رواية ارض الخناجر الفصل الرابع عشر 14 بقلم الكاتبة ايلول
لَهسّه صَواب زَعلك حَار بينا
وَطبيب الطّيب السل حَار بينا
عَفتنا وإحنا لأجلَك حَاربينا
أهَلنه ولا كَلت فَشله وخطيه
══━━━━✥◈✥━━━━══
رنـــه :: صرخت متخبله وانه اشوفها طايحة بالگاع ركضت عليها اصرخ شلت راسها من الگاع الحضني واجاني عبود يركض جراها الحضنه يطك على خدها وآنه خبصت الدنيا بصريخي
-صوووتج صوتج مابيها شي، عفرره، عفره.
يحجي ويطك على خدها ركضت اجيبله ماي ارجف كلي غسل وجها فتحت عينها وجها اصفر
-شني خويه؟
كعدت عدل ما تحجي دايخة وانه امسح بوجها وكف عبود خابر على طــروادة
عبود :: تعال رد للبيت، شو عفّره دايخه، بالحسين ماكو شي صدك جذب بس دايخه، هاي هاي تسمعك
فتح السماعه ونزل التليفون يم عفراء
طــروادة :: عفره.
مسحت وجها وردت عليه بتعب
عــفراء:: ها خويه.
طــروادة :: شني خويه شمالج ؟
-افترت الگاع بيه انه اليوم من الصبح ارولن.
طــروادة :: جايج انا حضري روحج خل اخذج للمجمع الطبي
رنـــه :: سدينه التليفون وكومتها كاضه بأيدها طببتها للبيت غسلت وجها وكعدت بباب المطبخ مغمضه عينها وحسين وزهره ملتمين عليها يعصرون برجليها على أساس هيج يعالجونها جبتلها جواريبها وعبايتها وچلبت
-اروحن وياج انه.
صاح عبود من يمه
عبود :: وين موليه انجبي واكعدي
درتله خازرته
– مالك شغل انتَ بله طاحت عدكم غير انه وياها.
سكت طب للغرفة يبدل وعفرة مالها خلك روحها حاطه ايدها على خدها ومدنكه وجها ذابل، ركضت لبست وطلعت لمن طب طــروادة خايف متخرذل، متروس تراب من الگيعان ونفسه مگطوع من التعب.
دار وجهه يدورها عليها بس شافها صاح
-ها عفره شني.
ومشه كعد يمها يعاين لوجها گالتله
-مخلوبه روحـــي
-خافنج ما ماكلتلج شي؟
-لا وعلي ماكله،بس اظن فقر الدم ردلي
وكف طــروادة بحيره گالها
-خل اسبح واخذج، رنـــه هدوم هدوم بساع
طب للحمام وركضت جبتله اهدومه، كامت عفره لبست عبايتها، طــروادة وهوه بالحمام صاح على عبود يروح يجيب سيارة من الولد وهوه طار بساع جاب سيارة واجه، لمن طلع طــروادة عاين علينه گال العبود
-ضل انتَ، وي حسين وزهره وخل رنـــه تروح وياها.
مشيت بصف عفراء كضيت ايدها وهيه تعاينلي بطرف عينها، اخذناها ورحنه للمجمع الطبي، سوولها تحاليل وكعدنه متانين النتيجة، وطرواده حاير بيها يجيبلها عصر ونستله مره لبن خاف من شاف وجها اصفر.
لمن صاحوا بأسمها وكامت هيه وياه راحوا وانه ضليت كاعده بمچاني شويه وردت عفراء كعدت يمي درت عليها
-ها؟
وهيه تعاين على طــروادة طلع يجيب علاج ويجي كالتلي بهمس مغطيه وجها
عــفراء:: حامل.
-هاه؟
-حامل.
-انتِ؟
-جا ياهو طــروادة؟ شمالج خوثة؟
ضحكت بصوت فرحانه وهيه تكرص بيه وانه من الحماس ضليت احوسن وكلساع اعاينلها واعاين البطنها
-يعني راح اصيرن خاله؟
-لا.
-هاه؟
-ههههه رنـــه اسكتي مني الفاهيه اتلكاها منج من اخوج.
ضحكت اسأل
رنـــه :: شبيه طــروادة؟
-انطوه التحليل اجاني يكلي شو يكولون حامل كتله هاه يكلي يكولون حامل عدج خبر؟ ضليت صافنه بوجهه.
ضحكنه لمن اجه طــروادة جايب العلاج وراحت عفراء يأشرولها عليه وهوه مقهور كل شويه وگال
طــروادة :: دمها تسعه ينراد تداري روحها.
-راح تصير خال هله هله بعد ما تتحاجه
ابتسم داير وجهه لمن اجت عفراء اخذناها ورحنه، مر للسوك جابلها معلاك ردينه للقرية وهوه طول الدرب يوصي بيها اكلي زين دريبالج على روحج.
ومن وصلنه للبيت عبود كصص معلاك وشوالها بأيده وطرواده يحضرلها بالصينية ويغسللها كرفس وحايرين بيها، حسين يصيح راح تجيبين ولد والعب وياه وزهره تكله
” لا تديب نيه متلي” وصايره بينهم حرب طاحنه، لورا العشا اجه عليها منذر راحت وهي توصي سوي هيج وسوي هيج وانه اهز راسي اي خوش وكلشي ما اسوي.
بس راحت عفراء، عبود راح السجاد وطرواده كعد وي حسين وزهره بالهول يعاينون فاره والبزون، طبيت للمطبخ غسلت ومسحت كلت بعد اليطب اكسر رجله خل يضل نظيف الباجر هستوني طلعت يمهم للهول گال طروادة
– حضري الچاي الولد راح يجون هناه.
-شني السالفة، شبيه بيتنه حلاوه يوميه جايين يوميه يوميه، والنوب شكد يشربون چاي ويترسون الدوانيه جكاير، ليش ما ترووح انتَ يمهم؟
عاينلي فاتح عينه ما راضي
طــروادة :: شو انتِ ما آدري شلونج تطردين بالوادم؟
-لا ما اطرد بس هواي يشربون چاي
-عمي انا اسوي الچاي بس كفيني شر السلانج.
حجاها بزعل خلاني انقهر عليه
-لا مو شوف انه اكولن شعدهم جايين جا مو بريا مريض؟
-اي هوه يردون يجيبونه ونلتم بلكن شوي ينسى.
سكتت ومشيت للمطبخ اعض بأصبعي واحجي وي روحـــي
-لو ادري بيهم يلتمون عدنا جا ولا بجيت على بريا.
شويه وسمعت صوتهم اجوا طبّوا للدوانيه، طــروادة كام يقفل باب الدوانيه الداخلي خاف اعاينلهم، عباله ضاله على الباب سويتلي فتحة بالشباج واطلع اعاين من يم السياج.
وهـــب :: شكد كاسرني بديرة عيونه مني، بس ارجع واكولن حگه العاشه مو هين، أول يوم كضاه بغرفته ومطفي الضوه ثاني يوم صــيهد كال خل نلتم سوه، اعاينله كاعد يم مــيثم ساكت والولد يسولفون بالگيعان والزرع شويه وصيهد گال
صــيهد :: شلون صرت بريا؟
عاينله بريا ساكت مــيثم خله ايده على رجله وهو يگول
مــيثم :: لا احسن الحمدلله.
طــروادة ::سبع سبع بريا هسه هاليومين يرجع بحيله.
سلطان:: واهم شي يرجع يشعر الصيهد بالروسي.
ضحكوا الا هو ماله خلك، يبتسم كوه على روحه وصيهد يعاين السلطان بطرف عينه وهذا داير عينه منه
بريا:: كافي تحاچوني هيج انا ما تسودنت ترى؟
سكتوا عاينلي ودار وجهه، غيروا السالفة بالساعة همه يحجون وهوه حتى ما يشارك لمن وصلوا يحجون شعر صاح مــيثم
مــيثم :: وهـــب صار شكد ما سامعين صوتك لا شعر منك لا صخام بوجهك.
صــيهد :: يشعر كله حبيات
ضحكت بريا عاينلي وسليم كضني من ايدي
ســليم:: عاشك من ورانه؟
وهـــب :: لا صــيهد يجذب.
مــيثم :: شيگول الشاعر وهـــب؟
تحسرت اعاين البريا
وهب :: يگول اخ يا غيض رفيج الروح الزين
يفت الگلب ويحنيلك الضلعين.
صفگوا همه وهوه رفع راسه الي ادور بعيونه عن مجال للصلح
-تعبني زعلك بالحسين.
مسح وجهه ووكف متحسر وكفت وياه فاتح ايدي اضمه الگلبي
-يابعد روحـــي .
بريا:: ما زعلان منك بس شويه تعبان اعذرني.
اجانه ســليم يركض خله روحه بنصنه يضحك ابتسم بريا ورغم صالحني بس حاس بيه كوه على روحه احسه حتى ما وده يضل كاعد يمنه، رجعنه كعدنه جان دور الشعر واصل الميثم وصيهد يغثة كل شويه وگاله
صــيهد:: ها الروسي ما تشعر؟
مــيثم :: أشعرلك على نجمة السلف؟
شال راسه صــيهد خازرني جا انا ياهي مالتي دار الميثم گاله
صــيهد:: لا اهينك سد حلكك.
ســليم :: عمي الله اليدري هذا چم مره عاشگ واحنه يا غافل الك الله كلشي ما ندري صــيهد طلع كله من جوه ليجوه.
رفع ايده مــيثم يصيح
مــيثم :: لا لا اسمع،
ما عاشگ من گبل أنا الأضمنه
هسه يله فك ريجه بعشك نجمه.
سلطان :: الجان يگول ما اطيح انا زلمه
دار الوكت وطاح بعشگ نجمه.
صــيهد:: انجب انتَ، بالحسين لو ما خاطر بريا فلا اضل كاعد وياكم تحبون واحد يهينكم؟
وهـــب ::ضحكنه سكته وهوه يريد يگوملنه وطرواده يكضه طنگر وجهه صار مايكصه السيف ويشكي الطرواده علينه لمن وصل السره الطرواده عباله راح يوكف وياه ركعه بوري من گال
طــروادة ::لو كل واحد يعشگ مثله
چا ياهو الاجه وشيخ على السلف نجمه.
ضحكنه وهوه كام زعلان جلبوا بيه قفل بعد عافنه وراح وبريا هم گالهم تعبـــت انا اريد اتمدد اخذه مــيثم وردوا للبيت احس جبل انزاح عن متني من بريا صالحني، لـ١١ كلنه طشينه.
“””””””””
ندى::يوم يوم احسبهن شوكت يخلصن، كاعده بالهول الكهرباء طافيه، فاتحة شباك المطبخ هوا عالي وصوت الأشجار يعصف لامه رجليه الصدري حاضنتنهن باديه وسانده راسي عليهن كل تركيزي بصوت الاشجار، واحرك رجلي على كيف وفززيت على ضوه بوجهي بسرعة مديت ايد اعدل حجابي واحجي
-شوكت اجيت ما سمعتك.
طفه ضوه تليفونه وكعد مقابيلي جريت نفس براحة عطره ترس ريتي كال بهدوء
-بريا صالحني.
-كتلك يحبك مايكدر على زعلك.
-اليوم كاعده انتِ شعجب يوميه وي نومة الدجاج تنامين.
زفرت نفس ساكته ومختنكه لمحته كام دخّل للغرفة بدل ورجع سد شباك المطبخ صارت حيل ظلمة المحه من جمرة الجكاره الماطاحت من حلكه زفرت نفس بخنگه گال
-ها؟
بقيت ساكته وكمت لازمه بالحايط اريد اغسل وجهي وأرجع للغرفة
-اشعلج ضوه؟
-لاا.
نترت لان جان واضح اريد ضوه ماله داعي يسأل طفه جكارته واني كملت مشي للمطبخ اتلمس فتحت الماي غسلت وجهي وهوه حسيته اختفه همست
-وهـــب.
ما رد جلبت بالحايط ورجعت مثل ما اجيت وصلت للهول فتحت باب الغرفة مشيت خطوتين ونردمت بيه شهكت اريد ارجع ليوره لزمني من زندي، جريت ايدي حيل منه اريد افلتها وابتعد ماعافها.
-اشعلج ضوه؟
جريت ايدي حيل منه ابتعدت احجي بغضب
-لاااا.
-بكيفج
مشيت مستنده على الحايط الحد ما وصلت لفراشي تمددت ساكته شعل الضوه داره علي غمضت عيني گال.
وهـــب :: راح انامن هناه بلكن تجي الكهرباء، بالهول حاره.
بقيت ساكته دار الضوه فرشله فراش بجهة البآب مقابيلي تمدد على ظهره يعاين بتليفونه، وإني نايمه صفح على جهه مقابيله، شويه وطفه التليفون ساكتين اثننيا فترة فاتت وگال
-بطه.
-ها.
همست وغمضت عيني گـــلبي يدك حيل زفر نفّس بحسرة
ساكت، ثواني مرن وفتحت عيني من حسيته كاعد كدامي بلعت ريك مرتبكه وهمست بخوف
-ها؟
مد أيده يتلمس لزم اصابعي حاولت اسحب ايدي منه قوه لزمته الها عافهن كلهن ولزم البنصر
-وهـــب .
-اششش.
حجاها واحس خله شي باصبعي گـــلبي يدكّ حييل واحس بنار تطلع من وجهي بلعت ريك ارجف من دنك على اصبعي باسه شواربه دغدغن جلد ايدي صوت نفسي عالي همست بصوت يرجف واجر بأيدي من عنده
-وهـــب حبااب.
عاف ايدي جريتها بسرعة الگلبي ولازمتها بأيدي الثانيه احرك الحلقة الخلاها باصبعي وكلبي يدك بقوة نزعتها بسرعة وخليتها بأيده ، همس بحسرة مقهور
-شلعتي گـــلبي شسوي وتحسين؟
انكتم نفسي بس صوت دكات گـــلبي عالي وصوت نفسه بردت اطرافي وما عندي اي رد
-اصيرلج اهل ولا تسافرين.
تنفست مخنوكه صوتي يرجف
-لازم اسافر.
-وانا؟
نزلن دموعي مخنوگه طلعت ايدي من الغطه اريد امسح عيوني سبقني ومد أيده الوجهي غمضت عيني احس بگلبي رأح ينفجر
-لا تبجين تخنگيني فوك ما انا مخنوگ، عاينــي اخذج الاختج اروحن وياج تشوفينها واخطبج منها.
شهكت ابجي بصوت وغطيت وجهي بأثنين اديه
-لاا لاا.
سكت واني احس بروحي احتركت حرك سحب اديه اثنينهن من وجهي طبكهن بايده وخلاهن يم شفايفه متحسر
-شني التردينه وتضلين وياي؟
-ما اريد شي اني بس اريد اسافر الاختي.
-انا ما اريدن اعوفنج والله روحـــي تطلع من اتخيل اطب للبيت وما الكاج.
-تتعود مو جنت وحدك، وهـــب فـــدوه والله راح اموت
احجي وياه وابجي مخنوگه خله اديه على وجهه مناه ومناه وهمس بصوت مخنوك
وهـــب :: أنّا عاشگج
حجاها وزفر نفس بحسرة باس باطن ايدي وهو يحجي
– بنص ربعي وفكري بيج، ما تنزاحين من بالي دوهنتيني، اموتن باليوم الف مره من اتخيلج مسافرة.
صحت واني ابجي وروحي مفرفحة.
-لااازم لازم اسافر لازم لا تسوي بيه هييييج اني ثقيت بيك.
عاف ايدي بسرعة ووكف يحجي بتعب
-هاي هيه هاي هيه براحتج.
مشه لفراشه، غطيت وجهي أبجي مخنوكه لو تدري گـــلبي المنو ما لمتني لو تدري بلوعتي جا عذرتني، مسحت دموعي اعين لجمرة الجكاره كل ما تخلص يشعل غيرها والغرفة صارت كلها دخان الكهرباء ما اجت وحاره ، لمحته وكفّ شلع الغطا الجان داكه على الشباك، وفتحه دخل الهواء للغرفة وضوه من الگمر.
ضليت كاعده فتره وهوه يم الشباك كعد يدخن ويعاين للشجر، كمت من فراشي التفت عاينلي شعل ضوه تليفونه وشمره على المخده مالتي، اخذته طلعتلي ملابس ورحت للحمام خليت الضوه بالباب ودخلت اسبح بلكي ابرد واكدر انام، طلعت مالكيته طفيت الضوه خليت تليفونه على فراشه وتمددت بفراشي هستوني سابحة والهوا يدخل للغرفه بردت شويه وكدرت انام.
ما ادري شكد وقت مر وفزيت على فتحة الباب بقيت على نومتي ورجعت غمضت عيني، كح وتحمحم شويه وهمس
-ندى.
منطيته ظهري ومخليه ايدي جوه راسي غمضت عيني اسوي نفسي نايمه حتى ما يحجي اي شي وياي، دك گـــلبي حيل من حسيته وره ظهري بلعت ريك مرتبكه حسيت باطراف اصابعه الترجف على شالي سحبه من شعري بهدوء واني احس بدكات گـــلبي تضاعفت.
طبكت سن على سن وعصرت اصابع رجلي بقوة من حسيت نفسه بشعري الرطب، تنفس بحسرة يخلي خشمه بين خصل شعري ويجر نفس بقوة، نزل خشمه من شعري الوره اذني قشعر كل جسمي من طبع شفايفه وره اذني نفسه حار وهمس بصوت طافي ويرجف
– تشوغ روحـــي بشمة شعرج.
احس كل جسمي تبند وعاصره عيوني بقوة دكات گـــلبي فاضحتني وهو يمشي شفايفه الحاره من وره اذني الركبتي
وبكل مره يبوسني يحجي كلمه الحد نهاية رگبتي تنهدت وشهكت من حسيته اذاني همس
-خاف الصبح تنكرين هذا دليل، وصلت الرگبتج وبستها من الطول للطول.
حجاها وابتعد واني مدري شبيه جسمي ذبلان وبس فاتحه عيني احس وين يله كدرت أستوعب همست مخنوكه
-وهـــب.
-هممم؟
-اذا اجيت مره الثانيه يمي والله اطلع بليل ماتلكاني.
سكت فترة واني مدري شبيه هلكد اختنكت كد ما لمت نفسي گـــلبي وجعني شويه وگال
-هاي هيه انسي الحجيته والسويته، هاي هيه انا مجرد شخص اوصلج الاختج.
-حرام عليك تجي يمي والله حرام، ايدك مالازم تلمس ايدي كله ذنب علييي.
-مرتي انتِ شنو الحرام؟
-مو مرررتك عقدنه جذبه لا تصدكه.
-مو بكيفج جذبه، عقد صحيح تضحكين على روحج انتِ؟
-لا مو صحيح، وهـــب لا تستغل ضعفي اني ثاقة بيك لا تستغلني وتترسني حرام.
احجي مختنكه وابجي گال
-هاي هيه كون اكدر إمسح هالليله من عقلج جا مسحتها وضلت بس بعقلي وذنبها بس انا اتحاسب عليه
بقيت ساكته ما ادري شوكت رجعت نمت ثاني يوم الصبح مالكيته بس مــاسه اجت يمي راسبه بدرس وخايفه من اخوها صــيهد، الظهر اختنكت كلش كمت وكفت يم شباك المطبخ اباوع بحسره للبطوط يسبحن بالساگيه، والشجر آلتين شلون البلابل تنقر على التينه وياكلن منهن.
مكتفه ايديه مستنده على الحايط اباوع ونزلن دموعي مختنكه حتى الطيور عدهم حريه اكثر من عندي صرت احسد الطيور لان يكدرون يمشون براحتهم اني صار اشهر محبوسه هنا.
التفتت من دخل وهـــب مبتسم عادي ماعبالك صاير شي
مديت ايدي على ركبتي مرتبكه اتاكد مغطيتها زين، راحت ابتسامته من شاف دموعي مسحتهن بسرعة گال
-شبيج؟
-مابيه شي
-ندى، شبيج شنو ضايجة مني؟
هزيت راسي لا مدنكه وكف كدامي
-جا عليمن تبجين، اطلع من البيت؟ ما اجي بعد والله بس لا تبجين.
رفعت راسي امسح بدموعي
-لا والله مو منك، بس مختنكه حييل.
-على هاي؟
-اي
غطيت وجهي ابجي ورجعت احجي بخنك
-حتى البطات احسن من عندي.
ضحك نزلت ايدي من عيني اباوعله
-تضحك واني ابجي؟
-هههههه لا والله يوجر جمر بگلبي لمن تبجين، شتردين ليش البطات احسن منج.
دنكت مرتبكه درت عيني رجعت اباوعلهن گال
-نداوي.
درت عيني اله
-اطلعج للساگيه؟
مسحت عيوني اباوعله ما مصدكه
-واهلك اذا يشوفوني؟
-بالليل من كلها تنام محد يشوفج.
-خاف بالليل تتغير.
-شني وحش انا وبالليل اتغير؟
-لا قصدي تغير كلامك تكلي ما اكدر لو تروح وي اصدقائك.
مد ايده لزم شاربه يضحك
-شاربي مو علي اذا الليلة ما اخذتج للساگيه.
ضحكت فرحانه وهو يهز ايده مبتسم
-كل هالفرحه علمود الساكيه
-اي من أشوف البلابل تاكل تين تمنيت نفسي بلبل.
-هاي هيه الليله نحوش تين ولا يهمج.
لازمه ايد بأيد فرحانه، شويه وطلع سديت الشباك ورجّعت للغرفة منتظرة الليل على احر من الجمر، صليت واجه هو جايب عشا گال بالليل اجيج، ومد اديه يباوع بيهن لمحت جرح يم اصبعه سألته
-شبيها ايدك
-نشكت من وراج
-ليش من وراي؟
ضحك هز راسه لا
-اتشاقى وياج، يله رايح انا شويه واجيج، كون جاهزه.
هزيت راسي اي بحماس طلع واني بس اكلت كمت لبست ووكفت كدام المرايه اعدل بشالي أفتر بالبيت منتظرة شوكت يصير الوقت كل شويه اتخيل نفسي بداخل الساكيه وابتسم وحدي،خليت مخده بصف الباب
كعدت واني كلي فرح فتح الباب وباوعلي مبتسم
-ها ؟
حجاها وعينه بعيني ضحك من شافني لابسه وكاعده بحماس
-عاين عاين الشيطنة ليلية تنام ويَّ الدجآج والليلة ضاله لنص الليل
-هههه شلون انام مو انتَ وعدتني تاخذني للساگية ونحوش تين
-ليش ما اجيبلج شجرة التين هنا لا من شاف ولا من دره
باوعتله مقهورة
-بس انتَ كلت شاربي مو عليَّ اذا ما اليوم طلعتج للساگية .
ابتسم عاض شفته ويباوع الوجهي
-اخذج اخذج بس فد بعد نص ساعة خلي الاهل كلها تنخمد .
هزيت راسي اي بحماس وهو مكابلني مبتسم ويباوع الحركاتي قصص وروايات عراقية كرار صلاح ضحكت وغطيت وجهي بايدي كال
-خاب فدوه آروح لثغرج
نزلت ايدي من وجهي مرتبكة اباوعله وهو اختفت ابتسامته مسح وجهه وطلع من البيت شوي ورجع حجه بحماس مثل حماسي
-يلا يلا تعاي!
مدلي ايده باوعتلها ساكته تذكرت من كتله حتى لمسة ايدك الايدي حرام، سحبت الردن نزلتها على كف ايدي غطيته ولزمت ايده كال
-جا احس بحرورة ايدج حتى لو غطيتيها كاض نار هسه انا .
حاولت اسحب ايدي منه واني احجي
-تعوفني وامشي وحدي؟
لزمها بقوة وهو يگول
-لا من نوصل للساگية اعوفنها امشي .
طلعنا واحنا نتختل بعدنا ما عابرين البيت وسمع صوت سحبني بقوة مختلني ورا السياج وجهه بوجهي وقربة اربكني همست بارتباك.
-نرجع ؟ خفت !
هز رآسه لا
-وعدتج انا . ضلي هنانه لا تتحركين خل اشوفن يا چلب بعده كاعد
هزيت راسي موافقة كعدت على حيلي حتى اليفوت من يمي مايشوفني صرت بين سياجين. راح هو وإني اتلفت شوي ورجع همس
-يحليوه
رفعت راسي اباوعله مادلي ايده لزمتها سحبني وياه
-منو الجان كاعد ؟
-آمي خطية ما يهيد بالها ويرتاح گلبها الا تعرف منو اجه ومنو بعده كتلها كلهم ناموا روحي نامي كالت تعال هناك اسويلك تحتومة كتلها شبعان ، ضحيت باكل من ايد امي النعمة لخاطرج .
يحجي ومبتسم ضحكت وكتله
-غلطت عليها انتَ كلت اشوف يا چلب كاعد .
-عبالي ولدنا ما ادري بيها امي تدورين وراي انتِ يا ولحظ
ضحكت وطلعنا من السياج عبرناه الحد ما وصلنا للساگية وكفت وسحبت نفس بقوة عاف ايدي وكف على جهه يباوعلي التفتت عليه
-انزل بالساگية عادي ؟
-اي نظفتها من الشوك اليوم حتى تلعبين بيها بلا ما تتعور رجليج .
نزعت من رجلي ونزلت بالساگية بمجرد الماي لامس رجلي همست بفرح
-الله الله
وضحكت بصوت عالي صاح
-اشش ها ها يمعوده العرض غالي حسج رحمة للخلفتج .
هزيت راسي اي بلا ما اعلق على كلمته اللعب بالماي وهو راح على شجرة التين حاش منها وتقرب انطاني غسلتهم واكلت كعد على طرف الساگية يباوع كال
-اول مره تشوفين ماي ؟
هدأت تلاشت ابتسامتي دنكت ساكته فززني من رش ماي على وجهي
-لا تعبسين جهرتج ترى اشاقيج شمالج كلبتي وجهج .
خليت ايدي بالماي ورجعت رشيت عليه وكف مبتعد ويحجي بتهديد
– ولج مو اجي اغططج
ضحكت وطلعت من الماي حشت بعد تين وافتريت بين الأشجار الحد ما گال يله تعالي نروح كافي ، لزم ايدي ومشينا بين الاشجار من نريد نعبر غصن شجرة طخ بركبته وجرحة .
ما آهتم رجعنا للبيت دخلت بدلت وطلعت غسلت التين اخذتهم ورحت يمه شفته ساحب ياخة القميص ويباوع بالمرايه على الجرح البرگبته عفت الصحن يمه ورجعت جبت التعقيم والشاش
كعدت كدامه كال
-شتسوين ما يسوه
-لا يلتهب وتبليني بعدين تكول انتِ السبب.
آبتسم تقربت عقمت الجرح بلا ما اطخه، لزم ايدي بقوة باوعتله بأرتباك سحبني عليه اكثر يقرب وجهي لوجهه يحجي بهمس وعيونه تتمعن بملامحي
-حبيتي البستان ؟
هزيت راسي اي وجهي احسه صخن ابتسامة تخوف على وجهه ، همس !
-جرح رگبتي ما يتداوى هيج !
دنكت عيني واني احاول افلت ايدي من أيده حجيت وآني مدنكة
-شلون أعالجه؟
مد ايده على حنكي ورفع وجهي صارت عيني بعينه باطراف اصابعة تلمس شفتي وهمس بضياع عيونة ذبلانات
-بس خليهن بين شفتي واراويج بيا نار حركتيني .
اباوع لعيونه ضايعه وذبلانه كلي أحسّ بنفسه يم وجهي شفايفه شويه وتطخ بشفايفي حرك اصبعه على شفتي دفعت أيده مبتعده من يمه غمض عينه، ورجع راسه ليوره وكفت اباوعله أرجف مرتبكه همس
-يا صبر ايوب، ارد كل ما گلت هاي هيه راح اتوب.
عفته وفتت للغرفة ارجف ايدي على شفايفي شويه ودخل نزلت ايدي خله صحن التين يمي وطلع بلا ما يحجي.
جــويريه :: من بين كل هالتعب فرحتني النتيجة صح درجاتي مو مثل ما اريدهن بس المهم نجحت، انقهرت على مــاسه طلعت بدرس، واكفات بالمطبخ نسوي عشا وهيه تدعي صــيهد مايجي.
مــاسه :: تدرين ما مقهوره لان راسبه بكد ما خايفه منه.
-كليله ناجحه جذبي عليه.
-لا يمه ماتعبر عليه جذبه، بــدور سوت روحها مريضة بعد ما تكوم من يم امي الا يعدي شهر الكسولي حتى مايگلها ليش درجاتج ناصيه
ضحكت اشوي معلاك واجت ام صــيهد محضره صينية جدي وجده وحدهم، اخذتهن خلتهن بصحن هستوها تريد توديهن واندك باب المطبخ بس سمعت صوته من صاح
-مــاسه.
نزلت ردني بسرعة ولفيت حجابي ودرت اريد امشي گالت إم صــيهد
-ضلي يمه اخيوتج لا تشردين منهم.
درت للطباخ وكفت بمكان مــاسه وهيه راحت فتحتله الباب نتر بوجها
-صارلي ساعة احجي.
مــاسه :: والله بساع اجيت بس تانيت جوري تلبس حجابها.
مشه واني منطيته ظهري بس وصل يمي گال
-بالختله تنزعه وكدام الوادم تلبسه ام وجهين.
مشه للهول واني احس گـــلبي انطعن بسجين بس فاتحه عيني جرت ايدي مــاسه تبررله
-مايقصد شي والله لا تضوجين.
هزيت راسي لا صاحت جده.
-ووينجن اطني خبزه ترفه.
راحت مــاسه توديلها خبزه بسرعة مسحت دموعي، اجت ام صــيهد يمنه كملنه عشاهم ودته الهم ورجعت تتعشه ويانه كعدت يمهن بلا ما اكل احس حتى معدتي احتركت وحجايته ما تروح من بالي.
خلصنه العشا ونظفنه، وجده وجدي وعمي وليد وشاكر راحوا يرجعون زوجة سلطان، صعدنه فوك نباوع تلفزون واني بالي كله مو يمهن ماكدرت انسى حجايته ضلت تاكل بگلبي مــاسه نامت واني ولا كدرت أغمض عيني ومعدتي بقت تكرصني من الجوع
نزلت للمطبخ اريد اجيبلي شي اكله امشي على كيف خاف احد يفز ضوه المطبخ ضال مشتغل بس فتحت الباب لكيت صينية محضره سديت الباب ودخلت ضحكت عبالي مــاسه محضرتها الي مديت ايدي اكل منها ورفعت راسي من انفتح باب المطبخ الخارجي وكفت اللكمه ببلعومي من شفّته كدامي
خليت ايدي على حلكي أريد ابلعها غصيت بيها تقربت للسنك غسلت ايدي ودرت وجهي اريد اطلع مشه بخطوات سريع قفل ألباب الداخلي للمطبخ رجعت ليوره ورفعت عيني اباوعله
-ارجعي اكلي
هزيت راسي لا، رفع ايده أشر على الصينية وحجه كمله كلمة
-ارجعي،اكلي.
مسحت وجهي وحجيت بصوت ناصي خايفه خايفه من جده اكثر من خوفي منه
-ما اريد،اريد اصعد يم مــاسه.
-راح اسب امج.
فتحت عيني خازرته تقدم خطوه رافع ايده البيها السبحه نتر
-ووولج.
بقيت فاتحة عيني خازرته
-نزليهن لا اشلعهن حيوانه
نزلت عيني منه نتر
-امشي اكلي راح احط بيج راشدي اعلمج شلون تخزريني.
رفعت راسي اباوعله واباوع للباب
-انتَ شتريد من عندي؟ اذا جده لزمتني هناه تموتني ليش ما تفهم.
رفع اصبعه على حلكه
-اششش، على اساس انتِ تخافين اوكح منج ما شفت،
اكلي.
-ما اريد.
-بتّ الحيوانه.
رفعت راسي اباوعله بعجز وقهر انترسن عيوني دموع صوتي يرجف
– تريد تضربني اضرب مثلهم لا تستخدم امي وسيلة بس حتى تمد ايدك عليَّ، لان اغلط عليك مثل ما تغلط علي.
تقرب خطوه ويحجي بتحدي
– فنج يله اغلطي الا يشهد الحسين گلب بصف گلبج اطلعلج.
مسحت وجهي ومشيت للباب دفعني من جتفي ونتر
-ام الجكاير.
عله صوته ودك گـــلبي بخوف باوعت للباب ارجف
-خلي اروح راح يكعدون.
-اكلي.
مسحت وجهي ورحت للصينيه اكل بسرعة رغم احس آريد اتقيئ
بس اريد اخلص منه ومن شره وهوه وراي شوي وگال.
– دافعتلج لان عازه نفسج، لا ترخصينها، وانا اضل ادافعلج
سكتت هادئة رحت للسنك غسلت احس نار بعيوني مو دمع يباوعلي بطرف عينه نظرة كرهتني بروحي زفرت نفس مخنوگه وافكر بالكلام الاحجيه حتى ما اغلط.
-باوع، اني ما مخرصه نفسي، مرخصه نفسي، ما مرخصتها، وحتى ما اريدك تدافعلي بعد والله ما اريد تدافعلي ولا تحميني.
احجي وارجف وهو عينه بعيني
-ارمشي الدموع ترسن عينج خل ينزلن.
مسحت عيوني برداناتي وما خليته يشوف دموعي، مبتسم باستفزاز.
صــيهد:: اذا مره الثانية لكيتج نازعه حجابج كدامي لو كدام غيري، عاينــي عاينــي واسمعي زين يشهد الحسين، لا جدج ولا جدتج ولا سلف يحميج مني.
بلعت ريك اباوعله ساكته نتر
-فهمتي؟ صيري أدميه، غلطاتج كثرن وجاي اجمعهن،
حجاها وابتعد من الباب مشيت بسرعة فتحته وطلعت گـــلبي يركض قبلي صعدت فوك اضــحك على روحـــي هوه هذا الردت احتمي بيه، شعلان محدث لا اكثر ولا اقل.
طفت الكهرباء، فتحت الشباك ووكفت يمه سمعت صوت البومه وابد ما ارتعبت صارت عاديه، فزت مــاسه راحت للحمام ورجعت تسأل
-ليش مانايمه جوري؟
-مانعسانه.
اجت وكفت يمي تحسرت مغمضه عيني ومركزه وي صوت ألبومه
-مــاسه
-هممم؟
-البومه ابد ما تعوف بستانكم؟
-اي، الله لا تذكريني جان عمو شامل يموت عليهن.
درت عيني الها وهيه تقربت للشباك تباوع مبتسمه
مــاسه :: هاي بايام الشتا جان يطلع للــبستان ويلكاهن افراخ طايحات من النخل يجيبهن يربيهن
-اي؟
-والله جا كمتلج بس انه نعست.
حجتها وراحت تمددت بفراشها، بقيت شويه واكفه اباوع للنخل واتنصت لصوت البومه الحد ما اختفى، هستوني اسد الشباك وفتحت عيني حيل اريد اركز من لمحت سواده تشبهه القرين الجان يطلعلي اجت من البستان وطبت للسياج شهكت فاتحه عيني حيل سديت الشباك بقوة وركضت لفراشي گـــلبي يدددددك واني امسح بعيوني خاف بيهن دموع ، بقيت اركز خاف يجي الحد ما نمت .
رنـــه ::كل ما تطفي الكهرباء اسب شعلان صارت عاده اول ما تطفى اصيح نعلعله شعلان، ومنّ تشتعل اكول اشتعل شعلان
بس هاليوم طافيه واني نايمه ما ادري كعدني طــروادة عركانين من الحر كعدت على حيلي روحي طالعه گال
-كومي حطيت حصيره بالحوش انگلي الفراشات.
يحجي واني صافنه دغاني بجتفي
-رنـــه .
دفعت ايده مطنكره نتر
-كومي.
كمت بوجهي للمطبخ غسلت لكيته ينگل بالفراشات فارش حصيره بالحوش بيه هوا احسن، اجه عبود شال حسين وطرواده شال زهره ، وانه تمددت بفراشي الهوا حلو فاتحه عيني واعاين للسما صحيت بعد من غسلت وجهي.
طــروادة فرش بصف حسين وعبود بصف طــروادة هستوه خله راسه على المخده. وكمت انه صاح
-ها وين؟
-اشوف الطلي خاف محتر.
عبود:: عود هفيله اذا محتر.
مشيت يمه اعاينله نايم رجعت يمهم تمددت بفراشي اريد ارجع انام ماكو
-طــروادة؟
-هاااه.
-هسه ام الطلي هم تبجي عليه؟
عبود:: حتى فاتحه سوتله.
طــروادة :: ليش ما تنخمدون وراي كعده من الاربعه.
سكتنه إِنّي وعبود رجعت أعاين للسما احسب نجوم وطيارات شويه وكتله
-اكلك طــروادة هسه هاي الطيارات بيها وادم لو فارغة؟
طــروادة :: خرب روح الطيارات رنـــه داخل على الله وعليج خلّيني انامن.
-يله نام نام شكتلك هسه انه.
عبود:: بس جاوبنه بيها ناس لو لا؟
طــروادة :: لا حول ولا قوة إلا بالله.
سكت عبود يضحك خنك واني هم سكتت ورجعت احسب طيارات شويه وصاح طــروادة
-ااااخ زرف بطني.
-هااه؟
كعدت اعاينله دفع حسين منه گال
-مو رجلين حدايد ونبتن ببطني.
عبود:: نام عمي نام سطرتنه.
رجع طــروادة تمدد. غمضت عيني اريد انام وتخيلت الطياره تطيح علينه، فتحت عيني جريت زهره الحضني كلش وغطيتها على اساس الغطا يحمينا هستوني اغفى وسمعت صوت طــروادة يصيح
-اعع شني هاي خاب رنـــه غرگنه.
كعدت على حيلي واكف لعبانه روحه حسين مسويها على ظهره وعبود غاص من الضحك طب سبح ونام جوه، للصبح كعدني
شاد جراجف ومسويلنه في منّ الشمس
-ما بيج تكعدين تعاونيني؟
كعدت على حيلي رحت غسلت وصليت سويت ريوك شلت الصينية وطلعت للحوش يشتغل بالبذور مال الشلب يخليهم بماي حتى يجذرون قبل الشتال، اسمعه يدندن يقرأ قصائد حسينية، من لمحني وبأيدي الصينية ابتسم وهوه يگول
طــروادة :: هلااا هلااا هلا بالمعدله.
ضحكت فرشلنه بساط وراح غسل واجه تريكنا سوه وكمت وياه اساعده نهد حيلنه للظهر يله كملنه اخذ هاسكي وراح ، العصر طلعنه بالحوش حيل اتونس على الدجاجات والطلي صغير وعلمته ينطح يركض وره زهره وحسين
لو نكعد انه وزهره نحطله من قراصاتها لو نحمره لاعبين بيه طوبه وهوه متحمل وساكت شويه بعد ويحس روحه اخوي، وانه لو يطوني مجال اطببه انومه يمي بالغرفه، بس همزين شويه اخافن من طــروادة .
ثاني يوم الغروب أعاين للتبن مال بيت جدي انقهرت لزمت حسين وزهره عصا صغيره وطلعتلهم الطلي والدجاجات
-اسرحوا بيهن يم التبن خل ياكلن.
حسين :: استغفرالله الله خبصتنه خبصتنه بطليها.
-ها حسين هاه ياهو الغسل فراشك من الصبح.
گلب عيونه ماعاجبه طلعوا وانه صعدت على گن الدجاجات أراقبهم، الدجاجات يحرثن الگاع باظافرهن يدورن اكل والطلي يلعب وحسين وزهره هم يفترون يلعبون متونسين اعاينلهم واضحك على غفله واسمع واحد يصيح عليهم
-اخذوهن جوه.
تلفتت ادور ياهو هذا بكيفه هوه شنو لمن طلع لمحته بريا حسين جاب الطلي صحت عليه
-عوووفه حسين.
ضل واكف محتار هوه وزهره رجع گاله
-اخذهن ورووح.
-ياهي مالتك انتَ ؟
رفع راسه فتح عينه خازرني وانه اعاين بأستهزاء جر حسين من ايده طرف فالينته نتر بيه
بريا:: كتلللك تحرررك.
بجه حسين كض زهره من ايدها يريد يجي للبيت تخبلت دنكت شلعت حجار من فوك كن الدجاج شمرت عليه
-ووولي بالحسين افشخك من تطك واحد بيهم وولي امده عيوني يوم البجن عليك.
طبوا حسين وزهره للبيت وهوه جاب الطلي والدجاجات وصلهن الباب الحوش ورجع من يم السياج أشر على نعاله وگال
بريا :: اكطعه على راسج من تغلطين.
درت لحسين يبجي متت قهر
-انه اكطعه على رأسك ابن الروووسيه.
خزرني غميته ونزلت أراضي بحسين وهوه يصيح والله الا احجي الطرواده عليه كضيته من ايده
-كله كتلني حيل
-كرصني مناه انخطف وانجلب.
-اي والله صدك انخطف وانجلب.
سكت حسين بس مقهور وهذا بريا عبالك شاخط كل شويه اغلط عليه، بالليل اجه طــروادة مهدود حيله من التعب صبيلتهم عشا وحسين يشرحله وانه اغمزله اريد ما يجيب اسمي حجه السالفه كلها وطرواده يعاينلي ويهز راسه متحلف، كمت للمطبخ وديت الچاي بأيد عبود اخذت اكل الطلي وطلعت اغلط على حسين هسه شيخلصني من طــروادة
مشيت بأيدي خبز واحجي واغلط الحوش من وره اظلم مكسور الگلوب ماله هستوني واكفه يم الشرك مال الطلي اريد انطيه اكله واحس ايد انمدت على ايدي نهبتت بقوة اندفعت للسياج نسد حلكي بلحظة
فتحت عيني مصدومة وانه احس الخنجر على رگبي بلحه كصني.
يتبع …
الخامس عشر من هنا
اخترنا لك
يلا تعالى شوف: هيونداي تكشف عن باليسيد 2026 بتصميم جديد ومميزات مذهلة!
رواية ماسة النوح الفصل السادس والعشرين 26 بقلم ريتاج محمد
إيفرتون ووست هام ينتصران ويتفوقان على يلا شوت مصر سبورت في مباراة حماسية ومثيرة
جمال تلاوات الشيخ عبد الباسط عبد الصمد في روائع رمضان بمصر
لماذا بكى محمد صلاح بعد خسارة ليفربول أمام باريس سان جيرام؟
سعر الريال السعودي اليوم الأربعاء 26 مارس 2025 مع بداية التعاملات
رواية غلطة مدفوعة التمن الفصل الخامس عشر 15 بقلم ميمي عوالي
لولو الشطورة تخطف الأنظار عبر الشاشات.. تعرّف على التردد الجديد لقناة وناسة بجودة فائقة لعام 2025
About the author
