//
//
وصلت و كان ربيع عالموعد
ربيع >> ان شاء الله خير ؟
رُوح >> سامحني تعبتك معايا بس بنسألك
ربيع >> ولا يهمك
رُوح >> بنعرف علاقتك ب هيثم شنو
ربيع >> هيثم قصدك صاحب القضية؟
روح >> ايوه
ربيع >> شوفي بالنسبه العلي و الصقر بيناتنا معرفة شغل بس ما نعرفهمش اصلا بس صدفت اني نكون ماسك يوم القصة مع علي في نفس الوردية والورديات مش نحن نقسمو مع من بنقعدو الشغل يوزع فينا ، بالنسبه الهيثم اول مره نشوفه كان يوم الي صارت فيه القصة كلها
روح >> تمام
قعدت روح تسآل في ربيع كم سؤال بعدها طلع ربيع وروح طلعت اوراقها وبدت تشتغل ، كملت شغل و ردت للحوش بس وهي راده دوبها درست سيارتها قدام الباب نزلو عوض ومعز من السيارة الي قدامها
معز >> قسمابالله يا محامية لو الجثة طلعت الهيثم حانخليك اتمني الموت انتي وياه
روح مبتسمة ابتسامة مستفزه وتبحت فيهم بعدي بحتت عوض>> وانت ماعندكش حاجه تقولها
عوض>> انا نفعل مانحكيش
روح ببرود>> تهيالي عيب مصبيين بنت فنص الشارع وتحكو معاها قصدي تهددو فيها
عندي مكتب ونستقبل فيه في جميع انواع التهديد كنتو تفضلتو غادي
معز بعصبية من برود روح وقرب منها روح وخرت وخافت
علي جية غسان يجري من ورا معز مسك يده و فصعها له لاوره
غسان بعياط >>اركبي فوق توا
ركبت روح وقلبها يدق وخايفه
عوض >> مش جايين نديرو مشاكل في كلمتين حكيناهن للمحاميه
غسان فك ايد معز ودفه جنب عوض ورفع حاجبه>> مره ثانيه تحكي مع راجل ما تستقوش علي وليه تهيالي مش خصلة رجاله
معز قرب من غسان>> مش انت اللي تعلمنا خصايل الرجاله
غسان >> تي نعلم حتي جدك
كلمة من هنا وكلمه من هنا مسكو في بعضهم جو جماعة الهادي الي كانو يراقبو في روح يحجزو وعوض قعد يفك في معز
غسان يمسح في فمه من الدم >> وديني تهوب من هنا نشرب من دمك
فضو الشباب العركة وركب غسان الروح دق عالباب وماسك يده توجع فيه
روح>> حي عليا ليش المشاكل ليش
غسان>> ماتخافيش ساهله ، مافيش شي شلتت هضوما
روح>> هضا خو هيثم وصاحبه
غسان>> اللي هوا المهم تبي حاجه كلميني وفيه جماعة لوطا شورنا ماتخافيش محد يوصلك
روح>>جماعة من
غسان>> مش شورك غير اطمني بس تسيرلك حاجه صقر يذبحني
روح ابتسمت >> باهي والنبي تعدي للمستشفي تشوف يدك والجرح اللي في فمك خير ما غفران تذبحني انا
غسان ضحك>> ساهل ساهل
طلع غسان من عند روح وما عدش للمستشفي روح للحوش بدون ماحد يفطنله ركب فوق دوش و مسح مكان الدم اللي علي فمه ودار عليه لصقة و كان الالم كله في يده من عند كتفه من فوق اتكي عالسرير ورن علي غفران وقعدو يحكو
غفران>> كنه صوتك تاعب شن فيه
غسان معش تحمل الالم>> يدي توجع فيا
غفران>> كنها ؟؟ بلكي شلت حاجه ثقيله
غسان سكت
غفران>> احكي
غسان>> مافي شي ماتركزيش ، المهم شن كنا نحكو
غفران>> غسان بطل قلب كلام واحكي
غسان >> درت عركه و حصلت ضربه ف كتفي تريحتي
غفران سكتت شويه>> مش حاناقش توا بس عدي للمستشفي
غسان>> الصبح تو نمشي فجر مافيش مستشفيات توا
غفران>> راجي شوي
حطت التلفون وطلعت شافت الحوش وردت>> تعالي توا
غسان يضحك>> وين نجيك ياهبله
غفران>> بتجي ولا شنو
غسان >>بعقلك انتي
غفران>> مش تقولي انتي مراتي و اتهزا عليا لما نقولك نتحشم ولا عليش جاي ؟يبقي تعال
غسان >> شويه وجاي
فتح الدولاب طلع جاكه ثقيله عشان مدوش وحط الطاقيه علي راسه و كان لابس سروال بجامه ومحوتك ما لبس من الالم ،ونزل مشي شور غفرات
غسان>> قدام الحوش انا
غفران>> اوكي
سقمت شكلها عالمرايه عالسريع وطلعت فتحت الباب خش غسان بسرعه وصكر الباب
غسان >> نعنشكلك كيف السراق
غفران رفعت روحها وحولتله الطاقيه من راسه >> مش لو تبطل مشاكل
غسان>> هضا عليش جايبتيني انتي بتهزبي
غفران >> ماتحكيش معايا كذا
غفران حولتله الجاكة
غسان >> اوباااا
غفران مسكت ضحكتها>> اسلح تيشرتك وبلا قلة ادب
غسان>> خليتي فيها ادب
سلح التيشرت و جابت غفران المرهم وقعدت تدهنله في مكان الالم وتمرسله فيه وترفع في روحها عشان غسان طويل وكل شويه ينابش فيها
غفران>> ريح روحك وطبس ماتحاولش معايا راقيلي منك
غسان >> قسمابالله عركه بسيطه
غفران رفعت حاجبها
غسان >> بلا وعاره مش ماشي معاك
غفران>> ماتحكيش معايا لعند توعدني معش ادير مشاكل
غسان برم وخرت غفران خبطت فالساس وفي يدها المرهم
غفران بتوتر >> حول ما تستضعفنيش
غسان >> طالع فصقع ومدوش عشان تقوليلي حول
غفران>> اوعدني باه
غسان>> وراسك انتي حاضر ووعد
غفران ضحكت و غسان طبس عليها
غسان >> نقرب ؟
غفران سكتت ونزلت يديها
غسان ضحك ، وقرب منها
بعد شويه
غفران>> حبيبي عدي خلاص طولت وخايفه خالي ينزل من فوق
غسان>> خليني شويه
غفران>> تطلع من هنا حاترن عليا عدي توا
غسان >> عليك قصة
غفران>> هههههه المرهم حايريحك شوية ويخليك ترقد بس بكرا لازم مستشفي
غسان >> تمام خلاص خشي جوا
غفران>>حط الطاقيه علي راسك صقع
غسان>> حاضر نحبك
غفران >> نموت فيك
عزقلها بوسه طايره وطلع 
//
//
في السجن
انا>> كم مازالك انت
بدر >> اسبوعين
انا >> بعد تطلع بطلع عرس اختك ؟
بدر >> تي عيب ما ندير شي الا بعد تطلع معانا
انا >> ياراجل انا قصتي قصة ماحد يربط روحه بيا
بدر >> مش شورك انت كون في روحك بس
شاهين يخبط علي باب الزنزانه >> غدا يا شباب
بدر >> هيا بنموت جوع
انا نطيت مع السرير الفوقي ونزلت ومشينا شور صالة الغدا
بدر >> لكي فترة علي وجه علاء
انا >> اه مرايف ما نحكيلك
جا وسام نط قعمز حذاهم
بدر >> ياراجل بطل نطيط ازح
انا >> يتنطر هك وهك
وسام >> ماعندي ما ندير
تغدو الشباب و طلعو للساحه
وسام >> بنعدي ندور دخان
انا>> طير ودورلي معاك
وسام >> تم
بدر >> انتو الاثنين شن لمكم علي بعضكم
طلع وسام من الساحه ماشي شور الممر متاع الزنزانات اللي يشيل شور الحمام كان الممر طويل
كان ماشي ومش مركز لعند سمع صوت وشوشه وقف المشيه وسمع طراطيش كلام
علاء>> انا مخلي عيني عليه… اطمن اطمن مافيش شي جديد … انت مش عارف صقر مستحيل يحكي الحد مفتح عليه لعيون بس مش عاطي سره الحد
اغلب الوقت مع بدر والشاب الجديد
خلاص تم تم
سقم وسام مشيته و خطم فطن العلاء يحط فالتلفون في جيبه بحت فيه وخش للحمام وعلاء ما فطنلش
اول ما علاء عدا للدار يشيل فتلفون للعمده طلع وسام يجري شور الساحه وجا لعندنا انا وبدر
انا >> ياراجل اركح
وسام >> نبيك ضروري تعال
بحتنا انا وبدر في بعضنا
انا>> شن فيه ؟؟؟
وسام علاء متمقصدك و حاطك في راسك سمعته يحكي بالتلفون مع حد
وحكاله وسام اللي سمعه
انا بحتت في بدر >> قصدك علاء هو اللي يراقب فيا !!
جيت بنمشي شوره جا بدر مسكني
بدر >> لو يعرفو انك عرفت ماتضمنش شن يسير بلا تهور و اركح خلينا نفكرو في حل
انا >> تي معيله هذي كيف الحركات هذينا
بدر >> صقر اهدا ، وسام كأنك ما شفت شي
وسام >> تم
انا >> بدر اطلقني
بدر >> راجي روح تعرف وتقولك شن ادير
عدا وسام وقعد بدر يقنع فيا اني نهدا وانا بنموت ونكفخ علاء
//
//
مرن يومين و انا حاط علاء في راسي ومتقلده سمعت كلام بدر و مابيتش نفقشله انه وسام سمعه يحكي وسكتت بس ماقدرتش نصبر قعدت انابش فيه لعند تعاركت انا وياه علي سبب تافه
كنك تبحت وهو يقولي مانبحتش و لحمت بيناتنا
بدر ماسكني >> عاجبك هكي
انا نمسح في خشمي من الدم >> خليني عليه بس
بدر >> تي امشي قدامي امشي
جا شاهين و مسكني انا وعلاء شالنا المدير السجن و عرفو اني انا اللي كنت مستقصده و حطوني في انفرادي خمس ايام
خشيت للانفرادي ، مكان مظلم و مصقع و مافيش غير ضي فوق راسي و سرير بسسس و شباك فوق ما نقدرش حتي نشوف منه
//
//
ثاني يوم عند روح ، جت للحبس وعلي اساس موعد زيارة عادي خشت للمكان اللي ديما تجي فيه ولقت شاهين خاش عليها
شاهين>>مافيش زيارة الاسبوع هضا
روح >> ليش ؟
شاهين >> صقر معاقب اسبوع فالانفرادي
روح انصدمت>> ليش ؟؟؟ كيف ما حدش قالي من امتي ؟؟
شاهين >> من امس اليوم ثاني يوم له
روح >> شن دار ؟
شاهين >> مانقدرش نقول مش صلاحياتي
طلعت روح من السجن و رنت علي غسان
روح>> دبر اي واسطه بنشوفه ضروري توا
غسان >> تمام تمام
روح >> توا ياغسان انا مازلت قدام السجن مش متحركه لعند نخش نشوفه ، بنخش نسأل مدير عليش حطوه انفرادي علي ما شفت من عندك
غسان >> خلاص تمام دقايق ونكلمك
خشت روح لمدير السجن و فهمت منه انه متعارك مع علاء بس ماعرفتش شن سبب العركه
طلعت منه و قعدت نراجي في مكالمة غسان ، شويه ورن عليا
غسان >> انتي وين قاعده ؟؟
روح >> في سيارتي قدام الحبس
غسان >> حايجيك واحد توا شرطي اسمه رفيق حا يخششك لصقر بس يا روح ربع ساعه اه وتطلعي ربع ساعه
روح >> تمام
خمس دقايق و جاني الشرطي رفيق
رفيق >> المحاميه روح ؟
روح >> ايوه
رفيق >> تعالي معايا
روح >> تمام
خشيت للسجن و نزلت لوطا لمكان الانفرادي مشينا شويه وخشينا يمين لمكان فيه سجون انفراديه وكان الممر مظلللم بكل
فتحلي رفيق المكان اللي فيه صقر
رفيق >> ماطوليش عشان حايسيرنلي مشاكل
روح >> حاضر
فتحت الباب وخشيت وصكر رفيق علينا
//
//
“صقر”
كنت راقد عالسرير وحاط يدي علي وجي ومغمض عيوني ونفكر ، سمعت صوت الزنزانه انفتح والباب اسكر
حولت يدي من علي وجي وكسرت عيني شور الباب كنت دايخ ومش راقد من ليلة امس نحق في خيال روح ، جت قربت مني و طبست عليا
انا >> روح
روح >> ليش هكي ياصقر ليش
روح>> انت ما تبيش تبطل ياصقر ريحني عليك كل يوم ما نرقدش وانا نفكر فيك بس نبيك تكون بخير ، خلاص هانت موعد الجلسة الاخيره قرب
انا صبيت من السرير وقعمزت>> مش بيدي كل شي يجي قدامي
روح بحتت فيه >> انت مازلت تحساب انك عايش بروحك ؟ ومش هامك حد ؟؟ يا راجل خف و اهدي شويه كل ما بنطلعلك حل تخرب الدنيا
انا >> شن ندير برايك ؟؟ نسمع ونسكت
روح صبت >> اه اسمع واسكت
صبيت من السرير وجيت وراها ونزلت نحكيلها فوذنها ويديا علي كتوفها
انا >> ما نبقش صقر لو سكتت
روح قلبها يدق و محاصره من صقر >> لا حتبقى صقر بسكوتك ولا بكلامك فالحالتين صقر
انا >> قلبك كنه
روح صبت وحولت يديا >> ماكنه شي خلينا فالمهم وبطل تودير مواضيع
اتكت عالساس وربعت يديها
انا >> ماترفعيليش حاجبك هكي يا بطه مش حانخاف راه
روح برمت وجها و تعقدت من برودي
قربت منها ولصقتها فالساس ورفعت راسها تبحت فيا بنظرات بريئه
انا >> لالا ماتدلعيش عليا بعدها تعطيني نظرات براءة
روح >> وانا امتي عمري ادلعت ؟
انا >> حتي رفعت حاجبك تخلي فيا مش علي بعضي يابالك عيونك
روح نزلت راسها >> ممكن تبعد عشان الشرطي ف اي لحظة حا يخش
انا >> مش حايخش
روح >> ديما هكي انت واثق ؟
انا نزلت علي رقبتها >> اه ديما
روح سكتت وجمدت في مكانها
انا >> نكمل ؟
روح>> تعرف يا صقر نلقى علامه علي رقبتي نعزق ملف القضية ونخليك هنا
انا نزلت يديها وبحتت في رقبتها >> بسيطة راه مش معلمه واجد
روح>> حيعلمك
انا نضحك علي شكلها وهي خايفه
روح دفتني >> حول هكي مش طبيعي انت
وصبت تسقم في ايشربها و تلم في اوراقها
انا حسيتها اضايقت جيت شورها ومسكت يدها لفيتها شوري
روح عيونها يدمعن >> حول معش تجي شوري 
انا >> شن فيه بس فهميني
روح >> لعند امتي بتقعد بتلعب بمشاعري ؟ توخر وتقرب امتي ما تبي وانا مسلمه نفسي ؟ انا مش لعبه خليك واضح معايا ولو مره بس
انا بست يدها من جوا >> بدون مانكون واضح انتي عارفه اللي جوا بدون ما نقول ، مانبيش نقول وتقعد عليا كلمه ونجبرك تقعدي معايا بظروفي هذينا
روح >> يعني لو لا قدر الله ما كسبتش القضية معش حانشوفك ؟؟ معش حاتقعد في حياتي
انا >> وانتي راضيه تقعدي في حياتي وانا محبوس ومش عارف امتي حانطلع ؟؟راضيه تجيني زيارة كل بعد اسبوعين مره ؟ لو انتي راضيه هلك بيرضو ؟؟ لو هلك رضو انا مانرضالكش !
روح >> حاتقعد طول عمرك اناني .. حاتكمل القضية وانا اللي نسيبك انا مش انت لو خذيت براءة وان شاء الله حتي مؤبد معش بنشوفك
فكت يدها بالقوه ودقت عالباب فتح رفيق وطلعت روح تجري
//
//
برمت روح ومعش عرفت وين تمشي و دموعها ما وقفنش لقت روحها قدام حوش سارة
سارة فتحت الباب >> روح كنك !!؟
روح>> نحبه انا كلبه
سارة>> خشي خشي بس خشي
خشت روح وقعمزت مع سارة
سارة>> عارفتك كلبه من لما جيتك وحكيتلك فالمكتب بس قلتيلي نعنك ما قعدتي سارة صح 
روح >> كلمة وحده اخرى ونصبي نهبدك بهل شنطة
سارة >> اهدي بس
روح >> قوليلي شن ندير معش نرقد الليل انا والله
سارة >> تعذبو في ارواحكم احكو اللي فقلبو بعضكم
روح >>ما نقدرش مانقدرش كل شي واضح من ناحيتي و ناحيته بس هو مسكرها ليا حاطلي قضيته فالنص
سارة>> هو خايف انه ما يطلعش براءة
روح >> وانا حانراجيه حتي لو نحكم عليه مؤبد
سارة >> روح القضية مش ساهله وانتي عارفه
روح >> عارفه عارفه خلاص بنحول القصة هذي من راسي ونركز فالقضية
سارة >> انتي القضية هذي من اول ما مسكتيها وانتي حياتك عكس
روح>> ساره سكري فمك
سارة >> باهي سكتنا … صبي للمطبخ الغدا عالنار
روح > خليني نعدي انا تو يجي راجلكك
سارة تي تعالي علي اساس برانيه
روح >> باهي تمام
صبت روح مع سارة وخشن للمطبخ
//
//
روحت روح للحوش و رنت عالهادي
روح >> حاندزلك اسم توا ونبيك تعرفلي عليه اي تفصيله
الهادي >> تم
روح >> ضروري يا اليوم يابكرا
الهادي >> اليوم مايسير شي بكرا الصبح نقولك
روح >> تمام
صبت روح عالمرايه تحول في دبشها و شافت لرقبتها ، حطت يدها علي رقبتها و غمضت عيونها
روح >> يارررررب عديها علي خير
دوشت و دارت قهوه وقعمزت تشتغل
//
//
صقر
من بعد ما طلعت روح من عندي وانا مخنوق ، كان خاطري نمسكها خاطري نحكيلها ونفهمها خاطري نقوللها اني مستحيل نسيبك ، بس ما كنتش قادر نقرب ما كنتش قادر نعطيها امل بعدين الظروف يجن ضدي ! انا بروحي مجرب كيف انه يكون حد معاك بعدين يخذلك مجرب كل شي ماقدرتش
صبيت من السرير و خبطت عالباب
رفيق >> شن فيه ؟؟
انا >> دورلي شاهين
رفيق >> تم
كلملي رفيق شاهين
انا >> دخان معاك
شاهين بحت يمين ويسار وطبس تحت الباب مدله سبسي ومعاه ولاعه
انا >> منور
شاهين >> افطن بس ساعه ويغيرو الورديه
انا >> تم
//
//
مرن ايام حبسة صقر فالانفرادي وكانن ايام مايعلمش بيهن الا ربي ، بعد طلع جوه هله زاروه وكانو المره هذي مش خايفين من شي و مصبيين معاه
روح كانت كل شويه تكلم في غسان عشان يكلم رفيق و تطمن علي صقر
الهادي كلم روح وعطاها معلومات علي علاء بس مافيش معلومه واضحه ادل انه علاش في له يد في قضية صقر
//
//
صقر
كنت فالزنزانه ، جا شاهين وقالي في زياره
نزلت وتوقعتها روح ، بس ما شالنيش للمكان لي نتلاقو فيه مع روح ! توقعت انه غسان بما انه اول امس هلي كانو عندي مش معقوله يجو حتي اليوم
طلعت للصاله متاع الزياره ، يديا في جيوبي وندور بعيوني علي غسان بس ما لقيتش غسان !!
لقيت امل ! غمضت عيوني و هذي اخر حاجه كنت نتوقعها تسيرلي فالظروف هذينا
فرصتك الذهبية: السكن المضمون ينتظرك بخطوات سهلة للتسجيل في الدعم السعودي 1446
سعداوي يستقبل رئيس مجلس مستخدمي قطاع التربية – مصربوست
طرق سهلة لضبط تردد قناة سي بي سي سفرة 2025 واستكشاف وصفات طبخ مميزة
تعرف الآن: مواقيت الصلاة في محافظات مصر لليوم الأربعاء 16-4-2025
رواية غنوة يونس الفصل الثاني والعشرون 22 – بقلم سلوى عوض
بث مباشر أرسنال ضد ريال مدريد بجودة عالية HD وبدون تقطيع شاهد الآن
موعد انطلاق الانتقالات الصيفية في إنجلترا تكشفه سكاي رسمياً قريباً
