رواية رماد الاعتراف الفصل السابع 7 بقلم زهراء سعد
مقال مقترح استمتع بالمباريات بجودة مثالية.. اضبط تردد قناة SSC الرياضية السعودية على نايل سات وعرب سات الآن
꧁لعبة الذئب الأشرس ꧂
بعض الالعاب تنتهي من نكبر نصير نعرف تسليتنه
مو بركض، ولا بالتوگي ولا بالحبل نلتهي بأمور ثانية
يا شغل يا درسة يا تربية تزيد مسؤلياتنه يوم بعد يوم و نضل نركض و الوقت يقل و يا دوب نلحك انشوف وين وصلنه.. بعد كل يلي مريت بي
و يلي ما توقعته يصير بحياتي..هو اليوم رجعت العب لعبة ناسيتها من سنين اصلاً ما اذكر مرة لعبتها
.. الختيلان!
بس هل لعبة قوانينها شوية تختلف!! غلطة وحدة مني ممكن تكلفني اهواي وهل غلطة متمر على خير
يا دمار يا موت!!
الموافقة على اللعبة أختياري يا العب بيهم بليل
يا ابقى عبدة عدهم بنهار!! هو هيج كلي.
فتحت الفلاش جنت امشي بنص لليل و اني اردد
اليوم لازم امحي كل خوف عندي حتى لو ما مات گلبي اني اموته بأيدي!
مستحيل استسلم، مستحيل اتراجع، اسوي يلي علية و اطلع..
فتحت الباب و السماعات بأذني اسمع انفاسة
جنت شادة حيلي بي هو هم خايف انفاسة مو انتظامية يتنفس سررريع، كلبي بعده يلعب
اروح امشي؟
لو اتراجع و باجر يرجعون يذلوني بأبشع الطرق بسبب أخوية الله يلعنه!
جان الهدوء و ترقب مالي المكان بس الخوف مسيطر علية، شغلت لفلاش وصلت لصالة و أخيرا
و صار كبالي المكتب يلا مشكاة لا تتراجعيين
اليوم اول و اخر يوم تبقين هنا! هاي فرصتج الاخير
اذا بقيت على هذا خوفي مراح اكدر اسوي شي
و راح يجي الصبح و تنكشف كل الخطة..
تحركت بهدوء و رجل اطخ برجل لحدما وكفت كبال المكتب، فتحت بطل الزيت و درت قطراات
على السبرنگة، رفعت رجلي امسحهن مرة ثانية
التفت يمين يسار، لحد الان ماكو شي..
رفعت راسي شاشة الكامرات مشتغلة بس الكامرات الخارجية مبينه
فتحت الباب على كيف، انفتح و طلع صوت خافت
بس كلهم نايمين مراح يحسون..
رديت الباب وراية، قربت السماعات..
_تسمعني؟؟
_ وين وصلتي
_دخلت للمكتب و هسه وين اروح
_هسه يلي أريدة منج تشكلين السماعات بمكان كون مستحيل يخطر على بشر يوكف يمه
_المكتب مابي زواية اهواي، كل يلي موجود رفوف على حايط مزهرية جبيرة و تمثال بركن لونه ابيض وصخ..
و مكتب على اوراق مطشرة
_ابيض وصخ؟ وين اكو ابيض وصخ
_اي هو هيج لونه يعني مو ابيض ناصع
_استغفرلله اسمه حليبي
_لا لحليبي مو هيج ع بياض اكثر هذا هو هيج لونه ابيض وصخ
_اسمه اوف وايت
_لا هو ابيض وصخ
_هاي هية انتي الصح اسمه ابيض وصخ
عوفي التمثال معليج بي
شوفيلي المزهرية..
_بيها ورد و اغصان سود لان الورد مو حقيقي و الوان الورد مو حلوات حتى بيهن لمع مثل ملات
خالتي برقية القديمات
_عوفي خالتج هسه و ركزي وياية ، خلي السماعات بنص هاي الوردات
_لا تنسى كل عشر ايام نطلعها و نغسلهن
_ شنو يلي ميتحركن اكثر شي
_الكتب!!
اكو نوع من الكتب بس ينمسحهن من التراب و ميتحركن من مكانهن عبد القادر يعتبرهن كتب قديمة تالفة و مهمات كلشش حتى هو ميحركهن
_قريبات على مكتب
_تقريبا اي لان اساسًا هنه قريبات على گاع (الارض)
_شكليهن
كعدت بالگاع فتحت السحابة الجنطة… طلعت السماعات صغار سود، فتحت اللاصق طلعت واحد من الكتب المتروكة و شكلتهن ورا الكتاب..
خليته بين الكتب بطريقة متثير الشك ابدا
انتهت اول مهمة، رفعت السماعة
_تسمعني؟
_ شسويتي
_شكلتهن مثل ما علمتني..
_عندج مهمة أخيرة و بعدها اطلعي من البيت..
_طلعتي من البيت وياك تكسر الظهر، ماكدر اتخيل لو اخوية عرف اني وياك
_ترجعين للبيت..
_بس مو هاي جانت الخطة
_هسه ما فهمت شتردين، تشردين وياية! لو ترجعين لأهلج
_كاسرين ضهري امي و ابوية ماكدر انزل راسهم
حتى لو اخوية يهودي ماكدر استغني عنهم
_اخوج عندي وياه شغل..
هسه خلصي الشغل و اشوف شسوي لا يكعدون الجماعة و تصير مشاكل
مشكاة: عقيل بديت اخاف
_اني وياج بكلشي محد يكدر يرش على وجهج المي!
لا تخافيين
_هسه شنو اسوي؟
_الاوراق يلي وقع عليهن عبد القادر صوريهن و دزيهن هسه
باوعت على مكتب كلها اوراق، يعني يا اوراق اصور
_اوراق الملكية
_واني شمعرفني بأوراق الملكية اشو لا اعرف اقرا ولا اكتب
_اسمعيني زين، اتذكري وين جنتي من طب المحامي لعبد القادر و ابنه وصلي خبر صار عدهم اجتماع..
_جنت بالمطبخ و مجرد ما بلغتك كتلي راقبيهم،فحاولت راقبهم من بعيد بس ماكدرت اسمع شي، كل يلي عرفته بعد ماطبيت يمهم و بأيدي
صينية الضيافة اجه يسلمهم الامانه..
_شنو سلمهم
_حجه اهواي وياهم ماشفت شنو هي الامانه
لان ماحجو شي كدامي فطلعت بس شفت بأيدة مجموعة اوراق بملف ازرق شفاف
و مبين مكبوسات..
_عفية بسباعية دوري على هذا الملف هسه
_بس على مكتبة ماكو اي ملف بس اوراق مبين خالهن بطريقة مخربطة حتى يعرف منو يلي يدخل ورا
عبد القادر تفكيره شيطاني اني اعرفة كلش زين
_ جاي احس الكدامي هسه تفوق الجاسوسة ألكس
توج بديتي تفكرين صح
_عقيل لا تخبلني اني راح انجلط من الخوف دكلي شسوي اريد اطلع قبل لا احد يحس علية..
و ثاني شي اني احب ام الاخضر سام
_شمنتظرة افتحي المجرات و دوري بيهن يا حضرة الجاسوسة ساام بس والله عليها جسم يشك شك
_ كتلي عليها جسم مو.؟..
_بالغلط طلعت جنت اشاقة وياج
_شقاك ولا حلو
_شوفيلنا الاوراق و اني راح اضل ساكت
_ثواني، فتحت المجر لاول مابي شي غير جنطة سودة ما فتحتها رجعت فتحت يلي جوا بي اوراق حركتهن بس رجعتهن بمكانهن، عقيل ماكو ماكو اي ملف بهل لون
_طلعي الجنطة السودة و دوري بيها
_ثواني.. بيها بس اوراق مابيها اي ملف لونه ازرق
_لا حول ولاقوة الابالله، هذا وين ضامهن
_شمدريني، هسه كلي شسوي
_صوريلي اوراق الجنطة خلي اقراهن
طشرت الاوراق بتسلسل و صورتهن و رجعتهن مثل ما هنه و دزيتهن
_ضميتي الجنطة؟
_ايي ضميتها بعد شسوي؟
_صوري الاوراق يلي على مكتب بس لا تحركيهن
فتحت الجهاز و صورتهن كلهن ، درت وجهي ردت اطلع..
مشكاة: ثواني تذكرت..
عقيل: شكو
مشكاة: انكشفنه!
و اني واكفة حسيت صوت ورا الباب
مالحكت حتى استوعب شصار و منو يلي دخل
التفتت اشوف وين اضم نفسي
ماعندي مكان غير ورا البردة!!
عقييل بعده يحجي براسي لان ماكدرت اكله خاف يسمعون صوتي
بديت ارجف من الخوف سديت نفسي و حتى غمضت عيوني من كثر الخوف
سمعت صوت همسات عالية يم الباب يعني خلاص اكيد راح يدخلون و يشفوني!
اصعب لحظات مرت علية، صار هدوء ابتعدت شوية
وخرت البردة، ماكو احد
منو يلي اجه بهذا الوقت؟
شجعت نفسي و فتحت الباب تأكدت ماكو احد حجيت ويه عقيل و بلغته جان اكو احد
كل فترة اسمع هذا الصوت! شلون ما حسبتها
ممكن اليوم يجون
_فهميني منو يلي يجي
_ماكدر احجي وياك لازم اطلع و اغلق الجهاز
_قبل لا اطلعين لازم تفهميني…
_عقيل كافي! ماكدر اضل مستمرة وياك افهم ما اريد انكشف لان راح اصير برجلين اعرف حظي كلش زين
_واكف بالباب الخلفي اطلعي احجي وياج
_ناوي على موتي انت لو شنو؟
_محد يدري،اني واكفلج برا انتظرج
_فتحت باب المكتب و طلعت كلشي مثل ما هو
فتحت الباب على ماري بعدها غاطسة بنوم مو حاسة بشي اصلا
طلعت من الباب واني التفت،صدت عيني على الاحذية الخارجية!!
تقربت شوية ركزت بنظر! هذا حذاء نسائي مال شنو؟؟
رجعته بمكانه و طلعت برا مشيت مسافة عن البيت
الدنيا ليل و بس أضوية الشارع الخفيفة مشتغلة
الطريق هدوء بحيث صوت خطواتي عالية
حتى سيارات بطريق ماكو..
لفلفت نفسي بسترة صوف قديمة بس كلشي ما لابسة برجلي بكد التوتر يلي عشتة
شفته منتجي على سيارة و الجهاز بأيدة
رافع راسه فوك مغمض عينه من التعب
سرعت خطواتي و اجيت يمة
_تعبتنييي عقييل مو كافي خبال ترا تعبت كلشي بيه هلك!!
يوم سمعات يوم شغل يوم انقل الكلام يوم اخرب شغل عبد القادر،كل هذا واني محد عايفني بحالي
انت تعرف احفاذ عبد القادر يشسون بية
واحد انكس من الثاني و متحملة كل هذا على مودك
انت تعرف لو غلطت غلطة وحدة بس!! هيثم شراح يسوي بية؟
انت تعرف اخر مرة درة بية طالعه اتسوگ شسوووا!!
مو كتلني و كسر رجلي حتى حتى اميي يلي وكفت تحميني من عذابة كتلها و كسر ضهرها و شمرها بشارع
اني عايشة يم واحد عار لا اصلا عايشة ويه شيطان
عقيل طلبت منك تساعدني ترحمني مو تصير مثلة و تعذبني والله جسمي هلكان اني تعبانه بس افهمني
_ انطيتج وعد اخلصج منه لو بأخر نفس عندي
_ياا وعد متكلي يا وعد هيثم طلب منك فلوس بس حتى يعوفني وانت اصلا ما انطيته و بسببك جبرني اشتغل خدامة بيت عبد القادر اني كل يوم الصبح انذل
اني تعبت من الذل اريد ارتاح
_شنو غلطي؟ ادري بي بذاك اليوم انطلب بسبب الاقمار و الشرب ردته ينسجن ينقتل وين مياخذو ياخذو شمدريني هل انذال بيت عبد القادر ينطو فلوس، شمعرفني بتفكيره الشيطاني
_مو اني كتلك راح يأذيني، كتلك لا تلعب وياه
تقرب مني و مسك فكي بين أيدة
_افهمي، ماعندي احد اغلى منج انتي و امي انتو الاثنين يلي مستعد انطي روحي الخاطر اشوف ضحكتكم مثل ما احفر حفرة لبيت عبد القادر
جاي احفر لهيثم! منو كلج اصلا اني مرتاح بعذابج؟
منو كلج اني مادري شيصير وياج، اصبر علية
بس هل كم يوم و راح تطلعين منهم
و اهم شي كلشي يصير وياج تحجيلي، تسمعيني؟
هزيت راسي برضى
_توعدني متعوفني؟
_لأخر نفس هذا وعد مني….
أبتسمت برضى بعدت عينها و صارت تباوع على بيت عبد القادر جانت حيل خايفة..
..
مادري يبت كلبي غلطج لو غلطي ما حافظت على الأمانه شوصلنه لهذا الحال
الوعد يلي كسر ضهري كسرة اليتم بكل ليلة لعيد!
رجلي رفضت تتحرك احسها صارت أثگل من الحديد
واكف كبال بيتهم و عيوني تفتر على كل ركن بالكي اشوف عيون ذولاك الناس اريد اتعب! اريد ألمهمم بحضني و اكلهم ليش هل كسرة؟ بكلبي اهواي اعتاب ما ادري شوكت ناوي انسى
حسيت بأيدة تطبطب على ضهري، انتبهت علي..
رحيم: ابو حازم لا تضل واكف نطب ونتوكل على الله
فارس: و نعم بالله خير المتوكلين
دار وجهه على اخوته اشر الهم يدكون الباب.
جانت واكف بالاخير وروحي بعدها تلوب بس وجهي جامد مثل الصخر ليسمع تعب كلبي و سوالفة يحتار
ليش ماعندي كل ردة فعل، شلون رجعت لهذا البيت مرة ثانية.. يستغرب شلون اصافح ايدي بأيدهم..
انفتح الباب و صار السلام و صل دوري وكف يباوعلي بصدمة راد يهجم علية و يكتلني بس انسحب
لان وياية ولد خالاتي كلهم و كلهم اكبر منه و مني .. مراح يكدر عليهم
سلمت ما رد السلام بس اخو الثاني رد
استقبلونه بالمضيف قدمونه الجاي بس ما شربنا
رحيم حجة على الرابطة يلي تجمعنا سوية جدي شلاگم الله يرحمه و علينا احنا و على امهاتنه
و حجه بدين و بشرع لازم منقطع صلة الرحم
بعدين ذكر خواتهم و ازواجهم و ذكر مشكاة
طلب يسلم على خالتي ام مشكاة اول شي و يسال على مشكلة يلي صارت و لان هي ام اكيد راح تحجي الحق و متفرق بين ولدها
رفض هيثم و تحجج امة نايمة و مريضة
رحيم طلب يكعدوها من النوم و واحد منه هو يروح و يسمع منها
و هم رفض ماقبل احد يروح ولا قبل احد يدخل بالمشاكل
رحيم باوعلي بنظرة، سوي يلي تريدة لان مبين قافل
ابتسمت بخبث، و طلبت اشوف خالتي و اسلم عليها و اطلع بدون ما اسألها على شي
قبل بس اخو جان وياية قبل هذا دخلت للحمام
عشر دقايق سويت يلي تمنيت اسوي من زمان
من اول لحظة تعرفت بيها على مشكاة و امها
طلعت واني كل الهم يلي بداخلي صار مجرد نار و تبخرت كدامي
كعدت كبال خالتي قبلت راسها كتلها
_مو ابن هدوة اني اذا ما خليتج ترتاحين
باست ايدي تكلي اي والله يمة انه مريضة انه متت و وكعت من موتت ابوية شلاگم
لا والله انه مريضة معلعلة من كعدت بهل گاع على احساب تعب ابوي
جانت تحجي وياية و تبجي مسحت راسها بطمأنينه
و طلعت كعدت بالمضيف وياهم ضلينه ربع ساعة
كام رحيم و كمنه وياه بأعتبارة هو الجبير..
و قبل لا نطلع لشارع فتحنا الباب، وكفت الدورية
شافها هيثم ركض على سطح سوينه مجال لشرطة
دخلو يركضون ورا..
طفر من السطح على بيت جوارينهم و شرد من الشرطة بس ضل ملاحق و هيج ثبتت كل التهم علي
بقو اخوته تعاركو ويانه على الصوت و كبرت العركة
جريت جرجف من المندر يلي جنه كاعدين علي
صحت الرحيم لازم يطب للغرفة يغطيها حتى اطلعها
اخوتها ماقبلو بس احنا. غصبًا عليهم فتحت الباب و اشرت الرحيم يطب
لان يحترمو و يخافون منه..
دخل و عينه بالكاع اسمعه يغلط عليهم و يلعنهم هنا جمد كلبي اكثر صاح علية
_عقيييل وينك تعال شيلها
دخلت و ياريت ما دخلت! كلبي رجف و جسمي نهد من شفت حالتها من شفت الدم الجامد على وجهه و حالتها لا يرثى لها
شعرها لمشلع!
بكد لأذية نايمة بالگاع و تباوع لسكف بدون ما ترمش
اجيت عليها و اني اباوع على ايدها مزركة مشرحه تشريح
لفلفتها بعباية و شلتها طلعت و طلعو الولد يتراكضون وراية
صعد اخو رحيم محمود و شغل السيارة..
نزلت عيني اباوع عليها دارت وجهه عني، هل وجه الحلو انتهى كلشي بي انتهى الجروح عميقة
و الدم بأيدي انترس ميرضه يوكف، ماكدرت اسيطر على نفسي ما حسيت غير دموعي تنزل تذكرته تذكرت هل ضحكة الحلوة من تضحك كبالي
ضميتها لصدري و اني اهمس بأذنها
_مو كتلج والله ما اعوفج ما اكدر اعوفج ليش هيج كسرتيني ليششش!!….
قبل اشهر…
وكفت السيارة نهاية الفرع و تلثمت. طبيت امشي
فتحت الجهاز رنيت اكثر من مرة بس تنطيني رفض
راح تخبلني يالكعبة شبيها هاي..
حاولت ارجع اتصل بيها مرة ثانية هم ماكو رد شسوي؟
تقربت من الباب ترددت ادخل، هسه هذا الكلب هيثم شكلة شعندي جاي بنص ليل
ابتعدت ضليت واكف اباوع على شباج عسى و لعل تفتح الشباج و المح خيالها بس اريد اطمن على حالتها
ليش صارت ترفضني؟ ليش من احجي وياها تسكت
راح تخبلني هاي لبنية منين ما اجيبها حيرة
رفعت التلفون و كتبلتها رسالة
“بداعت كل لحظة و كل وعد اطلعي اشوفج”
بقيت برا رايح جاي و كلبي الف حسرة و حسرة
سمعت صوت الباب تنفتح درت وجهي عليها طلعت
بس جنها مو هي متشبها بس بالاسم
ضعفانه و اشوف عظام ايدها من جوا العباية!!
رحت يمها ردت الزمها و تذكرت اني وين
عيونها حمر و الوجهه اسود
عقيل: هل مرة هيثم شمسوي بيج، مشكاة كافي
اهواي انتظرت لو بنص كل هاي مشاكلي لازم اجيبج يمي ماكدر، ماكدر اخليج هنا اكثر حتى امج و ابوج مستعد اخذهم يمي و اشوف هل الكلب.! قاطعتني
_ما اريد اشوفك بعد
ياريت تروح و ما ترجع
_شنو مشكلتج احجيلي
_مابية شي بس عوفني، جنت الامأن بوسط هل ذيابة العايشة بيها و هسه صرت احسك واحد منهم
روح ولا ترجع ولا تخليني اشوفك!
هدت أيدي دارت وجهه بدون متلتفت و راحت كدام عيوني! ….
محمود: وصلنه ابو حازم انزل
فارس: بس ساعدني خلي اطلع، فتحلي الباب و طلعت جابو السرير بالكوة اني و محمود كدرنه اانشيلها رغم ضعيفه بس عظمها ثگيل واني هم ماضلي حييل اشيلها
اخذوها كبل لطوارئ و امشي وراهم و حيلي مهدود مادري وين اروح احس نفسي ضايع بوسط هاي الناس
كعدت على كرسي برا و حنيت راسي
_يا مصيبتك يا فارس منين ما تلتفت تلكة مصيبة جديدة تنزل على ضهرك، هسه يالة حسيت بالكسرة و التعب
طلعت ورثت جكارة واني بالي بعده يلعب وياي
جنه يكلي ما اخليك ترتاح اليوم ولا كل يوم ……
رن الجهاز (صادق)
فتحت الخط..: احجيلي شكم مصيبة اكو
_ يا ستار ابو حازم شبيك؟
_مابية شي
_بس صوتك مو راحة.. لا بسلا بت خالتك بيها شي؟
_كاتلها كتلة موت
_لا حول ولاقوة الابالله شكد حيوان هذا ، و هسه شصاير وياها
_اخذتها بالمستشفى وبلغت عليّ
_ماعدها غير العافية، ابقى هناك هل يومين و اني امشي امورك هنا لا تشيل هم
_متقصر ابو علي احجيلي شصاير
_والله اتصلت عليك ردت اسأل عليك و هم خطتنه مشت مثل متريد بس سلطان شاك بينه حتى حجي وياية ميحجي
_احجيلي بتفاصيل
_يوم الاحد دزيت المحامي على سمارة و بلغها راح تطلع بهذني الايام و مشه بالمعاملة و لان سمارة ماعليها شي راح تطلع بس سلطان معارض
اكثر الشغل اليمه موقفة في سبيل يسحب منها كلام
المحامي سأل سمارة اذا عدها شي و ما حجيته خلي تحجي حتى انساعدها بس كالت ماعندي شي
و سلطان رافض طلعتها و مبهذلها من مركز لمركز و هسه قبل ماحاكمتها يريد ياخذها لسجن بس مليون بالمية هو مزور كلشي
_شنو العدها حتى سلطان مجلب بيها!
_هذا يلي راح يخبلني، حتى عمي ساجر حجة وياه
بس هو عنيد و ميرضى حتى يحجي
_و راضية و امها شنو اخبارهم امي شلونه
_ راضية و امهاا اجرت الهم بيت و كعدو بي صح البيت تعبان بس زين يستر، و امك صحت صارت زينه و جبت مرتي يمها حتى تساعدها بين مترجع
_ما قصرت صادق و كفت وياية وكفت اخو
_شنو الغلط اني صدك اخوك، هسه يلي اريده منك
تنتبه على نفسك و تعوف هل تدخيين يلي راح يجي يوم ويموتك
_شمدريك اني جاي ادخن
_من صوتك مختنگ
و اني احجي ويه صادق اجه محمود ترخصت منه و كتله بعدين اخابرك و نحجي..
محمود: يمعود وينك ضليت وحدي رايح جاي و هاي الدكاترة ديسألون على حالتها و اني لازم اطلع اجيبلها علاج من برا صيدليات المستشفى فارغة
_انطيني الراچيتة اني اروح اجيب العلاج
_اخاف ماشايل اهواي كتبلها الدكتور مهدئات و عصارات
_لا لا شايل انت معليك انطيني
اخذتها و رحت اشتري العلاج، كلت اشرد ولا ارجع اشوفها مرة ثانية، هسه اني شجاني هلكد انهاريت كدامها و بجيت، هسه شتكول علية!!
اشتريت العلاج و صحت المحمود من بعيد اجه اخذهن و رجعت كعدت ادخن برا …
تذكرت اخر ايامنه سوية مادري شيغيرها بيوم و ليلة.
سحبت نفس و ويه زفير الدخان رجع تفكيري بيها..
رجعت اتذكر ذيج الايام..
..
فارس: وين جنتي البارحه لليل كله اتصل و انتو ماكو
و اليوم الصبح هم
_جان عندي شغل
_وين
_بيت عبد القادر
وكفت مصدوم و مستغرب من طريقة كلامها: ليش ما كتيلي
_انت تعرف بية اني اشتغل يمهم، ليش حتى اكلك بعد
_اعرف بس انتي مطلعين الا تحجين و ثاني شي ليش بايته يمهم؟ ذيج المرة اني طلبت منج تباتين
يمهم حتى تصورين الاوراق و كتلج اخر ليلة بعدها تتركين الشغل
_ليش اني اكدر اترك الشغل بكيفي؟
_هيثم حسابة يمي كتلج لازم علي فديوهات تذبه ١٥ سنة سجن
_تريد تذب اخوية بسجن و تبطلني من الشغل و مافكرت منو ليصرف علينا لازم انضل ميتين جوع
حتى حضرت استاذ فارس يرضى علينا..
_ليش كاعدة تحجين وياية بهاي الطريقة؟ اني على مودج و خايف عليج
_لا تخاف علية مابية شي
_منو مضوجج احجيلي.
سكتت فترة سمعت صوت نفسها ردت: مابية شي بس تعبانه
_مو بكدي صدكيني، و اريدج يمي اليوم قبل باجر اجيتج فرحان عندي اخبار حلوة الج
_اخبار شنو؟
_عبدالقادر متورط بكومة قضايا فساد و سويت حساب وهمي و أبتزيت سلطان لزمته من أيدة التوجعه..
ايام قليلة و عبد القادر يصير بسجن هو و ابنه
و راح اخذ القطعه يلي جدي سجلها بأسم ابوية
و ابنيها ، وقتها نعيش سوية
اني و امي و امج حتى ابوج اجيبة اذا يريد و
_و منو؟
_حازم ابنه الحلو
كلمتين حجيتهن و نسد الخط مباشرة؟!!
شصار!! من شنو زعلت؟
حاولت ارجع اتصل بيها اكثر من مرة ماكو رد
رجعت سوتها و غلقت الجهاز.. هاي منين متعلمة تغلق الجهاز بوجهي
غير وقت بليل رجعت من الدوام جان ساجر موجود ابيته، اخذت الاوارق و رحتله..
خابرت صادق يفتحلي الباب لان ادري الكامرات بغرفة سلطان و هذا لو سنة ادك بالباب هم ميتحرك
دخلت للبيت و أبتسامة السخرية مالية وجهي
سلمت على عمامي و بيبتي، باوعت الصورة جدي الله يرحمة و دزيتلة بوسة رغم اعرف شلون جانت نوايا تجاهي! و مرت ابوية اصلا عبرتها
كعدت بصف ابوية على قنفة و خليت لأوراق و القلم كباله
_يلا باش، وقعلي عليهن
باوعلي بأستغراب، جر لأوراق يشوفهن؟ شنو هاي؟
_حصت امي يلي بالبصرة
_اي وشنو
_اي ارجع سجلها بأسمها رجلعها حقها بعد شنو
سرى: و هدى منيها حصة اصلا ياا گاع هاي جاي اطالب بيها؟
فارس: تؤتؤ هذا القانون يمك يا سيد ساجر النسوان تحجي و الزلم تسكت لو شنو
باوعلها خزرها.. و رجع يحجي وياية
_شتسوي بيها
_اريد ابني و استقر هناك يم خوالي
_خلصت عمرك تركض ورا خوالك و هسه تريد تعيش يمهم همة وينهم اصلا تعرف بيا ملا ساكنين حتى رايح هناك
_انت شعليك؟ اني و امي و ثاني شي شبيهم ولد خالاتي خوش ولد و خالاتي زينات و امي وحيدة اريدها تعيش ايامها يم خواتها يلي بقت حسرة بالكلبها تحجي وياهن!
_ ماكو گاع و ماكو توقيع ولا سفر..
ذبهن من أيدة و دار وجهه على تلفزون
_مو بكيفك الگاع ترجع الصاحبها مو اليوم باجر
و احجي كدام الكل انت سرقت حقها و حقي
مخلي الگاع الشغلك و الفلوس تجي الك و الأبنك
و يلي الها حق حتى متسأل عليها!!
دخل لأفندي يتمختر يمي..
سلطان: على يا گاع تحجون
فارس: حق امي و حقي يلي سرقها ابوك بعزز النهار
ساجر: احتررررم نفسك اطلع برا من بيتي شكد اكرهه اشوف خلقتك الزفرة بسبب أسلوبك يا عديم التربية
سلطان: يابة كول يا الله شكو شصار، فارس على ياگاع تحجي
_گاع البصرة يلي حضرة ابوك بانيها شقق و ياخذ أجارتها يوزع بيهن لل…
التفت بأستغراب: يابة هاي الگاع مو تابعه البيت جدي موهيج كتلي؟
وكفت مصدوم حتى بهاي!!
_الگاع گاع شلاگم يلي تعب بيها و فنه عمره بيها..
و التعب تعب امي يلي انكسر ضهرها حتى تزرعها
و اليوم اسمع عنها، طلعت گاع عبد القادر؟؟
لشوكت راح تضل هيج، مو الله يعاقبك بكل يوم كسرت امي بيها و بعدك مستمر…!!؟
ساجر: اطللللع كتلك اطللللللع كدامي ولا تلفي مرة ثانية والله اذا اجيييت اكسرها الرجلك! و اشوف شلون تدخل للبيت مرة ثانية
فارس: طالع و ما اطلع ابن رجال اذا رجعت طبيت لهذا البيت..
اخذت الاوراق و طلعت، بس مستحيل اكول هاي هية و لهنا انتهت والله ثم والله لأنتقم منك شر أنتقام..
ثاني يوم الصبح اخذت امي و اشتريت گيمر عرب و صمون حار و رحت للبيت بوكت كعدت
باوعت الامي ايدها ترجف لزمت ايدها و قبلتهن
_ابنج صار رجال شكبرة و انتي بعدج اذا اطبين بهذا البيت ترجفين.؟
نزلت راسها بحزن: موو بيدي يمة والله مو بيدي
منو البيهم ذكرني و حترمني كلهم كسروني كسرة عظم!
_اليوم اني موجود اكسر راسة الميحترمج
_انت ماعندك سالفة غير اكسر و اصلخ و اذبح
حتى بهاي جنك ابوك
_يمه عسكري شرديني اكلج مثلا
_نسخة طبق الاصل ابوك حتى بعيونك و حركاتك وسوالفك و انت حتى ما عايش وياه لو عشت وياه
شتسوي؟
_دعوفيني منه و اخل انزل
نزلت و فتحتلها الباب، ايد شايل المسواك و ايد حاضن بيها امي
قبل لا ادك الباب، انفتح.. راد يطلع بس شافنه وضل مصدوم
عين علية و عين على امي، حتى سلام ماكو
ام فارس: صباح الخير
ساجر: صباح النور، صباح النور، دخلي تفضلي
هدى: فارس اصر علية اجي اتريك يمكم اليوم
كلت اجي و اسلم عليكم
باوعلي بأستغراب!!
فتح الباب و أشر لأمي تدخل دخلت وراها جرني من زندي: ولك شقصدك اشو رجعت تريد اطب للبيت
_تؤ تؤؤ شكد حاقد علية
_ولك هو منو الحاقد
_وخر عني خل اروح ورا امي لا يتحرشون بيها
وخرت ايدي منه ورحت وياها، لكيته طابة تسلم عليهم
و كل عادة محد محترم سرى نعبرها و هي تفوور من هذا التصرف احسها تريد تذبحنه قربان لله
خليت الريوك على طاولة..
فارس: يلا منو ما متريك بعده
عمي محمد: اجييت بوكتك، وخرو البيض من كدامي
و جيبلي الگيمر
فارس: و جبتلك عسل يا بعد العسل كله
محمد: لعد صيح لأبوك بالكي بعده ما رايح لان ما أتريك
فارس:انت اكل اكل معليك بأحد، وين صادق و زوجته ابنه هذا المخبل وينهم
محمد: هسه قبل شوية جان هنا
هدى: يمة شوف ابوك اذا بعده خلي يجي يتريك
ظاهر: هاي منو جايب گيمر اليوم
فارس: ليش عمي اكو غيري يجيبلكم
ظاهر: هههه عرفتك والله انت ورا كل مصيبة تجيبلنه گيمر
صادق: اذا هيج الله يزيد من مشاكلكم حتى ناكل گيمر براسك
فارس: اخر من يتكلم انت ابو راس لمربع
حجيتها و طلعت برا حتى اشوفه وينه معقولة شرد
بس شفته بعده واكف بالباب صحتلة
_عيني ابو سلطان ما ناوي تجي تتريك ويانه گيمر
و ام فارس تسأل عليك، كلتها و دار وجهه علية
أشرلي براسه يعني هسه اجي
درت وجهي جان اشوف امي مخنزرة بوجهي…
جريت كرسي و كعدت وياهم تريكت، بالاخير اجه
سلطان سلم على امي و هو مستغرب من وجودها و وجودي
كعد بس ما اكل ويانه يعرف اني جبته
امي كلته اكل جاوبها
_ما اثق بفارس شمدريني شمخلي وياه
هدى: لا والله يمة اشترى كدامي و جابة شمخلي يعني
باوع لإمي بحيرة حسيته جان متوقع جواب غير هذا
دخل ابوية و كله: اكل و انت ساكت
جر الكرسي و كعد ياكل ويانه بس عين على الاكل و عين على امي
ضجت حيل باوعتلة و أشرتلة.. بمعنى شكوو
باوعلي بنظرات الصدمة: يعني انت شعليك
رجعت أشرتلة، ترا هاي امي
_اي و شكو
عاد السالفة صارت مليوصة
باوعت لأمي جانت تسولف ويه بيبي و توكلها و علي ابن صادق بحضنها ..
كتلها: كتلها يلا يمة اذا كملتي نروح عندي دوام
هدى: لا يمة بقيني اليوم هنا اضوج وحدي انت من ترجع مر علية اخذني
فارس: مو بالبيت احسلج تاخذين راحتج اكثر
هدى: اعرف بس اريد ابقى يم بيبتك شوية صار كومة ما شايفته
باوعت لأبوية ابتسم بطرف شفته جنه يكلي انتصرت عليك
باوعت المرت ابوية البومة كالبة خلقتها
و سلطان صافن عليها
عمامي بدو يطلعون على شغلهم و صادق ترخص و اني بده دوامي بس كاعد
شلون اعوفها وحدها لا و انوب هذا بعده كاعد يمها
لأول مرة احس ضايج بتواجدهم شسوي ضايج مثل سرى
سلطان طلع، و تلفوني ماسكت يتصلون بية و اني عيني على ساجر و هو يباوع لأمي
سرى زعلت وراحت لغرفتها و اني بعدني صافن على ابوية شوية و ندسته…شكوو تباوع
ساجر: متكلي شبيك انت لله مسلطك علية
فارس: عيب مو امي جايتكم خطار لا تصفن بيها هيج
ساجر: ترا امك هي مرتي
فارس: اهاا والله ماجنت ادري اشعر بصدمة
ساجر: وانت شكو كاعد متروح لدوامك
فارس: الظاهر انت ماعندك دوام شو كاعد؟
ساجر: كاعد بشارع، بيتي.
فارس: حقك والله، دخل اكوم اخذ امي و اطلع
ساجر: لا تحشر نفسك روح اطلع من البيت اريد اتمعن
فارس: بشنو!
ساجر: بالبيت صار كومة ما كاعد بي شسوي دوام ما الحك..
فارس: ما مرتاحلك يبن قيصر الطيار
ساجر: لك احترم نفسك اني ابوك
ام ساجر: بس لو اعرف على شنو كاعدين تبسبسوون
صارلكم ساعة
فارس: ماكو شي جدة ساجر جان يحجيلي على جدي الطيار
ام ساجر: الف رحمة تنزل على روحة دشوف ناس لسه تهابة و تحترمة لان جان انسان محترم و خلوق
لليوم يصحولنه بيت الطيار لليوم احنا المعروفين بالمحافظها كلها على سمعتنه، كل هذا بفضل تعب جدك
فارس: الله يرحمة، يلا يا جماعة عندي دوام مو مال اتأخر اكثر
باوعتلة و حجيت
_اليوم ماعندك شغل عمل دوام؟؟
_فارس اطلع اني هسه جاي وراك
_عادي تعال وياية هسه اوصلك بطريقي.
_مشكور مشكور اطلع انت
استغفرالله العظيم طلعت واني ادردم بكلبي لهذا ما اخلي امي تجي يمهم لان اعرفه راح يكابلها و يكعد و هي تستحي و تتقيد كدامه
بقت يمهم امي لليل لحد ما خلص دوامي مريت عليهم اخذتها سالتها على ساجر طلع ما مدوام ماخذ أجازة سيادة العقيد لسه يذوب على نسوان الظاهر مراح يكبر
وصلت للبيت كبل جريت الجهاز و
خابرت مشكاة ما ردت بالبداية
رغم جهازها مفتوح..
رجعت اتصلت مرة ثانية ردت بصوت ناصي و تحجي سريع
_اهاا فارس شتريد
_اريد احجي وياج شعندج
_بالبيت دا اشتغل بعدين احجي وياك
بهل أثناء اجه صوت يمها.. الدكتورة تنتظرج بالعيادة
اتفضلي اصعدي وياية
مباشرة رجعت سدت الخط و غلقت الجهاز بهيج حركة من كل عقها مراح اسمع شي…
~~~
„رضية‟
كعدت بالگاع يمها و كمشت ايدها واني اتواسل بيها
راضية: يمة فدوة اروحلج بس اكلي لكمتين توج طالعه من المستشفى و حالتج حال شلون تردين تصيرين زينه وانتي لا علاج ولا اكل
زين الخاطري معقولة انتي تحبين اختي اكثر مني!!
والله ما توقعتج تفرقين بينه
التفت علية و عيونها محملات دموع انفجرت بوجهي
_ولج اختج هاي، انتي اكبالي مأمنه عليج وهي سودة علية تفتر بسجون شمدريني شكاعد يسون بيها شمدريني شصاير وياها، يمكن ديعذبوها!
لو!! لالا ان شاءلله مابية شي، رفعت ايدها لسما
_يا إلهي احرسها بعينك التي لا تنام
ما رايدة شي غير ترجعلي مثل ماطبت كون كلشي مابيها..
_يمه ان شاءلله ترجع سالمة، بس اني هسه اهم شي عندي صحتج والله خايفة عليج، يمه افهميني اني ماعندي غيرج بهل دنيا و كلما تتمرضين انتي جاي تكسريني بزايد، ابوس ايدج ارجعي اوكفي على حيلج مثل ذيج السنين و احمينا جوا جناحج…
لفتني بحضنها ودموعها تجري على خدها مثل الشلال..
شيصير لو اخوية لسه موجود و ما قتلو ولد الحرام؟
على لاقل يمنه رجال يشيل مسؤليتنه يطلع يطب يشتغل محد يحجي علي بكلمة
احس نفسي مثل المسجونه، ايدي و رجلي مربطات
منكدر انسوي شي غير ندعي.
لحد لليل احنا هلكانين تعبانين رغم ما اشتغلنه شي
بس نبجي.
خلين امي تنام و كمت اشتغل هل اكدر علي
بقالنه اغراضنا يلي بالحسينيه و تذكرت بيت ابو سجاد
كلت اروح يمهم و اطلب مساعدة بشكم شغلة للبيت
انتظرت لثاني يوم الصبح سويت الريوك و انطيت العلاج لامي هدأت شوية و ذبت نفسها نحلانه
لبست حجابي و عباتي عدلتها و طلعت
منين افوت هسه، وين اروح
ما توقعت كربلاء هلكد جبيرة و بيها هلكد افرع و اتيهه بيها
عندي افلوس تكسي بس برجعه شلون بية
واني بعدني واكفة اباب الحسينية طبگت يمنه سيارة حديثة بالبداية خفت و ترددت اطب جوا بس كلت انتظر اشوف منو حتى اسأل او اطلب منه يوصلني و هم بكروته ولو مبين مو محتاج..
نزل منها رجال تقريبا نهاية الاربعين شكله غريب مبين صعب حييل عدل سترته و صار يتقدم يمشي بأتجاهي
خفت، درت ادخل بس لا
ضليت حارنه لا اني الطابة و لا اني السألته شبيك هيج تباوعلي..
وكف كبالي بحزم!
_السلام عليكم
_و عليكم السلام.
_رضية مو
_اي اي اني رضية منو انت
_المحامي جلال فرات، وكلني صادق محمد على مود قضية سمارة
صفنت بوجهه احتاريت شكلة، ليش هل ولد يريد يساعدنه؟ يعني مو كافي علي من أجرنه هذا البيت
و تسوكلنه.. الله يكثر من أمثاله ما اكول غيرها
رضية: شنو لأكدر اسوي اني
_متسوين شي غير تحجيلي بتفاصيل شصار وياكم و بعدها امج توكلني و توقع على شكم ورقة
_ تمام تفضل هسه اخلي امي تكعد.. هي شوية تعبانه و اخذت علاج هم و بعد مادري شصار على حالته
سبقته.و طبيت امشي سريع فتحت الباب و كعدت امي
كعدت تريد تفتح عيونه ماتكدر، بين ما غسلت اني
سويت جاي و قدمته للمحامي
شربه و سألني: جنتي ناوية اطلعين
_اي والله ردت اروح للحسينية اجيب اغراضنه هناك و كلت امر على جوارينه هم
_ماكو داعي تنقلون شي، خلال هل اسبوعين ان شاءلله ترجعون للحسينية اذا تردون
_بس الضابط كال القضية معقدة
_ماكو قضية معقدة كل قضية الها حل يم القانون العراقي.. انتي بس احجيلي التفاصيل و ان شاءلله خير…
اجتي امي كوة تمشي كعدت يمي و تباوعلي، يعني احجي.. توكلت على الله و بديت احجيله كل المشكلة من الالف للياء..
~~
سمعت صوت ابوية جوا.. كلت هاي هية جمانه انتهيتي..
اختي بعدها واكفة يمي، شسوي اشرد لا هيج راح
اثبت التهمة على نفسي..
سمعت ابوية يصيحلي احس جسمي كلة يرجف.
فتحت الباب كلهم كاعدين جوا من عدا سجاد
نزلت يمهم و هو يباوعلي بنظرة كرهه و حقد.
وكفت كدام ابوية، سد الجهاز و التفتلي
_شكو فاتحة الباب
_والله بوية جنت حسبالي اخوية
_شفتي مو اخوج ليش ضليتي واكفة تحجين وياه
_جان يسألني استحيت اعوفه و اطب
حك لحيته و ضل ساكت،
جنت اباوع الرائد.. شصار اشو ساكت!!
رجعت لغرفتي و اني التفت وراية ابوية ليش هيج سكت
وكفت اتسمع عليهم من ورا الباب..
يوسف: ليش بوية عفتها
_جاهلة بعدها
يوسف: جاهلة و ساعة كاملة تحجي ويه الولد
صاح علي بصوت عالي: هسه اني احتار بأختك لو بأخوك ذاك الخلقة سزز دكااافي… و انت الثاني بطل استشراف خياساتك كاافية علييك
ورا هل كلام زعل يوسف و طلع من البيت. خفة وراحه خلصت منك عساك لا طبييت
ضليت كاعدة بالغرفة و يمي اختي ادرسها..
و بليل امي و ابوية اتفقو باجر راح يرجعون يخطبوها لسجاد لان سارة رجعت الجواب رفض!
ماعرف ليش رفضت و هي اصلا جان عدها علاقة بسجاد و حجة ويه امي تخطب اليوسف هم
يزوجه و يستقر ابيت وحده لان هو اصلا يشتغل
و شغلة زين..
~~
جنت بعدني كاعد برا و الف فكرة تمر براسي..
طبن خالاتي اثنين برقية و إزهار يدورن منين يطبن
رجعت ضهري ليورا شافتني وحده منهن اجن عليه
كمت استقبلتهن و سلمت عليهن سألن على حالة مشكاة،
اخذتهن على غرفتها من بعيد ضليت واكف
صعبت علية ادخل يمها..
سمعتهن يبجن و يلطمن و هي هاي الرادتها حالتها حال و كعدت تبجي وياهن
ضليت واكف اباب الغرفة، خابرني صادق ابتعدت شوية عن المكان و رديت عليّ
_هلا ابو علي شلونك
_فارس مصيبة….
سلطان اخذ لبنية من الصبح لسه ماكوو سيطرة ما ادور عليهم!!
و ابوك داخل انذار بعد شوية و ينجلط، و المصيبة عرف اني وكلت المحامي…
الثامن من هنا
اخترنا لك
تردد قناة توم آند جيري 2025 على النايل سات وعرب سات وأفضل برامجها الترفيهية للأطفال
الإعلان الأول المؤسس عثمان الحلقة 187: أحداث مثيرة وتطورات صادمة بانتظارك!
الإسكان: طرح 15 ألف وحدة لمتوسطي الدخل بنظام الحجز الفوري قريبًا
دراسة: النساء يتفوقن على الرجال بحساسية السمع في اكتشاف الأصوات الدقيقة
إبراهيم دياز يوجه رسالة لجماهير الريال قبل ديربي مدريد
الضرائب الأمريكية تخطط لخفض نصف موظفيها
إمام عاشور: عودته للمنتخب مشروطة باعتذاره الرسمي للجهاز الفني
مفاجأة كبرى: رمضان صبحي يبدأ بديلاً في تشكيل بيراميدز ضد أورلان
About the author
