رواية الموروث نصل حاد الفصل التاسع 9 بقلم اساور حسين

رجع مِن كُل كِتر مخذول أهله ودنيته وناسَه

حاول يحچي بس ما فاد محد فاهم أحساسه

لطفا لا تنسون التصويت والتفاعل بين الفقرات

وگفت السيارة رفعت عيوني وياريت ميته ولا اشوفه

واگف بالباب وشاهين وراه يهدي بي قابض ايده

اثنينهم ونظراته تتوعد ، جمدت اطرافي رجلي وايدي

والأوراق كلها وگعت مني دخيلك وبي شسويت بنفسي

جنيت على روحي والله جنيت على نفسي .

افتر على جهة تمار فتح الباب ونزل راسه

وبعتب طبطب على اكتافه وضج صوته

_ متلهف تنزل راسي وتوگع عگالي يا ابن امي .

تلعثم تمار ويدير وجهه على امه يريدها تحچي

وضليل مارفع عينه منه يريد ينطق لطمه على حلگه

بكل قوته ، ركض شاهين لزم ضـلـيل من ايده يتوسله

_ عمي ابوي هذا دخيلك لا تهينو جدام ولدو وبناتو .

نشف الدم بجسمي شسوي بروحي هسة

افهمه احچي كلشي واذا ما يصدگني شسوي

هذا ضـلـيل اذا عصب ما يشوف بعد گدامه

ولا يسوي خاطر لكائن من يكُن غضبه يقوده

فتح بابي ونـزل اخذ الأوراق كلهن بين أيده

ضـلـيل : انزلوووووووا بالله انزلوا

لا تصيرون مسرحية جدام المنطقة واخلي الصغير

يحچي بيكم قبل الچبيرررر انزلوا .

قبضت ايدي بكل قوتي احسها صگت بعد

نزلت قبلهم عدلت عباتي ودخلت صارت نقش

گدامي دموعهـا تتسابق على خدها ركضت حضنتني

ونـزلت تبوس بيدي رفعتها خفت من عليها

غـاليـة : منو وياچ ؟ شبيچ حاجيني .

عفاف : عوفيها عيوني حيري بروحچ راح يذبحچ .

دلال : والله وگعتي يا بنت ذياب وخلص فلمچ الله يرحمچ .

القهر ذبح گلبي اريد اگوم املخهن تملخ

وهم ماتبرد ناري الخايسات واكفات وبكل شماته

والفرحة تنشاف بعيونهن لو بيدهن يطيرن

عبالك اني ذابحه روحي ذبح على زلمتهن وخلصن مني

عبرني يهف دخل للديوان الأوراق ما وگعن من ايده

فاتت الممثلة الكبيرة القديرة امه منزله عباتها على

اكتافها وتسحل بروحها والعباية تسحل وراها

وتبچي بصوت عالي ، بقيت صافنة على قدراتها

وگعت بالباب مال ديوان تفر بيدها خايفة

مقتدر دخل وياه تمار متردد ويفهم بي فاتوا الديوان

فزيت من جلجل وصار يدوي صوته بكل مكان

_ بــنت ذيـــاب .

وگفت على حيلي وعفت نقش ورايَّ

دخلت وخليتها على الله شيصير خلي يصير ماعندي

حل شنو بيدي صرت مقابيله بس بعيد عنه

وامه بعدها گاعدة بعتبت الباب وتمار

گاعد على تخم مغطي وجهه

يريد يبچي لو ما فشلته من ابنه وحرمته

تصلبت بمكاني استمع لهاي الشيطان تنحب

ام ضـلـيل : وروح ابوك يمه ضـلـيل اجت هددتني

گالت اذا انتِ ما تخلصيني من ابنچ اخذ بناتي

واشرد وانزل روسكم ردت اكشفها يمك تمار سمعها

گال يمه هاي اول تالي مـا باقيه احسن ما تشرد

ومانعرف بنات اخونا وين خلينا نأمن عليهم

ونشوف بيت بعيد ونگعدهـا هي وبنات اخوي .

ضـلـيل : شوفي غير درب .

ام ضـلـيل : والله يمه نختني اردهـا .

ضـلـيل : شگد تحبيها على اساس ما تتحملين ترديها

تمار : خوية انتَ على حگ حط طلقة براسي واكتلني .

ضـلـيل : صـار شگد اطمطم بطرگاعة بنت اخوك

وألملم بالفضيحة تلمهاااا ويايَّ لوووو تكبررررها

ولكم شحچي للعالم شگووووول بيا عين ارفع عيوني

بعدددد حرمتي شررررردت تردون تشهرونـا .

نهض من مكانه وصار بصفي رفعت راسي

خليت عيوني بعيونه اريد اضبط انفاسي

احس ضغطيّ علگ خزرني والأوراق اربعة بفايل

مجمعيها خفيف رفعها يضرب بيهن على راسي

وايدي بقوة وصرخ صراخ بوجهي

حسيت طبلة اذني انشگت

ضـلـيل : عجل بنت ذياب شگد حاقدة تبيعين

الأول والتالي علمود بيت لازم عليچ

بيووووووت انا مقصررررررررر ؟

شمرهن بعيد وراح ليغاد رفع اصبعه

نبرة التهديد بصوته هددت قوتي

ضـلـيل : تحچين غـاليـة وتنزلين هاي عيونچ

الصلفة بالگاع وراسچ العالي ينهد وينكسر لا

اكسررررررو وحگ القران الكريم افرغ السلاح براسچ .

كبحت خوفي وبثبات جاوبته ورفضت انزل راسي

غـاليـة : مـا اخاف من انسان ولا من الموت

وبعمري ما جذبت تعرفني احجي مرة تريد تصدگ

ما تصدگني راجعلك الموضوع .

مقتدر : ول موتچ حلال شگد صلفففففففة هـاي .

غـاليـة : مو بصلافة امك .

كمشني ضـلـيل من زندي عصره بين ايده

وبيده الثانية مرد وجهي يحذرني

_ تحچين لووووو اشوف شغلي وياچ .

غـاليـة : شغلك شوفه وياهم هل اثنين بيوم ما رجعت

وتعاركت انت وتمار امك گد ما تحبك گالت

اسجل بيت بأسمچ بس عوفي وروحي واخوك

عجبته الفكرة يريد ينزل راسك ساعدهـا

ودليل كلامي الأوراق قابل امك تسجل بيت بأسمي

هدية رادت تخفيني انا وبناتي وما استبعدها

تقتلنا انا وبناتي بس نطلع منا .

دفعني وگف مقابيل تمار ومقتدر بصفة يحچي براسه :

_ خوية حتى لو امك واخوك يعرفون بس الغلط

من حرمتك شلون تقبل تشرد وتروح وياهم

ويسجلون بيت بأسمها .

غـاليـة : قبلت يتسجل البيت بأسمي وارجع

بس ما اشرد واحرگ گلبها على بيت مثل ما رادت

تحرك گلب ابنها وتوگعني اني وبناتي بمصيبة .

درت على امه سوت روحها مبطوحه متخربطة

ونسوانه يغسلن بوجهه وعزيزة بالباب وگفت

بس تباع ما تدخل ، راح ضـلـيل گعد على تخم وصاح

_ تمار تلم غراضك كلها وتاخذ عيالك وتطلع

من بيتي ومن اليوم لا تعتب بابي متبري منك

جنازتي ودفنتي ما أريدك تعزب وتوگف بيها

وهاي وصية دامك تريد تطعني وتغدرني

ما اگدر اخليك يمي موووووو امان

اخووووي موووو امان .

گعدت امه تنود وتملخ براسها ونزعت شيلتها

تجر بشعرهـا لان طرد تمار صدمها من صاح

_ عزيزة تلمين ملابس امي ، وانت مقتدر شغل

سيارتك وصلها على بيت اخـوها ، وهـا اسمعيني

اذا يجي واحد بيهم ويگلي ليش تزعل امك وروح ابوي

انبت طلقة براسو وانعل ابوهم لابو الشريف البيهم .

من شافت كلشي ضدهـا وما يتفاهم قافل

وحتى يخوف ويمشي ويسب انواع السب

ما سامعته بكل حياتي وكفت تتحداه

ام ضـلـيل : تطرد اخوك وامك وهـاي موگفهااااا

تريد اطلعها مثل الشعره من العجينة وتخليها

يمك ختلهااا البيت بيتهاااااا .

وهوَّ يگعد ويرجع ضهره شغل جگارته

وبصوت تعبان جاوبها ويأشر عليَّ بأصبعه

_ هـاي اطلگها وارجعها منين ما اجت هذا حدي وياها .

رجع اخذ نفس من الجگارة غمضت عيوني

اعض بشفتي من القهر وگلبي يريد يطلع من مكانه

ضـلـيل : راح اسوي اللي لازم يصير من سنين

كـافي مليت دست على روحي هواي مو ادميه هي گوه .

بيده عصر راسه ونزل على عيونه يضغط عليها

ورجع يحچي عبالك مجبور گاعد على اعصابه

_ شاهين بساع الشيخ ابو محمد اطلگها

بإرادتي احسن ما تنزل راسي بين الناس .

فات نقش بنص الديوان لزمها شاهين

من ايدهـا يمنعها تتقدم صرخت على بيبيتها

_ الله لا يووووفقچ ماتفكرين باجر من يضيق

عليچ الگبرررر وتوكفين گدام الله شنووو تحچين .

شاهين : نقش عوفيها الحچي مايفيد وياها .

سحبت ايدها منه وركضت على ضـلـيل

تناشغ وتصرخ تعاتبه وتتوسل

نقش : من أمنت بيك واجيت بلغتك

بكلشي سمعته مووو حلفت ما تأذي امي وتحميهاااا

ليش ما ثبتت على كلمتك عود ليش اطلگهااااا .

احسها ما تحچي تكفخ بيه على وجهي

اريد كلامها يفوت بعقلي حسيت راح انجلط

يعني نقش هي حرگت الفلم گدام ضـلـيل

هو من شاف صدمتي بكلام بنتي نتر بيه

ضـلـيل : إي بنتچ بلغتني طلعت احسن منچ ومن

امي واخوي تخاف على عمها لا تتضرر سمعتي .

ما گدرت حتى اشوفه عيوني صارت بس على نقش

كمزت جوه رجلي تبوس بيدي وتناشغ تصيح

_ يمه والله العظيم خفت لا تسمعين كلامها

وتروحين هي تريد بس تخلص منه خفت والقران

وروح ابوية علمود مصلحتچ اذا نطلع من حماية

عمو ضـلـيل نتعذب وهاي مـا تعوفنا والله يعلم

شنو من مصايب تشمر علينا .

ضـلـيل : نقش گومي لا تتوسلين بيهاااااااا .

نقش : حلفت ما تأذيهااااا انت حلفت وعدتني

عوف امي حاسبهم هذولي گدامك حاسبهم .

ابتعدت منها وبقيت على نفس سكوتي

ما نزلت لا راسي ولا عيوني وهذا اكثر

شي چان ينرفزه ويستنزف صبره

رجع يصيح على شاهين حتى يستعجل

يجيب الشيخ درت على شاهين واشرت اله

بدون ما يحس بـ ” لا ” افتهم عليَّ عافنا وطلع .

عفتها تبچي وطلعت من المكان صعدت فوك

قفلت بابي شمرت العباية واجر بالشال

وشعري ينسحب وياه ضربت على وجهي

بكل قوتي ملخت روحي تملخ ودموعي

تصب على خدي اروح وارجع بالغرفة

شسوووي بروحي هسة شلون اتصرف شهل مصيبة

وگعت روحي شگد غبية اني شگد ردت احرگ

گلب هل عجووووز انوووب حرگت روووحي وياهااا .

عضيت ايدي اريد اكتم صوت هل بچي والنحيب

الله لا يوفقني على هل عمله الطايح حظهاااااا

وين اروح وين انطي وجهي شلون اقنعه

ما ردت اشرد والله العظيم ما ردت اشررررد

هذا صاير بررركان ويصب غضبه بكل واحد

يعارضه لو يحاول يحچي وياه .

احس الدم انسحب من كل جسمي بس اندفر الباب

وفات بعده بدشداشته والعگال على راسه درت وجهي

على كنتور امسح بدموعي ما اريد يشوفني

جر ايدي وفرني فر عليه ولم وجهي بيده حيل

وفوكاها مقيد حركتي اريد افك روحي منه ما يخليني

ضـلـيل : خليني ادحگ بدموعچ واحس على اقل ندمانة .

غـاليـة : والله ضـلـيل والله ما ردت اشرد والله .

ضـلـيل : امس من اجيتي تلعبين بحضني وتدلعين

ردّت اموتچ وحگ هوووو الله انتِ نايمة كل دقيقة

اريد احط براسچ طلقة واكتل روحي ونخلص

واتعوذ الشيطان واصبر روحي بـ

” ما تسويها باجر ما تطلع وياهم وتسجل البيت بأسمها ”

رفعت ايدي بس اريد يسكت حتى افهمه همست

غـاليـة : صح طلعت وسجلته بس ردت اقهـ ..

قاطعني بكلامه وصياحه رج البيت احس اريد اطم روحي

ضـلـيل : تقهرررررررررررريني تريدين تقهررررريني

تطلعين من المهجوووم تتفقين وتخططين وابن الكلب

شمعرررروفه مسافرررر اني العب وووحدي

ما اشرد بس العب عليه وعلى اهله اخوفهممم

اخليهم كلهم مضحكه تسجلين البيت بأسمچ

انتِ تهددين بيهم ما يگدرون يحچون حتى لا ينشهرررون

وانا نايم ورجلي بالشمس شمدريني مسويتني وصله

خاتم تفرين بيه فررررر بكيفچ وراح تهدديهم بيه مووو ؟

اريد أجاوبه گطع گلبي من طبگني بالكنتور شمرني

بكل حيلي وگعت استندت على حياطين وگفت متأذيه

ضـلـيل : تخوفين وحگ هذا الله تخوووووفين

شني هذا عقلچ بس هم حگچ ماكو زلمة حوك

يسيطر عليچ ، خليتچ زايد عن الزوم تشوفين روحچ

طغيتي بنت ذيااااااااب طغيتي .

حاولت ما انهز ومايشوف ضعفي نشف

وجهي وعيوني ثبتت وبثقة جاوبته بدون تلاعب

_ غلطان اني خفت عليك ، حتى خفت لاتعرف

امك واخوك شلون يخططون يريدون يكسرون ضـلـيل بيه .

ضـلـيل : ليش انتِ منوووو ولچ منووو انتِ

وانا شيخ ال ضـلـيل وانكسرررررر عليچ .

مد ايده بيده الأوراق نفسهن ضربني على وجهي

بيهن ابتعدت رجع سحبني انضربت بصده المتصلب

ضـلـيل : تبيعيني الخاطر بيت ؟

غـاليـة : والله مو .

ضـلـيل : انا اعز عليچ بيت لووو تجين اردچ حچيت

هوووواي لچ هووووواي حچيتها انتِ لو تريدين

روحي ما اعزززززهـا عليچ وهاي انتِ مـا مقدمة

اليه ربع ألي اقددددددمه الچ ول غـاليـة تغدريني .

طبگني على حايط يدفع بيه حيل والأوراق

يشمرهن عليَّ ادفع بيده ولا اگدر عليَّ ربع قوته ما اجيبها

ضـلـيل : اخذي البيت اشبعي بي خلي يفيدچ

هذا اسمه جشععععع وطمعععع طمعتي زايدددددد

لككككككك اخخخخخخ عبالك ما مخلي شي بأسمهااا

راحت وياهمممم وعبالك مااا مسجل شي بأسمهااااا .

شمرتهن وصرخت بكل علو حسي بعد ما اتحمل

غـاليـة : مووو بعيني تعررف كلش زين

وحجيت گلشي وانا ما اخـاف منك حتى اضطر اجذب

بس ردت احرگ گلب امك واخليها بناااار

هاي غايتي تصدك ما تصدك مشكلتك

بعد لا تقترب ولا تضرب ولا تتجاوز روح منا ضليل .

عوج ايدي يضرب بطرف ايده على راسي

فرني فر الحد ما انضرب ظهري بصدره

ضـلـيل : الغلط مو منچ والله انا كبرت راسچ عليَّ

خليت روحي بيدچ انعل والديّ والديچ بعد اذا

مـا ارجعچ واشمرررررچ برا حياتي .

غـاليـة : لا تهدد ما ذابحه روحي على حياتك .

طبگني على حايط وايده على رگبتي يريد

يخنگني يضغط ويرجع يفكها ما يگدر يأذيني

خليت عيوني بعيونه وهمست

غـاليـة : سويها ضـلـيل يلة .

ضـلـيل : اششششش صوتچ بنت الزمايل .

ضغط يقوي بيده ورفع ايده الثاني يعاون ايده عليه

ويفشل يبعد بعيونه حتى ما يخليها بعيوني وهم يفشل

دفعني بعيد عنه ولجأ للتهديد

ضـلـيل : ما ألطخ أيّدي بيچ ما تستاهلين

بس ارجعچ غريبة ، لمي ملابسچ اطلگچ اخلص منچ

وارجعچ لبيت ذياب هو انتِ ادگين وتنوحين تريدين

تردين هناك حتى تطلعين وطبين وتعشگين وتتزوجين براحتچ .

غـاليـة : طلگ روح طلگ وبعد شيل ايدك

ومعليك بيه لا تدخل احب اتزوج لا تدخل بيه .

ضـلـيل : البنات عندي انا اربيهن .

غـاليـة : تريد تلزمني من إيدي لتوجعني

حتى اتووووسل بيك واهين روحي وارجع مو ؟

ضـلـيل : ولي شوفي حياتچ .

يريد يطلع فتح الباب دست على روحي

وعلى گلبي وركضت وگفت گدامه

وخليت هيچ هاي عيوني بتحدي

خلينها بعيونه انا ما غلطت صحت

غـاليـة : خليهن عندك وطلگ يلة خليني

اشوف حياتي مليت .

سد الباب وسحب لعگال من راسه ضربني

على ظهري ويدفعني من گدامه تحركت

بعيد عنه كسر قراصتي وفر شعري بيده وسحبني

_ امشي اطلعي برررررررررررا اطلعي مناااااااا

تعبتيني ول تحرگين بگلبي فوووك غلطچ

مذنبة انتِ بدل ما تعتذررررررين تهدددددين وتتأمرين .

شفت حاليّ بالمرايا تمسكت بيدي وايدي

خليتها على ايده الي تريد تفتح الباب وهمست

غـاليـة : ضـلـيل لا تكسر صورتي بعين احد

لا طلعني بهاي الصورة گدامهم بناتي يشوفوني

عوفني بس عوفني لا تحرگ گلبي حباب ايدك فك شعري .

اجر بروحي وهو يسحبني ما متحمل يريد اطلع

غـاليـة : اكتل روحي اذا اطلع اذا تقلل مني

گدامهممم وتفشلني بعيونهم وبناتي شيل ايدك .

ضـلـيل : وانا وفشلتي .

غـاليـة : فكني بس فكني لا تحرك گلبي ايددددددك

اروح اني اروح اني انزززل والله واروح

ما ابقه بعد بس عوفني .

عافني وطلع مشيت اخذت الشال اشد بي

وشعري من فرت ايده يتگطع واسمع صوت

ننوس تريد تصعد لان سمعت اصواتنا عالية

خليت عباتي على راسي وما اخذت اي شي

ويايَّ حتى ملابسي عفتهن ، ونزلتي عكس

الهدم الصار بيَّ والكسرة بگلبي نبتها نزلت

رافعه راسي امشي بهدوء وهوَ گاعد بمكانه

ننوس بحضنه من شافتني كمزت تريد تجي

لزمها من ايدها ونقش وگفت وجهه اصفر

ودموعها ما وكفت ابد تمرد بيدها

مدت ننوس ايدها واني بعدني انزل صاحت

_ ماما تعالي ماما .

جاوبتها واني اتعداها هي وابوها وكلها تراقبني

منتظرين اوكع على شيخهم واتوسله يبقيني

غـاليـة : ابقوا عند اهلكم تحت حماية شيخكم .

رفع ايده يمنع مقتدر يحچي ويحذر بيهم

ما يحجون ويايَّ يسكت بيهم صاح

ضـلـيل : شاهين وصل بنت ذياب لبغداد .

ضحكت من شفت امه تنتظرني اطلع حتى تطلع

صعدت بسيارة شاهين وسألته

_ لعد وين الشيخ .

_ خابرني گال ارجع لا تجيب شيخ كم يوم واطلگها .

شاف المرايا ورجع يسألني

_ شيخة بيچ شي ؟

_ بعد لا تحچيها هاي شيخة .

_ ما ترهم لغيرچ ، لا تنقهرين محلولة .

_ امانة الله عينك على بناتي هذني خواتك فدوة .

_ لا توصين حريص شحدو ليتگرب منهن .

الطريق كله عيون بناتي ودموعهن تراوالي

بقيت احرگ بنفسي وألومها نزلني بصف

الباب بس طلعت امي راح حضنتها بكل حيل

وحتى ما بينت الها ضحكت وحچيت

_ طگ گلبي عليچ عفت البنات واجيت اشوفچ .

ما صدگتني وبقت تتفحصني بعيونها

_ لعد ليش ترجفين ولونچ مخطوف بيچ شي

ضـلـيل ضاربچ احجي يمه بعلي اجمع اخوتي عليهم .

_ لا دخيلچ كلشي ولا اخوتچ يعيطه من ضـلـيل يسلموها .

حضنتها ودخلنا وهيَّ بعدها ما مرتاحه لوضعي

_ يعني ضاربچ .

_ يا يمه ما ضاربني شبيچ .

_ لعد البنات ليش مو وياچ .

_ ننوس ما تقبل تعوف ابوها وانا اخاف

اعوفها وحدها عدهم خليت نقش يمها .

شوية حسيتها بلشت تصدگني راحت تركض

تريد تجهز اكل الدنيا أباع عليها غربت

آخذت منشفة وركضت على حمام فتحت الماي

وگعدت اناشغ سودة علية يمه ننوس خليتها

تفرفح ورايَّ ، كافي والله كافي مليت احارب وادوس

على نفسي الخاطرهن وبكل مرة يهددوني بيهن

شردت وحدة والسبب منهم حرموني منها

وما ادري بيها عايشة لو ماتت ، ذبحت روحي

ذبح بس ردت نقش تطلگ وتخلص ، تعبت

احارب عليهن كــافي لهنا وكافي ما يموتن هذولي

اهلهن اصحي لچ اصحي ما يموتن ما راح يموتن

ملخت روحي شگد ما افكر بيهن واگول عادي

گلبي ملجوم عليهن شلون اذا صار بيهن مثل

مُـرجانـة مو خلوها تصير خرسة

لو يسوّون الاكبر منها ، ننوس يخافن

اي يخافن يسوون بيها شي يعرفن بي يحبها

ويتخبل عليها بس نقش شلوووون يكرهوها

واعرفها هاي ما تسكت منهن اخخخ يا نار گلبي

دگت امي الباب نبرة صوتها خايفة مبينه

_ يمه غـاليـة تأخرتي .

رديت وصوتي من البچي بي رعشة تعب

_ اجيت يمه .

حجيتها وخنگت روحي اخاف تسمع شهگتي

واخوفها هي شباقي بيها صايرة شضعفها

حتى مشي ما تگدر تمشي ، اول ما طلعت

صار ابن خالي گدامي لفيت راسي بالمنشفة

ردت اطب بالحايط من الفشله

_ يمه خليل فززتني .

خليل : هاي منو هنا غـاليـة وحگ علي بغداد نورت .

تعديته اضحك ومن گد ما ارتبكت وخجلت

نسيت حتى اسلم امي بقت تغمز وبس صرت

قريبة منها هوَ يغسل بالمغسلة بصف الحمام

همست بأذني : ردي السلام عيب يمه .

غـاليـة : شلونك خليل .

خليل : مشتاقيلچ شسالفه شهل گطع .

رفعت ايدي بمعنى مو بيدي ورحت على غرفة

انشف شعري واسمع امي تگله مو بيدها

وماتعرفهم ال ضـلـيل ما ينجرعون

طلعت عبالي راح شو هذا گاعد على تخم

متمدد وفاتت امي تركض بالصينية مال اكل

وگعد وتصيح بيَّ اگعد وهو يطبطب على مكاني

خليل : تعالي هنا غلولتي .

رفعت حاجبي بعدين تذكرت من اني صغيرة

اولاد خوالي يصيحون غلولتي گعدت قريب من

امي شفت علاليگ بالباب مال مسواگ

غـاليـة : هذني شنو ؟

_ خليل كل يوم يجي يشوف شحتاج خطية ويروح .

_ مشكور والله ما اعرف شلون اجازيكم انت وخوالي .

خليل : شسالفه امي هيَّ وهذا واجبي .

اخذت من العيب كبة اكل بيها هيچ

خليل : شلونهم وياچ ال ضليل ؟

_ زينين .

_ قبل شهرين طلعت بفصل وفات هذا

زوجچ هو شافني عرفني سلم على جادر كله

من وصل يمي عبرني ردت اكفخه كفخه .

غـاليـة : ههههههه حتى يكسرون ايدك .

حجيتها وشربت ماي ما منتبهه على روحي

عقلي مشوش نزلت الگلاص من شفته شلون

ينظر وفاتح عيونه مصدوم بجوابي

خليل : منو يكسر ايدي ؟

غـاليـة : يعني اذا تكفخ شيخهم يسكتون ؟

خليل : وحگ علي گاعدين انا وسبعة عقداء

والحماية ترس الشارع شحده يتنفس غير

يروحون ثرم بين ايد الحرس .

حكيت حاجبي وهزيت راسي وقبل لا اوگف جاوبته

غـاليـة : هذولي كلها واگفين احتراماً

لشيخ ال ضـلـيل والشيخ من فات سلم على يعجبه

يعني فارض احترامه لو مو الدولة عشيرتهم دولة .

غير الموضوع من صارت حديه بكلامي

خليل : هوَ عود ليش ما يسلم شبي يكرهنا

لان سبيته مرة من إخذ بناتچ .

جاوبته امي : لا لان من اجه ياخذ البنات

وبعدين خطب ضـلـيل غـاليـة ابوها بلغه انتَ تريدها .

خليل : اي صدك ههههههه من يومها حطني براسه .

عفتهم وبحجة الجاي دخلت للمطبخ

افتر والف شغله براسي صارت بس اجت

امي خلت الصينية وتهمس بصوت خافت

_ يگلي ليش تنتر بيه شبيها اذا ماتريد اظل

اروح عيب يمه خطية .

غـاليـة : يمه راسي يوجعني اريد بس انام

اخذي هذا الجاي وخلي يشرب ويروح .

رحت على غرفة سديت الباب وضميت روحي

بسرير امي غطيت حتى راسي بقيت اتلوع

بالفراش صوت بناتي يزرف براسي وگلبي

مقبوض ما مرتاحة اقوي بنفسي واقنعها

واخطط بعد الطلاگ ادور شغل واشوف

حياتي بعد والبنات يمكن بيوم يرجعوهن عليه

وأرجع دموعي تهز هل قوة الوهمية

بجيت واحس بعيوني تريد تنطفي من وجع راسي

ماحس غير عيوني تنگلب ونمت نومة عندي طويلة

بس صحيت منها استرد بوعيي واحس بثقل

على جسمي واشم ريحة دم بالمكان

نظري مغوش استوعبت انا بالمستشفى .

ردت اتحرك ونيت بوجع من ايدي

امي فزت نايمة على كرسي رگبتها مكسورة

تمسح بوجهي وتعدل بشالي تريد تبچي

_ غـاليـة تسمعيني يمه اصيح الدكتور اوكفي

ركضت امي عافت الباب مفتوح اسمع

صوت خالي وخليل برا بلغتهم بسرعة

فات الدكتور كشف على وضعي احس

لساني ثگيل وعيوني ما تنفتح بس اغفي

خفت جنت اسمعهم واريد اتحرك مو گادره

هديت استمع لكلامه يبلغهم جسمي ضعيف

واحتاج راحه واذا يستمر حالي هيچ احتاج

مراجعة دكتور اختصاص ، تخردل حالي صاير بيَّ

شي اذا افقد حياتي لو صحتي بناتي شلون

مرن على بالي ودموعي تصب عبالهم نايمة .

بعد ساعتين رجعت اصحصح گعدتني

أمي تلبسني بعباتي هزيت راسي حتى ترجعني

الدنيا بكبرها تفتر خليت راسي على مخده

بين النايمة وصاحية اسمعها تحچي بالتلفون

_ هسة ردنا نطلع رجعت داخت ونامت

والله بيبي فاتت تنام رحت اشوفها وخلتني

املخ بروحي گلت ماتت المخدة كلها دم

اي ضغط الله ستر وطگ خشمها دم جان راحت بيها

الدكتور سوالها تحاليل خوش مستشفى والله .

ما گدرت اكمل واسمع غفيت لدقايق ورجعت

تحاول تگعدني فات خالي سندني وامي وياه

طلعوني اجر بنفسي وخليل طبگ بسيارته

صعدت وخليت راسي على حضن امي

واون من وجع راسي ، فوتوني للبيت ورجعتني

على چربايتها گعدت يم راسي تريد احچي

وياها ، اسمعها تگعد بيه اكثر من مرة تگلها

_ گعدتها والله بيبي ما تگعد نايمة .

وكذا مرة حاولت الى ان نمت بدون ما اسمع

بعد للفجر حسيت انرفع راسي من المخدة

وشميت عطر مو غريب عليَّ وايد دافية

تحضن بوجهي ويبوس بوجهي

انذهلت من صوته الخاضع ندمان

ضـلـيل : كون هذا الوجع بيه غـاليـة

انا اتحمل انتِ وين تتحملين .

فتحت عيوني بصعوبة مقهورة منه قهره

رفع راسي يبوسني بكل مكان بوجهي

خاوي من الخوف مايعرف شيسوي

_ اجيت ضـلـيل .

_ دخلت بغداد ورجعت طلعت منها وبنص

طريق الرجعة ماتحملت ورجعت لبغداد

اذا ارجع وما اعرف شبيچ يصير بيَّ شي .

غـاليـة : مو ما تريدني وطردتني .

_ وبعدني ما اريدچ .

_ لعد شعندك هنـا .

_ حرمتي محسوبة عليه .

_ متأكد ؟

_ وروح ابوي بعد ما اريدچ .

درت وجهي منه اريد اوگف وابتعد

منع حركتي وثبتني

ضـلـيل : شبي راسچ .

_ سمعت الدكتور گال شقيقه .

رفع ايدي بهتت من شفتها كلها طگع لونها ازرگ

غـاليـة : عزا هاي شنو شبيها ايدي .

ضـلـيل : مو بس ايدچ .

رفعت ثوبي من رجلي واشوف نفسهن

برجلي وحتى الباقي من جسمي بأماكن متفرقة

ضـلـيل : يروحن لا تخافين .

_ هـاي ليش هيچ .

_ من مصايبچ .

_ من قهررركم راح تموتوووني .

ضربني بطرف اصبعه على شفايفي وصاح

_ اششش متحمل وگاعد على اعصابي .

_ روح ما مجبور روح .

_ رايح بس لا تبقين تحرگين بروحچ .

_ معليك بيَّ لو اموت لا تدخل شيل ايدك مني .

_ مليت من هذا اسلوبچ غلطانة وانتِ ام الراهي .

حجاها ورجعني على مخده يريد يطلع

لحگت تمسكت بي وهمست بدون تفكير

_ وين رايح .

_ اولي .

_ ب3 الفجر وين تروح .

_ عجل اگعد يمچ تستصغرين بيَّ .

_ راح اسكت بس لا تروح .

گعد على طرف السرير شغل جگارة

يشربها وساكت وحتى انا خفت انطق بكلمة

كسر هل صمت من خلص جگارته

التفت بعتب وتعب يحاچيني

ضـلـيل : انتِ والدنيا عليَّ وحگ الله غـاليـة تعبتيني .

_ ما راح اسوي اي شي بعد .

_ هو ظل شي ماسويتي بيَّ ؟

_ غلطت بس .

_ لا تبررين لا تعبين نفسچ .

_ شوف انقهر من اشوفك مقهور .

_ لا والله ما تنقهرين تعرفين شگد احبچ

انتِ لان عرفتي دگيتي دگ على گلبي

ما خليتي مصيبة ما سويتيهااااا .

رجعت راسي على مخدة ضغطت عليَّ وهمست

_ بغلاتي عندك اذا صدك تحبني ماتروح .

غمضتها عيوني يضربني دمار بيها راح

يمشي على أضويه يطفي بيها ما اتحملهن

طلع واني عبالي اقتنع ، استندت على اغراض

وبكل ما باقي من حيلي مشيت سريع واصل للگراج

وامي تمشي وراه هم ماتقبل يروح

غـاليـة : ضـلـيل مووو احچي وياك .

حچتها وگعدت بالگاع هذا قافل اذا ما يشوفني

متخربطة فلا يتفاهم ، اجت امي تركض وهوَّ

خجلان منها واگف وراهـا بقت تصيح لان اجيت

نزل جسمه طوق خصري استندت عليه وامشي

ضـلـيل : ما تنامين شعندچ تركضين .

غـاليـة : من ورا … سكتت قبل لا اكملها من فر وجهه

كله عليه مايريد اخلي مذنب ابتسمت بوجهه وهمست .

_ ركضت وراك اقصد .

_ شعندچ ويايَّ .

_ ما اقبل تروح .

_ مو بكيفچ .

_ الخاطري .

_ لا .

_ اذا تحبني .

_ اشششش العرمة .

گعدني على فراشي عدل مخدتي وامي فاتت

بيدها ماي شربت منها هو يريد يستغلها ويروح

لزمت ايده الحد ما كملت واخذت الگلاص امي وطلعت

گعد قريب مني ما راضي على وضعي

_ لا تبقين تقهرين بروحچ ، طلاگ صار كم سنة

تريدي اطلگچ ومصروفكم انتِ وامچ برگبتي

وبناتچ اسبوعين عندي الثالث عندچ خليهن

اسبوع كامل يمچ بعد بس لا تتزوجين .

يريد يطلگ ويتحكم حضرته شوكت اشوف بناتي

ويبعدهن مني وفوكاها يتأمر ويتشرط براسي

غـاليـة : بعد الطلاگ لا تدخل اتزوج انخطب

احب لا تدخل محسوبة غريبة عليك .

ضـلـيل : وتتزوجين ؟

_ لعد ادفن روحي .

قيد حركت وجهي بيده وتقدم اكثر يهدد

ضـلـيل : اموتچ اذبحچ تتزوجين شنو ماكووو زواج .

غـاليـة : من يصير طلاگ يعني يسقط حقك من غـاليـة .

شرد ذهنه ولمعت عيونه تغيرت نبرت صوته تماماً

ضـلـيل : بنت ذياب .

_ ها .

_ ما تتزوجين .

_ لا تروح .

_ ارجع نفس قبل وياچ اذا تكسرين كلامي

ما اشوفچ ، ما احترم ، ولساني تعرفي .

_ تقهرني عود بكلامك ؟

_ لا تقهريني .

سمعت صوت حسرته تقدم مستسلم تعبان

نام وهوَّ يحيطه سكون غريب سحبني

على أيده بدون كلام نام ونمت .

گعدت على صوت بناتي اثنينهم

اخذتهن بحضني احضن بهاي وأبوس بالثانية وننوس

عيونها صايرة دم ما صدگت تخلي

راسها على رجلي وتنام ، شاهين سلم

وراح عافهن يمي اربع ايام ورجع شاهين اخذهن

وعلى تلفون امي تخابرني نقش من تلغون شاهين

باليوم مرتين بالأسبوع الاول ماتشكي منهم

بالثاني بقت تلعب روحها وهي تگلي

_ يمه يعرفن اخابر عليچ وكل شوية يسمعني

كلام عيب حتى أوصله ألچ عود من يفوتن

بغرفة عمو ضـلـيل وهاي عفاف الخايسة تگلي

عبالك زعطوطه تلبس ملابس نوم وتنزل من غرفتها

على غرفة عمو وتتعمد تفوت على غرفتنا بحجة

تشوف ننوس عود عمو يوصيها وتظل تفتر .

غـاليـة : تجاهليهم ماما .

عفاف : قبل شوية جنت اتريك واجت

تسولف لدلال واني موجودة تگلها البارحة

ضـلـيل حار شيسوي بيَّ وشالني وفرني .

غـاليـة : هههههههههههه شالها مرة وحدة

ضليل صاير يشيل هوايش شنو مايريد روحه ههههه .

_ يمه هي مال ضحك والله اول البارحة ملختها

تملخ اصيح بيها عيب تحچين هيچ مقابيلي

تگلي ها المطلقة تردين زلمة .

_ ضربتيها وضربتچ ؟

_ ملختها وملختني وعمو ضـلـيل راد يكتلني

وشاهين خلصني بس لزم عفاف طلع بيها ضيم گلبه

هو منا صار ايام عبالك ابو مات بالجديد لا حلاقة

لا اكل لا شرب حتى النوم مالته متخربط يفوت متأخر للبيت .

سديته منها بعد ما نطتني موجز اخبار طويل عريض

وانشغلت بأمي وبالبيت والتنظيف اخلقه حتى سمر وقتي

ومن بعد اسبوعين خابرتني فحطانه عبالك عدها سباق

_ اگلج يمه اجت خالتهم وياها سماهر بنتها هاي

عمرها 22 ، ها وسمعت عزيزة تتعارك هي وبيبي

تگول الها انتِ بعيدة ما تگدرين تلفقين مشاكل

دزيتي اختچ وبنتها متعمدة براسچ ملعوب .

غـاليـة : ابقي بعيدة عن لعبهم لا تدخلين

ولا تنزلين بس للحاجة خليهم نارهم تاكل حطبهم

عجوز النار تريد تلزگ ضليلو بمصيبة ماتعرف شلون .

وگع لساني گد ما حذرت ونصحت سدت الخط

مني بقيت اسولف الصار لأمي كش وجهه وصاحت

_ غدي منهن برررو يمه شنو من نسوان

بس لا تفوت البنية على الزلمة وتصير جبيرة .

_ اي خطية غشيم مايعرف ، هو غير حافظ لعبهن .

_ لو مهما يحفظ يظل كيدهن عظيم .

_ ايععععع شنو هل حرب القذرة .

خليت سجادتي وشمرت التلفون طلعت صورة مُـرجانـة

من المجر خليتها على گلبي وشهگت

شلونها هسة زينة بس اريد اعرف زينة مرتاحة

تخاف يعاملوها زين لو تتأذى منهم فاتت امي

على صوت نحيبي تمسح على راسي

صحت بصوت واني افرفح على خبر منها

_ يارب دخيلك سخر لها من يحميها

ألهي حبب الناس بيها ، وابعد عنها كل كاره وحاقد

بدلّ حزنها فرح وراحة بال يارب يا كريم .

_ لا تخافين يمه والله كلبي بارد ويگول بنتچ زينة

_ يمه عليچ الله ادعيلها هووواي ادعيلها هي

هسة بس تحتاج دعائنا ماعدنا غير شي أفيدها بي .

يومين ودخلت علينا نقش تهفي بفستانها

باستني وگعدت على تخم عطت بيها

_ منو اجه وياچ .

_ شاهين .

_ امشي صيحي شگد عيب .

_ لاا خلي يروح الخايس .

سديت حلگها لا يروح انوب يسمعها

_ ليش ولچ صاير سايق لحلگچ فحطان

من الطريق وما يشكي

فات مغندب وبلا احساس من عصبيته عاط

شاهين : شيخة نقش شالعه گلبي ترضيها ؟

ضربت على صدرها وكفت تجاوبه

_ انوب اني شالعه گلبك بسيطة شاهين اني اعلمك .

جريتها گعدتها ورحت على ولد اتوسل بي يرتاح

ركضت اخذت بطل ماي ورجعت فتحته اخذه

من ايدي فحطان شرب ذب نفس ويحاجيها

شاهين : بسيطة تگلي بسيطة .

نقش : وبسيطة مرة ثانية وثالثة .

شاهين : هاي گدامچ شيخة شوفي الأسلوب .

نقش : ماما يصيح عليَّ تقبليها ما يحترمني .

شاهين : شيخة شباب رادت تنضرب بيهم

تمشي بثول ما تركز ابد من خوفي وحرصي صيحت .

غـاليـة : فهموني اعصابكم دخت ولكم .

شاهين : نزلتها تاكل جوعانة بعدني اقفل بالسيارة

هاي وصلت للمطعم ما ادري بيها صحت عليها تنتظر

طبت بنص الشباب هي شني عمه مركب گرون انا ؟

نزل راسه وجهه صاير احمر دم

يريد ينفجر مسح على لحيته يصبر

بروحه عليها حصرت ضحكتي على منظرهم

شاهين : نفس انا جذاب مووو ؟

نقش : يعني شبيك ما ادري بيهم .

_ المهم دخلتي بنصهم .

_ شكو بيها .

_ ول نقششششش شكوووو بيهاااااا .

رفعت ايدها تأشر عليه وتباع عليَّ

وگفت ادگ رجلها بالگاع وتصيح

_ هم رجع صيح گال بعد ما اصيح بالسيارة .

شاهين : شيخة حاجيها بس حاجيها .

نقش : شاهين بسيطة اريد اشوفك تگعدني من الصبح

تگلي سويلي ريوك ما اسووويلك ابد ابد .

هز ايده وجاوبها بصوت واثق ممزوج بنبرة اسف

شاهين : ما اريد منچ شي بعد تعايريني على بيضه .

غـاليـة : هسة نزوجك وحرمتك تسويلك ولا منيتها .

نقش : اي هو يحب وحده روحوا خطبوها وخلصوني .

غـاليـة : اوووو منو هاي سعيدة الحظ .

شاهين : ماكو هيچ حچي .

نقش : لا تستحي من امي عادي امي سبورتيه .

شاهين : استغفر الله .

نقش : ماما يحب بنية كُلش حلوة

بس من طرف واحد يعني البنية ماتعرف بي يحبها .

من سمعت صوت حسرته حسيت روحي

تبسمرت بصعوبة سألته

_ ليش من طرف واحد ؟

شاهين : ماحب احملها ذنوب البدايات اريدهـا بالحلال .

لمعت عيونه من شافني تغيرت ملامحي :

_ منو اعرفها ؟

شاهين : لا غريبة .

نقش : يمه عدنا اخبار مو حلوة .

غـاليـة : شكو ؟

شاهين : واصل خبر لخوال ابوي مُـرجانـة عند الموروثين .

حسيت المكان صار يفتر بيَّ وشفايفي يبست

تمالكت نفسي اخفي برجفتي همست

_ شلون يعرفون ؟

شاهين : واحد من ولدهم شايفها صاعدة سيارة

وياها واحد من الموروثين وداخلين للأراضي مالتهم .

ملخت روحي اجت نقش تلزم بيدي تمنعني

يمه بنتي خرب كل مخططاتي هل خبر

والله حسيت گلبي يوووجعني عليهااا صار ايام

شلووون فهموني شلووون اروح الها شنو

براسهم يذبحوها اذا توگع بيدهم

شاهين : جدتي ذاعت الخبر على عمامي وكل

ولدهم طشوها بكل العشيرة بنت عابد بأراضي الموروث .

غـاليـة : وعلى شنو ناوين ؟

شاهين : كلها تخطط والأخبار ما تبشر بالخير

على اساس يدزون عليهم كم زلمة يحذروهم

حتى يسلموهـا ، وجدتي تحزمت احزام لموتها .

غـاليـة : وعمك ضـلـيل وين ؟

شاهين : جدتي ما رادت يوصل خبر للشيخ

بس بلغته وراح عليهم كلها دمها حامي عليها يريدوها .

بيرغ : تريدون على سنة الله ورسولة وبرضاكم

وگدام العالم متزوجة واطلعها عروس من بيتكم

انا جاهز ، رافضين بلغوني اطرهـا بلمح البصر .

دفعه وارث برا يطلع بي وهوَ ينتر بعصبية ويصيح

ملِكه ركضت على امها من وگعت على تخم

تفتح بشالها ركضت اخذت ماي غسلت وجهه

انخطف لونها خفت لا يصير بيها شي ويوگعون

بمصيبة والله شيخلصهم .

طلعت مستعجلة وارث يتصايح هوَ وبيرغ

لزمته من ظهر قميصه عتيته ولا يحس

رجعت اعت بي اسحب فاصل بالعركة

رفعت ايدي وضربته بعد ما خلص صبري

طلع صوت عالي بالضربة لزم مكانها

وافتر يشوف منو ضربه رجعت كم خطوة

ارمش برهبة من شكله احتقن اوع شبيها هذا

غير انتَ ما تحس يعني شسويلك .

وارث : ضربتيني ؟

هزيت راسي بـ ” لا ”

وارث : چا منو ضربني ؟

رفعت أكتافي وملت راسي

وفتحت عيوني بمعنى ” ما اعرف ”

بيرغ : يغشم روحه الطنطل هي ضربتك اكو غيرها وراك .

اشرت الهم على غرفة وفتحت ايدي امثل شكل المتخربط

بيرغ : منو تخربط ؟

حجاها وركض مستعجل يشوف منو متخربط

رحت امشي وراهم اثنينهم من شافوها متخربطة

خزر وارث بيرغ وهمس بأذنه

_ بالله ماتت امها لو ابوها يموت

بالسجن شلون تتصرف لك حيوان تحقد عليك وتكرهك .

نتر بيدغ ايده من وارث مصمم على غلط وطلع

طلب وارث من سَــهم يوصلهن على بيتهم

قبل لا يطلعون امها رادت تروح على حمام

طلع امها عدها سكر ، بقت ملِكه يمي من شاف

امها راحت دفع الباب وفات عليها خنست

وركضت ختلت بين الكرسي وبين المكتب

لا يلوحني طشارهم ، لزمها من ايدها دفعته

بكل قوتها وگفت مقابيله عبالي تخاف منه

ملِكه : ايدك اكسرها لا تمدّها أتوسخ .

زجر بغضب من كلامها واقترب اكثر يحذرها

بيرغ : وافقتي ؟

ملِكه : لو تموت اتزوج زبال المنطقة وما اقبل بيك .

بيرغ : اذا ما اندمچ يوووولوووو اخخخخخخخ

اشگچ والله اشگچ بالنصصصصص .

دفعته تريد تطلع اعترض طريقها يساومها

بيرغ : شراح يصيررر لو تعرفين

ملِكه : خاب جنك عگرب دوخرر لا اهينك وخر .

_ ول تهينين منوو ؟

_ والقران اخلي اخوتك شهر يضحكون على سحلتك .

وگفت اضرب على خدي من عتها وصاح بوجهه

_ صاااابرررر لان بيوم عرسچ اذا ما اخليچ

تتوسلين وتبوسين بيدي .

_ لا تحلم زايد اگعد .

_ اغتصبچ .

رفع ايده اليمين تضرب باليسار عبالك بيده وصله

_ تغتصب منو الخايس ؟

_ اشگگچ وحگ الله املخچ تملخخخخخخ .

_ راح اغلطططط .

_ غلطي بعد غلطي اذا ما اشلع شفايفچ واگص لسانچ .

دفع الباب وارث خلصها منه طلعت وهيَّ ادردم

ملِكه : الخايس يهددني روغان .

بيرغ : اكلك شنو روغان .

وارث : حذاء يلمع مثل ذاك بصف المكتب .

التفّت شاف الحذاء راد يطلع وراها دفعه

وارث بكل قوته گعده على تخم

_ اگعد .

_ اموووتهااااا اليوووم .

_ انجب لك هي تموتك لسانها اطول مني

فاتت فرتنا فر بلسانها وطلعت .

_ منووو يفرنا .

_ ملِكه شبيك راح تموووت ما تعرفهاا .

بيرغ : وارث احترم نفسك .

وارث : تريدهـا ؟

_ اي اريد اكسر راسها .

وارث : وحگ العباس جذاب .

_ وارث اذا ما تحلها وهاي الزمالة توافق الله يستر مني .

فتح وارث باكيت الجگاير اخذ بيرغ

وحده شغلها وارث هم شغل وحده

_ اساعدك بشرط ؟

بيرغ : بلشنا .

_ براحتك .

بيرغ : بالله شنو الشرط ؟

طلع وارث من جيب بنطلونه اربع اوراق ناعمات

مطبگهم ما ينشاف شنو مكتوب بيهم وقدمهم

وارث : اسحب وحده وانت وحظك .

جر بيرغ ورقة وعبالك متعودين على هل لعبة

بيرغ : اذا شي صعب ما انفذه .

وارث : ويسقط حقك ما اساعدك عادي .

فتح بيرغ الورقة قراهـا بكل ترهي راح

وارث گعد على تخم وفرش ايده منا ومنا وابتسم

_ اقراهـا شبيك .

بيرغ : اسحب ورقة ثانية .

_ لا ممنوع تخالف قوانين لعبتنا .

بيرغ : مكتوب ادفع خمسة ملايين الدار الأيتام .

المكان تحوّل هدوء غريب وارث صافن على بيرغ

وبيرغ صافن بالورقة واني حتى ملامحي نشلت

بگد ما مركزة بكل حواسي وياهم

وارث : عندك وقت ساعتين اذا الورقة ما تنفذت

وتجيني بالدليل والصك تثبت يسقط حقك .

بيرغ : طول الوقت على اقل .

وارث : ساعة ونص گدامك .

شمر بيرغ الورقة على وارث وطلع شوية ويركض

شغل السيارة وصاح على همام يفتح الباب

شرد ذهني بگد ما تعجبت ابتسم بتلاعب وهمس

وارث : تلعبيها ؟

هزيت راسي على سريع ب ” لا ” فتحهن وسحب سلة

الزبالة برجله حرگ باقي الأوراق وكأن خلص وقتهن

شمرهن وگف على سريع سألني

_ ليش جنتي تلطمين على وجهچ من فتت ؟

تقدمت اخذت التلفون من ايده كتبت

” بيرغ گال اغتصبچ ”

وارث : يغتصب منوووووو ؟

” ملِكه ”

وارث : عبالي .

” شعبالك ؟ ”

وارث : كملي .

” اي وگال اذا ما اشلع شفايفچ واگص لسانچ ”

كتبتها وهوَ يقراها رجعت ضربت على وجهي

” عيب شنو يشلع شفايفها شبي مخبل اخوك ”

صفن بالتلفون وظل بمكانه تعبت ايدي

جريتها حط عيونه بعيوني تلمع اول مرة اشوفها

بوضوح حواجبة ثخينة هيچ من يخنزر تنزل على عيونه

تحمحم مبتعد وجر التلفون رجعه بجيبه

وارث : عيب كلش عيب لا تدخلين ولا تفكرين بهيچ

اشياء بعدچ صغيرة فهمتي ، من تشوفين لو تسمعين

هيچ اشياء طلعي من المكان لا تلوثين عقلچ .

رفعت حواجبي اثنينهم واشرت اله على نفسي

بمعنى اني چبيرة مو صغيرة نتر بيَّ بلحظتها

وارث : صغيرررة انتِ صغيرة .

كشت ملامحي من عصبيته عبالك بس هو عنده

صوت تجاهلته ومشيت گعدت على كرسي

صار ورايَّ اريد افتر اشوفه وين راح لان

صوته راح لفترة مو قصيرة بس نقذني من حجه

لأن لو افتر واشوفه هل مغرور اطير هيبة زعلتي

وارث : انتِ امانة عندي تبقين الى ان تنحل المشكلة

وترجعين بسلامة بحضن امچ ، ولذاك الوقت من انصحچ

تاخذين بنصيحتي اني افهم واعرف منچ بهل دنيا .

من شاف ماكو جواب ولا ردت فعل مني طلب مني بلطف

_ بالله ديري وجهچ انتبهي على كلامي .

عدلت گعدتي وگف گدامي وابتسم

_ مُـرجانـة وراس امي خوفاً عليچ انصحچ

من تحجين انتِ ورجال خلي مسافة بيناتكم

طريقة كلامكم انتِ وهمام قبل شوية غلط

لا تضحكين ولا توثقين بالكل ماتعرفين شنو نوايا الناس .

ردت يفتهم مني منعني بكلامه

_ اعرف على نياتچ مو قصدچ ، لا تخلين احد يعرف

بشنو تفكرين وين تروحين تحبين منو وتكرهين

منو امرچ بيد منو انتِ بهل اراضي غريبة دخيلة .

دخل همام هز راسه يسأل شكو بقيت

على نفس گعدتي انتظر وارث يجاوبه

الثاني هم ساكت وهمام بعده مركز بالوجوه

همام : شبيها البنية تريد تموت شمسوي .

وارث : شمسوي لك .

همام : اندري شبيها مخلوسه .

التفت يشوفني وارث ورجع صاح بي

وارث : شبيها زمال غير البنية بيضة .

همام : بيچ شي مُـرجانـة وارث مسـ .

وارث : خاب كون نعال وعلى راسك اگطعه .

همام : خابرتني امك

_ شكو ؟

_ اهل امك عدنا بالبيت .

_ شصاير ؟

_ گالت صايرين اعصاب لازم تروح .

اخذ اغراضه مستعجل وسحب مفتاح متعلگ بالحايط

وصاحني رحت امشي فتح الغرفة نفسها اول ما اجيت

گعدني بيها يريد يحبسني بيها هزيت راسي

ومشيت ابتعدت عنها واشرت رافضه فكرته

وارث : ساعتين وارجع .

اشرت على نفسي وعليه بمعنى اخذني وياك

وارث : مستعجل تعالي فوتي .

لمعت عيوني اريد ازخها بالبچي جر نفس متعصب

حبس عصبيته عبالك بلع صوته وراح يمشي

وارث : تعــالي لا تخبصينا .

رفعت عباتي وركضت صعدت شغلها وطلع

من اراضيهم كلها يسوق سياقه بحيث

بقيت لازمة بكل حيلي الكرسي الحد ما وصل

نزلنا مترددة على بيتهم وهمام فات ورانا

ميمونة بس دخل ركضت على وارث خايفة

همست بأذنه تشنج جسمه وفكه همس

_ اخذيها فوتيها عينچ عليها .

دخلت وياها البيت گعدتني بالمطبخ ريحة

الطبخ ترد الروح استحي اطلب منها

وهي مخبوصة بالجاي تصب اجه همام

اخذه منها واسمع وارث دخل صوته عالي يسلم

وارث : اليوم منو منورنا ابوووي تاج راسي .

راحت ميمونة تتسمع عليهم رحت وياهم

شفت امه گاعدة وياهم زلم اربعة كلها

معگلين شكلهم هيبة وجهم نوراني

وارث حاضن واحد منهم ومن يحچي

وياه يگله بوية ، سألت ميمونة بلغت

الإشارة فهمتني بسرعة عندي فضول ليش

يسمي بوية هو غير ابو ميت جاوبتني

_ وارث خواله مربي وهذا اسمه فؤاد خال وارث

الكبير بس وارثنا يصيح عليه بوية لان فتح

عيونه وفؤاد هوَ اخذ دور ابو .

ضحكت من كملت وحجتها بفخر

ميمونة : وارث تربية اهل البصرة .

تصلبت ودمي احسه جمد گعدت بالگاع

ميمونة تضرب على شفتها عضيت شفتي

ودموعي صارت تنزل من سمعت سؤال خالهم

_ وارث بوية ما اريدن افرنها ادخل بصلب سالفتنا

متعني من البصرة لهنا اسألك ، عندك بنت دخيلة

فاتت من عشيرة ال ضـلـيل ؟

وارث : اي بوية عندي البنت .

فؤاد : صار شگد ؟

وارث : كم شهر .

_ وساكت ؟

_ چا أذيعها .

_ تبلغ بيها .

_ افضحها ؟

_ تبلغ بيهااا بوووية چا احسن تصير دم .

ام وارث : نصحتك يمه تبلغ بيها ما تاخذ بكلمتي .

وارث : شصاير ؟

فؤاد : اهلها شايفين البت داخله بالسيارة

هي واحد منّكم للأراضي ويريدون البت .

دخل بيرغ للبيت بيده ورقة وسهم وياه

وجبر على صوتهم نزل من فوك دخلوا كلهم

بيرغ : شكو .

همام : اهل مُـرجانـة يردونها .

_ اي رجعها .

وارث : انتَ مخبل وين ارجعها دمها مهدووووور .

فؤاد : چا تورط روحك واخوانك .

بيرغ : عايزين مشاكل خلي خالك ياخذها .

وارث : البنية بأمانتي ودخيلة عندي على موتي ما اسلمها .

فؤاد : خابروني زلمهم كبار صغار فاير دمهم

يريدون البت ويهددون اذا ما .

وارث : اسمع بوية احنا قبل لا تدخل بتهم

على اراضينا هل عشيرة عدنا مشاكل وياهم .

فؤاد : وراح تكبر اذا ما تنطي البت .

وارث : واذا اگلك امها متعمدة ادخل البنية عدنا .

فؤاد : ليش .

وارث : عابد ابو البنية صاحب ابوي ساجر وشريكة

عابد حب بنية من بغداد بشبابه وأهله عارضوهم

تمسك بيها وطلع من اهله راح البغداد تزوجها

علنوا عليَّ الحرب النفسية وما قبلوا حتى يدخل

هل محافظة مرة ثانية ، وهوَ اراضي ورزقه هنا

ابوي ساجر اراضي بصف اراضي عابد اقترح عليه

ياخذ هل اراضي ويشغلها مصانع وزرع شغلنا

وعابد ما اعترض لان چان يمر بفترة عجز مادي

بعده شاب وبداية زواجة ، وقع هو وابوية عقد

وبهل عقد الأراضي تظل بأسم عابد بس المستثمر

ابوية ساجر وعابد ياخذ نسبة من ارباح هل ارض .

ميمونة صفنت بوجهي مصدومة بالقصة

بردت ايدي واني اسمع كلامه سحبت

رجلي على صدري وركزت

وارث : مات عابد الله يرحمه موصي ابوية ارباح

الأراضي زوجته وبناته الأثنين ياخذوها واخوانه

ممنوع يستلمون ربع من هذا الرزق ، ابوية ساجر

ما عجبه هل اقترح لازم يفتي بكيفه ومن راسه

سلم الأرباح مرتين بالثالثة طمع وطلب ارملة عابد

من ابوها يريد يتزوجها لأن هي وبناتها الورثة

بأراضي عابد وام عابد هم عدها حصه فكر ينطيها

حصتها فلوس ويخلص منهم حتى الأراضي تظل تحت

ايده لأن يضمن الأم والبنات عنده .

فؤاد : واكيد هنا اخوان عابد عرفوا .

وارث : اي وسحبوا البنات من امهن استنجدت

بأبوية بوكتها ألتقيت بيها جانت تعبانة على

موت زوجها وفقدان بناتها ومن ذاك اليوم سمعت

تزوجها شيخ ال ضـلـيل ودخلوا ويانا حرب

حتى نلغي العقد ويرجعون يأخذون الأراضي .

فؤاد : ليش ما تلغي العقد ؟

وارث : فقط زوجته عدها حقد تلغي العقد

وتحاربت منهم وما قبلت تلغي العقد لليوم

وتعمدت ادخل بنتها لأراضينا ، لان تعرف ال ضليل

ما يگدرون يسون بيها شي وهيَّ عدنا

احنا واجب علينا نحميها بوية .

همام : قبل فترة رحنا وطلبتها من شيخهم

ولليوم انتظر موافقتو نحل الخلاف وانا اتزوجها .

فؤاد : ليش انتَ تتزوجها ؟

سَــهم : لوتي صاير حتى ياخد حصته وحصتها مو ؟

فؤاد : منو گال راح يوافقون ولد عمها وعمامها

اذا يعرفون بيها عدها هيچ ورث ما شاء الله

ما يخلوها للغريب .

بيرغ : اعتقد بلغك هادرين دمها تموت يعني .

فؤاد : اذا يموتوها معنها ناوين على باقي من اهلها

امها واختها يصفوهن وتصير أمّهم الوريثة الوحيدة

وبهل حالة يگدرون يسترجعون الأراضي منكم بسهولة .

وارث : انا متأكد امها عدهـا مخطط براسها

دام خاطرت بالبنية وهربتها لأراضينا

بس جانت رافضه تنكشف هويتها ونعرفها

يعني اكو مخطط وملعوب .

بيرغ : برأيي حتى لو ال ضـلـيل ما ينطون موافقة

اعقد عليها همام ومن يصير شي قدم عقد زواجكم .

وارث : احتفظ برأيك .

فؤاد : ليش حل بيرغ منطقي خلي همام يعقد

على بنية حتى ما ينهدر دمها وتموت

بصفتها شنو گاعدة بنص زلم غربة منو يقبلها .

ام وارث : وحگ العباس حچيت وياه ردت

يعقد عليها ركب راسه وزعل ما قبل وحتى

البنية حجيت وياها ما قبلت تتزوجه

امها من دزتها بالأسم نبتها تدخل دخيلة عند وارث .

وارث : ما اتزوج دخيلة عندي الف مرة حچيتها

وانا ما مستعد اورط بنية بهاي حياتي .

فؤاد : شبيها حياتك .

وارث : خطر منين ما ألتفت خطررر بخطررر .

فؤاد : چا خلي همام يعقد عليها وادخل

احنا وشيوخكم ونبلغهم البنية تزوجت بعد .

ما سمعت صوت واحد منهم نشحطت

احس بلعومي ينبز بقيت اگح بصوت عالي

ودموعي ما وگفت اهز براسي رافضه كلامهم

فؤاد : ها بوية وارث شني ردك فضها خلصنا .

وارث : توكلوا بوية .

_ يعقد عليها .

رجع سكت ورجع يسأل بي جاوبه ونبرة صوته تغيرت

وارث : بالبداية غير نسمع من البنية ؟

فؤاد : چا البت ماعدها غير حل لو ترد

لأهلها لو تعقد حل ثالث ماكو تصير دم بوية وارث .

وگفت وعدلت نفسي من امه شافته متردد گالت

_ اروح اسألها .

فؤاد : بوية مخليها هنا بالبيت صدك عود مسودن شني .

وارث : جنت ضامها بغير مكان هسة اجت

والبنية صغيرة تخاف وحدها وحرت بعد جبتها هنا .

فؤاد : هسة اخوك يعقد عليها ويخلصك من حيرتها .

طلعت امه شافت وجهي يتلاطم والدموع

تتماطر على ملابسي والرجفه بيه مخيفة

هزيت الها راسي بـ ” لا ”

ام وارث : سمعتي كلشي .

ميمونة : اي كلشي كلشي سمعت يمه .

ام وارث : يعقد عليچ لو ترجعين لبيت اهلچ .

اريد افهمها ما تفهم عاطت بيَّ بصوت عالي

_ ولچ خليني افتهممممم وافهم الزلم لا تبچين .

فزيت من سمعته بصوت واضح گال

وارث : اترخص خالي بس دقايق واجي امي ماتفهم عليها .

دخل علينا وسد الباب خنزر بوجهي ما راضي

على حالتي وتقدم وضعه كله تخربط مو بس صوته

وارث : شكوووو هووو شكووو شهل لطم .

طلع همام وراه شهگت وابچي افرفح

من الضعف والقهر الي حسيت بي بهل لحظة

طلع تلفونة كتبت

” ما اقبل اتزوج همام ”

هو وهمام اثنينهم وياهم ميمونة قروها

همام : ماعدنا غير حل لو معقد لو ترجعين .

اخذت التلفون هوَ ثابت فاهم

” رجعوني عادي ”

ام وارث : تموتين يمه والله اسمعي مني واقبلي .

مسحت عيوني بكل قوتي وبقيت اهز براسي

واناشغ بعلو حسي ارجف

ام وارث : اخذيها مني كلمة وداعت وارث

تنامين عندي زواجج من همام على ورق

يسكت بي الدم وتفض يمه احسن ما تموتين

لو يروحون بيها شباب .

سدّيت آذني صدت عيوني بعين وارث

مكتف ايده وضاغط عليها وعيونه حتى ما يرمش

عبالك يريد يحچي بس متشنج ومتردد .

ميمونة : بعدچ صغيرة لا تضيعين شبابچ

وافقي احسن ما ترجعين وتموتين ماتعرفين

رب العالمين باجر يحلها .

همام : اخذيها من هل شارب تبقين بحمايتي

وشوكت ما تريدين تنفصلين انا جاهز وراضي .

ام وارث : استعجلي الزلم برا تنتظر وافقي .

وبلحظة تسرع ورعب ضغط وكلام من كل صوب

بين رفض والموت ، وورقة عقد زواج مستقبلها مجهول

صرت بين النار مجبرة اسلمهم جوابي بعجز .