رواية سجين وروح الفصل الخامس عشر 15 بقلم الكاتبة آية

فتحت لقيت غسان و معاه الهادي و اثنين اخرى

غسان >> لقو جثه محروقه ومبلغين عليها انها هي جثة هيثم

روح >> كيف ؟؟؟؟ جثة هيثم ومن اللي بلغ ؟؟
غسان وخر روح جوا ورد الباب والشباب برا >> خشي غطي راسك ازح واطلعي

برمت وانا مش فاطنه الشي خشيت لبست و طلعتلهم

انا >> هادي اعرفلي من قدم البلاغ
هادي >> مكتوب في تقارير البلاغ مجهول يعني في حد رن بالتلفون وبلغ وسكر الخطر
انا >> وين لقو الجثة ؟
شبح>> في مزرعه ف سيدي خليفة
انا >> تأكدو منها انها جثة هيثم ؟
غسان >> لا بس خوه وصاحبه قاعدين توا فالمركز وقالبين الدنيا و معالم الجثه مش واضحات ف حيديرو فحص الاسنان عشان يعرفو
انا >> اهم شي صقر رد للحبس عشان ما يآذيش روحه
غسان >> شن حاديري
انا >> هادي حاول تجيبلي تقرير الطب الشرعي
قبطان >> خليها شوري

طلعو الشباب من عندي وانا قعمزت فالصاله قعدت متوتره اذكرت صقر لما كان يقولي خوذي نفس واهدي
وفعلا خذيت نفس و عديت لعند العشره وهديت
وقعدت نفكر فالخطة اللي في راسي

//

في السجن

بدر >> قعدنا بروحنا احكيلي
انا>> رديت من وين ما جيت
بدر >> اسمع راه درهتو ام كبدي انت وغسان كل ما حد يجيني يحكي كلمتين وقص
انا >> روح انخطفت و اللي خطفوها طلبو مني نرد للحبس ، ماقدرتش نرد الا لما نشوفها دورت عليها

وقعدت نحكي لبدر فالقصة

بدر >> هضا كله صار في ثلاث ايام وواااو
باهي من اللي قالك علي مكان روح ولما خشيتو كيف ما لقيتوش حد

انا >> الشبح عنده معارف واجد بكل قدر يعرف واحد من اللي يشتغلو من الجماعة اللي خاطفين روح بس هما عندهم قانون بين بعضهم مستحيل حد يقول هو تبع من او يشتغل مع من
ساعد شبح عشان في معرفة بينهم ساعده اني نلقى روح بس بدون ما نقدر نعرف اي معلومه عن اللي خطفوها
اتفق هو وياه علي اساس انه الشاب اللي يشتغل مع اللي خطفو روح يقول الجماعته انه جاي بلاغ مستعجل ولازم يطلعو بسرعه من المكان ويسيبو روح وهضا اللي صار وقت اللي وصلنا لقيت روح بروحها

بدر >> باهي شبح هضا مش صاحبك ؟ مايقدرش يقولك اي حاجه ؟

انا >> مستحيل فيها قطع رقابي بالنسبه له وهذي قضيتي وماحد يدخل ويآذي نفسه بسببي
حتي روح خلاص

بدر >> خلاص كيف ؟؟
انا >> نبيها اتنازل عالقضية
بدر >> مش بكيفك هي مش حاتوافق
انا >> المره هذي هي اللي سحبت الكفاله وردتني

بدر انصدم

انا >> فوت

جا وسام قعمز حذانا

وسام >> يارا جسمي متكسر بكل ازح
انا >> كنك
بدر >> هضا حاله يكمل فيها يتنطر برا فالساحه ويشنقل مع الصور
وسام >> ياراجل كساد
انا >> غير را يحسابوك بتهرب يجو يكفخوك
وسام >> ماعندي وين بنهرب قاعد 

انا >> خطرها طارق طلع ؟؟
بدر >> مقدمك
انا >> مبرد وجه

قعدنا نهدرزو انا وشباب و كل شويه يخطر علي بالي موضوعي وتجي صورة روح قدام عيوني .

//
//

ثاني يوم ، طلعت روح من الحوش
ومش ناويه تقول الهلها انه صقر رد للحبس عشان تاخذ وقتها وتفكر براحه بدون زن

خشت للمكتب و اندمجت فالشغل و بين القضية والاوراق تحاول تلاهي روحها ماتبيش تفكر في صقر ماتبيش تذكر عيونه
حاست بين الاوراق ومعش قدرت حطت يديها علي راسها و تنهدت علي رنة تلفونها وكانت سارة اللي ترن

سارة>> عندك العلم انك احقر عروس
روح >> كنك ياحيوانه
سارة >> عليك عزقه عزقتيها لنا خذاك بكل صقر
روح >> النبي ياساره تخليها ساكته
سارة>> كنك يا دراما ؟
روح >> تقدري تجيني في المكتب
سارة >> تو نشوفه كان جابني
روح >> باهي

صكرت روح من سارة و ردت تشوف فالاوراق ورنت عليها سارة بعد شوية وقالتلها جايه

سارة >> توتوتو معقوله المكتب حايس هكي وكنه وجك شن فيه

روح >> قعمزي بس
سارة>> تي قعمزت
روح >> مش عارفه شنو نحكي ولا شن نقول
بس مخنوقة ياسارة
سارة >> احكي شن فيه يا بنتي شغلتيني عليك

بدت روح تحكي الساره علي قصة خطفتها وكيف طلعت بس ما حكتلهش شن صار لما كانت مخطوفه

سارة >> لا حول ولا قوة الا بالله هضا كله صار معاك ؟؟؟؟ معقوله ؟ وليش ما بلغتوش ؟؟ هكي حايكون الموضوع ضد صقر مش معاه

روح >> انا عارفه تفكير صقر كويس مش حايصبر لعند الشرطة تدور عليا لازم هو بروحه يلقاني وفعلا هضا اللي صار و غير هكي مش حاينقلب ضده الموضوع عشان حايخطف مراته يعني ، بس قدمت بلاغ باللي صار و شرحت فيه الوضع وقتلهم انه كلمو صقر وهددوه انه لو بلغ الشرطه حا يقتلوني بس مازلت ما عرضتهنش عالقاضي مع اوراق قضية صقر

سارة >> ليش
روح>> عشان لو قدمتهن كان القاضي حا يطلع صقر وما يقبلش الكفاله بس انا مانبيش هكي يسير نبي صقر يرد للحبس

سارة>> روح شن في في راسك

روح >> مافيش شي عقلي ملخبط نبي نتريح والله

سارة>> ليش خليتيه يرد للحبس مدام عقلك معاه هكي ومرايفة عليه

روح >>مش مرايفه علي حد

سارة>> مش عليا يا روح .. نعرفك وغير اني نعرفك نعرف الحب و الرياف كيف يكونن

روح بحتت فيها >> تي فشن تحكي انتي ؟؟ حب ورياف منو ؟

سارة >> انكري وقولي مانحبش ؟؟؟ قولي انا مانحبش صقر ؟

روح >> كلمي راجلك وروحي كذا انا غلطانه نحكيلك

سارة >> سيبيني من القانون وكلامك اللي كله الغاز وقضايا وقوليلي بس انا مانحبش صقر

روح توترت >> ساره صكري فمك و روحي عندي شغل اطلعي

سارة>> حانسكت باهي لكن وديني كان ماجيتي كيف الكلبه وحكيتيلي انك تحبيه ما نبقى انا ساره 

روح >> نعنك ما قعدتي سارة 

//
//

عند غسان .. مشي شور حوش هل صقر بيحكي مع منذر

منذر >> ياراجل امي دايره مناحه فالحوش علي ردة صقر للحبس مش عارف شن ندير والله كل شويه تبكي وتقولي سيبته مره مانبيش نسيبه مره ثانيه

غسان >> شيلها تشوفه بكرا فيه زياره اتريح هيه و هوا يطمن عليكم

منذر >> تو نشيلها ، ماكلمكش الهادي ؟؟

غسان >>لالا شكله ما وصلش الشي
منذر>> بناخذ فاطمه اختي ونعدو نشوفو روح الوليه بروحها فالحوش عيب ازح ماتجيش

غسان >> ماتخافش الهادي موصي عليها شباب المنطقة بدون ما تعرف و منتبهين عليها

منذر >> باهي تمام ، تسير حاجه كلمني
غسان >> تم

طلع غسان من عند منذر و ركب لسياره ماشي شور المحل علي رنت غفران

غفران>> حبيبي
غسان >> عيونه
غفران >> وين قاعد ؟
غسان >> ماشي شور المحل بندير كم حاجه
غفران >> اهااا ، باهي كنه جوك شين 

غسان >> قصة صقر الملخبطه هذي اللي معش انتهت وانا اكثر حد عارف كيف انه صقر مخنوق

غفران >> تو تفرج والله ربي ما ينسش حد

غسان >> يارب .. خلاص انا وصلت المحل نكمل ونرن عليك

غفران >> تمام باي

//
//

مرن يومين عاديات بكل مافيش فيهن اي احداث
روح عقلها عند صقر و صقر روحه عند روح وماحد فيهم قادر يقعد بدون الثاني

صقر رد الحياة الحبس اللي كان عايش فيها ثلاث سنين
وروح ردت للشغل و الاوراق اللي كل ما لها تغرق فيهن

//
//

كانت روح عند هلها … هنا يومين بعيده فيهن علي صقر بس كأنهن سنتين عيونها سارحات من كثر التفكير و عقلها ديما شارد ماتفكرش في شي غير فالقضية و كان حكت علي شي تحكي شور القضية وماترقدش ولا تاكل

يارا >> روح كنك ؟؟ مريضه تحسي في حاجه
روح >> هاه ؟
يارا >> نحكي معاك انا وين عقلكر
روح >> يارا جيبيلي اميه وبنادول بنرقد
يارا >> راك تطلعي حامل ؟
روح>> معش نبي لا اميه لا بنادول باهي  اطلعي بس
يارا >> نفسية هذ

طلعت يارا وحطت روح راسها عالمخده وغمضت عيونها ودمعتها نزلت وعلي طول جت قدامها صورة صقر

//
//

صقر

كان مش اقل من حالة روح ، سرحان ومش فاطن الشي وكل شويه يدور في دخان ويدخن بيش يفش غله

وسام >> العاشق الولهان

انا >> ريحنا ياراجل
بدر >> تكثر عليه ياخذ فيك اعدام
انا >> العمده ماعندش دخان
وسام >> معايا انا
بدر >>نزحت دخان خلاص وانت يا محراك الشر غم فمك
وسام >> العتب علي بيساعد 
بدر >> اسكت بس
وسام>> نعدي ندخن بروحي مالي ومالكم

طلع وسام والتفت بدر عليا

بدر >> عليك ضيق علم
انا >> ماطلبتش منك تمسك خشمي
بدر >> را نكفخك ازح رد كويس

حكيت عيوني و مسحت بيديا علي وجي و تنهدت

بدر >> تي غير وسع بالك
انا >> بنرقد
بدر >> تريح
انا>> بندخن قبل

لحقت وسام شور الحمام دخنت و جيت بنرد للزنزانه خطمت من جنب دار التلفزون لقيت العمده مقعمز ، غمزتله ومشيت شور الزنزانه اللي كانت فاضية الشباب مش فيها

العمده >> شنو ؟
انا >> التلفون
العمده بحت يمين ويسار طلعه من جيبه ومده ليا

انا >> نكمل ونجيبه لكي
العمده >>تم

رد عمده لمكانه وانا خشيت للزنزانه رقيت للسرير الفوقي و رنيت علي رقم روح ،الرنه الاولى الثانيه الثالثه ردت

رُوح بصوت جدي >> الو
انا >> الو

روح الجديه حولت من صوتها >> صقر؟؟؟؟؟
انا >> هكي تخليني ياروح ؟
روح ساكته

انا >> احكي ماتخلينيش هكي احكي قوليلي ليش طلعتي في حياتي ، كنت مجرم ومتهم ومحبوس ولا هل يندرو عليا ولا صاحب ولا حتي البنت الي كانت في حياتي كنت عايش منعزل عن الدنيا جيتي انتي لخبطتي الدنيا كلها ولخبطتي عقلي ؟

روح >> يعني انت بس المتلخبط ؟؟ كنت محاميه و قويه من برا الجوا عمري ما ضعفت قدام حد جيت قدامك انت وضعفت … نقعد قدامك نكون كيف البنت الصغيره ، لما مانشوفكش او ما نسمعش صوتك نقعد كآني مدمنه ندور في اي حاجه نعالج بيها روحي .. شفت انا الوين واصله ؟؟ بعصبيتك و بغرورك وغموضك و الغازك وحياتك المش واضحه و تهمتك وقضيتك وتحكمك لعبة فعقلي لعب … تحكمت فيا من يوم اللي مسكت ملف قضيتك قعد اسم صقر مرتبط في حياتي كلها …

روح سكتت

انا >> الله يربح اهل امك كلهم ماتسكتيش ، ارحميني وكملي كلامك مش حانقدر كل شويه نكلمك ونسمع منك

روح خذت نفس و بصوت يرجف>> مش عارفه شن نكمل مش عارفه انا وين ماشيه نحس فروحي ضايعه وخايفه … خايفه عليك حتي النوم مش قادره نرقد تعودت نرقد في حضنك 

انا >> وربي نقتل لو حد مس منك شعره ولا جا شورك ، كلمة خايفه معش بنسمعها علي لسانك
ازمة وتمر … انا لازم نسكر ردي بالك علي روحك وروحي و تعاليلي في اول زياره را والله ما قادر نصبر

روح >> حاضر رد بالك علي روحك وانا معاك

سكرت علي روح مع خشت بدر

بدر >> تهدريز من جده
انا >> ما فطنتش الروحي بكل باهي اللي ماحد خش
بدر >> سمعتك تكلم صبيت قدام الزنزانه عشان ماحد يفطن
انا نطيت من السرير الفوقي >> اصلي .. خليني نشيل التلفون للعمده
بدر >> في من كنت تكلم
انا حطيت يديا في جيوب جاكة التوته>> روحي
بدر >> ان شاء الله عقل

طلعت عطيت التلفون للعمده ورديت للزنزانه غمضت عيوني ونفكر

//
//

ثاني يوم عند روح …كالعاده كانت فالمكتب و تجهز للقضية عشان مش فاضل الا طشه عالجلسسة الاخيره و الحكم النهائي واللي بعده حا يتقرر يا انا صقر بريء يا اما مجرم و يصكر ملف القضية علي هكي

كانت
الهادي >> السلام عليكم
روح>> وعليكم السلام شنصار
الهادي >> مازال ما طلعت نتيجة التحليل للمحكمه انتي عارفه متاع الاسنان اطول
روح >> اه عارفه
الهادي >> بس انا قدرت نعرف كم حاجه
روح >> شنو
الهادي مد لروح الاوراق

روح فتحت الاوراق وبحتت في هادي >> من وين جبتهن هذينا ؟؟؟
الهادي >> عيب عليك 
روح >> انت جن مش هادي
الهادي >> هههههههه مقبوله منك نخليك تشوفي الاوراق

روح >> تمام تمام

طلع الهادي و روح بحتت فالملف اللي فيدها و طلعت ورقة الرسمه متاع صقر و قعدت ترسم والملامح بدن يوضحن

//
//

بعد يومين فتحو زيارة المحامي ، لبست روح وخذت شنطتها ووصلت للسجن

جا شاهين خذاني طلعت من الزنزانه خشيت للغرفه نفسها اللي كنا نقعدو فيها انا وروح لما كانت تجي وتاخذ في اقوالي … خشيت وصكر شاهين الباب وشفت روح قاعده عالطاوله رفعت راسها وبحتت فيا

روح >> كيف حالك
انا طلعت يديا من جيوبي و دفيت الكرسي بكراعي وقعمزت مقابلها وانا نبحت فيها

روح>> ماتبيش تحكي كبريائك مش مخليك تحكي اللي في قلبك ؟؟ لدرجة هذي الغرور

انا >> هو الواحد لما يبحت في عيونك يقدر يحكي حاجه ؟؟

روح >> انا في شنو وانت في شنو
انا قربت الكرسي وجيت جنبها

روح >> حيعلمك بنت دبشك دخان
انا >> شن الاوڤر هضا تقول شميتي حشيش 
روح >> من وين يجيبولك فيه 
انا >> را قاعدين في حبس الكويفيه مش حبس بريطانيا
روح >> وانت من امتي ادخن

انا >> تو سيبنا ام القضية اللي فوق راسي وبدينا تحقيق فالدخان ؟ ندخن من زمان بس مش ديما بالجو

روح >> وعليش توا رديت عليه

انا >> الرياف

روح حطت يدها علي رقبتها >> اممم ، المهم حاول تباعد عالمشاكل ونبيك تعرف كويس بكل انك مراقب جوا فيه حد يراقب فيك احسب حساب كل خطوه وماتعطيش سرك الحد اوثق ف بدر بس

انا >> شن فيه ؟؟

روح >> انبه فيك بس ، ارجوك افطن الروحك خلاص هانت موعد الجلسة الاخيره قرب

انا >> وشن حايسير فالجلسه الاخيره

روح >> خلي الموضوع شوري بس و انتبه الروحك

انا >> انتي مش ناقصك شي
روح>> غسان ومنذر كل شويه عندي مش منقصين عليا شي
انا >> فالشقه بروحك
روح>> مانبيش نمشي لحوش هلي نبي نركز بس
انا >> تمام تمام
روح >> نبي نحكيلك موضوع بس مانبيكش تفكر في شي
انا >> شنو ؟؟
روح >> يوم ردتك للحبس جوني غسان وشبح وهادي و قبطان فالشقه و قالولي

انا قاطعتها قبل ما تكمل كلامها >> انتي طلعتي الام الرجاله هضوما كلهم بروحك ؟؟؟؟؟؟
الشبح طلعتي الامه ؟؟؟؟؟ تي انتي بعقلك شبح هضا يعد سنون الكلب وهوا ينبح يفصلك تفصيل

روح >> ماطلعتش لابسه عريان انا ! لبسة حوش وخشيت حطيت علي راسي ركز فالموضوع وسيب الكلام الفاضي مش وقته توا

انا مسكتها من مرفقها وقربتها شوري و عيوني بيطلع منهن النار >> اقسم بالله كان ماتبطلي حرق دم نحبسك معايا هنا

روح >> انت شن تبي مني ؟؟ احكي اللي في قلبك قول اللي فيه وريح تريح

انا غمضت عيوني وحطيت يديا علي وجي ونزلتهن >> احكي شن فيه

روح تنهدت >> لقو جثه محروقه مشتبهين فيها جثة هيثم

انا ببرود >> باهي ؟؟

روح >> يعني الموضوع حايزيد قضيتك تعقيد

انا >> لو ثبت اني انا ما خطفتش اكيد حايثبت اني انا ما قتلتش

روح >> الله عالذكاء !
انا >> اتهزي ؟

روح >> الموضوع فيه طرف ثالث انا مش قادره نوصله في حد لو نوصله حاتنحل كل حاجه

انا >> ما تحاوليش تقربي من اي شي يجيب خطر روح ردبالك

روح >> حاضر حاضر والله انت بس ردبالك علي روحك

صبت روح وانا صبيت وراها و مسكتها من لاوره
روح >> صقر
انا >> خليني نشبع من ريحتك
روح غمضت عيونها

انا >> مش قادر نحكي مش حانقدر نقولك شي هليني نمسك دليل برائتي في يدي وبعدها حاتعرفي كل شي

روح>> طول عمره كلامك الغاز كله

انا >> قرب ينحل لغزي

فكيت يديا من روح و طلعت و خذاني شاهين شالني شور الزنزانه

بدر >> باهي اللي شفناك فارد وجك
انا >> ماعندكش ما تدير الا تبحت فيا
بدر >> فاضي اشغال
انا >> صبي نطلعو برا حسني انخنقت
بدر >> هيا

//
//
تكت روح عالمكتب خذت الملفات متاع القضية كلهن و روحت للحوش

خذت ملف اقوالها مع صقر
واقوال امل
و اقوال علي
و اقوال معز و عوض
و اقوال ربيع

قعدت نقرا فيهن كويس ، ولقيت اختلاف واضح بين الاقوال وخصوصا اقوال ربيع … كان فيه اختلاف

مسكت تلفوني و رنيت عليه

روح >> الو
ربيع >> ايوا
روح >> ممكن نشوفك بنحكي معاك بخصوص القاضيه
ربيع >> ماعندكش مشكله
روح >> بكرا فالمكتب تجيني ؟؟
ربيع >> اوكي تمام

صكرت روح من ربيع و صبت ادير في قهوة عشان تركز في باقي الاوراق

//
//

في السجن

جا غسان زيارة ليا انا وبدر

غسان >> سمعت بالقصة ؟؟
انا >> قالت لي روح امس
بدر >> شن فيه
غسان >> لو جثة مشتبهين فيها الهيثم
بدر >> معقوله ؟؟؟؟ وكنك ما قتلي
انا >> شن بنقول يعني
بدر >> ابو ام البرود
غسان >> المهم يراجو في تقرير الطب الشرعي
انا >> باهي براوا
بدر >> ازف بطل
انا>> غسان اسمع فتحلي عيونك علي روح
غسان >> الهادي حاط جماعته فالمنطقة
انا >> فوتلي الهادي اه وخليك انت
غسان >> تم

//
//

ثاني يوم مشت روح للمكتب عشان تشوف ربيع