رواية سر خلف النقاب الفصل الثاني والعشرين 22 بقلم هدوء آل محمد

تجريان دائماً بلا توقف

هي بنت الشقاء والدموع

بنت المصائب والآلام

تتحمل الألم والذل والنوائب

بصبر وثبات، مثل الصخرة التي لا تتزعزع

لانها تثق ان هناك رب كريم لن يخذلها أبداً

بحضني فجر وارضعها الرجفة بعدها بيه خايفة لافجأة ينفتح الباب ويجون مشعان وولدة شراح يكون حالي نفتح الباب ودخلت دلال بيدها جنطتي

دلال:- حبيبتي هاي اغراضج وذهبج جففتها بالسشوار

باوعت الها بأمتنان

_ شكراً كلش شكراً

ابتسمت وطبطبت على كتفي

دلال:-لاتشكريني على واجبي

سمعنا صوت رجلها يحجي بصوت عالي مبين يريد يسمعني

عيد:- يمه الدنيا مكلوبة هناك ولد رجلها كلهم يدورون عليها انا مامضحي لابنفسي ولا بيكم مهيمن شمرها وراح وراح تطيح براسي

حسينة:-ولك اسكت لاتسمعك البنية عيب عليك

عيد:-ميفيدني العيب اذا اجوي ولكوها يمي ودكوني بفصل يكسر الضهر

وجه دلال تغير لونة وفشلت

بلعت حسرتي

_ خيه ماقصرتو انتو انا هم لازم اطلع

دلال:- وين خيه عيد يحجي لحالة

_ميخالف حقة عيالي ناس مشرانيين لازم اطلع اذا ردتي تكملين معروفج وياي نطيني عباة ونقاب وجنطة غير هاي حتى الم اغراضي بيها

هزت راسها وطلعت شوي ودخلت الحجية حسنية

حسنية:-وين تردين ترحين يمه عيد يسولف لحاله

_ ميخالف خالة وامنتج الله لاتكولين المهيمن خليني اروح وانتو ماقصرتوا

سكتت الحجية شتريد تكول حقها هم خافت على وحيدها

دخلت دلال شايلة عباية ونقاب وجنطة

دلال:- هاي ملابس اطفال جدد اشتريتهم عبالي احبل بس صارت من نصيبج دفي بنيتج بيهم

هزيت راسي والدمعة بعيني وانا اختك يهمام صارت الناس تتصدق عليه

لبست وكملت ولفيت بنتي

دلال:-هاج هذا جاكيت مطري لبسي خاف تمطر وحطيتلج شمسية هم

مادري شكول لهل بنيه غير ربي يرزقها بالذرية الصالحة على وكفتها الي وكفتها وياي طلعت انا وبنتي الجنطة على ظهري صرت امشي بدون لا اندل وين اتوجه الى ان وصلت للشارع العام

اجرت سيارة وببالي اروح لمحافظ(***) مستحيل احد يلكاني هناك

ضلت السيارة تمشي بل 6 ساعات الدنيا صارت مغرب يالله وصلت نطيت اجرة للسايق ونزلت الجو ثلج كلش باردة وين اروح مادري وين اتوجه الجوع هد حيلي اتلفت بعيوني ادور محل ماكو كلها البسة سالت مرة متوسط العمر كانت دا امشي

_ خالة بس سؤال

لارا:-هلا عيني

_وين اكو محلات هنا تبيع اكل

باوعتلي بنظرة شك وهي طگ بعلجها

لارا:- انت منين يبنيه تبينين مو من هنا

دب الخوف بكلبي حجيت بتلعثم

_ لا لا انا بس جايه على اختي هنا وتيهتها

ضهرت على وجهه شبه ابتسامة

لارا:- يي انا ادليج تعاي وياي بيتي قريب من هنا اخلي رجلي يطلع وياج الدنيا صارت ليل لايطمعون بيج ولد الحرام

هزيت راسي الها ومشيت وياها ضلينا نمشي الى ان بدت تدخل درابين وكفت بخوف

_ خالة مو كلتي قريب شو جايبتني هنا

لارا:- يي قريب امشي بس بالبداية اودي امانة لاختي ونرجع

استمريت امشي وياها رغم الخوف بس ما بيدي شي

الى ان وصلت يم بيت فتحت الباب

حجيت بخوف احاول اكذب ضنوني

_ خالة مو كلتي بيت اختج شلون تفتحين الباب

لارا:- ي مو هي مقعدة فوتي لاتخافين

ترددت ادخل بس جرتني من ايدي ودخلتني البيت حديقة كبيرة

ونهايتها بيت دخلت كانو مجموعة بنات كاعدين بس شكلهم مو راحة نداريت عليها بخوف

_ خلاص حالة ندليت تذكرت وين بيت اختي

ضحكت ضحكة تكزبر الجلد

سماهر:- ها لارا صيدة جديدة

لارا:- شلون لعد

ردت اطلع مدري منين دخل زلمة وجه اسود وضخم

رامي:- تؤمرين شي ست

هنا عرفت نفسي انو انا واكعة بمصيبة كبيرة! مايطلعني منها الا الله

ضميت بنتي الحضني حيل بودي اضمها بگلبي سالت دموعي وصرت اتحسب من شامل لمشعان لباسمة لحضي ماخليت واحد وهم يباوعولي نسحبت الجنطة من ضهري

ندارت الولد نفسة الي سحبها شهكت

_رجعها الي خوية يرحم امواتك

غلس علية وفتح الجنطة يبوحوش بيها طلع الذهب وخلا گدام الي جابتني

باوعت الي بتحذير

لارا:- سولفيلي هسه منو انت لو اخليج اليوم عشاء للجماعة

تقدمت الي وحدة ورفعت النقاب كش وجها من شافت الوحمة

سماهر:-هل مرة مو خوش صيدة يا لارا

جسمي كله يرجف نفسة والجوع مسيطر عليه فوك كل هذا التهلكة الي وگعت بيها

لارا:- يي يالبكعة سولفيلي منو انت وشوصلج لهنا

_ خالة والله انا وحدة جارت عليه الدنيا دخيلج لا تأذيني

لارا:- بلا هل مقدمات سولفيلي يالله

مسحت دموعي وانا اهز ببنتي

_ خالة انا مرة متزوجة بس سمعت ضرتي تريد تكتل ضناي شردت منهم وبطريق الشردة جاني الطلق اخذتني عجوز يمها الى ان ولدت وابنها طردني وهاي حالي

سماهر:- شتكولين لارا

لارا:- هي بالحالتين ماتفيدينا شكلها مايفيد بس خل اسال عنها واستفسر عود اتاكد من حجيها

لارا:- مستحيل اطلعها من هنا لذالك راح اخليها مشرفة على نظافة البيت مؤقتاً

اباوع الهم يتناقشون بتقرير مصيري وكاني مو

موجودة

_ بس خالة انا اريد اطلع ماريد اضل هنا

لارا:- شبيه مخبلة واطلعج سماهر اخذيها جوى

سحبتني من كتفي وانا اتوسل بيهم يعوفوني بس الحايط يسمع وهذول ولا يحسون

دخلتني لوحدة من الغرف وطلعت اسمع بس طگت القفل!

نداريت اتلفت الغرفة مالت عرسان؟! شسالفة شجابني هنا دخيلك ربي طلعني من هنا دخيلك مثل ماحميتني ونجيتني من الي قبلهاا

صرخات بنتي الي جوعانة بديت ارضع بيها وانا ارجف وابجي الى ان

نفتح الباب اتسعت عيوني بصدمة

.

.

واكف وحيلة مهدود خصوصاً بعد ماحمل نفسة المسؤلية بالي صار ويه ابنه يمسح بعيونة وترجع تنزل دموعة من جديد

ابو نوفل:- والله اذا صار الابني شي ماراح اسامح نفسي ابد

سطام:- طول بالك حجي ان شاء الله يتعداها بطل نوفل بس كول ياالله

الشيخ عگاب:- طول بالك ياخوي الولد طلع من حلگ الموت وان شاء الله تعدي سلامات

ابو نوفل:- اريد ادخل اشوفة

زكريا:- والله ياعمي ممنوع بالعناية المشددة

الشيخ عكاب:- انا اروح اشوف المدير واحاول اخليهم يدخلوك حتى تطمن گليبك ياخوي الله يعينك

ابو زكريا:- جاي وياك يابا

راحو ثنينهم للادارة مالت المستشفى

اما زگي صوت جهازة يرن للمرة الرابعة وهو مايرد

بس بزع وقرر يجاوب

زكي:- اهلا نقيب سجاد

سجاد:- هلا بيك حبيبي اغتذر قطعت اجازتك بس ضروري باجر تداوم لأن اكو اخبارية اجتنا على بيت مالت دعارة

زكي:- اكيد لو خبر زائف ؟؟

سجاد:- اكيد مليون بالميه

زكي:- راقب الي الوضع يابطل وجهز كلشي باجر جاييكم

.

.

قبل عدة اعوام في داخل الجامعة

دخل قتيبة للقاعة باول يوم اله دوام دخل للجامعة وهو تايه وين يتوجه مايدري ويريد يسأل بس يستحي بقى هيج فترة حتى اجى صوت بنية

غادة:-انت مرحلة اولى؟

رفع نضرة الها بنت شعرها يرفرف بالهوى والوجه قالب وصبوب

بلع ريگه بتوتر

ابتسمت بعفوية ولطالفه

غادة:-وانا هم بس الفرق انا مأجلة سنة لذالك اعرف كل ظرابين الجامعة

هز راسه مايدري شنو يجاوبها مستحي فهاي اول مرة بحياتة يتكلم مع بنت مرت الايام بدت تتقرب منه كانت تريدة صديق او اخ وقتيبة تعلق بس تعلق من نوع ثاني وهو الحب

الى مابيوم قرر يعترف الها طلب منها يطلعون فد مكان وهي وافقت تباوع اله وتشرب بالعصير

غادة:-يي يالله سولف شنو الموضوع الي تريدني بي؟

اخذ نفس وباوع الها بعيون تلمع بالحب

قتيبة:-غادة انا احبج

اتسعت عيونها بصدمة وبهت وجهها

غابت ابتسامة قتيبة وتيدلت الى علامات استغراب

قتيبة:- شبيچ؟ ليش نصدمتي

هزت راسها بنفي

غادة:-مستحيل قتيبة مستحيل!!

صرخ بيها

قتيبة:-هو شنو الي مستحيل حاي اكلج احبج يافهيمة

باوعت اله بعيون مدمعة

غادة:- شلون قتيبة انا معتبرتك سند وصديق

قتيبة:-اكبر چذابة انت ولج انا لو ما متاكد منچ ما كان أعترفت

غيرتج فاضحتج غادة لتكابرين

ردفت باستنكار

غادة:- ميصير قتيبة مستحيل

قتيبة:- يابنت الناس فهميني شنو قصتج دومج غامضة لاعرفت منج لاحگ ولا باطل

باوعت اله بتردد

غادة:- اذا عرفت انا متأكده راح تعوفني

رد باصرار

فتيبة:-ماعوفج يا اول دكت گلب بس احجي

دنكت تلعب بأضافرها وبدت تحجي

غادة:-من وعيت على الدنيا انا ساكنة بمكان كبير ومغلق على قلوب محطمة

أطفال بلا آباء، نبحث عن حب واهتمام

أعين محجوبة بالدموع، قلوب محشورة بالحزن

أصوات صامته، نطلب الحنان والرعاية

في هذه المكان، يوجد أطفال بلا آباء كل منا لديه قصة

نحث عن حب واهتمام، ولكننا لا نجد

أبواب مغلقة، نوافذ محجوبة

محبوسون، بلا حب ولا اهتمام عرفت هسه وين اسكن انا عايشة بدار ايتام ماعرف منو اهلي بنت حرام لو بنت حلال وانت قتيبة مستحيل اهلك يتقبلون وحدة مثلي انا بعد ماصار عمري 18سنة طلعت من الدار وهسه ساكنة بمشتمل وي شايب وعجوز اداريهم

واستلم راتب تالي الشهر يادوب يكفيني مصاريفي هاي انا قتيبة هاي انا

طول ماهي تحجي هو يباوع الها بصدمة لكن من كملت تحولت الصدمة الى ابتسامة

قتيبة:- هي هاي السالفة الي ضامته عبالي عندج شي كبير

باوعت اله بعدم تصديق ودموع تجري

غادة:- يعني شنو؟

ببتسامة حنونة

قتيبة:- انا حابج يبنية حتى لو طلعتي يهودية

ببتسامة خجولة

غادة:- واهلك ياشاعر العرب

قتيبة:-انا اقنعهم وبالنهاية هاي حياتي ومحد اله دخل بيها

مشاعر الحب كانت واضحة عليهم

وقتيبة عاطفتة غلبت على عقلة مشت الايام حبهم يوم عن يوم يكبر

كملوا جامعتهم وهنا لازم قتيبة يفاتح اهلة بالموضوع

جمعهم بعد الغداء وهو خايف من رفضهم

يحيى:- خير قتيبة امك تكول رايدنا بموضوع

قتيبة:-يي يابا

عبد القادر:- شسالفتك ولك متعارك

قتيبة:- لا بس شسمه اريد اتزوج

الكل فرح بهل خبر وايدوا على القرار الي اتخذه

بفرح وعيون تلالي بالدموع

ثريا:- ييي يمه يوم المنى الي افرح بيك كلي تريد غريبة كريية تدور مواصفات

قتيبة:-لا يمه انا مختار وحدة اريد بس تمشون وتخطبوها

يحيى:- ومنيه هاي بنت منو من يا عمام

تغير لون وجه

قتيبة:-هسه راح احجيلكم السالفة بس الي اريدة منكم تهدئون وتفهموني

يحيى:- يي سولف كلنا نسمعك

قتيبة:-البنية الي اريدها يتيمه

ثريا:- ياعيني خطية ي شكو بيها نخطبها من عمامها لو من خوالها

يحيى:- صحيح حجي امك

قتيبة:- ماعدها لا عمام ولا خوال

عبدالقادر:-ادري حزورة خو ما حزورة دحجي وفضنا

دنگ راسه وتكلم بتردد

قتيبة:- البنية من دور الايتام

رفع نضرة على ابو الي يباوع اله بملامح جامدة

يحيى:- عود تحجي صدك لو تشاقة؟

قتيبة:- لا والله يابا دا احجي الصدك

لطمت على وجهها

ثريا:-يمه تريد تجيبلي بنت حرام لبيتي

صرخ على كلمة امة الي زرفت گلبه

قتيبة:- مو بنت حراام يمه لاتحچين هيج

ثريا:- خوش والله وتصرخ بوجهي عفيه عليك يبن بطني

كام وباس راس امة باعصاب تلفانه ومنهارة

قتيبة:- اسف يمه مو قصدي والله بس كلمتج صعبه

يحيى:-والمطلوب من عدنا هسه شنو

قتيبة:- تخطبوها الي

ضحك بستهزاء

يحيى:-ومنين نخطبها من مديرة الدار؟؟

كتم اعصابة

قتيبة:-خطبوها من عندي انا لنفسي

يحيى:- الله يهديك ابني

حجى هيج وكام راد يدخل للغرفة

قتيبة:- يابا لتخليني هيج گول شي؟

يحيى:- انساها وليدي وانا من باجر اخلي امك تدور الك على بنيه اذا مستقتل على الزواج

قتيبة:- بس انا اريدها هي!!

باوع اله بنضرة تحدي

يحيى:- نجوم السماء اقرب الك

گال هيج ودخل للغرفة تقربت ثريا تكرص بكتفة وكاتمة صوتها

ثريا:- لك انت تخبلت اكو عاقل يذب نفسه بهل بلوى

تكلم بغصة وعيون مليانه دموع

قتيبة:- احبها يمه

ثريا:- انساها ولاتغضب ابوك يبعد امك

قتيبة:-ترا غصب اهلة واخذج؟ لو حلال عليكم وحرام علينا

كال هل كلمات وطلع وقلبه يحترق مثل النار التي تشتعل في الظلام مشاعره تذوب مثل الثلج الذي يذوب تحت الشمس

أحبها أكثر من أي شيء في هذا العالم لكن أهله يرفضون حبه لها

يشعر بالعذاب مثل الطائر الذي يريد الطيران

لكن أجنحته مقيدة بالسلاسل

يشعر بالحزن مثل البحر الذي يغمره الأمواج

لكن لا يستطيع أن يعبّر عن مشاعره

اهله يريدون منه أن يتناسى حبه لها

لكن كيف يمكنه أن ينسى ضحكتها وجهها كييف؟

أهله يريدون منه أن يختار بين حبه لها وبينهم

لكن كيف يمكنه أن يختار بين القلب والروح؟

يتجول في الشوارع يشعر بالضياع مثل الطفل الذي يفقد طريقه

لكن لا يستطيع أن يجد طريق إلى الزواج بها

يشعر باليأس مثل الشخص الذي يفقد الأمل

لكن لا يستطيع أن يفقد الأمل في حبه لها”

رن جهازة باوع الاسم غدوش غمض عينه حاير شيجاوب لو شنو يكول الها فتح الخط واجى صوت شهكاتها

غادة:- رفضو مو كتلك قتيبة كتلك لانتعلق ببعض تالينا نخسر

قتيبة:- راح احاول واحاول ولو انت لو مااتزوج انا نطيتج وعد واكون مو رجال اذا خلفت بي

وبقى قتيبة يحاول وي اهله وبكل مرة تنتهي السالفة بمشكلة وعركة جبيرة

الى ما بيوم قرر ان يتزوج ويخليهم امام الامر الواقع

اتصل بيها وهو واكف بالسيارة يم بابها

قتيبة:-غادة جيبي مستمسكاتج وتعاي

غادة:- شكو طيبة شلك بيها

قتيبة:- راح نتزوج اليوم واخليهم امام الامر الواقع

غادة:- موهيج قتيبة مو هيج

صرخ بيها بنفاذ صبر

قتيبة:- عندج عشر دقايق اذا ماطلعتي عتبري كلشي بيناتنا أنتهى

سد الخط بوجها وبقى ينتظر يباوع للباب وعينه على الساعة مرت 8 دقائق وطلعت عيونها حمر اجت ركبت

غادة:-راح تخسر اهلك هيج!

باوع الها بوجه تعبان

قتيبة:-مستعد اخسر الدنيا لخاطر عيونج

غادة:-واذا خيروك مابيني وبينهم

قتيبة:- اختارج مثل ما ابوي اختار امي

رجفت شفايفها ونزلت دموعها

غادة:-وعد؟

شغل السيارة وخابر على اصدقائة

وانطلق البيت الشيخ لكى الولد ينتظروه نزل هو وغادة الي لابسه لبس محتشم بعد ماقتيبة تكلم الها عن الحجاب وحبته ولبسته عن قناعة مو خوف من قتيبة لا حب بالدين والحجاب

دخلو للشيخ ماهي الا دقائق وتم العقد وصارت غادة مرته شرعاً

طلعوا والفرحة مو واسعتهم

قتيبة:-امشي نروح لاهلي

غادة:-لا حباب خلي نعيش اليوم مثلم انتمنى احنى وبعدها باجر نبلغهم حباب لتخليها بنفسي

ابتسم وهز راسه وانطلقوا للسوك وشترى الها حلقة

وركبو بالسيارة

قتيبة:- جيبي ايدج خل البسها الج

غادة:- لا مو هسه

قتيبة:- لعد شوكت

لمعت عيونها بفرح وحزن

غادة:- وديني للبيت حلمي البس فستان ابيض انا ضامة الفستان ومجهزتة لهل يوم

باوع الها بعيون كلها حب

قتيبة:- وعد الج الا اسويلج احلا عرس واخلي العراق كلة يسولف بي

غادة:- عود خوش يالله وديني

قتيبة:- تمام راح اوديج واروح للبيت اخذ كم قطعة ملابس وابلغهم راح اسافر وي صاحبي وراها اجيج ونروح ناجر فندق

حجت بخوف

غادة:- بس احنا ماتفقنا هيج

قتيبة:- ماتثقين بيه؟

غادة:- لو مااثق بيك ماكان خليتك تعقد عليه

قتيبة:-لعد هاي هي خل نعيش مثل مااحنا نتمنى

هزت راسها وايدت كلامها وصلها للبيت ورجع لبيتهم جهزو انفسهم ثنينهم كل شخص بيهم جنطة طلع بعد مابلغ اهله

اتصل بيها وهو كلبة يدك بحب

قتيبة:- حبيبتي راح اجي كملت

غادة:- يروحي انا باالصالون

قتيبة:- صالون ايش كلبي تخبلين بكل حالاتج

غادة:- كتلك انا محضرة لهل يوم وحتى لو كنا وحدنا مراح اخلي فرحتي تروح انتظرني ساعة واكون جاهزة

قتيبة:-خوش لعد انا راح اروح احجز فندق وهم اشوف الي مصورة حتى نوثق لحضاتنا شرايج

غادة:- عاشت ايدك حبيبي

وبس سد الجهاز انطلق للفندق حجز على عقد السيد وراح يفتر وأخيراً لكى مصورة حجز يمها خطرت اله فكرة شهو بس غادة تكشخ هو هم لازم يكشخ؟! راح لمحل صاحبة وحجز قاط واخذة وراح للحلاق حلق وصفف اله شعرة بطريقة حلوة ورجع للفندق بدل باوع لنفسة بالمراية ببتسامة

قتيبة:-خل نشوف منو احلة ياغادة افندي

باوع للساعة صار اله ساعتين من حاجاها غم كصته

واتصل بيها

قتيبة:- لج هاا صار الج بدال الساعة ساعتين شو ماتصلتي

غادة:- كلت اخلي هو يتصل يمكن غير رأيه

قتيبة:- اووف منج اوف راح اجيج هسه ترا

غادة:- وانا انتظرك يروحها الغادة الحجي والحجية يردون يسلمون عليك

سد الجهاز وطلع من الفندق ركب السيارة ونطلق نص الطريق اجت ببالة فكرة يشتري ورد وقف امام محل ورد ونزل

قتيبة:- السلام عليكم

الموضف:-وعليكم السلام تفضل شنو طلبك

قتيبة:- اريد بوكي ورد

الموضف:-عندك حجز

قتيبة:- لا والله

الموضف:-زين شنو المناسبة

قتيبة:- زواج بس مستعجل كلش

الموضف:- اها بالخير عندي بوكي جماعته لاغين الطلب اذا تحب اشوفة الك

قتيبة:- يي يالله بس ليش لاغين اطلب

الموضف:- والله مادري انت تعرف بالنسوان من يردن يلغن الطلب يطلعن حجج هل مرة موتن العروس ههههه

قتيبة:-دخيلك ربي هههه

جاب اله البوكي كان مرتب وحلو اشترا واخذو وطلع شغل السيارة وانطلق وهو مسلطن وي الاغاني الى ان وصل للبيت نزل شايل بوكي الورد واناقته طاغية رن الجرص نفتح الباب بسرعة والشخص الي فتحه خاتل ورى الباب عرفها هيه بسرعة دخل وسد الباب

رفع نضرة الها كانت كاشخة بفستان ابيض بسيط ومخلية على راسها وشاح ابيض تقدم بهدوء ورفع راسها وهاي اول مرة يلمسها بيها تلاقت عيونهم سوى ابتسم وعينه دمعت باس راسها وايدة بعدها على خدها

قتيبة:-تدرين المتنبي شكال

همست بخجل

غادة:- شكال

بعد كذلتها وخلاها ورى اذنها

قتيبة:- قال :

لا السّيفُ يفعلُ بي ما انتِ فاعلةٌ

ولا لقاءُ عدوٌى مثلَ َ لُقياك.

لو باتَ سهمٌ منَ الاعداءِ في كبِِدي ..

ما نالَ منٌي مانالَتْهُ عيناكِ…

نزلت راسها بخجل ورغم المكياج خدودها وردن

قتيبة:-رفعي راسج خل اشوف ربي من شنو خالقج من طين لو من غيم شهل ترافه بويه

سحبت بوكي الورد منه

غادة:-كافي عاد وامشي سلم عليهم

قتيبة:-ي نسلم ليش لا

خلى ايدة على ضهرها ومشو سوى دخلوا للهول كانو شياب ثنين كاعدين سلم عليهم ووصوه على غادة وامنو عليها واخذت جنطتها وطلعت انطلقوا للمصورة واخذوا كم لقطة وبعدها توجهوا للفندق اول ماوصلوا لزم ايدها ونزلوا

قتيبة:- خل اصعدج وبعدين انزل اجيبهن

صعدو للغرفة الي اول مافتح الباب بان الورد باوعت اله بصدمة

غادة:-هاي شنوو

قتيبة:- الورد للورد ياوردة عمري

دخلت وهي تمشي على الورد والشموع المعطرة واجواء تجنن

كان اكو ميز نهاية الممر بي كيك وسوالف ويمه حلقات

قتيبة:- اوكفي وذبي الوشاح خل اخذ الج كم لقطة

غادة:- يي صورني يكولون الصور بيد النحبهم تطلع حلوة

خذوا كم لقطة خلدوها لتبقى ذكرى ضن منهم انها ذكرى سعيدة عاشو اجمل ايام حياتهم بحب وود من دون علم احد

من بعد اسبوع اجى الى اهله بكل قوة حسبالة انتصر وضن ان الحب هو اقوى من كل شي بس مع الاسف طلع الحب مو كلشي

وخضع لرغبة اهله شاء ام أبى

الكل طلع يباوع اله وهو حاضنها على كلبة ودموعة تجري

قتيبة:- غاااادة غاااادة كووومي ماتتفقنا هيييج غاااادة المن عفتيني

تقرب العم يحيى بصدمة حاول يلزم ابنه الي صرخ بي

قتيبة:-ابعدددددد لاتلزززززمني وخرررررر كله منك كله منك الله لايسامحك راااحت وهي زعلانة منييي وخررررر دخيلك يالله صبررررك

وانتهت قصة غادة وقتيبة التي لم تكتمل

هل غضب الوالدين؟ أم القدر؟ أم ماذا؟

لا ندري، ولكن نعلم أن حبيبته رحلت

تركته وحيداً في هذا العالم

تركته بقلب مكسور وروح حزينة

لكن حتى في الموت، حبيبته لا تزال حية

في قلبه وفي ذاكرته وفي كل مكان

سيحملها معه إلى الأبد

وسيبقى يحبها حتى آخر نفس في جسده”

“كانت غادة مثل وردة تفتح في الربيع

مليئة بالحياة والجمال والرحيق

لكن قبل أن تكتمل قصة حبهم

توفيت وهي لا تزال في ريحان الشباب

رحلت وتركت اثر في قلوب الجميع

خطت النهاية قبل البداية وها قد سقطت اولى اوراق الخريف من روايتنا وانتهت اول قصة لكن مذا عن الباقي ما مصيرهم وماذا ينتضرهم

____________________________

الى هنا ونختم البارت

الثالث والعشرين من هنا