.
.
.
قبل ثلاث سنين
قربت شور الشباب و لقيت علي يعلي في صوته مع اللي فالسياره وما فهمتش نحسابه واحد سكران و جاي بيدير هرجه وخلاص
انا >> تي فوته ياعلي
علي>> تي اين نفوته هضا بيضحك عليا
انا >> توكل يا راجل
الشاب >> تي وين توكل كنا يفلم هضا
علي >> يا هيثم حل عن اهلي و العن الشيطان
نزل هيثم و نزل معاه سلاح وكان معاه صاحبه نزل معاه ، انا اول ما شفت سلاح طلعت سلاحي و كان علي عنده سلاح برضو بس مش ماسكه الشباب كلهم التمو وعلي كان منفصل والشاب برضو والحمو في بعضهم و طبعا نحن صبينا مع علي
كنا ثلاثه وهما اثنين
وفجآة الشاب ” هيثم ” بدا يفرغ بالسلاح فالهوا وخر صاحبه ووخر اللي معانا وقعدنا انا وعلي خذيت سلاحي وضربته بحاشية السلاح علي راسه من لاوره
بس ماكانتش ضربه قويه ، كانت خفيفه نبيه يوقف طلق عشان ما يضرش حد
//
//
روح >> ولما ضربته طاح ولا شنو ؟؟
انا >> معش فطنت الشي بكل جو ناس يحزو من المستشفي لي كنا ماسكين عليها و اخر شي فطنتله انه هيثم طايح وراسه كله دم
شاله صاحبه للمستشفي و ثاني يوم لقيت هله رافعين عليا قضية ، بدو تحقيقات ومن هنا وهنا عرفت انه الشاب خاش في غيبوبه و سبب الغيبوبه هو ضربة حاشية السلاح اللي انا ضربتها
روح >>وقتها شن درت ؟؟
انا >> علي وقف معايا و حاول يطلعني منها ويقول انه شجار جماعي زي ما يقولو قانونيا و انه الضربه مش معروفه من من و يريح حق الشاب
روح >> ايوه يسمو فيه تحايل عالقانون
انا >> ايوه بزبط هضا اللي قاله ليا ، بس القصه ما زبطتش … قعدت ماشي جاي عالمركز وتوقفت عن الشغل طول فترة التحقيق … و قعدت المحكمة تراجي في هيثم ينوض من الغيبوبه عشان يقدرو قيمة الضرر و ندفع فلوس ونطلع … بس طلع تقرير الدكتور و قال انه الدماغ متضرر واجد وهل هيثم ما بوش يتنازلو و كان صاحب هيثم اللي كان معاه فالعركه هو اللي ماسك كل شي … حاولنا بس ماصارش شي
روح >> وعشان انت موظف فالشرطة ف ضاعفولك العقوبه
انا >> بزبط
روح >> لانك كنت مستخدم سلاحك ، لو السلاح ماكانش معاك كنت طلعت منها
انا>> لو ما طلعتش اساسا ماكانش صار اللي صار
بس قدر
روح >> تمام كمل … من بعد اول سنه كان هيثم في غيبوبه و انت خشيت للحبس
كنت بنحكي علي خشت الشرطي وقال انه الزيارة كملت
روح >> بديت شوية شويه نفهم والصورة توضح عندي
انا >> انا تعبت من الدوا والكلام فالقصة هذي
روح >> خلاص قربنا نوصلو لنهاية القصة و بعدها حانقدم اوراق انه فيه ادله جديده طلعن و نديرو محكمه و نراجو قرار القاضي
انا >> وشن هنا الادله ؟؟
روح >> يوم المحكمة حا تعرف
انا >> اتوقع مافيش اسرار بين المحامي و المتهم
روح >> مش اسرار اعتبرها لغز مش انت تحب الالغاز ؟؟
انا صبيت قربت منها >> بس انا نساعد فيك في لغزي
روح >> الباب مفتوح والشرطي برا بعد مني بلا فضايح
انا ضحكت
خذت روح حاجتها و طلعت
//
//
طلعت روح وهي حاطه في بالها الخطه ٣
من بعد هل صقر ، و بعد امل
توا قعد لازم انها تحكي مع علي صاحب صقر
خشت علي فيسبوك صقر و نزلت عالصورة اللي كان حاطها صقر له هو وعلي و خشت عليه
روح ” لو سمحت ممكن نحكو في موضوع مهم “
دزت الرسالة ومافيش ثواني الا وهي جايها الجواب
علي” مهم من اي ناحية “
روح >>عليك قلة ادببببب هضا كنه !
كتبتله ” من ناحيه قانونيه 
“
علي بدا الجد في كلامه “كيف يعني ؟ “
روح ” هضا عنوان المكتب لو عندك فضول ياريت تجي ونعرفو نحكو “
دزت روح العنوان و قعد علي يدز ويبي يعرف الموضوع بدون ما يجي … بس روح كانت مصره انه يجي كانت تبي تشوف ملامح وجه وهوا يحكي
خلاته يدز ومعش ردت عليه …
//
//
يوم زيارة غسان الصقر
انا >>وين مختفي انت ؟؟
غسان >> قاعد والله الفتره لي فاتت مشغول ونفكر في كم حاجه
انا >> ان شاء الله خير
غسان >> نبي غفران !
انا>> اخت بدر
غسان >> ايوه
انا >> وتوكل علي الله
غسان >> انا متأكد انه امي مش حتوافق عالموضوع
انا >> عشان خوها محبوس
غسان >> وعشان حالتهم ووضعهم وكل شي
انا >> انت متأكد من قرارك ؟
غسان >> اه متأكد انا مش صغير و غفران من اول ما شفتها حسيت انها هي اللي نبيها نبي نستقر مليت من الحبوس و المشاكل ، وتوا مش حانقدر نطلع عرس لانه مالش شي طالع عرس اختي مش عارف شن ندير
انا>> وباهي اقنع هلك قبل وبعدها شوف ، مالمحتش عالموضوع بكل ؟؟
غسان >> لا وعارف انه امي حاتقول لا
انا >> ماتعشمش البنت ولا تحكي شي لعند تشوف هلك
غسان >> اليوم تو نحكيلهم ونشوف بالنسبه الغفران مش ملمحلها بشي
انا >> تمام وبدر شوري
غسان >> ماتبي شي ؟؟
انا >> نبي طلب بس
غسان>> شنو؟
انا >> ترد بالك علي روح ! انا حاس انها ادير في شي فوق من طاقتها و حاس انها ماشيه شور شي خطر
غسان >> ياعم الحنون
انا >> زمري 
غسان >> حاضر والله
//
//
عند روح فالمكتب خشت لقت علي مصبي قدام المكتب ويراجي فيها
روح قدمت وفتحت الباب وبدون اي حرف >> تفضل
خش علي وروح قعمزت
علي>> ياريت تحكي اللي تبيه بسرعة عشان عندي شغل
روح>> انا اللي نبيك تحكيلي
علي >> وشن تبي نحكي ؟؟
روح>>علي قضية صقر
علي انصدم و بان في وجه انه ماكانش متوقع جيته تكون علي قضية صقر اصلا
روح >> صقر صاحبك عرفته ولا لا ؟
علي هز براسه
روح >> وكيف صاحب يسيب رفيقه في عز محنته !
علي >> بس انا مشيتله كم مره … و بعدين صارن لي ظروف
روح >> ظروف سنتين ؟؟
علي >> عادي مرات الظروف يقعدن العمر كله
روح >> ومازال ما كملن ظروفك ؟
علي >> لاء مازال
روح >> باهي ممكن تحكيلي علي يوم الجريمه ، انت وقتها كنت مع صقر
علي >> اسأليني ونجاوبك
قعدت نسأل في علي …. سألته علي يوم الجريمه و من كان معاهم و سألته كيف صارت القصة ووين كان صقر
وجاوبني وكان كلامه زي كلام صقر و زي الكلام اللي مكتوب عند النيابه …
كملت كلام مع علي بس ماحبيتش نضغط عليه فالكلام … خليته يحكي براحه و بعدها طلع من عندي … كتبت كم حاجه في اوراق القضية
وانتقلت للخطة اللي بعدها ….
مشيت وشيكت علي حسابي فالبنك بعدها طلعت ومشيت الحوشنا ولقيت بابا عندنا
روح>> اللهم طولك ياروح امتي جا هضا ؟
يارا >> تقريبا نص ساعه له
روح >> وشن يبي ؟
يارا >> يحكي مع خالو عمر
روح>> باهي تمام
خشيت للدار غيرت دبشي وخشيت للمطبخ نبي ناكل ونسمع صوت الباب طبق عرفته بابا طلع …طلعت لقيت خالو عمر فالصالة ويحكي مع ماما
ماما >> تعالي شويه
مشيت وماسكه التبسي في يدي وناكل
عمر >> اسمعي بوك كل مره طالع الامنا بقصة … صكرناله فمه بقصة الصرف طلعلنا بقصة شغلك و يا توقفي يا تزوجي
روح >> ليا فترة نشتغل شن خطرله توا ؟؟ ليش حاط راسه من راس شغلي اللي نصرف منه علحوش اللي مايندريش عليه ؟؟يندري علينا من وين ناكلو ولا نشربو يندري من وين ندفعو في مصاريف جامعة يارا ؟؟ باهي يندري عليا لما مرضت و مشيت بروحي بالسيارة للمستشفي ماكانش معايا حد ؟؟ ولا عادي ما يهمش المهم هو ما يصرفش علينا
عمر >> بوك عارفتيه راسه يابس و مراته زايده امه علينا
روح >> شن يبي توا؟؟
عمر >> يبيك تجوزي ، قالي تجوز وادير لي تبيه عند راجلها اهم شي تطلع من اسمي
روح علي قد ما انقهرت من كلام باتها بس بينت البرود كله … حطت التبسي لي فيدها عالطاوله >> تمام
عمر >> تمام يعني شنو؟؟
روح>> يعني حا نحل الموضوع !
خشت روح لدارها وسيبتهم يتهارجو برا و معش قادره تفكر وتفكيرها ملخبط و مش وقت اي حاجه تعكر عليها تفكيرها فالقضية
//
//
عند غسـان
خش للحوش و لقى امه قاعده بروحها فالصاله وبوه فالمكتب مازال ما جا … قرر انه يفتح موضوع غفران مع امه
فتح الموضوع و حكى الامه مقدمات بس زي ما تعرفو الامهات لا ترضى بالقليل 
يبن يعرفن تفاصيل التفاصيل
امه >> وباهي بنت عيت من ؟؟
غسان >> امي بدون لف ودوران خليني نحكيلك من الاول
وحكى غسان الامه انه غفران من عيلة علي قدهم و انه خوها محبوس وحكالها شن التهمه ، و قاللها انه البنت كويسه و بوها متوفي و كل اللي يعرفه بس بدون ما يدكن عالكلام واجد كان يحسن حتي فالسلبيات عشان امه ما تنتبهش ….
امه >> وكنك وليد وحيد نعطيه هالعطيه ؟؟ انت من توا واجعتك امها و البنت بتقعد تخدم عندهم ؟
غسان >> يا امي مش هكي ! افهمي الله يربحك
امه>> نفهم شنو ؟؟ بعدين انت طيب وواضح ان البنت واجعتك بس
غسان >> انا مش صغير ؟؟ كبير و نعرف نختار … وبعدين شن تفرق عيلتها اانا بناخذها هيه مش عيلتها
امه >> اكيد البنت عايشه مع خوالها قتلي وهما مربيينها و مأثرين فتربايتها وبعدين خوها محبوس
غسان>> كان عالحبس حتي انا كنت محبوس ! كيف ما انتي ما رضيتيش بالبنت عشان خوها محبوس برضو بنات الناس مش حا يرضن بيا انا ! ولا انا استثناء
امه >> لا اهن بنات خالاتك يرضن و يفرحن
غسان >> ايوووووه قوليلي هكي !
مع خشت باته
امه >> تعال يا محمود اسمع
غسان>> خرفي
محمود>> شن فيه
حكتله ام غسان القصة وغسان يحكي من جهه
محمود >> علي كيفك انت حر في اختيارك كبير مانكش صغير نقه كان بنعلموك كيف تزوز
غسان >> يعني نحكي للبنت ؟؟
امه >> وانا ماليش كلمه ولا شنو؟؟
غسان >> انتي عالعين والراس بس انا نبي البنت ولاقي راحتي معاها
قعدت امه تهزب و غسان يقنع فيها و برضو ما فيش فايده بس مدام خذا الموافقه من باته معناها شويه شويه ح ترضى امه رغم انه ماكانش متوقع ردة فعلها تكون مسكره هكي
ركب الداره فوق و هو مضايق رن علي غفران
غسان >> الو
غفران>> كنه صوتك
غسان ضحك >> وقعدنا نعرفو الصوت لما يقعد مش صافي
غفران >> بطل سخافه
غسان يضحك >> شنجوك انتي ؟
غفران>> تمام بس قولي كنك ؟؟
غسان >> مافي شي تالف شويه بس
غفران >> اكيده ؟؟
غسان >> وراسك
وهو يحكي مع غفران رنت عليه روح
غسان >> سيادة المحاميه
روح >> اسمع بكرا تكون عندي فالمكتب
غسان>> خرفي شن فيه
روح >> تبي صقر يطلع تعال
غسان >>ربي يعيني عليكم وخلاص
روح>> عدي عدي كمل انتظاراتك
غسان >> تم
صكر و عاود علي غفران
غفران >>منو ؟؟
غسان >> انغارو يعني توا ؟ 
غفران >> لا نسأل عادي
غسان >> باهي ياعادي هذي روح
غفران >> اهاااا
وسكتت رغم انها حا تموت وتعرف روح من تكون
غسان >> ماتبيش تعرفي روح من
غفران>> مش مهم
غسان بيحرقلها دمها >> براحتك 
//
//
ثـاني يوم عند روح فالمكتب ، جاها غسان
روح >> غسان نبي منك طلب
غسان >> ياساتر عاللهجه اللي تخوف
روح>> بتسمعني بدون هزوه زي هزوة صقر ؟
غسان >> سكتت احكي
روح >> نطلب ؟؟
غسان >>تي اطلبي
روح >> نبي نطلع صقر بكفالة
غسان >> بس صقر قالي انه جربو بكفالة من قبل وما زبطتش
روح >> لا توا عندي حاجه حنقدمها للقاضي تخليه يقتنع والكفالة اصلا سلطة تقديريه للقاضي
*سلطة تقديريه ، يعني حاجه في يد القاضي وتعتمد علي قناعته “
غسان >> انا جاهز ما عنديش مشكله
روح >> مبلغ الكفالة بالنص بيني وبينك وبعد ما ياخذ صقر براءة حايردولنا مبلغ الكفالة … بس فيه مشكله ؟
غسان >> اللي هيه ؟؟
روح>> لازم عشان نطلعه بكفالة انه يكون عنده مكان اقامه ثابت ! يعني الشرطة اتردد عالمكان هضا لو مثلا طلعن ادله جديده وجو بياخذوه للتحقيق وانت عارف قصة صقر وهله
غسان >> حطي عنوان حوشنا
روح>> اكيد ؟؟
غسان>> اه
روح >> غسان شكرا بجدددد ساعدتني
غسان >> انتي ضامنه حا يطلعوه ؟
روح >> اكيده حانطلعه لانه الحكم في قضية هيثم كان نهائي بس اللي جد جديد هو اللي خلاه يقعد يعني القضية الثانيه هي اللي عليها مشكله ومازال ما فيهش حكم نهائي
غسان >> قسم بالله ما فاهم حاجه بس فلوس بكرا حا يكونن عندك
روح >> خلاص تمام
طلع غسان وتريحت و روح كملت كم ورقة و طلعت لمشوار كانت تبي اديره من زمان
//
//
وصلت روح عند حوش بوها وكانت عارفه انه باتها مش قاعد ومرات بوها فالحوش بروحها دقت الباب وفتحتلها سالمه مرات باتها
سالمه >> المحاميه بنفسها هنا اوووه
روح >> اسمعي كلمتين بنحكيهن لكي و ياريت تسمعييهن كويسسسس بكل ، حياتنا اطلعي منهااااا ساد ما درتي فينا ! سبب طلاق باتي وامي انتي و عملك الاسود و بعد ما امي سيبتلك كل حاجه و خلتلك باتي و فلوسه وكل شي قعدتي تلفي زي اللفعه حوالينا ، قوليلي شن تبي منا ؟؟ ولا عشان ما جبتيش عيال قعدتي بتسودي عيشتنا ؟؟
سالمه >> والله العظيم اندمك علي كلامك يا قليلة الادب مالقيتيش من يربيك بتجيبي العار البوك طول النهار بسيارتك وادوري
روح >> وانتي خايفه علي باتي مشاء الله عليك يا ملاك …سالمه فكينا من الكلام الزايد ، كلمتين طلعينا من راسك عشان ما نحطكش في راسي و طلعي قصة الزواج من راس باتي لاني عارفتك انتي اللي حاطتيها في راسه وقت ما نبي نجوز نجوز علي كيفي !
سالمه بحقد >> احمدي ربك لقيتي راجل يرضى بيك … باهي اصلا اللي جاك عريس
بنات بروحكن في حوش ما عندكن من يستر عليكن نسمعو و نسلمو
كانن يحكن بصوت عالي قدام الشقه … علي جية بات روح سمعن يحكن واول ما سالمه شافت مصطفي قعدت تعلي في صوتها و ادير في شوشره عشان تقلب الموضوع علي روح
اختمت انه بات روح ضربها و سالمه دروحها تمسك فيه … نزلت روح تجري لسيارتها وروحت للحوش و بوها وراها
//
//
فالحوش
روح >> قسم بالله اندمها علي الكف الحقيره
باتها خش و كان خالهن عمر قاعد
يارا >> شن فيه كنكم ؟؟
مصطفي >> والله نربيك يا قليلة التربيه من يوم وغادي كلمتي هي اللي تمشي … حاتزوجي يعني حا تزوجي
روح تعيط من الدار >> مش علي كيفك مش علي كيفك
مصطفي وماسكه عمر >> تي حول خليني نخش نربيها حول
عمر >> العن الشيطان واطلع ازح فضحت بينا فالشارع كل يوم جاي تعيط … تي اطلع اطلع
طلع مصطفي وهو يسب ويلعن
عمر >> ازح ريحو امي كل يوم قصة شكل
ام روح >> امسحها في وجي ياعمورا خلاص
طلع عمر وخشن كلهن علي روح
روح >> مانبيش نجوز مانبيش نسيب شغلي 
حتي بعد جابلي عريس جابه ليا ما يبيش الشغل
يارا >> ماتوافقيش خليه يعيط هنا عنده طول عمره يعيط شن الجديد ؟؟
روح >> تعبت بكل تعبلي نفسيتي ! حتي الشغل مش قادره نركز فيه طول اليوم وانا نفكر
امها >> فكينا من الحس االله يربحك
روح>> يعني نجوز و نفني عمري مع حد مانعرفش عشان بس سالمه اتريح ؟؟؟؟؟ ماما الله يربحك فكيني من الكلام هضا عارفتيني مستحيل نوافق
خلوني بروحي بنرقد
طلعو كلهم من الدار و انعزقت عالسرير
روح من لما بوها وامها اطلقو كانت هيه دوبها متخرجه و بوها فرحان بيها و من اول ما خذا سالمه انقلب عليهم اول شي كان يصرف بعدها قل الصرف و بدن المشاكل
اشتغلت روح وصرفت علي روحها عشان تكمل ماجستير و بعدها علي طول بدت فالمكتب و الفلوس اللي تحصلهن تحط جزء منهن فالمصرف
و جزء علي مصاريف الحوش
كبرت قبل وقتها وتحملت المسؤوليه ، امها من صبايا زمان اللي ماتعرفش ادافع علي روحها وكل حاجه باهي وحاضر حتي وهي مطلقه … و اختها الكبيره اجوزت و لهت في حوشها و يارا مازالت تقرا
فكل شي كان علي روح !
تعلمت تسوق و بشويه شويه دارت سياره وقعدت تشيل وتجيب في هلها كان حد مرض كان مناسبه كان زيارة كان جامعة اختها لو تأخر عليها الباص
كبرت و ما لقتش وقت الروحها حياتها كلها جري و مسؤوليه و قلة حيله و هضا كله مش عاجب باتها ! كانت تبين للكل انها قويه بس ورا القوه هذي مليون قصة وقصة
//
//
عند صقـر
كنـت مع بدر انا وياه فالزنزانه بروحنا
بـدر >> لما تطلع من هنا شن اول حاجه ح ديرها ؟؟
انا >> لو جيتني قبل فترة كنت قتلك اكيد حا نمشي نشوف هلي ! بس توا ماعنديش ماندير
وسكتت شويه ” ومش عارف ليش جت بين عيوني صورة روح “
بـدر >> السكته هذي فكرة في اللي انا نفكر فيه صح ؟؟
انا>> وشن هو اللي تفكر فيه ؟؟
بدر >> روح
انا بحتت في بأستغراب >> كيف ؟؟
بدر >> هي ولا لا
سكتت وانا مستغرب من روحي انه كيف روح جت في خيالي اصلا و كيف بدر عرف !
بدر يضحك
انا >> خلاص ياراجل تقول قاعد انكتلك
بدر >> ما شفتش وجك وانت مستك
انا >> باهي تمام خلاص
بدر >> تم
انا >> وقفلي وانت منشرط ضحك شويه بنحكي معاك في موضوع
بدر استغرب >> شن فيه ؟؟
دويتله علي قصة غسان و انه يبي اخته وقتله انه شافها مره فزياره وعجباته بس بدون مانقوله لا يحكو ولاكلمها ولا شي وقتله انه بيخطبها بس قاعد يقنع في هله
بدر>> باهي ؟؟ يعني مازال يقنع في هله
انا >> انا ماحكيتلك الا وانا عارف انه غسان
مستحيل يتنازل علي قراره فعشان هكي دويتلك
بدر >> الزياره الجايه بنحكي معاه ، انت عارف ظرفي كويس و انا نبي راجل يقعد مع هلي مانبيش حد يزيد الطين بله
انا >> يعني معقوله انا بنحكيلك علي غسان لو ماعنديش فيه ثقه ؟؟ وانا عارف ظروفك؟
بدر>> خلاص امتي ما يجيك نحكو
انا >> تم
طلع بدر و اتكيت وغمضت عيوني
//
//
بعد يومين
روح قدمت طلب علي طول اول ما غسان وافقلها علي فلوس الكفاله طلعت الفلوس الي فالبنك و جابلها غسان الفلوس وماكانتش عارفه جرآتها هذي لوين تبي تشيلها ! شن الثقه اللي حاطتها في صقر ومخليتها تعطيه الفلوس اللي كملت عمرها وهي تحوش فيهن عشان اطلعه بكفاله !!
مشت وقدمت الاوراق و كان سلاحها هو عدم كفاية الادلة لادانة صقر ! خصوصا انه فيه شهود كانو في نفس مكان الجريمه و امتنعو عن الشهادة
ومن ضمنهم الشاب اللي كان مع علي وصقر هضك اليوم ، قدمت الاوراق و طلعت و جتني انا فالحبس
//
//
يوم الزيارة
روح >> ياريت اليوم تحكيلي اخر جزء من القصة هذي
انا >> تو كل شي مكتوب عندك ليش حابه تسمعيه مني
روح >> التفاصيل يا صقر ! التفاصيل
عمري ما نعتد بالكلام اللي كان عند النيابه !
ديما يكون في بدايه القضية و يجي بسرعه وبدون تركيز بس انا توا متأكده انك متذكر تفاصيل اكثر من اللي كنت متذكرهن يوم افادتك عند النيابه
رُوح كانت تحكي وانا مش معاها كنت نبحت فيها
روح >> صقر وين عديت نحكي انا ؟
انا >> نبحت فالتفاصيل 
روح ارتبكت >> وصلنا من بعد اول سنه كان هيثم في غيبوبه و انت خشيت للحبس
انا ضحكت >> تمام حانكمل
اتكيت عالكرسي و ربعت يديا وبحتت فيها >> في يوم جا الشرطي خذاني و شالوني للتحقيق وقعد يسألو كم سؤال ما فهمتش كنهم
واستمرو عالحال هضا يومين !لعند ما عرفت انه هيثم انخطف وهو فالغيبوبه !
روح >> ولفقولك انت التهمه ؟؟
هزيت براسى >> بزبط !
