رواية اسيرة بين يدي قاتل ابي الفصل السابع 7 بقلم نور آل زيادة
سيلين،،، مر اسبوع وسراج ببعقوبه خلال هل اسبوع كل يوم يتصل ثواني بس يسأل عني ويعبر عن اشتياقه ويروح
امااني فأحس نفسي وحيده صرت هواي اشتاقله وبالي كله يمه هذيج الفتره كنت كل يوم اصبح على صوته وغزله وبالنهار يتصل عليه يطمئن وبالليل منام ثنينا اذا منحجي سوا صار جزء كلش مهم بحياتي الى درجة مااتخيل حياتي من بعده كان حبنا حلو وعفوي نابع من القلب حب عذري بعيد كل البعد عن الكلام الغير اخلاقي او اي لمسات غلط ومحرمه
للان ايدي مامسكها غير بس من لبسني خاتم الخطوبه وهذا احلى شي بحبنا نقي كنت كل يوم اسأله على موعد رجوعه ويجاوبني بكلمة (هانت مابقى شي) وبعد ١٠ ايام بالمضبوط رجعوا العصر اتصل بيه وكلي
سراج،،، اني بالباب افتحيها
سيلين،،، ماصدگت طلعت طايره من لهفتي واشتياقي حتى نسيت ألبس حجاب وطلعت بالتراك فتحت الباب بلهفه من شافني جمدت عيونه وبعدها ابتسم
سراج،،، عزيزة گلبي شلونج زمردتي الثمينه؟
سيلين،،، الحمد الله،،، انت شلونك هواي تأخرت اشتاقيتلك
سراج،،، اويلي يابه اليوم ناويه تجلطيني طالعه بشعراتج الشگر وبهل ملابس وفوكاها مشتاقتلي يعني الشيطان يحضر بينا لامحال والله اليستر
سيلين،،، ليش يحضر شنو مافهمت؟
سراج،،، حبيبتي مااريد اخدش برائتج المهم اني افهم ومن نتزوج افهمج
سيلين،،، بالبدايه مافهمت وهذي مشكلتي بس من تذكرت شلابسه وشلون طالعه عطت
_ياااااا !!!!! مالابسه حجاب وبالتراك عزززه نسيت
دخلت للبيت اركض وعفته بالكراج صوت ضحكته وصل يمي
بدلت بسرعه وخليت الحجاب ورشيت عطر وطلعت لكيته كاعد بالمرجوحه ألي بالحديقه ابتسم من شافني
سراج،،، علساس هسه غطيتي نفسج هو انتي بكل الأحوال فتنه شتلبسين جمالج يفتن
سيلين،،، ترا اني عاديه يعني اوكي هواي يكولولي حلوه بس اكيد اكو الأحلى مني
سراج،،، انتي حلوه شكل وروح بس اخلاقج وبرائتج سبب كافي حتى اعشقج واشوفج بنضري اجمل بنيه بهل كون
سيلين،،،خجلت الى درجة احس وجناتي اشتعلت
سراج،،، اويلي عالخجول ألي طلع مشتاقلي
سيلين،،، ليش انت مامشتاقلي؟
سراج،،، ميت عليج احس هسه رجعلي النفس هسه گلبي رجع ينبض لوبيدي احضنج حضنه اكسر عضامج
سيلين،،،، ياااا شنو هل كلام؟؟!!
سراج،،، انتي كلتي مجرد كلام ومابي اي غايه غلط ولاراح اسوي لأن للان انت موحلالي بس كلماتي طلعت من كثر شوگي ألج لوبس تعرفين شكد مشتاقلج
سيلين،،، واضح،،، لهذا بس مره وحده باليوم تتصل ولمدت ثواني
سراج،،، حقج بس ماكدرت صدگيني طول الوقت بالمضيف يم جدي ومااكدر اتصل گدامهم اخطف نفسي خطف واكدر اتصل
سيلين،،، شلون صار جدك؟
سراج،،، هو تعبان ومبين علي المرض بس وضعه موكلش صعب
سيلين،،، المهم اطمئنيتوا علي وتصالحتوا
سراج،،، اي أتصالحنه وقرر يرجع كل شي لأبويه ويريد يسلمه الشيخه بس بشرط نرجع لبعقوبه
سيلين،،، بلعت ريقي احاول استجمع نفسي،،،، أردفت بأرتباك
_يعني وافقتوا؟
سراج،،، اي،، ليش لا
سيلين،،، واني سراج؟ شلون بعد اگدر اشوفك ووين نتزوج؟
سراج،،، اكيد نضل نلتقي ومن نتزوج نروح نسكن ببعقوبه يم اهلنا
سيلين،،، انتفضت مفزوعه ووكفت
_شنو ؟ شنو؟ نروح نعيش هناك؟ اني مااروح
وكف وصار امامي وتكلم بهدوء…
سراج،،، عادي حبيبتي تتوترين من هل وضع بس انتي راح تصيرين زوجتي واني راح اكون وياج وتتعودين وحياتنا راح تترتب وراح اوفرلج كل شي
لأن جدي انطانه ورثنا من هسه وحالنا تغير١٨٠درجه كل التحلمين بي راح اسوي واجيبه ألج
سيلين،،، عن اي حياة تحجي واي فلوس؟ منو كلك تهمني فلوس جدك،،، اني مااعوف بغداد وأصلا مااكدر اعيش بغير مكان،، وبعدين شتوفرلي هناك،،، يعني معناتهه حتى دوام كليه ماكو،،، وين احلامنا ألي حلمنه بيها سوا وين كلامك؟
سراج،،، عادي تداومين ماكو فرق هنا ولاهناك
سيلين بدموع،،،، سراج اني من هل مكان مااروح واذا انت تريد تروح ويااهلك وتعيش يم بيت جدك هل شي راجع ألك بس اني مو وياك لاهسه ولابعدين واعتبر خطوبتنه أنلغت
هل كلام خله وجها يصير احمر من الغضب رفع صوته وحسيته راح ينفجر…
سراج،،، شنو هذا كلامج؟ انتي تحجين من كل عقلج ؟ علمود هل سبب تريدين تعوفيني؟
سيلين،،، عفته ورگضت لداخل البيت واسمع صوته ينادي بأسمي طلعت امي
ام شاكر،،، هاي شكو؟
سيلين،،، اسمعه يسولفلها السالفه واعرف امي تريد حجه على سراج لهذا توقعت راح توگف ويايا لأن ماكو اهل يريدون بنتهم تبتعد عنهم وتروح لغير محافضه لكن صدمني كلامها…
ام شاكر،،، عوفها معليك بيها هو بكيفها قابل المره تتبع رجلها وين يروح تروح ويا،، هاي بكيفها تسولف،، المهم جدك شنو انطاكم ورث؟
سيلين،،، انصدمت بكلامها مشيت للباب باوعت على سراج بحقد ودموعي نزلت جاوبته…
_شكيتني لأمي وامي وگفت وياك بس من هل دقيقه انسى شي اسمه سيلين لأن لو اموت مااتزوجك….
نزعت الخاتم ورحت خليته بأيده انصدم بكلامي وتصرفي قبل ليحجي اي شي ركضت متوجه لغرفتي وقفلت الباب ابجي على حضي المصخم
اعرف كلش زين بيت جده بابت عرب مسولفتلي لمياء عليهم وبناتهم كلهن تقريبا مامكملات دراسه وأكيد ماراح يخلوني اكمل دراسه راح أنسجن بالبيت يم ناس مااعرفهم وبمحافضه ومكان غريب عليه وأنجبر اغير لبسي وكل حياتي حتى ارضيهم
اعرف هل شي مينطبق على كل اهل بعقوبه لكن بيت جد سراج بالتحديد هذي طبيعتهم وعاداتهم
لا والف لا… لأول مره انتفض بحياتي وصار هل شي بوجه سراج
اسمع كلامه ويا امي وهو يحاول يفهمهه واسمعه يصيح بأسمي حتى احجي ويا بس ماطلعت من غرفتي
گلبي انكسر منه،، سمعت صوته يم غرفتي قريب ضل يتوسل افتح الباب واسمع امي تهدد بيه بس مافتحت الباب لأي شخص خليت المخده على راسي حتى لااسمع صوتهم ألى ان ملو وعافوني
ضليت اسبوع اني حابسه حالي بغرفتي اهلي حجوا ويايا ويحاولون يقنعوني واني متمسكه بموقفي أتجاه سراج
جهازي غلقته مارديت على اي اتصال منه وكل يوم يجي يريد يشوفني وارفض واصلا من اسمع بوجوده اقفل باب الغرفه
بعد الاسبوع اجت لمياء ودخلت غرفتي خجلت منها وأنجبرت استقبلها
لمياء،،، ولج هاي شصاير بحالج؟ ليش هيج مسويه بنفسج؟
سيلين،،، كله سبب اخوج
لمياء،،، شبي اخويه اصلا حاله اتعس من حالج ليش هيج سيلين كسرتي گلبه شلون تفسخين الخطوبه وانتي تعرفي يموت عليج؟ صار اسبوع حال الضيم حاله نتوسل بي حتى على الأكل
سيلين،،، هذا اختياره
لمياء،،، لا مواختياره هو وضع أنفرض علينه كلنه ومجبورين نرجع لبعقوبه
سيلين،،، انتو مجبورين بس اني لا،،،، انتو خطبتوني وعلساس زواجنه هنا يصير وأسكن هنا ومن اخلص السادس اداوم كليه
لمياء،،، عادي هناك داومي ترا هذيج المحافضه بيه كل شي متوفر حالها حال بغداد وبيها هواي ناس مرتبه ومثقفين
سيلين،،، انتي مونفسج كلتيلي جدج متسلط وگرايبج ميحترمون المرآه وميخلوها تكمل دراسه وحتى اختج ام مصطفى تزوجها ابن عم ابوج وماخلاها تكمل دراستهه وميخلوهه حتى تزوركم كل كم سنه تشوفوها مره
واكيد من اروح هناك يفرضون عليه نفس القيود مامجبوره اروح يم ناس مااعرفم ولااتغرب واصير بعيده عن اهلي
لمياء،،، وسراج وحبكم ميستاهل تضحيله؟
سيلين،،، يعني تعترفين كل كلامي صح وتريدين اضحي بس هو ميكدر يضحي لأن النفوذ والسلطه والمال ألي راح يحصلها هناك اهم مني
لمياء،،،، سيلين سراج يعشقج يموت عليج بس يبقى هناك اهلنا ومجبورين نروح نعيش هناك
سيلين،،، على راحتكم لاأني مجبوره اتنازل ولاهو لعد كلمن يروح بطريقه
لمياء،،،، لتسوين هيج سيلين راح تدمري لسراج افهمي يابنت الناس ميكدر يعيش بدونج
سيلين،،، يكدر… هو اختار واني اختاريت وانتهينه
طلعت لمياء والدمعه بعينها اما اني فهل قرار كان اشبه بالموت البطىء بالنسبه ألي منا قطعت الأكل و ضغوطات اهلي وكلام امي وتهديدها من كثر الضغط تخربطت اخذوني للمستشفى شكلولي مغذي جسمي كله يرجف وأحس روحي تريد تطلع غمضت عيني منتهيه من التعب والمرض سمعت صوته يمي
سراج،،، حبيبة گلبي وعمري انتي،،، ليش هيج سويتي بينه؟ لعبتي بحالي لعب وطلعتي انتي هم متأذيه
سيلين،،، فتحت عيني ونزلت دموعي
سراج،،، روحه لسراج لتبجين كل شي ولادموعج اني أحلها لتصدكين فد يوم اسمح لأي سبب وأي شي يفرقنا ماصدكت صرتي ألي للموت مااعوفج صيري زينه وكل شي أله حل
سيلين،،، طلعوني من المستشفى وابويه من شاف وضعي كللها لأمي عوفيها لتضغطين عليهه
مرت ايام ماشفت بيها سراج ابد ولاحتى اطمئن على صحتي عرفت هنا أحنا انتهينه الى ان اجت لمياء تطمئن عليه
لمياء،،، سلامتج حبيبتي زمردة اخويه العاشق المتيم ولج هذا طلع مويحبج عبر كل المراحل دخل حرب البسوس علمودج
سيلين،،، اي واضح ولهذا بعد ماشفته ولا سأل عليه؟ المهم عاد انتصر بمعركته؟
لمياء،،، طبعا انتصر المحامي سراج الدين على سن ورمح والموضوع يخص عزيزة گلبه وتريدي مينتصر؟
سيلين،،، شصار؟
لمياء،،، راح نروح كلنا نعيش ببعقوبه
سيلين،،، شنو هل معلومه الخطيره والجديده
لمياء،،، الجديد كلنا نروح ماعدى بهاء ومرته وجهاله وسراج هم راح يبقون بهذا بيتنا وبس أحنا وباقي الولد نروح
سيلين،،، صدددددك؟!!!! والله احلفي؟
لمياء،،، هههههه وردتي وتفحتي هاااا؟
سيلين،،، عليج الله احجي الصدك؟
لمياء،،،، سراج قنع بهاء بهل فكره لأن مرت بهاء هم ماعاجبها تروح وقررو يبقون بس ابويه رفض وجدي من وصله الكلام زعل وعلى زعله ابويه لعب طوبه ببهاء وسراج بس سراج كله شغلي هنا وحياتي هنا مااكدر اروح هناك تريد اخذ الباقين وروح
وبعد نقاش طويل عريض وبعد حرب طاحنه انتهت بفوز سراج الدين وكل هذا حتى لايفقد محبوبته وزمردته على گولته
سيلين،،،، الله عليج هل كلام صدك لوتضحكين عليه؟
لمياء،،، وداعة امي وابويه صدك
سيلين،،، ههههههه حبيبي،،، فدوه لگلبه كل هذا سوا علمودي؟
لمياء،،، بربي لو سامع كلمة حبببي هاي ألا يحرر القدس هسه،،،
يولي انتي شمسويه بأخويه اخاف ساحرته ومندري؟
سيلين،،، لاوالله مامسويه شي،،، اصلا حرام
لمياء،،، ههههه ليش ألي مثلج تعرف هل دروب وين اكو افقر منج حقه اخويه ميت عليج انتي لوبس تبطلين العناد كل شي يصير بخير
سيلين،،، اني موعنوديه بس عندي مشكله بداخلي مااحب شي ينفرض عليه،، أختنك وأحس راح أموت من احس نفسي مجبوره على شي
لمياء،،، هاي عقده نفسيه لو فوبيا
سيلين،،، ماأعرف شنو،،،، زين أكلج هو ليش مختفي ليش ماأجه ولاخابرني؟
لمياء،،، شيخابرج وانتي غالقه جهازج وبعدين ترا هو ماخذ على خاطره منج انقهر لأن من اول موقف ومن دون نقاش عفتي،، ترا هل فتره كله تعبان من ورا تصرفج كلش انقهر يكول سيلين متحبني لأن لو تحبني متتخلى عني بهل سهوله
سيلين،،، لا لا صدكيني احبه وماردت اعوفه ولااريد
بس بنفس الوقت مااكدر انصدمت بالصار موهاي احلامنه الحلمناها سوا وخططنه ألهه ماتحملت ولااستوعبت الفكره…
أكلج هسه شلون اريد اشوفه؟
لمياء،،، شتسوين بي بعد انتي موعفتي وبعد متريدي
سيلين بدموع،،، يعني شنو بعد ميريدني هاي هيه؟
حضنتني تواسيني….
لمياء،،، لتبجين يمعوده والله اذا يدري بچيتج يتخبل عليه كل شي ولادموعج
سيلين،،، شسوي هسه؟
لمياء،،، هو سوى ألي علي وانتي هم زعلتي تروحين بنفسج تراضي
سيلين،،، اخاف يفشلني وميرضى عليه؟
لمياء،،، هو زعله ثكيل ويا الكل بس متأكده من يشوفج يطير ام الزعل وحتى تطير هيبة الكرامه والكبرياء مالته هو روحه مفرفحه عليج من يوم رحنا لبعقوبه وهاي صار عشرين يوم هو الشوگ لعب بحاله لعب كومي وكشخي ولبسيله الوردي وهو من يشوفج يتسرسح ويتبخر كل الزعل
سيلين،،، نفذت كلامهه لبست بنطلون ابيض وعلي قميص حلو ونازك لون وردي طويل يغطي جسمي لأن بوقتها كنت شويه جسمي مليان وطقمت ويا شال وردي خليت ميكب بسيط جدا وخليت روج وردي فاتح وتعطرت
لمياء،،، كتلج اكشخي بس ماكتلج اجلطي اخويه هسه اذا يشوف هل كشخه ينجلط ولج شطاله المكياج يخبل عليج يبرز معالمج رغم خاله كلش قليل وبسيط بس حلو وصدك حقه من يحب الوردي عليج تطلعين تخبلين بي
سيلين،،،فهمنا امي الصار و أستأذنه منها حتى اروح امي طارت من الفرح استغربت سبحان مغير الاحوال شنو هل الحب المفاجىء لسراج مع انو هي اكثر وحده مارادتني ارتبط بي
وصلنا يم بيتهم شفنه سيارات يم بابهم بس سيارات فخمه استغربت…
_ اكلج لمياء منو يمكم؟
لمياء،،، مااعرف بس هل سيارات شايفتها يم بيت جدي تعالي نفوت
سيلين،،، لا احس مترهم خلي ارجع لبيتنا بعدين اجي عليكم
لمياء،، امشي نفوت وبطلي خجلج
سيلين،،، سحبتني من ايدي دخلنه للكراج صاروا هواي شباب كاعدين على كراسي بالحديقه من ضمنهم سراج وأخوته من دخلنه توجه نضرهم اتجاهنه ارتبكت وخجلت عيني صارت اتجاه سراج فتح عينه مبين اتفاجىء بجيتي نزلت راسي من الخجل كام من مكانه وتقدم اتجاهنا بلهفه وكف كدامنه حجبنه عنهم
سراج،،، سيلين؟!! شجابج هنا يبااا؟
سيلين،،، يعني ارجع لبيتنا متريد تشوفني؟
سراج،،، مااريد اشوفج شنو؟ غير ميت على شوفتج
لمياء،،، احم احم ياناس ياعشاق الكاع محضوره انتبهوا
سراج،،اخذيها وفوتي للداخل بسرعه
سيلين،،، هاا لا راح اروح اجيت اشوفك ماعبالي عدكم ضيوف
سراج،،، يعني جايه عليه تشوفيني؟
سيلين،،، وأعتذر منك
سراج،،، اويلي يابه،،، فوتن جوا هسه اجي وراجن
سيلين،،، اخذتني لمياء لداخل البيت دخلنا المطبخ بي هواي بنات سلمت توجهت الانضار اتجاهي مستغربين وجودي قطع النضرات صوت سراج من دخل ورانا
سراج،،، وين امي؟
__ منو هاي الحديثه؟
سراج،،، عمه هاي خطيبتي
سيلين،،، هل كلام خله أكثرهن وجوهن تغيرت وعمته عوجت حلكها وحتى سلام محد سلم
تجاهلهم وهو ولمياء دخلوني للصاله
سلمت وسراج عرفهم عليه وعرفني عليهم ومن ضمن الموجودين عرفني على جده وجديته وعمته عمتي وكفت بوستني بس الباقين كان وضعهم مختلف حتى عمي هم حسيته متغير عليه من شفت الوجوه والوضع همست لسراج
سيلين،،، مااعرف مااحس نفسي مرتاحه وماحسيت حبوني؟
سراج بهمس،،، حبيبة عمري هو انتي منو ألي يكدر يشوفج وميحبج غير بس ألي ماعنده ذوق
سيلين،،، ابتسمت لكلامه
الشيخ علوان،،،، انتي اهلج من وين ياعشيره؟
سيلين،،، من بيت………… شفت ملامحه تحولت
الشيخ علوان،،، سراج خلصت البنات مالكيت غير هل بنت تاخذها هم بغداديه ومتعرف بالأصول وفوكاها لبسها مابي حشمه وهم ماعدها اصل
سيلين،،، سمعت كلامه لواحس شي انضرب براسي واستغربت كلامه..
ليش شبيهن بنات بغداد شنو هل سمعه؟
بكل مكان وبكل محافضه اكو الناس الزينه والناس الشينه على اي اساس يسيء على بنات بغداد ويجمعهن بكفه وحده وبعدين لبسي مستور وحتى قميصي طويل مغطي حتى الافخاذ وعريض استهضمت وتجمعت الدموع بعيني
سراج،،، ياشيخ ليش شبي اصلها ناس معروفه ومعروفين بشرفهم وطيبتهم وبنات بغداد حالهن حال بنات بعقوبه او اي محافضه ثانيه بالعراق بيهن زينات وبيهن لا،،، اني واثق بأختياري واعرف شنو اصلها ومعدنها واخلاقهه
عمة سراج،،، بس مومن مستواك ومستوانا أحنا اهل خير وشيوخ ومعروفين المفروض تتزوج من مستواك
سراج،،،، هاي المضاهر التافهه متعنيلي شي اهم شي اتزوج بنت شريفه عفيفه بنت ناس شرفاء وياكلون لگمتهم بالحلال
ابو بهاء،،، ثمن كلامك سراج واحترم
سراج،،، يابه انته اكثر واحد تعرفني شكد محترم واحترم بس المفروض احنا اهل خير وشيوخ على الأقل نحترم الضيف مونقلل من شأنه صح كلامي ياشيخ لو نضام الشيوخ تغير وصرنا نهين خطارنا
سيلين،،، الكل سكت واني من الفشله اتمنى اتبخر مشكلتي ما اعرف ارد وحتى من شخص يغلط بحقي بمكان مااواجه وارجع حقي اصير اخجل منه واريد اتهرب وكأنما اني الغلطانه
همست… سراج رجعني لبيتنه فدوه
جاوبني بصوت شويه مرتفع..
سراج،،، صار من عيوني
دخلت لمياء شايله فواكه وقدمتلنه
سيلين،،، وكفت حتى نروح
لمياء،،، وين رايحه ماضيفناج للان ولو البيت بيتج بعد انتي چنتنا
سيلين بصوت يرجف،،، شكرا راح اروح غير مره
ام بهاء،،، كعدي يمه ميصير تطلعين ومامضيفيج
سراج،،، اكعدي يبا شويه واني اوديج للبيت
سيلين،،، خجلت وأنحرجت رغم ماعاجبني بعد ابقى بس كعدت،، اجني بناتهم كعدن امامي ويخزرن بيه لسبب مااعرفه،،، ياربي شنو هل اليوم الاگشر،،، ارتبكت ضليت اعصر بأيدي من التوتر
سراج بهمس،،، شبيج حبيبتي؟
سيلين،،، مابيه شي بس ليش هيج يباوعولي؟
رفع راسه وشافهن..
سراج،،، من غيرتهن منج هيج يباوعن
سيلين،،، قدم صحن الفواكه وصار يدور بالمشمش ويختار الطازجه والشكلها مرتب ويطلع منها النوى ويقدملي،،، ابتسمتله
عمة سراج،،،، عوفها هي تاكل شنو ماعدها ايد وبعدين شدتسوي؟
سيلين،،، اشوفها تباوعلي بحقد وسراج ولامهتم يختار مشمش ويقدملي يعرفني احب الفواكه فريش ونضيفه ويفتحها حتى يتأكد مابيها حشرات لأن نفسي تلعب…رجعت عادت علي نفس الكلام جاوبها وهو يقدملي مشمشه
سراج،،، احب ادلل مرتي بنفسي
الشيخ علوان،،، ابو بهاء الضاهر بغداد نست ابنك اصله من شوكت عدنه الحرمه تدلل الحرمه هي وضيفتها تدلل الرجال وتخدمه وتطيعه
ابو بهاء،،، لا شيخ يعني هو،،، بس تعىرف،، يعني
الشيخ علوان،،، لا بس ولاشي الضاهر نسيتوا الأصول وهل وضع مايعجبني
سيلين بهمس ،،، سراج بعد مااتحمل ترجعني لواني ارجع لبيتنه
سراج،، يله يبا امشي ارجعج لبيتكم،،، من رخصتكم اوصل خطيبتي وأجي
سيلين،، سلمت وطلعت واني اغلي وصلني لبيتنا واني كلمه ماحجيت قطع الصمت
سراج،،، ضجتي مو؟
سيلين،، ليش ألي صار ميضوج بنضرك؟ اصلا شبعت أهانه ولو اهلي يدرون الله وأعلم شيصير
انتفض وجاوب بسرعه…
سراج،،، لا لا،، لتوصلين سيلين هل كلام ترا تصير مشكله وبالنهايه اني وأنتي ألي نخسر وهو هذا
يريدوا يخربون زواجنه ولو انتي اصلا عفتيني
سيلين،، حجاهه بعتب جاوبته..
_اني ماعفتك لأن اريد اعوفك وأنما أنجبرت،،، سراج افهمني اني مااكدر اروح هناك واليوم من شفت تصرفاتهم وكرهم ألي صرت متأكده قراري صح،،، اني هنا وبيتكم هيج احتقروني اروح هناك يمهم شيسوون بيه؟ ولو ادري اليوم موجودين ولاأجي
سراج،،، حقج والصار احسبي عليه وهمه ضايجين بالأساس مني لأن كسرت كلمتهم وقررت ابقى ببغداد وحتى جيتهم اليوم لهل سبب
سيلين،،، اخاف فد يوم يضغطون عليك واخسرك واني مااريد هل شي لأن واضح ماحبوني
سراج،،، سيلينتي احارب الكون علمودج انتي صرتي اغلى من النفس لتتوقعين فد يوم اعوفج ميمنعني عنج بس الموت وحتى الموت اريد اموت واني يمج
سيلين،، اسم الله عليك عمرك طويل ان شاء الله
سراج،،، تخافين عليه سيلين؟
سيلين،،، اكيددد،،، شلون مااخاف عليك
سراج،،، شنو اعنيلج؟
سيلين،،، مااعرف بس اعرف شي واحد صرت كلش مهم بالنسبه ألي
سراج،، يعني تحبيني؟
سيلين،،، خجلت وسكتت
سراج،،، جاوببني وريحي گلبي
سيلين،،، اني شنو بالنسبه ألك؟
سراج،،، انتي روحي وماكو اغلى من الروح مشاعري ألج ماألها حدود واتمنى اعرف مشاعرج
سيلين بخجل،،، اني هم عندي نفس مشاعرك
سراج بعتب،،، لعد ليش عفتيني بهل سهوله سيلين وحسستيني ماألي قيمه عندج؟
سيلين،،، اعرف انت هسه زعلان عليه سامحني الصار غلط واني اعرف بس قراركم صدمني صدكني موبيدي مااتحمل شي ينفرض عليه اختنك والله مو مبالغه ولاكذب من صدك اختنك حسيت وعودك كذب واحلامي راحت ماتحملت
سراج،،، اني عذرتج لأن انت بعدج صغيره وقراراتج تتحكم بيها عواطفج بس اذا صدك تعزيني بعد لتتصرفين بهل طريقه لأن انت موجرحتيني ذبحتيني بتصرفج احبج اي واحترمج ومعزتج خاصه عندي بس مااسمح تقللين من قيمتي وأحترامي وأي موضوع اومشكله نواجها نكعد نتناقش ونحلها ونوصل لنتيجه واكيد هل نتيجه راح ترضينا ثنينا،،، لتصدكين افرض عليج شي ماحابته وبنفس الوقت ماارضى تلغين احترامي ووجودي قراراتنا نتخذها سوا
سيلين،،، خجلت من كلامه حسيته رزلني بس بأحترام
سراج،،، سكتي سيلين؟
سيلين،،، لأن ماعندي رد،، غلطت واعرف بهل شي بس خفت ومن خوفي هيج تصرفت
سراج،،، لتخافين عيوني انتي طول مااني وياج مااريد ابد تخافين،،، وعد مني راح اخليج اسعد وحده راح اخلي الكل يحسدنا على سعادتنا وحبنا انتي بس خلي أيدج بأيدي ومعليج
ابتسمت لكلامه ألي دخل الراحه والأطمئنان لصدري سلمت ودخلت للبيت واستقبله شاكر سلم وراح ماطول هواي
مرت الاشهر وكل فتره سراج واهله يروحون لبيت جدهم والغريب كل مره يرجع اشوف سراج ضايج احسه ميحب بيت جده وحتى كم مره تهرب من الروحه ومن يرجع يجيني متوتر ويرجع يفتح ويايا موضوع نقرب زواجنا اوحتى على الأقل نعقد وطبعا اني ارفض صار موعد دوام المدارس اخذني اني وامي اشترالي كل المستلزمات والملابس للدوام وكل شويه يكول
سراج،،، اتمنى اغمض وافتح تخلص هل سنه ونتزوج عاد
سيلين،،، ليش احسك مستعجل؟
سراج،،، يامستعحل غير صبري خلص صار سنتين ونص اعرفج واحبج شوكت تصيرين ألي موگلبي انشلع
سيلين،،، بس ترا خطوبتنه ماصارله غير اربع اشهر موهواي
سراج،،، بالنسبه ألي اربع سنوات واخاف من تطول اكثر يصير شي واني مااكدر بدونج
سيلين،،، شيصير يعني قابل ليش احسك خايف؟
سراج،،، ماخايف بس…..
سيلين،،، سكت واني مااهتميت لأن اعرفه ديحاول يقنعني بهل كلام حتى اوافق
داومت وخلال هل شهر سراج تغير صار طول الوقت اشوفه عصبي صح هل شي مو ويايا بس مبين علي الغضب بس احسه تغير عليه وحتى بطل يسمعني كلام حلو وكذا مره تجاذلنه ومن نتصالح يكلي اعصابي تعبانه كم مره صار موقف ونتر بوجهي صرت استغرب تصرفاته ويوم طلب مني يحجي ويااهلي كعدنه كلنا وفتح الموضوع
سراج،،، عمي اني جايكم اليوم واريد اطلب طلب وأتمنى متردوني
ابو شاكر،، تفضل وليدي اسمعك
سراج،،، اني من خطبت اتفقت وياكم تخلص السادس يله نتزوج بس هسه بعد مترهم اهلي خلال هل الأسبوعين راح يشيلون ويروحون يم بيت جدي واموري راح تتخربط،،، عمي اذا عندي خاطر يمكم لتردوني وخلي نتزوج خلال هل فتره
سيلين،،، كلامه صدمني جاوبته..
سراج موهذا اتفاقنه اني سادس ومااكدر شلون اتزوج واني عندي دراسه صعبه
سراج،،، مستعد كل شي اوفرلج حتى مدرسين واني اساعدج واذا على البيت والشغل مرت بهاء مستعده تشيل عنج كل المسؤليه منا لحد ماتخلصين السادس وتنجحين ان شاء الله وشتريدون اني حاضر بس وافقوا
ابو شاكر،،، اني من البدايه ماعندي مانع بس هاي شروط سيلين وانت وياها اتفقتوا
ام شاكر،،، اني هم اكول طولت الخطوبه واذا تريدون تتزوجون موافقين
سيلين،، بس اني مامقتنعه وماموافقه مااكدر افهموا
سراج،،، من رخصتكم اكدر احجي وياها وحدنا
سيلبن،، طلع الكل اجه كعد يمي
سراج،،، كوليلي سبب واحد مقنع للتأجيل؟
سيلين،،، مامستعده وامور الزواج والتجهيزات راح تخليني ألتهي عن الدراسه واني اريد انجح واطلع معدل حلمي اصير مهندسه
سراج،،، حقج ووعد مني اني بنفسي اساعدج واوفرلج كل شي تحتاجي حتى تحققين ألي تريدي سيلين اني محتاجج يمي احس مااكدر بعد بدونج وافقي لخاطري
سيلين،،، مااكدر صدكني مااكدر
سراج،،، سيلين احسج متريديني ولامتلهفه لزواجنه اني الوحيد ألي متلهف لهل الخطوبه والزواج اذا متحبيني ولارايدتني كولي مااجبرج على هل زواج اني صح احبج وميت عليج بس بنفس الوقت مااريد هل شي يصير مني بس اريدج تبادليني هل المشاعر وانتي كل تصرفاتج تثبت انتي ماراغبتني
سبلين،،، لاموهيج السالفه ابد اني هم عندي نفس المشاعر بس مترهم هسه نتزوج
سراج،،، فهمت وصلي جوابج انتي مارايدتني لأن لو تريديني جان ثبتيلي حبج ووافقتي
سيلين،،، كال هل كلام وكام من مكانه يريد يطلع استهضمت من هل موقف ودموعي نزلت صحته
سراج لتروح عفيه لتزعل مني
اندارلي من شافني ابجي تقدم اتجاهي
سراج،،، ليش هل دموع انتي مومتريديني ليش هسه تبجين عليه؟
سيلين،،، لأن اني اريدك
سراج،،، واني هم اريدج افهميني سيلين حسي بيه تأجيل زواجنه مولصالحنه
سيلين،،، ليش شنو صاير؟
سراج،،، ماصاير شي بس اني عندي خوف بداخلي ليش مااعرف اخاف اخسرج اخاف تعوفيني صار ايام احلم احلام موزينه وهل الأحلام كلها بيج اشوفج بالحلم تعوفيني واني والله اموت اذا متصيرين ألي بس عوفي عنادج وحسي بيه اذا تحبيني صدك وافقي وداعة عيونج مااخليج تندمين
سيلين،،، يباوعلي وعيونه تتوسل بيه قبل لسانه سراج سوى كل شي حتى يثبتلي حبه وصار الوقت اني اثبتله مااريد اخسره ولااريد ازعله مني هل سنه اذا مانجحت اكدر اعيد بس اذا خسرت سراج ماكو شي يعوضه ابتسمتله
سراج بلهفه،،، شنو يعني صدك؟! يعني وافقتي؟ خلص راح نتزوج؟ يعني وافقتي على زواجنه؟
سيلين،،، اي موافقه
من غير نقاش حضني يعبر عن فرحته وهاي اول مره يسويها بحياته ابتعد مرتبك
سراج،،، اسف،،، اسف،،، نسيت نفسي
سيلين،، اني هم الموقف خجلني اكتفيت بالسكوت
سراج،،، من باجر ان شاء الله نبدي نجهز وراح ابدي اجراءات العقد مال محكمه ووياها هم نعقد شيخ خلال اسبوعين نخلص كل شي ونسوي العرس
سيلين،،، يعني شنو بعد اسبوعين العرس؟
سبلين،،، منلحك كل شي نسوي هواي مستعجل ترا
سراج،،، لاحبيبي نلحك بس كولي ياالله نتوكل على الله وهو يحلها
سيلين،،، ثاتي يوم بلشنه التجهيز صارت رگضه ورا يومين رحنا اختارينا الذهب والغرفه هم،،، كل شي نختاره اني وسراج سوا اذواقنه متقاربه اختارينه الستائر والمفروشات وكل ديكور الغرفه خلال اسبوع جهزنا كل شي وسراج طاير من الفرح بس حسيت امه ضايجه وماعاجبهه الوضع بس اني وكالعاده دائما ألتمس للناس اعذار وكلت يجوز تعبانه
موعد العقد صار قبل اسبوع من موعد العرس سبحان الله تخربطت ومارهمت اتصل بيه كلي.. تأجل بعد يومين
ورا اتصاله بساعتين العصر اجه يشوفني فتحتله الباب أباوع علي مزين ومحدد لحيته وكاشخ عبالك عريس أبتسمتله،،، سلم عليه لكن كان سلامه بارد مومثل كل مره
سراج،،، سيلين اني واهلي راح نروح لبعقوبه جدي وضعه كلش موزين واحتمال يموت
سيلين،،، لا،، خطيه،،، شبي؟
سراج،،، مااعرف هسه قبل شويه اتصلوا بينه عفت أهلي يحضرون نفسهم واني اجيتج اكلج اوصلهم واشوف جدي يومين ان شاء الله اجي
سيلين،،، الله يشافي لومخابرني ومخبرني ليش تعبت نفسك؟
سراج،،، حبيت اشوفج قبل لااروح
سيلين،، ترجع بسلامه موتتأخر عليه سراج انتضرك،،، لتنسى بعد يومين العقد
سراج،،، شلون انسى راح اشتاقلج زمردتي
سيلين،،، هههه هو يومين قابل شكد راح تبقى
جر حسره وجاوبني بقهر…
سراج،،، هو صح يومين بس بالنسبه ألي عمر كامل ديربالج على نفسج وأشتاقيلي
سيلين،،، هههه يله عود اشتاقلك
باوع عليه بنضرات لليوم ماعرفت افسرها راح واحس گلبي انعصر بروحته ودموعي نزلت ماجنت اعرف هل لقاء اخر لقاء يجمعنه ولو اعرف شمسوي من ورايه ماكنت نزلت دمعه وحده عليه لأن بسببه ضليت طول عمري ابچي دم
يتبع….
الثامن من هنا
رواية غلطة مدفوعة التمن الفصل الخامس 5 بقلم ميمي عوالي
برج الجوزاء .. حظك اليوم الأحد 16 فبراير 2025: مشاريع جديدة
السبت.. العطوي يتولى قيادة فريق ضمك في مواجهة جديدة
انخفاض كبير.. أسعار الخضروات والفاكهة اليوم الثلاثاء 22 أبريل 2025
رابط تسجيل الاعتكاف في المسجد الحرام 2025.. أسرع الآن واحجز مكانك قبل انتهاء الفرصة!
سعر الذهب يرتفع لمستوى قياسي بسبب رسوم ترامب الجديدة على السيارات.
سارع الآن.. تردد أون تايم سبورت 2025 لمتابعة أقوى البطولات الرياضية
