رواية ضمير ميت الفصل السابع عشر 17 بقلم دنيا آل شملول
ضمير ميت
الحلقة السابعة عشر :
ظل حيث هو ينظر لظهرها الذي ولته إياه وغادرت .. أخذ يودعها بقلبه ويتمنى لها السعادة .. وبدون سابق إنذار وقفت سيارة أمامها وفي ثوانٍ فقط اختفت داخلها .
كان يحاول استيعاب ما حدث .. ركض للخارج وهو ينادي بصراخ :
بدوووور .. بدوووور .
وجد هاتفها قد سقط أرضًا فانتشله وصعد لغرفة المكتب الخاصة بفراس على الفور ..
دلف دون أن يطرق الباب مما أجفل فراس الذي كان ينظم بعض الأوراق والتقارير .
فراس بقلق :
في إيه يا وليد ؟!
وليد وهو على وشك البكاء :
بدور .. بدور اتخطفت من قدام المستشفى .
فراس وقد ضرب المكتب أمامه بيديه معًا :
إنت بتقول اي؟؟!!
وقبل ان يُجيب وليد سمعا صرخة باسم بدور أتت من الهاتف الذي يحمله وليد .
انتشله فراس وعرف على الفور بأن الصرخة كانت لشدا التي كانت تتحدث الي بدور قبل أن يتم اختطافها .
فراس :
شدا .. ألو .. ألو .. شدا ردي عليا .. شدا .
أتاه صوت دالين المرتعش :
بدور في إيه ؟
فراس :
دالين .. دالين أنا فراس .. شدا .. خلي بالك من شدا .. قوليلها متخفش .
دالين ببكاء :
بدور فين ؟
فراس بغصه :
متعيطيش .. اهدي اهدي .. ثقي فيا .. هرجعها .. والله هرجعها .. هكلمك تاني اتطمن على شدا .
أغلق معها فراس وأخذ يدور في الغرفة ذهابا وإيابا .. يشعر بالاختناق .. لن يسامح نفسه أبدا إن حدث لها أي شئ .. فوجودها هنا من البداية فكرته هو .. أيعقل بأن والده من اختطفها .. ولكنه يعرف بأن والده حتى هذه اللحظة لا يعلم بأن بدور ليست ممرضة من الأساس .
= مهاب !!!!
نطق بها وليد الواقف بلا حول ولا قوه .. تائه ضائع .
ضرب الاسم وصاحبه في عقل فراس كناقوس الخطر .. فنظر لوليد باستفهام ليتابع وليد :
= أنا .. أنا بحب بدور واعترفتلها بالحب ده وهي رفضته .. وفي يوم كنت في مكتبي وجالنا حاله طارئة .. ولما جيت أخرج قابلني مهاب ووقف في طريقي .
تذكر وليد ذاك اليوم الذي كان على وشك الذهاب لرؤية الحاله الطارئه التي دلفت للتو .. لكن أوقفه مهاب الذي وقف أمامه بجسده وهو يقول بطريقته المستفزه :
ياترى بدور رفضت قلبك ليه يا دكتور وليد ؟ .. معقولة تكون بتحب واحد تاني !!
لم يجب وليد وتحرك ليذهب لكن مهاب جمده بقوله :
متزعلش أوي كده .. دي لو حبتك هيبقى الألم اللي هتعيشه مضاعف .. أما دلوقتي هي هتتألم بسيط شويتين .. عشان مختارتكش .
نظر له وليد بعدم فهم وهو يتمتم :
قصدك إيه يا مهاب ؟!!
مهاب بابتسامة واسعة :
قريب هتفهم قصدي ياغالي على قلبي .. سلام دلوقتي شكلك مستعجل .
غادر مهاب تاركًا وليد يتخبط في أفكاره عما يقصده وعن مغزى كلماته .. لكنه استجمع شجاعته وقواه سريعًا وتحرك لغرفة الطوارئ .
عاد من ذكريات هذا اليوم وهو يتمتم بقلق :
– أنا مكنتش أعرف إن ده قصده .. أنا السبب في اللي حصلها واللي لسه هيحصلها .. أنا السبب .
اقترب فراس وربت على كتفه بهدوء وهو يتمتم :
لا انت مش السبب .. ولو حد السبب فهو أنا .. عشان أنا اللي جبتها من البداية .. روح انت دلوقتي يا وليد .
أخرج فراس هاتفه وقام بمهاتفة السيدة ابتهال ليعرف إن كانت شدا لا تزال لديهم .. وقد أخبرته بأنهم متجهين بها للمستشفى .. فهي فاقدة للوعي .
أغلق معها وهاتف حازم الذي أخبره أنهم قادمون إليه .. فجلس في انتظارهم بتوتر .
°°°°°°°°°°°°°°°°°°°°°°°°°°°°°°°°°°°°°
وصل لؤي لمستشفى الصاوي .. وخرج وجذب شدا بين ذراعيه وصعد بها .. فاستقبله فراس .
اقترب أحد الأطباء وأشار إلى إحدى الغرف التي ذهب إليها لؤي ووضع شدا بها ليفحصها الطبيب … بينما وقف لؤي وفراس ودالين في الخارج .
فراس موجهًا حديثه لدالين بحده :
انتي إزاي تطلعي كده ؟
دالين بحده مماثلة :
أنا مش هسيب اصحابي واستخبى .. بدور اتخطفت بسببي .. وشدا جوه بسببي .. وكل المصايب اللي بتحصل بسببي .
فراس بعصبيه :
مفيش حاجة بسببك .. وجيتك هنا غلط .. ليه بتعملي كده .. هتهدي كل اللي بنسعاله .
دالين بعصبيه :
مش هسيب اصحابي .. سامع .. مش هسيبهم .
لؤي بحده :
مش وقته اللي بتتكلموا فيه ده .. دلوقتي لازم نعرف بدور فين .
فراس بضيق :
أنا إلى حد ما أعرف مين اللي خطفها .
لؤي بسرعة :
مين ؟
فراس :
دكتور مهاب الصياد .
لؤي :
ليه هو ؟
حكى فراس له ما أخبره به وليد .
فقال لؤي ببعض الشك :
مظنش إن مهاب يعمل كده من باب الانتقام من وليد .. ثم إنك بتقول طردتهم النهارده .. يعني هيفكر في إيه ولا إيه .. يا إما في سبب تاني .. يا إما في فاعل تاني .
قال آخر جملة وهو ينظر بأعين فراس الذي فهم ما يرمي إليه لؤي .
فراس :
مش مستبعدها .. بس حتى الآن معرفش إذا عرف حاجة عن بدور ولا ..
توقف عن الحديث حينما تذكر جابر .. هم يعتمدون هنا عليه بالكامل حينما يتعلق الأمر بأجهزة الكمبيوتر .. من خلال جابر يمكن التأكد إن كان والده علم بشئ عن برنامج الاختراق أم لا .
أخرج فراس هاتفه سريعًا وأجرى مكالمة مع جابر الذي أتى في أقل من نصف ساعة .
جابر :
خير يادكتور فراس .
فراس :
عم جابر .. بابا طلبك من مدة قريبة أو حاجة .
جابر :
أيوه .. إمبارح .
فراس :
ليه ؟
جابر بعدم فهم :
كان فيه برنامج اختراق على جهازه الخاص وطلب ألغيه وأنقل بياناته وأعرف البيانات الشخصية للي اخترق الجهاز .
لؤي :
وانت عملت إيه ؟
جابر بتلقائية :
عملت زي ما طلب مني .
فراس :
مين كان بيتجسس عليه ؟
جابر بتذكر :
اا .. مش فاكر بالظبط بس كانت واحدة مش عارف إسمها ندى باين .
لؤي :
شدا !
جابر سريعًا :
أيوه أيوه شدا .. حتى دكتور مهاب قاله إن ليها أخت هنا في المستشفي تقريبًا .
ضربت نواقيس الخطر في رأس حازم الذي كان يقف على بعد منهم يستمع لكل ما يقال بعقل شارد وقلب ممزق ووجه شاحب خالي من الحياه .
لقد اتضحت الرؤيه الآن .. رأفت ومهاب هما من فعلاها .. لكن ترى هل سينقذونها أم ستسقط بين يدي أنياب الذئاب وتنتهي ؟
دلف لؤي لغرفة شدا التي استعادت وعيها ولكنها لا تتحدث وتنظر للفراغ بأعين خالية من الحياة .. وقف أمامها وأخذ يهزها بقوه وهو يقول بانفعال :
مينفعش تضعفي دلوقتي .. مينفعش أبدا تضعفي دلوقتي .. فوقي ياشدا .. بدور محتاجاكي .. لازم تتحركي .
بكت شدا بقوة .. بكت كأنها لم تبكِ من قبل .. بكت كطفلة ضائعة تائهة .. كانت تتظاهر بالقوة طوال الفترة السابقة .. لكن الآن لم تعد تستطيع .. لقد فقدت جميع حصونها .. لقد أمسكوها من نقطة الضعف بحياتها .. بكت بقوة وأخذت شهقاتها تعلو بضعف .
اقتربت دالين وأخذتها بين أحضانها وهي تربت على ظهرها بحنان وتتمتم بهدوء :
مش هيحصلها حاجة .. هترجعلنا سالمة .. مش هيحصل حاجة .. لؤي بيه معاه حق .. مينفعش تضعفي دلوقتي .. نقطة ضعفك في ايديهم فلازم تبقي قوية .. لازم تبقي قوية وتنهشي لحم أي حد يقرب من أختك .. لازم تقفي على رجليكي عشان ترجعيها .
هدأت شدا قليلًا وبدأت تستعيد قوتها شيئًا فشيئًا .. حتى وقفت فجأة ووجهت حديثها للؤي وفراس :
تعرفوا إيه عن الموضوع ؟
قص فراس كل شئ على مسامعها وبدأت هي بتفهم الوضع .
ولكن السؤال الآن .. من أين سيبدأون ؟
°°°°°°°°°°°°°°°°°°°°°°°°°°°°°°°°°°°°°°°°
كانت على وشك الذهاب بتاكسي ولكن أوقفها رؤية سيارة شادي القادمة .
ترجل من السيارة بهدوء واقترب منها بابتسامة وهو يتمتم :
عامله إيه ياست الكل ؟
روح :
بخير ياحبيبي الحمد لله .
شادي :
رايحة لفاتن ؟
روح :
أيوه ياحبيبي .. لازم أفضل جنبها الفترة دي على الأقل .. شريف قالي إن سمر مرجعتش البيت وبيكلمها تليفونها مقفول وهو قاعد مع فاتن وحاجات كتير في الشركة واقفة علي وجوده .
شادي :
طب يلا هوصلك .
روح بتردد :
شادي .. عايزة أتكلم معاك في موضوع .
شادي :
موضوع إيه ؟
روح :
يلا وديني لفاتن وفي الطريق نتكلم .
أماء شادي بهدوء ثم ركبا السيارة واتجه بها لمنزل فاتن .
شادي :
ها يا روح .. إيه الموضوع ؟
روح بتردد :
اا .. شادي إنت .. إنت شايف فاتن إزاي ؟
شادي وقد فهم ما ترمي إليه :
اممم .. شايفها بنت طيبة وقلبها أبيض ونقي ومتستحقش أبدًا اللي هي عيشاه حاليًا ده .
روح :
شادي .. إنت فاهم قصدي .
شادي بهدوء :
فاهم ياروح .. ومش عايزك تقلقي أبدًا .. أنا عمري ما هبص لمرات أخويا .
ابتسمت روح باتساع وهي تنظر إليه برضا تام .
فتابع شادي :
بس إبنك لازم يتربي .
روح بتأكيد :
أنا معرفش إيه حصله فجأة كده .
شادي :
أنا تقريبًا عارف اللي حصله .. بس سؤال .
روح :
أي ؟
شادي بهدوء :
يوم ما شدينا أنا وهو بالكلام في البيت .. لما مشيت انتي قلتيله إيه ؟
روح بتذكر :
قلتله على اللي حصل بالظبط يوم الحادثة .
شادي بابتسامة ساخرة :
ومدام سمر لما رحنالها المستشفى قالتلك الهمجي إبنك اتهجم على فاتن وضربها وقالها كنتي معاه ليلة الحادثة .. يعني الهمجي كان فاكر إن فاتن كانت معايا .. يعني باختصار كده .. الليلة كلها عاصم فاهمها غلط واتصرف غلط بناءًا على فهمه الغلط .. ومدفعش تمن ده كله غير المسكينة اللي اتصدمت في أمها وعمها .. ودلوقتي في جوزها اللي بيتهمها بالخيانة .. أعذريني يا روح بس أنا مش هسمح إن عاصم يعرف الحقيقة دي كلها غير لما يتأدب .
روح بحزن :
إزاي ؟
شادي :
لما يحس إن فاتن بتضيع منه .
روح :
بس دول روحهم في بعض .
شادي بهدوء :
بس إبنك شكَّاك .. والشك سِم قاتل .. بيقتل كل حاجة حلوة .. ولو مفاقش من شكه ده .. يبقى ميستاهلهاش .. وهيخسرها .
روح :
عندك حق .. بس هنعمل إيه ؟
شادي :
ولا اي حاجة .. في الوقت المناسب اللي هنحس فيه إنه فعلا عِقِل وعايز يفهم اللي حصل ساعتها يستاهل يعرف .. غير كده لا .
°°°°°°°°°°°°°°°°°°°°°°°°°°°°°°°°°°°°°
كانوا يجلسون جميعًا في إحدى غرف المستشفى يفكرون فيما يمكن فعله .. وقد اتفقوا على الا تتدخل الشرطه في هذا الأمر .
طرقات على الباب دلفت بعدها إحدى الممرضات وهي تتحدث باحترام إلى فراس :
دكتور فراس عمرو بيه بيدور على حضرتك .
فراس بهدوء :
خليه ييجي هنا يا آنسه دعاء .
أماءت دعاء بهدوء ثم ذهبت .. ولم يمر الكثير من الوقت حتى دلف عمرو إلى الغرفة .. وقد توقف مكانه حينما رأى لؤي الذي تعلق نظره بصديق حياته .
تذكر ذاك اليوم الذي أخبر لؤي فيه بكل شئ يخص القضية .. حينها أخبره لؤي بكل قسوة أنه لن يهتم لأحد وسيفعل ما يمليه عليه أمانته لعمله وضميره المهني .. ثم ترك المكان وغادر .
كانت نظرات عمرو تنم على العتاب والحزن والألم .. بينما نظرات لؤي تمتلئ بالندم والأسف .. فعمرو حاول مرارًا وتكرارًا الوصول للؤي ولؤي كان يصده في كل مره .
تحمحم عمرو أخيرًا ودلف بهدوء وصافح الجميع .. وحينما وصل للؤي ومد يده إليه .. تجاهل لؤي يد عمرو الممدو وقام باحتضانه بقوة ..
تعجب عمرو في بادئ الأمر .. لكنه بادل صديقه الاحتضان وشدد عليه كثيرًا .. ثم ابتعدا دون أن يتفوه أحدهما بشئ .
عمرو بهدوء :
في إيه ؟.. إيه اللي بيحصل ؟
تنهد فراس قبل أن يقول بهدوء :
أقعد وهتفهم كل حاجة .. دلوقتي ياجماعة مفيش غير حل واحد .
لؤي :
أي هو ؟
فراس :
نوصل لمهاب بأي تمن .
نظر لؤي تجاه شدا فوجدها تقبض يديها بعنف ووجهها أحمر من الغضب .. ومن دون سابق إنذار قامت بإلقاء عمود تعليق المغذي نحو النافذة بعنف لتتهشم النافذة تمامًا .. اقتربت منها دالين بحذر .. فصرخت شدا في وجهها وهي تقول بحده :
متقربيش .. قسما بدين الله بدور لو مكنتش في حضني الليلادي هقلب حياة مهاب لجحيم و هـ …
لم تستطع إكمال حديثها بسبب تلك الإبرة التي أعطاها فراس لها .. فسقطت فوق الفراش .
لؤي بخوف :
إنت عملت إيه ؟.. إيه اللي إنت ادتهولها ده ؟؟؟
فراس بهدوء :
اهدي شويه .. دي إبرة مهدئ بس مفعولها عالي شويه .. شدا مش لازم أبدا تكون موجودة وإحنا بنحاول نرجع بدور .. مشاعرها هتغلب عليها .. واللي أنا واثق منه إن لو مهاب اللي خطف بدور فهيساوم عليها .. وشدا هتسلم اللي معاها .. وده مستحيل أسمح بيه .
دالين بحده :
إنت أكيد اتجننت .. إيه اللي بتقوله ده .
فراس وهو يضغط على أسنانه بغضب :
لسانك يا دالين عشان معرفش المرة الجاية هعمل إيه .
دالين بحده :
انت بتهددني .
لؤي بغضب :
اخرسوا انتوا الاتنين .. ده مش وقت خناق … ده بدل ما نكون إيد واحدة .
فراس وقد لاحظ عدم وجود حازم بينهم :
هو حازم فين ؟
دالين وكأنها استوعبت ذلك الآن :
ده .. ده كان هنا من شوية .
فراس بسرعة :
لؤي .. لو مهاب خطف بدور فعلا عشان التقارير اللي وصلتك واللي هتتنشر بكره .. فهيتصل بشدا عشان يساومها .. وفي الحالة دي إحنا لازم نلعبها بعقل .
لؤي وكأنه وجد الحلقة المفقودة الآن :
إزاي مفكرناش كده .. طيب فين تليفون شدا ؟
أخذت دالين تفتش جيوب شدا لكنها لم تجده .
لؤي وهو يتحرك :
أنا هنزل أشوفه في العربية ممكن وقع منها .. وإنت إتصل عليه بردو يا فراس .
قاطعه فراس بصوته :
لؤي .. أنا بتصل فعلا بس المكال قيد الإنتظار .
نظروا جميعًا إلى بعضهم البعض وفي صوت واحد :
حازم !!!!!!
لؤي :
عمرو افضل جنب شدا ودالين هنا وابعت أمِّن المكان .. فراس يلا فورًا .. لازم نلاقي حازم .
°°°°°°°°°°°°°°°°°°°°°°°°°°°°°°°°°°°°°
نزل من بينهم بهدوء دون أن يشعر أحد منهم به .. جلس في السيارة بألم وبدأت دموعه تتجمع داخل مقلتيه .. لم يخبرها بأنه يحبها .. لم يحيى معها الحب كما يجب .. لقد كان ينتوي فعل ذلك ويتقدم لخطبتها بمجرد عودة دالين .. لما يحدث كل هذا معهم ؟!
وبينما هو غارق في حزنه وآلامه فإذا بهاتف شدا الذي وضعه على المقعد المجاور بعد أن جلبه من منزل لؤي يصدح صوته برقم غريب .. نظر تجاهه وكان على وشك تجاهله .. لكن شيئًا ما بداخله دفعه للرد سريعًا .
أتاه صوت الطرف الآخر بمجرد أن ضغط زر الإجابة :
مفكرة نفسك صحفية ذكية ومفيش منك .. وإنك لما تمشي ورا فراس وتحشري بينا الحشرة أختك عشان تزرعلنا برنامج اختراق وتسرقي المعلومات اللي على أجهزتنا .. وفي الآخر تفكري إننا هنعديها بالساهل .. تبقي غلطانه يا قطة .. المعلومات اللي معاكي قصاد رقبة أختك .
حازم وقد أغمض عينيه بقوه :
أنا حازم خطيب بدور وزميل شدا في الشغل .. والمعلومات والبيانات اللي إنت عايزها معايا كلها وأقدر أجبهالك في الوقت والمكان اللي تعوزه .. بس متلمسش شعره من بدور .. قولي الوقت والمكان .
أتاه الصوت الآخر :
تعجبني .. هستناك الساعه ٦ في ( … ) ولوحدك .. ولو لعبت بديلك .. أنا كده كده رايح .. فالقطة بتاعتك هتروح فيها .
حازم :
أنا لوحدي وهاجي لوحدي ومعايا كل اللي طلبته .
الطرف الآخر :
سلام .
أغلق حازم معه بعدما رأى المكالمة الفائته من فراس .. فتنهد بهدوء ثم أرسل المكالمة التي سجلها للتو برقم الهاتف للؤي .. وقاد سيارته متجهًا للجريدة .
في نفس الوقت خرج فراس ولؤي من المستشفى وشاهدوا الغبار الذي خلفته سيارة حازم .. فأخرج لؤي الهاتف حينما أتاه صوت إشعار لإحدى الرسائل .. وقام بتشغيل المسجل .. ثم نظر هو وفراس لبعضهما بقلق .
فراس :
تفتكر هيسلمهم الورق؟
لؤي :
متستبعدش .. بس طالما بعت التسجيل يبقى عايزنا نتصرف ونلحقه .
فراس :
إحنا قلنا مفيش شرطة .
لؤي :
من غير شرطة يافراس .. إحنا محتاجين عمرو .. بس البنات ..
فراس :
محلولة .
أخرج فراس هاتفه وقام بالاتصال على شادي الذي أجاب على الفور :
فراس !!
فراس سريعًا :
شادي .. عايز رجالة أمن يقفوا على غرفة في المستشفى عندي وعايزك شخصيًا معايا في مهمة ضرورية .
شادي :
مسافة السكة وأكون عندك في المستشفى .
أغلق فراس معه وبقي هو ولؤي في انتظاره .. لا يزال لديهم الوقت الكافي للسيطرة على الأمر .
°°°°°°°°°°°°°°°°°°°°°°°°°°°°°°°°°°°°°
بينما لدى شادي .. فكان قد وصل لمنزل فاتن للتو حينما أتاه اتصال فراس ..
شادي بهدوء :
أمي أنا عندي شغل .. فهروح أنجزه أنا … وانتي خليكي هنا ولما أخلص هعدي أخدك .. تمام ؟
روح :
تمام يا حبيبي .. خلي بالك من نفسك .
قبل جبينها بحب ثم خرج من باب الڤيلا مجددًا ولم ينتبه لذاك الذي وصل للتو .. وحينما رأى شادي يغادر .. ظن بأنه كان في الداخل وخرج الآن فقط .. فكز على أسنانه بغضب .. ونزل من السيارة وهو ينتوي ارتكاب جريمة اليوم .
دلف إلى الڤيلا وأول من قابلته كانت روح التي دلفت للتو هي الأخرى .
روح بهدوء :
عاصم !.. تعالى ياحبيبي .
عاصم وهو يحاول أن يكتم غضبه :
سؤال وجاوبيني بصراحة .
روح بهدوء :
طب تعالى نقعد في الجنينة بره عشان فاتن متصحاش على صوتنا .
عاصم بعدم فهم :
هي فاتن نايمة ؟
روح بتأكيد :
أيوه .. بتاخد علاج بينيمها فترة طويلة ولسه موصلني شادي عشان آخد بالي منها عما شريف يشوف شركته ويرجع .. لإن في شغل كتير متراكم عليه وواقف على وجوده .. وسمر هانم معرفش هي فين من وقت ما خرجنا من المستشفى .
لقد تعمدت روح بأن تتحدث بالتفصيل في هذا الأمر لأنها متأكدة من رؤية عاصم لشادي حينما خرج الآن .. ففضلت أن توضح له كونه لم يدلف إلى هنا ولم يرى فاتن كذلك .
عاصم وقد بدأ يهدأ قليلا :
طيب يلا .
خرجا إلى الحديقة .. وأتت الخادمة بفنجانين من القهوة لهما .. وطلبت منها روح بأن تناديها حينما تستيقظ فاتن .
روح بهدوء :
قول يا عاصم يابني .. إيه اللي عايز تسألني فيه ؟
نظر لها عاصم لبعض الوقت ثم أغمض عينيه بتعب .. فمدت روح يدها إليه وأمسكتها بين راحتي يدها وأخذت تربت عليها بحنان قبل أن تقول بهدوء :
هحكيلك كل حاجة ياعاصم .
نظر لها عاصم بترقب .. وبدأت روح تقص عليه كل ما حدث منذ أن أرسل لها مراد رسالة يخبرها فيها بأنهم قد حددوا موعد الزفاف إلى أن أخبرها شادي بأنه لن ينظر أبدًا لزوجة أخيه .. لكنه تعمد مضايقته كي يستفيق من وهم شكوكه وعدم ثقته بزوجته .
عاصم وقد أغمض عينيه بألم .. كيف سيواجه فاتن الآن بعدما فعل ما فعله بها ؟.. كيف ستسامحه ؟.. لقد آلمها في أكثر أوقاتها إحتياجًا له .. لقد شهدت خيانة والدتها وعمها .. وهذا ليس بالسهل عليها .. ثم مرت بذاك الحادث والذي نجت منه بفضل شادي .. ليأتي هو ويضربها ويتهمها بالخيانة وتنجو للمرة الثانية بفضل شادي .. ليعود من جديد ويتهمها بالخيانة .. وآخر ما فعله هو طلبه للزواج من أخرى .. يا إلهِ .. ماذا فعل !!.. هل يعقل أنه خسرها الآن ؟.. هل حقًا سيخسرها ؟
شعرت روح بتخبطه فأرادت أن تهون عليه قليلًا :
اسمعني ياعاصم يابني .. الواحدة مننا ياحبيبي لما بتحب من قلبها بتسامح .. بس فاتن هتحتاج شوية وقت .. لازم تديها وقت تستعيد فيه نفسها وروحها .. متبعدش عنها ومهما طلبت منك إنك تبعد تبِّت فيها .. افضل عافر عشان تكسبها تاني .. اللي هي مرت بيه في الفترة الأخيرة من أول يوم دالين اتخطفت فيه لحد اللحظة دي مهواش سهل .. فلازم تتحمل أي رد فعل هيصدر عنها .. واتأكد إن القلب هينتصر في النهاية .. انتوا حبكوا كبر معاكوا من وانتوا صغيرين .. فصعب يتهد بسهولة .. بس إنت بدأت تهده بأفعالك في الفترة الأخيرة .. لكن لسه في فرصة تبنيه تاني وتقويه المرادي ومتسمحش للنسمه تعدي منه .. فاهمني ياحبيبي ؟
أماء عاصم بهدوء كطفل يتم شرح أحد الدروس له ..
فتابعت روح بهدوء :
وشادي ياعاصم .. شادي لما قلتله إنت شايف فاتن إزاي .. قالي أنا مش هبص لمرات أخويا يا روح .. رغم كل اللي حصل شايفك أخ .. وعايزك أخ يا عاصم .. شادي طول عمره لوحده .. عايش بين شغله ورجالته .. لا ليه أخ ولا ليه صاحب .. ولما جه مصر وقرر يستقر قال هيقعد بين أم وأخ بيتمناه .. شادي إنسان كويس أوي ياعاصم يابني .. كويس بجد .
عاصم بهدوء :
مين اللي بعت الرسالة ليكي ؟
روح بتنهيدة :
معرفش يابني .. حتى شادي كان قال إنه هيدور ورا الرقم بس أديك شايف مبيقعدش أبدًا .. ده حتي مش قادر يسافر انجلترا عشان يصفي شغله هناك .
عاصم بهدوء :
أنا عايز الرقم يا أمي .
أخرجته روح له بابتسامة وأعطته إياه .
عاصم بهدوء :
همشي أنا دلوقتي .
كان على وشك الذهاب لكن أتاه صوت والدته :
مش عايز تشوف مراتك وتطمن عليها الأول ؟
عاصم بألم :
مظنش إنها هتحب تشوفني دلوقتي أبدا .
روح بهدوء :
مش لازم تشوفك .. على الأقل تحس بوجودك .. يلا تعالى شوفها وامشي .
صعد معها للأعلى بهدوء ودلف لغرفة فاتن .. وجدها نائمة بكل هدوء .. وخصلاتها تنتشر بحرية على وسادتها .. ووجنتيها حمراوتين كعادتهما دائمًا .. أخذ يتأملها بشوق وحنين وألم .. كيف استطاع أن يفعل بها هذا ؟.. أين كان عقله ؟ لقد كان متهورًا بما يكفي لجعلها تكرهه .. أغمض عينيه بألم حينما وصل تفكيره إلى هنا .. هل كرهته حقًا أم ستسامحه كما قالت والدته ؟
°°°°°°°°°°°°°°°°°°°°°°°°°°°°°°°°°°°°°
وصل شادي ومعه رجاله حيث المستشفى .. صعد ثلاث رجال لغرفة شدا ودالين .. ونزل عمرو وتحرك أربعتهم ومعهم ثلاثة أشخاص آخرين أحضرهم شادي .
°°°°°°°°°°°°°°°°°°°°°°°°°°°°°°°°°°°°°°°
وصل حازم حيث العنوان الذي أخبره به المتصل ..
ونزل بهدوء وبيده الفلاشة الخاصة ببيانات المستشفى .
كان المكان مظلم بعض الشئ .. اقترب منه أحد الرجال ضخام البنيه وفتشه .. ثم دلف به إلى الداخل .. قابله مهاب عند الباب وهو يبتسم باتساع :
شاطر .. بحب الرجاله المتفاهمه أوي .. أنا فعلا فخور بيك .
حازم :
بدور فين ؟
مهاب :
البيانات .
حازم :
بدور .. أشوف بدور واستلم بياناتك .
ابتسم مهاب وهو يحك ذقنه ناظرًا للأرض ثم رفع رأسه وأشار بها إلى الرجل الواقف بجانب حازم .. فضربه الرجل في معدته بقوة جعلت حازم يترنح قليلا وتحول وجهه للأحمر بسبب الألم الذي شعر به .
مهاب :
البيانات .
حازم بإصرار :
بدور .
ضربه الرجل مجددًا .. فبصق دماءًا هذه المره .. وكان سيفقد الوعي من شدة الألم لكن لا .. يجب أن يتماسك .. ليس الآن أبدًا .
مهاب :
البيانات .
حازم :
انت بتتعب نفسك وبتضيع في وقتك على الفاضي .. خليني أشوف بدور وخد اللي إنت عايزه .
مهاب بضحكة صاخبة :
أنا أصلا لسه مخلصتش اللي أنا عايزه من بدور .. انت جيت في وقت مهم جدًا .. فاللي أنا عايزه هاخده وبعدها هتاخدها .. لإنها بعدها متلزمنيش .
حازم وهو يحاول ألا يفكر فيما قاله مهاب .. فما يقصده مهاب بحديثه ليس بالنية الحسنة أبدًا .
حازم :
انت قلتلي البيانات هي اللي تلزمك .. وأنا قلتلك تاخدها وأخد بدور .. فين كلمتك كراجل ؟.. ده كان اتفاقنا .
مهاب بتفكير :
الاتفاق انتهت صلاحيته .. امممم .. بس تصدق أقنعتني .. انت صح فعلا .. بس أنا مش عايزك تنهار لما تشوفها .. إتفقنا ؟
نظر حازم تجاهه بوجه شاحب .. ما الذي يقصده ذلك اللعين ؟.. ماذا فعل بها ؟
°°°°°°°°°°°°°°°°°°°°°°°°°°°°°°°°°°
يتبع ….
خطوات سهلة لتثبيت تردد قناة ميكي كيدز لجميع الأطفال بصور جديدة
الأهلي والنصر لختام مثالي أمام الغرافة وبيرسبوليس
كيف استفاد الزمالك من الأهداف العكسية لتحقيق نتائج مميزة هذا الموسم؟
اتحاد الكرة يعلن تعيين الكولومبي أوسكار رويز رئيساً للجنة الحكام
مانشستر يونايتد يهزمه توتنهام ويهبط إلى المركز الـ15 في الدوري الإنجليزي – FilGoal
نزيف صناعة مركبات الهيدروجين مستمر.. شركة شهيرة تنضم لقائمة الضحايا – الطاقة
أسعار الذهب في الكويت اليوم: عيار 21 يسجل 26.175 دينار بنهاية التداولات
