رواية ضمير ميت الفصل الثالث والعشرين 23 بقلم دنيا آل شملول

رواية ضمير ميت الفصل الثالث والعشرين 23 بقلم دنيا آل شملول

 ضمير ميت

الحلقة الثالثة والعشرون

أنهى جميع أعماله وتفرّغ تمامًا لكي يعيد محبوبته إليه .. الآن لن يشغله أي شئ عنها وعن محاولة إرضائها .. خرج من مكتبه وأخبر داليا السكرتيرة بأنه لن يعود قبل أيام وبأن عليها مباشرة الأعمال المهمة وأن ترسل له الأوراق التي تتطلب توقيعه .. ذهب إلى منزله فوجد والده يجلس إلى الأريكة ويرتشف من فنجان قهوته ..

وقف مواجهًا له وعينيه حمراوان من قلة النوم .. فهو قضي الليل بأكمله في إنهاء أعماله .

عاصم :
مبسوط ؟

مراد بلامبالاه :
ليه إنت زعلان ولا حاجه ؟!

عاصم :
دي مرات أخوك .. إزاي ؟.. إزاي قدرتوا تعملوا كده ؟

مراد زافرًا بضيق :
إنت هتعلمني اللي ينفع واللي مينفعش يا عاصم ولا إيه ؟

عاصم بغضب :
إنت بتقول إيه !!! بقولك مرات أخوك .. يعني حرام … علاقتكوا كلها حرام في حرام .

مراد :
اللي ميخصكش متتدخلش فيه .. روح اجري صلح علاقتك بمراتك .

عاصم بتعب :
تصدق !.. انت صح .. مينفعش أضيع وقتي مع حد مش في دماغه ومبيدورش غير على نفسه وحياته واللي يهمه وبس .. مراتي أحق بكل دقيقة بضيعها دلوقتي .

مراد ببرود :
شاطر .

تحرك عاصم من أمامه وقد عزم على إنهاء كل هذا .. سينفرد بأعماله وسيعيد محبوبته .. منذ متى ووالده يهتم من الأساس ؟.. سيعتمد على نفسه .. ونفسه فقط .

دلف إلى غرفته وبدل ملابسه واستغرق في نوم عميق .. فبعدما يستيقظ ينتظره الكثير ليقوم به ..

°°°°°°°°°°°°°°°°°°°°°°°°°°°°°°°°°°°°°°°

عادت الفتيات لڤيلا فراس .. وطوال الطريق لم يكفوا عن الثرثرة في أمور الزواج وترتيباته .. وقد انتهى بهم الحال إلى أن هاتفت غرام عمرو وأخبرته بأنها ستهتم هي بكل أمور حفل الزفاف وسيكون في ڤيلتهم .. اعترض في بادئ الأمر ولكنه وافق على مضض بعدما تحدث له فراس وأخبره بأن الفتيات سيهتممن بهذا الأمر .. وبأن هذه رغبة غرام وليس هناك فرق بينهم وبأن عمرو سيتكفل بكل تكاليف الزواج ولكن الإختلاف فقط في المكان .

ترجلت الفتيات ودلفن ليقمن بتقييم المكان وتهيئته على أكمل وجه كي يكون أنيقًا ولائقًا بملاك صغير كغرام .

فراس بهدوء :
هتشتغلوا شغل مهندسين مش كده ؟

شدا بحماس لم تعتده الفتيات عليها :
هنظبط الدنيا .

ذهب فراس لإنهاء بعض أعماله في المستشفى بينما بقيت الفتيات مع غرام يرتبون المكان ويعدونه للزفاف الذي لم يتبقى عليه سوى يوم واحد فقط .

جلست دالين إلى أرجوحة غرام وبدأت بفتح العلبه التي أعطاها لها فراس .. كانت عبارة عن علبة سوداء صغيرة بداخلها علبة أخرى علمت من مظهرها كونها علبة لهاتف .. شهقت بفرحة وهي تخرجه من العلبة .. كان لونه أزرق وموضوع بعلبه سوداء .. هل هي مصادفة أن يجلب لها اللونين المفضلين ؟!! أم أنه يعلم كونهما مفضلين لديها ؟

أجفلها صوته الذي أتى من العدم فجأه :
عجبتك الهدية ؟

دالين وهي تنظر له بفرحة :
أوي أوي .. بس .. بس مكنش في داعي بجد .

فراس وهو يهز كتفيه كعلامة اللامبالاه :
أنا السبب إن تليفونك يتحرق مع العربية .. فده واجبي لا أكثر .

أصابها الإحباط على الفور وهي تخفض بصرها للأسفل ثم ابتسمت بألم وهي تتمتم :
شكرًا مرة تانية .. بعد إذنك .

غادرت المكان ودموعها تهدد بالسقوط .. بينما بقي هو بمكانه وبداخله رغبة كبيرة في أن يجذبها إلى أحضانه ويخبرها بأنه يود أن يجلب لها كل شئ تحبه وأي شئ مهما يكن .. يود بث مشاعره إليها .. لكنه بقي مكانه ولم يتحرك .. كانت فقط رغبة وقد تبخرت مع تبخر رائحتها من المكان بعد مغادرتها .

جلس إلى الأرجوحة ورفع رأسه للسماء وشرد بالأوقات التي جمعتهم معًا .. يتذكر كيف احتوته بكلماتها البسيطة في ذاك اليوم الذي ذهب إليها شاكيًا همه .. يتذكر لمعة عينيها السعيدة بيوم مولده .. كم كانت جميلة وهادئة .. يتذكر خوفها منه في أول مره رأته فيها وكيف تعمد إخافتها في ذاك اليوم بسبب ثوران عقله وقلبه لمعرفة كون الخاطف هو والده ..

أخرجه من شروده رأس غرام التي وُضعت على كتفه محاوطه ذراعه بذراعيها ..
أمال برأسه على رأسها بهدوء وهو يتمتم :
مبسوطة ؟

غرام :
أوي أوي .

فراس بابتسامة :
وأنا ده اللي يهمني .. إوعي تزعلي في يوم أبدًا .. ولا تحزني على حاجة .. حافظي على جوزك وبيتك .. استحملي شغله ومواعيده لإن الشرطة معروفين بإن مواعيدهم مش منتظمة .. يعني ممكن يبقى في حضنك الساعة اتنين بليل وفجأه يجيله تليفون يخليه يطلع بسرعة على ملى وشه .. ممكن تجيله مهمه يسافرلها بالشهر ويضطر يقفل تليفونه ومتعرفيش تتواصلي معاه .. هيبقى قلق ليكي وصعب عليكي بس لازم كل مره يطلع فيها تكوني واثقة إن ربنا هيحيميه ويرجعهولك بالسلامة .. متضغطيش عليه في حاجه عشان هو طبيعي مضغوط في شغله .. يعني لو جاي متأخر من بره وشكله تعبان مش لازم تطلعوا تسهروا .. ممكن تخليها وقت تاني وهو من نفسه هيعمل إجازات لنفسه عشان يديكي حقك من وقته .. لازم تقدريه وتحترميه .. مش معنى مثلا إنك بتهزري معاه أو هو بيهزر معاكي وتقوليله يابايخ أو يا رخم قدام حد .. إوعي يا غرام .. ديما تعمليله هيبه واحترام قدام الناس .. وفي بيتك بينك وبينه اعملوا كل اللي نفسكوا فيه لو هتضربوا بعض .. لكن قدام الناس ملوش غير الاحترام .. متجرحهوش بكلمة انتي عارفه إنها هتجرحه لمجرد إنك تاخدي حقك .. لا في طرق كتير تاخدي حقك بيها غير دي .. واوعي في يوم يطلبك وانتي زعلانة وترفضيه .. حاولي على قد ما تقدري مهما يكون بينكوا مشاكل متناميش غير في حضنه آخر الليل .. قدريه وقدري اللي بيعمله عشانك .. افتكريله الحلو وبس .

انتهى من حديثه بتنهيدة قبل أن يتساءل بهدوء :
فهمتي كلامي ؟

كانت غرام تنظر له بعيون دامعة وما إن انتهى حتى ألقت بنفسها بين ذراعيه تحتضنه بقوه : إنت مش بس أخويا .. إنت أخويا وأبويا وابني وحبيبي وكل حاجه ليا في الدنيا .. ربنا ما يحرمني منك أبدا .

فراس بابتسامة وهو يربت على ظهرها بحنان
:
ولا يحرمني منك يا كل دنية فراس .

غرام بهدوء بعد صمت طال لدقائق :
فراس .

فراس :
همممم

غرام بهدوء :
مش ناوي تاخد خطوه في علاقتك بدالين .

فراس بعد دقيقة صمت :
مفيش علاقة بيني وبين دالين عشان آخد فيها خطوة .

غرام :
فعلا .. حتى دقات قلبك اللي زادت بمجرد ما سمعت إسمها بتقول كده .

فراس متحمحمًا :
هي غلطت فيا .

غرام بهدوء :
أكيد مكنتش تقصد .

فراس :
وإن يكن .. متعتذرش ؟!.. أو حتى متحاولش ؟!

غرام بهدوء ونبرة غموض :
نشوف الأيام مخبيالنا إيه .

°°°°°°°°°°°°°°°°°°°°°°°°°°°°°°°°°°°°

تحركت الفتيات على وعد بالعودة في الغد لترتيب المكان بعدما خططوا جميعًا له .. وغدًا سيكون التنفيذ .

وصلت دالين بفاتن إلى الڤيلا ودلفتا بهدوء .. كان المكان هادئ إلا من غرفة المكتب الخاصه بوالد فاتن .. فكان يصدر عنها صوت اغنية لأم كلثوم ..

نظرت دالين لفاتن بابتسامة وهي تتمتم بهدوء :
عمو شريف شكله بيحب ولا إيه !

ضحكت فاتن بخفه وهي تتمتم :
شكله كده .. تعالي نطب عليه .

أماءت دالين وذهبتا بهدوء تجاه مكتب شريف الذي كان يجلس إلى مكتبه رافعًا رأسه إلى ظهر مقعده وينظر للسقف في شرود .. وابتسامة شارده تزين ثغره ..

دالين بابتسامة :
أوبااا .. أبوكي رجع مراهق يا تونا .

فاتن وهي تكتم ضحكتها :
لا بجد هو عامل ليه كده !

دالين بمكر :
هنعرف حالاً .

وما إن أنهت جملتها حتى دفعت باب الغرفة وقفزت إلى الأريكة المقابلة للمكتب وهي تقول بمرح :
قفشتتتتك .

شريف وقد أجفله حركة دالين .. لكنه ابتسم سريعًا وهو يقول بهدوء :
اااه .. رجعت للدوشه تاني أنا .

دالين وهي تقف في غرور مصطنع :
طبعا طبعا .. ربنا مش يحرمك مني أبدا .. وبردو مش هتفلت من إيدي .. قولي كده إيه سر الابتسامة دي والأغنية دي والسرحان ده .. ها .. إيه ها ؟

فاتن بضحكة :
بابي العاشق الولهان بيسمع ” الحب كله ” !

شريف :
إتلمي يا ماما انتي وهي .. ويلا بقا على بره .

دالين :
إحنا بننطرد !!

فاتن :
تعالي يا دالين تعالي .. هنطلع اوضتنا يا بيبي ونسهر سوا نتفرج على فيلم كوميدي يفرفشنا .. وخليه لوحده يسمع أم كلثوم .

شريف بابتسامة .. فابنته عادت لها ابتسامتها بعودة دالين :
يلا يلا هنرش ميه يلا .

دالين بضحكة :
مقبوله يا اونكل .

ثم امسكت بذراع فاتن وهي تقول :
يلا يا بنتي بدل ما ننضرب .

خرجتا وصعدتا لغرفة فاتن .. دلفت فاتن أولا لدورة المياه وارتدت منامة مريحة .. وخرجت لتدلف بعدها دالين .

كانت تجلس إلى فراشها تنظر إلى المرآه أمامها بشرود .. ترى ماذا يفعل الآن ؟.. هل حقًا شك بها بسهولة ؟.. كيف استطاع أن يفعل بها هذا ؟.. كيف استطاع أن يرفع يده ويصفعها بكل بساطة ؟.. كيف شبهها بوالدتها وهي التي قضت كل العمر بجانبه .. هو وفقط ولا أحد آخر .. كيف غزا الشك قلبه بسهوله هكذا ؟.. لما لم يسمع منها كما سمع من غيرها ؟.. لما جعل الأمور تصل إلى هنا ؟.. من المفترض أنها تنام بين أحضانه الآن .. فزواجهما كان سيتم بعد عقد القران بشهر واحد فقط .. وها قد مر شهر ونصف .. ابتسمت بتعب وهي تتنهد بهدوء حتى جذب انتباهها صوت يأتي من الأسفل ..

وقفت لتتجه إلى البالكون ولكن اوقفتها دالين التي خرجت للتو وهي تقول بحماس :
تونا .. عايزه أجرب الدريس بتاع الفرح .. متحمسه أوي أوي ألبسه .

فاتن بابتسامة : وأنا كمان متحمسه جدا .. بقولك في .. في صوت تحت .

دالين وهي تلهيها عن ذلك :
أبوكي ما هو تحت .. تعالي نشوف الحاجة اللي جبناها بقا .

ألقت فاتن نظرة على البالكون قبل أن تتحرك مع دالين تجاه الفراش وبدأوا في إخراج الأغراض التي أحضروها ..

وبعد بعض الوقت سمعت فاتن صوت عاصم ينادي من الأسفل .. وقفت بسرعة وأخذت تفرك يديها معا وهي تنظر إلى البالكون بتوتر ..

دالين بهدوء :
تعالي نشوف في إيه !

تحركت معها فاتن بهدوء حتى دلفوا من البالكون ووقفتا ناظرين إلى الحديقة في الأسفل .. كانت جميع الأضواء مطفأه .. وما إن خرجت حتى فُتحت الأضواء البنفسجيه والبيضاء التي تُزين الشجر وأطراف البسين والبوابة والتي تأخذ مجرى من أسفل البالكون الخاص بها إلى نهاية البوابة كعدة صفوف متراصة بجانب بعضها بعضًا .. وبجانب اضواء البسين تتراص زهور بنفسجيه وبيضاء تشكل قلوب متعدده .. والبسين يمتلئ بالمياه ويطفو على وجهه نفس الزهور ولكن بعشوائية ساحرة .. وفجأه بدأت البلالين في التصاعد من الأسفل للأعلى ببطء وجميعها بيضاء وبنفسجيه .. البيضاء مكتوب عليها باللون البنفسجي ” تونايتي ” .. والبنفسجيه مكتوب عليها بالأبيض ” بحبك ” .. بدأ يصدح صوت موسيقى هادئة في المكان مع صعود تلك البلالين للسماء .. وكانت بداية مطلع أغنيه ” سبت فراغ كبير “

كان كل شئ مفاجئ بالنسبة لها .. لكن ما صدمها حقًا .. هو رؤيتها لتلك الفرقه التي تحتل جانب الحديقه وتعزف للأغنيه وعاصم يقف أمامهم حاملًا المايك بيده .. وروح وشادي وشريف وشدا وبدور وحازم يجلسون في الأسفل ناظرين إليها بهدوء وترقب ..
بدأ عاصم الأغنيه ..

سبت فراغ كبير
عندي والله حبيبي، حبيبي
وإنت هناك بعيد
مش بعيد عني حبيبي
قولي إزاي أعيش

سبت فراغ كبير
عندي والله حبيبي، حبيبي
وإنت هناك بعيد
مش بعيد عني حبيبي
قولي إزاي أعيش

كل يوم بقول
إمتى ترجع ليّ إمتى
صعبة أوي الحياة
صعبة من غيرنا أنا وإنت
قولي إزاي أعيش

ذكريات كثير
بتقابلني معاك يوماتي
بتفكرني بيك
و بسنين حلوة في حياتي
قولي إزاي أعيش

مهما غبت سنين عن عيني إبتسامتك ضي عيني
روحي مش ممكن هترجع إلا بوجودك حبيبي
حبيبي
حبيبي

سبت فراغ كبير
عندي والله حبيبي، حبيبي
وإنت هناك بعيد
مش بعيد عني حبيبي

انتهت الأغنيه وعينيهما متلاقيه ببعضهما في حديث صامت طويل .. قطعه صوت عاصم الذي صدح مجددًا يقول بصوت متعب :
بحبك ومش قادر أعيش من غيرك .. بحبك وندمان على كل لحظة زعلتك فيها .. بحبك وهعمل المستحيل عشان أشوف ضحكتك بتنور حياتي من تاني .. بحبك وهفضل أحبك لآخر يوم في عمري .. تونايتي .. أنا آسف .

شهقت بقوة وهي تركض لغرفتها وألقت بنفسها إلى الفراش على معدتها ووضعت الوسادة فوق رأسها وبدأت تبكي بقوه .

أماءت لهم دالين بهدوء بمعني أنها لن تتركها .. ثم دلفت خلفها وجلست إلى جانبها وأخذت تمسد ظهرها بحنان دون أن تنبس ببنت شفه .. فهذا أفضل .. عليها أن تبكي كي تُخرج كل ما بقلبها من حزن .. عليها أن تنظف عينيها من آثار الدموع التي تتراكم وتأبى السقوط .. أخذت شهقاتها في الإنخفاض تدريجيًا وانتظمت أنفاسها لتعلم دالين بأنها ذهبت في سبات عميق .. فقامت بجذب الوسادة عن رأسها وسطحتها بشكل مريح ونزلت للأسفل حيث عاصم والبقيه .

عاصم بلهفه :
هي كويسه يا دالين صح ؟.. هتسامحني مش كده ؟

دالين وهي تربت على يده بهدوء :
مظنش إنها عايزه تخرجك من حياتها يا عاصم .. وإلا كانت قلعت دبلتك من بدري .. وده معناه إنها هتسامحك عاجلًا أم آجلًا .. بس شوية وقت .. اللي هي فيه مش شويه .

عاصم بتنهيدة طويلة :
وأنا هحاول تاني وتالت وألف وهفضل أحاول ومش هيأس أبدًا .

تحركوا جميعًا للذهاب بعد بعض الوقت .. وقف عاصم أمام شادي وصافحه بامتنان :
أنا مش عارف أشكرك إزاي على وقفتك وفكرتك دي .

شادي بمزاح :
لا شكر ولا حاجه ياعم .. يمكن تردهالي قريب لما أشبك نفس الشبكه بتاعتك دي .

عاصم بابتسامة :
أهلا بيك يا صاحبي .

ابتسم شادي بهدوء وهو يتمتم :
وبيك يا بو الصحاب .

دمعت عينا روح تأثرًا بهما .. فاقترب شريف منها وهو يتمتم بهدوء :
ششش .. متعيطيش .

روح بابتسامة :
مبسوطة إنهم بقوا أصحاب على الأقل .. كنت خايفة أوي عاصم يفضل مش متقبله .

شريف بهدوء :
كل حاجه بتيجي مع الوقت يا روح .

أماءت روح بهدوء قبل أن يأتي شادي ويأخذها معه ليذهبان .. بينما ذهب عاصم لمنزل والده .. وعادت بدور وشدا مع حازم إلى المنزل ليوصلهما ..

شدا بتنهيدة :
ربنا يصلح أمورهم .. أنا متأكده إن اللي هما فيه ده بسببنا .

بدور :
ليه ان شاء الله .

حازم بضحكة :
حسدناهم .. طول الوقت نقولهم بطلوا تتمحننوا انتوا الاتنين .. وشويه شويه تسلطوني أروح أسحب عاصم من جنبها وشويه تانيه وتقوموا انتوا ساحبين فاتن .. دا احنا كنا مطلعين عينهم أصلا .

بدور بضحكه :
عندك حق والله .. بس حبهم قوي .. وهيرجعوا .. أنا واثقه من كده .

حازم وشدا :
يااااارب .

°°°°°°°°°°°°°°°°°°°°°°°°°°°°°°°°°°°°

دلف إلى منزله بتعب وهو يلعن عمرو تحت أنفاسه .. لقد أرهقه اليوم كثيرًا ..

جنات وهي تقابله بابتسامه :
حمد الله على سلامتك يا حبيبي .. أجهزلك عشا ؟

لؤي :
لا لا .. الحسنة الوحي اللي عملهالي عمرو الزفت النهارده إنه عشاني .

جنات بضحكه :
شكلك مهدود ياحبيبي .. يلا هانت أهو .. صحبك بقا وهيدخل بعد بكره .

لؤي :
يدخل على قفا أهلي أنا يعني .

جنات وهي تربت على صدره بحنان :
عقبال ما اتعبلك كده يابني يارب .

لؤي بابتسامه :
لازم تفصليني يعني .

جنات بابتسامة :
مشفتهاش ؟

لؤي بتصنع عدم الفهم :
هي مين دي ؟

جنات وهي تلكزه في خصره :
إنت فاهم .. متستعبطش عليا .

لؤي بضحكه :
لا لا مشفتهاش .. كانت مع غرام مرات عمرو بينقوا الحاجه النهارده .

جنات بابتسامة أمل :
عقبال حاجتكوا كده يارب .

لؤي بهدوء :
أنا هطلع بقا أرتاح شويه عشان تعبان .

أماءت جنات بهدوء ليصعد إلى غرفته وهو يفكر في مجنونته .. ترى هل تشعر به كما يشعر هو بها ؟.. هل حقا سيكون لهما نفس الطريق ؟.. بقي في مكانه يفكر بها حتى غلبه النعاس وذهب في سبات عميق .. دون أن يدري بأن هناك من تنام فوق فراشها ناظرة لسقف الغرفة بشرود تفكر في تلك الخطة التي اقترحتها دالين وهي تدعو داخلها بأن تنجح حقًا .. مهما حدث هي مدينة له على أي حال .. كما أنها .. كما أنها تحبه .

°°°°°°°°°°°°°°°°°°°°°°°°°°°°°°°°°°°°°

كانت تجلس إلى فراشها وأمامها اللابتوب الخاص بها وصوره التي تملأ الفيس بوك أمامها .. تشاهدها للمرة العاشرة في هذه الليلة .. كم هو وسيم وأنيق في اختيار ملابسه .. شعره البني الطويل .. عيونه الخضراء .. لحيته الخفيفة .. ابتسامته .. نظرته .

تنهدت بابتسامه وهس تفكر في نفسها .. هل يتذكرها ؟.. هل احتلت جزء بسيط من تفكيره كما فعل بها .. أم أن الصدفه التي جمعتهم كانت مجرد صدفه وانتهت ونسيها بمجرد خروجه من المكان ؟.. هل ستراه قريبًا ؟

تذكرت حفل زفاف صديقها عمرو .. بالتأكيد سيحضر .. فلؤي أخبرها سابقًا بأنهم جميعًا أصدقاء .. اغلقت اللابتوب وهي تنتظر أن يمر الوقت بفارغ الصبر حتى تراه .. وأخذ يأتي برأسها مشهد تلو الأخر عن مقابلتهما ..

بينما عند شادي كان يجلس وأمامه ورقة وقلم وأخذ يرسم حروف اسمها بهدوء وتروي .. وبعدما انتهى أخذ ينظر له بابتسامة وهو يتمتم في نفسه :
إسمك حلو زيك .. ياترى هتيجي الحفله يا سندس ؟

°°°°°°°°°°°°°°°°°°°°°°°°°°°°°°°°

سطعت شمس يوم جديد .. ملئ بالأمل للبعض .. والغموض للبعض الآخر .. المحاولة والمثابرة للبعض .. والشوق عند البعض ..

استيقظت في نشاط كالعادة لكنه صباح مميز .. فـ اليوم سينتهوا من توضيبات حفل الزفاف .. لتكون غدًا في منزلها الجديد الذي أنشأته معه بـ الحب والدفء .

اغتسلت وارتدت ملابسها التي تتكون من بنطال بنفسجي ينتهي بأساور مع شميز أبيض وحذاء رياضي أبيض .. ورفعت شعرها في شكل ذيل حصان .. ونزلت للحديقة لتجد العمال قد حضروا ومعهم ما طلبوه .

ابتسمت لهم غرام بهدوء قبل أن تهاتف دالين التي أخبرتها بأنهم في طريقهم إليها .. وبالفعل لم يمر أكثر من ربع ساعة وكانت الفتيات في منزل غرام .. تناولوا الإفطار معًا وبدأن في إرشاد العمال ليقوموا بترتيب الأجواء على أزواقهن التي اتفقوا عليها معًا بالألوان التي تحبها غرام .. بقوا على هذا الحال حتى غابت الشمس .. وكان كل شئ على أتم الإستعداد .. وتبقى فقط اللمسات الأخيرة .. والتي ستُضاف في الصباح .

غرام وهي تنظر للحديقة ضامة يديها إلى صدرها بسعاده :
مكنتش أعرف إنها هتطلع بالجمال ده .. بجد خرافة .

دالين بابتسامه :
الجميل للجميل ياجميل .

غرام وهي تحتضنها بحب :
أنا بحبك … بحبك أوي .

ضحكت دالين بخفه :
طب سيبي شويه لعمرو طيب .

غرام وهي تلكزها في كتفها :
نفس رخامة فراس .

فراس من خلفهم :
طب بتجيبوا في سيرتي ليه وأنا مش موجود بقا !! ها ؟

غرام وهي تقفز إليه بسعادة :
شفت عملنا إيه ؟.. إيه رأيك بقا !

فراس بإعجاب واضح :
لا فعلا جنان .. زوقكم عالي وراقي جدا .. ولمسة الكيوت اللي في المكان شبهك أوي .

غرام بابتسامه :
حبيبي والله .

دالين مقاطعة بهدوء :
طب ياغرام إحنا هنمشي بقا .. ومن النجمة هنكون عندك .. وانتي حاولي ترتاحي النهارده على قد ما تقدري لإن اليوم بكره هيكون صعب . أوك ؟

غرام بتأكيد :
حاضر .. بجد شكرا أوي يا دالي .. مش عارفه من غيرك كنت هعمل إيه .

دالين وهي تحتضنها متجاهله تمامًا وجود فراس :
حبيبتي انتي زي أختي بالظبط .. يلا أشوفك بكره .. سلام .

غادرت دالين تاركه خلفها فراس يكز علي أسنانه بغيظ .. هل تجاهلته الآن ؟.. ألم تلقي تجاهه ولو نظره ؟.. اااخ يا إله كم يتوق لخنقها الآن .

غرام :
فرااااس .. إيه رحت فين ؟

فراس بانتباه :
انتي بتنادي على حد في بلد تانيه .. ما براحه .. أنا جنبك أهو .

غرام :
جنبي آه لكن مش معايا أصلا .. أنا بكلمك من بدري يا بيه .

فراس :
طب غوري قدامي يلا .. أنا جعان أصلا .. ولو مبطلتيش كلام هتعشي بيكي .

غرام بضحكه :
لا وعلي إيه .. الطيب أحسن .

°°°°°°°°°°°°°°°°°°°°°°°°°°°°°°°°°°°°°°

ذهبت دالين لمنزلها وبدلت ثيابها أولا ثم ذهبت لمنزل فاتن .. فهي رفضت الذهاب معهم .. وطلبت من دالين أن تتركها بمفردها قليلا ..

وصلت للمنزل وترجلت من السيارة بهدوء وصعدت لغرفتها مباشرة .

دالين وهي تدخل رأسها من الباب :
أدخل بالبيتزا ولا ألف وأرجع تاني ؟

فاتن بابتسامة :
لا ترجعي فين .. دي فيها بيتزا .

دالين بغيظ :
آه يا زبالة .. بقا أدخل عشان البيتزا وبس !

فاتن :
وانتي فاكره إيه يعني !

دالين :
لا مش فاكره ياختي .. طول عمرك معفنه .. يلا يلا ناكل بسرعه بس قبل ما تبرد .

وبدأوا في تناول طعامهم في صمت قطعته فاتن وهي تتمتم :
هو عاصم لسه بجد بيحبني زي زمان يا دالين ؟

دالين بهدوء :
مش معنى إننا غلطنا يبقى مبنحبش أو الحب قل يا تونا .. كل ما كان الحب كبير كل ما كانت ردود الأفعال صادمة .. موقف زي اللي كان فيه عاصم مثلا .. عاصم مقدرش يفكر بعقله .. عقله وقف تمامًا عن التفكير .. وكل اللي اشتغل في الوقت ده كان قلبه وبس .. حس إنه مجروح .. مدبوح .. انتي عارفة عاصم عاش فتره صعبة أوي بعد طنط روح .. هي كانت كل حاجه ليه .. واونكل مراد عمره ما حسسه إنه إبنه .. ولما طنط روح رجعت .. رجعت ومعاها شادي وبتقول إبني اللي مخلفتوش .. هو شايفه معاها في كل مكان .. شايف إنها كانت جنبه وبتراعيه في الوقت اللي عاصم كان محتاجلها فيه .. وبالتالي غضبه وكرهه لشادي عموه عن إنه يشغل عقله ويركب الأمور ويوزنها .. فكرة قرب شادي من مراته جننه .. وشادي الحق يتقال كان بيتعمد يضايق عاصم وهو اللي اعترفلي بنفسه .. قالي إنه كان عارف إن عاصم جاي المستشفى ومع ذلك هو اللي زق الكرسي بتاعك عشان يوديكي العربية .. مع إن حازم كان موجود وكان ممكن يطلب منه بحكم القرب بينكم أو حتى عمو شريف أصله مش مكحكح أوي كده .. كان بيتعمد يفضل ساكت وميتكلمش في الوقت اللي عاصم بيطلع نار من ودنه .. ولما يشوف شادي ساكت بيتجنن أكتر .. قالي إن طنط روح قالت لعاصم إن شادي هو اللي اتبرعلك بالدم لما عملتي الحادثه وهو اللي أنقذك من الحادثه بعد ما سبتي الشقه وهو كان بيجري وراكي عشان يهديكي .. أي واحد مكان عاصم مش هيفهم الموضوع غير بشكل ومنطق واحد .. خصوصًا إن عاصم قال إنك من بعد الحادثهةة وانتي رافضة تمامًا تتكلمي عن المكان اللي كنتي فيه قبلها ..

هو غلط مش مغلطش .. غلط عشان مسمعكيش .. وغلط عشان مد إيده عليكي .. بس كل إنسان مننا يستحق فرصة تانيه .. وهو شاريكي وهيبيع الدنيا بحالها ويشتريكي .. وأنا مش بقولك كده عشان ترجعيله يافاتن .. أنا بوضحلك الأمور .. وانتي شغلي عقلك وقلبك ومتحكميش واحد فيهم على التاني .. وشوفي هتوصلي لفين .. يا تسامحيه وتبدأوا من جديد .. يا تشيلي ده من هنا .

وأشارت في نهاية حديثها إلى دبلتها التي ترتديها .. وبحركة تلقائية رفعت فاتن يدها التي تحتلها دبلته تجاه قلبها وهي تقول بسرعه :
لا مستحيل أقلعه .

ابتسمت لها دالين بهدوء لتتمتم فاتن بعدها :
أنا بحبه ويمكن تخطيت مرحلة الحب من زمان أوي .. بس .. بس خايفة يجرحني تاني .. خايفة يكسرني تاني يادالين .

دالين بهدوء :
مش هيكون في تاني يا تونا .. لإنكم هتقطعوا وعود وعهود على بعض .. محدش يتدخل بينكم .. محدش فيكم يتسرع في الحكم على التاني .. لو شفتيه بيخونك بعنيكي أقفي واسأليه واسمعي منه واحكمي بعدها .. بلاش التسرع لإنه بيخسرنا بعض .. فهماني يا تونا ؟

فاتن بهدوء وتنهيده :
فهماكي .

دالين بابتسامة ماكرة :
طب بالمناسبه بقا .. أنا كنت جايه من غير أكل وعاصم اللي قابلني بره واداني البيتزا دي وقالي متاكليش منها قبل فاتن .

فاتن وهي تنظر لقطعة البيتزا في يدها وابتسامة حنين ارتسمت على ثغرها .. جعلت دالين تقترب منها وبدأت في دغدغتها وفاتن تضحك بصخب قطعه دلوف شريف الذي نظر لهما بإنزعاج قبل أن يتحول لضحكه خفيفه على مظهرهما وكأنهما طفلتين مذنبتين أمامه .

دالين :
يوه بقا يا اونكل .. كل مره تعمل فينا كده وتدخل مصدرلنا الوش الناشف فنكش وبعدها تضحك .. مبنتعلمش .

شريف :
اغبيه بقا اعملكوا إيه .. المهم .. ياريت تنجزولي حفلاتكوا وسهراتكوا عشان في شغل مستنيكم من بداية الأسبوع .. ومش عايز أي إعتراض .

دالين بحماس :
مستعدين يا برنس .

شريف :
يا إيه ؟

دالين وهي تتراجع في الفراش :
سوري يا اونكل .

شريف رافعًا رأسه بغرور مصطنع :
بحبني وأنا مسيطر .

خرج وهو يضحك عليهما بينما تمتمت دالين بغيظ :
أبوكي ده ولا واحد صاحبنا .

فاتن بضحكه :
بابا بس قالب على واحد صاحبنا .

°°°°°°°°°°°°°°°°°°°°°°°°°°°°°°°°°°°°°°°

انقضى يوم ملئ بالأشغال والمتاعب .. فعمرو أنهى كل شئ يخص منزله هو وغرام .. وأنهى دعواته وحجز حلة الزفاف وكذلك قام بحلق شعره حلقة خفيفه .. ليكون الغد مقتصر فقط على تهدئة توتره ..

بينما أنهى لؤي بعض الأعمال لديه حتى يأخذ إجازه في الغد طوال اليوم .

وكذلك البقية .. كل من كان لديه عمل سعى لإنهائه في هذا اليوم حتى يتفرغوا للغد .

أتى اليوم المنتظر .. غرام تجلس إلى الفراش تفرك يديها بتوتر .. ثم تتحرك في الغرفة ذهابًا وإيابًا .. ثم تعود لتجلس إلى الفراش وتفرك يديها معًا .. حتى سمعت طرقات على الباب فظنت بأنها دالين ..

دلف فراس بابتسامه وهو يتمتم بحنان :
عروستنا الحلوة عامله إيه ؟

غرام وهي على وشك البكاء :
متوتره أوي أوي يافراس .. لا لا أنا مش عايزه اتجوز .. أنا خلاص قررت مش هتجوز .

فراس :
قررتي إيه يامجنونه .. الفرح النهارده .. أومال فين الشقيه اللي كانت بتتنطط إمبارح وأول هنا وهناك وحماسها مغرقنا ؟!

غرام :
فراس أنا بتكلم بجد .. مش هتجوز .. أنا هموت من الخوف .

اقترب منها فراس وحاوطها بحنان وهو يمسد ظهرها بهدوء :
حبيبتي متخافيش من حاجه .. أنا جنبك .. كل حاجه هتبقى كويسه وبخير .. ده توتر بس عشان داخله على حياه جديده .. وده أمر طبيعي .. يلا بقا يا حبيبة أخوكي أدخلي خدي الشاور بتاعك عما الست دالين والميك أب ارتيست ييجوا .

اماءت غرام عدة مرات وهي تتمتم :
طيب طيب .. ربنا يستر .

دلفت غرام لدورة المياه بينما اخرج فراس الهاتف ليرى سبب تاخر دالين هكذا ..

دالين :
ألو يا فراس .

فراس :
حضرتك فين ؟.. غرام قلقانه وعيزاكي ومش عارف أعملها حاجه .

دالين :
والله بحاول مع ماما عشان تيجي تحضر الفرح وهي رافضه .

فراس بهدوء :
ممكن تديهاني أكلمها ؟

دالين بهدوء :
أكيد .. يارب تقدر تقنعها .

وبالفعل تحدث فراس إلى والدة دالين ووافقت على ذهابها إليهم تحت إصرار فراس .. وكانت تدعو الله بأن ينتهي هذا اليوم على خير .

بينما اتصل فراس بعمرو ولكن لؤي هو من أجاب ..

فراس :
أومال عمرو فين ؟

لؤي وهو يضحك :
عمرو قاعد بيفرك ايديه في بعض ويمشي في الأوضه ويشرب ميه ولا كأنه عيل صغير مستني العقاب .

فراس :
متقوليش إنه قرر يلغي الجوازه .

لؤي باستغراب :
إنت عرفت منين ؟

فراس :
غرام بتقول وبتعمل نفس الشئ .. المهم أنا ساعه كده وهجيلكم ماشي ؟.. والدتك تبقى معاك وإلا إنت حر .

لؤي :
ماما موافقتش والله يا فراس .. قالت هتروحلها بيتها بعد الفرح .

فراس : لا طبعا إيه الكلام ده .. بس اديني رقمها وأنا هكلمها .. والا أقولك .. أنا هروحلها بنفسي وبعدين أجيلكم .

لؤي :
يارب تسمع منك .. متتأخرش بقا ها .. لحسن عمرو محتاج اللي يفوقه .

فراس :
مش هتأخر .

°°°°°°°°°°°°°°°°°°°°°°°°°°°°°°°°°°°

وصلت الفتيات للڤيلا وصعدت دالين سريعًا لغرفة غرام فوجدتها لا تزال ببرنص الاستحمام ..

دالين عاقده حاجبيها :
انتي قاعده كده ليه ؟

غرام بتوتر :
دالين .. دالين ارجوكي أنا صرفت نظر عن الجوازه دي .. ارجوكي مش عايزه .

دالين بذهول :
انتي بتقولي إيه .. قومي يابنتي الله يستر علينا وعلى ولايانا .. قومي يا حبيبتي الله يهديكي قومي .

غرام وهي على وشك البكاء :
مش بهزر أنا بتكلم جد .. مش هقدر يادالين .

أخذت دالين شهيقًا طويلًا أخرجته بهدوء مع كلماتها :
حبيبتي ده طبيعي .. مش كل يوم بنتجوز ومش أي حد بيتجوز اللي بيحبه .. ده مجرد توتر هيروح مجرد ما عمرو يمسك إيدك عشان تنزلوا تحت .. وبعدين صبرتوا قد إيه عشان اللحظه دي .. وعمرو استناكي قد إيه عشان بس يشوفك بالأبيض ويأكد للعالم بحاله إنك ليه هو وبس .. فكرتي فيه لما يسمعك ويعرف إنك عايزه تلغي الجوازه عشان بس متوتره ؟.. طب هو عمرو هيجبرك على حاجه ؟.. هو بيتمنالك الرضا .. وبيحبك .. ومش عايز حاجه من الدنيا غير راحتك .. فمينفعش تكافئيه على حبه ده بإنك تلغي الجواز عشان بس خايفه .. انتي لو هتخافي من الدنيا كلها مينفعش تخافي من عمرو .. يلا يا ماما يلا اتكلمنا كتير وده وقت الفعل .. يلا قومي .

غرام بتنهيدة ارتياح بعض الشئ :
طيب يلا .. بس دالين متسبنيش أبدا ها .

دالين بابتسامه :
مش هسيبك . يلا .

°°°°°°°°°°°°°°°°°°°°°°°°°°°°°°°°°°°°°

وصل فراس لمنزل لؤي وترجل بهدوء .. طرق عدة طرقات قبل أن تظهر من خلف الباب السيدة جنات التي توترت بمجرد رؤيتها لفراس ..

فراس بهدوء :
إزيك يا ست الكل .. وازي صحتك ؟

جنات :
بـ بخير الحمد لله… ا اتفضل يابني .. اتفضل .

فراس بهدوء :
لا لا عشان بس الشباب مستنييني .. لؤي قالي حضرتك مش عايزه تيجي الفرح .. ممكن أعرف السبب .

جنات بتنهيدة :
مش عشان حاجة أنا فعلا مش هقدر وهخاف اتنكس وابوظ الدنيا .. انتوا شباب في بعض وربنا يسعدكم .

فراس بابتسامة هادئة :
لا مينفعش الكلام ده .. أوعدك مش هتتعبي ولو حصل هو أنا إيه بقا ها .. وبعدين ماما موجوده ومامة دالين .. أكيد مش هتكسفيني ولا أي ؟

جنات بتنهيدة استسلام :
خلاص يابني حاضر مقدرش اتأخر .

فراس بابتسامة :
شكرا جدا لحضرتك .. يلا بعد إذنك .

غادر فراس متجها حيث الشباب بينما تنهدت جنات بتعب وهي تدعو من صميم قلبها أن يمر اليوم على خير .

يتبع …..