رواية سر خلف النقاب الفصل الخامس عشر 15 بقلم هدوء آل محمد

وجعًا شــــديدًا هُنا

في مُنتصف صدري اريد ان اموت فقط لم اعد احتمل كل هذه الكمية من الظلم

.

.

______________________________________________

صرت اركض وادور مثل لمخبلة طلعت بالشارع ماكو فص ملح وذاب حني الخوف اباوع بالزواية ودموعي تجري ماكو

_شاااامل وينك شااامل

ايد تسحب بيه

ثريا:-وچ يمه بس اصبري وين طلعتي وخليتي هذاك مفرفح

عتيت ايدي من ايديها ادور علي عسى ولعل الگاه سمعت صوت بچي من الزاوية الي يم بيت جيرانه ركضت وكلي امل عسى ان الگاه هناك وفعلاً متكور على نفسه مثل الطفل ويبچي

قرفصت گدامة وانا حيلي مهدوم ماضل صبر ولا ضل بيه حيل اتحمل هبطات لزمت ايدي

_ليش هيج شامل ليش؟

رفع عينه الي والدموع مبلله وجهه

شامل:-معليه انا معليه ماكتلت احد هم هم الي كتلوهم

هزيت راسي اجاري

_ يي منو هم

تقرب مني يتلفت خايف وشاورني

شامل:- بهلول بهلول كتلهم واخذهم بعييييد

شهگت ورفعت ايدي امسح بدموعة

_يي خل يولي بهلول

شهگ ومن وسط شهكاته

شامل:- انا احبها لمهجة انا ماكتلتها

_ يي يروحي ماكتلتها هي ماتت يالله گوم وياي

كومته وسندته وانا احتاج من يسندني رجعني نمشي واشوف قدوري مفرفح يتلفت بالكرسي ويمه خالة ثريا من سمعوا خطواتنا لتفت الي وصرخوا

ثريا:- يايمه هو هيچ گالوها وين ختفيتي

عبد القادر:- وييين ختفيتي وييين لهل درجة مو مهم بنضرج عفتيني وطلعتي

فزيت من نبرة صوته الي نرفزتني

_رحت اتونس واشرب جاي براس الفرع وي ولد المنطقة

حجيت هيج شو هذا تخبل

عبد القادر:- دشوف يربي دشووف الصلافة

_والله اشك مو شامل الشاخط انت

حجيت هيج وصرت بضهر شامل لان نزع نعالة يريد يصوبة باتجاهي اباوع على شامل الي خربان ضحك بتسمت

عبد القادر:- طبييي جوى عااااد مو صرتي فرجة لامة محمد بدشداشتج يالنمرة

باوعت على روحي كنت لابسه دشداشة جلد النمر

دخلت للبيت واسمع يدردم مادري شيحجي تقى وتقوى يباوعون من فتحتة الباب مثل لبزازين

تقوى:- عزااا بعينج شلون هيج مديتي لسانج

امسح بقاية دموعي

_ شيسوي قابل هو رجال وانا مرة؟ بيا حال وابو الغيرة العراقية يطلع بطولاته هسه ابو ابوية مسموط

فزيت على ححايته والله جبانة بس عيني گوية

عبد القادر:-ولج گضي لسانج يالنمرة لو ابتلي بيج

_ ماگضة يا ابو الغيرة وشتريد تسوي سوي ابن عمي على عيني وراسي بس مو مالت تتحكم بيه

تقرب بكرسية اعترف انا حيوانة ولساني فالت بس جبانة والله صار قريب اشر الي بيدة

عبد القادر:-قربي

تقربت وعيني بعينه

_ تقربت تريد تضرب اضرب ماخاف غير من الي خلقني

همس بصوت ناصي وببتسامة

عبد القادر:- نجرة مريتي

بهت وجهي وكفت عدل وكلبي يلعب شناو يا شبي هذا شو مصدگ نفسه ردت اجاوبة بس سكتت خاف اكسر بخاطرة بلعتها ودخلت للبيت ادور فوني وين يالله لگيته جوة المخدة اتصلت مباشرتاً بسراج يرن يرن وقريب لاتنتهي المكالمة جاوب

سراج:-هاا شتريدين

_اسلم عليك بربك هذا هم سؤال الرجال شلونه جلط لو مات

سراج:- ولج صلفة انطي مجال شبيج

_والله ياجنس ادم انتم تجلطون فضها بروح ابوك

سراج:- زين بس سكر رتفع شوي ونجي

_ ياا خطية والله باجر يكوم يعبي گواني من ورا مصايبنة

سراج:- گواني شنو

ماسمع بس الطوط طوط يا شبي هذا

رحت ادور على شامل لگيته بالمرجوحة وابو الغيرة يمه ولبنات وخالة ماكو يمكن رجعوا لبيتهم وخلوني ويه هذا وحدنا؟!

ردت ارجع صاح بهدوء

عبد القادر:- يالنمرة

باوعت اله

_ ها ابو الغيرة

عبدالقادر:-وحق رب الكعبة صلفة

كتفت ايدي

_منكم نتعلم احجي شتريد

عبد القادر:-خابرتهم گالو شوي ونجي

_خبرك قديم ادري

عبد القادر:- ادبسز احترمي

عبدالقادر:-تعاي گعدي يم اخوج

گعدت وسندت راسي على الحديدة اباوع للسماء

احرك بحركات خفيفة

عد وانا اعد ونشوف ياهو اكثر هموم

من عمري سبع سنين وكليبي مهموم

راحو ويلي راحو بعد ماردو احبابي

راحو ويلي راحو بعد ما ردو احبابي

دموعي تنزل سكته اباوع على شامل غفيان

عبد القادر:- صوتج يخزي تدرين

رفعت راسي مسحت دموعي

_محد طلب رايك

عبد القادر:- مو شرط تطلبين رأيي انا احب افرضة ها ها ها

_شهل ضحكة شبيك شو ليوم طابگات عندك

عبد القادر:- من عاشر القوم

_ي والله صحيح عاشرتك وتخبلت

عبد القادر:- النمرة

على مناگرتنا نفتح الباب فزيت گبل دخلوا قتيبة وسراج ساندين نوفل الي عيونة براسه مبين

نوفل:- يموعودين مابيه شي بس هدوني اعرف امشي

يحيى:- يا ما بيك شي هو منو الي راد ينجلط

دخلو للديوان وگعد

نوفل:- شامل وين؟؟

_ غفى على المرجوحة

باوعلي بتعب

نوفل:-صيحي

_خليها على باجر ترا والله اكلت هبطة من تسوى عمري

كلهم تسالو شصار نط قدوري

عبد القادر:- الولد شرد والمحروسة طلعت تدورة ونفتر بدشداشتها

_ غاثتك الدشداشة دلل باجر البس احمر

شال المخدة وهبدني بيها

يحيى:- هوووش شبيكم صدك جذب جهال بيا حال احنا

_ عمي گول لابنك احنا بيا حال

عبد القادر:- يابه گول لبنت اخوك خل تسكت لو اسكتها بطريقتي

_ شنو طريقتك بالله علمني بلكي اسكتك بيها

عبد القادر:- والله اكون ممنون لو الناس كلها تسكت بطريقتي جان الدنيا بخير

يحيى:- وتالييي

تكلم بتعب

نوفل:- هاي عود انت لجبير؟

قتيبة:- زعاطيط

يحيى:- انت هم نچب

قتيبة:- هسه ماگدرت الهم فتريت عليه

نوفل:- هاي شبيكم يمعودين

سراج:- رونق روحي گعدي

شهكت وسالت دموعي

_ والله خطية عوفو على باجر مشفتو حالة من لكيته خاتل ويبجي لخاطري على باجر

فرك وجهه

نوفل:-استغفر الله بس كعدي ونومو بلغرفة

هزيت راسي امسح بدموعي طلعت لگيتة بعدة على نومته

گعدته ودخلته للغرفة مددته بفراشه وغطيته كعدت يمه العب بشعرة والدموع تجري شلال الى ان تاكدت منه نام طفيت الضوة خليت شي خفيف طلعت وقفلت لباب

لگيت لولد رايحين بس عمي بالبيت من شافني كبل حجه

يحيى:- بنيتي ماعليج امر جيبي النا فراشات نتمدد

هزيت راسي

_دلل عمو

يحيى:- ربي يبارك بيج

جبت الفراش ونطيته لسراج اشرته من يكمل يجي

دخلت للمطبخ شوي واجى

سراج:- ها شتريدين

_شراح تسوي على امك

جر حسرة

سراج:- نوفل مُصر ان نروح باجر

_ يا وين يروح هو بي حيل يتحرك

سراج:-والله مايتناقش حاولت احاجي بس رزلني

سراج:- نجبي رونق واسلوبج حسني شوي

_ والله هاي اني عاد لي يعيل بيه امسح بي الگاع

سراج:- ايبااااه ما مسحتي بعمامج الكاع ذيج الفترة

عدلت وكفتي

_ ذيج وحد وهسه وحدة

سراج:- دمشي امشي نامي والله كل فايدة مابيج بس لسان

اخذ بطل الماي وكلاصات وراح وانا طفطفت الاظوية چني شايب ورحت تمددت بغرفتي هو بيتنا ثلاث غرف ديوانية وهول ومطبخ والصحيات داخلي وخارجي بس كلها احجامها وسط مو كبيرة

وسط هوسه افكاري دخلت بنوم عميق متعب مافزيت الا على سراج يهز بيه عقدت حاجبي من الضوء

سراج:- ادري ميته خو ما ميته

_ استغفرالله حتى بنومتي لاحكني شبيك

سراج:- كومي سويلنا ريوگ وحضريلي كم لبسة

_ حسبي الله ونعم الوكيل

سراج:- تتحسبين علينا امداج

_لا شعليكم انتم اتحسب على عمامك التحف

سراج:- اذا هيج حسبي الله ونعم الوكيل

حجاها بضحكة وطلع كمت غسلت ولفيت شالي

وطلعت حضرت الهم الريوگ خليته بالمطبخ وصحتهم رن الجرص

سراج:- روحي فتحي هذا لو قتيبة لو عبد

هزيت راسي وطلعت فتحته باوعلي بتك عين

عبد القادر:- صباح الخير

_ شو من ورى خشمك

عبد القادر:- شبيج تريدين تعاركين؟

حجيتها وفتحت الباب دخل وهطرته

يحيى:- اخوك وين

عبد القادر:-گال اتريگ ببيتنا لاتسمموني

رحت لغرفة شامل لكيته گاعد اخذته دخل للحمام وبقيت انتظر كمل وغسلت اله وجبته يمهم نوفل او ماشافة

نوفل:- تعال يمي حبيبي تعال هنا

كعدته على الكرسي

سوى اله نوفل لفه ونطاها اله يباوع اله بحسرة

نوفل:- سراج اول مانرجع گبل تودي لطبيب

سراج:- ان شاءالله

نوفل:- يالله انا اترخص

يحيى:- بعدك ما اكلت شي

نوفل:- لا الحمدالله وراي طريق هم احضر غراضي ان شاءالله ورى العصر انا هنا

يحيى:- خوش ترى راح قتيبة يجي وياك

يحيى:-طريق بالساعتين لايصير عندك ارتفاع على الاقل واحد وياك

نوفل:- خير ان شاء الله

شوي واجى قتيبة وطلعوا مر الوكت بين الشغل وركض بالبيت الى العصر كلع سراج من الغرفة لابس بنطرون وقميص وبيدة جنطة صغيرة وجنطة مالت سفر باوعلي وحجى ببتسامة تعب

سراج:- ديري بالج على نفسج وعلى البيت بغيابي ادري بيج ذيبة اشوف سالفة امج ونجي يومين مانطول

_ليضل بالك بيت عمك هنا هم روح وانت مطمئن

سراج:- خير ان شاءالله

صوت هورن برى طلع سراج وانا اباوع من الشباك

فتح الباب ودخل السيارة نزل منها كاشخ بالاسود فتح الصندوق ونزل الجنطة وهم بيدة جنطة صغيرة

نوفل:- ها نتوكل

طلعو وسدو الباب وراهم

.

.

.

في طريق المطار يجر حسرات وهموم الدنيا ثقلانة على گلبه بعمر 17 شال مسؤولية عائلة كاملة وهو ربعة اكبر همهم يشترون جهاز جديد او ملابس جديدة اما هو همه شلون يسند خواته ويسعدهم

قاطع صفنته

قتيبة:- موكافي تجر حسرات راح تطيرنا

نوفل:- جاي احجي وسبقتني شبيك ابني عليمن هل حسرات مصيرها الدنيا تگضي

سراج:- الحچي سهل بس الفعل صعب

نوفل:- ماكتلك لاتنقهر ولاكتلك انسى بس هالله هالله بنفسك

قتيبة:-باع منو يحجي ولا عبالك راد ينجلط لبارحة

نوفل:-شامل ميحجي هيج منا والطريق اكو شي ولازم اعرفة

قتيبة:- عود من تعرف كول الي

من بعد نقاشات ومجادلات وصلو المطار ودعهم قتيبة ورجع للبيت وسراج ونوفل ركبم الطيارة واقلعوا الى بلد اخر

من بعد رحلة دامت اكثر من خمس ساعات

هبطت الطيارة رفع سراج جهازة واتصل ورجع يباوع يدور بالوجوه

نوفل:- ها وينك؟ ييي يالله خوش شفتك

سراج:-منو هذا؟

نوفل:-صاحبي كلفته يبقى ويه امك على ما نوصل

دنك سراج خجلان

سراج:- افضالك كثرن

وصل والولد وتسالموا وركبوا بالسيارة

خليل:- وين للفندق لو للمستشفى

نوفل:-بوجهك للمستشفى

سراج:- شلونها هي؟؟

برتباك

خليل:-والله هاا نوصل وانت تطمن عليها

عرف سراج ان اكو كارثة… وصلوا للمستشفى ونزلوا

وبوجههم للغرفة سراج اول مارفع عينه نصدم

الوجه عبارة عن خارطة من الكدمات

وايدها مصبوبة

سراج:- هااي شصاير بيج؟؟؟

شهكت تبجي وتتحسب

كواكب:- يمه مايخاف من الله دمرني حسبي الله ونعم الوكيل

حجه بستهزاء

نوفل:- مفصخج تفصيخ والله بي حيل

سراج:- شكو شصاير خويه نوفل انت تدري بششي

باوع نوفل لكواكب الي دنكت راسها متفشلة

نوفل:- مع الاسف والله هذا ابنج بس هيج اگول

تتنقل نضراته بين امة ونوفل

سراج:- فهموني شصايرررر

نوفل:-اكعد انا اگلك شصاير

سراج:-گول گعددت

نوفل:- امك استغفرالله يربي عدها علاقة بهل شويب من قبل لا يتوفى ابوك

گام سراج وصرخ يريد يتقدم الامة

سراج:- شدااا تحجيييي لججج الكلام صدك احجييي بطلييي دموع التماسيح

لزمة يحاول يهدي

نوفل:-أهدأ لك شجاك بس أهدأ

سراج:-شهدااااا حط حااالك بمكاااني شهدااا بس فهمنييي

يحاول يهد عليها وهو لازم بي

نوفل:- شتعل جد جدك ولك بس انطي مجاال

كعدة غصب ماعنه وگعد يمه

نوفل:- اعررف مو سهل عليك بس اسمع للاخر

هز راسه

سراج:- كمل خل اشوف كمل

نوفل:- المسعد عريس الغفلة طلع تاجر اعضاء بشريه وامك الفهيمة رادت تروح بالرجلين ويبيعوها تفصيخ مثل سيارة خربانه المهم مهزومة منهم بعد ماكلت دك كتل ومنين حابت الرقم ماعرف وصلتلي وهاي احنا هنا

نزلت دموعة ودنگ راسه بكسرة

سراج:- حلو الله يسود وجهج كواكب هاي سوالف مراهقة ماتسويها مو عجيز هيج بايعتها وخاينه حتى ابوي ليش هيج

تشهك وتبجي وسنونها واكعة الامامية

كواكب:-سامحني يمه سامحني

سراج:- على شنو لو شنو اسامحج؟!؟ على كسرة تنسيم لو على مووتت همام بحسرته لو على ضياعنه لو على شنووووو

سراج:- لااااتكولين يمه لاتحجيييها هل كلمة اقدس من انو بشر مثلج ينطقهاا سمعيني زين راح اخذج وياي واذبج على اهلج فتهمتي تحلمين توصلين بيتي لان عندي بنيه واخاف على سمعتها ولاتروح تتعلم على السوالف المكسرة منج

حجى هل كلمات وطلع من الغرفة باوع نوفل على كواكب

نوفل:- شتسوالج هسه چان ستحيتي على شيباتج الواحد ميدري شيحجي ماگول غير طيح الله حضج يي والله

طلع يدور على سراج لگى گاعد بالممرات ومدنگ راسه وبس دموع تجري گعد يمه يطبطب على كتفه

نوفل:-تبچي امداك ولك هاي ماتسوى اضحك عليها مو نوب ابجي

سراج:- شحجي للناس شكول امي مصاحبة

نوفل:- هي صدك سالفتها متسولف ولو هاي امي والله احط راسها جو تريلة واضل افعص بيها الى ان يبرد گلبي

سرااج:- شسوي مادري شور عليه

نوفل:- ششور گبور تلفها ماتتركع والله تدري شنو انا احمد الله مامفصخيها وموزعين اعضائها على المرضى كان هسه كم بريئ نگلب بريج من وراها

باوع سراج علي بتعب

سراج:- ماعندك Break ؟!

حك حاجبه بفشلة… وبعدها تكلم بقهر

نوفل:- الصراحة متشمت بمك لا تباوع الي هيج

امك اذته لهمام لك يجيني ايام اشوف طبعات بضهرة اكله عوفهم يكلي وتسنيم؟ لك گبل لاتصيرون انتم روحة معلگة بيها لك والله حترگت حرگ من زوجها عمك السگط لهل شايب بس لعبوها صح

ولاعبالك ساكت عمامك انا ناويلهم نيه گشرة هم وخالك السگط والله الا اخليهم يبچون ويتولولون مثل النسوان ماتسمى نوفل وانا اخوك يهمام الا افرحك بترابك واطيح حظهم شواربي ازينهن بالقندرة واطلع معتب اذا ماطلعت حگ كل حسرة وقهرة وتنهيدة الك ياهمام من عيونهم

كمل كلام وضرب على كتف سراج

نوفل:- وهسه گوم نشوف هذا الدكتور شيكول على امك گوم ولاتفكر دام انا بضهرك نام رغد وانا گد الوعد

سراج:- مشكور خويه ماتقصر

نوفل:- كوم گوم ولا كل سالفة ودگيت اليتيمة وگمت تولول مثل ام زگي صير رجال حوك

خلى ايدة على كتفه واخذه للدكتور وگدر يطلعها على مسؤليته اخذوها وراحوا للفندق ولاواحد يحچي وياها نكرة لامحل لها من المحبة ولا الرحمة

وگدر يلگى حجز وسوو الها جواز مؤقت وعرضوا حالتها على السفارة لذالك تسهلت امورها

وثاني يوم ركبوا الطيارة ورجعوا ونفذ سراج وعدة على حدود المحافظة اتصل بخالد واجى يركض

واحد شبك الثاني

خالد:-يمه مريتي يمه

سراج:- مشتاقلك حيوووان

خالد:- ولك خرب شرفي اذا ماشيلت اهلي واجيتكم

نوفل:- شطلعت هاي

خالد:- ليشش بس لا مترضى استاذ رفل

نوفل:-رفل الله يطيح حضك ولك منين سامعها

خالد:- من فد وحدة الله يفك اسرها بيد اليهود

ابتسم بقهر

سراج:- ماتعرف شي عن اخبارها

خالد:- مستقرة ببيت بوحدها وسمعت هم حامل

تلاشت ابتسامته

سراج:- شنوو حامل؟؟

خالد:- يي مرة متزوجة طبيعي تحبل شتريدها تبيض!!

نوفل:- طيح الله حضك اخبارك خايسه مثل وجهك

سراج:- يالملگوف نسيتني شأريد اكول اخذ كواكب

وديها لهلها

خالد:- ياكواكب؟

سراج:- الي خلفتني

خالد:- هي مو تزوجت

نوفل:- ابشرك تطلگت

خالد:- هلهلي ينشراح

نوفل:- منو هي انشراح؟؟

نوفل:- طاح حضك وحضي لي خلاني اوگف وي مزعطة

خالد:- وانا اكول ليش كال اجر سيارة ولاتجيني بماطورك المهتلف

نزلها من السيارة ومشاها للسيارة الي مأجريها لكن بدون ان يباوع بوجها وكف يم السيارة وباوع الها

سراج:- سمعيني زين تعاملت باصلي وكفيت ووفيت اذا بيووم بعد اتصلتي بيه او بنوفل مراح تشوفين خير

كواكب:- لهل درجة حااقد عليه؟؟

سراج:- والج عين تحجين وتعاتبين انا لو بمكانج اطم روحي بالحياة

توكلي وانسينا فهمتيييي انسينااااا

عافها ومشى ركب بالسيارة الاجرة الثانية ونطلقوا الى البيت وطول الطريق صافن ويجر حسرات اخر شي ماتحمل طلع باكيت الجگاير الي من سافة نوفل سحبة منه منصدم

نوفل:- شنييي هاي تدخن بعدگ بطول القلم ملعون الصفحة

سحب الباكيت بتعب

سراج:- خويه ولي يرحم عزازي وعزازك عوفني

هز راسه بوعيد

نوفل:- يصير خير

.

.

خابرني سراج كال راح نوصل فقط هل كلمات طلعنا انا وشامل بالحديقة ننتظر جيتهم هم وامي وبعد نص ساعة صوت السيارة وكفت بالباب شوي ونفتح دخل سراج بوحدة!!!

باوعلي بتعب ممزوج بغضب

سراج:- هل كلمة لاتجيبها على لسانج ولاتجيبين طاري هل مرة بهل بيت مفهوووم

حجى هيج وعافني ودخل من بعد فترة يالحجالي شصار وتخبلت بجي ولطم وفشلة كل هذا يطلع من امي شخلت للمراهقين؟!

ومن صدك نگطعت اخبارها ومرت على السالفة ثلاث اشهر وبهاي الثلاث اشهر اجوي بيت نوفل سكنو يمنا بنفس الفرع وصاروا الولد شلة وحدة الى مابيوم ملتمين كلنا وصدمنا كلام ابو نوفل !!!!

.

.

.

فتحت عيني ولكيت نفسي بالمستشفى لزمت بطني بخوف خايفة لااكون خسرت جنيني الي توي حسيت بي بعدة يي بعدة لو انا دا اتخايل دخلت الممرضة مادري الدكتورة شافتني صاحية بتسمت بوجهي

الممرضة:- الحمدلله على السلامة

تكلمت بتعب وصعوبة

_ ابني بي شي راح مو؟؟

الممرضة:- لا حبيبتي الطفل بخير وانت بخير بس شنو لازم ترتاحين راحة تامة وما تكومين الا للضرورة

نفتح الباب ودخل مشعان ورى زمرد

مشعان:- الحمدلله على السلامة

مشعان:-بخير بخير اطمني

بعد ساعة طلعوني من المستشفى ورجعني للبيت تمددت على ظهري بسريري وبمساعدة زمرد

ممنوع عليه الحركة منعاً باتاً الا للضرورة وبدت معاناتي وي الملل ولازم ابقى نايمة على ظهري ومرت الايام ملل بملل الى مابيوم الصبح ندگ الباب مسعان كان طالع وزمرد بعدها ماجايه

اضطريت ان اگوم وامشي على كيفي بخطوات بطيئة فتحت الباب وندفعت بقوة وكعت گبل على ظهري اريد استوعب الوگعة ماكو نسوان تثنين وحدة لزمت حلكي والثني صارت تظرب على بطني ب

ضربات خلت روحي تشيغ اريد احجي اريد انطق ماكو مستممرة تضرب الى ان اغمى عليه ولمى فتحت الصدمة كنت متمددة بالگاع بغرفتي ويمي اوتي الكوي مالت الملابس ومشعان گاعد يباوعلي بغضب وعتب بس فتحت نطق

مشعان:- ليش ولج ليش يالماتخافين من الله ولج روح هاي روووح شسوتلج وتكتليها

_مو اني والله مو اني مشعان نسوان ثنين هم الي ضربوني

ماسمع مني وجرني من شعري الي توي بدء يطول

وصار يضرب بيه بوحشية مانطاني مجاال ابررر

يضرب ساعة على راسي ساعة على ضهري الدم صاير نزل مني بغزارة

نطقت بصعوبة

_ مشعان راح اموت ارحمني

باوع على حالي وعلى الغرفة الي نترست دم سحبني من ايدي شمر عليه البطانية وشابني وهو يسب وينعل لكحني بالسيارة الي ورى

ونطلق للمستشفى وهو يسب ويلعن بيه وباهلي ماوصلت الا منتهية عيوني بدت تغمض واعيه واسمع كلشي بس مو كادرة افتح اسمع الدكتورة تصرخ بالممرضات

وراها حسيت بغرسة ابرة وراها رجعت العالمي المضلم الي ماستمر هواي ورجعت فتحت بس الغريبة لكيت نفسي بالبيتونة!!! المكان الي اول مرة نحبست بي

نزلت دموعي وضحكت على نفسي مامكتوبلج الراحة صرت اشهگ على الي راح قبل حتى لايشوف النور شذنبة هل طفل الي نقتل قبل حتى لا اشوفة او المسة

اشهك وابچي اباوع على حالي وملابسي الي بيها دم قرفت من نفسي ورحعت ابجي هذا دم ابني يي دم ابني مادري شكد مر وكت اواسي نفسي بدموعي خطوات على الدرج تاذن بوصول احد غمضت عيني وصارت تحجي يم اذني

باسمة:- فتحي اعرفج مو نايمة

فتحت اباوعلها مبتسمة بنصار

باسمة:- شفتي حالج گتلج لاتتحديني تخسرين

سالت دموعي من جديد

_ انتِ الي نزلتي

هزت راسها بفخر

باسمة:- يييي بالانكليزي ونعم بالعربي

حجيت بحسرة گلب وبجي وقهر

_ ماخفتي من الله ولج روح هاي روح مالها ذنب ولج شتكولين الربج شذنب الي ببطني ولج عسى حركت گلبي ماتتعداج ولج روحي عساج بنار ماتطفين منها

احجي وابجي تخطتني ونزلت بكل برود اشهگ وابجي وادعي الدنيا مغرب مبين من الشباك شهكت من كل گلبي

_ الهي وانت جاهي حگي وحركت گلبي ماتتعداج ياباسمة اللهي جعلها تفرفح على روحها مثل مافرفحت على ضناية ساحي ياقيوم برد گلبي

دعواتي من گلبي دعيتها دعوة مظلوم ومحترگ گلبة وكان ابواب السماء كانت مفتوحة بذيج اللحظات ساعتين واجت الاجابة من رب السماء وسمعت صراخها

والبيت كله يصرخ من بينهم صوت ميسون