رواية الموروث نصل حاد الفصل الثاني عشر 12 بقلم اساور حسين

بقلمي رواية : الموروث ‏

لطفا لا تنسون التصويت والتفاعل بين الفقرات

⊰ مُـرجانـة ⊱

عيناها التي تُناضرهُ أيضًا نصلٌ حاد

تَغرِسُ سحرها في نصف الفؤاد

تلتفُ علىٰ روحهُ إلتفاف النَّجَاد

وتأخذهُ بعيدًا إلى ذلك الوادِ

الذي يحفظ عشقها فيهِ حتى الموت و الرُقاد

أسقطتهُ في قُعر الهيِـام

وسقتهُ العذاب بكُـلِ إنسجام

تسيّدَت عليهِ تلك المَـدام

لتُصبح الأصل في قلبهِ ومسك الخـتام

لكن حَربهم قائمـة و مليئة بالألغـام

ألغامٌ تهدم الروح وتجعل في العقل وِسـام

شُنَت ضِدهُم من غير سلام

ختامُها سيُكلل بالنَصر أو الإستسلام ؟

بضعف گعدت على بايات الدرج من فوك

ودموعي تتسابق على خدي لو عندي مكان

واعرف احد اروح عنده ، صعبة اسمع هل كلام

وحقهم ما ينلامون هو منو يحبّ المشاكل .

ام بيرغ : ساكته اشوفچ إم وارث راضية ولدنا تتصارع

على وحدة زعطوط غريبة ما نعرف اصلها من فصلها .

كعدت ام وارث بالگاع بنص الصالة وتأشر بيدها

لميمونة تطلب ماي ، ركضت ميمونة جابت گلاص

اخذته منها تشرب ويوگع منها صايرة من ألخوف سعفه

ام وارث : وارفع راسي وأفتخر بابني يرخص دمه

الخاطر بت مظلومة ودخيلة عنده أبوي ربانا

لو نتكتل كلنا ما نسلم دخيل دخل دارنا .

ام بيرغ : من يوم دخلتي حياتنا انتِ وابنچ ودعنا الراحة .

ام وارث : ما عاجبچ اخذي ولچ وولي ما ميتين عليچ

ولا بينا واحد توسل تظلين عدنا .

بقت وحدة تتجادل والثانية تهدد وميمونة

كاعدة وايدها على رأسها صدعت

منظرهم وهمَّ يطلعون بيدهم أسلحة يتراوالي

لملمت روحي وصعدت بالغرفة خفت اظل مگابلتها

بجيت الحد ما حسيت النار هدمت كل حيلي

نمت بالفراش وادعي من ربي بعد ما اگعد واخلصهم

يروح واحد بيهم يموت وانا وعشيرتي السبب

بعد بـيا عين واخلي بعد عيني بعينهم الموت اهووون .

فزيت جوعانة بطني تلويني ومبين صار الفجر

صبرت نفسي عيب اكوم اكل وميمونة نايمة

غمضت ورجعت غفيت الثاني يوم صياح

وتهديدات ام بيرغ ماخلصت تسب بالكل

ميمونة : والله دخت والله خلص صبري

وين اولي وين اهج منچ كافي بسچ ما مليتي .

ام بيرغ : نهايتچ قريبة يا بنت ساجر وعلى ايدي .

ميمونة : ياهو وگع بلسانها وصاحت

نهايتك على ايدي خايبه اذا اتخبل عليچ

افصل واذا فصرت اخرب واهجم حياتچ كلها والقران .

طلعت ام همام والواضح عليها ماتحب المشاكل

وتتجنبها بقت هي وام بيرغ وحده تغلط على ثانية

صعدت ميمونة تلطم على رجلها ماتتحمل ام بيرغ

من شافتني رجعت نزلت جابت اكل وسحبتني من ايدي

_ فوتي بالغرفة انوب لا تضربچ الحقيرة .

خلت الأكل مقابيلي سألتها بالإشارة عن اخوانها جاوبتني

_ زينين ام وارث جهزت اكلهم راح يجي سَــهم ياخذه

خابر وارث سألني عنچ ووصاني انتبه عليچ

ونبهني تبقين تحت أنظارو بالغرفة لا تطلعين منها ابد .

تذكرت الكاميرا من حجت والله فد نسيتها

وعبالك صار يمي ارتبكت بشكل اعدل بشالي

وارتب بملابسي وركزت على حركتي

ميمونة نزلت بعد ما صعدت ابد

ومر اليوم وصاروا اربع ايام وخمسة

والشباب كلهم ماكو .

وبيوم مر مثل كلّ الايام الشي الغريب الوحيد

ام ببرغ صوتها ماطلع وتتصرف بحذر

ميمونة بالمطبخ اريد نزلت اساعدها بعدني

على درج وام بيرغ صاحت على ام همام فوتتها

بغرفة ام وارث خليت إيدي على گلبي من سمعت

صوت قفل الباب عبالك قفلته عليهن .

اول ما وصلت بعدني باب المطبخ واندفع باب المخزن

الداخلي وطلع شخص ضخم ماشفت غير ظهره

اقترب من ميمونة التفتت من حست شخص قريب منها

شافته ونخطف لونها وبصوت مبحوح اثر خوفها همست

_ بندر ..

حاوط خصرهـا يمنعها من الحركة ودفعها

على كاونتر ويهمس بصوت عالي

_ اششششش ميمي اششششش .

وهيَّ صوتها راح من الرهبة وخوفها حتى ما عاطت

بس تدفع بي وتحاول تشرد من بين ايده

رفع بخاخ رش بوجهه وظل يرش الحد ما فقدت .

اريد اركض رجلي صارت خيوط خرب بيهن

رفعها بين ايدها مو واعيه البنية منتهية

استدار يريد يطلع الشر يطفر من وجهه

المخيف مشوهه ، رجع نزلها متخلي عن هدفه

وسبب وجوده هنا ، وقبل لا يخليها على ارضية

ركضت على درج اصعد روحي واجر بالمحجر

حتى اسرع ركضتي اركض واتعثر اوگع وارجع

بيَّ ما بيه وصلت على غرفة وقفلت بابها .

اسمع صوت خطواته وهوَّ يصعد على درج

فتح الغرف باب باب الحد ما وصل باب غرفتي

ضربها ضربة بعد ضربة بعد ضربة .

اروح وارجع ادعي ربي ما شافني يارب ما عرفني

يموتني گال اموووتچ اذا يعرفني ويشوفني يموتني

دفر الباب وصار يروح بعيد ويدفعه يريد يكسره

صرت بنص الغرفة ايدي على راسي

خفت والخوف اكل حيلي غمضت عيوني

وصحت بصوت عالي مبحوح من انكسر نص الباب

مُـرجانـة: ساعدووووووووني يا نااااااااس .

من سمع صوتي اختفى ونزل مستعجل

جسمي يهتز وصار ثلج شمرت روحي بين

الكنتور والمجرات اشهگ وايدي على رگبتي

توجعني احس عبالك بلعومي ملچوم

عصرت روحي عصر مغمضه عيوني

من رجع دفر الباب وبضربتين تفلش

راح يموووتني رجععععع يموتني

خليت ايدي على راسي حيل احمي نفسي .

خطوات اسمع احد يتقدم يمي

حط ايده على اجتافي ورفعني

فكيت عيوني من سمعت وعرفته من عطره صاح

وارث : مُـرجانـة هاي انا وارث .

من بين شهگاتي جاوبته اجر بالكلمة جر وأشر على باب

مُـرجانـة : بـ بـ بنـ بندر هذا بندر .

انذهل يتمعن بوجهي وشكد اكو اصوات

وصياح جوة ما اهتم ولا تردد يسألني

_ مُـرجانـة تحچين هذا صوتچ رديتي تگدرين تحچين .

خليت ايدي على رگبتي فاتت امه خجل وابتعد

آخذتني تتفحص بوجهي وايدي وترجف

_ ولك يمه ماي تشربه البنية راح يوكف كلبها .

طلع مستعجل مخبوص على غرفته

ورجع بنفس السرعة اخذت اشرب منهارة

وتلفت كل اعصابي يريد يطلع جريت قميصه خايفة يروح

ام وارث : عوفي انا عندچ خلي يدور اخته اخذها هذا المجرم .

سحب روحه ونزل بيرغ صوته هز البيت هز

گلبي يريد يوكف بحجة اروح للحمام

ركضت على درج نزلت من شفته يخابر

وكفت بصفه ابجي بعد التلفون من اذنه وهمس

وارث : ياهو وياچ عايني عليَّ .

مُـرجانـة : خايفة خلّيني يمك .

فزيت من صوت بيرغ يخابر وعاط بهمام

وهذاك فلش المطبخ تفلش من شاف تلفونها

وعرفها جانت تطبخ تخبل فقد فرد مرة

طلع محتار وامه باب الشارع لازمة شال ميمونة

حاضنته ودموعي تتقاطر بحضنها .

رجعت نظري على وارث سد الخط وصاح

_ هذا العار طالع من المحافظة كلها .

همام : شبسرررررررعة ول شبسرررررعة .

وارث : لو يطيح بيدي لك اخخخخخخ اخخخخ .

بيرغ : انا غبي والله غبي لزمتو وضربتو طلقه

مووووتو وخلصصص من شرو هل نكره منو بحالو .

همست بصوت ما يسمعه غيره من راد يطلع

مُـرجانـة: اخذني وياك .

وارث : ساعة وارجع .

_ اروح اخذني وياك .

همام : ميمونة تكتل روحهااا گالت اذبح روحي

اذا ياخذني خرب اهلك بندر شني من تهلكة .

لزمني من طرف ثوبي وفتح باب غرفة امة دخلني

كعدت حيل مابيَّ وبعدني متمسكة بملابسه

واحجي وياه هوَ ما مستوعب صوتي يتعجب

ويفك عيونه على وسعها من احجي ويسمعني

مُـرجانـة : كلبي راح يوگف بس لا تعوفني حباب .

وارث : ولا اعوفچ ساعة بس ساعة وراجع .

هزيت راسي رافضه كلامه ولزمت ايده كل قوتي

مُـرجانـة: اخذني منا هذا يخوف اخاف يرجع يموتني .

_ حتى اموته وانعل سلفه سلفاه .

نتر ايده من بين ايدي من دخل بيرغ صاح بي

بيرغ : كاعد هذا بمعووووووود تعال حلها .

وارث : وجع بصوتك الخايس يعار شبيك .

بيرغ : امشي بساع بلكي نحصلهم .

وارث : ما تشوووووف البنية راح تموت من الخوف

روحوا قبلي امشي ولي شوية واجي وراكم .

وكفت من وكف راح للباب رحت وياه امشي

اتلفت وهوَ يصيح بيهم حتى يروحون

ورجع راح على باب المطبخ يوجّه بسهم

لزمت قميصه من وراه استدار شافني

شهگت ومسحت دموعي ، راد يعبر عتبة

الباب منعته من لزمته حيل لا بي يحاجيني

ولا يگدر يطلع ثبت بمكانه ويتجادل وياهم .

عليَّ وامه مقابيله تحجي شصار وشلون

غافلهم ودخل وعينها عليَّ

صرت قريبة منه بس يتحرك يطخني

وهل قرب قيد حركته بس مجبورة والقران خايفة

مُـرجانـة: رش بخاخ بوجهه فقدت واخذها .

ام وارث : يا يمه هاي تحجي .

سَـهم : سامعين المثل من يگول تحچون ألآخرس

انتوا تحچون الأخرس وابو واهل الأخرس اذا خرسان .

طلعوا مستعجلين ينتظرونه بالسيارة

اشر حتى امه تاخذني وهوَ ركض

راح وياهم وبعدني ما تحركت خابرها

_ ها يمه وارث ، اي راح افوتها على غرفتي

خوش اقفل الباب علينا لا يظل بالك .

كابوس من شيطان ، وهم اتوهــــم مثل كل يوم وليلة

تسارعت دگات گلبي من بديت اصحصح ودور نظراتي

وجع براسي ذبحني رفعت ايدي اكتم صوت ونيني

بيت عبالك من طين ، السقفية من خشب ونازل منها

نشرة على شكل وردات ناعمات مشتغلات ينورن

المكان بلون اصفر خفيف .

ودفاية بالحايط صايرة دائرية والحايط يمها

مصخم بلون اسود ويطلع منها ريحة حطب

محروك يحرك لعيون وخنگه ، بساطات ممدوده

بكل مكان بالغرفة لونهن احمر على ماروني

ومخاد بعشوائية مرتبات ، وطبلة صغيرة

عليها فراشات اثنين مغطيها تول بلون ابيض .

حركت جسمي راسي ثگيل وعيوني تبزني

عبالك بيها فلفل ، تلمست مخدة وفراش نايمة

عليَّ ومتغطية ببطانية ولحاف على سرير ناصي

من حديد يمكن صغير ، تحسست رجلي

لابسه جواريب فرو واني بعمري ما احب ألبسهم .

دموعي تنزل بلا صوت وجهد مني عقلي رافض مكاني

گلبي بدگاته يعبر عن خوفه، كورت روحي وصدر

مني صوت شهگه عالية من سمعته

خارج المكان يردد نفس الكلمات بصوته الخشن

” يهل عـايش على رموشي ، حـلم كل لحظة يتجسم ”

رفعت جسمي بصعوبة مستنده على حايط

ينث تراب مدري طين والهوا ثلج مدري منين يفوت

سحبت رجلي على صدري وطوقتها بيدي

ملت راسي وخليته على رجلي وعيوني على باب

ضجيج بعقلي من اتذكر اخر مرة شفته بيها

تنطفي الدنيا كلها بعيوني .

بقيت على نفس كعدت ليلة كاملة ، طلع النهار وخلص

ومارجعت اسمع حركتو ، وكفت على حيلي رفعت

البرده طلع شباك صغير مليان حدايد وسيم ناعم

رجعتها ورجعت اريد هاي الدفايه تنطفي خنگتني

حتى ماي ماكو يربي شلون اطفيها هاي وخلص منها

رجعت كعدت وشمرت الجواريب من رجلي لعبانه روحي

منهن غطيت وجهي بيدي ما اريد افكررر ولا اتذكر شصار .

بجيت الحد ما نگطع النفس بعد من الشهگات

ما يدخل الرئة ، تعبت وباد حيلي شمرت

ايد منا وايد منا لدقايق بس طفرت ودخلت

بالبطانية وجريت لحاف شمرته فوك راسي

وغمضت عيوني وجسمي يختض بفتحت الباب

خطواته حاسبها فتحت طرف عيني رجف

كل ذره بيه من شفت سيخ حديد صاير لون احمر

مخيف بگد ما مخلي على نار وحامي متجمر على اخر .

شمر مخده بصف الجرباية قريب من راسي

حسيت كعد وحراره السيخ تلفح بوجهي شهگت

بصوت مسموع وعيوني ما افتحها ابد امثل النوم

ريحته كفختني عبارة عن حطب وأنفاسه حاره

قرب وجهو من وجهي لدرجة شعرو نازل يطخ بخدي

بـندر : 802 يوم هاجرة زلمتچ .

قبضت ايدي خليتها جوة گلبي تسارعت ضرباته

اخاف حتى يسمع صوت گلبي ، نزلت دموعي

ولا اگدر اسيطر بعد عليهن صعبة صارت صعبة

بـندر : فكي عيونچ حتى تشوفين إنجازاتچ .

قاومت كلامة ورغبتي بفك عيني تراجعت

بدون ما افكها بعد الغطوه مني وهمس

واحس يريد يفوت كلش بوجهي

بندر : تلعّب روحچ منّي ؟

ضرب السيخ بطرف حديد السرير كورت

روحي اكثر من رجع وصرخ بوجهي

بندر : خليتي الدنيا كلها تلعب روحها مني

وانتِ هم تعلب روحچ مني ، غصباً عليچ

تتحملين هل مشوهه دام انتِ حرگتيني .

حكمت غلق عيني من رجع بنفس مكانو

گدامي وجهو نزل وصار برگبتي جر نفس

طوووويل يحاجيني بكل برود لزگت روح

بالحايط حتى بعد ماكو مكان اكثر ادفع بي جسمي

بندر : تروحين غاد عني ما مشتاقتلي ؟

_ لا .

_ شني لا ؟

_ ما أريدك .

سكون صار بالمكان وبس صوت انفاسنا مسموع

صمت دام وقت مو قليل جبرني فضولي ومن خوفي

فكيت عيني بتردد شفت شبه ملامح شخص بيوم

جنت زوجته ، عبرت صدمتي صعّب اخفيها

نص وجهه مشوه ، والطرف الثاني شخص اعرفه

نايم بس راسه على حديدة مال سرير وجسمه بالأرض

جبانة انا جبانة ما عرفت اكتم خوفي من شكله

مخيف الى درجة ما تنوصف الجلد مطبگ

صرخت كعدت وادفر برجلي حتى ابعد جسمي

الملم بالبطانية واصررخ اصررخ بكل حيلي

نهض من مكانه فاتح عيونه شال السيخ وصاح فشلان

_ طالع انا طالع طاااالع .

قفل الباب واسمع بخطواته تبتعد بركضة

صرخت وايدي على كلبي صرخت بكل حيلي

وتأنيب الضمير اكل من حيلي ضربت على وجهي

وكفت افتر منا اجي مناك اضرب بروحي ملخت وجهي

مشوووهه شوووهته شوووهته راح يموووتني

شسوي بروحي يا مصيبتي يا مصيبتچ ميمونة .

رفعت ايدي تهتز بجنون بهاي ايدي بهل ايدي شوهته

مردتها عصرتها ضربتها بكل قوتي بالحايط

احس ماكو وجع يوصل لوجع گلبي شبيه

فتحت عيوني امداني امددددداني انا غبية غبية .

هلكت ونمت بعز تعبي وشهگات شگت گلبي تعبتني

غفيت بس هواجس بعقلي هوواي بقيت بين نايمة

وكاعدة كش وجهي بخوف من رجع فات

رجع بمكانه على مخده جسمي كله تصلب

من سحب وجهي قوي يضغط على راس ومد وصله

مدري شنو على عيوني بقيت ارافس

خفت يشوهني ويعذبني ادفع بي من صدره واصرخ

_ عوووفني لا تأذيني بس عوفني .

بندر : اشد عيونچ حتى ما تشوفيني وتلعب روحچ .

رجع راسي على مخده رفعت ايدي اتلمس

بالوصلة ضبها على عيني ورجع اقترب ساكن

قليل يتحرك ، عفت عيني وبدون ما اشوفه

مديت ايدي بتجاه وجهه

ثبت وحتى نفسه ما عاد احس بي تلمست مكان

التشوهات بس احس بلحم متكرمش وطابگ

شي على شي مشيت ايدي على حاجبه موجود

الحرك بس من جوة عيونه ونص رگبتو مشيت

على صفحة الثانية السليمة بدون ما افتح عيوني تلمستها

بشرتو صافية ناعمة باردة ، لزم ايدي فكرت يمنعني

بقيت لثواني استوعب حركته حط ايدي على ايدو

وهمس صوتو يرتعش : وايدي تشوهت .

مشيت آيدي المعصم بالكامل متكرمش

شعور وملمس غريب سحبت ايدي بسرعة

وجر الوصله من عيوني درت وجهي نطيته ظهري

وهوَ طلع ما يريد اشوفه يمكن .

ما صبر ورجع صوته ثگيل ويجر بالكلمة

جر راسي ورجع الوصلة شدها سحب روحي منه

وهوَ بصعوبة عبالك يحجي تعبان متهالك الى درجة

بندر : متندمة ؟

_ لا .

_ ليش .

_ تستاهل .

ضحك ضحكة عالية نشف الدم بعروگي

ودموعي نزلت جسمي يرتعش صار وهوَ

مستمر يضحك ويضحك وسكت بلحظة وهزني هز بصوته

بندر : خرب د***** .

وكف دفر الحرباية عبالك دفرني ورجع عادها

بصوت عالي سديت أذني ما اكدر تلعب روحي

من اسمعه شلون يلفظها ، رجع قريب يتأكد مني

بندر : ما خفتي اموت .

_ سويتها حتى تموت .

بندر : راح تتأذين على ايدي اذية بكل الطرررق

تتخيليها وما تتخيليهاااا راح تعضين اصابعچ ندم .

ميمونة : لا تعذبني، لا تحركني ، لا تضربني

تريد تنتقم موتني وخلصني وخلص روحك مني .

بندر : انتِ تحبيني ؟

_ لااااااا لاااااااااااااااااااا لااااااااااا .

بندر : وتريديني اموت ؟

_ رجعني خابر وارث خابر همام رجعني .

_ راح اخليچ تحبيني تعشگيني .

ضحك بشكل مجنون بقيت اتلفت من جر ايدي

يلفلف بيها وبصوت خشن ببرود اعصاب يحاجيني

_ عندي رأي يخالف رأيچ .

_ شتسوي عوف ايدي هدني شبيك فك عيني

شسوي يمااااااا هماممممم وينكم ، بندررررر

احجي وياك بندررررررر حباب لاااا لااااااااااااااا.

غافيه بفراش ام وارث ، وهيَّ راكعه تصلي ورافعه ايدها

تنخي وتندب ربنا يحفظ وحيدها ويقوي

لبست نظارتها وتربعت فتحت القران ترتل بصوت خافت

الوقت متأخر والبيت هدوء بس غرفة ام همام

مفتوح النور بي وصوتها تنحب على بنتها .

انفتح الباب التفتت واني التفتت وياها شفت

وارث دخل والتعب تاري ملامحه صاير كلش

اسمر من التعب ولحيته علت دخل ونزل جسمه

على امه باس راسها واخذ ايديها باسها وباس الثانية

وارث : ادعيلي هواي ادعيلي .

_ ماعندي غيرك ادعيله يمه ، طمني على اخيتك .

فتحت عيوني شافني جاوبها وعيونه بقت يمي

_ بعدنا ندورها يمه هذا لوتي ما يترك اثر .

_ چا هو مو صاحبك .

_ ملعب بندر الگاع ما تجرعه .

_ يمه ميمونة حلفت بس ياخذها تذبح روحها

ما اوصيك على اخيتك هاي دورها ورجعها .

_ لا توصين ما تنام عيوني اذا ما اسمع خبر عنها .

طبطبت على اجتافه وابتسمت راضية نزل راسه

وسحب التربة بيده يتلمسها ويقراها وبخفوت طلب

_ اريد اكل من ايدچ الطيبة بس

خفيف من البارحة على لحم بطني ودخت .

_ يا يمه جنك على اكل .

_ بس قبلها مري على ام ميمونة صبريها .

فزت من مكانها مخبوصه اريد اشيل عيونه

عنه ما گدرت ابتسم بلا وعي واخجل واسحب

بنظراتي منه وارجع لنفس النقطة ، طلعت مستعجلة

رجع التربة ولم السجادة وبثگل بدون ما يشوفني يحاجيني

وارث : كاعدة ؟

ابتسمت بخجل وكعدت على طرف السرير اعدل

بملابسي وشالي نزلته عدل على شعري

بخفوت وصوت شبه مسموع رديت

مُـرجانـة : اي .

رفع راسه من سمع جوابي ضحك

وانا ضحكت على ضحكته

وارث : صوتچ صوت اطفال .

مُـرجانـة: يمكن لان انا صغيرة .

وارث : يمكن ليش مو يمكن .

رجع على حايط استند وطلع تلفونه

صفنت وعقلي والشيطان يوسوسون شر بأذني

لزمت رگبتي بأرتباك وأنا اتخيل يوكف يمي

ويحضنني ، ابتسمت وايدي ترجف وانا اشوفه

مكتف ايده ولازم التلفون تك ايد يتصفح مدري يكتب

مندمج يعض طرف شفته السفليه ويذب حسرات .

فاتت امه وشغلت كل أضويه الغرفة خلت

الصينية بصفه وحجت ويايَّ

_ ها مُـرجانـة خالة كعدتي ؟

_ اي .

_ اروح اسوي اكل حتى تاكلين .

_ لالا مايحتاج شبعانه .

_ شوف شوف بعينك من الصبح حرارتها

عالية وترجف وبالفراش اتوسل بيها وما تاكل .

وارث : خليها على راحتها .

حجاها بكل برود ولا مهتم وشغل تلفونه تجاهلنا .

دخل بيرغ سلم وكعد على چرباية بالجهه الثانية

_ اكلك بيرغ طلعت ابوها .

وارث : مني ملِكه ؟

_ عجل اكو غيرها .

_ اي والمطلوب .

شغل بيرغ جگارة جر نفس وصاح

_ اهوووو وارث اهوووووو .

_ ووجعت ابوي كون بطنك شبيك .

_ مو تفاوضنا وقبل الوقت سلمتك

هاي الخمسة وزعتها على دار ايتام وگلت اساعدك .

رجع الصمون ومسح أيده بالكلينكس

مد رجله وجر ورقة موقعة وبصمة

قراها بيرغ وارث شرح الوضع

_ دزيت خالي فؤاد وكتبت

تعهد أضمنك ما تضربها ولا تأذيها والبت اذا

صار عليها شي انا اتحمل المسؤولية وابوها وافق .

بيرغ : تعهد بكيفك تتعهد تضمني شني تضمني

هووووو انااا ما اضمن روحي انتَ شلون تضمني .

وارث : أضمنك واحاسبك واطيح حظك

اكرز بيك ضرب ورزايل اذا تصير صلف وياها .

بيرغ : خليني محترمك ووووووارث .

وكف وارث وانا شردت للمطبخ اصيح امه وعيني عليهم

وارث : وانتَ تتعهد ما تأذيها هذا بيتي

وبنص بيتي ماعندي حرمة لا حول ولا قوة تنضرب .

بيرغ : مرتي حرمتي من تفوت مالكم شغل بعد .

وارث : تعهدت ووافقوا، جانك مو زلمة وتريد تهينها

لو ناوي على نيه وياها مو خووووش الغي

هل تعهد واضرب راسك بالحايط حيوووووان .

راحت امه تريد تشوفهم عافها وصعد وبيرغ

بنص الصالة بصف الدرج وكف ويصيح

_ احنا مو عبيد عندك تمشينا بكيفك

حلووووة هااااااي حتى بزواجي يدخل

عقد عليها قبل لا اعقدددددد انتَ منووو وتتعهدني

منوووو انتَ وتدخل بزواجي كلك خلگ نسـل منبوووووذ .

بقيت بصدمة ام وارث ورثت اعصابها وعاطت

بي تسكت بي وتدفعه حتى يطلع كل ظني

بعد هل كلام ينزل وارث ويضربه بس كمل طريقة

بكل برود ولا عبالك تجاوز متجاهله تماماً .

طلعت ام بيرغ من غرفتها مبين فزت مو نومتها

عبرت منهم وطفرت فوك ، دخلت غرفة ميمونة

وبعدهم بنص هل ليل واصواتهم ما هدت

وام بيرغ ترش على نار خلت بيرغ يگب

ويسب وأعصابه ضده، انقهرت ومتت من الخوف

على وارث شنو احساسه وهوَ يسمع هل كلام من اخو .

بقيت كاعدة على چرباية اكل اظافيري بتوتر

حرت بين اروح اشوفه وبين عيب واصلاً ميصير

اروح بيا وجّهه اروحله غريبة عليه لا يشوفنا احد

واصير علچ بحلگهم ، رجعت ظهري على مخده وتمددت

وبين أفكر بأهلي ، وبين كلام هذا الي فحط ومل

من السب الصياح وسكت بعد ما سمعت صوته

وبين خوفي على ميمونة من بندر

ومرعوبة ليكون شافني وعرفني هنا صدك انا بمصيبة .

انفك الباب وكفت مبتسمة من شفت وارث دخل

بيده اغراض دفع الباب انفتح على حيله اقترب يسألني

وارث : شلونها حرارتچ .

_ ما ادري .

_ اشوف ؟

_ شنو ؟

_ حرارتچ ؟

بقيت ارمش مثل الثولة وافكاري مدري شبيها

ضاربها فايروس تخيلت يخلي شفايفه

مثل ما امي تسوي على گصتي ويشوفها

سرت قشعريرة بجسمي وضميت ايدي شهرتني

_ لااا شنووو لااا زينة انا زينة .

رفع ايده يأشر بيها بمعنى شبيچ

وحط الأغراض على ميز بصفي وتقدم صار گدامي

مد راحة ايده حطها على راسي وأصابعه فوك شالي

غمضت وجسمي مدري شبي تشنج وايدي باد حيلها

مو بس ايدي كلي تخربط وضعي بلعت ريگي بصعوبة

وفتحت عيوني احس گوه افتح بيها ياا شبيه شصاير

انا مركزه بوجهه وهوَ نظراته على باب والكسر مالته

انا عشت بعالم و وارث بعالم ثاني بعيد كُل البعد عني .

وارث : حارة الحرارة كلش عالية .

مُـرجانـة : ها .

وارث : هاي اكل تاكلين وتشربين هذا العلاج

اخذي 3 اوقات لا تفوتين موعد وتاكلين .

مُـرجانـة : هسة تروح .

وارث : ديري بالچ الحرارة تخليچ ترجعين تفقدين النطق .

مُـرجانـة : ها اي اي .

راح على باب يفر بي منا منا يتفحص بي

وطلع بدون ما يكثر كلام ، وانا نايمة اكلت قليل

وشربت علاجي ثگلت عيوني وغفيت

كعدت من الصبح شفت باب غرفته مفتوح

وامه تنظف بيها رحت عليها وهمست

_ صباح الخير ، شنو وارث راح .

_ هلا خالة صباح النور، ما بات هنا طلع بليل .

اخذت السطل منها مال مسح ذبيت الماي بالحمام

وغسلتهن رجعت كلشي مكانه ونزلت وياها

البيت بدون ميمونة ما ينطاق جنت الوحيدة

ارتاح من احچي وياها ، ام بيرغ تفتر بالبيت

على شمل مرض توزع فايروسات بكلامها المسموم

حتى الجوارين ما يسلمون من لسانها وعرامتها

تظل بالباب لا ساعة ولا ساعتين وتدخل تاخذ

غيبتهم على هاي طلعت هذا فات وهذا زين وهذا شين .

بقيت على هل روتين يوم يجر يوم وصار اسبوع

سَــهم يجي ويروح وبيرغ يرجع للبيت ويروح

وهمام دخلته البيت خفيفه يضحك رغم حزنه

على اخته ، وسمعت منه وارث متواصل هو وبندر .

رجع بعد هل ايام سَــهم وام وارث جانت

اعصاب صاحت بي تسأل على وارث طلع ورجع بلغها

_ فد ساعة ساعتين ويجي ياكل عندچ حجيه .

راحت تجهز أكلاته وصاحتني وياها

ماعدها احد يعاونها بس خلصت صعدت سبحت

مستعجله وطلعت بالغرفة مخبوصه ابدل وارش بالعطر

وافترر واغني بصوت هامس وابخ عطر بالجو

رجعته وخليت إيدي على گلبي ونزلت متحمسه .

بقيت بالمطبخ انتظر الحد ما فات ركضت

على غرفة امه وهمست بخجل بس هذا حماسي شهرني

_ اجه وارث اجه خالة تعالي ركضي .

بقت بمكانها ولا عبالك حجيت تعجبت

لان ادري بيها طگ گلبها عليَّ ، بقت بمكانها

درت على صوته اقترب رجعت على مطبخ

وشلت كلاص ماي اول ما فات ابتسمت

مُـرجانـة : الله يساعدك .

وارث : هلا بالمرجان .

اخذه مني شربة دفعه وحده اجه همام من وراه صاح

_ افاااا زعلتيني .

_ يا ليش .

_ ماكو الله يساعدك ولا ماي تفرقه هاي تفرقه .

ركضت طلعت كوب ثاني صبيت ماي ومديت

ايده المقصود همام اخذه وارث شربه

اخذت مالته الفارغ مليته ورجعت وهم اخذه من ايدي

همام : شبلاك يول جنت بحرب .

وارث : لا المعنى ولي اخدم نفسك بنفسك .

هز ايده ودخل همام حتى ما شرب ماي

ومن بعده وارث ما طول ثانية يمشي وراه

دخل على غرفة امه تعاتب بي على غيابه

ام وارث : حارمني منك ، ومن بزرتك شبيك يمه

على اقل خليني اشوفهم ساعة انا غير جدتهم .

وارث : يمه شغل والله شغل كله فوك راسي .

_ غلست على اطفالك ماتريد تجيبهم ؟

وارث : خليهم بعيدين كل ما يجون هنا يوصلون للموت .

ما رضت وبقت حتى ما تقبل يبوس راسها

ومن بين كلامهم سمعتها تهمس بأسمي

طبگ الباب ظل وياها بالنص ساعة يتصايحون

طلع منها معصب وجهه دم محتقن صعد

فوك دخل سبح ورجع بدل وراح هي تخبلت

وبقت تحجي لهمام وبيرغ تالي عافوها اثنينهم

وراحوا على غرفهم بالساعتين ودخلوا

حمامة وغريب يركضون بيدهم ألعابهم

ومن بعدهم فاتت بنية تقريباً بنص العشرين

شابة فد جميل شكلها ومعالم الأنوثة بجسمها بارزززات .

تمشي وارث دخل وراها همام صار ورايَّ وهمس

_ امممم شعجب اليوم جايبها وياهم .

سألته مترددة

_ هاي امهم .

قبل جوابه دخلت سلمت على سريع وركضت

على اطفال فتحت باب غرفة ام وارث من شافتهم

اخذتهم تبوس وتحضن بيهم تشمهم .

راح وياهم تمدد على چرباية امه والبنية

بصف امه كاعدة تسكت بأطفاله وهذا همام دخل

بغرفة امه ، صعدت بالغرفة ساعة وصاحتني امه

بدون ما احجي دخلت على مطبخ ساعدتها وفاتت

البنية ترتب بالمواعين

وارث : زهرة .

_ اجيت عيوني .

ركضت اخذت غريب منه تغلس بيده وتضحك وياه

رحت اخلي لبن على سفرتهم واسمع همام يگول لبيرغ

_ صار كم يوم ما ياكل زين انتظروا لو تصيحون .

بيرغ : بعدنا ما متصافين روح انتَ سَــهم .

ركض سَــهم مد راسه ورجع عليهم

_ ولكم نايم .

همام : غافي بس تصيح بي يگعد .

بيرغ : خلصونا نريد نتزوهر .

طلعت منهم ورحت على غرفة نايم بدون مخده

فاتح ايده منا ومنا وعضلاته بارزة عمره

بالثلاثينات وشكله يوحي هو بعمر الثلاثينات

بلعت ريگي بثول وردت اطلع من فتح عيونه

خلاني اصك حتى ما اعرف افكر غمز وهمس

_ مُـرجانـة يا مُـرجانـة .

_ ها .

_ انتِ ها .

_ هذولي .

_ ياهم .

_ هذولي ياكلون .

_ مُـرجانـة .

_ يريدون ياكلوك .

مدد جسمه نرفع القميص طلعت بطنه والردن ضب على

ايده برزت اكثر وصارت اكبر عيوني حسيتها تبرق

وارث : شكو شهيق زفير فكري واحچي .

_ اخوانك يريدون ياكلون هذا الأكل جهز .

_ امممممم ، تمام اجيت .

طلعت ردت انضرب بالحايط همزين ما شافني

دخلت للحمام أعضّ بأصبعي اكلته اكل المسكين

غسلت وجهي بالمرايا كافي مُـرجانـة والله عيب

لچ عيب انا بنت غـاليـة ضـلـيل ايام وسنين

يحاول وياها ما رف جفنها ولا اهتمت

انا شبيه انا شبيه ياربي هو حتى ما يشوفني

بعيونه ولا ينتبه ولااا مهتمممممم

كافي ياربي اريد اصير قوية ما انهز مقابيله

ما احب هيچ ما احب هاي الأفكار دمرتني ما اريدها .

عدلت شالي ورحت على مطبخ ام بيرغ

تباع بوجهي وتبتسم ابتسامة خبيثة

وزهرة توكل بالأطفال وام وارث تسألها

شلون مدبرتها وياهم اثنينهم وهيَّ جاوبنها

_ احياناً وارث يساعدني بيهم .

نزلت الخاشوگة من اقتربت مني ام بيرغ تسألني

_ حلوة مو .

_ اي وحبابة .

_ دام دخلها بيتنا وعرفت مكانو بعني عاشگ

وارث ما يدخل على بيتو ناس غرب ما يحبهم .

بعدم مبالاة رفعت اكتافي ما مهتمه

طبطبت على رجلي وبضحكة كملت

_ وزهرة مبينه شخصية قوية وذكية

وحلوة وبعمرة تناسبه يعرف يختار ابن ساجر على ابو .

لزمت رگبتي بأرتباك وعيني على زهرة

تضحك وتمسح ايد حمامة وتبوسها

_ وأطفاله يحبوها ، وهوَ اطفاله مهمين عندو

ومو بسهولة يحبون شخص يخافون بس مبين يحبون زهرة .

خلت اكل بحلكها اطلع صوت من تاكل وكملت

_ وزهرة اكيد تغار وما تخلي وحدة دخيلة

بعمر المراهقة واجنبية بوسط بيتها وبيت زلمتها

وزلم الغربية اذا يعشگون كلام نسوانهم تصير سيف

يعني تودعين الملاعب كلها مثل ما اجيتي تروحين .

اخذت لبن شربت وشلت مواعيني غسلتها

وكل ما يجيبون مواعين اغسل وكلامها يتكرر بعقلي

وانتفض وابعده وارجع بلا سيطرة افكر لحد ما خلصت

زهرة اخذت چاي وراحت ، نشفت المواعين ورفعت

بيدي ارجعهن بمكانهن وشفت من بعيد زهرة

بيدها استكان وتقدمه لوارث وهوَ يحاجيها

وعادي يعاين عليها ويبتسم بوجهه ومنتبه

لتحركاتها ما يتجاهلها ابد ولا يتجاهلها .

وهذا تركيزي وگعني بفشلتي شاغت روحي من تزحلگ

واحد من المواعين وانا أخلي مكانه وضربني

بطرفه على عظمة خشمي وكع وتفلش على رجلي

صرخت واحير الزم بوجهي لو اشوف رجلي

بقيت مغطية وجهي وابجي وام وارث اجت تركض

هي وهمام وام همام ، سحبت ايدي امه وشهگت

جرت ايدي تغسل بوجهي واني أشر على رجلي

احس الوجع بيها اكثر ، طلع همام ثلج من الثلاجة

وكف گدامي رجع ايد وبتك ايده الثانية حط ثلج

على مكان الضربة بخسمي من الخجل تنزل دموعي

بدون ما ابجي بعد واطلع صوت .

كعدت على كرسي رجلي يطلع منها دم

ما اشوف غير همام راح ورجع شايل نجانه

بيها ماي خلاها قريب مني واشر عليها

همام : خلّي رجلج اشوف بالله منين الدم .

التفتت على صوت وارث عيونه دم خازرني

خليت كلينكس عليها ما قبلت حتى اخليها بالماي

ومن فشلتي همست

_ ما بيَّ شي والله زينة اني هووواي زينة .

صعدت اجبر بروحي ارفع برجلي

دخلت للغرفة ودايخه من ضربة وجهي مسحت دموعي

وكعدت بالگاع اتلمس برجلي انوب حتى هذا الكلينكس

بعد ما ينشال لزگ بالدم والجرح وبس احركه

تشوغ روحي احسها تريد تطلع ، بقيت احرك

ايدي سريع وابجي بكل حيلي اناشغ بدون صوت .

دخل عبالك عنده مداهمة ومدري شبي اعصاب

وارث : امشي بالله امشي گدامي .

_ وين ؟ مو قصدي وگع والله .

_ اطلعي بس امشي .

_ راح تطردني ؟

فتح عينه ورجع طبگ حاجبة مستغرب من كلامي

وارث : امشي للحمام .

_ شنسوي بالحمام شعدنا ؟

راح قبلي ترددت بس من اخاف عقلي بعد ما يفكر

سمعت صوت ماي مفتوح وكفت بالباب وهوَ

يمد بيده يشوف الماي يدفي بي يمكن

وارث : تعالي .

_ ما بيَّ شي .

_ بس تعالي لا تعانديني تعالي .

وكفت قريب من الماي ولساني صار ثگيل

مُـرجانـة : ليش تصيح .

وارث : خلي رجلج هنااااااا .

مُـرجانـة : راح اخليها بس .

وارث : بس شنو ؟

مُـرجانـة : عصبي ليش عصبي .

زفر انفاس غضبان ، جاوبني من شافني انتظر جوابه

وارث : ضايج .

مُـرجانـة : مني .

وارث : لااااا .

_ ها .

_ مني .

خليت رجلي بالماي الدافي وعصرت طرف دشداشتي

عطت من سحب الكلينكس من رجلي ورجع الدم

يصب من رجلي قويت قبضت ايدي اكثر من رش

ماي اكثر وبدون ما يعاين بوجهي سألني ومتعصب

وارث : هاي بنت الكلب شحجت وياچ .

_ منو ؟

وارث : ام بيرغ القندرة بنت القندرة انعل ابوها لابو اهلها .

بقيت مركزة برجلي وهوَ ثاني رجله ونازل

يشمر عليها ماي ، رفعت عيني على تفاصيل ايدي

وراحت عيوني تحفظ ملامحه عيونه وسحبتها

رموشه طويلة وقصيرة بس هواي عنده رموش

رفع عيونه شافني ما شلت عيني منه

مُـرجانـة : زهرة امهم ؟

وكف رفعت راسي گلبي انقبض من قربه

بقيت بس ارمش ومن كل عقلي انتظر جوابه

وارث : هاي ام قندرة گالت مرتي مووووو ؟

مُـرجانـة : لا ، گالت وارث عاشق زهرة .

رفع ايده يأشر على نفسه مضيق عيونه

_ انا عاشگهاا ؟

مُـرجانـة: اي گالت وارث ما يدخل على

بيتو ناس غرب ما يحبهم ، وگالت زهرة حلوة

وذكية وبعمرك وكلشي انتَ تحبه بهاي شسمه

النسوان بيها .

من عصبيته عض شفته متحلف بالشر

وارث : وبعد احچي شگالت اسمععع منچ بالله .

مُـرجانـة : ما گالت بعد شي .

_ ابد .

_ اي .

_ جذابة .

طلعت وهوَ راح على غرفته رجع بيده

معقم لونه جوزي ولاصقات جروح

كعدت على سرير ونزل هو يبخ معقم

مُـرجانـة : مرتك ؟

_ مربية اطفالي .

مُـرجانـة : من تتزوجها اطردوني بعد ما تحميني .

وارث : انعل ابوهاااااااا اليووووم سممم بيها سممم

تزرررع سمممم عبالها ما اعرفهاااا .

_ لا تنزلين دموعچ .

_ تعبت اريد امي .

_ اششش لا تحجين هيچ .

_ راح تمل وتشمرني ؟

_ من حمايتچ ما امل انا والله .

_ والله ؟

_ اصيرلچ سلف وأهل مُـرجانـة بس لا تبچين .

طفرت من سمعت صوت امي بيرغ ورانا تصرخ

بعلو صوتها لمت البيت علينا ضربته بركبي بكل حيلي

على حنچه وهوَ كمز عض لسانه من الضربة

بحيث ظل ينقط دم وهوَ لازم حلگه ويصرخ

_ انعل ابهاتكممممممممم عضيت لساااااني .

فاتت ام بيرغ وتضرب بالباب بكل قوتها

وهوَ متعجب فاك عيونه وحلگه من صلافتها

وقدرتها شلون لمتهم وتصرخ

_ لاااا تاخذنا بصوووتك شني مگعدنا بنص الحرررام

مخلي بت صغيرة بحجة دخيلة عندك وتختل بيها

يا بالحمام يا بالغرفة .

جرّ كلينكس وكف مقابيلها يضحك مستصغر بيها

وارث : صيحي بعد علي صوتچ اعرف غايتچ

وما احقق مبتغاچ ، لعبي لعبتچ وانا ما اتنفس

افعالي تسولف اخليها لعبي يلة لعبي .

ام بيرغ : عجل مو تستشرف براس ابني

والله ماكو حرمة تنضرب بهذا بيتك

احناهم ناس مصلي ونصوم ما نرضى الحرم يخش بيتنا .

كلها صعدت ونظراتهم اريد اطم روحي من نظراتهم

ضميت روحي بظهره اجر بطرف قميصه وهمست

مُـرجانـة : خزتنا هاي خزتنا سكتها

اخذتي عزا اخذني منا .

وارث : الحرام شفتي بعينچ ؟

ام بيرغ : اي بعيني هاااي اللي راح ياكلها الدود شفتكم

تريدها عوووف الحرام يا ابن ساجر وتزوجها .

تمار من صفحة مجطول والدم بطولة

وشاهين ابنه من جهه ثانية ما نعرف منين الدم ينزف

طلعت حرمة تمار من البيت شافتهم وگعت متخربطة

بگد ما دگت ولطمت على وجهه .

ضـلـيل صاح بعلاء ابن تمار ومقدر يشيلون تمار

وهوَ راح على شاهين يصحي بي ويشوف منين الدم

تعاونوا هو واثنين وياه احذوا بالسيارة وراحوا .

عمتي وبناتها يغسلون بوجه ام شاهين

شالوها فوتوها وهي تلطم وتصيح بأسم شاهين

تخبلت خبال على ابنها ، سويت كوب ليمون

واجيت اشرب بيها وادعي محروك كلبي على شاهين

وخبصه صرنا من العالم والجوارين

وسمعوا عمامهم وشيوخ تلتم بالسيارات ويرحون

وراهم على مستشفى ، عشت يومين بالمطبخ

يا جاي يا اكل يا فراشات يا تنظيف انكسر ظهري

وحتى اخبار ما نعرف غير ها بعدهم ها عمليات .

صعدت مهدود حيلي صحت بنقش تاخذ مكاني

بين ما ارتاح كم ساعة ، للمغرب سمعت صوت صريخ

خليت ايدي على گلبي واول ما نزلت ام ضـلـيل

شمرت على درج استكان چاي فلشته وعاطت

_ ول كفي دعاووووي على ولدي ول هجمتي

بيوتنااااا ، شردتي بنتچ الـ**** حتى يسون بيها ***

وما خلصنا منچ ولا منهاااا ذبحوا ولدنا الله

لا يوووفقچ بنت ذياب .

تجاهلتها والخاطر ضـلـيل كملت شغل بالمطبخ

على اكل وخدمة ومر اربع ايام ولا واحد بيهم راجع

دخلنا باليوم الخامس ورجع ضـلـيل تعبان

لدرجة ما يگدر لا ياخذ وينطي بالكلام بس طمنهم

_ تمار تحت المراقبة يگولون احسن

وشاهين ضربته بصدره يحتاج مراقبة وراحة .

ردت اروح اشوف احتياجاته عفاف ودلال عدهن

سباق حمام جاهز فراش نظيف لبس مريح

كملن وطلعن وهوَ نام ساعتين وطلع للشيوخ

والذبايح ما هدت والمشاوي والطبخ منا والجايات

اثنين معزبين على جايات الزلم وما ملحگين .

وعشر آيام بالمضبوط طلعهم ضـلـيل والذبايح

تحت اقدامهم صارت تتذبح وحلف ضـلـيل

ما تنطبخ تتوزع على كل بيت محتاج دفعة بلاء عنهم .

راحوا العالم الغربة كلها وبس اهل البيت بقينا

فرشنا سفرة على طول الصالة واصب بالأكل

وكلهن يرتبن ويايَّ عفاف تساعدني ، بس خلصت

اخذت بطل ماي كُله شربته احس بعد ماعندي طاقة

اوكف على حيلي ، غسلت وجهي ورحت اريد اكعد

شاهين بصف ضـلـيل وماكو مكان ، صار ايام بس

من بعيد اشوفه ابد ما نلتقي بحيث من شافني

الحد ما كعدت هوَ ينتظر مني سلام ابتسمت وسلمت

_ الله يساعدك شيخهم والحمدلله على سلامتهم .

هز راسه عود يجاوبني هزيت ايدي وكعدت

وعزيزة تضحك علينا هي ونقش

وهذا شاهين من شافها تضحك صاح

_ عمي هاي نقش الحد الأن الحمدلله

على سلامتك ما سمعت منها .

ضـلـيل : يولووو عليش ما تسلمين عليَّ

لا يروح تصير عندو مضاعفات .

انتظرت نقش تبلع اكلها وايدها على شفايفها

وكلها عيونها عليها حتى اني بس اعرفها تجفص

نقش : عمو ما شبع الحمدلله على سلامتك

لا ظل جبير لا صغير لا بنت لا ولد ما حجوها شبع .

ضـلـيل : سمعت .

لزم شاهين صدره وراح همس بأذن ضـلـيل

طگها ضحكه من هاي الرنانه وكفخه على راسه

ضـلـيل : احجيها لا تصيرين بخيلة بوية نقش .

نقش : عمو طگوني طلقة خلي ينطوني فلوس

بگد ما اخذ شاهينو فلوس واحجيها .

ام ضـلـيل : تفووو من عيونچ .

نقش : ما احس ما احسد لا تخافين .

شاهين : بلاها الطلقة هساع اشيلهن كلهن

واخذيهن حلال عليچ .

ضـلـيل : بس گولي الحمدلله على سلامتك .

نقش : جوعانة اكمل اكل وافكر اگول لو لا .

ضـلـيل : بنت امها انا اگلك خلي تمر كم يوم وتگول .

نقش : والله العظيم عمو دا افكر اگول

فد يومين واگول ههههه .

شاهين : دا امووع عمو .

كملنا ونقش جنها عماتها ما وكفت تدردم

بس تحجي وتضحك ضحكتها تذكرني بمرجانة

ابتسمت وغصيت بثاني خاشوگة اتمناها يمي هسة .

لملمنا السفرة واخذت نقش الجاي وانا رحت

على ننوس كعدت اوكلها لان حضرت جنابها

تلتهي بتلفون ابوها وتعوف الاكل ، وزعت نقش

الجاي وصلت الشاهين انا قريبة منهم همس

_ عليچ الله .

نقش : مليون واگول .

_ لازم انتِ تنطيني .

_ يا ناقصك فلوس .

_ اي والله ناقصني .

غمزت وهمست وهوَ يسمعها عبالك تعاير بي الحقيرة

_ ها ها تجمع حتى تتزوج هاي

البنت اللي تحبها من طرف واحد .

شاهين : اي هاي غـاليـة كلشششششش .

نقش : يلة شتسوي اصبر على حصرم تاكل عنب .

شاهين : ههههههههههههه يمتى اكل عنب يمتى .

راحت كملت توزيع وقبل لا تطلع رجعت تسأل بي

رافعه حاجبها وايدها على خصرها

نقش : اكلك انتَ تريد انطيك فلوس تتزوج براسي ؟

شاهين : لا عمي ما اريد اني انطيچ الفلوس كلها .

نقش : عبالي .

التفت شاهين على ضليل وصاح بصوت مسموع

_ عمي إن جان گلبك لوعوه، گلبي بمكوايه کووه .

ضـلـيل : كل لشّة تتعلگ من كراعها حبيب عمك .

ام ضـلـيل : هذولي شمالهم يمه فهمني مثل اطرش بالزفة .

ضـلـيل : موزين تعرفين يمه اخافن عليچ ابقي اطرش بزفة .

طلع للديوان هو وشاهين واخوانه هناك

كملت اكل ننوس رحت اغسل ايدها

واسمع بناتها يحچن براسها ما غسلت المواعين

وبقت كاعدة بحجة ننوس تتمضحك گدام الشيخ

وهو الشيخ شدعوة عليَّ يفهي ويتمضحك

گدامها وشنو محصل منها ولو تزوجي وتخلصي منها

وانا بيه مرض اسمه اردهن ما اسكت

غير ابطل منه واخليهن محروگات بدمهن لاا اجاوب

غـاليـة : صار ايام افتر بنگلادش مو مثلي

تالي على هل كم ماعون بقيتن تاخذن غيبة

وبعدين ما تروح تزوجه .

ام ضـلـيل : بنت النغل ازوجو عليش ما ازوجو .

وانا اصعد على درج وننوس بيدي جاوبتها

غـاليـة : روحي دوري وتعبي روحچ غيري

ما يريد وما يعوفني ومايحب غيري هسة

لو تزوجي عشر نسوان بعدي .

ام ضـلـيل : امداها من دنيا شيخ ال ضـلـيل ألچ

يالبغدادية ينحلف بأسمه وحق الله شعرايه

من شواربو تسواچ انتِ وكل اهلچ .

غـاليـة : هاي شنسوي بعد حكمته ونصيبه

شيخكم وتاج راسكم يوگع چفي بحُبي وغرامي .

عاطت تفشر فات علاء ومقتدر وهي بعدها تسبني

دخل هو ضرب الباب اربع ضربات وعاط

_ بنت ذيـــااااااااااب .

غـاليـة : شيخهم .

ضـلـيل : حسچ طالعععععع بنت ذيـاااااب .

غـاليـة : بس صوتي طالع ؟

ضـلـيل : ما اسمعععع غيروووووو .

غـاليـة : على جايات اسمع غيره .

ضـلـيل : ابقي راددي گاعد هين ألچ انا .

رحت فتت اسمعه يتصايح وياهم

وهيَّ تحچي الصار وهوَ انفعل لأن بعدها تحچي

بالزواج وكلها دخلت بسكون وصمت من دخل غرفته

وضرب الباب ضربة سببت هدوء بگد ما رجت البيت .

دقايق واجت عزيزة بيدها تلفون شاهين گالت

_ هاي امچ على خط .

جاوبتها وعزيزة راحت بقيت احچي

الصار من راحت لليوم شصار اخر شي گالت

_ راح انصحچ تاخذين بنصيحة امچ

تعيشين ملكة ما تاخذبن اگلج الله وياچ

وابقي على گالت وحجت وسب وسبني وصاحني وضربني .

عدلت گعدتي واستمع لكلامها متت بدمي

بس مدري شبيه مبتسمة ومتردده بس كملت

سلمت وراحت رجعت التلفون بيد ننوس

وانا بقيت بالغرفة اروح وارجع بحيرة

دخلت للحمام اسبح وكلبي ومشاعري متلخبطه

طلعت انشف بشعري وصافنه على روحي

والله اخاف انوب يصير بيَ شي من يشوفني .

رحت على كنتور فتحت الجنطة جابتها امي

اخر مرة اجتني هيَّ وياه ، طلعت لبس فستان

نوم مخصر على جسم الظهر مفتوح وتنشف

على رقبة تشد الفستان ، قفلت الباب لبسته

ورجعت نزعته مستحيل عززززا لاااا ابدددددد

شنو اسوي ابدددد لااااااا شيلي الفكررررة غـاليـة

معليچ بـ امچ ما تعرف علاقتكم يبوووو عليَّ يبووو .

كعدت والفستان بين ايدي رحت على مرايا

طلعت جنطة صغيرة رسمت شفتي بلون احمر

ورفعت رموشي رتبت وجهي بالكامل

واخذت بطل ماي اريد اغسله ، تالي فتحت

القفل اروح اغسل بالحمام مو من كل عقلي

وكفت بين غرفتي والحمام ورجعت من سمعت

احد يصعد قفلتها ، وبلحظة مدري شسميها

لبست الفستان وشسورت شعري على طوله

لنهاية ظهري خليته مفتوح لبست

دشداشة فوكاه بس صارت بالوحدة

تعطرت ونزلت والبنات اصواتهم بغرفة عزيزة .

جريت الشال زين على راسي اريد اتبوش

من الخجل ، تعديتهن گاعدات على صوبة

حتى دلال وعفاف بس مطفيات الأنارة

مو كلها مشتغله ، رجلي ترجف ما اعرف شلون وصلت .

دگيت الباب ودخلت بسرعة وطبگته

متمدد على سرير ايده على عيونه

وبخار يطلع من الحمام بغرفته هسة طالع

من شافني رجع ايده ونتر

_ بنت ذياب روحي مابيَّ حيل حجي ومشاكل

دايخ منّ لغوة الناس ولعبانه رووووحي .

أبتسمت ورفعت الدشداشة شمرتها على جهه

والشال وياها ، فتحت شعري عدلته والفتت

رفع نص جسمه مستند على سرير جامد

بس عيونه تتحرك تاكلني من فوك لتحت

رجعت شعري بالكامل بحركة بطيئة ومشيت

عنده والابتسامة ما فارقت وجهي عكس

الحروب اللي عشتها بداخلي .

كعدت قريب منه على طرّف الچرباية

العب بشعري صار يرمش سريع يرجف حاير

شنو يحچي شلون يتصرف

ضـلـيل : هاي شني سكرات الموت ؟

رفعت راسي وضحكت بعلو صوتي سحبني

من خصري يهز براسه وايده ما مستوعب

_ شنو غـاليـة شصاير .

_ شصاير شيخهم .

_ مسويه طرگاعة مسامحچ على

على منظر لو تطلعين ذابحة ابوي .

وانا اضحك بس متت بدمي من الخجل

اول مرة من زواجنا لليوم ألبس بهل طريقة

وابد ما شايفني بهل طريقة ، نزل راسه باس رگبتي

وابتعد صافن بوجهي يتلمس شفتي يمسح

بالحمرة يشوف بيها غمض عيونه ذبلت

فتحها تلمع ومال راسه لزم وجهي

ضـلـيل : تريديني ؟

_ ما ادري .

_ احچي شي غـاليـة .

_ بس اريد نعيش طبيعي مثل كل المتزوجين .

ضـلـيل : يعني عادي .

_ عادي .

_ عليچ الله صدك .

_ والله صدك .

_ ول احبچ وحق الله ومحمد اعشگچ انا عاشگچ .

قرب نفس اخذ شفايفي بدون مقاومة مني

وكل ما يزيد بلمساته واريد ابعده كلامه

ولهفته تمنعني ، بعد حين نمت على صدره

راسه بشعري يجر النفس من كل گلبه وحاضني

بكُل تملك ، والأول مرة احضنه واغمض عيني بحضنه

بلا مشاكل ، شعور غريب وأمان بنفس الوقت

وهمساته تخليني ابتسم طول ما انا بين ايده

ضـلـيل : ابقي عندي مـن انتِ عندي اعيش ملك زماني .

رفعت راسي مبتسمه ورديت على كلامه

غـاليـة : كل يوم راح تصير ملك زمانك .

ضـلـيل : كل يوم تجين هين ؟

_ اي .

_ بهداي على گلبي ما يتحمل غـاليـة .

_ يلة بعد ما اجي .

_ انتِ تحسين شصاير بيَّ هساع .

_ گلبك دگاته سريعة .

_ وضعي متخربط شلون يوگف الزمن ؟

باس راسي قوي وجرني اكثر بحضنه

نمت يمكن قبله وتأكدت من گعدت الصبح

كاعد يشرب جگارة وانا اسداريت همست

_ كاعد .

ضـلـيل : جرّبت شعور ” ما نمت من الفرحة ” .

ردت اروح جرني بحضنه باس وجهي يترجاني

ضـلـيل : تنقلين كل ملابسچ عندي وتبقين هين .

غـاليـة : بس هاي غرفتك الخاصة ؟

ضـلـيل : وتصير خاصة بينا انا وشيخة ال ضـلـيل .

عرفني رافضه الفكرة من ما جاوبت وضحكتي تسليك

باس خدي وطووول هووواي طول

ضـلـيل : عوفيها الفكرة ما عجبتچ

زين حلفي كل يوم تچين ؟

_ والله كل يوم اجي عندك والله .

_ شبيچ انتِ مريضة ؟

_ هههههههههه ضـلـيل .

_ نظر عيونو يقبلهم كلهم وانتهوا لبعدچ .

اريد بس اروح خجلانه منه منت بدمي كافي

الملم بروحي بالغطوه حتى ملابسي ما اعرف وين

منعني وبخوف وجه السؤال والرهبة واضحة على صوته

ضـلـيل : غـاليـة الغالية اذا هذا .

_ شنو شيخهم شنوو ؟

_ اذا صرتي حامل .

_ يا بعد وكت .

_ اعرف اعرف بس اسمعيني .

_ اسمعك .

_ اذا صرتي حامل هم تمنعيني احس بالطفل

وما اريد اذكرچ بس من تولدين الطفل عادي

تنامين عندي حتى يكبر جدام عيني ؟

شود ذهني لدقايق وانقهرت انمرد كلبي

على حالته ، قربت روحي طبعت بوسة خاطفه

على طرف خده وابتعدت اجاوبه

غـاليـة : وعد نعيش كلشي سوية

فترة الحمل والولادة ونجهز كلشي انا وياك

واحتمال مفكرة نبني سويت انا وياك وأطفالنا .

ضـلـيل : مفكرة ؟

_ اي مفكرة .

_ مو نفكر .

_ لا شيخهم انا افكر .

_ وانا .

_ تنفذ .

_ وانا الممنون .

نهضت ختلت بالحمام بدلت وطلعت مستعجله

صعدت فوك بوجهي للحمام لان وجهي ملغمط حمرة

غسلت سريع وبدلت ونزلت ما اعرف اذا

الصار صح لو غلط بس انا مرتاحة وبطلت اخاف .

قبل لا انزل وانا اعدل بشالي ودشداشتي

اسمع بصوته مبين وتكف بالمطبخ يضحك

كل ضحكه منه تجيب التايهه وامه وعفاف تسولف

وياه وهو منطلق ودلال تعدل بالبشت مالته

مخلي على اكتافه وتعدل بالعگال تمسح بظهره

وهو يصيح عليها معدله هاي معدله

ووطلع محفظته يورق فلوس لأخواته ونسوانه

وعمي تصيح وامك من دخلت جان لازم ضبه بيها

فلوس وكاعد يشمر يحضنها ويتغزل بيها .

اول ما دخلت وشافني رفع ايده اعلى شي

وصوته يدوي دوي لكل البيت ، وكلها موجودة صاح

ضـلـيل : هلا وبعد هلا وبعد هلا وبعد هلا وبعد

هلا تاج راسي وراس ال ضـلـيل كلهم من چبيرهم لصغيرهم .

يا گاع نشگي وبلعيني ردت افوت واموع بهدومي

ونقش تضحك بصوت عالي وعزيزة وياها

وامه عاط بي ما راضية على كلامة

_ شنو تاج راسك وراس ال ضـلـيل ول عيب شيخنا .

ما احس غير جرني باس راسهم وجاوبها

_ وحق الله تاج راسي وراس العشيرة .

زعلت مدري شبيها جريت روحي منه وفتت بالمخزن

بحچة اطلع اكل ختلت صاح بيها

ضـلـيل : هسة انا من ال ضـلـيل انتِ مو من ال ضـلـيل

انتِ عشيرتچ مو مثلنا وانا شيخهم بكيفي

غـاليـة تاج راسي وراسهم بكيفي .

هو اذا صلف امه صلفه ولسانها اضعاف لسانه جاوبته

_ ها لازم متممها وياها تحضن وتبوس ورايق

اليوم توزع فلوس وتضحك شكيت بيك انا .

طبگت الباب من سمعت ضحكته بعد فلا اطلع ديلة

ام ضـلـيل : لوتي هذا ملعب هاي البغدادية ليلها كلو

تلعب بحضنو سواها تاج راسو وراس العشيرة .

ضـلـيل : ههههههههه ول يماااا اعشگهاااااا اعشگهاااا .

هو هيچ حچه دفعت عزيزة الباب رفعت ايدي

على راسي هو يرفع امه تكبس ما اتحمل

رجعت صعدت جلفت الفوك كله بس خلصتوا

نزلت كملت الشغل وياهن وفاتت حرمة كلش

جبيرة اول ما دخلت نغزني كلبي من نظرات عمتي

اريد اسلم دخل مقتدر وتمار وياها بس گلت سلام

عليكم ونزلت ابوس بيها فات ضـلـيل عمتي رفعت

صوتها من سألتني عجوزهم انا منو

غـاليـة : حرمة ضـ ..

ام ضـلـيل : ارملة عـابد وام بناتو .

كلها التفتت تباع عليها عفتها وحتى ما صححت

خليتها بيد ابنها لأن كلشي صار بوجوده

بس دخل هل ليل وخلص النهار الديوان والكراج

والشارع تحول مسلحين انواع الاسلحة رافعين

وكلها لافين وجوههم بالغترة ودخل واحد يهوس

ما افتهم على كلامة بس سمعت غسل عار والموروثين

ضربت الباب مال مطبخ اكثر من مرة من طلع

ضـلـيل وشاهين يوجهون بالشباب

التفتوا على باب اجه شاهين يركض يسألني

_ شكو شيخة .

_ شصاير .

_ هل ليلة ناويين على شر على اولاد ساجر الموروثين .

عيوني صارت تغوش طلبت يصيح ضـلـيل

بس راح باغه شفته يجي رحت على غرفة

دخل يعدل بالبشت والعگال

_ ها غـاليـة .

_ ضـلـيل شصاير .

_ هدرو دم اخوي وابن اخوي وولد عمامنا

نهدر دمهم مستهينين بينا ربع الموروث .

عطت ومرجانة صارت بين عيوني

_ بنتي عنده اذا تأذيهم يأذون بنتي .

_ مو اغلى من اخوي ولد اخوي .

_ لاااا ضـلـيل لاااا الخاطري لااااااا لتخليها بهيچ موقف .

_ وصلوا عدهم ومن العصر هذولي وجبة ثانية

راح اهدهم عليهم ، وگع اخوهم سهم الصغير بيدنا .

_ عزززا صخام بوجهي صخاااااام بوجهي .

_ وارث ما يظهر نفسه

لازم نلزمو من إعزازو وعزازو اخوتو .

ثقل ميزانك بذكر اللّٰـه:

– سُبحان اللّٰـه

– الحمد للّٰـه

– لا إله إلا اللّٰـه

– اللّٰـه أكبر

– سُبحان اللّٰـه و بحمدهِ

– استغفر اللّٰـه

– اللهُم صلِ على محمد وال محمد .

الثالث عشر من هنا