رواية ارض الخناجر الفصل العاشر 10 بقلم الكاتبة ايلول
دكات گلبچ تنسمَع وتبچين سنطه بلا دمَع
══━━━━✥◈✥━━━━══
جــويريه:: انكتم صوتي بس فاتحة عيني على وسعها مصدوومه وكلبي حسيته طلع من مكانه، سواد عبارة عن كتلة سواد واكفه گدامي عيشتني الرعب بكل معانيه انتهن رجليه وروحي نخلبت اريد اكدر انطق او اتحرك واشرد ماكو، جريت رجلي الصدري وضميت راسي بيت رجليه ابجي بخنك واتعوذ بس اريد يروح من يمي واردد بصوت يرجف وشهكه
“قل اعوذ برب الفلق” “قل اعوذ برب الفلق “
كلّ ذرة بجسمي ترجف ومغمضه عيني بكل قوة على امل يروح
وفجأة واحس بأيده فوگ راسي دفعتها مخروعه وزحفت بسرعة شارده ما صدكت وكفت على رجليه ركضت بكلّ حيلي واتلفت مثل المخبله كل شوي عاثرة بشي دفعت باب المطبخ وصارت بوجهي ام صــيهد كعدت على حيلي اهتز كلي مخروعه وهي كعدت يمي خايفه
ام صــيهد:: اسم الله الرحمن اسم الله يمه شبيج يمه.
واني حتى النفس ما اكدر اسحبه اريد احجي ما اكدر بس ارفع أيدي أأشر على الساحة واحرك شفايفي بلا صوت، اتلفتت هيه خايفه واحد يكعد ويشوفني، كامت بسرعة جابت ماي بكلاص وكعدت يمي تصب الماي بايدها وتغسل وجهي تردد
“بسم الله الرحمن الرحيم ” اسم الله الزهره”
ومسحت على راسي الحد ما استقر نفسي بس جسمي بعده يرجف وهيه تقره على رأسي ايات غمضت عيني وسندت راسي على ايدي
ام صــيهد:: وين جنتي وشمالج مخلوسه؟
رفعت راسي الها مسحت وجهي بين اديها همست بصوت يرجف
-اجاني القرين.
حجيتها وبلعت ريك بخوف اباوع لعيونها عكدت حاجبها مستغربه
-شجاج؟
-جني، لان طلعت ابجي بره إجه يواسيني.
مدت ايدها على صدر دشداشتها هزته وهيه تصيح
-اسم الله الزهره اسم الله، كشش برّه وبعيد، يمه اسم الله شمالج خايبه جــويريه.
-خاله والقران ما مجذبه اسألي بــدور هيه اكتشفته وكل ما نبجي يجينه، يريد يواسينه.
ضحكت ايدها على حلكها ودارت وجها تباوع للباب خاف واحد يجي گالت
ام صــيهد:: النوبه من يجيج ابو گرون مادري شسمه كليله على جدج وجدتج خل يكتلهم.
سكتت وهيه واضح عليها ما مصدكتني كومتني من أيدي وكفت يم السنك غسلت زين وصعدت فوك تمددت بفراشي والخوفه بعدها بيه كل ما أتذكر اللحظة هذيج من اني ادور عليه بين النخل وبمكان بعيد وفجأة لكيته بصفي، كشت روحـــي ومديت ايدي على راسي امسح عليه من تذكرت شلون خله ايده فوك راسي، غمضت عيني اتذكر مخالب والله مخالب الخلاهن على رأسي مو ايد عاديه
جريت فراشي بصف الحايط حتى يصير الحايط بظهري بلكي أأمن وانام، هستوني غمضت عيني ورجعت سمعت صوت البومه
فتحت بخوف أركز بالصوت كمت بسرعة عبرت من بين مــاسه وبدور شباك الغرفة مفتوح وكفت يمه اباوع للنخل بس صوتها مبين، سديت الشباك وجريت بطانيتي تمددت بين مــاسه وبدور حتى احتمي بيهن.
رنـــه ::فتحت عيني فازه على صوت عبود يدغ بيه ويهمس
-رنـــه،رنـــه.
رفعت راسي من المخده كوه مفتحه عيني
-شكو؟
-كومي شوفي طــروادة شو مصخن فد مره.
كعدت بفراشي اعاينله واعاين لحسين وزهره النايمين بصفي عايفين فراشاتهم وجايين عليَّ، زهره شوي بعد وتطبب رجلها بحلكي، وعبود ضال واكف بباب الغرفة وانه النعسه بعدها بيه ماتروح رجع كال.بنتر
عبود:: خااب گومي.
رفعت أيدي خازرته
-شنيي؟
-وسم حتى سم كومي شوفي طــروادة مصخن.
كمت من الفراش مفتحه تك عين طبيت الغرفة طــروادة وعبود وراي يلغي، شغلت الضوه وكعدت يمه مديت ايدي على كصته
-يمه گاب نار.
عبود:: صار ساعة كل ما اكعدنج تردين تنخمدين هاي رابع مره اجيج.
-غير ل١٢ مانايمه ضليت ادرس
-ديله يله شوفي شتطينه، ماكو خافض حراره شي؟
رفعت اجتافي مادري
-اندري، من جانت زهره تصخن عــفراء تحطلها تحميله، شوف الثلاجه بلكن ضاله وحده.
عبود::هههههه طاحظج.
فتح عينه طــروادة خازرنه دفع ايدي من كصته
طــروادة :: وخري عني لا اكوملج.
عبود::خاب كوم خل اخذك للمستشفى.
هز راسه لا وجر الغطا عليه زين طلعنه من يمه بالهول كال عبود
-نخابر عفراء لو زحمه خاف نايمه.
-لا تكعد گبل الصلاة بنص ساعة هيه خابرها بله.
دكّ عليها اثنينه مستحين خاف تطلع نايمه ويكعدون هيه ورجلها،بأخر دكه ردت علينه بخوف
-ها عبود الو.
عبود:: الو،شلونج.
-شكو؟ بيكم شي؟
-لا، بس اكلج هذا طــروادة مصخن فد نوب شنشربه.
رنـــه:: عفره ما يرضى عبود يخليله تحميله.
حجيتها وعبود طكاني على راسي حيل يصيح
-شمالج تاكلين تبن انتِ سدي حلكج. لا يكوملج.
عــفراء:: رنـــه تسمعيني.
-اسمعج كلي الهذا الخايس لا يطكني والحسين اخليهم بلا اكل ولا شرّب كادرين عليَّ وعلي اضل ما اطبخلهم ترى.
عــفراء:: ها هاا السانج السانج كضيه شويه مسويته أحَمر هسه انتِ نصبه، اسمعيني.
نترت وانه خازره عبود
-اسمعنج.
-اكو بالثلاجة براسيتول شربيه وحده، وسويله كمادات لا يشمر.
-خوش.
سدينه التلفون مشيت للثلاجه وعبود حضرله طاسه وكمادات كوه كعدناه شرب الحبايه وكعدت يمه اسويله كمادات، عبود رد نام وانه مكابله طــروادة وكاعده كل شوية مغيره الكماده، من أردها على كصته ينز جسمه ويفتح عينه، همس بصوت تعبان.
طــروادة:: روحـــي نامي رنـــه.
-لا مالك غرض خلني يمك بلكن تنزل الصخونه وجهك بعده نار.
غمض عينه صفنت بوجهه مكسور گـــلبي گد ما انقهر على الگاع تمرض، ساعة مرت وانه يمه، طــروادة بلا ما يصخن يحجي وهو نايم، النوب هسه مصخن ماخله سالفة ماحجاها، شوي وكام يشوفني عفراء كل ما يفتح عينه يكلي
-روحـــي نامي عفره صرت زين.
عصرت الخاولي رجعته على راسه احجي
-لا مبين صرت زين، نام نام لا اخنكك.
شال الخاولي من كصته ورفع راسه منّ المخده يعاين الوجهي عاكد حاجبه
– رنـــه !
-لا انه امك.
-انجبي.
رجع رأسه للمخده ورجعت الكمادات على راسه واديه ورجليه نام شويه ومن جددتها هم فز فتح عيونه حمر دم عاينلي ورد غمض يهمس وهو مغمض
-حتى بتعبي ماخلوني اعيش يابه
حجايته مردت گـــلبي مرد رجع ون بوجع
-اااخ يا بويه.
-اسم الله عليك، طــروادة اودي عبود يجيب الولد ياخذونج للمستشفى.
هز راسه لا، شويه حسيت حرارته نزلت عفته وكمت صليت وطلعت للحوش هستوها الشمس تطلع، مشيت فتحت سلسلة هاسكي احجي ويا
-صاحبك مريض.
وهو يفتر وراي، فتحت گن الدجاجات طلعن وانه لازمه بأيدي عصا، لان الديج ينكر شبعته كتل يله گام يخاف مني وماينگرني بس هم ما اثق بيه اخافن يغدرني، اطيتهن اكل
-تعالن، تعى تعى تعى.
عفتهن ياكلن وصعدت على الگن اعاين من فوك السياج، فارشين نايلون بره السياج ومخلين الحنطه الحصدوها، وعلى صفحة مخلين التبن تل صاير شگده، وبعد نص گاعهم ما محصوده، تفلت واحجي بحركه
-تف عليكم وعلى گاعكم كون هم تحترك مثل ما حركتوا گاعنه.
“مخلينها بظهر بيتنا حتى يحركون گلب طــروادة الچلاب” ادردم واغلط هستوني انزل ولمحت جلكان النفط دك گـــلبي حيل وتلفتت اعاين بخوف، رجعت صعدت على الگن اتلفت لبيوتهم ولا باب مفتوح بعدهم منخمدين كلهم.
نزّلت بسرعة ومشيت للجلكان لزمته بخوف وافكر” أبديه على الحنطه وأخربها كلها بعد مايكدرون يبيعونه يخسرون مثل ما طــروادة خسر”، درت عيني لباب بيتنه خايفه منه اذا كضاني هوه يكتلني، مايلحك بيه بسرعة ابديه وأرد ركض.
ولان مأمنه محد كاعد طلعت بطرك الدشداشة والشال عفت باب الحوش مفتوح امشي بسرعة واتلفت طلع هاسكي وراي اجاني يركض يريد ينبح
-اششش اسكت وحمس اسكت.
حط راسه بالگاع يشمشم، مشيت بسرعة گـــلبي يدك بقوة وصلت يم الطعام(بذور الحنطه) كعدت على حيلي وبس اريد افتح القبق مال جلكان النفط، بكل حيلي احاول وماكو، عيني على باب حوشنه طلعن الدجاجات وراي خرب ، غلطت بصوت
-انفتح انفتح اشعلك وأشعل شعلان وياك.
-شسوين؟
رفعت راسي وشهكت فاتحة عيني على وسعها والنفس حسيته وكف ببلعومي، وكفت على حيلي وانه اشوف بريا وميثم واكفين كدامي مصدومين
مــيثم:: ولج شمطلعج هيج انتِ مسودنه؟
يحجون بصدمة وبريا اتلفت يأشر علي ويحجي
بريا:: بيدها نفط هاي تريد تحرك الحنطه!!!
سكتوا اثنينهم واحد يعاين بوجهه الثاني ويردون يعاينولي مصدومين صاح بريا
-امشيي ردي للبيت امشيي
نترت خايفه لان انكشفت واريد أضم خوفي
-ووولي ووولي مالكم شغل عاب هالشكول.
مــيثم :: ايا عرمه بالحسين اكطع الخيزرانه على راسج ووولج شوما تردين انتِ.
حجاها واجه بريا يريد ياخذ الجليكان من أيدي نبح عليه هاسكي رد ليوره وهاسكي يزئر عليهم.
-دوروا وجهكم عاب هالوجوه ما تستحون تعاينولي.
بريا:: امشششي لج زعطوطه امشييي على حور حالج نعاينلج، ردي للبيت لا يكضج شعلان يعلكج بالسياج يومين.
مــيثم :: تريد تبلي طــروادة هاي عرمه بالحسين ماتنكدر، وولج غير تطيح براس طــروادة المگرود ذيج هيه كلها تكول طــروادة الخرب الحنطه لان احتركت گاعه.
بلعت ريك ساكته آفكر بحجيهم صدك خاف يشكون بطرواده عفت الجلكان ومشيت بسرعة شارده صاح وراي
بريا:: عررمة اگطع النعال على راسج بعد لو لكيتج طالعه هيج.
ووكفت خازرته
-خااب ابن الروسيه انا اكطع النعال على راسك.
التفت على مــيثم فاتح عينه على وسعها مصدوم وهد يريد يجيني كضاه مــيثم يغلط
مــيثم :: ما مربايه انتِ خل اشوفن طــروادة واسولفله يرضى بعرامتج.
-مالكم شغل بينه مربايين ما مربايين ياهي مالتكم.
بريا بسرعة نزع نعاله شمره عليَّ طاحت الطكه بهاسكي عاص وعاينلهم يريد يهجم دنكت شلت النعال شمرته عليه، اثنينهم غطوا وجوهم من النعال بس طاح يمهم ركضوا عليَّ يردون يكتلوني، ركضت للبيت وانا اصيح على هاسكي
-أشوه أشوووه.
وهوه ما صدك گبل ركض عليهم، طبيت وسديت باب الحوش بسرعة صعدت على گن الدجاج اعاينلهم ركضوا شاردين من هاسكي صعدوا فوك قمرية السيارة وهوه يفتر داير مادايرهم عاينولي متحلفين طكيت أيد بأيد غميتهم ونزلت.
صحت الدجاجاتي طببتهن للبيت ومديت راسي الهاسكي
-تعااال كافي تأدبوا ولد الروسيه بعد ما يغلطون، هااسكي تعال تعال.
أجاني يركض طببته وهمه نزلوا يغلطون متحلفين بيه سديت الباب بوجهم وطبيت للبيت احجي وي روحـــي
-همزين كضوني حجيهم صدك لو مبديه النفط على الحنطه كلها راح تكول هاي سواية طــروادة ويبلونه والنوب ينقهر ازيد من قهره على الگاع.
كعدت حسين وزهره سبحوا وراحوا يبدلون حضرت هدومي مال المدرسة وطبيت للمطبخ اسوي الريوك ،طلعت الخبز حميته واصيح على حسين
-كعد عبود يله.
شويه وطلع عبود يفرك بعيونه يعاين من وره خشمه رفع أيده يأشر
-شتردين انتِ؟ خبصتيه شو عفره جانت تسوي الريوك وتكمله ماينسمع صوت، انتِ بس تطكطكين وصوت المواعين واصل السابع جار وفوك هذا كله طبخج يلعب الروح.
نزلت ايدي بيها الخبزات اباوعله والدمعه التمّت بعيني
-صدك؟
ضحك اجه يمي جر راسي عليه باسه وهو يضحك
عبود:: خاب انتِ غير حتى السم من إيدج عسل، شعدي غيرج انا.
عيبت عليه اضــحك غماني وراح يغسل لمن رجع گال
-انتِ لا ترحين اليوم، اخذلج اجازه حتى تسوين شوربه شي الطرواده.
-عدي موضوع مهمّ بالرياضيات.
-هوه من يصير زين يقريج.
-يله خوش.
ريكتهم بسرعة وطلعوا للمدرسه سويت ريوك الطرواده ومشيت كوه كعدته كام غسل مجلب بالحايط، وبس رد لفراشه تمدد وجهه أحمر وعيونه منفخه ومدمعه من الصخونه.
-بس اكل شويه حتى تشرب دوه.
-ما اريدن.
-انا اوكلنك شويه عليك الله جا شلون تصير زين.
مسح وجهه وكعد كوه على روحه سويتله لفات صغار اوكله واصبله الچاي بالصحن ياخذ من إيدي ويبتسم على كيف گال
– البارحه ليش تكليلي انا امك.
-هههههه، مو انتَ ضليت تروح منا وتجي مناه مره تكلي عفره مره ما ادري شتحجي، النوب لكيتك تسولف وي ابوي.
سكت رفع راسه الي عاف صحن الچاي بالصينية متحسر وسأل بصوت مخنوك
-شسولف؟
باوعت بعيونه ساكته وهو متاني احجي زفرت نفّس بحسره
-گتله حتى بتعبي ماخلوني أعيش بويه.
هز رآسه بأسف
– شاكر وشياطينه حتى على لگمه الحلال لاحگيني.
-اي همه چلاب هوه وولده.
رفع راسه خازرني دنكت بسرعة
طــروادة :: تأدبي رنـــه لا تغلطين على آلولد لا حضج أطيحه.
-جا بس همه يغلطون شني همه حلال وانه حرام.
نتر بعصبيه
-ياهو الغالط شو تمسلتين انتِ؟
شلت الصينية وطلعت من يمه اريد اكله صوجي سويتلك ريوك وخفت يخلي الصينية براسي غسلت المواعين وشفته كام غسل ورد للغرفة، شوي وصاح
-رنـــه.
مشيت بزعل فتحت الباب اعاينله مسح وجهه وگال
-انتِ كبرتي كافي سوالف المزعطه عوفيها حلاتج بحلاوة حجاياتج وسوالفج مو بالغلط والصياح شني انتِ تردين تصيرلي ميلاد؟ ترا أكسر ظهرج!!!
عدلي وحسني الفاظج دام النفس عليج طيبه، اذكري حچاية ابوي من يكلج شمحلات محاچيج، جا شمالج السانج كام مايحجي غير الغلط؟
واكفه بالباب مدنكه واكل بشفتي شهكت ودموعي نزلن على خذي وهوه يرزل بيه رفعت ايدي امسح دموعي وشفتي ترجف
سكت متحسر كعد على حيله
-تعاي.
طبيت للغرفه وانه اشهك واكفه يمه جراني من ايدي الحضنه يبوس براسي ويحجي
طــروادة :: وكلام الله ينفت گـــلبي من تبجين.
شهكت مغطيه وجهي بأديه
-امسحي دموعج لا تقهريني، انا لو ما رايد مصلحتج جا صفگتلج على الغلط.
رفعت راسي من صدره امسح بدموعي واحجي
-جا ما تحاجيهم كضوا عمرهم يغلطون عليَّ ومايحترموني عودك اكبر مني همّه ويخلون راسهم براسي.
باوعلي باستغراب ومد ايده يمسح عيوني ويحجي
-ياهو الغالط عليج؟، هوه بس صــيهد هذا مسودن شلج شغل بيه خيولي.
-لاا، حتى هذول الخياس ولد الروسيه.
حجيت اباوع لعيونه نزل ايده وضيك عيونه مركّز بعيني وهز راسه يسأل
-ليمت غالطين عليج؟ وين شايفينج همه حتى يغلطون عليج؟
راحت البجيه اعاين لوجهه وادورلي عذر گـــلبي كام يدك حيل
-من جنت بكد زهره تتذكر؟ غلطوا علي!
سكت يعاينلي بشك ما مقتنع كمت بسرعة واحجي اضيع السالفة
-راح اسويلك شوربه.
وطلعت من يمه ركض للمطبخ سويتله شوربه وهوه رجع نام ، ندك باب الحوش وسمعت صوت صــيهد يصيح
-طــروادة.
رديت بگلبي وهرش حتى هرش، صيح صيح مل وراح ولا فتحتله الباب وراه بنص ساعة اجوا ســليم وسلطان صيحوا وطولوا
ماراحوا مشيت ردت اهد عليهم هاسكي وسلطان يصيح
-خاب طــروادة هيووه.
هستوني اصيح الهاسكي وسمعت صوت عبود يمهم هوه وسجاد گالهم
عبود :: مريض طــروادة كلش.
سلطان:: جذب بس مايريد يشوفنه.
عبود:: لا وعلي البارحة الليل كله يون مصخن وصاير بيه فلك.
ســليم :: جا ما كعدتنه نآخذه للمستشفى صدك تحجي ليش هيّج عايفه ضال وحده؟
سلطان:: افتح الباب شمالك خل اشوفنه.
فتح الباب عبود يأشرلي طبيت بسرعة وهوه فتحلهم باب الدوانيه، مشيت الطرواده كعدته
-الولد اجوا يشوفونكم.
فتح عينه بالكوه تلمست وجهه رجع صخن حيل همس
-ياهمه؟
-هذولاك الغلطت عليهم مساعه وانتَ ما رضيت!
-مــيثم وبريا؟
-لاا، الثانين الگلت عليهم چلاب همه وابوهم.
گلب عيونه يستغفر ورجع باوعلي بخزر جر الغطا فوك راسه ساكت كمت طلعت من يمه اعاين من شباج الهول اجوا وراهم صــيهد ووهب وعبود اجه يريد بس يقنع طــروادة يكوم يمهم ما يرضى مايريد يشوف أي واحد.
وانه ضاله أراقب بيهم گاله صــيهد
-ها كعدته؟
عبود:: ما يرضى يكعد والله من الصخونه ماله خلك
سلطان:: لا وعلي دره بينه انا وسليم هناه ومايريد يشوفنه.
وهـــب :: يابه غير يگلولك مريض صدك جذب شني السالفة.
دار وجهه سلطان ضايج عاينت الصيهد گال العبود
صــيهد:: سويلنه درب خل نروحله.
عبود:: تعالوا طبوا محد هناه
رنـــه ::اسمع واغلط على عبود ركضت للمطبخ وهمه طبوا للغرفة يحاجون طــروادة يردون يآخذونه للمستشفى ومايرضى گاله سلطان.
سلطان :: انعل ابو الگيعان لا ابو الحاصوده ولك تتمرض علمود الگيعان، انا خسارهن شكد يصيرن فلوسهن خمسين مليون؟ باجر ابيعن سيارتي وسيارة ســليم واحطهن جوه رجلك صددك تحجي انتَ؟
ســليم :: وكراب الگاع عليّ انا اكربها طــروادة بس شد حيلك رحمه الأهلك خاب يروحلك فـــدوه كل فلس بهالقريه.
وهـــب ::حكيت خشمي ساكت أعاين عليهم وهمه بس يحاولون يراضون طــروادة كعدوا يمه وهوه ممدد بفراشه، وصيهد واكف على صفحة متاني لحدمن راح يضل ساكت گالهم طــروادة.
طــروادة :: اريدكم سالمين يابه على الفلوس انا؟ مخاويكم طمع؟
سلطان :: محد گال مخاوينه طمع جا حگك اهلنه الحركوا گاعك واحنه الندفع خساراتك، هسه عوفك من الگاع وگوم خلنه نأخذك للمستشفى.
دنك صــيهد طفه جكارته بالنفاضه وصاح
صــيهد:: ماتشوفون رواحكم چلبتوا؟ اطلعوا يله انا ويآه نروح للمستشفى مو صح طــروادة؟
ضحك طــروادة يهز راسه أي والولد يضحكون يحركون بگلب صــيهد
سلطان:: ترى اول صاحب الطرواده انا، انتَ جنت عدوه.
صــيهد:: انتَ صاحبه مانختلف، بس انا اخوه.
وهـــب :: صيحنه نضحك ونصفك الصيهد گالهم طــروادة
-اطلعوا خل ابدل!
صــيهد:: أساعدنك؟
ســليم:: اذا انتَ تساعده كلنه نشارك بالمساعده.
صــيهد:: لا ما ارضى طــروادة عرضي محد يبدله غيري.
طــروادة :: عمي بس اطلعوا انا ابدل شمالني تسودنت اخلي واحد منكم يبدلي.
وهـــب ::ضحكنه وطلعنه كلنه، ســليم وسلطان راحوا للگيعان وي الحاصوده وانا واكف كدام صــيهد اريد أفاتحه بالموضوع واخافن يگطع البرجله عليّ، ضيك عيونه وهز رآسه يفرّ بسبحته
صــيهد:: شعدك؟
-هاه؟
-ووجعاه، شتريد.
-هيج أكولن جا حتى وانتَ لابس بنطرون وقميص تكض سبحة؟
-اي بكيفي ،اكلك سبحتي الكريمه وين شو مارديتها؟
وهـــب ::دنكت ساكت اغلط على روحي شحجاني ما ادري وين ضيعتها، اجه طــروادة ونقذني طلعت وكبل ما اروحن سمعتهم يحجون بسالفة هزيت راسي متحلف بيهم، همه راحوا للمستشفى وانا مشيت للمشتمل تلاكه وياي ابوي صاح
-امشي اخذ الدركتل والعربانه للحاصوده
-عمي بالحسين هم الي شغل مو الفلح موجودين همه ينگلون.
-جدك يگول الفلح يبوگون خل واحد من الولد يصعد بالدركتل وشد عليه العربانه الچبيرة حمل الحنطه بيها. يله بعد ابووك يله.
-يابعد ابوك يادنيا، عمي بالحسين هم اروحن ايدي محتركه وين اكدر اسوقن الدركتل.
غير قفل اراويه ايدي ولا مهتم يغلط ويسب واذا ما تروح انتَ انا اروحن، جريت السويج منه ومشيت للدركتل شغلته وتنگبت بجفيه اتمنى هيج اعصار يجي يشيل القرية من الخريطه، شديت العربانه عليها ومشيت للگيعان لكيت ســليم وسلطان يحملون بالتبن هم بدركتل،تفلت عليهم
-من جير بفرگكم جا الطعام ياهو ينگله شعلان.
سلطان:: خاب اسكت شعلان المشعول مخلي جواسيس هناه حجينه عليه مساع وهذا ابو عمار ضل ياخذها ويجيبها طلع يوصله حجي.
-نتسابق؟
ســليم :: هاي دركتل مو دراجه انجب واكعد.
وهـــب :: اكلك بريا وميثم وين شو غاطين.
تحسر سلطان يهز براسه گال
سلطان:: بالمعامل
-لاااا، ليش ؟
ســليم:: ما ادري حسب سوادين شعلان طخت بعقله وداهم للمعامل.
وهـــب ::زفرت نفس متحسر وسقت الدركتل للحاصوده ابو الحاصوده ضل يصيّح وينتر شلون بطيت عليه
-خاب لا تضل تعنطز بالحسين انزل اكتلك بالنعال خايس ابن الخايس.
-صارلك ساعه ورانه گــيعان الوادم نضل بگاعكم احنه؟
مشيت الدركتل بصفه فرغ الحنطه بيها واخذته للبيت، وعلى فد جره للغروب يله كضينه رديت للبيت مهدهد وايدي متبنده من الوجع طبيت للمطبخ صارت بوجهي آلعافيه الشوفتها تروح كل التعب دنكت ابوسن راسها
ام صــيهد:: الله يساعدك يمه.
-يابعد روحـــي يساعد بختج.
مــاسه :: اجه وهـــب للسنك فتح ايده يريد يغسلها ويعاينلي أشرلي تعاي يمي اقتربت يمه حجه بهمس
وهـــب::بساع سويلي اكل البنيه ماتت من الجوع
-وديتلها بدون ما وأحد يشوفني
-اه شلون فتحتي الباب؟
-اخذته من غرفتك وحتى النسخه العد صــيهد هم اندلها لا تخاف اكدر اوصلها بألف طريقة.
ضحك يغسل بأيده
وهـــب :: انتِ كفو وعلي.
-اممم بس تحجيلي بعدين.
-تمادت ولي مناه صبيلي عشا ميت من الجوع.
-هههه اطلع يله روح للدوانيه بت عمه تريد تجي تساعدني.
راح يسبح، واجت جــويريه يمي هيه وبدور ساعدني بالعشا وامي كاعده بالگاع تگلي دجاج على البريمز، ندك باب المطبخ وصوت صــيهد
-مــاسه.
درت عيني آلامي خايفه غطيت شعري زين ومشيت فتحت الباب على كيف اعاينله واكف يدخن
-ها.
-ياهو جوه؟
-بالمطبخ؟ انا والبنات وامي!
هز راسه لا
صــيهد:: بالدوانيه مشعول موجود؟
-جدو؟ اي هوه وابوي ويمهم عمي شاكر.
-جيبي عشاي لهناك ما اريدن وياهم.
سكتت وهزيت راسي اي خزرني
-شوماعاجبج.
-لا والله بس غير كتلك اي.
-ما ارريدن.
نتر وراح زعلان سديت الباب ودرت الامي فاتحه اديه واحجي
مــاسه :: يمه والله ماكتله شي
بــدور :: هوه ما يرضى واحد يضل ساكت لو كايلتله اي هسّه أجيبه مايضوج.
مــاسه :: انجبي انتِ انجبي شارده أربعة وعشرين ساعه وكلشي ذابته براسي، شكتله انه شكتله ويزعل بس يريدله حجه.
مشيت للطباخ احجي مختنكه وامي تصيح راح اكوملجن، صفت وياي جــويريه تحجي بهدوء
جــويريه :: عادي اخذيله العشا وكليله اني ما اقصد شي من سكتت.
مسحت وجهي اهز راسي اي كملنه عشاهم وديناه يمهم جــويريه ما ترضى حتى توصل للدوانيه اليوم ما ادري شبيها.
صبينه صينيه النه بالمطبخ هنه كعدن وانه اخذت صينية الصيهد مشيت البيته طبيت ودكيت باب غرفته ماحاجاني فتحته وشلت الصينية طبيت اعاينله متمدد على الچربايه وتلفونه بأيده.
-ما اريدن اخذيه.
سكتت مختنكه
-والله ما قصدي شي من سكتت مو ماراضيه والله.هزيتلك راسي نسيت تضوج.
سكت شمر التلفون على الميز وكعد
-ذيج الخانسه وينها ما تساعدج؟
-جــويريه؟
-بــدور!
حجاها وكعد يم الصينية ياكل وكفت يم الباب كتله
-تساعدني مرات.
سكت عفته وطلعت ركض طبيت للمطبخ كعدت أكلت وياهن لمن كملنه نظفنه البنات صعدن وانه ضليت اسوي كهوه الهم اجه يمي وهـــب بالمطبخ
-ميوسه.
درت وجهي عليه
-هاه.
-تذكرين جم مره انا مطيج عشره؟ وشكد صارف عليج؟
وكفت عدل عفت البأيدي غمزتله
-تريدهن شنو؟
ضحك
-لا بس صيري حبابه مره وحده وسويلي شي بيه خير.
-شتريد ليمت كايلي على شي وما مسويته الك؟
تحمحم متحمس ودار للباب يتأكد محد موجود كض ايدي يتوسل
وهـــب :: روحـــي الصيهد كليله وهـــب عده سباق ترضى يروح، وجيبيلي سويج الدراجة منه.
جريت ايدي منه مبتعده
-يااا والله، يمه ياهي مالتي انه.
-شكد چلبه ولج ولا عشرة غزرت بعينج.
-وهـــب توديني للموت انتَ؟ ترضى انكتل؟
-شنّي السالفة راح يعضج هوه؟ اذا مارضى يكلج لا وهاي هيه.
-جا اذا هيج ما يخوف ماتروح انتَ تكله؟
حك شعره بحيره
وهـــب :: مو انا يكتلني قاسي وياي.
-اي اي وانه حنين وياي بابا انه اكثر وحده بيكم مكتوله.
-بالحسين ولا ينشد بيج الظهر، اختيش انتِ كل خير مابيج، امددداج وامده اخوتج.
ضحكت صبيت الكهوه وداها ورجعلي
-ميوسه والله اطيج خمسه وعشرين.
سكتت محتاره اكل باضافزي
-بشرط، تحجيلي ياهي هاي البنيه البالمشتمل؟
خزرني يعاين مناه ومناه خاف واحد يسمع ورفع ايده على حلكه يسويلي
وهـــب :: اششش، حتى وي روحج ما تجيبين طاريها ولا تذكرينها مــاسه فهمتي؟
هزيت راسي اي وسكت هوه ضايج تندمت لان كتله هيج شويه وهز راسه موافق
-اسولفلج بس بشرط تقنعين صــيهد اروحن للسباق وتجيبين سويج الدراجه منه.
زفرت نفس اقوي بروحي هزيت راسي موافقة وطلعنه سوه لبيت صــيهد هوه ضل واكف بالباب گال
وهب ::اذا كتلج بس صيحي بصوت عالي.
مــاسه ::شتسوي اذا صيحت تجي تحميني؟
وهب :: لاا، حتى الحك اشرد.
طكيته على ايده ضحك ودفعني للبيت گبل ما اگول بسم الله، صار بوجهي صــيهد طالع من الحمام ينشف بشعره هز راسه ها، ومشه للغرفه وانه اطكطك باصابعي ساكته، مشيت ورّاه للغرفة
-احم اجيت آخذ الصينية.
سكت لبس دشداشته ووكف يسد بدكم الردن، فتح الجراره يختارله سبحه شال وحده نيليه بلون دشداشته وثانية لون بيجي محتار بينهن
-البيجي احلى وي الدشداشه.
رجع النيليه سد الجراره وراح للميز يخلي عطر عاينلي بالمرايه وهز راسه
-احجي تره من اول ماطبيتي مبين تردين شي؟
ابتسمت بخوف الوم بروحي واهمس
-انه، لا ما اريد شي ههه.
دار خازرني
-ووولج تجذبين؟
-وهـــب وداني عليك.
عكد حاجبه متانيني اكمل
-يگول عدي سباق اريد اروحن ويريد سويج الدراجه وگالي اذا قنعتك يطيني خمسه وعشرين وسالفه.
هز راسه موافق ورجّع للمرايه لفّ الچفيه على راسه كمل ورجع دار عليَّ
صــيهد:: روحـــي كليله يگول صــيهد تاكل تبن وتنجب، خوش؟
هزيت راسي اي خوش گال
-شتگليله؟
مــاسه :: اكل تبن وانجب.
فتح عينه على وسّعها خازرني
-شنيي؟
رفعت ايدي أبلعم
-انتَ كتلي
-كتلج كليله مو تگليلي، امششي يله ردّي للبيت ولا تضلين كلساع طالعه طابه.
مشيت بسرعة اريد اطلع صاح
-الصيينيه.
رجعت اخذتها وطلعت ركض مالكيت وهـــب بالباب لا يا غدار، ركضت للمطبخ لكيته متانيني گبل گال
-بشرري.
-الغدار ليش تعوفني وتشرد.
-مو كلت حتى واحد من عدنه ينكتل ليش اثنينه، التبذير حرام.
-مو كتلك ما يرضى
-شكالج؟
-گال گليله خل ياكل تبن وينجب.
-حيوانه شو تغلطين عليَّ؟؟
مسحت وجهي محتاره بينهم
-غير هوه گالي ياهي مالتي انه؟
هز ايده مراضي وطلع من البيت زعلان، صعدت ركض لكيت بــدور كاضه جــويريه وتحجيلها على القرين راح تخبل البنيه
-بــدور بطليّ هالسالفه
بــدور :: انتِ ما تصدكين بس شوفي جــويريه تكول كل ما ابجي يجيني.
مــاسه:: جــويريه هاي يعلمنها بالمدرسه صاحباتها وتخلس بيج
جــويريه:: سكتت هو اني من گاعي مخلوسه الحد هسه محد منتبهه للفلوس وهالشي مخليني طول اليوم خايفه واحس مبين للكل اني الماخذتهم.
رنـــه ::طــروادة شويه صار احسن بس بعده ما يطلع من البيت ماله خلك للعصر يله طلع گعد بالحوش وهاسكي يمه، جبتله صحن شوربه احجي
-سويتها الك الصبح وعفتها.
ابتسم اخذها من ايدي، اجوه حسين وزهره جابوا كتبهم قراهم انه هم ركضت جبت الرياضيات وكعدت يمه يقريني ويسأل
-فهمتي؟
-آي والله هاي هيه.
طبكت الكتاب ودّك تلفونه فتح السماعه وحاجاها
عــفراء::شلون صرت
-احسن الحمدلله،منذر شلونه.
-الحمدلله، ردت اجيك اليوم والله بس مالحكت، عدهم عزيمه وعلي ومن الصبح الهسه نركض وما ملحكين.
-لا بعد روحـــي لا تجين ولا تتعبين مابيه شي وعلي، هاي رنـــه هسه اطتني شلون شوربه تخبل صحيت.
-مسويتلك شوربه؟ رنـــه ام السان
رنـــه :: هههه،شلونج.
-هلا بيج شلونج، ها خوما تعبانه.
-لا عادي يشتغلون وياي، وباوعي عجنت اليوم خبزج خلص.
عــفراء:: طــروادة اوكف يمها عينك عليها من التنور.
طــروادة ::ااي، هوه انا كاعد يمها اليوم.
-اي فـــدوه ديربالكم عليها، وتأكدوا من الطباخ وراها هيه شويه ثويله مرات تخلي الغاز مفتوح.
ضحك طــروادة وانه اصيح عليها
-والله ولا ثويله اوكلهم اكل يخبل
طــروادة :: اي يخبل، طماطه طاكها الجفاف ضاله بس كشور بالتاوه، وبيتنجان غرگان بالدهن، ومرات تحن علينه تسويلنه مرگه بلا لحم تگول يبطي يله يستوي.
عــفراء :: ههههههه، لا لا ما ارضى تحجون عليها رنـــه هاي عزيزة ابوي.
طــروادة :: عزيزة ابوج راح تسوي بينه جفاف.
رنـــه :: ضحكت وهوه حاضني ويضحك أخذوا التلفون حسين وزهره حاجوها شويه وراحت.
كام طــروادة خله حطب بالتنور وانه رحت سويت العجين واجيت يمه واكفين متانين النار تهفت حتى اخبز كتله
-انه بس اخافن احط ايدي بالتنور.
-انتِ دكيها خليها على المخبازه وكليلها روحـــي للتنور وحدج وهيه تمشي.
-ههههههه والله ايدي تنلسع عاين لبست جفوف عفره
دار عينه لحسين وزهره ملتهين يعاينون بتلفونه گال
-روحـــي اقفلي باب الحوش وتعاي.
ركضت قفلته ورجعت يمه خبزت خليتها على المخبازه واخذها هوه لزكها بالتنور وانه اصيح
-عفييييه.
-وووجعه، شهرتينه، هسه يگولون رنـــه فاهيه وطرواده يخبزلها اسكتي.
-جا موتكول ساعدتها بالخبز عليك الله، انه جذبت على ام صــيهد كتلها اعارف اخبز.
ضحك يهز راسه لا ما اكول كملنه الخبز واخذت تليفونه صورتها كتله من تجي عــفراء اراويها الها، راح يصلي وانه احضر بالعشا لمن كمل اجه للمطبخ عاين للطباخ گال
طــروادة :: انه عيني عليهن وروحي صلي.
ركضت صليت وطلعت لكيته يگلي ويحجي وي عبود بالتلفون
عبود:: شبيك والله شويه وارد كاعد وي سجاد
-تدخنون؟
سجاد:: لا وعلي طــروادة انا اخليه يدخن صدك تحجي؟
-شويه وردوا للبيت كافي من الصبح الهسه.
عبود:: ساعة ونرد للقريه تأمر
سداه منهم وراح كعد بالهول يعاينون تلفزون هوه وحسين، وزهره اجت يمي تساعدني أخذت الصينية وكعدنه نتعشى سوه زهره تسولف ويانه درت الطرواده احاجيه
-خاف تبقى هيج حجيها ما مفهوم؟
ابتسم يهز راسه لا
-انتِ جنتي مثلها لمن وصلتي الثاني ابتدائي يله تعدل حجيج وهسه السانج واصل اذانج.
-انه هيج جنت؟
-اي وعلي،وهم من جنه نگول الامي خاف تضل هيج گالت لا عفره هم جانت حجيها ثكيل كبرت وتعدل.
ضحكت، الوره العشا هستونه نشرب چاي وملتمين بالهول اندك باب الحوش وراح حسين فتحه اجاه گال مــيثم وبريا عاينت الطرواده بخوف خاف يحجوله شلون انجلبت عليهم يموتني والله.
بس گاملهم طرواده جريت حسين اسأله
-شيسوون اجوا؟
-انا شدراني؟ كاعد وياهم.
-وسم السانك شويه كضه.
مد السانه وكضاه بين اصابعه وزهره تضحك من شافني درت وجهي منه ضايجه گال
-اضن يلعبون دومنه لان وهـــب وصيهد وسليم وسلطان كلهم اجوا.
زفرت نفس براحه مد راسه طرواده صاح
-چاي چاي.
سويت چاي وخليته بترمز حضرت استكاين وشكر انطيته اله احجي
-اشربوا شويه شويه اذا خلص بعد ما اسوي.
-هاي هيه روحـــي نامي مالج شغل بعد.
وهـــب :: التمينه يم طــروادة، مــيثم وبريا مالهم خلك لان جانوا بالمعامل، ومحد سألهم ليش وداهم ليغاد، خاف يضوجون، كعدنه نلعب دومنه، انه وسليم ضد صــيهد وطرواده
احنه نغش وهمه واحد فاهم الثاني كل ساعة فايزين علينه،
خلصت الدومنه وكعدنه نسولف گال مــيثم يشعر
-الله لا يوفقك وكون….
يشعلك فوگ ما انتَ مشعول
صــيهد:: هاي حاره مكسبه الشعلان.
بريا:: ابن الماخلفت شريف، خرب روحه ينلام طــروادة من يهد عليه هاسكي.
ســليم:: هههههههه عليّك الحسين ليش وداكم للمعامل.
مــيثم :: يابه طلع من غبشة الله، انا وبريا كاضين جلكان مال نفط هيج نريد نوديه للبيت مرينه من يم الحنطه صاح ” شلون تعبرون النفط من يم الحنطه انتم ثولان انتم مابيكم خير وكعد يسب بأبوي وامشوا هسه للمعامل، مسودن واحد يحير شيحجي وياه.
طــروادة ::امس يگل لحسين اخوي ” انه جدك بيرغ عراضه”
وهـــب :: ضحكنه كلنه نصنف على جدي وبريا چلب يريد يشعرلهم بالروسي وصيهد كضله خيزرانه
صــيهد:: حجايه وحده بالروسي اصفگك.
بريا:: شبيك خوش شعر مدح مدح عليك الله، بداعة نجمة السلف.
وهـــب :: فتح عينه صــيهد مصدوم وانا بلعت العافيه وضميت روحـــي بين بريا وسليم، دار عينه صــيهد الطرواده مصدوم وطرواده يگله
طــروادة :: بالحسين ما حاجي.
سلطان:: عليمن على نجمة السلف العاشگها صــيهد؟ ترى وهـــب گاللنه.
وهـــب :: قريت المعوذات وهوه دارلي جنه وحش خازرني
-صلي على محمد انا جنت اقصد النجمة البالسما.
طــروادة :: منين دريت انا ماحاجي الواحد؟ وهوه سولف بس يمي
-سمعتكم اليوم آلصبح تسولفون ولكفتها.
حجيتها واجتني الخيزرانه تهلهل من صــيهد والولد يغطوني بالمخاد
مــيثم :: انا گبل غيرت اسمك بالتليفون كتبت نجمة السلف.
صــيهد:: لا تضلون تمسلتون وتاكلون تبن، كل كعده تخربونها، انا اعلمنك وهـــب، الدراجة تشوفها بس بالحلم بعد.
وهـــب :: لا بداعة نجمة السلف.
رد گاملي صيحت
وهـــب :: ما اعيددنها التوبه التوبه.
عافني ورد المچانه شربنه چاي وهمه الشعر من واحد الواحد وانا بس اضحك عليهم وصل السره الصيهد گاله سلطان
سلطان :: ها نجمة السلف ما تحجي؟
خزره صــيهد وگاله
صــيهد:: والله انا اگول الخيزرانه حلوه
وتحلى اكثر لو مرت على جلد كل واحد كاعد هنانه.
بطلوا هاي السالفة لا انعل والديكم چلاب.
طــروادة :: اكلك هوه سلطان مستكفينه وساكت هاي كعدتين ما نسمع حسه.
وهـــب :: التموا على سلطان وهو ثاني المخده منتجي عليها وحاط رجل على رجل ، جر اخر نفس من الجكاره يفكر،طفاها وعاين علينه گال
سلطان ::
كضه وكف صبري
ومامش شي يطفيها نار الموجره بگلبي
وهـــب ::صفكناله كلنه وبريا تحمس يصوفر طكاه مــيثم وسلطان سويناله باب من صفگناله شعل جكاره ثانية گال
سلطان :: اسمعوا اسمعوا،
راحت وخلتني ادخن حتى گطوف الجكاره
يهالوادم الگولي حل…..لو تدلوني بدرب السكاره
وهـــب ::ضحكوا كلهم الا انا وصيهد هسه خازرني انا شعليه جرّ الخيزرانه صاح
صــيهد :: درب السكاره؟؟؟؟
سلطان :: لا هيج تعبير هذا شني السالفة لا تطك.
صــيهد:: ابن النعااال تريد تسكر.
وهـــب :: طبك كبار وصغار وكتلنه بالخيزرانه كلنه الا طــروادة شارد واكف بالباب النوب مــيثم وبريا يسبونه بالروسي خلوه يدخن نريد بس نندل الباب منين ونشرد واحد يحتمي بالثاني وسلطان يصيح
سلطان :: شعررر شعر يمعود مو صدك، سالفه سالفه حتى مو شعر ، ااااخ خرب اهلك. ابو نجمة السلف.
ســليم:: بداعت نجمة السلف كاااافي اااخ لا تطك لا اطكك وعلي ااااخ خرب.
وهـــب:: يعيلون بيه ويخلونه يطكنه حيل جريت بريا محتمي بيه لمن وصلت للباب دفعته وطفرت شارد واصيح
-على كيفك ابو نجمة السلف.
طلع وراي ومالحك بيه بعد شردت، طبيت للمشتمل بهدوء خاف نايمه وافززها.
ندى:: نمت عدل بسرعة غطيت شعري وغمضت عيوني گـــلبي يدك حيل، ماقفلت باب الغرفة ما ادري شنو سبب الفضول العندي اريد اعرف بالمرات اليجي بيها للبيت واني نايمه شيسوي.
بلعت ريك من سمعته فتح باب الغرفه همس بصوت ناصي
-بطه.
وشغل الضوه ثواني بس لمحني نايمه رجع طفاه، گـــلبي يدك حيل مرتبكه، واحس بخطواته يمي، سمعت صوت طكة رجله من كعد كدامي وصوت نفسه من تحسر، واني احس حتى النفس كتمته همس
-نايمه.
ثواني وحسيت ببروده اصابعه فوك خدي الحار برخاوه تحسس خايف يطخني اكثر،دفعت ايده وكعدت على حيلي ساحبه الغطا علي، كام من يمي شغل الضوه يباوعلي خازرته ، وجهه أحمر ومرتبك.
– من انتِ ما نايمه ليش تسوين روحج نايمه؟
-حتى اشوف شتسوي من تجي يمي واني نايمه.
-شسوي؟ اسألي وانا أكلج شسوي لا تضلين تمثلين علي.
هزيت راسي بعصبيه اسأل
-شتسوي.
سكت يباوعلي بارتباك تفاحة ادم تصعد وتنزل غمض عينه ورجع فتحها تحسر وهو يگول
-بس وره ماصار بينه عقد كمت اطب للغرفه.
-ههههه ترى العقد سويناه حتى اخوانك يسكتون عنك، مو حتى تطب للغرفه واني نايمه.
ضحك وهو يگول
-اي ماكلنه شي، ليش ضايجة.
-شتسوي تجي يمييي من اني نايمه؟
أبتسم بضياع عينه تصعد وتنزل على وجهي
-اشوفن شعرج.
رفعت إيدي بسرعة اتأكد اذا شعري طالع ودنكت عيني مرتبكه اجه كعد كدامي ثاني رجله ومدنك يريد يخلي عينه بعيني
-ندى.
رفعت راسي اباوعله تحسر
وهـــب :: أذا اخذج بأيدي الاختج تشوفينها، واخطبج منها ترضين؟
فتحت عيني على وسعها اهز راسي لا ونزلن دموي كام وكف بسرعة مبتعد وهو يگول
-اعتبريني ماحجيت شي.
حجاها وطلع ضميت وجهي بايدي ابجي بشنو تورطت انيي
شهكت ادعي الله لا يوفقج ويلوعج مثل ما لوعتي گـــلبي .
جــويريه :: مر ثاني يوم واني الخوف اكل گـــلبي لليل وره العشا كاعدين بالهول وطب جدي گال الجده
-اطيني فلوس الحاصوده.
سمعت طاري الفلوس واحس بجمسي رجف بلعت ريك بخوف وهيه كامت للبوفيه، وي كل ثانية دكات گـــلبي تزيد كمت ورجلي ترجف فتت للمطبخ يم مــاسه باوعتلي بخوف تسأل
مــاسه :: شبيج وجهج أصفر.
هزيت راسي ماكو شي اطكطك باصابعي اسمع صوتهم يحجون بصوت ناصي النوب صاح جدي
شعلان:: وووين وديتيهن.
وبيبي تحلفله ضامتهن بالبوفيه ومالكتهن وهوه تخبل يصيح
-هسه اريدنهن تنبشون الگاع وتطونياهن وين وديتنهن.
كعدت على حيلي بالمطبخ اذني كامت تون واحس الحراره تطلع منها كد ماخايفه كمت ما افهم حجيهم وكلها تحجي وتصيح صاح جدي
شعلان:: اناا باجر اريدنهن ربع ما ناكصات، والتطلع ماخذتهن اذبحنها بهالخنجرررر.
طلع من آلبيت وجده گلبت الدنيآ بالغلط على ام صــيهد والبنات واني ضليت اكل باضافري متندمه لمن اجت كضتني من اجتافي وهزتني حييل تصيح
-كونج انتًِ الماخذتهن ولج وروح نضال الليله اخليه يذبحج.
جرتني منها ام صــيهد واني بس فاتحه عيني ومخروعه من الخوف العشته الف مره عضيت ايدي ندم على السويته موكدهم اني مو كدهم ليش اندك بيهم، صعدتنه فوك ام صــيهد واني بس متانيه الليل يجي حتى اطلع وارجعهن ما اريد اي شي بس ارجعهن ما اعيدها يا رب ما اعيدها بس خل اخلص من هالمشكله لمن نامن البنات وطلعت من البيت أرجف وخايفه كعدت يم حايط المطبخ البرا اعاين للسما خااايفه
أصوات ارتطام الابواب وحفيف الشجر أثر الهواء العالي زاد من خوفي ورعبي
ركضت بخوف خاتله بصف السياج واني اسمع صوت الولد يتسامرون يم الساگية رفعت راسي للسماء النجوم تلمع وكأنها تطمني مسحت عيوني اهمس بداخلي
يا رب محد يلزمني يا رب بسّ أرجعهن المكانهم ندمت على السويته ما اعيدها بس اخلص من هالمشكله الخوف تملكني لان آعرف لوّ أكتشفوا اني الماخذتهن محد راح يخلصني اني الوحيدة الماكو أحدّ يدافع الها
ردت اكمل مشي وبسرعة سديت حلكي بأيدي من حسيت باصواتهم قريبة مني تحركت بهدوء اتختل بصف السياج الي من خوص النخل وامر على بيبان بيوتهم بيت بيت .
الحد ما طلعت ونركع الباب وراي بقوة كعدت سانده ظهري على السعف وكاتمه صوت نفسي بأيدي كلّ ما اغمض عيني احس بالخنجر وهو على رگبتي وارجع آفتح بسرعة
نزلن دموعي غصب عني ومشيت بهمه وخوف لنهاية السياج الخارجي اتلفت مرعوبة وكعدت على حيلي شلت البلوكه من يم السياج وحفرت الكاع بإثنين ايدي خايفه ومستعجله ودموعي مغطيه خدي وشهكتي ما كدرت اضمها اكثر بس اريد الكاهم وارجعهم المكانهم قبل لا يكتشوفن اني الماخذتهم
بمجرد زحت التراب عنهم ولزمتهم بايدي شهكت بخوف واني اسمع صوتها المكروه صوتها اليعلن عن وجوده المخيف بقربي مثل كل مره ابجي بيها شمرتهن من ايدي مسحت وجهي وعيوني احاول امنع دموعي احجي بصوت يرجف
-ما بجيت ما بجيت لا يجي لا لا لا ما بحيت لاااا
انكتم صوتي وعلت دكات گـــلبي من حسيت بخطواته ورا ظهري غمضت عيوني بقوة مرعوبة بردت اطرافي واني احس بحرارة جسد خلفي ثواني وتملكني مخالبة الي مداهم على اكتافي حتى تحتضني .
يتبع…
الحادي عشر من هنا
اخترنا لك
جالكسي اس 24 الترا Galaxy S24 Ultra يتلقى ميزة تسجيل الفيديو بصيغة Log
أسعار كعك العيد 2025 في المحلات: تعرف على التفاصيل الجديدة الآن
باريس سان جيرمان يستعد لموقعة ليفربول برباعية في ليل
أسعار الذهب في السعودية اليوم: تعرف على تحركات الأسواق والعوامل العالمية المؤثرة
حجز أكثر من 30 دراجة نارية وسيارات “إندرايف” بممر البرانس!
تفاجأ الآن: سعر الدولار اليوم السبت 19 أبريل 2025 في السوق المحلي
محافظ القاهرة يتفقد ديوان العاصمة ويهنئ العاملين بالعيد لضمان جودة الخدمات
About the author
