رواية سجين وروح الفصل الرابع 4 بقلم الكاتبة آية

روح>> ياررررربيييي كلام متكرر كلام معتاددد وواضح انه مش حاكي كل شي كيف النيابة تقبل الاقوال هذينا بس وتاخذ القضية حكم بدون ما اتحرى حتي

مسكت تلفونها ورنت علي غسان

روح>> الو
غسان >> ايوا
روح >> شن صار ؟؟ حكيت مع صاحبك لي قتلي كان يسكن في منطقة صقر
غسان>> حكيتله من قبل وقالي لو عرفت حاجه نقولك ورديت حكيت معاه اخرى قالي ماعرفتش شي لعند توا
روح>> تمام تمام .. بنطلب منك طلب
غسان>> انتي كان خليتيني نمسك معاك القضية وخلاص ؛)
روح>> ماهو كانك جايبلي قضية كيف العالم والناس را ما هضا حالك
غسان>> الله غالب
روح >> المهم نبيك تحكيلي مع باتك يخلي اي حد فالحبس يديرلي واسطة نمشي بكرا الصقر
غسان>> الزيارة بعد ثلاث ايام اصبري
روح>> مانقدرش مع انه المفروض زيارة المحامي غير زيارة الاهل بس حتي القانون عندنا يلبزو فيه
غسان>> باتي يسمع في كلامك اكثر من كلاميقوليلا انتي
روح>> ازعمك
غسان>> جربي
روح>> تمام تمام المهم لو عرفت اي حاجه قولي وتو بكرا كان مشيت نحاول نحكي معاهم علي موضوع الزيارات هضا

غسان>> خلاص تمام

صكرت من غسان ومشت لمكتب استاذ محمود طلبت منه

محمود>> مش قتلكم طلعوني منها القضية هذي
روح>> والله اخر طلب بس انا مانعرفش حد غادي وحضرتك تعرف ياريت تساعدني في هذي بس

محمود رفع التلفون و طلع من حذاها دار مكالمة ورد للمكتب

محمود>> تمام عدي بكرا حاتلقي الشرطي اللي عالباب وريه بطاقتك وخشي لشاهين

روح>> بارك الله فيك

نظام الزيارات المفروض المحامي يكون في مكان خاص غير الزيارات العاديه بس هنا يحطو فينا مع بعضنا المساجين الثانيين والي زايرينهم ومع المحامي كلهم في نفس الصالة مافيش اي نظام

اللي محكوم عليهم باحكام بسيطة لهم زيارة كل اسبوع
واللي اكثر زيارة كل ثلاث اسابيع
واللي اكثر زيارة كل شهر

صقر عنده واسطة من بات غسان عشان يعرف ناس واجد وكان متوسط الغسان وغسان قدم خدماته الصقر 

طلعت روح من المكتب وردت مكانها وهي تحاول كيف تلقى حل القصة الزيارات

//
//

ثاني يوم

في الحبس

كنت مقعمز مع الشباب وطارق من بعد اللي صار تباعد علي جماعة علاء و معش قعد يقعد معانه قعد يقعد بروحه مانتلاقوش الا وقت النوم في الزنزانة كيف المنبوذ بروحه

وعلاء من بعد عركتي معاه انا وبدر و انا عارف انه حاطني في راسه بس مكبر عقلي وفايت

طلعنا للساحة برا و كنت مقعمز بروحي جا بدر قعمز حذايا

بدر >> كان عمري ١٨ سنه لما اول مره خشيت فيها للحبس

انا بحتت فيه واستغربت كلامه

بدر بحت قدام وكمل كلامه >> كان وقتها باتي متوفي وامي مشت بينا انا واختي الحوش هلها لانه هل باتي كانو يسكنو برا بنغازي ومانعرفوهمش اصلا
بس ماحدش تقبل يربي شاب وبنت في عمر المراهقه ماحدش قدر يتحمل مسؤليتنا من هلها
بعد سنة من توفاية باتي تقدم الامي حد اكبر منها ب واجد و بدون حتي ما يسآلوها خوتها وافقو
عشنا اول سنه عادي الراجل ما كانش كويس بكل بس ما كانش سيء كنت نشتغل في محل مع جارنا و اختي كانت تقرا فالاعدادي
كنت نبات برا مرات عند صاحبي نلقطو في شغل من هنا وهنا ونروحو مع بعضنا في يوم كنت مروح فالصبح روحت لقيت امي وجها متغير واختي باين انها باكية حاولت نسآلهم ماحد عطاني اجابة
في يوم قتلهم اني بايت عند صاحبي زي العادة و طلعت بس ماهنانيش عقلي في نص الليل رديت للحوش …. لقيت راجل امي جايب رجالة و شرب و كارطة ودخان و اللي يخدمن عليهم امي واختي !
انكلبت ، ضربت و عيطت و قلبت الدنيا
وعشان نحن مش في بلاد عدل بدال ما هو اللي ينحبس خشيت انا للحبس وانا في عمر ال ١٨ عشان دافعت علي امي واختي ومن اليوم هضا لليوم وانا تعودت عالحبس عشان خشيتله ظلم

مره ضرب ومره سرقة ، مره شغب وهكذا
بعد فترة راجل امي توفي و مره وحده لقينا روحنا فالشارع واظطرينا نمشو الهل امي من جديد
وانا مازلت علي حالي لما حاولت نسقم ونصبي علي كرعيا و نشتغل عشان ندير حوش يلمنا انا وامي واختي ، و بديت فالشغل و نلم فالقرش عالقرش … لقيت روحي خاش في عركة و انحبست من جديد ومش عارف امتي نطلع

كان بدر يحكيلي وما يبحتش فيا وكلامه كان يطلع من تحت سنونه كان يحكي في كل حرف و القهر باين في كلامه ، قعدت ساكت و مش فاهم ليش حكالي

انا >> ربي يفك اسرك وتطلع وتكمل شغلك وتشري الحوش لي تبيه انت وهلك

بدر >> مانبيش شي من الدنيا الا اني نحط راسي ونرقد وانا مطمن !

انا >> معناها بعد روحك من المشاكل ومن خشت الحبس ، اول ما خشيت سآلتك قتلك اول مره ؟ قتلي مش حاتكون اخر مره ! معناها انت ناوي

بدر>> مش ناوي بس كل ما نبعد نلقى الدنيا جايبتلي حاجة قدامي ! لقيت روحي ولد حبوس

انا >> مافيش حاجه اسمها ولد حبوس انت مالكش ذنب فاللي صار

كنا نحكو فالساحة بحتت لقيت شاهين جاي شورنا

شاهين >> صقر تعال معايا
انا >> شن فيه ؟؟
شاهين مشا قدامي ، بحتت في بدر ومشيت وراه
طلعنا شور مكان الزيارة واستغربت لانه اليوم مافيش زيارات

وصلنا حولي الكلبشات من يدي

شاهين>> بسرعة اه ما اطولش

خشيت للمكان متاع الزيارة وشاهين صكر الباب ولقيت روح مش عارف ليش ضحكت اول ما شفتها

روح حولت نظاراتها >> شفت مهرج قدامك ؟؟ 

انا >> لا بس شفت حد مش قادر يصبر لعند الزيارة الجاية
“حطيت يدي علي خدي وبحتت فيها “

“روح تطلع في الاوراق من الشنطة وتجنب انها تبحت فيه”

روح>> اه مش قادرة ريافي قاتلني علي غموضك

انا ابتسمت وحكيت عيوني

روح >> مش راقد كويس؟؟

انا >> هنا تقعد واعي ويدوبك تآمن علي روحك
روح >> صقر ساعدني نطلعك من هنا !
انا >> وانتي شن حاتستفيدي ؟
روح>> بغض النظر عن انه حايكون نجاح كبير ليا ويضيفلي ك محامية ، بس

انا >> بس شنو ؟؟

روح سكتت ، مابتش تقوله انه في شي من جوا كل ما له يجبرها انه تساعده

روح >> وبس يعني

انا اتكيت عالكرسي وبحتت فيها >> انا الي عندي قلته لكي
روح>> مش كل شي قلته يا صقر ! انت لغز .
انا >> وانا قتلك حلّيني .

روح >> نوعدك اني حا نحل لُغزك و نطلعك ونكسب القضية ….

انا رفعت حاجبي >> حانشوفو

روح >> ممكن نسآلك كم سؤال ؟؟
انا ربعت يديا >> اسآلي

//
//

من جهة روح

كنت نحكي مع صقر وكنت عارفة انه يستفز فيا بكلامه ….

نظرت عيونه، رفعت حاجبة ، تنهيدته ، تربيعة يديه ، وابتسامته … ملامحه الحادة اللي مستحيل لما اي حد يشوفهن يقول انه فيه جواهن قهر ، تفاصيل كنت منتبهتلهن من اول زيارة وشبه بديت نحفظهن

بديت نسآل في صقر بس تعمدت اني نبتعد عن القضية قعدت نسآل فيه في اسآله عادية نحاول انلطف الجو بينا ، نبيه يحس اني صديقته مش محامية جايه بندافع عليه

رُوح >> عندك اختك وحده واخ واحد صح

صقر هز براسه

روح >> انت الوسطي فيهم وكنت تشتغل في الشرطة صح

صقر غمض عيونه وفتحهن بمعني صح ، ومع كل حركة صقر يديرها روح اتوتر ومعش تعرف اتكمل الاستجواب

رُوح >> تقدر تحكيلي علي امل ؟؟

صقر ضحك >> غسان كشفلك اوراقي ؟؟

رُوح ابتسمت >> هو ما قاليش غير الاسم… قالي الباقي اسآلي عليه صقر

صقر >> ماعنديش باقي .. امل كانت املي و انطفي.

رُوح >> وشن طفاه

صقر >> خشتي للحبس

رُوح >> خلي عندك امل انك حاتطلع من الحبس و تصلح اللي صار وترد امل

صقر >> بنرد باتي اللي مات بسببي ؟؟ ولا بنرد هلي اللي حولو بكل من المنطقة ؟ شن نبي نرد ولا نرد

رُوح>> مش كل شي لكي ذنب فيه باتك مات لانه ربي كاتله انه فاليوم والوقت هضا يتوفي .. هلك حولو عندهم ظروفهم فالنهاية قضيتك مش قضية شرف ! ولا قضية اداب ولا حتي قتل عشان هلك يحولو ويخافو ويجلو من المنطقة … وحتي ولو خافو ليش بعد تقريبا سنة من خشتك للحبس ليش مش من الاول ؟ ماتخليش الاحباط اللي انت فيه يعميك ويخليك معش تفكر

صقر ساكت ويبحت في روح وهيه تحكي بحماس كان كلامها فيه طاقة غريبة يخليك اتحمس انك ادير كل حرف في كلامها

صقر >> حبيتي من قبل ؟؟

رُوح >> شن دخل كلامي اللي قلته كله فالموضوع هضا

صقر >> جاوبيني بس

روح>>مش حا نكون لغز زيك ونقولك اعرف بروحك .. لا ماحبيتش

صقر >> عشان هكي كلامك مليان ايجابية و تحكي اني حا نطلع ونرد امل … مانبيش نرد حد سيبني في اصعب ظروفي .. مانبيش نرد حد كنت مآمن انه الوحيد اللي حايوقف جنبي ويصدقني ولو كلهم كذبوني … امل سيبتلي علامة في حياتي عمري ما حننسا وجعها … تصدقي انه لو باعوني هلي ووقفت معايا امل كنت حانحارب الدنيا عشان نطلع ؟

رُوح >> حانجرب نحب ونقولك شعوري وقتها .

خش شاهين >> لو سمحتي يا استاذة الزيارة انتهت ماتسببيلش احراج

رُوح>> حاضر طالعة

صبت روح وبحتت في صقر >> بعد بكرا حانكملو كلام
صقر ابتسم >> نراجى فيك

//
//

من جهة صقر

كملت كلامى مع روح وكلامها كان في عقلي

ربكتها اللي مافهمتهش .. محاولاتها كيف انها تقنعني اني نحكيلها … نبرة صوتها لما نقوللها حاجه ماتعرفش كيف ترد عليها بس برضو تصر انها تلقالي اجابة الكل شي …

طلعت روح وخشيت للزنزانه واول مرة من فترة طويلة نقعد نراجي في الزيارة امتي تجي عشان نكمل كلامي معاها

بدر >> وين عديت

انا >> المحامية
بدر>> شن فيه صار جديد ؟؟
انا >> لالا بس جت تسآل في كم حاجه
بدر >> اوكييي
انا >> محمد وين
بدر >> تلفزون
انا >> تعال نعدوله

مشينا شورهم و لقيته قاعد بروحه قعمزنا حذاه وشوية وخش علاء 

انا >> اللهم طولك ياروح
بدر>> كآنه ساس ماتعبرش

قعدت نقعمز وعيوني عتلفزون بس عقلي في مكان ثاني

بدا علاء ينابش ومعش با يهني روحه وبدر يقولي فوت بس زودها كلمه مني وكلمه منه شدينا في بعضنا

//
//

عند غسان

كان مع اصحابه فالليل مكسد قدام المحل رن تلفونه وكان باته

غسان>> ايوا

محمود>> تعال ياراجل انت ومشاكلك
غسان>> شن درت انا عليك ظلم
محمود>> رنو عليا من الحبس صاحبك مضروب ويبو حد من هله ومايعرفولش صاحب غيرك
غسان>> من قصدك صقر ؟؟؟
محمود>> اه تعال انا فالقسم

طلع غسان بسرعة ومشا شور القسم ولقى باته
وفهمه انه صقر مضروب ، وانه لازم ينتقل المستشفي برا ولازم حد من هله يكون عندهم علم

غسان>> نقلتوه
الشرطي >> اه بس لازم هله
غسان>> هله معش حد فيهم تواصل معاه من اكثر من سنه
الشرطي >> توقع انت
غسان>> نوقع
محمود>> تي علي شن توقع
غسان>> نسيب الراجل بين الحياة والموت

طلع وسيب باته ومشى وقع وركب في سيارته ومشى للمستشفي

خش لقى شرطي قدام دار صقر وممنوع الزياارة ، قعد يبرم و سآل الممرضة وعرفو انه محصل ضربة في جنبة ب لاميته و نزف واجد … عرف غسان دغري انه علاء ورا ضربته وكان عارف انه مستحيل يسكت

//
//

ثاني يوم جت روح المكتب و تشتغل عادي وتراجي في يوم الزيارة بفارغ الصبر عشان تشوف صقر

خشت علي استاذ محمود بتعطيه اوراق قضية قديمة لقاته يكلم في غسان بتلفون

محمود >> ماتخششليش روحك في مشاكل المره هذي لو خذيت اعدام مش مصبيلك

صكر محمود من غسان وتنهد

محمود >> موكلك فالمستشفي قاعد

روح انصدمت >> صقر؟ كيف ؟؟؟؟ شنصار

محمود>> مانعرفش غسان ولدي معاه ، عدي للمستشفي و ماتخليش غسان يتورط في اي مصيبة

روح طلعت تجري بدون حتي ما ترد ، خشت المكتبها خذت تلفونها ومفتاح السيارة ومشت دغري المستشفي

//
//

وصلت لقت غسان راكب من تحت ماسك قهوة

روح >> شن صاررر صقر كويس؟؟ ليش ما كلمتني
غسان >> كويس كويس ، الجرح سطحي بس يبي راحة
روح>> خشيت شفته ؟؟
غسان>>ماخلونيش
روح >> وين الغرفة ؟ حانخش نشوفه
غسان >> تعالي

مشو شور الدار لقو الشرطي واقف مدت البطاقة متاعها وورقة التوكيل و خشت علي صقر

//
//

“صقر “

كنت دوبني نايض وميت من العطش وحاس بدوخه مش قادر نرفع راسي

علي خشت روح عليا جت جنب السرير

روح >> الحمدلله عالسلامه شن صار انت كويس؟؟
انا ابتسمت>> ماقدرتيش تصبري الزيارة بكرا؟
روح>> صقر بلا بصارة من دار فيك هكي ؟؟؟ ليش ماحدش كلمني من امس
انا>> اهدي بس … نبي اميه

حطت روح شنطتها و جابت الشيشة يلي جنبي وفتحتها وقربت مني …رفعت روحي بشويه وحطيت يدي علي جنبي

روح>>تحس بجاجة؟
انا>> لا تمام

روح متردده ومرتبكه … قعدت حايسه وماسكة الميه وانا مش قادر نتحرك

بحركة سريعة حطت يدها ورا راسي ورفعتها و مسكت باليد الثانيه الشيشة

روح>>صحة
انا>> الله يسلمك

اتكيت وبحتت فيها >> زيارة مريض ولا زيارة موكل؟

روح>>الاثنين

انا >> ياستي شكرا
روح>>صقر من دار فيك هكي؟؟؟ لازم ناخد الاجراء اللازم
انا>> ما تشغليش بالك ديما تصير

روح>> كيف ديما تصير ؟؟ صقر انت من قبل مستهتر و مش هامك شي بس توا في حد وراك ماتكونش اناني ! حانكمل وقتي وانا نترجا فيك تحكيلي ؟؟؟ كل شي عندك لغز ويبي حل ، مانبيش منك شي غير انك تساعدني نساعدك بس

كلام روح كوم وطريقتها وزعلها وهي تحكي كوم ثاني … نسمع في كلامها بقلبي مش ب وذني .

انا >>قعمزي تعالي

ماكانش فيه كرسي وخرت شويه وقعمزت علي حاشية السرير … وحكيتلها اللي صار
من خشت علاء علينا ومنابشته لعند ماشدينا في بعضنا واضاربنا ومعش نندري علي شي الا وانا فالمستشفى

روح>> خلاص تمام

انا >>تمام شن حا ديري؟؟

جت بتصبي مسكت يدها برمتها>>ردبالك تخششي روحك في اي قصة ، قصة علاء سيبيها مالكش دخل بيها ، هضا واحد مش ساهل مافيش داعي تدخلي فالقصة

روح>> مش حاندير شي يضرك ماتخافش

هزيت براسي >> ومن قالك خايف علي روحي؟
مانبيكش اتورطي في اي شي يخص علاء

روح>> ماتخافش اطمن ، المهم غسان برا بس مش مخليينه يخش هو اللي وقع وقاعد هنا من امس

انا >> طمنيه عليا وخليه يعدي مافيش داعي يقعد انا كويس

روح>> حانقوله ردبالك من روحك انا طالعه حانحاول نجيك بكرا لو خلوني

هزيت براسي

طلعت روح وحكت الغسان الي صار وفهماته انها حا تتصرف و تنهي قصة علاء

غسان >> باهي هو كويس؟؟
روح>> الجرح سطحي الحمدلله مش عميق دوبك كيف نايض بس تعبان شوية
غسان>> باهي تمام
روح>> خلاص قالي قوليله يعدي
غسان>> تو نطلع ندير برمه ونردله
روح>> تمام ، تصير اي حاجة طمني

//
//

طلعت روح من المستشفي و مشت المدير السجن و حكت معاه في موضوع علاء ، ومن خلال الكلام عرفت انه علاء واسطته قوية ، وانه اكثر من الانفرادي مش حا يندار له شي لانه هو هكي هكي محكوم مؤبد

روح >>يعني عشان محكوم مؤبد يعتدي عالناس هكي ؟؟

مدير السجن>> موكلك ماينخافش عليه ويعرف كيف يدافع علي روحه

روح>> عارفه ، بس ياريت من فضلك الموضوع هضا معش يتكرر لانه مش من مصلحتك

مدير السجن >> تهديد ؟

روح>> لا والله حشاك ، بس تخيل انه كلامك هضا اسرب برا ؟؟ يعني عادي سجين يعتدى علي باقي السجناء بس عشان واخذ مؤبد وماعندكم ما اديروله ؟ وتوا النت مخلي الاخبار ينتشرن بسرعة البرق غير البهارات والتضخيم اللي يصير ، عشان هكي قتلك مش من مصلحتك ، انبه فيك مش نهدد فيك

مدر السجن >> تمام يا استاذة اعتبري الموضوع انحل

طلعت روح وهي عارفه انه الموضوع انحل ، الناس كلها توا بدت تخاف من السوشال ميديا و النت بشكل عام و كان مدير السجن عارف انها تقدر تنشر القصة و يخشو في معمعه طويله ، حاولت روح تجنب اسلوب التهديد وتحكي بهداوه و باسلوب نصيحة وفعلا حصلت مبتغاها .

في السلك القانوني كله تعلمت روح انها ماتحكيش مع حد بأسلوب تكبر ، من القاضي لعند اصغر واحد
عشان اي حد تبينله انك احسن منه حايدير عكس اللي انت تبيه ، وكان الاسلوب و الذوق هن اللي ميزات روح في شغلها

//
//

مرن كم يوم وما فيش اي جديد

صقر طلع من المستشفي ورد للحبس و علاء مختفي بكل وعرف انه حطوه انفرادي ونقلوه القسم ثاني بكل
وكان عارف انه روح ورا القصة هذي

من بعد جيت روح للمستشفي معش جت لصقر

خش شاهين للزنزانه
شاهين >> صقر ومحمد و بدر زيارة

طلعنا ورا بعضنا ومشينا لمكان الزيارة وكنت ماشي ونحسابها روح بس لقيت غسان

انا >> شكلك رايفة عالحبس كل شويه جاي 
غسان>> كان جينا يا ووك وكان ماجينا تقعد تعزر
انا >>  شنجوك انت مافيش جديد ؟؟
غسان>> ولا حاجه باتي هالك امي فالشغل و حاط عليا حطه موصي الناس كلها عليا
انا >> تستاهل كان طحت المره هذي ماعندك من يطلعك
غسان>> لا تو نقوي الصحبة مع روح  تفزعلي بعد نطحنها
انا >> وينها هيه ؟

غسان>> مانندريش عليها تشتغل بلكي

انا >> مش مفروض اتابع القضية كنها معش جت

غسان ضحك>> اتابع القضية صار  البنت تجي عندك تروح ريقها ناشف وهي تجدا فيك بس عشان تحكي حرف ، بعدين انا عرفت من باتي انها اول مره تمسك قضية بروحها ديما تمسك في قضايا تحت اشراف باتي

انا >> اوكي فهمنا  ما تصدق عاد
غسان >> معش قابلك علاء
انا >> لالا

بحتت جنبي لقيت بدر و اخته مقعمزين فزيارة

انا >> تعال نعرفك علي بدر

صبينا مشينا شور بدر

غسان >> السلام عليكم
بدر >> وعليكم ااسلام

انا >> هضا غسان يابدر

صبو سلمو علي بعضهم وقعدو يهدرزو واخت بدر مقعمزه ما بحتتش فينا

رديت انا و غسان شويه وصبت اخت بدر بتطلع

غسان >> ماتبي شي انت ؟؟ طالع انا
انا >> لالا سلامتك

طلع غسان دغري ولقى اخت بدر مصبية قدام الباب شكلها تراجي في حد

غسان >> تبي حاجه ؟؟
هي >> اه ؟ لا نراجي في خالو بس
غسان>> باه تعالي هكي ماتوقفيش هنا
هي >> ليش؟
غسان>> بنت موقفه فنص القايله بروحها قدام حبس ماشور شي

مشو قدام شويه وهي كانت ماسكة تلفونها وترن علي خالها

غسان>> انا غسان
هي متوترة >> غفران غفران

جا غسان بيحكي شاف سيارة خاشة

غفران>> خالي جاي

وعدت تجري وركبت للسيارة وغسان فصلها من فوق التحت بنظراته الوسخه 

//
//

عند روح ، كانت حايسه في شغل ثاني غير قضية صقر … وكانت بتعرف بس مكان هل صقر عشان تفهم منهم ليش دارو فيه هكي !

يومها كانت فالحوش و فتحت اللابتوب وخشت عالفيسبوك وقعدت ادور علي اسم امل

روح >> ازعمك امللللل منننن

مسكت تلفونها ورنت علي غسان بس ما عطاهش ولا معلومه مفيدة كالعاده بس قاللها انها تقريبا تخرجت من لما كان صقر فالحبس و علي القسم لي كانت تقرا فيها

خشت يارا عليها فالدار

يارا >> شن اديري
روح حطت الاابتوب علي جنب >> بحتي نبيك في مهمه
يارا >> ياستّار
روح >> قلبي ولّع نار 
يارا>> طول عمرك تافهه
روح>> اس بس ركزي معايا
يارا>> قولي
روح>>نبيك ادوريلي علي وحده اسمها امل معاكم فجامعة
يارا>> وامل هذي من
روح>> مش شورك بس دوريها

حكت روح اليارا المعلومات لي تعرفهن

يارا>> وكيف بندورها هذي وهيه تخرجت ؟؟
روح >> يارا اسآلي !! مقطعة الجامعة جت علي هذي
يارا>> عندنا شباب معانا كبار لهم كم يعاودو فالسنة تو نسآلهم
روح>> تمام ، طيري هي بنكمل شغلي
يارا>> مصلحجيه خزي

طلعت يارا و قعدت روح تفكر مسكت تلفونها بتشوف امتي اقرب موعد زيارة عشان تمشي الصقر ، لها فترة ما حكتش معاه ولا شافاته
علي رنت غسان

روح>> الو ؟
غسان>> عرفنا مكان حوش هل صقر