بقلم زهراء سعد….
حــجــاب مــســتور!
إذا القلبُ في الإصرارِ لا يتوبُ
ولا تلكَ الفتاةُ تكفُّ عن الخطا
أذا العقلُ في الأهواءِ مغلوبُ
_لاا مو كالت راح اروح يم جيرانه حسبالي اجتي يمكم
_لا والله ما اجتي ولا وصلت لبنية
ترخص و طلع بقينه اني و امي واكفين مصدومين
سدت الباب و سمعنا اختي صاحت من فوك !
فوراً اجه ابالي ابوية لزمت الدرج اريد اصعد و كفت هي و وجهه احمر أشرت على فوك. ..
_رضيية وينج تعالي شوفي وين راح
باوعت الامي بقلق: معقولة مسويلها شي ؟
وكفت كدامي بقلة حيلة تعصر بأيدها ،:هل ولد مو راحة
امها شلون عافته و لسه ما رجعت
سمارة: عوفن الحجي هذا والله لو كاتلها لو يريد يكتلها لان ديفتر على جوارين و بيدة توثية اكيد يريد يضيع شاش و يكول شردت ميكول كتلتها
المفروض واحد يلزمه يفضحة و يكسرهه بهاي التوثية يلي شايلة
ام رضية: شمدريج شايل توثية؟
سمارة: جنت اباوع من الشباج الفوك
ام رضية: لج انتي شنو تردين تسويلي اطلابه من اطلاباتج؟؟
شلون فاتحة شعرج و كاعدة تباوعين ما كفن مصايبج؟!
رضية: يمه كافي هسه تسدة
ام رضية: شتسد بعد هسه لو احد شايفه شكلها مخبلة ماعدها عقل شيكولون اصلا علينا مصارلهم يومين و كاعدين مكابلين الشارع منو طالع و منو
تخوصرت و هي تهز بأيدها
سمارة:ايي وشنو يعني بذاك بيتنه هم جنت افتح الباب و نكعد برا اشو ما جنتي تحجين
ام رضية:ذاك البيت وحد و هذا واحد اليوم احنا كاعدين بنص جوارين ماعدهم ابنية تمد اصبعه مو تمد راسها و حجاب مستور ماكوو على راسها
_اكررهه الكعده بهيج مناطق ما اكدر انحبس شورطني اني و سمعت كلامكم و اجينه لهنا
والله يا الله
_ اهاا ما عاجبج، أشرت على الباب. ذاك الشارع روحي اشتغلي شغل عماتج و عمامج و خلي بأيدج فلوس و اكعدي بالمنطقة يلي تعجبج اذا الكعدة هنا متوالمج والله انتي عليمن تطلعين تربيتهم انتي مو تربيتي.
انتي من عرگهم شلون متشبهيهم.. مو صوجن صوجي اني يلي سوووويت المستحييل حتى اخليجن تعيشن هنا تعيشن بمكان مستور يلفيجن و يخلولجن قدر و مكانه
_وليش تقارنيني بيهم مو تكولين انتن تربيتي لعد ليش تعيرينه كلما حجيت لو طلبت شغلة ترجعيني الاصلي و ترجعيني لذيج الديرة الوصخة لا منهم ولا من دمهم، اما على الكعد تذكري اني بفلوسي و بتعبي جبتج هنا
ردت علية بعصبية: من طلايبج مدري شسويتي و اجيتي تركضين بذيج ليلة بس شردوني تصيحين
اذكرج لو نسيتي لو بس فالحة يمي تطلبين
سمارة: منو يطلب! اني اطلب هه يمه اني ما طلبت غير حقي،حقي اكعد بمكان شريف اكدر اكول اني منين مو استحي و اخجل منه مثل ما اخجل من تربيتي يلي ما اكدر اتقبلها، خلتني اتغير خلتني اكرهه روحي من اشوف هذا شعنده و احسد هذا
خليتوني اكرهه روحي اتمنى اموت الف موته باليوم
خليتوني اعيش بخيالي و اعيش عيشة ناس هم بخيالي، شعندي اني منكم شنو انطيتوني انتو؟
يمه طلعو بطفولة يشترون العاب لجهالهم يلعبون بيها
انتو شنطيتوني؟؟
عمتي خلت بأيدي لعابة قماش بيها أبر جنت احبها
بعدين طلعت سحر تسوي للعالم سحر و جن
شنو ذبي عيشتوني بعيشتكم الوضخة شذنبي!!
و هسه من طلعت من الطريق هسه من مشيت اعوج
كلتي تربية عماتج ليش انتي وين جنتي؟
تربين رضية و اخوها لعد اني منو الي؟
كلكم فكرتو بنفسكم و بأغلاطي بس منو بيكم احتواني ليش جاااين هسه تحاسبوني
اي غلطت اني انيي كلي غلط من راسي لحد اصابيع رجلي كلي غلط بغلط و طامسة بنص الغلط
تعرفين شنو جنت اشتغل اني؟؟
تعرفين شعاشرت اني
تعرفين عاشرت النذل و الوصخ و العاق و الدنيء
انتي تعرفين محد بيهم جان زين و رحم بحالي
انتو الوحيدين لا تكولولي شنو غلطج لان مالكم حق بهاي عيشتوني بعين فارغة بعين اتمنى أمليها
و هسه ترفعين صوتج و تكولين تربية عماتج!
ولو ما أتقارن بوصاختهم بس وصخة اني مثلهم
يمه اني حيييل وصخة
انهاريت و احس كلبي مجمر منهم احس خلصت طاقتي وياهم.. طول الوقت تعيرني
الوصخة تربية عماتج
بس لا تنسين يمه تربية عماتي يلي تحجين عليهن
هي يلي خلتج تكعدين بيت بيوم من الايام
و هي خلتج اطلعين من مستنقع القذارة
و بسببها كعدتنه هناا، دباعي وين كاعدين
بحسينية ناس تصلي بيها ، وحنا بح، صفكت أيدي و كملت .. لا صلاة و عبادة خلف الله عليج انتي تصلين
وله احنا لا احنا غجر هيج تعلمت كلما وكفت كبال السجادة يضحكون علية .. وينج وين الصلاة
ذاك اليوم تتمركصيين ويه عماتج
و اليوم تردين تصلين!! كبرت و صرت استحي من نفسي اذا فكرت بيوم اصلي
جنت اركص صحيح بس والله جنت اصرف عليكم
جان الي ايد بسحر بس والله مالي علاقة و ماعرف ليش عمتي نوال جانت تروح للمگابر و تاخذني وياها
جنت طفلة بس جنت المهم اجيب افلوس و اصرف عليكم و هسه تعيرني تربية عماتج!
ايي يمه لا تستغربين ترا احنا مستوانا بالگاع لاا لا اعتذر احنا جوا الگاع بشوية
اذكرج شنو تاريخنه المشرف البطولي؟ قبل السقوط يعني من يطلبون نسوانه حتى يركصن و المتعرف تركص لازم تغني ذاك اليوم يالة حصلنه الجنسية
اسمي بالكوة اكتبة حتى دراسة مثل العالم مادرست
اتمنى لو ماخلفتوني و خليتوني اعيش بهيج عالم
بهيج اسم و كنية حرمتوني من ابسط حقوقي. بس تعرفين شنو المفروض تفتخرين بينه احنا مو مثلهم احنا عليج طالعين ننسب كنيتنه الج مو الابوية
لو ما انتي امي و انتي علمتينه جان تعرفيين اني وين هسه؟ بس صدكيني يا يمة اني مو مثلهم…. لو مثلهم جان صرت محترفة
بالجدوه ، جان لسه كاعدة بذيج المنطقة ماكو بشر يسأل علينا
بس انتووو هذا تفكيركم المفروض اني اسمي تفكيركم الوص*
قاطعتها بصراخ
رضية:سمارة كافي كاااافي شجاج احترمي امي على الاقل ، تحجين على نفسج على اساس احنا الحياتنه وردية … امي شافت انواع القهر فسبيل تجيبنه و تكعدنه اهنا و انتي حضرتج تردين ونسة و طلعة والله شنو حرمتوني! !! لج هذا هم كلام تحجين بي؟
سمارة :شوفي عزيزتي المذلولة لا انتي عشتي يلي اني عشته ولا شفتي شي شسويتي مثلا احجي شسويتي؟كنستي شكم بيت؟ مسحتي غسلتي بس ذني سويتيهن؟؟ و جاية تحجين و تكولين احترمي؟
اني اشوف و نختصر حياتنه المذلولة كلها
نشوفلنه شغلة اطلع افلوس بهزة خصر منا لف شعر منا احسن من عل عيشة مو صح كلامي يمه؟
مسحت دموعي و رضية بعدها تباوعلي بكل حقد
على كل حرف طلع مني.
مو انكر و اكول مو قصدي لا قصدي
بس لان كرهت حياتي وياهم كرهت عيشتي كلها.
بسببهم خلفوني و شمروني بنص الزبل و تعالي يا علانه تأقلمي!
باوعت الأمي عيونه تصب دموع
كعدت بالگاع بكل انكساراتها ما وصلت لهاية الكسرة
احس كلبي مقبوض، و خايفة بنفس الوقت
محد يعرف شضامة لسه محد بيهم فهمني و عرف حجم عذابي
لسه محد يعرف شصار بذيج ليلة السودة يلي عشته
يلي ارتكبته بين ايدي
كل المح صورته كبالي اكرهه احقد علي اكثر
ما اكول غير الله يلعنه بكل لحظة عيشني بجذب
حتى يمشي مصالحة
صارت عيني بعين رضية و هي حاضنه امي و تبوس بايدها
لو تعرف اختها شسوت شلون راح تباوع بخلقتي
اتمنى يوم يطردوني حتى ما اشوفهم ما اريدهم حتى يعرفون شسويت بحياتي
ضغطت على نفسي و حجيت العبارة يلي كسرت كل لحظة حلوة بحياتي..
_ اخ لو الحياة جانت بأيدي والله ما اختاريتكم تصيرون اهلي !!
درت وجهي اريد اصعد و أنصدم.
رفعت راسي ابوية واكف ع اخر باية من الدرج و عيونه تحجي حجم الانكسارات بعد كل الكلام يلي سمعه مني هسه عرفت ليش رضية جانت تحاول تسكتني
بالحظتها
تمنيت اروح اركض و احضنة و اكلة لا تضوج مني بوية والله مو قصدي اكسرك بهل كلام بداخلي نارر جمرة
جمدت والله بالحظتها استحيييت ارفع عيني بعينه
و خصوصا حبيبي ادري بي ميكدر يتحرك بسبب الحدبة يلي بظهرة
عيونه جانت تتجه على مكان واحد بس يلي هو ..سمارة
ضليت بسمرة بمكاني لابية اصعد ولا اترجع و انزل
نزلت عيوني منه استحيت احط عيني بعينه
جاوبني بكلمات متقطعه تحجي عن قهرة و ألم و ندم
_اسف…بوية سمارة، بكد ما جذبت على امكم حرمتكم!
نزل اول باية ألتفت رجلة بدشداشته و ما احس غير سندنه الاخير ع الارض و سبحان بدمة حاولت سمارة تركض و تلزمة بس وكعته قوية صارت على راسة
لفظ اخر انفاس و عينه تحوم حولينه و استقرت بعين سمارة
بعدها سمعنا شخيرة عالية و انغلقت
عيونه الى الابد
لحظات انهت كلشي .. اخخ ياااشمعة بيتي شلون يهون علية اعيد بقصتك شلون ارجع و اتخيل وكعدتك و نومتك اخخ يا اخر سند النه
جمدت تحس عيوني تريد تطلع من مكانها
اريدة يفتح عينه بس اريدة يفتح عينه
منووو! اني انيي بوووية تموت بسببيي بوووية
ابوس ايدك بس اسمعني لأخر مرة والله لو تسمعني
متنقهر على حالييي بوية الله يخليك اني ابنيتك سمارة
بس فتح عيونك هسه احجيلك كلشي والله هسه احجيلك
خفت فجأة و ابتعدت احس رجلي بعد متحملني
سمعت صوت صراخ رضية من وراية
رضية: ب..باباتي ياابة لك بوية ابوس ايدك بس فتح عيونك
بووويية اخ ياربي اخذ روحي و رجعلنه ابوية
ياربي لا تختبر صبرنه بأبوية ياااا ربييييي اخذت منه عريسس بقيلنه سگف بيتنه
خليت راسه بحضني و الطم على وجهي بوووية
حبيبي ابوية رااااح ،صرخاتنه يلي تطلع من وسط كل قهر عشنا اليوم عرفنه مااكو قهر بهل دنيا غير كسرتنه بأبونه
كلشي نسينه ما نريد شي، نحمد ربي على كل عذابنه بس ابوية اريد يرجعلنه حضنته بقوة بكفوف ايدي و ضميته بحضني
صرت احجي وياه مثل المخبلة ،حبيبي بابا ابوية حارسنه و سگف بيتنه ماعدنه غيرك بس فتح عيونك
حاجيني بوية على الاقل حاجيني، بووووية بوووووية
بوووية بس رد علية بوووية
بهل نقطة وصلنه مرحلة فقدان الوعي بوجود الوعي
ايي ايي هيج وصلنه ابوية يموت واني اضل عايشة
امي تبوسة من ايدة و تلطم بكل قوة على راسها
وجهة تزلغ جلدها صار بأضافيرها
حالة امي ما وصلت الها بحياته حتى بوفاة اخوية!!!
درت وجهي على الجانب الثاني سمارة
وجهة مشحوب اصفرررررر عيونه صلبة قوية ما كدرت ترمش ضلت واكفة تشوف ابوية من بعيد و اخطواته ترجع ليورا
فتحت الباب و طلعت ، رفعت ايدها و دكت على صدرها بثنين ايدها كل ما عدها قوة
مشت لشارع و هي تلطم اختف من انظاري بعد ما سمعت صوت رج أذني رج صوتها عااالي مثل كليوم بس اول مرة اسمع نبرت صوتها بعد موتت ابونه
احس صوت صراخها مو صوت عادي لاا لا مستحيل و قليل بشنو اوصفة سمارة اعلنت حزنها أعلنت قهرها بطريقة خوفتنه منها كلنا
جانت مثل الوحش الهائج جانت بحاله ممكن ترعب كل يلي يشوفه
جانت بحالة تبجي من القهر
امي شبه فاقدة الى الان و اني منيمته بحضني و احجي وياه و مادرينا شصار بفرعنا الثالث!!
_ اعلان جريمة!! اني انييي كتلته ابووووية ابوووويةة
اني كتلته ابوووية ماااات مااات ابوية ماااات شفتو اني كتلته
باوع هذاك هذاك بيتنه …لا تشرررررد مني شوووفني ابوية مات اني اني كتلت ابووووية
راحت على مرة تمشي بالفرع كمشت ايدها و تبوسه
جيبيلي ابوية الله خيليج راجعيلي ابوية
هذاك هذاك ابوية هنا مااات مااات ابوية مااات
اني كتلت ابوية
ابوية مااات بسببي!!!!
تربعت بالگاع نمت على تراب صرت مثل المخبلة لزمت شعري و اجرررره بأيدي كلمت عدي قوة وصلت مرحلة اجره جررر بأيدي اوگع خصل
اجر شعري و اركع راسي بالگاع
مافهم شجنت اسوي بس ابوية مااات كدامي مخبلة اني اني كتلت ابوية بعد كل يلي سوووا علمودي
اني مو انسانه تستاهل الرحمة اصيييح ولكم اكتلوووونييييي مااات ابوووووية مجررررمة مجررررررمة اني كتلت ابووويةة
وكفتني هاي المرة و لزمت أيدي كل ماعدها قوة
ولج يمه حرررام عليج شكاعد تسوووي
حد يوومة هذا
لا لا لاا اني مجرمة اني كتلت ابووووية اني انييييي
ياا الله اخذنييي بوووووية اسمعني بوووووية
_استغفرلله ولا حول ولاقوة إلا بالله
محممممددد ولك ويييينك روح جيب من البيت حجاب عباية خلي تستر نفسهااا
راح طفل يطلع بسادس ابتدائي يركض للبيت
كمشت ايدها و دفعتهن و طلعت اركض و اصييح
ياااا ناااس اني مجرمة اني كتلت ابوية
صيييح و الطم على وجهي و صدري
بنص الشارع و الزم واكفة تباوعلي و اني افتر و اصيح
و صلت للشارع الثاني و الناس تركض وراية
_اسمع شباب يكولون خطية تخبلت
_هذولي حرااااس الحسينية
_ولك دجيبها دجيبها ططببها للبيت فضحت نفسهاا
_ياابة يا تسون خيير يا لتضلون فاكيين حلوگم البنية فاقدة ابوهاا مات هسه الناس شالووو و طلعوو
ولا همني يلي همني هو الركض اركض ايي اني اريد اشرد بس لوين؟ مادري اني اركض بين النااس و اعبررر الشاارع
هيييي انت وكف ابو البيكم البنية راااح تدعمهااا
عبرت الشارع باول خطوتين
حسييت السيارة راح تدخل بعماقي و تطشر اخر نقاط دم باقية بيها
فتحت ايدي و استقبلت الموت برحبة صدر هوووى عااالي كفخ وجهي صررااخ، عالي، عركة!
فتحت العيوني ركزت على سيارة عبرتني حاول يسيطر عليها بسبب السرعة انضرب بعمود الكهرباء!
نزل الجامة و هو نازل علية غلط وحدة ورا الثانية
فتح باب السيارة اجه راد يضربني على وجهييي بالحظات بس صاحوو علي
يمعود لبنية فاقدة ماعليها عتب ابوها توه ميت
اجو يمي تلاثة شباب ما اعرفهم
باوع عليهم و صاح: ماعرفتو تجروها من الشارع واكفين و فاكيين حلوگتگم الجااايفة انتووو متشوفوهاا
ذبت نفسها على سيارة لوو كاتلة و طالع هسهه منو يتحمل خطيتها!!!!
_خوية ماكدرنه عليه من ذلك الشارع نركض وراها لسه من مكان المكان فاااقدة ابوها ماات و هي مثل المخبلة، ذولي توهم نازليين جدد بالمنطقة هو اخنا شنعرف عنهم
باوعلي بخوف و استغراب رجع على سيارة مالته
كمشوني الولد من ايدي و صارو يسحلون بيها حتى اوخر من الشارع و اني اصييح
ولك بووووية وويييين عفتني بووووووية
سودة بوجهي بوية اني كتلتك اخخ بوووية اخخخ يكسرتي
_يمعودة دمشي شكد عظمج ثكيييل
رجع يمي سمعت صوته وراية :عوفها عوفها
شمر علية شماغ احمر
و طلب منهم يساعدو و يخلوني بسيارته
كل هذا و التدفع و الغلط واني فاااقدة بمعنى الكلمة ماعرف وين رحت لا ما اعرف اني منو. وشصار بية
ماعرف ليش ابوية مات بس اكو حرگة بكلبي حرگة تچوي والله احس بألم احس ألم حار يچوي اعظامي
كرفست نفسي و ابجي ووييينك بوووية بس تعال احجي وياك ما اريد شي ابوية راح يناس سمعوني
اني كتلت ابوية…
لا إله إلا الله محمد رسول الله …
هي اكثر جملة ترددت بذاك اليوم ..
رضية _ بعد ما انفتح الباب بكل قوووة طبو الجوارين لفو ابوية بالبطانية و اخذو وسط صريخي و عتابي … و امي لبست عباته و راحت تركض وراهم كرفست نفسي
و اني اندب بروحي اخ منج يا سمارة اخر منج شسمعتي ابوية باخر يومه
بنفس هاي الحظات بهذا الوقت الصعب اجتنه اقوى عاصفة السودة
يلي راح تحدب ظهرنه ويه كسرة ابونه
طبت سمارة ترجف و الوجهة اصفر و اكو رجال وياها ساندها من كتفها بثنين أيده
لافه بشماغ احمر لان هي طلعت بدون حجاب تركض
شافتني جرت نفسها جر و اجتي خلت راسها بحضني و هي تصرخ
مااااات مووو ابوووية مااات استهترت و صارت تملخ بشعرها كوة ضليت لازمته
فوك قهري و كسرتي صارت حمل ثگيل عليية شلون اهديها شسويها هاي يلي صارت مثل المخبلة و تأذي بنفسها
بأي طريقة تريد بس تعذب نفسها و تخرمش بوجها
جان بعده واكف عين علينه و عين على دم يلي تارس
المكان
طبن النسوان و متعجبات من حالنه كعدن يسألن شلون مات و من جوا ليجوا يبوعن على سمارة
و هاي بس تسمع سالفة تزيد ما تنقص و محد كعد يمها يبرد كلبها
واني الحيلي رايح ماكدرت اوكف و سند نفسي
ولا بية اروح اكعد يمها و احجي وياه..
درت وجهي و انصدمت هذا شعنده واكف هنا
منو هذا النوب!
باوعلي و أشر بأيده عليها، بس مافهمت الشي و النسوان صارن حوالينه
ورا عشر دقايق بدت الناس تسلم و تطلع
و احنا على مكانه اختي واكفة تلطم واني ابمكاني ابجي لان حيييل مابقة بيه بعد
انتهت ماكو راح يمكن يطلع ورا مادرت وجهي عنه
جريتها لحضني و ابجي و ريحية الدم تحجي كلشي
دمها يلي اختلط ويه دموعها و دم ابوية يلي بعده بالگاع
..مرت علينا ساعات ماكو ابشع منها ضميت راسي بكفوف سمارة و اني اتذكر تؤامي حبيبي و اخوية
اويليي عليك يخوية اويلي عليك يل قتيل اويلي
على عريس يلي راح ضحية لهمجيية ناس مجرمين
ناس جهلة صرخت بعلو صوتي بأسمه اتمنى وجودة يمي اليوم اريده يرفعلي ضهري و يكلي لا تنسكرين
اريده ارجع احجي وياه و اسمع صوته اريد ارجع الذاك اليوم و اطش جلكيت على فرشت عرسه
سكتت اشهك بدوون صوت رفعت راسي اباوع عليها
عيونها بعدها معلقة على درج مسحت دموعها
_سمارة باوعلي خيتي باوعلي…. ليش ساكته!!
كابليني و ابجي لا تصفنين
سماااارة لا تموتيني سمارة ماعندي غيرج صفيت بلا اخ ولا اب
رفعت ايدها كلهن دم باوعتلي بعيون ذبلانه
_بأيدي كتلتهم! اني مجرمة؟
اني… اني الله خلقني حتى اكتل يلي احبهم
اني انسانه مجرمة قاتلة ليش الله ليش يريد يخليني اعيش
ليش ما متت ابدال ابوية..
_اشش كاافي كاافي لا تحجين شي كاافي كاافي
_ليش عمامي ما كتلوني الية ليش كتلو اخوية
بذاك اليوم اخوية شعلي؟
سديت حلكها بأيدي واني اشهك
تحجين صدك تردين ترجعين تنذليييين!! لج تعرفرين
ابوية شسوا علمودنه
كل هل قهر و تحمل المرض و سكت على موتت ابنه في سبيل ميخلينا
نذل نفسنه الاحد و نطلب من المجرمين يلي حولينا
حتى نكدر نشرد بليلة ضلمة و نعيش ابيت مستور بعيدا عنهم و عن حقدهم و عن طمعهم فوك الفقر يلي عايشينه!!
ف أسكتي احسن الج… و لا تسمعين العالم علينا
سمارة عاشت بجحيم منفرد يتغلغل بعذاب ضميرها
جوارينة و اهل الحسينية اجونه للبيت طاقة ما ماعندي اوكف استقبل و أضيف مثل كل مرة احس روحي مكسورة منهارة جمرة غايب ما غابت علينا شلون بينة
و هسه ابوية راح منو ألنه وين راح ننطي وجهنه
ساعات دخلت امي مفرفحة روحها من البجي
و الكسرة الجبيرة من دخلو ابوية وراها بتابوت أخ يابوية يا كسرتي بيك وكفنه تلگينا ابوية سمارة ما صبرت اكثر و ذبت نفسها على تابوت
وصلت المرحلة من الهلگان بس دموعي تنزل و أيدي
على سمارة اريد أوخرها لان يردون يشلون التابوت بس
هي وقتها جانت منهارة اكثر مني لان اخر كلمة حجاها والدي بسببها و بسببها و كف ابوية يسمع كلامها يلي
جان ينزل مثل السم و بسببها ابوية راد ينزل و مات
ورا موت اخونه ابونه صار ألنه عون و سند صار يفهمنا و يسمنه من نشكيلة خوفنا من عمامنه
صار يحس بوجعنا من يجبرونه نمد أيدنه و نطلب من العالم فلوس حتى يعيشون بيهم صار يحس بذلتنه
من النسوان تطلع للگدية و الزلم تنام بالبيت بدون عمل
لان محد يقبل يشغلهم بسبب همه غجر!
مطرودين من كل حق و اني مثلهم! مثل ما جانو السبب بقتل اخونه
سمعت النسوان تصيح ورا اختي و هي تركض لشارع ورا التابوت تريد تروح وياهم للوادي، سمارة تعلمت على الأختلاط ميهمه احد شخصيتها اقوى مني و متخاف بس هذا عنادها دائما يأذيها و يكسرها
و ترجع تعاند نفسها و تأذي روحها لهذا امي تفرض عليها
الشغل و الحجاب و الطلعة ممنوع عليها حتى من جان
ياس عايش الله يرحمه، ورا ما طلعت حاولت اسحب
اختي و اخليها تدخل بس فشلت جانت منهارة و تبجي و تطلب من ابوية يسامحها
واحد من المنطقة يصحوله ابو ضياء طبك سيارته كية. يمنه و كال اصعدوها اني اخذكم للوادي،
صعدناها اني و امي و نص الجوارين النسوان هم صعدت ويانه، باوعت الأمي مغطية وجها بالعباية
و تلطم بخفوت بس اسمع صوت الطلم على صدرها و راسها شكد عالي
حتى رجلها ما عانتها تنزل و تشوف اخر لحظة من رفيق دربها لطول هاي السنين ولا اني كلبي انطاني
انزل و ما اعينها بلطمتها و حزنها، سمارة مثل المجنونه
نزلت يم القبر تصرخ و تبجي نار شعلت بكلبها و كلما صاحت صوته صار يتراجع و شفايفها تفطرت
و وجها صار احمر مثل الدم بلون شعرها خصوصا هي بيها داء الوردية
خلصت الدفنه و رجعنا للبيت وقتها جوارينه يعرفون بحالتنه و بوضعنا لمو ابيناتهم و سوو العشة
الزلم اجتمعو بالحسينية الطابق الاول و النسوان همزين ما اجو بسبب مكانه فوك غرفة وحده صغيرة و الثانية مسويها مخزن يعني ماعدنه مكان الاحد
اسوء و اصعب ليلة مرة علينا بذاك اليوم محفورة بذاكرتي و مستحيل تروح اي تفاصيل منها …
~~~
بين طفلة و سجانّ جبان
واقفه امامه بأنحناء …
جنت واكفة اكباله و هو كاعد على قنفه منحني راسه
و بأيدة حزام البطرون
و اني كل نظري يتجه نحو هذا الجلاد . رفعت أيدي اتلمس جسمي احس بألم كل ضربة راح يضربه الي بجديد
باوعلي و عيونه حمررة مثل لباية الجمرة
حجه من بين اسنونه، شوصلج للمدرسة يساق※
نزلت دموعي برجاء و اني اتقرب بأنحناء حتى المس ساقه.. ما اسويها والله ما اسوية بعد
كام على حيلة و صفكني بضربة خلاني اطفر بمكاني
و ابجي، فر أيدي بقوة و قربني يم وجهة احسه رفعني من على گاع بكد ما اني ضعيفة و كصيرة
_ طبيت و عمي واكف يمج! شكتيلة علية ليش واكف و يخنز بوجهييي…
شهكت بصوووت عالي بألم
اششش
اشش
صووت ما اسمعلج
كااافي لا تضلييت تصرخيين بأذني
جاوبي بدوون هل نعثلات متمشي علية
_والله والله ما كتلة هو شافني اركض كتلة اريد اروح اشوف صديقاتي بس بس هيج والله
دفعني بالگاع بكل قوته
_تشوفين صديقاتج مو؟ ترحيين يوم الجمعة تشوفيهن
_عمي هم هيج سألني و كتلة مادري نسيت
كلي تعالي اوصلج بس ما قبلت و انت اجيت بعدييين
فرك شعرة بكل قوة
_الكدامج اهبل مو؟ خمس ساعات انتي مو بالبيت وووووين جنتي
رفع لحزام و ضربني على ضهري بكل ماعندة قوة
_تانگي والله بتانكي المتروك فوك السطح
توه راد يضربني سمعنا صوت من برا،، انفتح الباب الخارجي
شالني من كصيبتي، هددني و هو يحجي ابين اسنونه اسمعيني ولج تطبين هسه بالغرفة و تسوين نفسج نايمة لو حجيتي لو أشرتي أقضي عليج و محمد! مفهووووم،، اشرت براسي اي
دفعني للگاع فتحت الباب جريت البطانية و ايدي ترجف
لفيت نفسي و نمت او بالأحرى مثلت النوم خليت البطانية على جسمي احس بألم مو طبيعي يحركني حرك
اجتي يمي و همست قريب من راسي
_ رمانه، اني شردت من البيت و كلت العمي يجي وراج و كتلة يوسف يكتل بيج
و كلي اني اجي و أربي هسه يجي عمي و يطرده من البيت لا تخافين
نزلت دموعي بحرگة و قلت حيلة
سحبت ايدي و خليتها على أذني جنت كاررهه اسمع اسمه مو اسمع صوته و هو يحجي ويه ابوية
ضلت دموعي تجري و ما حسيت بنفسي و اني اغفي
رجعت لنقطة البداية..
اول ما رجعت للبيت و شفته يصيح و يتعارك ويه امي
لزمني من كصيبتي و جرني صااح بوجهي بتهديد..!!!
يوسف: شعندج براااا ام المصاايب، لج اليوم اذا ما طينت حياتج بالطيين اطلع كلب ابن سطعش كوا※
حاولت اسحب نفسي ما احس غير راشدي فرني فر
اجتي امي تركض دفعته عني و اشرتلي اطب جو اركض
رفضت و بقيت مصره تجي وياية
سحلني من ايدها و كلها: ديلا مو تردين ترحين روحي هاي بتج تبقها هنا
_ولك انت و ابوك علية عووف الطفلة
_هاي طفلة هاااي طفلة
رب الشيطنة و الاستهتار
طبييي جووا كداميي لا اكسر راسج
فتح الباب و شمرني على طارمة و رجع قفل الباب ورا
سمعت امي تحجي و تصيح بعدها سمعت كال
(كااافي صيياح الناس ألتمت علينا)
_خايف من شكم واحد يسمع صوتي بس ما خفت ابوك ينفضح و هو يومية يم الكح**
مو اذا صورنه و نشرنه وووين ننطي وجهنا بين الوادم
_ بس هسه محد يدري طبي جوا اذا شافونه نصير علج بحلوك الناس…. و لا تصدكين ترا رمانه طفلة
شمفهمها هاي كل شغلتها تودي حجي و تجيب حجي
_لالاااا بتي واني اعرفه متجذب كالت شفت ابوية يعني شافته صدك و هل شي مو جديد على ابوك حتى ما اصدك، شنو ناسي شنو جان يسوي بية
اني اليوم ما ارجع اذا ما اجيب اخوتي بعد همه يتفاهمون وياه.. حاولت وياه بكل الطرق ما فاد بي
_هاي شغلتجن النسوان تندعن من الله حتى تعرفن شي و تكبرن المصيبة
تردين ترحين روحي اني مالي علاقة يجي ابوية و احجيله الصار
_شتريد تكول كول.، اني ما ابقى دقيقة بالبيت بعد
دارت وجهة و راحت،
انفتح الباب و طب هو عصبي وجهة ميتفسر خفت منه و رحت ورا البيت اركض
ختلت حتى ما يكتلني مديت. راسي من ورا البيت شفته كامل بأيدة بوري و كاعد يم الباب حتى بس اطلع يكتلني
ضليت كاعدة جوا الشمس بالساعة كاملة يطب بس ما اتحرك من مكانه لحد ما اجه سجاد كلة كوم التلفزون وكف بعد ميشتغل
بس شفته طب ركضت ع درج الخارجي هو هذا الوحيد يلي يصعدنه ع سطح باوعت ماكو مكان اختل بي
ردت انزل سمعته يكول لسجاد راح اصعد احرك الاشارة من فوك
ماعندي حل غير ختلت ابطن التانگي مال المي خليت القبق الاسود مال التانكي هيج تشكيلة لان ماكدرت اسدة اكثر صوتهم قرب
هدأت بدون صوت و حركة و تنفسي صار بطيئ و ثگل حتى ميحسون صعد يوسف اسمع يحرك بالأشارة و يصيح ع سجاد يسألة اذا اشتغل
اخر شي خلة الصحن بوضعية مختلفة و ثبته على قاعدة عليها ابلوكات اثنين و بعدها نزل
ضليت كاعدة فوك مترددة اخاف انزل و يكتلني اخاف ابقى اكثر
شوية و سمعت صوت اخواني كلهم يصحولي خنست بعد بزايد
يوسف ضل يمشي بالبيت و يهدد حتى اطلعله و اخواني كلهم يدورون علية
كمت ارجف من الخوف و الهوى صار قليل كوة اتنفس ختنگت
سمعت صار هدوء برا رفعت ايدي وكعت القبق مال التانگي و بعد محاولات بأت بالفشل كدرت اطلع بعد ما ايدي انشكت بالبوري مال المي
مديت راسي، ماكو احد نزلت من الدرج و كبل لشارع اركض بس وين اروح مادري خايفة اخر شي فكرت اروح للبيت يلي ابوية جان بي اكيد هو رج هناك
ماكدرت اروح لعمامي اخاف يوسف يطلع هناك
و بيت جدو اهل امي بعيدين علينا
بقيت امشي بشارع حافي ملابسي كلهن تراب و بس ابجي اخاف احس كل اعظام جسمي ترجف
وصلت للمدرسة ألهث من التعب باوعت على بيت من بعيد الباب مقفول وين اروح ابهاي الحالة
حاولت افتح باب المدرسة ما كدرت كعدت يم الباب ابجي
مسحت ادموعي توني ردت ارجع جان اشوف عمي ابو عبدالله واكف يحجي ويه رجال قريب لعمرة
بس هو يحجي و يباوعلي، جمدت بمكاني و ضليت كاعدة
راح الرجال شفته طلع تلفونه و خابر عشر دقايق و عبر الشارع و وكف يمي مستغرب سألني: اها ولج شجابج هنا
_باوعت ع باب المدرسة كتلة
اتفقت اني و صديقاتي نجي هنا بس لسة ما اجن يمكن
_هو منو يطلع بالعطلة، و بعدين ليش هيج ملابسج مشگگه و كلها تراب هاي وين جنتي امج اخوانج وين
_عمو وگعت و دمرت ، هسه ارجع وياك لا تكول ألهم
_المن اكول، شبيج ترجفين، امج شلون تخليج تطلعين بهيج ملابس لازكات ع جسمج و شعرج نصه طالع
شكو شصايرر؟ شمسوية من دكة و جاية تركضيين
_ لا عمو بس صديقاتي اجيت اشوفهن
حجيته مأيسة عرفت مراح يصدكني و عرف ما اكدر أختل يمة و اخلي يحميني
كمش ايدي بقوة و أشر بأيدة بمعنى تعال
درت وجهي شفت يوسف اجاني مسحت دموعي
كلت انتهيت!
باوعلي عاصر وجهة و عيونه ما تحركت عني
تقرب مني و سحبني بكل قوته،
عاصفتهم كعاصفةِ أراث
نارٌ تُطفئُ النارَ
جريمة! أولُها جنونٌ
وآخرُها في سجن السلطان!
_فتحت عيوني على صوت عالي رفعت راسي اباوع
عيوني مغوشة ركزت ع سمارة بعدها حاضنة أيد امي غافية و وجهة مخرمش و الدم جامد على وجهه
فركت عيوني بقوة، سمعت صوت قوي مثل كأنما ديكسرون الباب طفرت من مكاني رحت اركض على شباج
لا حول ولا قوة إلا بالله
يمه يمه الحكيلنه… يمه
ولج يمة العساكر تراسة بيتنه!
كعدت مفزوعة ترجف و تسألني
_احجي ولج اشبيج
_مادري مادري والله بس شوفي هذولي العساكر كلهم ملتمين اباب بيتنه، كعدت على صوتهم و همه يكسرون بالباب
_لا يا ابو فاضل اوكف النه ضلينه بلا كفيييل
كامت من مكانها تلبس حجابها و لفة العباية
باوعت السمارة صارت ترجف و دموعها مثل الشلال
تنزل تراجعت ورا و كفت نفسها بخوف
طلعت امي و هي تنتچي على حايط رجليها متعينه
و الباب ما وكف لحظة بكد ما يدفعون بي حتى ينكسر الجام كله واكع باقي بس الحديد
صاحت امي عليهم
_فتحت فتحت الباب، ولكم يمة استرو على شيباتي
حجته و الغصة ابلعومها
فتحت الباب و طبو اطشرو الاستبقال بثواني
جريت الحجاب و لبسته و شمرت واحد على سمارة
بس ما لبسته بقت تبجي
حجة واحد بيهم مبين عمرة ٤٥ سنة
_شلونج يمة مركز الشرطة يلي بالمستشفى بلغتنه على جريمة قتل صارت بالبيت اريد الكل يجي ع تحقيق بين ما يتم الكشف على جريمة
لطمت امي على خدها بكل ماعدها قوة
_لا يمة لا كول غيرها اني جنت واكفة يم الدكاترة من كتبو التقرير وكعة درج و الضربة صارت براسة
ابونه وكع من هذا الدرج و هذا دمه من الصبح لسه ما صعدنه فوك ولا اجينه لهذا المكان
و روح ابني شهيدي لا صارت جريمة ولا النه علاقة بشي
_ميخالف أجرأئات لازم تجون للمركز بس تحقيق و انشوف الأدلة و بعدها تكدرون تطلعون
_ماعدنه غير هل مكان يمة استر علينه
_منو عايش هنا؟
_اني و بناتي الأثنين والله اسأل اهل المنطقة صوتهن ما طالع
_هو اكو تبليغ صار من المنطقة،
هسه انتو تعالو للمركز بدون مشاكل ويصير خير
كعدت امي تبجي كدامهم عسى و لعل يعفونه بس ابدا
اجتي امي للغرفة بعد ما طلبت منهم تلبس جواريبها و تبلغنا
و اجه واحد وراها واكف جرة عباتها جرني يم سمارة، صارت تلبسها الحجاب و تحجي ويانه بهمس
_ديرين بالجن تكولون غجر! اليسأل كولي على اسم عشيرتي جنه بالبصرة و اجينه الكربلا بسبب حالتنه المادية تأثرت
بعد ما اخونه استشهد بالأنفجار… عمامجن وين
ابوية تعارك وياهم ع الورث و عفناهم
سمعتوني زين ركزت على سمارة و كالتها: اطلعج يمة والله اطلعج ديري بالج ولا تخلين حجابج ينزل
شعرج بين الزلم ضمي حافظي على نفسج لو جان على الحساب موتج!
ساامعتني؟
هزت راسها بمعنى اي
دموعها غلغلت بعيونه و مو قليلة كسرة كلبي و خوفي شلون راح نطلع كدامهم
فوك موت ابوية الناس ما رحمتنه ماعرف منو هذا
الميخالف الله وبلغ علينا
تسترنه و طلعنا
طلعو الضباط كدامنه و اكو شكم واحد ورانه صعدونه بسيارة و اخذونه ع مركز عشر دقايق حسيناهن سنة من الخوف
وكفت السيارة و نزلنه طبونه بالمكتب جان اكو رجال جبير كاعد ورا المكتب طلب
امي تدخل وحدها و بعدها اني و وراها اختي بس بهل وقت كل وحدة بمكان ياخذون معلوماتنه مثل الاسم و العمر و النسب
دقايق وراها صاحاولي لان اني اكبر من اختي سمارة
دخلت للمكتب و رجل اطك برجل من الخوف كعدت بدون ما انطق بكلمة
دخل وراية الضابط ثاني سلم الملف و طلع
كلب بألأوراق و هو يباوعلي سألني
_شنو اسمج الكامل
_رضية حليم گطع
_البصرة.. جنه عايشين بالبصرة بعدها انتقلنا و طلعنا اجينه لكربلاء هنا استقرينه
_ليش اجيتو هنا؟
_ماعدنه مكان و جنه عايشين بالأجار ورا وفاة اخوية ماعدنه يلي يعينه انطرينه نجي و نكعد حراس بالحسينية
_اشو ماعدكم ولا مستمسك؟
_ قبل لا يموت اخوية جانت بي حالة نفسية و حرك البيت بس ضلت ويانه بس بطاقة السكن
_عدكم تقرير الأخوج
_لا هو من عرف بي حالة نفسية بعد ما راجعنا ضل يصيح و يكول مابية شي بعدها جاب نفط و حرك المكتبة و حرك نفسها كدرنه انطفي و نتلاحك علي بس المكتبة يلي بيها كل جناسينه راحت
_ وين جنتي من ابوج وكع
_كبالة واكفين انسوالف اني و امي و اختي راد يجي يمنه انلفت رجلة بدشداشة و عثر و وگع
_ضلينه حاضني و نبجي و طبو جوارينا شالو و اخذو للمستشفى
_هاي هية اطلعي
كلمتين حجاهن و وراها ماعرف شنو كتب
جريت نفسي و طلعت لكيت امي كاعدة على كرسي برا رحت كعدت يمها، دقايق و طببو اختي للمكتب
علقت ايدي بالباب و عيني تتجه ع الكرسي يلي راح اكعد علىّ رفع راسه و شافني بعدني واكفة
ذب القلم من أيدة و اشرلي اكعد
كعدت و كل ذرة بجسمي ترجف سألني اول سؤال
_:سمارة حليم گطع
_البصرة و سنكه كربلاء
_صار شكد بكربلاء
_ اسبوع تقريبا
_ليش تركتو البصرة
_بعد وفاة اخوية ماكو غيرة جان يعينه و حالتنه ادهورت و اجينه نعيش بحسينيه مو ملكنه
_شنو سبب وفاة اخوج و شنو اسمه
_ياس حليم طگع: حاله نفسية و انتحر و قبلها حرك نفسه و حرك البعض من مستمسكاتنه
_انتي واختج جنتو بالغرفة من وگع ابوج بس منو راح اول يشوفة
_لا لا جنه واكفين كدامة جوا الدرج
_بس ابوج لكينه على جثته بصمات تدل على شخص هو يلي دفعة
_لا لا لا والله هو وكع وحده
_ الاطباء بلغو على أثر تعذيب و عيون منتخفة يعني المرحوم جان يتعذب و يبجي
_سودة علية ابوية يبجي
نزلت دموعي بقلة حيلة اريد بس اسمع منه ابوية
شبي كلشي صار بسببي حسيت روحي راح ارجع انهار و احجي كلشي بس تماسكت روحي بأخر لحظة
تذكرت وكعته و عيونه انتهيييت بجيت بصوت خافت و اني همس
بوية كسرت ضهري يبوي شلون عفتني
مسحت ادموعي و رفعت راسي جان واكف بشك و يباوعلي مادري شنو كتب
و دك ع جرس بصفة دخل واحد سلم بأيدة الملف
أشر علية و كال أخذوه على تحقيق!
باوعتله برجاء: بس اني ما سويت شي اني ما أذيته بس…. بس هو سمع مني كلام مو حلو وضاج
ما سمع مني طلع و طبو أثنين ضباط جدد
و اكو وحده وياهم هم ضابط كمت على حيلي
صارت لمراية بوجهي و شعري احمر كله طالع
تذكرت كلام امي وهي توصيني بحجابي
كفيت شعري و لفيت نفسي اجتي لبنية لبستني لگلابجات و طلعت وياهم لمصير مجهول
شعوري مينوصف بعدد الكلمات خوفي و حقدي ع نفسي احس لسه ما انتهى و هاي مجرد البداية
البداية يلي دمرتني و دمرت كل فرد من عائلتي
هوية مزيفة تاريخ و وجود مزيف!
هم راح يجي يوم ينكشف كلشي؟
وصلت كبال الزنزانه و فتحو القضبان الاسود
هذا العقاب يتبع جريمة لشنو؟
دمار اخوية او موت ابوية؟
او هو؟
عذاب روحي يلي مستحييل تنغفر هاي ذنوبي
اني سمارة اسمي يوضح لوني يوضح لون كلبي
من اسمي مكتوب عنواني
خطت رجلي اليمين اول خطوة و دخلت لغرفة حيطانه رمادي ضليت اباوع على جدارن المكان
و اتذكرت كلمتها بنص الحفلة و اني افتر بتنورتي
أبتسامتي و ضحكتي جانت متعوفني
صاحت علية: اصبغي شعرج احمر يبت القريبة (الغريبة) يلوگلج مو بس تجيبين دم و تودي العماتج
درت وجهي عليها واني اباوع على تفاصيل ملامحها
جانت تباوعلي بكل حقد، رديت عليها: غاثج هل شعر
بس وسواد عيونج الصبح تلگي احمر بلون تنورتي بعد شتردين؟؟
_زمانج يربيج مو احنا يبت حلييم! مبيوعة يرخيصة
طول عمرج تبقين مبيوعة
ضحكت بصوت عالي احس بوقتي هذا بديت اسمع هاي الضحكة هسه بهذا الوقت كأني رجعت سنة ليورا كأنو ما عشت كل هذا
قطع تفكيري صوت القفل درت وجهي انغلق الباب
صار وقت جلد الذات!
(حـجـاب مـسـتور)
هو الشيء الحاجب عن الاشياء المرفوضة العلن تحت سيادتهم و قوانينهم
و الستر هو اسم لا يقرب لهم بشيء
هدية عيد الفطر للمتقاعدين: صرف معاشات أبريل 2025 وزيادة مميزة بالمبالغ
الجمعة العظيمة: اكتشف لماذا تسجد الكنيسة القبطية 400 مرة في طقوسها
رأس الحكمة نموذجا .. فرص جديدة على البحر الأحمر وطريق مطروح- السلوم ووسط القاهرة
الآن ~ موعد صلاة عيد الفطر في الخارجة 2025 حسب البحوث الفلكية
مراجعة سماعات الرأس Barracuda X Chroma: الأداء المذهل والصوت الذي يأسرك!
مواقيت الصلاة في بني سويف اليوم 21 رمضان: موعد أذان الفجر والمغرب
محمد شريف يسجل والخليج يخسر بثنائية أمام الخلود في الدوري السعودي
