انفتح الباب دخل جـبر وبعده سَــهم
وعلى صوت همام رجّعوا التفتوا
همام : يول دخيل الله نسيتهاااا بالسيارة .
سَــهم : نسيت منو ؟
جـبر : يول اجت هاي فاتت .
همام : يا ذكي ادري فاتت غير شفتها فاتت وتذكرتها .
وارث : منوووو ؟
همام : طرتنا طر وفاتت علينا ميمونه بنت مسيلمة الكذاب .
ميمونة : قريت شفتك تگول
بنت مسيلمة الكذاب ابن الراهبة .
راح يمشي عليها وهي تتقرب منهم وتنتر وهو ينتر
همام : محتاله بنت محتال كم مرة
حذرتچ ما تگولين ابن الراهبة .
ميمونة : ابن الراهبة .
طلعوا جـبر وسهم من الغرفة من شافتهم عاطت
_ ملتمين ، على شنو ناوين صارحوني .
همام : ارجعي للسيارة بساعچ .
ميمونة : يا خبر اليوم بفلوس وباجر يصبر ببلاش .
همام : شيب اهلچ هم بلاش .
فتّحت ايدها وتعدت همام رحت على موروث
والتلفون بيدها رفعته تقربه من وارث :
_ وارث هم وياهم حجية عليچ رسول الله مو اكو لغز .
جـبر : ميمونة امشي ارجعچ للبيت همام ووارث عدهم شغل .
وارث: ماعدنا شغل منين جبتها عدنا شغل .
ميمونة : ها خوية وارث لازمتك الرعشة شبيك ؟
وهي تمشي وعيونها تباع منا ومنا
شافتني من بعيد جمدت فاتحة عيونها وعضت شفتها
ميمونة : يا يمه يا حجيه تعالي وشوفي الكارثة .
همام: فعلت الهمبلة مبين من كلمة كارثة .
ميمونة : حجية حاصرين بنت بالغرفة ومزورگيها تزورگ .
ملامحهم فتحت عيونهم حلگهم نعوج
وشي حلگه انفتح ومنهم من رفع ايده ما مستوعب الصدمة
ومو بس همه مصدومين اني صعقتني وياهم بكلمتها
حاصريني شنوو حاصريني شلون شافتها هيچ
كملت كلامها وهي تفوت عليه تتفحصني بنظراتها
ميمونة : مسبحينها بملابسها بماي بارد
بوكسات وجهه مشوه من البوكسات
رجلها مبين مجروحة وايدها ملخوها تملخ
وكل هذا والبنية بعدهـا صغيرة حجية .
فتحت الصوت عالي لمحت وارث أشر لهمام
ما يريدون اسمع شي تقدم عليها سحب التلفون من ايدها
وجرها يطلع بيها وهي معارضة بقت تسألني
ميمونة : منو منهم مسوي هيچ بحالچ
عندچ اهل لو لا ؟ عزززا البنية جامدة من البرد
هاي سوالف ابن الراهبة خبيث .
كل هذا واني صافنه بعيونها اريد
المح ولو ذرة شبه بينها وبين بندر ماكو
ابد ما تنطي شبه ، بس معقوله تطلع اخته ؟
شلون يعرفها وعلى اي اساس يدورها حرت والله حرت
فزيت من شفتها نزعت كوت لابسته جوة العباية
وكفت يمي تلبسني وبعدها تسألني اني منو .
رجعت اركز بيهم وارث الوحيد ماكو بيناتهم
كلهم يقنعون بيها تطلع من الغرفة حتى يفهموها
سَــهم : البنية ماتحچي لزگتي امشي نطلع .
همام : اذا ما تشهرنا وتجذب ما تطلع والله .
جـبر : هسة هي لگت سالفة تشهرنا بيها .
سَــهم : وتجذب براحتها .
همام : ماتشبع جذب ما تتعب بنت مسيلمة الكذاب .
طلع جـبر ودقايق ورجع بيده جگارة جر نفس
منها وقبل لا ينفخ دخانها حذرها بعصبية
جـبر : اخر مرة احجي بهدوء اطلعي منا .
ميمونة : ليش ضاربيها خطية ؟
جـبر : اطلعي لا تخليني افقد اعصابي .
قبل لا يسمع كلمتها اجه اخذها من ايدها
يطلع بيها وسهم قفل الباب عليه بقيت
بس اسمعهم شنو يحجون بس صوتهم واضح
جـبر : منو سمحلچ تطلعين ؟
ميمونة : طلعت وهمام اخوية ويايه .
جـبر : همام مو منبهك وارث ميمونة ما تطلع ؟
ما سمعت رد همام ويمكن ما جاوبه
واصواتهم راحت بس همسات تثبت وجودهم
مرت الساعات ومن القلق عيوني ما اخت النوم
فتحت البردة الظلام خيم على كل المزرعة
رجعت خليت راسي على مخده ودموعي
تجري على خدي اتذكر هيچ وقت جانت
امي تجهز اكلنا اني وخواتي وتظل كاعدة
تسولف وتضحك ويانا الحد ما نخلص اكل
وتتأكد شبعنا واخذنا حمام وسوتها عادة
مايصير انام بليل قبل لا نسبح ونتعطر وانام
تعالي يمه وشوفي حالي جوعانة وملابسي
مبلله جمدت عليَّ ، لفلفت روحي بالبطانية
ورجلي صايرة ثلچ بقيت صافنة والأفكار
تتضارب بعقلي الحد ما غفت عيني ونمت
والامان مسلوب من روحي .
مرت هل ليلة وما أصعبها من ليلة من وجع رجلي
گعدت على ريحة چاي مهيل اول
ما فتحت عيوني شفت صينية اكل
ريوك كامل وكوب چاي حار مبين جديد
اخذتها بلهفة بين حضني اكل بيها
واتلذذ من بعد ايام من الجوع اگعد
اكل وصتني امي ما اكل ولا اشرب
ولا انام عدل بس من ادخل هل ارضي
ارجع اعيش لازم انفذ كل كلام امي كله
واسرارهم كلهم صارت بيدي لازم استغل
كل نقطة الصالحي مثل ما علمتني اطبق .
رجعت الصينيه بمكانها بعد ما شبعت
حسيت عقلي رجع يفكر وينظم افكارة
ياربي شگد الجوع كافر يخلي الشخص
عقله يتقلص بعد ما يستوعب حياته
ما تحركت بالعكس بعد ما اكلت بقيت
نايمة براحة بالفراش ما اريد اسوي شي
غير بس ارتاح ، اسمع اصوات سياراتهم
وعمالهم يشتغلون برا ، وعبالك مو بس مزرعة
بداخلها مصنع مبين من الدخان والريحة .
نهضت من اهتزّت الأرضية وكفت وفتحت
البردة واشوف شاحنات عملاقة كبار
الى درجة ، يحملن كراتين ، سَــهم وجبر
يشتغلون وياهم وبيدهم اوراق يأشرون
على هذا ويصيحون على ذاك ، وعلى جهة
المقابل المكان اللي اني بي غرفة صغيرة
مفتوح شباكها وعلى طول الشباك مكتب مليان
اوراق ولابتوبات اربعة مفتوحات وآني مركزة
بطرف الشباك وظهر وارث بيده كوب يشرب شي حار
وايده الثانية بجيب البنطلون وگف بمنتصف المكان
مقابل الشباك ورفع راسه اتجاههم ، واثنان هو
مركز وياهم ، راقب مكاني شافني التقت عيوني بعيونه
ثبتت انتظر رد فعل منه ، صار العكس وبكُل تأني
وهدوء انسحب واختفى من امام عيني .
سديت البردة اخاف احد يباع عليَّ
ورجعت غطيت بين افكاري وتعبي
مر اليوم وخلصت هل ليلة بين حيرة وتخطيط
گعدت باليوم الثاني على نفس ريحة الجاي
شفت الصينيه القديمة ماكو والجديدة اليوم
بيها انوع من الاكل ، وغير هل صينية بزارية
طبلة ثانية بيها صينية صغيرة فتحت تغليفها
واشوف تمن ودجاج گد شخص واحد مو اكثر
مثل ما گالت امي كريمين خطارهم ما ينام جوعان
كريمين وكرمهم مشهود بين باقي العشاير
واللي يعاديهم ما گدر يوصل لربع كرمهم .
كملت هل يوم وساعاته ما تمر ثگيلة
والثاني يوم رجعوا كرروها بدون ما اشوفهم
والثالث والرابع والخامس
ومر اسبوع على نفس الحال عايشه
حسسوني اني حيون مشتري يوكلون بي حتى
ينذبح بالعيد ، بديت افقد صبري عليهم
تركت الاكل بحيث يدخلون يبدلون الصينبة
والأكل على حاله ، ماعندي غير هذا الحل
حتى عسى ولعل احجي وياهم لأن مليت
بعد مليت الى متى اظل هيچ منبوذة .
حسبت ايامي بالمضبوط عشرة وانا لا شايفتهم
ولا عبالك ساجنين بنية هنا ، دخلت على حمام
بداخل ممر بوسط الغرفة غسلت وجهي واخذت
الجنطه مالتي الصغيرة بدّلت ملابسي الاحتياطي
وكوت ميمونة افر بي على جسمي يدفيني
من بعد مقاطعة اكلهم وشربهم استسلموا واضح
من دخول سَــهم بدون ما يخلي عيونه بعيوني سألني
_ ليش ما تاكلين ؟
اشرت على نفسي وعلى برا
سَــهم : ممنوع تطلعين .
خزرته ورفعت حاجبي ما عاجبني كلامه واشرت ” ليش ”
سَــهم : وارث مايقبل .
رجعت ارفعت ايدي وبنتر اشرت ” ليش ”
سَــهم : انتِ دخيلة اراضي الموروث طلعتچ منا بقناعته .
عوجت حلگي مستهزئه بطريقته وجوابة
سَــهم : اه انوب شني هل حركات .
فتحت الشباك وأشرت على مكان وارث وحركت
اصابيعي بمعنى اريد احجي وياه جاوبني
سَــهم : لااا لااا وارث ما يلتقي بالغرباء يكرههم .
ردت اطلع طبگ الباب بكل قوته صرت
بس انا وياه بالغرفة بعد ما چان الباب مفتوح
على حيله ، ردت انضرب اله شوية تراجعت بخوف
سَــهم : لا تجبريني اطخچ دخيل العباس اگعدي .
ضربت على شباك وبعناد رجعت اطلب احجي انا وموروثهم :
سَــهم : راح ابلغه اذا قبل هو يجي بس هسة اكلي .
رن تلفونه جاوب بسرعة وقلص عيونه من الصوت العالي
سَــهم : شبيك شليك هاي فتحت النعال
غير رادت تطلع وقفلته قابل متعافي .
راح يتمشى على باب فتحه ورفع ايده
مدري لمنو وشنو قصده ، ورجع يباع وبعده
التلفون بيده اشر على اكل ونبهني
_ اكلي عيوني وانا ابلغ وارث تريدي .
كمل ورجع قفل الباب ، باوعت على اكل ورحت
اكلت قليل ، ثاني يوم رجعوا طبيعي للشغل
وبقيت طول اليوم انتظره ولا عبالك
رجعت اعاند بيهم بترك الأكل وهمه فد شياطين
هم يعاندون بيه وصاروا حتى من يدخلون اكل بالعناد .
عرفت ما راح يجي والله كلبي يعلم هذا راح يعذبني
بقيت اضعف ضعف بعد ما جنت سمينه
ودوخة تضربني تسطرني سطر كل ما انهض
اريد اروح على حمام اوگع وبعد فترة اصحصح
فاض صبري بعد توجعت على باب وصرت اضرب
بكل قوتي الحد ما تعبت ايدي اخذت الحذاء
اضرب بيها والصوت صار اعلى بحيث المكان بگد
ما جبير تردّد الاصوات ينعاد وياريت اگدر احجي
وعندي صوت لا اشهرهم وألملم الأراضي الباقية عليهم .
تراجعت من انفتح الباب وصوت يرعد كلبي برا يهدد
همام : اذا ما اكــسر راسهـا مثل ما كسرت الباب .
رحت بعيد هو دخل يأشر بيده ويرفعها هيچ بوجهي
يريد يضرب واني ارجع بروحي طبگني طبگ على حايط
همام : تخبلتي انتِ مخبلة ؟
فار دمي دفعته من صدره ورحت ليغاد عنه
وهو رجع قريب مني يسأل بعصبية زرف اذني
همام : موووو تضربين الباب يول يعني تريدين شي
احجي يلة هاي اجيت يلة انطقي يلة احجي شكووو ؟
حتى التأشير نسيته شلون اشرح تجمعت
الدموع بعيوني واكتفيت ارفع ايدي على باب
همام : تريدين تطلعين احچي لا تمثلين احچي .
هزيت راسي بـ لا عض اصبعه بكل قوته وضرب الحايط
همام : عجل شتريدين يول شتريدين .
دخل الولد سَــهم ركضت بتجاهه صرت وراه
احتمي بي من هذا الكلب وگف گلبي من همجيته
سَــهم : تريد وارث .
همام : مو عرفناااااها قاصدته مبين غاية براسها .
سَــهم : وارث يريدك روح .
همام : هاي وجودها خطر طلعوهـا منا .
سَــهم : وارث صار عصبي والحسين كافي .
همام : عليش هاا لان ما اقبل يورطنا بمصيبة ؟
سَــهم : همام اطلع نصحتك انا اطلععععععع عوفها .
غطيت وجهي بيدي ودموعي صارت تجري
من طريقة كلامه وعصبيته مرد كلبي مرد
جسمي صار يهتز مهضومه احس ضاق
النفس راح اموت من فشلتي راح امووووت
فزيت على صوت رگعت الباب بعيدة بس صوتها
جلجل المكان باوعت على برا هذا باب غرفة وارث
سَــهم ركض على همام ومن ايده لزمه :
سَــهم : بس اطلع لك اطلع .
همام : اطلع ومحمد بس عندي كم سؤال
روح انتَ اطلع سَــهم لا تخبصني وروح .
وفعلاً هذا سَــهم طلع وهذا همام راح على باب
عبالك متعمد سدها ، شغل جگارته وجر الكرسي
طبگ رجل على رجل وسألني بدون ما يشوفني
_ بنت ياهو انتِ ؟
ذب الدخان وابتسم بتلاعب وعيونه على باب
_ لو اگلچ بنت يا شيخ لحمه رخيص عنده يريد
يربط نسله بكل وسيلة بنسل الموروث .
تجاهلته وسويت روحي حتى طرشه
ولا عبالك موجود ، بس جسمي فاضحني
ارجف خوف ، واعصر بيد شگد ما ابعد نظراتي
منه ارجع اباوع بوجهه من طريقة كلامة واستفزازه
اندفع ألباب صار وارث گدامنا ضحك همام ضحكه
خلتني اخلي ايدي على كلبي وارث بقمة الغضب صاح :
وارث : اطلع .
_ اكو شي مهم جديد يستفز وارث هههههههه .
وارث : اطلع .
_ لهل درجة ههههههه ، اكمل واطلع .
وارث : وحگ بدر الهواشم اذا اعيدها اطير راسك بيها .
ذب همام جگارته وداسها بحذائه وتوجهه
للباب مر من وارث بكل تحدي ثبت نظراته بعيونه
وطلع بمجرد ما طلع الباب طبگه وارث وقفله وصاح
وارث : مهزلة هل مهزلة أحذركم ما تعيدوها .
ترددت بعد ادگ الباب بس ما استسلمت
صرت اراقب حركتهم شوكت يشتغلون
شوكت يخلصون ثلاث ايام وكشفت
وقت سَــهم شوكت يدخل الأكل للغرفة
بس فتح الباب جريته من ايده
انشمرت الصينية كلها على گاع ركضت
برا امشي بكُل سرعتي واعدل بملابسي
وشالي اخاف يتحرك من مكانه فتحت
بابه ودخلت غصباً عليهم كلهم
رفع راسه سلاح مفكك بيده ينظف بي
وايده ملطخه بمجرد ما شافني نهض
من مكانه يغسل بيده وبصوت يدون بالمكان صاح :
وارث : لك سَــهم .
دخلت جوا رافضه اطلع اليوم
لو اني لو هذا ابو راس اليابس
وارث : اوگفي بمكانچ يا بنت .
ضيقت عيوني متضايقة ورفعت ايدي بوجهه استوقفه
وارث : تعانديني ؟ روحي منا لك غضب تعال اخذها مني .
خزرته أعترضت طريقة وانا اضرب رجلي بالأرض
رافضه تهربه ونفوره مني شخصياً
سَــهم : حاجيها يمعود صار ايام تون وتنوح عليك .
وارث : الله يبليك مثل ما بليتني .
بقيت على نفس موقفي ما زحت من مكاني
وارث : وحگ علي ورطه هاي ورطه .
سَــهم : صح غريبة وماتحب تحاجي غريب
بس حاول هي بنت مو بزون خايس مبلل ولعبانه روحك منه .
درت وجهي فاتحة عيوني على هذا سَــهم شلون
يسمح لنفسه يوصفني هذا الوصف الخايس
خزرته بطرف عيني ضحك عرفني ضجت
سَــهم : ما بقت واحد ما خزرته مو بنت فرتنا فر .
كتفت ايدي انتظر يستوعب وجودي
وارث : ارجعي على غرفة خمس دقايق وانا اجي .
رفعت اصبعي واشرت على سگف بمعنى
” والله ما اتحرك ”
مشيت گعدت على كرسي واكو كرسي ثاني
مقابيل مالتي اشرت اله يجي يگعد گدامي
سَــهم : ههههههههه قوية هههههه نفذ يلة نفذ .
هز ايده وارث ما عاجبه الوضع قلدته وانا
هم هزيت ايدي ما عاجبني وضعه الصراحة
سَــهم راح وهوَّ من بعيد كتف أيده واستند
على حايط اشر بيده احچي ورجع كتفها
بالإشارة عبرت عن تصرفه الغلط ويايه بمعنى
” غلط تحبسني كل الأيام الفاتت واني خطارك ”
وارث : ما افتهم عليچ احچي ، عوفي التمثيل .
ضربت الكرسي انفعلت من طريقته
وبأصبعي ضغطت على جهة رگبتي
وصدري بعلامة اكس بيدي بمعنى :
” ما اگدر احچي ، انا مو جذابة ”
وارث : ولا فهمت ولا راح افتهم .
ضغطت على اعصابي وشرحت
وجهت اصبعي عليه ورجعته عليَّ بمعنى :
” متعمد ماتريد تفهمني ”
وارث : ما اريد افتهم بالأشارة ، اريد اسمع صوتچ .
سكتت لثواني حايرة وبديت افقد اعصابي
جر الكرسي وگعد وهوَّ يسألني بكل احترام
وارث : اسمچ ، بنت من انتِ ؟
اخذت ورقة لون ابيض ومسحتها بيدي بمعنى
” مُـرجانـة بياض وصفاء كالياقوت ”
وارث : هسة انا المفروض افتهم دخيل العباس خلصينا .
تجمع الدمع بعيوني نزلت راسي اكف بعباتي
ما اريد انزل دمعتي استحي منه اخجل اموت من الخجل
رجعت احاول اوضح كلامي وبعد ما تعبت جاوب
وارث : ارجعي يا بنت ارجعي للغرفة .
بقيت بمكاني ، بلعت ريگي من سألني بأهتمام
وارث : انتِ تعرفيني ؟
اومأت بسرعة بدون تفكير بـ اي
وارث : قبل لا تجين هنا تعرفيني ؟
رجعت نفس الحركة عدتها وهزيت راسي بـ اي
وارث : يعني متعمدة تدخلين ارضينا .
بكُل اصرار رجعت ردّيت بالأشارة بمعنى ” اي ”
وارث : منين تعرفيني ؟
اشرت على كلبي وعلى نفسي اقصد ” امي ”
وارث : ما افتهم .
لطمت على افخاذ رجلي بلا وعي بدون ما احس
من سمعت صوت رجلي شلون طلع عالي
عضيت شفايفي من الفشله ورفعت راسي
لگيته متعجب فاتح عيونه ويباع على رجلي
بلعت ريگي وكفت من استوعب وطگ رگبته
بتحذير صاح بيه : روحي اطلعي منـااااااا .
عاندت واريد اكمل افهم بي رفض رفض
قطعي انهضمت ودموعي صارت تتسابق
تجري على خدي امسح بيها وترجع تنزل
تركته وركضت طلعت ما اريد اظل وياه
ولا دقيقة ، واني اركض لمحت سَــهم وجبر
من بعيد يعدلون بكراتين من شافوني طلعت
توجهت نظراتهم على غرفة وارث
كعدت على سرير اناشغ بلا صوت
ياريت اكدر اصررررررخ يااااااريت دمي يفور والله .
اقل الخمس دقايق استداريت بنظراتي على
باب دخل وارث يخطي خطواته بحذر
تقدم وهو يمشي سحب طبلة نزلها گدامي
وبكل تأني عدل ورقة وقلم على طبلة
وبيده الثانية مدها كلينكس
وارث : اذا تظنين متعمد ما افتهم عليچ غلطانة .
مسحت دموعي ورفعت عيوني استمع لكلامه
وارث : اكتبي وانا اقراها حتى افتهم تگدرين ؟
ضحكت واهز براسي واخذت القلم وكتبت
” اي اي اگدر تفتهم خطي ”
وارث : اي افتهم خطچ حلو .
ابتسمت وكتبت بتردد
“رجلي مجروحه اجيت حتى اگول رجلي توجعني ”
حجيتها ورجعت دموعي تنزل اخذ الورقة
يقراها بدقة ورجعها وهوَّ يسألني
وارث : وينها اشوفها ؟
كتبت بسرعة وكل شوية اگطع بالكتابة
امسح ادموعي بملابسي وارجع اكمل
” ما اگدر حرام ، بس اريد علاج “
وارث : ليش ما حجيتي على اقل بلغي سَــهم ؟
” ما اشوفه اني نايمة يجي يخلي اكل ويطلع ”
ابتعد يريد يطلع ما گدرت اصدر صوت استوقفه
بس ضربت على طبلة استدار يشوفني
كتبت ” انا ما اعرفك امي گالت اهربي لأراضي الموروث ”
وارث : امچ ؟
هزيت راسي كتبت ” اي والله امي گالت عالية
روحي للموروث وادخلي ارضهم هناك تعيشين بأمان ”
وارث : عالية .
بقيت ارمش بهدوء وانا انظر لعيونه ابتسمت
” اي انا اسمي عالية ”
وارث : امان من شنو خايفة ، من منو شاردة ؟
” انا موروثة مثلك ويريدوني حتى ياخذون حقي ”
كتبتها وبجيت من كل حيلي بدون توقف
واحارب حتى اكتب امسح بملابس وارجع اكتب
” ابوية مات وعافنا ”
وارث : منو باقي من اهلچ ؟
كتبت مثل ما علمتني امي
” انا اخر وحده بقيت بنسل ابوية
اخواني وخواتي ماتوا وامي ماتت ”
ضحك بصوت يدوي دوي بالمكان
جر كرسي صار احمررر دم ومكمل ضحك
عدل ساعته ويتحمحم صار يغصغص
وارث : امچ هي ميته گالت روحي للموروث
ههههههههههه ، من تريد تجذب بس انت مو گدهااااا
ذكرتيني بميمونة لو بمكانچ تصوغ الجذب صياغة .
خفت خوووف انرعبت من الفشلة خليت
ايدي على گلبي لا يهجم ويضربني
اريد ارتب بس ارتب افكاري بعد عقلي صفن
يريد يطلع كتبت مستعجلة حتى الخط صار بي ثول
اكتب واضرب على طبلة اكتب وحيل اضربها
” قبل لا تموت كتبت اسمك وعنوانك
وبقت تحذرني لان من ضربهم وتعذيبهم
عرفت راح تموت ، گالت اذا متت لا تبقين عدهم
شردي بكل وسيلة ، عندي سبع عمام واثنين عمات
وشيخهم معروف بالزواج من القاصرات ”
اكتب وادعي يصدگني رغم كل المعلومات غلط
عمامي بس اربعة وعمات سبعة ومعروف
على ال ضـلـيل من يعشگون وحده ما يبدلوها بعد
عقلهم وگلبهم وروحهم تصير بعد بيد الي يحبوها
تعمدت كل معلومة انقلها تكون وهمية .
وارث : هسة نشوف موضوع رجلج والله كريم على باقي .
مُـرجانـة: يعني صدگتني ؟
كتبتها سحب الورقة وابتسم بتلاعب بوجهي وطالع .
ساعة كاملة والباب انفتح دخل سَــهم
بيده علاگه صغيرة فتحها وهو يشرح
_ ليش ما حجيتي رجلچ مجروحة
عذرينا خوية لو ادري من زمان اجيب علاج .
بقيت ساكته تركهن وطلع رجع بيده قصاصه
ورقة صغيرة وقلم : اكتبي شنو تحتاجين
طالع حتى اشتري احتياجات .
اضطريت اكتب كم شغله مهمه للبنات اخذها وراح
رجع وبيده الأغراض تركهم وقفل الباب
دخل الظلام علينا ، ومن هل يوم سَــهم صار
مرة بالبوم يجي يسأل اذا احتاج شي
ورجع الموروث يختفي ويتعمد ما المح خياله
رجلي بدت تتشافى على كريم
ومن بعد ايام تمشي روتينه عدهم تعجب يمي
عبالك يمشون مثل ميل الساعة بنظام .
دخلوا 12 زلمة معگلين عباياتهم على اكتافهم
يفترون بالأراضي، همام سَــهم جـبر يمشون وياهم
لمحت وارث من بعيد يراقبهم فروا الاراضي كلها فررر
وطلعهم همام ، سَــهم وجبر دخلوا على وارث
سديت البردة من شفت همام شافني من بعيد
دخل على غرفة وارث رجعت اتابعهم
دفر الباب ودخل عليهم يريد يطگ يهدد بوارث :
همام : اذا ما تشرح شنو براسك يا وارث
أقسم بأيات الله احرگ هل اراضي وانتوا بيهااا .
وارث : انا اتصرف مثل ما مكتوب بالوصية
همام ما يعجبك روح ارگع راسك بآلف حايط .
همام : شمكتوب بيهاااااااا الوصية شمكتوب .
وارث : انا اخوك ومسؤول عنك وعن ميمونة وسهم
وغيرك وغيرك ما عدا إخوانا اللي بعدنا ما نعرفهم
ما يعجبك مشكلتك تگدر تتنازل وتطلع من النسل .
شال حاسبة من الحاسبات رگعها بالگاع فلشها تفلش
همام : عليش ما تاخذ شورنا مو على اساس أخوانك .
وارث : مرة ثانية ابلغك قبل بوقت راح يجون
جماعة ابوك يشرفون على حلال ويتأكدون من الوصية
ماشية عدل لو متلاعبين بيها .
همام : وبعد احچي ؟
وارث : عمتك ماتت وصلني خبرها وابنها دفنها وحده .
همام : سد الموضوع هذا ما اريد احد يعرف .
راح يكشف على اوراق دقايق ورجع طلع
طرد وارث الباقين وما نسمع غير صوت تفليش
يطلع من غرفته دخل سَــهم وجبر انذار
بليلتها سَــهم وجبر شغلوا نار وباتوا بالارض
لمحت اكو ضوء خافت يطلع من غرفة وارث بقيت فاتحة
الشباك الحد ما لمحته وهو شافني اشرت
اريد احجي وياه ، تجاهلني ضربت الباب اكثر
من مرة بكل قوتي ما احس غير اندفعت
ودخل عيونه مطعونه دم وجهه صاير ازرگ من العصبية
وارث : مو تريدون تدخلون هل نقمة الارض دخلتيها
شنوووو تريدين بعدددددد شنوووو براسچ ما تعوفيني ؟
ابتعدت خليت ايدي على شفايفي بمعنى ما اعيدها
تقدم بلا وعي احس فاقد من العصبية لزمني
من ايدي ثبتني وقبض على وجهي بيده الثانية
وارث : مُـرجانـة عابد الـ ضـلـيل مو وارث ينضحك عليه .
ننوس : بابا ما تگعد ماما ماتت .
رجعت عيني غمضت وما صحت غير
على عطر ضـلـيل فتحت عيوني صار وجهه گدامي
بديت استوعب الوضع شفت روحي نايمة بحضنه
على رجله مخليني ويمسح براسي
غـاليـة : موتتـها واجيت .
ضـلـيل : ولا نفس .
غـاليـة : ضـلـيل موتت بنتي .
ضـلـيل : لا تحجين دخيل محمد تعبتيني غـاليـة .
اريد اشيل روحي منه ما اريده اكرهه روحي
والله بس يتقرب روحي بودي احرگها
ضـلـيل : ابقي نايمة مايصير تگعدين .
غـاليـة : ارتاحيت من موتتها .
ضـلـيل : انتِ شردتيها بنت الحيوانات .
_ اذا ما ابچيك دم يا ضـلـيل اطلع صدك مو بنت امي وابوي .
رفض ابتعد سكت وانا سكتت كورت روحي
احس الوجع والقهر صار بمعدتي شهگت
اريد ابجي من ضيم كلبي وهو ما يعوفني
وانا لو اموت ما انزل دموعي وابين ضعفي گدامه
صكيت واني استمع لصوته تعبان من حالتي :
ضـلـيل : ما خليتهم يلمحون خيالها عميتهم منها .
غـاليـة : مُـرجانـة .
_ بنتچ فاتت الأراضي الموروث .
_ ضـلـيل خليهم يمحون بنتي من راسهم .
لزمني من وجهي قوي وعيونه تريد تنط
يكره من افرض كلامي ، وانا اعرف من
احجي شگد يكابر بس بالأخير ينفذ :
_ موووو بمزاجج لا تتأمرين .
_ لعد بمزاج منو ؟
_ انا بكيفي ومزاجي .
_ اي لعد اذا بكيفك ومزاجك
امحي اثر مُـرجانـة من راسهم .
_ تسكتين لو افلش وجهچ ؟
جريت روحي جر من بين ايده ورحت على جهه ثانية
ضـلـيل : باقية فوك صخام وجهه ومصيبتها
شردت بنت اخوووي ونزلت راسي وراس العشيرة
تتأمر ، امحي بتها مثل ما محيتي ودستي
على سمعتنا بالقندرة يا قندرة ، عود يول
يعرمه فد مندله انتِ نموووونه شايفه روحچ شوفه ؟
غـاليـة : ضـلـيل مبين انت تعبان روح نام .
ضرب تلفونه بالكنتور خسفه خسف
ونهض خفت بس بقيت صامدة رفعت
راسي وهوَّ يريد يكسر عيني يخوفني
رافع ايده يهدد بيها ويسب ويحچي
ضـلـيل : انتِ خليتيها تفوت اراضيهممممم مو ؟
_ اي والله اني .
_ انعل اهلچ نفر نفر ، تعرفين هذا ما ينجرع
شيوخ ما يگدرون عليه وتعرفين احنا اعدائهم
عدهم ثار ويانا وعدنا ثار وياهم .
_ شيسوي ما يگدر يسوي شي .
_ اذا وارث عرفها بنت الـ ضـلـيل
راح يدمرها دمار نفسي وجسدي
هذا ماكو بگلبه رحمه متربي على
نمط يحولون گلبه صخر ، هو على اخوته
مو حنين تريدين يصير حنين على غريبة
باگ حلال اخوانه كلهم ولطع الحلال كله صار ملكه
ومن يحچون اخوته ويتعاركون يصيح مكتوبة بوصية
وهو جذاب خداع ابو مات من قهر وارث وصدماته .
سألته بفضول واعوج بطني من الوجع
_ عنده اهل ام اخت ؟
_ امه عايشة يعبدها عبادة وعنده نسوان أب شيطانات
واخوات من امه ومن غير ام ، واخوانه اثنين وياه
والباقين كلهم اعدائه يريدون يشربون من دمه
لان كلهم جانوا الكل بالكل ووارث المنبوذ الوحيد بيهم
تالي استولى على كلشي وكلهم صاروا
منبوذين تحت رحمته وانتِ منا وقيسي شگد داهية هل وارث
وارث هذا وارث ما خلفت مثل امه مره .
ضحكت وبطني تملخ بيه من الوجع
اريد الوجع يروح يزيد انوب من التفكير والخوف
غـاليـة : بس هم احسن وارحم منك ومن اهلك الوحوش .
طبگني بكل قوته على كنتور الباب فات جوه
من القوة وفر ايدي بين ايده يسد بحلگي
ضـلـيل : والله انا وصلتچ لهل مستوى من ****
لو ادوس راسچ ما تسويهاااا ول شمسوي اناااا
وتگولين وحششششش عليَّ بشني اجرمت وياچ .
هو ساد حلگي وانا احچي بس ما مفهوم
غـاليـة : جابرني عليك .
ضـلـيل : اموتچ واخلص منچ شلووووون حاجيني .
رجلي صارت خيوط بلحظتها بعد ما يتحملني
وگعت وهو يلزم بيه اخذني بين ايده مذعور شلون
هيچ اوكع من ايده يشيل بيه ويصيح
” دخيلك ربي غـاليـة شبيچ ول بوية حاجيني ”
نومني على جرباية يفتر منا ويروح مناك
خابر بالتلفون يصيح وصوته يرتعش
_ ول يالخايسسسس اريد دكتور مضبوط
اليووووم اريدنا هم رجعت تخربطت اذا يصير
بيها شي انعل خيركم اذا ما ابطلكم منهااااا
خبلتونا بنات عابد ويا بنات عابد
من انعل روح أهاليكم بهل يومممم .
اجه يمي يصيح ويشوف براسي وحرارتي عاط
_ حرارتها زينة ابن الغبي شعليها الحرارة
اگله اريد دكتور اختصاص صخام بوجهك وبوجه ابوك .
وهو يحچي ويصيح بعده لازم راسي قبل لا يبتعد
اخذت ايده لزمتها خليتها جوة خدي وفتحت عيني
اشوفه عيونه وحاله كله تخردل دنگ ونزل روحه
وشمر التلفون الثاني هذا رفع راسي ورجعني
على رجله ويرفع بيه مثل الطفلة عبالك يحضني
ضـلـيل : عليش تتخربطين غـاليـة شنو يوجعچ ؟
غـاليـة : مُـرجانـة ، نقش ، ننوس كلهن بيه ياكلن بگلبي .
ضـلـيل : نامي ارتاحي محلوله خليهم عندي .
ردت انام حاولت عالجت ولأنه موجود
وانا بحضنه فلا اگدر وتغمض عيوني ابد
بقيت امثل النوم الحد ما طلع ادري بيهم
كلها هسة جوا ودمهم فاير يريدون يشربون من دمي
بيه ما بيه سحلت روحي سحول للباب
وگفت أستمع لأصواتهم كلها بالصالة مگعدتهم امهم
نزل بالبداية صوت هامس ما ينسمع وبكل
دقيقة يزيد ويعلى صوتهم اكثر ولأول مرة تمار
يوگف بوجهه ويتجادل وياه بنتر
تمار : كلنا ما نقبل نلفي وحدة نزلت راسنا
ومثل ما احنا نحترمك انتَ تحترم اخونا الجبير
على عيني وراسي بس تريد نسكت على ***
حرمتك وبناتها لهنا وحدك .
فتحت الباب قليل حتى اسمع اوضح
ضـلـيل : اي وين وصلتوا عدكم حل ؟
ام ضـلـيل : يمه ضـلـيل الي ياخذ من غير ملته
يموت بعلته وغالية مو من ملتنه يمه عرفها
خلينا نغسل عارها وعار بناتها شيل ايدك منها يمه دخيلك .
ضـلـيل : ههههههههههههههه ، اشيل ايدي من منو ؟
سكوت ، هدوء ، تردد بالكلام ، الجو تكهرب
ورجع كرر السؤال من جديد ينتظر جوابهم
ضـلـيل : اشيل ايدي من منوو ؟
تمار : غـاليـة وبناتها نزلن راسنا ونفذت تهديدها
منو بعد ياخذ بنات من عائلة وحدة من بناتهم شردت
شوهت سمعتنا گدام الناس تريد نسكت ؟
ضـلـيل : لا هاك اخذ سلاحي وروح اكتلها بسلاحي .
لابس حزام المسدس على اكتافه طلع السلاح
وسحب إقسام صوت السلاح يوگف الگلب
من يمي گعدت بعد رجلي خدرت من خوفها
ضـلـيل : قبل لا تصعد تضربها تضرب اخوك
اهدر دمي تمار وروح موتها بعد منو يحاجيك .
نهض من مكانه وراح باس ايد امه وهو يضغط
ويركز على كل كلمة ينطق بيها :
ضليل : يمه اشيل ايدي من غـاليـة وبناتها
من تدفنوني بصف عابد ، عوفي غالية وبناتها
امسحيها من راسچ حتى لا تخسريني .
هو طلع واني رجعت ركض للغرفة
من سمعتها تصيح على ننوس
دقايق وفاتت ننوس تبچي اخذتها بحضني
لميتها ابوس بيها واشم بعطرها الطيب
وهي تتلمس بوجهي خايفة لان شافتني بعز تعبي
خليتها بحضني وهي ما وگفت اسئلة على مُـرجانـة
جانت صديقتها الوحيدة بهذا المهجوم مالتهم .
ومن بعد ما طمنت روحي عليها طلبت اكل
نومتها بفراشي وبدون ما اشكي يمها جبرت روحي
ونزلت جوا بعد ما كل واحد راح بصوب
بعدني ما داخله المطبخ واستمع لأصوات نسوان
اخوانه ونسوانه الهوايش گاعدات وامه متربعة
وياهن ويگرطن بيه بسوالفهن الخايسة
يتسممن اكل وماعدهن موضوع غير غـاليـة
عفاف : هاي الصفره لوتيه تعرف شلون تسيطر .
ام ضـلـيل : تخسي بنت ذياب تسيطر .
عفاف : يا تخسي وحق الله زلم ونسوان تخافون منها
وگادرين بس علينا اولكم ابنچ ضـلـيل حرف
نخاف نحجي وياه يوصل يمها يخدر بعد .
شربت امه الجاي واخته الجبيرة موجودة حجت
_ يحبها ويرجف عليها عود هاي ما تنطي لا
كلمة حلوة لا بنومة لا كلبي وحياتي على نشف
اذا تصير زينة يصلي عليها .
ام ضـلـيل : ابني واعرفه هل نغله بنت النغل
البغدادية ملعبه لو تنطي عين وتمشي على
مايه وكله عيني واغاتي بعد ما يعبرها .
عفاف : يا عجل هي بالعكس .
ام ضـلـيل : ابني قوي وشابع من احترام العالم
وخضوعهم ، واجت غـاليـة شخصيتها قوية
والصار ما يحصلها منها حب قوتها وعنادها
ولو يصير العكس ما اعتقد بعد يظل وياها .
درت وجهي على بعيد شفت ضـلـيل فات
خزرته هو عرف سمعت كلام سم منهم
دخلت للمطبخ من شافني تكهرب وضعهن
هو فات للمغسله بصف الحمام يكف بردن
الدشداشة وامه تحاجيني عبالها اسكت
والله شنووو نزلت راسهم وخربت سمعتهم الخايسة
_ ولا عبالك مسوية مصيبة تمشي وتتمايل العروس .
غـاليـة : اي عروس مو شايفتني لابسة الأبيض .
اخذت بيضتين طگيتهن واحمي بالطاوة
اريد اخلصها على سريع واصعد ما بيه حيل أتصادم
ام ضـلـيل : لبسي ابيض بنت ذياب على شهيرتچ
غـاليـة : الحمدلله شهيرتكم هاي مو شهيرتي بناتكم هذني .
ضربت على رجلها وتعض بأصبعها
ام ضـلـيل : انوب تجادل وتتعارك بعدها
اخخخخخخ اذا اگضچ يا بنت ذياب انحرچ والله .
خليت البيض بالطاوة وهي بعدها ادردم
_ كون من حظچ الگاعد على حظ بناتي
اوووووووف مشغلات العشرة اصابعهن شمع
وما گعد حظهن باقيات يلزگن بالدنيا تلزگ .
فات عليها ضـلـيل ويرجع بردن الدشداشة يطبگها
يتجهز للصلاة يريد يصلي يمسح براسه صاح
ضـلـيل : خليهن يطفن اصابيعن الشمعععععع
يمهههههههه حتى يگعد حظهن غـاليـة العرمة
ما تشغل حتى اصبعها الصغير وتسوي شمع .
غـاليـة : هو انتوا مال شمع عيشوا بالظلام احسن .
خليت البيض بالصمون واريد اطلع عاط بيه گدامهم :
ضـلـيل : تعالي اخذي اكل لروحچ لا تنسحن روحچ .
غـاليـة : شبعت مغثه ما اريد .
ضـلـيل : شلون تخليني هسة اصعد اشمرها من فوك .
غـاليـة : اهووو هسة الواحد ما يريد يتزوهر .
ضـلـيل : عساچ لا تتزوهرين عمرچ كله
ولي انا هم *** على شني شالع گلبي وفحطان .
غـاليـة : لحالك شسويلك .
ضـلـيل : اخخخخخ بنت ذياب اخخخخخخ كون اگضچ .
صعدت وانا اخزر بي وهو يروح على غرفته
فتت على غرفة وكلت ننوس وهي بحضني
تباوع على تلفزيون غفت وانا على نومتها نمت
گعدت الصبح على صوتها برا تسولف ما سكتت
فركت وجهي وعدلت ملابسي وطلعت لگيتها
واگفه يم ابوها وهو مبين توه طالع من غرفة عفاف
وهي طلعت تمطط بروحها عود شوفيني بودي
اعبر الها بلغة جديدة بس اتذكر اني ام وبنتي
گدامي لازم اثگل واتجاهلها ، هو من شافني
دار وجهه وصاح بيها عود يريد يسمعني
ضـلـيل : من الصبح تشتغلين ادردم مثل امچ .
هو تجاهلني واني تجاهلته اضعاف
رجع على غرفة وننوس راحت وياه
شوية وطلع لابس دشداشته سبحته
بيده وببده الثانية شايل ننوس
ضـلـيل : هساع اخليهن كلهن يطگن الچ
بيض عيون وجبن عرب تريدين مالح لو حلو .
باسته بخده وتحرك برجلها بحماس
ننوس : مالح هبيبي .
ضـلـيل : اويلي بوية انا حبيبچ .
ننوس : انت هبيبي .
نزلها وانا فتت على حمام سبحت
وطلعت بدلت اريد انزل اسمع الأخبار
اول ما بلشت انزل اشوفها گاعدة بحضنه
تلعب بلحيته وهو يفر بسبحته يحچي
هو وتمار على اراضيهم وباقي الأراضي
عبرتهم هو ولا عبالك يشوفني اعرفه
يتعمد گدامهم عود شوفوني انا ثگيل
كون اخلي كاميرا امك تشوفك من تجيني
هيچ اله يبرد كلبي بيك وبيهم .
فتت على مطبخ اليوم اذا ما اكل يصير بيه
شي جهزت ريوگي وگعدت وحدي وهنا فوك راسي
يفترن منا ومنا وبالطلبات طلعوا روحهن بعدهن
جوعانات وطلباتهم كل واحد يطلب شي مختلف
على ثاني واني منا كاعدة اتريگ شاطت رواحتهن
الخايسة عاطت عفاف وحرمة تمار
_ شبيكم انفجعتوا نريد نتسمم شصاااار
طالبن وطالعين يا عفاف يا هاي ويا ذيچ .
ام ضـلـيل : ها شبلاچ غير الزلم تريد تاكل .
_ عجل غير نفهم بس احنا بالمطبخ
خلي يطلبون من الباقي لو على راسهن ريشة المسعدات .
ذبيت نفس بصوت عالي وشربت چاي
واني اطلع صوت واكلت لكمتي
غـاليـة : المسعدات مو مثلچن يتسممن يومية
صار كومة المسعدة ما اكلت خلي اتسمم واجي عود .
عفاف : هووو ياهو يمچ لو بس تريدين مشكلة ؟
غـاليـة : منو غيري اني وياچن بالمطبخ
شبيچ حسرة تشوفني اخلي لگمة بحلگي تتكهربن .
طلعت عفاف على ضـلـيل تأشر على مطبخ
_ هسة هاي البغدادية منو يمها اكلتنا وشربتنا .
سكت
ام ضـلـيل : هي وين ينگدر عليها .
سكت
عفاف : جنت اتعارك انا وحرمة تمار وهي
طلعت لسانها مترين نريد تسكت ماكو .
سكت
ام ضـلـيل : هسة تهجج الجناين بنت ذياب
مثل ما هججت بناتها ما تتعاشر ولا تتواطن .
سكت ونزل ننوس من حضنه اخذ
تمار وطلع بدون ما يدخل ولا بحرررررف .
انا هم كملت اكل غسلت كل المواعين مالاتي
ومالاتهم كفيت المطبخ كله ودخلت على
ديوان نظفته عطرته وطلعت على صالة بس عجوزهم
گاعدة تتفحص بيه بنظراتها وانا اشتغل
هزت ايدها بعّد صفنه طويلة اخذتها عليه
غـاليـة : ها ما نعجب ؟
_ اندري شنو عاجبه بيچ معصعصه .
_ ويني وين المعصعصات جسمي ابنچ
ميت عليه ما محصله ، بس لان انتن ما شاء الله
وحدتكم اطخ 100 تشوفني معصعصه حقچن .
تمار : هاي احنا نفوت ونطلع على مشاكل .
كملت من الصالة وجوا الدرج والدرج جلفته
وصعدت على فوك كملته كله ورجعت سبحت
توضيت وگعدت اصلي بعدني بنص صلاتي
وفاتت بنت تمار بلا مفس تحاجيني
_ عمو ضـلـيل رجع وراح لغرفته جوا يريدچ .
اشرت على سجادة وجاوبتها
_ روحي گولي لعمو تصلي ما تجي اليوم .
طبگت الباب بكل قوتها ونزلت هسة
بالله هل زعطوط تارسات گلبها حقد
شگول عليچن دقايق وهم رجعت
_ يگول خمس دقايق واريدها مزروعه گدامي .
قبل لا اجاوب طبگت الباب ، بكيفه يريد يمشيني
كملت صلاتي وبالعناد بقيت ساعة وراها قران ودعاء
مُـرجانـة اسمي يلهث بذكراها روحي وعقلي يمها
ونقش هاي ضروري اخلصها منهم بعد ما شردت مُـرجانـة
لازم لازم بعد التفت على نقش وارجعها بأحضاني .
فاتت ننوس تعبانة من العب غسلت الها وبدلتها
وكعدت على تلفزيون تلعب بشعرها عاجبها لان طولان
من شفتها نامت غطيتها وطلعت من الغرفة
عبرت امه گاعدة هي والحزب بالصالة
دگيت الباب لان شفت عفاف ماكو گلت اخاف عنده
رغم اعرفه ما يحبهن يدخلن على هل غرفة بس احتياط
دخلت شفته گاعد ومقابيله سبح اشكال والوان
وكلهن احجار كريمة الوانهم واشكالهم تاخذ العقل
غاليات على گلبه بحيث مرتبهم كلهم ويعدل بيهم
وينظف حجر حجر بكُل تركيز وتأني .
بعدني توني سديت الباب ودخلت
بنص الغرفة وبدون ما يباع بوجهي نتر
_ امشي اطلعي .
_ مو ردتني .
_ وما اجيتي .
_ اجيت هياتني .
_ بالوقت اللي يعجبچ .
_ ماكو فرق .
_ ما عجبچ لان انا قررت الوقت .
_ ضـلـيل ماكو فرق .
_ اطلعي برا .
_ تمام .
استداريت اريد اطلع دفر الطبلة واجه بكل
سرعته بأتجاهي بيده وحده من السبح
ضربني على طرف زندي عطت وهو
يثبتني گدامه عصرت عيوني من الوجع
حتى ما ابچي وضاغطه على اعصابي
_ ترتاحين من اضربچ تجرين عدل ؟
_ اكرهك وحق الله اكرهك .
رجعت ضربتي اضعاف بهل كلمة
بحيث عبالك انكفخ على وجهه ابتعد
مني وانا جريت روحي قبل لا اطلع صحت
_ لا تجي بعد ما تهدي اعصابك تعتذر
ما اقبل اعتذارك وراح اظل اگول اكرهك
الى ان تحترم نفسك وتبطل همجيتك .
طلعت لازمه ايدي واني امشي وهاي تذب سمها
_ خلاها تسمم بدنه انبح صوته
قهرررته قهررررر من هذا الزين ورجعت صعدت .
غـاليـة : انتِ تعوووووفيني بحالي لوووووو شلووون
خليني مو راح تخبليني كااااافي عااااد كاااااافي .
اجت بنتها الجبيرة تصعد على درج وتصيح
_ يول **** تصيحين على امي وتتجاوزين يول
راسچ هساع اخلي يلولح منااااا اموتچ والله .
غـاليـة : امچ ما محترمة روحها ما احترمهاااا
وبنت ابوچ تعالي خلي راسي يلولح .
عفتها اريد اصعد كلهن واگفات استغلن
الوضع يعرفن بي من يصير عصبي ما يدخل
بعد لا بيه ولا بعركاتهم كلهن ، طلعت ام ضـلـيل
گلن بي نفط ينحط بالصوبة وصاحت
_ جيبيهاااا هاي بنت ذياب خليني احرگها .
دفعتها من رادت تلزمني وانا نزلت ركضت
بيه ما بيه على مطبخ سحبت الجداحة
ورجعت عليها هي ترجع بي جريته من ايدها
وانا افتح بالقبغ طلع ضـلـيل وفاتوا اخوانه
صبيته على روحي كله والجداحة بيدي
كلها بهتت والصياح صار بفلس من كل صوب
زلم أصواتها خشنة ونسوانهم تتلاطم
وانا بلا وعي وبقمة عصبيتي صبيت
النفط كله على روحي واريد اشغل الجداحة .
اريد اوصف حال ضـلـيل بهل ثواني
ما ينوصف صدمة على رعب على روحه
بعد طلعت من جسمه ركض على غرفة
جر المسدس وحطه على گلبه صاح
_ وعزة جلالته بس تشب النار بيچ غـاليـة
ادگ روحي بطلقة بنص گلبي
وبعد انهيها ما اريدها هل دنيا ..
3 خطوات فعّالة لتجنب الجوع في رمضان.. تناول الطعام ببطء للحصول على الشبع
الذكاء الاصطناعي يتفوق على الجراحين في إعداد التقارير الطبية بدقة أعلى
مرسيدس AMG SL 63 بتصميم كابورليه وطلاء ذهبي .. صور
أسعار الأسماك اليوم في أسواق الإسماعيلية الأحد 23 مارس 2025 بالتفصيل
تردد قناة mbc مصر دراما HD نايل سات 2025 لمتابعة المسلسلات الآن بسهولة
إعادة أحمد كراوع إلى تشكيلة منتخب ليبيا تحت قيادة أليو سيسيه
أيمن العشري: استعدادات مكثفة ومتابعة الأسواق لاستقبال عيد الفطر
أسعار الخضراوات والفاكهة اليوم الإثنين 24 مارس 2025 في الأسواق المحلية
