لمياء،،،، صار فتره البيت هدوء والكل ساكت ماطلع حس لأي شخص من يوم مرض سراج للان
بهاء وباهر حذروا نسوانهم من اي مشكله او لغوه للأمانه زوجة بهاء هادئه وماعدها مشاكل لكن نوال شبيهة اسراء ولو ماكو احد يشبه اسراء بهل دنيا على ذكر اسراء ورا ماطلع سراج من المستشفى اجتي هي وعمتي ضلت تتلوك وتحنن گلوب وتبچي على وضع سراج وتتودد لبناتها اخر شي عمتي ختمتها و طلبت من سراج يرجع اسراء
كان جوابه عافهن وصعد لغرفته ضلن شويه من شافن ماكو فائده راحن
مر تقريبا اسبوعين صح شويه وضعه الصحي تحسن بس واضح للأن بعده تعبان
لكن فجئه بعد الأسبوعين تغير وضعه الكل انتبه لهل شي صار حتى بالبيت مايتواجد والكل يسأل وين يروح حتى بالليل ميرجع للبيت كل واحد صار يفسر غيابه على مزاجه ورا ثالث يوم رجع تصورنه صاير ويا شي موزين لكن تفاجئنا من دخل للبيت مبتسم وشكله مرتاح الحجيه من شافت هذا وضعه كالت هذا وضعه ورا مره اخاف متزوج بالسر وميحجي
امي صدكت كلامها وضلت تحوس تريد تعرف والكل يخاف يسأل بعد اسبوع جمعنا كلنا وصدمنه من كال اني خطبت وبعد يومين زواجي ضلينه واحد يباوع بوجه الثاني مامصدكين كلامه اخر شي امي كالت
ام بهاء،،، يمه انت َتشاقى لو تحجي صدك؟
سراج،،، هذا الموضوع مابي شقى
ام بهاء،،، هيج بهل سرعه،، نمت وكعدت تكول خطبت وبعد يومين عرسي شنو هي لعبه،،، زين ليش هسه يله كلتلنه وليش مارحنه شفناها للبنيه وخطبناها؟
سراج،،، امي اني موصغير ولااول مره راح اتزوج المهم اني شفتها واعرفها وشفتها مناسبه ألي وتقدمتلها ووافقت وانتهى الموضوع المطلوب منكم بس تعزمون الأهل والكرايب كلهم،،، العرس يوم الجمعه اسوي عشا والكل يحضر وانتهى الموضوع
ام بهاء،،، هيح بهل سهوله قررت ونفذت وأحنا اخر من يعلم؟ اني اكول عوف هل سوالف ورجع مرتك ام بناتك ماكو وحده تحبك ولاتريد خاطرك بكدها وهاي انتَ شفت بعينك ردت وحده عافتك وتزوجت علمود الفلوس والثانيه قبل فتره هم عافتك الله واعلم على شنو
لمياء،،، انصدمت بكلام امي الجارح ومن شوكت ميته على اسراء وحابتها؟ باوع عليها سراج بغضب وجاوب…
سراج،،، كلت العندي وبلغت حتى لتكولون ماكال وموضوع اسراء منتهي ومااريد اي شخص يحجي بعد بي
ام بهاء،،، زين البنيه مين؟ نعرفها لو غريبه؟ منو اهلها؟ اكو واحد بعد يومين يتزوج وهسه يله يبلغ وفوكاها للان اهله ماشافوا العروس وين صايره هاي؟
حجيه حكيمه ،،، ها ام بهاء من اكلج ابنج مايعرف بالأصول تلوميني اكلكم الشيخ سراج طغى وماأله رداد،،، الله يرحمك حجي علوان بس هو جلمته جانت مسموعه من يوم راح صارت بيد المايخافون الله طلك مرته وهسه يريد يتزوج وحده منعرف مين
سراج،،، الله يبارك بيكم وشكرا على كلامكم الحلو اذا خلصتوا ابدوا ترتيبات العرس واعزموا الأهل كلهم
لمياء،،، نها كلامه وطلع من البيت وخلا الكل يتلاطم ورا
سمع الكل وصارت ضجه والكل يتسائل منو العروس وحتى تكمل إجتي عمتي واسراء فضحونه فضيحه بصوتهن كعدت اسراء بالصاله تدك وتلطم وامي تواسي بيها
ام بهاء،،،، لتخافين انتي الأولى وام بناته مااعوفج اضل ورا لحد مايرجعج
اسراء،،، شنو الفايده وهو راح يتزوج عليه
ام بهاء،،، صدكيني متبقى حتى لو تزوج فتره ويعوفها ابني وأعرفه بسرعه يمل وقرر يتزوج بهل وگت حتى يرد اعتباره لأن العشيره كلها ضلت تحجي بسالفة هاي البنيه العافته وتزوجت قبل ميخطبها،، هو بالنهايه رجال وشيخ وكرامته مهمه
اسراء،،، واني شنو ذنبي يطلكني علمود وحده متسوى؟ وفوكاها بسببها يريد يتزوج ثانيه يرجع اعتباره كدام الناس
لمياء،،، ذنبچ ماعرفتي تحوي وذنبچ اخذتي بالمكر والحيله وذنبچ گلبج مونضيف
ام بهاء،،، لميااااااء،،،، سدي حلكج واحترمي مرت اخوج وحماتج بنفس الوقت
لمياء،،، مومرت اخويه وأنما طليقته وموحماتي لأن أني خلعت اخوها
ام اسراء،،، حقي*ره و چ*لبه تتشمتين بأبني وبتي ألا اخذ جهالنه وضلي مثل الچل*به وحدج
سمعنه صوت عالي وغاضب
سراج،،، ابن ابوه وامه يوصل يم اختي لوجهالها اخلي الدم يغسل شوارعكم
اسراء،،،، سرااج؟؟!!
ام بهاء،،، يمه اهدى خطيه مرتك من حرگت گلبها جايه ،، لخاطري ردها ولم بيتك وبناتك لخاطر بناتك رجعها
سراج،،، اطلعوا برا بسرعه وجهكم مااريد اشوفه
اسراء،،، سراج والله اني احبك بقيني هنا خدامه يم بناتي بس لتعوفني رجعني لخاطر البنات وشتريد اسويلك حتى لو تتزوج عليه
سراج،،، اصعد اغير ملابسي انزل ألكيجن طالعات من بيتي وأذا ماطلعتن ماعليه عتب بعد اذا سويت شي وألي ماعاجبه كلامي يطلع وياهن
لمياء،،، راح الغرفته والكل وجوهه صارت تنطي ألوان عمتي واسراء مثل الحبابات طلعن لأن يعرفن سراج من يهدد ينفذ امي ماعاجبها كل الوضع والصراحه هو فعلا الوضع مقلق وتصرفات سراج غريبه معقوله كلام امي صحيح ويريد يتزوج حتى يرد اعتباره بعد ماالمعارف كلهت سمعت بقصة مرضه لأن ماشاء الله عماتي ماصدكن طشن الخبر ويصيحن هاي حوبت اسراء لأن طلكها من دون سبب
اليوم العرس قبلها بيوم سراج صاحني رحت سلمني مبلغ وكال
سراج،،، اخذي جهالج وبناتي روحي أشتري ألج وألهم ملابس وكل نواقص اريدكم مرتبين
لمياء،،، بس هذا المبلغ هواي
سراج،،، بالعافيه عليج الباقي
لمياء،،، تسلم،،،، اكلك سراج منو هاي البنيه الراح تزوجها
سراج،،، الباجر تعرفيها لتدوخين نفسج عليج بالنتيجه
لمياء،،، هذا كل شي كدرت اعرفه وافهمه والحقيقه مافهمت غير عرس سراج من انسانه منعرفها
أشتريت ملابس وحضرنا كل تجهيزات العرس صار بسرعه والكل يتسائل ومستغرب اهل امي اجوي بس جديتي نعيمه و خوالي وولدهم وولد خالاتي اما النسوان ماأجن الضاهر زعلانات لأن مااخذ من بناتهم وعمتي اجت وولدها ولد عمام ابويه ونسوانهم كلها اجوي والكل حضر ويتسائل واحنا منعرف شنو نجاوب لأن احنه بالاساس منعرف شي
اليوم العرس من الصبح كعدنه حضرنه ترتيبات العرس وتفاجئنه من اجه اخويه الصغير باقر من السفر الفرحه صارت فرحتين،،،حضرنا نفسنه وكشخنه سراج اشرف على التجهيزات واختفى منعرف وينه رجع ويا توقيت العرس كاشخ طالع يجنن لابس زي عربي فخم والأحلى ابتسامته والآشراقه والراحه ألي مزينه ملامحه اتمنيت صدك يكون داخله هيج فرحان مثل خارجه بس اعرف كل هذا تمثيل لأن سراج داخله حاليا مكسور بعد السوته سيلين بي كان يسوي هل شي حتى يفهم الناس سراج قوي وميخسر ميريد اي شخص يتشمت بي
طلعن النسوان للزفه وفاجىء الكل من كال
سراج،،، مااريد اي مره بالزفه غير لمياء وام مصطفى وامي وجديتي نعيمه والكل يبقى هنا الى ان نرجع
لمياء،،، عمتي وجديتي صارن يلطمن من الفشله واهل ابويه ونسوان عمامهم كلهن ضاجن ولاعبر اي شخص طلعوا الزلم كلمن سيارته وأحنا صعدنه ويا باقر امي من شافت عمتي وجده حكيمه زعلن وحتى تلوي ذراع سراج كلتله
ام بهاء،،، مااروح اذا عمتك وجديتك مايجن
سراج،،، على راحتج مااجبر احد يجي اساسا متاخر شويه ونرجع ابقوا هنا استقبلونه من نرجع
لمياء،،، امي والكل انصدم بكلام سراج لأن الكل يعرفه شكد خاطر امي عزيز عليه
طلعنه متوجهين لبيت العروس زفه ضخمه وسيارات فخمه وموسيقى طول الطريق اباوع سراج يقود سيارته متفاعل ويا الزفه برزانه وثكل وواضح علي كلش فرحان وكأنما هاي اول مره يتزوج وضليت اتسائل ويانفسي كل هل السعاده والفرح ألي يشع من عيونه معقوله كله تمثيل؟
وصلنه للمنصور ضليت افكر شنو السالفه ليش هنا جابنا معقوله البنيه الخطبها منا زين شنو هل صدفه معقوله!!؟ ليش نفس المنطقه الساكنه بيها سيلين؟
وقف سراج سيارته امام بيت فخم جدا وكأنما ڤله او قصر نزلنه من السيارات ضليت اباوع على فخامة البيت
خرب عرضك سراج هاي منو راح تزوج وين لكيتها وشنو هذا بيتهم؟؟
صاحنه اني واختي وجديتي دخلنه و هو دخل قبلنه توقف امام الباب الداخليه اباوع علي اخذ نفس قوي عبالك داخل معركه تحولت ملامحه للقسوه دخلنه اول مالمح العروس رخت ملامحه وعيونه صارت تلمع باوعت على العروس وهيئتها آيه من الجمال سبحان الله لبسها وأطلالتها وكأنما اميره ركزت زين بمعانيها وأنصدمت معقوله؟!!!
لا شلون ياربي معقوله هاي سيلين لوغيرها وحده تشبها؟ من سمعت اسمها وتأكدت استغربت اكثر زين هي موتزوجت قبل فتره شنو ديصير هنا؟
اباوع على سراج رايح منتهي هايم بيها وصدك هي تدوخ كعد يمها وهمسلها وراها صار يغطي بيها يريد يضمها ولو بيده يلمها بعبايته ويطلعها مسكها من ايدها وطلعنا واني طول الطريق افكر دماغي ميرضى يبطل تفكير وصلنه لبيتنه دخل سيارته للكراج ونزلها مسكها من ايدها ودخلنه للبيت استلموا الكل بالهلاهل والچكليت والهوسات من قبل اهل عمام ابويه وأقربائنا وعمتي وبناتها وجديتي مكتفيات بالمشاهده
طلعت من بيتي نحو حياة جديده مجهوله وغامضه بغموض سراج رغم واعدني يكون زواجنه شكلي ومؤقت لرد اعتباره بين اهله وناسه لكن داخلي اكو خوف رغم بطلت هل شعور من زمان لكن اعترف اليوم رجعت حسيت بي
قطع افكاري صوته ولمست أيده لأيدي سحبتها بسرعه اباوع على الطريق والهوسه والسيارات
سراج،،، شبيج؟
سيلين،،، مابيَ شي
سراج،،، شنو خايفه؟
سيلين،،، من شنو اخاف ومن منو؟
سيلين،،، وصلنا لبيتهم ودخل السياره للكراج نزلني واني مااندل دربي بسبب الكاب ردت ابعده سحبه اكثر وغطى حتى وجهي ماقبل ابعده
ذبحوا فجران دم خروفين دخلني للبيت هواي نسوان واكفه اكو اشخاص عرفتهم واكو اشخاص لا
صارت ميساء امامي فزت مصدومه صار وجها احمر من الغضب باوعتلي بحقد أبتسمتلها
كعدنا اني وسراج إجتي لمياء تاخذ الكاب اني ماصدكت اختنكت نزعته وانطيته ألها اباوع الكل يباوع عليه
حجيه نعيمه،،، صدقه لمحمد،،، مبروك عليك شيخ خير مااختاريت حسن الله يستر عليها
سراج،،، تسلمين حجيه
سيلين،،، شكرا
اباوع عليهن كلهن يباوعن عليه همست لسراج
_اكلك سراج ليش الجماعه هيج يباوعون عليه وواضح من نضراتهم ماعرفوني منو؟
ضل صافن بوجهي وبعدها جاوب
سراج،،، هو اني ماعرفتج همه شلون يعرفوج صدك المكياج لادين له
سيلين،،، شنو قصدك عيني اخاف قصدك جنت چكمه والمكياج عدلني؟
سراج،،، هو انتي چكمه بكل حالاتج شكو خابصه نفسج
سيلين،،، استفزني كلامه خزرته أبتسم وكام
سراج،،، لمياء عروستي بأمانتج راح اطلع يم الولد ديري بالج عليها
حجيه حكيمه،، شنو قابل قحط،،، لو راح ناكلها
سراج،،، اعرفج صار سنين ماماكله كيمر بسبب السكر والضغط أخاف تنسين نفسج وتيهين وتاكليها
عمة سراج،،، قحط والله قحط
سيلين بهمس،،، بداية موفقه ان شاء الله واضح سمعني باوعلي أبتسم واتقدم باس راسي وطلع واني ذبت بحركاته ضليت أئنب روحي
شبيج سيلين ثكلي ندري طالع حلو ويخبل بس أثكلي لتطيرين هيبتج
ساره،،، شبيج تسولفين ويا نفسج؟
سيلين،،، لاهيج
ساره،،، اخاف الشيخ رجع اخذ گلبج بحركاته وكشخته
سيلين،،، من حوره علساس
ساره،،، اي واضح من هذا عيونج تلاحقه من يمشي
سيلين،،، ساره جوزي عني ماألي خلگج
ساره،،، اي طبعا اليوم ساره منو،، اليوم حصة الشيخ،،، غمزتلي…
سيلين،،، گلبي نفض لكلمات ساره احس فجئه وعيت على نفسي اني بشنو حايره وناسيه وضعي الحقيقي
سيف،،، مامي اريد اطلع يم الولد
سميه،،، ابقى يمي شويه ونروح
سيف،،، لااريد اروح يم عمو الشيخ
ام بهاء،،، شنو هاي اشو هذا يصيحلج ماما شنو انتِ امه؟
ساره،،، اي سيف ابنها
ام بهاء،،، ياااااا طلعت متزوجه وعدها ولد
حجيه حكيمه،،، شفتي هاي تالي سوالف ابنج عاف الحديثات واخذ وحده جانت متزوجه جايبها وجايب ابنها وياها كرت عينچ،،، ابنج يريد يربي ولد الغربه
ام مصطفى،،، ياجماعه صلو على النبي
لمياء،،، ترا مو وقت هل سوالف
ساره،،، شنو السالفه بعدنا بسم الله
ام ساره،،، حبيبات ماكو داعي لهل كلام
عمة سراج،،، لاإله داعي ونص هو شيخ شنو ياخذ وحده لامسها رجال قبله وفوكاها مخلفه شنو خلصت النسوان
سيلين،،، اي خلصت
ام بهاء،،، شنوو؟!
حجيه حكيمه،،، شوف العرامه
سيلين،،، حجيه قصدج شوفي الثقه
ميساء،،، اي الثقه الخلتج تحومين داير مدايره لعبتي بعقله لحد ماخليتي ياخذج وعاف الأحسن منج
سيلين،،، الأحسن مني لوبيها خير متوصل لنص الثلاثين وبعدها مامتزوجه وتحوم على المتزوجين
ميساء،،، احترمي نفسج
سيلين،،، وليش اخذتي على نفسج منو يكول اقصدج مثلا،،، ورفعت تك حاجب
عمة سراج،،، ها هنا السالفه لهذا طلك بت عمته واخذها طلعت لاعبه بعقله ويجوز ساحرته واخذها
حجيه نعيمه،،، يمه صلو عالنبي شنو هل كلام
سيلين،،،حبايبي ماكو داعي لهل تشنج صيرو ريلاكس بالنهايه أني اليوم عرسي وصرت الشيخه وزوجة الشيخ
ميساء،،، الله وأعلم شقدمتيله وخليتي ياخذج
سيلين،،، لالتخافين مو كل الناس ميساء وتركض ورا المتزوجين اني لوعلى ذمته وحده اخرى مااباوع حتى بشكله أسأليهم من سمعت بي تزوج غيري عفته وفسخت الخطوبه وبعدين
اني مااحتاج اقدم شي حتى يتزوجني اني حبه الاول والآخير حب عمره وحلم حياته انتضرني عمر حتى يملكني ولو عندي عشر اطفال هم يتزوجني سراج ينسى الدنيا كلها ومينسى زمردته سيلين
ام بهاء،،، سيلين؟؟!!،،،، يا سيلين؟،،، انتي سيلين نفسها؟
سيلين،،، اي خاله حبيبتي اني سيلين نفسها بنت ابو شاكر جيرانكم شنو معقوله ماعرفتيني؟
ام بهاء،،، ولج لمياء هاي تحجي صدك لوتشاقه؟
لمياء،،صدك هي نفسها سيلين
ام مصطفى،،، معقوله،،، يعني هي هاي سيلين؟؟!
ميساء،،، ياسيلين هاي فهمونه شكو؟
عمة سراج،،، هاي انتو عود تحجون صدك!!!
ساره،،، ليش هل موضوع بي شقا سيلين هي نفسها خطيبة الشيخ سابقا
حجيه حكيمه،،، سويتها ياسراج كسرت چلمت جدك وهو بگبره واخذت الفكر والماعدها اصل وفوكاها ارمله وعدعا ولد عاف بنت الخير و الأصل واخذ هاي
سيلين،،، هههههه،،، لتنغثين عيوني انتي،،، ليصيرلج شي انتي بدون شي واصله للحلقه الأخيره
الدنيا متسوى بالنهايه ميصح ألا الصحيج افترت الدنيا ورجعلي سراج ماقبلتوا بي َ قبل وزوجتوا غيري وهسه عاف الدنيا كلها وأخذني
نوال،،، لتفرحين هوايه قبل اقل من شهر راد يتزوج غيرج وماصارت أله ونساها بهل اقل من شهر واخذج فتره ويملج وياخذ غيرج
سيلين،،، لالتخافين سراج مينسى سيلين ولاراح ينساها الى درجة انجبرت افسخ خطوبتي من واحد مدعي عام،،، عفته لخطيبي حتى اتزوج سراج ترا البنيه التحجون عنها هاي اني،،،، حبيبي سراج من سمع بخطوبتي تمرض عليه وأني على أثرها عفت الدنيا كلها ووافقت نتزوج مااتحمل يصيرله شي
ام ساره،،، شنو السالفه اخذتوها حاصل فاصل هو عرس لوعرگه
سيلين،،، عادي حبيبتي خاله همه بالنهايه أهله ومن حقهم يعرفون ويعترضون
حجيه حكيمه،،، اي اني ماموافقه على هل وضع
سيلين،،، عادي قدمي أعتراضج يم الشيخ وان شاء الله ورا شهر عسلنا من نرجع ننضر بي ولو واضح حبيبي سراجي مامعبر اي واحد مبين من صدمتكم
الكل سكت ويباوعولي بحقد واني ولامهتمه اخذت موبايل سميه وصرت اصور نفسي وأغيظ بيهن حرگتهن حرك شوطتهن شويه وبلشوا يقدمون العشا ترسوا المكان ميوزه متحركه ونزلوا عليها مناسف تمن وتاجينه ولحم ودجاج ومرك ومقبلات وبقلاوه وفواكه صراحه جعت من شفت الأكل بس اكيد مااكدر آكل هل الإكل وفوكاها بالليل يصير ثقيل على المعده
ام بهاء،،، سيلين يمه عندي حجايه وياج امشي لهذيج الصاله هنا صارت هوسه
سيلين،،، اخذتني للصاله الثانيه هم لكيناها متروسه نسوان دخلتني غرفه غلقت الباب وحجت
ام بهاء،،، اني ماجنت ادري انتي العروس صراحه من سمعت سراج يريد يتزوج ضجت بس هسه اني فرحانه تعرفين من زمان اعزج وردتج لأبني بس ماصار النصيب وهسه الله كتبلكم تتزوجون والله يسعدكم انتي خوش بنيه وتستاهلين كل خير انسي الصار قبل وعيشوا حياتكم وتهنوا
سيلين،،، لتخافين خاله نسيت الماضي من زمان نسيته الى درجة حتى ميمر ابالي وبذاكرتي
ام بهاء،،، اي عفيه هو هذا الصح
سيلين،،، خاله اكيد ماجايبتني هنا حتى تكولين هل كلام وبس
ام بهاء،،، صراحه،،، هو،،، يعني،، اني اريد اطلب منج طلب واتمنى ماترديني
سيلين،،، وليش اردج هيج طلبج صعب؟
ام بهاء،،، لا طبعا طلب عادي
ام بهاء،،، لتكولين لسراج على قبل من اجينه لبيت اهلج وبلغناج بعرسه
سيلين،،، ليش؟
ام بهاء،،، شوفي يمه احنا بوكتها انجبرنه على كل الصار الشيخ علوان جبرنه كلنه واني هددني يگتل ابني وسكتني وبنفس الوكت سراج ماراد يوصلج الكلام كال يخلص العرس وراها اتزوج سيلين وورا زواجنه ابلغهه بزواحي من اسراء
سيلين،،، قصدج من البدايه مقرر يستغفلني؟
ام بهاء،،، لا والله موهيج السالفه هو يحبج يموت عليج وجده ماقبل بيج وفرض عليه بت عمته لعب بينه طوبه كلنا وحتى هددنا وجبره وألا ميعوفج ولايبدلج بأي وحده ماراد يخسرج لهذا كال لتوصلولهه
سيلين،،، هههه،،، وكان متوقع اوافق موو؟
ام بهاء،،، هو يدري متوافقين لهذا كال اقدم العرس وأكيد سيلين من تسمع تزوجت اسراء بالأجبار تقدر وضعي ونكون تزوجنه واكيد بعد متعوفني لأن تعرفني احبها بس ألها
سيلين،،،اعصابي أنهارت من سمعت هل كلام تماسكت قبل لاانفجر،،، جاوبتها
_ هذا الكلام بعد لايقدم ولايأخر انطيني الزبده
ام بهاء،،، اني احبج وماردت يستغفلج لهذا أجينا لبيتكم وبلغناكم بعرسه
سيلين،،، بلغتوني لأن تعرفون اني ماارضاها على نفسي وتكونون ضربتوا عصفورين بحجر
ام بهاء،،، لا وروح ابو بهاء موهيج السالفه اني جنت ناويه وحدي اجي واحجي وياج بهدوء واوصلج الصار بينه وافهمج وضع سراج بس على حضي اجني عماتهم والحجيه وكبرن السالفه
سيلين،،، وشنو الفائده هسه من هل كلام؟
ام بهاء،،، رجائي يمج لتوصلين لسراج اجيناكم ومن عدنه عرفتوا بالزواج لأن سراج من خسرج تأذى وماااريد يكرهني لأن اني وصلتلج مااريده يلوم بيه لأن من غير قصد صرت سبب بفراگم
سيلين،،، انتي ماصرتي سبب واذا جانت صدك نيتج تخلين ابنج ميستغفلني فهذا فضل سويتي ألي
ام بهاء،،، اي وداعت ولدي بوكتها مافكرت بأبني شنو موقفه بكد مافكرت بيح ماردت يستغفلج ردت من البدايه تعرفين كل شي وانتي تحددين اذا تقبلين تعيشين ويا ضره اولا بس عماته الحقيرات خربن كل شي من تجاوزن وخربن الموقف
سيلين،،، هل الموضوع فهمته وأقدره رغم الصار غلط بس ليش كملتوا الغلط بأكبر منه وشوهتوا سمعتي بين الناس؟
ام بهاء،،،منو كال هل شي وليش هيج نسوي؟
سيلين،،، هو اني اريد اعرف ليش؟
ام بهاء،،، ماسوينه هل شي وداعت ولدي وروح ابو بهاء،،، شلون نسوي هل شي اكلج سراج تدمر وراج يموت عليج وأحنا نحبج شلون نأذيج ونعرفج ونعرف أخلاقج
سيلين،،، لعد منو شوه سمعتي طلع كلام عني؟
ام بهاء،، مااعرف والله مااعرف
سيلين،،، ضليت افكر وتسائلت معقوله كلامها صح زين لعد منو سوا هل شي
ام بهاء،،،بنيتي اذا اكو خاطر يمج لترديني انتي هسه ام وتعرفين شنو معنى الضنا اكيد متتحملين ابنج يزعل منج لو ياخذ موقف سراج اغلى من روحي واذا خسرته وزعل عليه اموت بداعت ابنج لتوصليله اي شي من هذاك اليوم
سيلين،،، لتخافين مااحجي اني مااضر شخص رادلي الخير وماضرني واصلا الكلام بهل موضوع بعد لا يقدم ولا يأخر
تقدمت حضنتني وباستني
ام بهاء،،، مبروك عليكم زواجة الدهر ان شاء الله
سيلين،،، شكرا
ام بهاء،،، خلي اروح اجيبلج عشا اكيد جعتي
سيلين،،، لا شكرا
رجعنه للصاله الكبيره كعدنه شالوا الأكل والميوزه دخل سراج كعد يمي كلهن خنسن ولاكأنما قبل وقت جانن مستلماتني ضليت أباوعله معقوله يطلع صدك موهو الحجه عني؟
سراج،،، شبيج هيج تباوعيلي؟
سيلين،،، ابتسمت لا حياتي هيج ماكو شي
سراج،،، حياااتي؟؟ خير ان شاء الله شكلج نويتي تذبحيني اليوم
سيلين،بهمس،،، واشرب من دمك هم
سراج،، لتبسبسين ويا نفسج سمعيني صوتج
سيلين،،، ماكو شي
سراج،،، سيوفي حبيبي تعال يمي
سراج،،، تعشيت وليدي؟
سيف،،، اي واحد عمو اسمه باهر جابلي اكل وأكلت
سيلين،،، ياباهر؟
سراج،،، اخويه باهر شبيج نسيتي؟
سيلين،،، ها باااهر،،، لا مانسيته بس ماشايفته قبل
سيف،،، ماما هنا راح نعيش؟
سيلين،،، مااعرف
سراج،،، لا موهنا عدنه بيت حلو سويته مثل بيتك هذاك راح نعيش بي سوا
سيلين،،، اي الحمد الله
سراج بهمس،،، لتفرحين هوايه ماميت عليج وسويتلج بيت بس حتى…
سيلين،، حتى شنو؟
سراج،،، بعدين تعرفين ليش
سيلين،،، تقدمت ام مصطفى شايله علبه مال ذهب وكفنا اني ويا فتح العلبه طلع قلادة ضخمه كرسي جابر اني اتخبل من هيج موديلات احسها ڤولكير بس مااكدر احجي وافشله وخصوصا للامانه كان شكله كلش حلو لبسني بمساعدة لمياء رجع طلع تراجي نفس موديل القلاده وسوار ومحبس ولبسهن ألي جابو علبه ثانيه فتحوها طلع منها سلاح لبسه ألي صرت اخرخش مثل مرته اسراء صراحه كرهت نفسي خرب لبسي كله بس مع ذلك اكتفيت بأبتسامه خصوصا واني اعرف شكد اسعارهن مرتفعه اباوع جماعتهم كلهن ضاجن ألتقطنه بعض الصور شويه وكال
سراج،،،،،،، شنو رأيج نروح على بيتنه اكيد تعبتي من الهوسه
سيلين،،، لا عادي متونسه واني اشوف الحيايه مغثوثات مني خصوصا هاي ميساء السحاره
سراج،،، ترا التحجين عنهم كرايبي
سيلين،،، علساس هسه انتَ ميت على كرايبك والله شكلك كارهم كره العمى بس تبيع مثاليات عليه
سراج،،، سيلين لسانج عندج حجي اجلي هسه ليسمعوج
سيلين،،، حقك انتَ متدري شلون استلمني من انتَ طلعت
سراج،،، شسوون؟
سيلين،،، ماسون شي بس ماخلن كلمه عليه ماكالنها ولااهانه ماهاننها خصوصا جديتك ام ابوك وعمتك وهاي ميساء من غيرتها راح تموت
سراج،،، وشبيج هيج غيرانه منها لو لأن تعرفيها رايدتني؟
سيلين،،، انتَ كلتها رايدتك ولو انتَ تريدها ماكان عفتها واجيت تزوجتني ف على شنو بعد اغار منها
سراج،،، اااااخ من لسانج الله يرحم قبل
الحجيه نعيمه،،، يمه عشا وتعشوا شنو رأيكم نزفكم لحجرتكم حتى تاخذون راحتكم
سراج،،، ماادري بس يمكن بعد وقت
الحجيه نعيمه بهمس،،، لا يمه كوموا احسن راح ياكلنها لمريتك نفسنها بنضراتهن ليصير بيها شي اني طول الوكت اقرالها ايات واصلي على النبي
من عيونهم
سراج،،، تسلمين ياام گلب الحنون
الحجيه نعيمه،،، حقك وليدي تحبها ومتريد غيرها عروستك جوهره وتلوكلك صدك ترهم تصير شيخه للشيخ هل مهره مايلوكلها خيال غيرك
سيلين،،، ابتسملها سراج واني صارت غصه بداخلي هاي كلمت والدي قبل كالها لسراج وخوش جازا
ام مصطفى ،،، شيخ ولدنا يريدون يدخلون يسلمون ويباركون
سراج،،، اي هلا بيهم
سيلين،،، اكثرهن لبسن حجاب دخلو الولد اول واحد مصطفى دخل مبتسم باركلنه وبعده شخص اخر صح متغير بس عرفته بهاء الدين باركلنه بعدها شاب باركلنه عرف عن نفسه باقر اصغر اخوتهم اباوع على شخص واكف وراهم من ابتعدوا شفت ابو طبره واكف صافن علينه وشكله مصدوم دفعه باقر بأتجاهنه تقدم سلم وبارك بس كان وضعه غريب سلم وطلع اول واحد
لمياء،،، شبي باهر؟
باقر،،، مااعرف قبل شويه برا علگها بالرگص مااعرف هسه شبي
سيلين بهمس،،، منو هو باهر مافهمت؟
سراج،،، السلم وطلع هذا باهر
سيلين،،، انصدمت معقوله،،، يعني اخوهم باهر هو نفسه ابو طبره؟!!
ام مصطفى،، يله ياجماعه نزفكم
ام بهاء،،، حضرنه غرفتكم يله نصعدكم
سراج،،، رايحين لبيتنه
ام سراج،،، يابيت؟
لمياء،،، البيت الكدامنه
سراج،،، يله يبا،، نروح لبيتنا
سيلين،،، حضنت سيف وصيت ساره وسميه علي وطلعنا من البيت واحد من حرس سراج اخذوا ساره وام ساره وسميه وسيف يوصلوهم للبيت شفت سيف يتلفت عليه يباوع گلبي رجف علي وعلى نضراته
ساره
__
رجعنا للبيت ويانا سميه وسيف راح يبقون كم يوم يمنا غيرت ملابسي وأتصلت على مؤيد لكن ميرد صار يومين اتصل بي ميرد قبل يومين بلغته بالعرس و طلبت منه اروح رفض وصارت مشكله تدخل بيها عمي محسن ورزله أنجبر يوافق لكن واضح جدا هو مامقتنع وحتى يعاقبني مارس الصمت العقابي ضدي لأن يعرفني متعلقه بي يحاربني بالزعل والبعد
ورا يومين تفاجئنه من آجا لبيتنه الشيخ سراج أخذ سميه وسيف كان وضعه للشيخ غريب وحتى شكله مرهق استغربت وتسائلت شنو صاير
اول ماطلعوا اتصلت على سيلين ضل بالي عليها لكيت جهازها مغلق وهل شي زاد قلقي ورا ساعات اتصلت بسميه استفسر عن الوضع ارتاحيت من كالت زينين وكل شي ماكو
ثاني يوم اخذت امي ورحت لبيت عمتي حتى ارضي مؤيد لكيت وجها ثكيل انقهرت من تصرفه من شافنه سجاد تسائل عن السبب
سجاد،،، شبيكم شنو متزاعلين؟
ساره،،،لاماكو شي بس ضاج لأن رحت لعرس سيلين وهو ميحبها
سجاد،،، سيلييييبن،،، تزوجت؟؟!!!
ساره،،، اي ليش ماسمعت
سجاد،،، لا،،، شعجب؟ ماتصورت بهل سرعه راح تتخطى وفاة زوجها وتزوج
سجاد…الله يسعدها تستاهل كل خير،،،، من رخصتكم
ساره،،،كام من مكانه وبين على ملامحه علامات الحزن استغربت وضعه توجه لغرفته قبل ليوصل توقف وألتفت على مؤيد
سجاد،،، عوف الزعل وتراضى ويا خطيبتك الدنيا قصيره ومتسوى واحد يضيعها بالزعل لتخسر الشخص التحبه لأي سبب حتى لتعيش شعور الندم بعد فوات الأوان لتأجل مشاعرك ولتأجل أهتمامك كل شي بالحياة يتأجل ويتعوض بس خسارة شخص تحبه ماكو شي يعوضه اصحى على نفسك وبطل خشمك اليابس الدنيا متسوى
ساره،،، كال هل كلام ودخل غرفته اول مره اشوف سجاد هذا وضعه باوعت على مؤيد وثنينا أستغربنه وضعه وكلامه
مؤيد،،، شفتهمنه احنا هسه
ساره،،، ألي فهمته يكول تراضوا ولتطولون الزعل الدنيا متسوى
مؤيد،،، انتي خوش هل فتره هواي اليدافعون عنج خالي محسن وهسه سجاد بعد شتسوين بمؤيد
ساره،،، مؤيد الروح والريه وكل الناس عاريه
مؤيد،،، اششش،،، ولج ليسمعوج شنو هل كلام
ساره،،، هاي الحقيقه حبيبي ماكو واحد قبلك ولابعدك
مؤبد،، لوصدك متكسرين كلامي وتروحين للعرس
ساره،، بس انتَ وافقت
مؤيد،، انجبرت اوافق ماشفتي خالي شلون لح عليه خجلني
ساره،،، يو،، حبيبي لتزعل بعد هيَ تزوجت يمكن بالسنة مره بعد نتشاوف
مؤيد،،اي يكون احسن بعدها لصالحنه
ساره،،،سكتت مااريد اكبر الموضوع
مؤيد،،، ها اشو سكتي
ساره،،، عجزت واني احاول ارضيك شسوي بعد
مؤيد،،، يابه رضينه
ساره،،، صدكككك؟ حبيبي انتَ اموت عليك
مؤيد،،، اني هم احبج بس ماحب تعانديني المرأه واجب عليها طاعة الزوج
ساره،،، انتَ كلتها الزوج وهسه انتَ خطيبي من نتزوج اشعلك اصابيعي العشره شمع
مؤيد،،، اي عفيه هاي ساره الأحبها وبهل مناسبه قررت نطلع وأعزمج اريد اغيرلج جو قبل لااسافر
ساره،،، طفرت من مكاني مامصدكه وكلت بلهفه صدددددككك؟!!
ساره،،،امي ابتسمت من سمعت وصلناها لبيتنه وطلعنا وهاي اول مره نطلع وحدنا سوا ويعزمني احس الكاع ماشايلتني امشي وبداخلي فرحه متنوصف أخذني لمنتزه عام باليرموك كعدنا جابلي حب عين الشمس اكلنا ضلينه ساعتين نسولف تونسنا صار الليل وكف يم بسطيه مال أكل جاب اكل وأجا كعدنا بالسياره فتح كيس الأكل
مؤيد،،، وهاي جبتلج العشا حتى لتكولين طلعني وماعشاني
ساره،،،فتح الكيس بي لفتين وقوطيتين اخذ قوطيه ولفه وبدا ياكل واني صافنه عليه باوع عليه
مؤيد،،، اكلي شبيج
ساره،،، اخذت اللفه بيها فلافل ومليانه خس يعرفني قالوني موزين وهل اكل يأذيني ومع ذلك جابها أنجبرت أكلها اذا ارفض تصير قصه جرعتها بصعوبه وشربت ببسي بقت نصها باوع عليه
مؤيد،،،شنو شبعتي؟
مؤيد،،، جيبيها اني آكلها احسن متنذب حرام التبذير
ساره،،، اخذها مني واكلها ورجعني للبيت امي استلمتني فرحانه وتسأل كذبت عليها حتى لتحجي عليه صح هل الأمور متعنيلي بس بخل مؤيد لايطاق بخيل حتى بمشاعره كل مره نزعل انبهه على هل شي وميفيد طلعتنه كلها على بعضها يمكن ماكلفته ثلاث ألاف ورغم هذا ضل ايام يعيرني بيها كل مااحجي يكول طلعتج ونستج اسكت لان احبه ومااريد اخسره مااتخيل حياتي من دونه وتنازلي هذا كان اسوء شي ماقدرت قيمة نفسي وهذا الشي خلا مؤيد ميقدرني ويشوفني مااستاهل اي شي وهذا اكبر غلط سويته بحق نفسي
صعدوا بالسياره وراحوا واني عيوني تلاحقهم وگلبي يم ابني حسيت بلمست ايد سراج لأيدي رجفت ليش مااعرف
صعدنا بالسياره رغم هو البيت امام بيتهم طلعنا من البيت دخلنا بيت ثاني بس هذا مختلف بيت فخم اندار سراج فتحلي باب السياره ونزلني دخلنا البيت شغل الأناره كانت رأئحه الصبغ والأثاث الجديد بارزه بالمكان باوعت صراحه بيت حلو وضخم والاثاث حلو ميقل عن البيت العايشه بي عرفني على غرف البيت دخلت غرفه المفروض غرفتي
سراج،،، راح يجيبون عشا اخذي راحتج الى ان يجيبوا اني اطلع اودع ضيوفي وأجي
سيلين،،، طلع وأني استغليت الفرصه فتحت حقيبه ملابسي وطلعت ملابس مريحه وغراضي والمكياجات والعطور خليتهم على الميز طلعت برنص حتى اخذ حمام الحمد الله الحمام بالغرفه قفلت الباب حتى اضمن عدم دخول سراج للمكان ودخلت للحمام اخذت حمام دافىء استرخيت لبست البرنص وطلعت انصدمت بوجود سراج بالغرفه رجعت بخطواتي مفزوعه
سيلين،،، هاي شدخلك هنا موقفلت الباب
سراج،،، هههه ياباب هاي البيت بيتي ياباب تقفلي عندي مفتاحه
سيلين،،، اريد خصوصيه ممكن تروح لغرفتك ورجائا بعد لتقتحم غرفتي وخصوصيتي لتنسى اكو بينا اتفاق
سراج،،، يااتفاق بلله ذكريني لأن نسيت
سيلين،،، شنو يااتفاق مواتفقنا زواجنه شكلي امام الناس وكل واحد أله حياته
تقدم عليه بخطوات وهو يفتح ازرار دشداشته
سراج،،، هذا الأتفاق بلي وأشربي ميه انتي زوجتي واريدج
سيلين،،،، شنوووو،،، لووووو تموووووت تعرف شنو تموت حتى بالحلم متحصلني
سراج،،، ميحتاج احلم لأن راح يصير حقيقه
سيلين،،، مسك خصري وسحبني عليه دفعته بعصبيه راد يوگع لوتخبل وتحول شخص اخر هجم عليه مثل الوحش بلحضتها ماشفت سراج شفت ثامر وأنعاد شريط حياتي وكل السوا ويايه ثامر بهل لحضه
يتبع….
التاسع عشر من هنا
هالاند يعلن رسمياً التزامه مع مانشستر سيتي لفترة جديدة
مباريات العراق والكويت اليوم: شاهد البث المباشر حصرياً عبر يلا شوت الآن
التعادل أمام بوتان: مدير المنتخب يكشف الأسباب ويقدم اعتذاره للجماهير
تعرف على تردد قناة سبورت تي في 2025 على أقمار النايل سات وعرب سات وتابع البث بسهولة!
«الشؤون» تثمن اعتماد «نزاهة» مقترحاتها لتعديل قانون مكافحة الفساد
بيراميدز يعلن قائمته لمواجهة البنك الأهلي في كأس مصر – رادار
