رواية رماد الاعتراف الفصل الخامس 5 بقلم زهراء سعد

دعني اسير لوحدي

الحر يهوى التحدي

يامن تريد انتحاري

وحدي اسير بمهمً

في كل انحاء بَلاءِ

_ دخل الغرفة المستشفى بخطوات سريعة جنة ديركض

وييينك عقييل.. عمتي شلون صارت؟

جنت كاعد يمها و أيدي متمسكة بأيدها..

فارس: زينه لا تشيل هم

وكف يباوع الها بنظرات الاستغراب

صادق: شصار وياها؟ اني وصلتك اليوم الصبح و هي وحده بالبيت و مابية شي

_ مابيها شي بس مرتفع ضغطها

_الف الحمدلله عدت سلامات، ثواني لازم اخابر عمي ساجر و اطمنه اكيد باله يمكم

_اصلا هو يلي بلغني

_ماعرف، خابرني من زمان كالي عقيل اخذ امه بسيارة و مبينه حالتها صعبة هسه تروح تشوفها

بس جنت بالعيادة و ماكدرت اجيك، اعذرني خوية

_ساجر شمدري؟ راح اتخبل هذا شلون يدري بكلشي

_يمكن الجوارين بلغو مابيها شي عقيل

_مستحيل! اني انتبهت محد جان موجود من طلعت

تقدم ليكدام و صار يتفحص الضغط..

_مرتفع ضغطها حيل ليش لسه ما كتبولها تحاليل لو مفراس. شصاير وياها.. عقيل

_ مو انت دكتور افحصها و شوف

_افحصها بعيني بس غير اعرف السبب ليش هيج صار وياها…. وين تحاليلها؟ العلاج اي شي انطيني خلي اطمن عليها

رديت بتعب: فوك راسها بالعلاگة البيضة

اخذ التحاليل يشوفهن، رفع راسه مصدوم: هاي جلطة

_بس ربك ستر حفظها و خلاها دايمة على راسي

_الف الحمدلله

دقيقة هسه اجييك

ابتعد عني مسافة بسيطة طلع الجهاز اتصل مدري شنو حجة و رجع سدة بس جنت متأكد جان يحجي ويه ساجر

صادق: و هسه شكد لازم تبقى هنا

فارس: الدكتور كال الباجر الصبح حتى نتأكد من حالتها و هم هسه ضربوها ابر و نامت على أثرهن

مشغول؟ عندك شي

صادق: لا والله ماعندي شي اجيت اشوفك و اطمن على صحة عمتي

فارس: ابقى يمها بين ما ارجع

صادق: ليش شعندك؟

فارس: عندي شغل بالمستشفى اليوم لازم اخلصه

صادق: ميخالف بس عقيل مو تتأخر

فارس: ربع ساعة واني يمك..

طلعت من الطوائ و رحت على ردهة النساء

حجيت ويه الممرضة و طلبتها بالاسم: رضيه گطع

انتظرت واكف بالممر عشر دقايق و طلعت متوترة

و ايدها ترجف

_صاير شي، شبيج؟

_لا ماكو شي بس بالي يم امي حالته جاي تسوء اكثر و اكثر

_ما كتبولها علاج؟

_كتبولها بس ماعندي اطلع اشتريلها بس جبت نص العلاج من صيدلة المستشفى مجاني

_جيبي الوصفة و تعالي وياية

_سيدي ماريد ازحمك، خليها على الله

_لا ترفضين شخص يقدملج المساعدة ويد العون

لا تگطعيين صله الاحسان و المعروف يمكن اذا ماقبلتي المساعدة مني امج تسوء حالتها و تتأذى

وقتها انتي مراح تسامحين نفسج مو صح

_ صح بس اني معتمدة على ربي العالمين من الصبح واني ادعي يساعدني

_و ربي دزني الج و صرتي ابالي و رجعت التقيت بيج.. جيبي الوصفة و تعالي وياية بسرعة

عايف امي يم ابن عمي ماكدر اتأخر

راحت جابت الوصفة و اجتي تمشي سريع اخذتها

من ايدها و سألتها

_الى الان ماكو تحسن بحالتها؟

_ورا ما اخذت علاج المستشفى كعدت و حجت وياية بس بعدين رجعت تأذت من خلص مفعول العلاج

_زين هي شوصلها لهاي الحالة؟

_سيدي صار يومين ما ماكلين ولا لكمة عيشتنه على مي و نكعد جوا الشمس ساعات، امي بالاساس عدها روماتيز و فقر دم و مفاصلها و ماكو علاج، طبعا تتأذة.. بس انت ليش اجيت مرة ثانية ورا ماعفتني و رحت تركض؟

_امي واكعة لكيتها و جبتها للمستشفى

_ماعدها غير العافية و تكوم بسلامة

_تسلمين..

رضية اريد اعرف التفصيل مثل ما واعدتينيي..

_شوكت تريد احجيلك اني جاهزة و اتمنى تنفذ كلمتك مثل ما وادعدتني و اطلع اختي من السجن

_ راح أبذل كل جهدي حتى تطلع مستحيل ابهذل ناس بريئة بسبب افعال واحد همجي مثل أبو.

_بس خاف هل شي يسبب النه مشاكل بعدين

_اني موجود بأي وقت تحتاجين لأي مساعدة

وصلنه لصيدلية اخذ الراچيته و انطاها العلاج و شرحلها شوكت لازم تاخذة

و قررت ابدي بشغلتهم حتى يرجعون للبيت حالتهم متسمح يرجعون يكعدون جوا الشمس بساحة المقر مرة ثانية

خابرت واحد من جماعتي و طلبت يطلعون كشف حتى اذا ماكو شي هسه يرجعون للبيت و الاهم

بدون علم سلطان، بس بلغني سلطان موجود و مراح يطلع غير باجر الصبح و هيج تأجل الكشف!

القصة يلي اعتبرتها انتهت، هي بالاساس بالبداية

مراح تنتهي لحد ما اني انتهي..

مو ذنبي لو انخلقت من دم يمسونه الدم النجس!

بس اني مو نجسة!

مو ذنبي لو تربيت بين فئة ما تعرف اصلها و هذا مو سبب كافي حتى تكرهني

ولا ذنبي و اني من دون الناس انولدت بيت گرايب

تحب الكرهيه و الحقد

ولا ذنبي انخلقت يم اهل كل حلمها تحصل فلوس و النسوان ترتاح ..

اني من أبشع فئة بالمجتمع بس اني ما اشبه قصة اي احد. انخلقت بوسط ناس متخاف من الحرام ولا من العيب السحر و الرقص الغدر و القتل حلال هو شيء مُباح لكن عيب و رب العيب تكعد بيتك و تسكت

و تكول اني مالي علاقة بأحد هذا مو عذر بنهاية اني منهم و بيهم ولازم اتعلم كلشي منهم!

بس جان يمنعني دم ثاني اختلط بدمي و دم والدي الله يرحمه و يغفرلة.

هو دم امي و ألها

هي شي استثناء هي تختلف عنه تربيتها و تفكيرها

مشاعرها و أيمانها امي من عشيرة السادة يلي ناس تهابها و تحترمها خصوصًا بجنوب

ناس الها سمعتها، تقاليدها ناس تخاف حييل من العيب، ناس تفكر شرف العائلة هي المرأة.

اني ماجنت ادري بكل هذا إلا من اجينه الكربلاء اجينه

مشردين هاربين من الموت و الهلاك يلي يفتر ورانه

الله سبحانه و تعالى فضل علينا و ساعدونه ولد الناس الخيرة

و سمحولنه نكعد أبيت مهجور و تعبان بس ابلاش

جنه بس نخصر افلوس على اشياء اهم مثل الأكل و الكهرباء لو على اشياء للبيت كل هذا اني جنت مسؤولة عليّ ، و مع كل هذا امي ما جانت راضية

طول الوقت اتكول شكد ما نتهجر تاليتنه بالبصرة

هناك اصلي و هناك اموت و هناك اكمل حياتي

اهواي صارت مشاكل و ياما و ياما امي اخذت عباتها و تاخذ رضية و ياها حتى تشرد و تروح وحدها

لان ابوية جان يرفض روحتها و مستحيل يقبل نعيش هناك.بس تؤجع خايبة بسبب رضية و هي تقنعها نرجع و نحجي ويه ابوية حتى انروح كلنا.

سؤال جان يحووم براسنه داائما.

و هذا السؤال دائما جانت امي ترفض اجابته

ليش؟ محد يعرف بينه..

بيوم من الايام ابوية طلع جان يريد يدور على شغل

و بقى البيت ألنه..

صبت رضية المي على الزيت الحار

و النتيجة لليوم ماجنت مختيلته..

هنا استوعبت امور تندمت لان مامشيت ورا كلامها

جنت اعاندها و اكسر كلامها لحد ما وصلت لهذة المرحلة اليوم وحيدة سجينة بين الحيطان..

من وسط البصرة عائلة صغيرة محد يعرف عنهم اي سر اي شي. حرفيًا محد يعرف عنهم شي لحد ذاك اليوم!!

عائلة السيد ابو راجح..

السيد متزوج اثنين الاولى بيبيتي ام امي و الثانية ام سلمة يلي هي نفسها ام راجح امي تسولف عنها تكول أمرة عظيمة

ماشفنه فد يوم منها شي مو حلو عدها اربع ولد

و ابنية و الناس تسميها بأسم بتها الجبيرة سلمة

رغم هي اسمها سمية مو سلمة.. اولادها اكبر من اولاد

بيبيتي ام امي رغم هي الثانية، بيبتي عدها امي نرجس و خالي عابد اخر العنقود و ازغرهم

لان بيبتي جانت عدها مشكلة بالقلب و مريضة

فد يوم عابد صلى صلاة الجمعة ورا ابو بستعجال

وطلع يركض بدون علم احد و راح يم جماعتة

يلي ماعدهم لا دين ولا ديانه ولا اهل وراهم

شباب طايشين عن القانون حسب كلام امي

جانو يكدون بكهوة يم صديقهم يشتغل هناك

و يضلون لساعات بدون ميرجع عابد للبيت

بنفس هذا اليوم جان اكو عامل جاي من النجف يكولون من البادية بشرته سمرة ضعيف و مبين على شكلة تعبان

عاد عابد لزم جماعته و كعد يضحك على حركات هذا العامل، اطورت الامور و تعاركو وياه على اسباب تافه

طلع العامل يركض خارج الكهووة لم جماعتة و اخوانه و اجه على جماعة عابد

و بدت العركة يلي انتهت من جر عابد زجاجة

عصير فارغ و ضرب العامل على راسة يلي أدت بوفاته بلمح البصر!!!

بهل وقت شصار؟ ساعدو؟؟

شالو و اخذو للمستشفى؟؟

الهروب و التفرق جان الحل الوحيد يلي خطر براسهم بذاك اليوم

من بيت البيت و من دربونه لدربونه

“و منا تبدي قصة نرجس”

وصل عابد يرجف للبيت

امي تلكته خايفة، يمه احجيلي شبيك

زمخ بصوت عالي: عوووفيني… اريد انام لحد يكعدني

عافها و راح الغرفته يركض، طب و قفل الباب

امي بقت قلقة خايفة تحس اكو شي صار، بس متعرف شكو.. بهذا الوقت اني توني سطعش سنة

الح على امي تعوف عابد و تجي تخيطلي صدرية المدرسة بس امي ولا ابالها اني. مهتمة بس باعابد

اجه ابوية وحده و اخواني رايحين لامهم

امي حجتلة كلتله متاكدة عابد مسويلة سالفة اشو تصرفاتها مو لايگتلي

امي بطبعها تبالغ. بالحدث لهذا ابوية ماخذ هذا الكلام بعين الاعتبار!

بليل و كلنا نايمين سمعنا صوت الباب تتكسر و تندگ

توقعنا اخواني دكو الباب اكيد صاير شي يمهم مو زين.

بهل وقت ابوية جان نايم، طلب من امي تشوف منو بالباب بس امي رفضت كالتله اكيد ذوله ولدك خاف عدهم شي، دكوم شووف شكو شصار..

كام ابوية بكل تعاجز فتح الباب، ثواني و صااح صوت عالي رج البيت رج من الصوت كعدت من النوم

فتحت باب الغرفة شفت جماعة تارسين البيت ترس

و مربطين ابوية و ينخگون بي

كتمت صرختي ما اريد احد يسمعني بس جنت ابجي خايفة و ارجف

ثواني و دخلت امي لابسة العباية و ترجف

كبل فتحت الكنتور و شمرتلي الحجاب، كالت استري نفسج ولا اطلعييين صوت نهائيا..

جنت البس و ارجف من الخوف، و ابوية بين ايدهم

ديتحمل الضرب و السب بعدها بالحظات سمعنا

صوت عابد كام يصيح، هجم على واحد كتلة

و اجتمعو على و دك كتلو ورمو تورم

امي هنا نهد حيلة

جبرتني البس جبة و اخلي العباية فوك راسي

و اطلع من الشباج حتى افزع اخوتي يلي بالبيت الثاني

فتحنه الشباك بس جانت عدنه مشكلة الزخرفة الحديد قوية

نزلنه البوري البردة و و كعدنه نعوج الحديد

حتى يصيرلي مكان اكدر اطلع منه،

اني جنت ضعيفة كلش، مكان صغير اكدر افوت منه

امي حاولت بكل قوته و هي ترجف و تبجي حتى يصيرلي فرصة اكدر اشرد و محد يتعرضلي

حاولت اكعد و اعبر هم ماكدرت صارت امي تدفعني

وقتها حسيت اعظام كتفي انكسرر من ألم الدفعة

وكعت على الجانب الثاني خارج البيت بعد ما عباتي انشكت و اتجرحت

وكفت على حيلي اريد اركض سمعت صوت باب الغرفة انفتح و اني تصيح

_اطللع منا ماعدنه بنات روووح

من الخوف ما رجعت الها كملت طريقي و ضليت واكفة ادك بالباب اقل الربع ساعة

خوف و قلق ألم، عشت لحظات بحياتي ما انساه

انفتح الباب طلع كرار اخوية

شافني بحالة يرثى لها توسلت يروح لابوية

رااح يكتلو. كرار الله يخليك روح راح يمووتووون

كرار: ولج احجيلي شصار

نرجس: مادري مادري طبو علينا جماعة مسلحين

التمو على ابوية و عابد و صارو يكتلوهم و قبل لا اطلع طبو على امي وهي وحده بالغرفة

الحك ألهم

طب جوا و فزع اخوته اثنين جابو اسلاح و تواثي و واحد وصى ام سلمة تختلنه اني و سمية بالمخزن و تقفل الباب

و طلع على بايسكل لولد عمامي يفزعهم

ساعات خوف و رعب مرت علينه نبجي و نندعي محد يتأذة بيهم، هذا اليوم من اسوء الايام

يلي مرت علينا الخوف يلي عشته بذاك اليوم

اني صرت اعيشة كل يوم بهاي الساعة…

اجو للبيت امي كوة تمشي ضربوها الميخافون الله برجلها بتوثية و عابد مورم و مدمه من فوك ليجوا

ماكو شي بي صاحي جابة راجح كوة يمشي على رجلة

و ابوية متأذي بس احسن من عابد

ولد عمامي مطشرين بالاستقبال ماكدر ادخل و اشوف اخوتي ولا ابوية المفروض انتظر و اني كاعدة على نار!

امي جانت تبجي و تدعي على نفسها بالموت على فضيحة الصارت بسبب عابد، و احنا كعدين حواليها

نبجي مابيدنه شي

راحت سمية تتسمع من ورا الباب على كلامهم ورا شوية اجتي كالت باجر راح يسون كعدة

ام سلمة: طبعا انسوي كعدة رد اعتبر همه تهجمو

على بيتنه و كتلو ابونه و ابنه و المرة مالها ذنب كسرو رجلها، يستاهلون

سيمة: لا يمة اني سمعت ابن عمي يكول ذولي مايستحون و مو خوش ناس من هددناهم بشرطة ما خافو الظاهر عدهم ايد قوية بدولة.

اخاف ميسكتون بجم فلس ننطييهن

ام نرجس: شقصدج يعني؟ فوك ما ضربونه و تكسرنه

راح ننطيهم فلوس!!

سمية: والله ما اعرف يمه اني هيج سمعت

دخل كرار حتى يجيب مي تلكته ام سلمة كلتله احجيلي شصاير يا كعدة يا فلوس صح عابد غلط

بس همه تهجمو على بيتنه و كتلو و ابونه و ابنه و نسوانه مووو همه الغلطانين

كرار: اعرف يمه اعرف بس ذولة لا يتهددون ولا يخافون،واحد منهم كال تردون تشتكون اشتكو بس تأكدو راح انصفيكم! و لازم نحل هذا الموضوعاليوم قبل باجر يخايفين

يجون و الله يستر بعد

ام سلمة: اشرحلي لا تخبلني

كرار: ابوية ينتظرني و يريد مي يمه بعدين خل تطلع الزلم و نجي هنا نحجي..

طب للاستقبال و ما طلعو غير ورا ساعة تقريبا فضوها من يمهم و تناقشو و بعد ورا الغدة يجي الشيخ العشيرة مالتنه و هم يفتهم من ابوية

طلعو اخواني كعد يحجولنه، الولد يلي كتلة عابد

جان الوحيد الأهله يطلع يشتغل و بعد ايام عن عرسة حسب كلامهم..

و هسه الاهل طالبين دم عابد حتى مو فلوس

هل كلام خلانه انگابل اخونه و نكعد نبجي

و هنا اعترف بكلشي و اعترف على جماعته بس المشكلة جان عابد هو يلي ضرب العامل و بسببة مات

ماجنه نروح نقدم شكوى لان هددو اخواني و ابوية

ولا بيدنه شي غير نترقب يلي راح يصير بينه من دمار

العصر اجت كل عشيرتنه و افتهمو من ابوية

و اجو همه جايبين جماعة مدري منين على اساس

شيوخ معروفين و جايبين الناس يلي يشتغلون يمهم

بحيث اجو تلاث اضعاف اعددنه!

اجتمعو على حل المصيبة عابد..

مصيبة دمرتنه و خلتنه رماد..

القرار النهائي بعد اكثر من ساعتين مبلغ ست ملايين

و ينطون فصلية

يا كسرتنه بهاي الكلمة، انسان روحة تقيمت بفلوس

و بمرة من عدنه

يا كسرة اخواني و ابوية!

عابد انذل وقتها و راح لشيخهم كعد يم رجلة

كله هاي ركبتي اخذ بثار ابنكم و انسو موضوع الفصيلة

احنا سادة و سمعتنه تحجي عنه، اني الغلطت اني الأتعاقب مو اختي المرة بالبيت مالها ذنب

رد علية بحزم: وووين جنت ابو السمعة من تتعارك و تمشي ويه السياب!!

اشو ما كلت سمعتنه تحجي عنه!! من ادنك راس ابوك و الناس تحجي عليّ ما كلت هاي سمعتنه

بس من توصل للعطوة لا هاي سمعتنه

_ميخالف شيخنه اني اوافق على كل كلمة تكولة و حقك علية واني استاهل اشد انواع العقاب

بس اختي مالها ذنب..

_كلت العندي و انتهى النقاش

راجح: اختنه متروح لغريب ما ننطي فصيلة تردون فلوس بيكم خير و ادللو

الشيخ: يا ابو راجح، الظاهر ما ناوين تخلصون من هاي المشكلة اشو كل أتفاق ترفضو

هاي ما نكدر و انتو شيخونه بس نزلو العطوة

جا مافكرتو بأهل المرحوم و بشبابة يلي ضاع؟!

ابو راجح بتعب: الحق وياهم خايفين على اختهم

و الكدامك مو جهال اكبرهم دكتور و اصغرهم محامي و البقية كلهم واصلين و رافع راسي بيهم

متعلمين الادب و الدين على أصولة، همه مجرد خايفيين على اختهم و هذا حقهم، منو بيكم يأمن يشمر بته يم ناس لا اصل ولا فصل و لا نعرف عنهم شي..

الشيخ: ماكو خايفين مو خايفين الناس يلي راح ياخذوها ناس مرتبين زينين يشتغلون يمي صارلهم سنين و اذا انطتوهم مرة راح يصيرون انسابتكم

بعد ماكو سالفة ما نعرفهم انتهت!

ابو راجح: تحجي على الفصيلة و على مصيبة بس لسه ماجبت سيرة البارحة، الظاهر جماعتك ماحجولك

رد عمي: مو تحجي بشيوخية و العدالة شتفسر

كتل النسوان بغرفهن؟؟

كسرو رجل ام عابد و كتلو ابو راجح لحد اخر نفس

لحكنه علي، اشو لحد الان ماجبت سيرة للمووضوع

أرتبك و جاوب: ملجومين، على موتت اخوهم حاولت امنعهم بس ماكدرت

و الكم الحق علينا بهاي الشغلة و انا كدام كل هل وجوهه الطيبة انزل تلاثة من العطوة و يبقى تلاثة بذمتكم، يستاهل ابو راجح دخلتهم و طبتهم حقكم على راسنة انتو مبينين اهل نخوة و سمعة طيبة

و احنا من دمكم و نسبكم انريد الفصيلة حتى نصير نسايب و ان شاءلله ما ابينه اي مشكلة ناكل من خبزكم و تشربون من مينه

صارت بيها طول و عرض الخاطر فلان و الخاطر علان بس ما نزل شي و القرار ما اتراجع خلاص تلاثة ملايين مبلغ يكسر الضهر و الأسوء منها

العيون جانت تتجهه الي من كالو انريد فصيلة

رغم سمية اكبر مني بس مو اخوها يلي سوا المشكلة

اخوية يلي من امي و ابوية!!

و من اليوم صار كدامنه اسبوع واحد، سبع ايام بس

من عدا اليوم لازم جامعين المبلغ و الفصيلة!!

ماجنت احجي شي غير قافلة الباب و نايمة

خلاص يعني ماكو دراسة ماكو حلم ماكو صديقاتي

وحيدة فريدة بين ناس غربة عني اطباع غريبة و ما اعرف شنو مصيري..

ابوية باع سيارته و باعو قطعة كبالنه لبيت عمي يالة جمع المبلغ و سدده الهم

كل هذا عابد جان منتهي تمرض و وگع وكعت موت

جان يلوم نفسه على تصرفه الهمجي يلي وكعت براس اخته! يلي هي اني!!

بيوم العقد،اجتي سمية للغرفة الخوف و القلق بايين عليها

حضتني و تبجي حاولت تهديني و تحجي وياية

بس كلبي جان مكسور حتى دموع بعيني ماكو

عيوني جافة الى درجة و الحرارة تمشي بكل انحاء جسمي

فتحت ايدي و اطتني كلادة ذهب و وياها فلوس

كالت تحتاجيهن بعدين او خليهن ذكرى بينه

ماعندي اخت غيرج اكعد احجيلة و اشكيلة

بعد خلاص ماكو لمة العصر ولا زيارة سوا

على الاقل تبقى هل كلادة ذكرى بينه يجي يوم و ترجعين واني راح اضل انتظرج، لو اموت هم تلكيني

انتظر جيتج و سوالفج

حضنتها و من كل كلبي بجييت على كلامها احس حياتي الحلوة انتهت، اهلي صديقاتي احلامي

كلبي يكلي راح تبدين بمصير اسود و هنا راح يبدي خوفي

كمشت ايدها: ابوس ايدج لا تعوفين امي تعالي يمها

سولفي وياها، ساعديها بشغل والله امي تموت بدوني اني اعرفة من سمعت راح اروح لحد هاي الحظة ما نشفن ادموعها!

_وعد مني ما اعوفها، وانتي هم اذا تصيرلج فرصة تجين تعالي ولا تگطعين بينه

_ونعم بالله، يلا هسه كافي بجي خلي اكوم احضر ملابس على الاقل

_لا اتعبين نفسج سمية

_لا يمعودة شكو هسه عندي، بس كليلي وين جنطتج مال الملابس

_عندي وحدة و صغيرة هم متكفي

_عندي جنطة حديد حمرة من هاي الزينه خلي اروح اجيبها و اجي

_لا يمعودة لميلي ملابسي شلون مجان مو ضروري

جنط و هل سوالف

_لا ليش ملابسج كلهن جدد حريمات اخربطهن هسه ثواني و اجيج..

فتحت الكنتور طلعت ملابسي.. طشرتهن كدامي و كعدت بهل أثناء طبت امي كوة تمشي

شافتني بهاي حالتي اجتي يمي حضنتني و كعدت تبجي حاولت بكذا طريقة اهدئها بس وين سودة علية متأذية بسببي

_كافي يمة ابوس ايدج كافي لا تأذيني اكثر

_وحيدتي انتي ولج شلون ما انكسر شلووون

_مو من اشوفج هيج تأذيني ما اريد اشوف دمعة

بعينج لا تكسريني ابوس ايدج

_يمة لا تگطعين بية لا تعوفيني اني عيوني مترتاح بس من تشوفج

_ان شاءلله يمه اني للموت ما اعوفج

_اي عفية ابنيتي عفية بتربايتي، وينج هاج هذا

_جزدان؟ شسوي بي يمه

_تعرفين هذا بزواجي امي اطتنياه ولسه ضامته محتفظة بي و من اجيتي انتي لدنيا كلت اجمعلج بس هل الله قاسمة كل اسبوع كل شهر اذب بي فلس

جنت اكول افرح بيج بتخرجج و اشوفج دكتورة و ارفع راسي بيج بس هسه ووين راح تبخر ذاك حلمي

هسه اخذي هذا خاف تحتاجي فد يوم من الايام

اخذته فتحته: يمه بي مبلغ زين ليش ما انطيتي لابوية حتى يفك دينه

_ابوج عندة لا تخافين عدنه اراضي و هو يبيع و يحصل بس باجر عكبة انتي بعيدة علية محد يمج

ولا الج احد يساعدج

_ربج ميعوف احد

رفعت ايدها لسما تندي: ياربي بجاه نبيك مثل مارجعت يوسف ليعقوب لا تخلي بتي تغيب علية

اللهي انت الحافظ القوي بحق اسمائك احفظ بتي من كل أذية و شر

قبلت ايدها، لا تخافين الله وياية و مستحيل يعوفني

سمية: يمة معليج خل تروح اني ابقى بتج و يمج

نرجس: هاي شنو شوكت اجيتي

سمية: توني دخلت و تعالي ساعديني الجنطة ثگيلة

ام نرجس: هاي الجنطة منيلج ولج جبيرة

سمية: يادوب يكفن ملابس الست نرجس

سولي مكان سولي، باااع شمسوية شلون كلابة الملابس

نرجس: النية جانت اساعدج

سمية: ياريت ماكو هل نية هسه اصفط الم حيرة والله حيرة

نرجس: اكلج اخذي نص ملابسي الجدد ما اريدهن

سمية: بالعكس البسيهن اكشي بيهن المن ضامتهن متكليلي

كعدت و رتبتلي كلشي واني كاعدة من بعيد اباوعلها

جانت تسولف حتى تغيرلي جوا بس بداخلي مشتعلة

واني احاول اتصرف طبيعي!

ثاني يوم الصبح اجو و اجت العشيرة مالتهم..

اخذني منتظر اخوية للاستقبال حتى يعقدون علية

و عيونه حمر. و كفت ورا الباب ردت اشوف عابد ماكو ماشفته

صار العقد و وافقت و سمعتهم كالو هسه ناخذها ويانه بس خلي تجهز نفسها

و ابوية انطاهم لفلوس، و رجع حجه وياهم على مودي بس محد يسمعلة

اجو اخواني بصالة ودعوني حتى بجي يبجون ادري بيهم سودة عليه مو متقبلين الفكرة بس غصبًا عليهم صارت..

سألت على عابد كالو بالمستشفى كنالة يجي يشوفج بس ماقبل ، بس هو فعليًا منهارر

اعصابة أنهارت الى درجة، تمنيت بس اشوفة

اريد احجي وياه، بس ماكو مابقى غير لحظات و اطلع من بيت الدلال

حضنتني سمية و هي تبجي كالت انتي دومج ساكته و راضية ما فد يوم شفتج تكسرين كلمة ابوج ولا امج شيصير وياج تتحملين

اريد اذا صارت عندج ابنية تسميها راضية و ان شاءلله تطلع ابنية بارية بأهلها مثلج

اصعب لحظات الوداع عشتها بدموع و اعتاب و وداع

سمعتهم صاحولي، اخوية شال الجنطة و الثاني لافني بأيده و يمشيني

واحد يمشي كدامي و الاخير يحجي وياي ملتمين يمي جنهم نجوم من السما نازلين

احلى جنة عشت بيها هي بيت اهلي، شكد فرحت بداخلي من شفتهم حوالية الا عابد ضل غصة

بكلبي اشوف اخوية و احجي وياه و أسوء غصة..

ركبوني بسيارة كوة تتحرك، راح وياية واحد من عمامي صعد كدام بسيارة و اني ورا

و شغلو السيارة و اخذوني..

ساااعات طويلة و ما وكفت السيارة، دمعي نشف

تعبت، تفكيري، ايامي، ذكرياتي..

كلهن بعقلي تعبت بس من التفكيرر حاولت اغمض عيني بس كدرت..انتبه علية عمي

نزل السترة مالته و كلي خليها جوا راسج و نامي بين ما نوصل

_ليش عمو بعد شكد و نوصل؟

_مادري بس يكولون بعد ساعة و نوكف..

اخذت شهيق بتعب و لفيت السترة و خليتها جوا راسي

جانت عيني على الباب السيارة جنت اشوف الغيوم و الشمس لسه عالية يمكن توها ب٣ الظهر صارت

من التعب غفت عيوني و انتقل تفكيري العالم ثاني عالم اني راسمته.. ورا فترة كلش طويلة حسيتها

حسيت صارت اصوات عالية بديت اصحى شوية شوية..

بعدها باب السيارة يلي يم رجلي انفتح

قلقت و تحركت فوراا بخوف

كعدت عدلت عباتي، باوعت عليهم جانو الزلم قليلين

و يلي فتح الباب واحد ضخم كلش يطلع عمرة نهاية الثلاثين

بس ملابسة مبهذلة و لحيته عالية..

نزلت عيني علي و هو بعده يباوع بخلقتي احس انقرفت منه!

دار وجهه عني و ابتعد، كلي انزلي

شفته ابتعد مسافة بعيدة، نزلت من السيارة دايخة

باوعت على منطقة تعبااانه حييل تعبانه

تذكرت منطقتنه و ناسنه شلون مختلفين، اخ ياربي

راح ابدي اقارن

التفتت حوالية، عمي وين؟؟

ماكو احد يمي الزلم اطشرت..

كل واحد و دخل ابيته بس نفسه هذا الرجال واكفلي يم بييت بعيد لا لا مو بيت غرفة من ابلوك و حمام صغير كلش

باوعت جنطتي الحمرة بالگاع، مديت ايدي اخذها ثگيلة لان هي بالاساس ثگيلة لان حديد

ضليت اجر بيها و ما اعرف وين اروح

و هذا الرجال واكف بمكانه يباوعلي، من باوعتلة اشرتله يجي يساعدني، اشرلي على بيت و دخل جوا!!

و هنا انتهى دلالي…

ضليت اسحل سحل بيها كوا تمشي

كلها تراب و صحراء و العاگول مطشر و يجرح

عباتي توسخت و ايدي انفسخت بكد ماجريت

تعبت و كعدت بالكاع دقايق و اني اباوع على سمه شلون صافية و البدر ظاهر مستحيل انسى هاي الحظة

الطريقة يلي طلعت بيها بعزز و صلت مذلولة وحيدة!!

رجعت نهضت نكثت عباتي و ضليت اسحل لحد ما وصلت للبيت

طبيت الباب جان من بردة عبارة عن بطانية

السكف ساندوچ و فوكا بلوكات بس

شافني دخلت، ردت اسلم بس كلت لا على شنو

هو قبل شوية شافني

لكيته نازع التشيرت و باقي بالفانيلة شكلة مقزز

ولا حبيته

عزلت نفسي و كعدت وحيدة غريبة ماعرف شنو يلي ينتظرني…

مع الاسف الدينا ما وكفت هنا لا استمرت بالقباحة و القرف

بعد ما تم زواجي و صرت حامل،

اكتشفت، اهواي امور و منها

الرجال ميطلع لشغل اصلا ماكو شغل الهم على حسب

كلامهم

و النسوان و الاطفال همه يلي يجبون الفلوس

اكو قسمين

قسم يجدون!

و الاقسم الثاني رقص و حفلات أعوذ بالله

و هنا بدت مشاكلي يلي ما تخلص غصبا علية

لازم اطلع اجدي و اني حامل لو اشبع ذل و أهانه

بس نفسي ماجانت تتقبل امد ايدي لان ما اتربيت هيج..

رحت و بعت ذهبي يلي جان عندي بيت اهلي و ضميت افلوس بمكان مستحيل بشر يخطر على بالة

و جنت يومية اطلع فلس و اكول حصلت افلوس

بديت شوية شوية اتعلم عليهم و اعرف تفكيرهم القذر و اكتشفت اكو جماعة هنا يسون سحر و شعوذة

المشكلة يلي بهاي المنطقة كلهم كرايب ماكو اي بشر غريب عن بشر بحيث خلقهم صارت اعوذ بالله تخوف

عكسي اني الوحيدة غريبة و مو مرغوبة محد حتى يباوعلي..

بسنة ال1995 بأسوء ايام و الحصار و اصعب عيشة مرت علينا ولدت بتي رضية و ابني ياس

سميت البنية هل اسم مثل ما واعدت اختي سمية

يلي اتمنى هسه ارجع اشوفها

و الولد ابو اصلا ما اهتملة بالبداية لان ميحبون الولد

سميته ياس

حاولت قدر الامكان احتوي اولادي و ما اخليهم يختلطون بأي فئة من جماعتهم

رغم همه حبو رضية لان ابنية حلوة و من هسه قررو

يطلعوها تركص لهذا و الذاك!! حتى يجيبون فلوس براسها خفت عليها و عزلتها منهم و ممنوع اخليها تطلع

اما الرجال يلي تزوجته بدا يوم عن يوم يمرض و يتعب فأقنعته عندي شكم فلس يكبر البيت و يبني غرفة ثانية

و يكبر المطبخ لان البيت كلها بصالة صغيرة و مقطعها و حمام صغير الطفل ميكدر يدخل بيها

اخذ فلوس مني و طلع روح روحي يالة بناهن بعد سنة ونص من التواسيل

بسنة ال 98جبت بتي الثانية يلي اجتي اجمل من اختها بتلاث اضعاف، سميته اسم معاكس الها

و يلي هو سمارة رغم هي بيضة و جميلة الى درجة

ضميته حتى من عيون الناس

و كل يلي يسالني عليها اكلهم شكلها معيوب و سمرة سودة مثل عبايتي، لهذا سميته سمارة

بس سمارة مو مثل رضية الهادئة المطيعة… لاولا

سمارة عنيدة الى درجة ابوها تعب من وراها

اجي اريد انام ارتاح، ورا ما ارجع من الشارع و التسحول الظهر

تغافلني و تغافل ابوها و تروح يم عماتها الرقاصات

هنه يدكن و هي تركص و يعلمنها على كلشي مو زين

حتى من بلغت كتلها لا تكولين صيري مثل اختج

ترا يكتلوج و يأذوج

بس وين هاي العنيدة تسكت اول سؤال سألنها عماتها جاوبتهن و هي تضحك بدون متخاف ولا تهتم الاحد

من ورا هل كلمة فزيت بنص الليل، فتحت عيوني ما لكيتها بالفراش، تخبلت

طلعت دورت عليها كلبت البيت كلاب دورت بالساحة ماكو فص ملح و ذاب ورا ساعات و اني كاعدة بعتبت الباب

اللوم، احقد على نفسي كبرت واني ماكدر اسيطر على طفلة!! على مراهقة متعرف وين مصلحتها؟

ليش ما طلعت مثل اختها ليش ما ألتزمت بكلامي مثل اخوها بس لو اعرف عليمن طالعة!

معقولة اني قصرت بتربيتها؟ أذيته؟ حرمتها من شي؟

زين اني من احبسها و اجبرها و ادرسها بالبيت على شنو غير ما اريدها تبقى جاهلة و تبقى تمشي ورا الغلط!!

الصوج بيمن؟؟ هنا معقولة ما عرفت اربيها لو عماتها

سون الها شي… ما اعرف ما اعرف

احس عقلي راح يوكف..

بدت الشمس تطلع و ظلام تراجع حاولت اتحرك من مكاني بس مابية حيل طاقة بجسمي ماكو

واني كلما التفت ما اشوفه نايمة يم اختها اموت الف موته

وكفت سيارة حديثة، جريت شالي و خليته ع راسي

وكفت مصدمة و جسمي يرجف! منو هااي؟

بتي!! معقولة هااي بتي سمارة؟

نزلت من سيارة هي و عماتها و باقي النسوان يلي بالمنطقة

لابسة تنورة حمرة ملمعة و شعرها!!

تحركت السيارة و اني ما شفت نفسي غير رحت سحلتها و لزمتلها التوثييى و كسرتها تكسررر

كعدو اخوانها بعدوني عنها واني ما نشف غليلي

_ولججججج شمسوووية بنفسج شمسووووووية

صايرتلي ركاااصة! لج صاابغة شعرج احمررررر

هااي شلابسه؟؟ يعني شنوو عود ساترة نفسج بهل لبس لوووو شنوو، لج لابسة صلوخ و ايدج طالعة و لابسة الحجل و لج هذا حلال حراااااام

انتييييييي شنووو بلاااء لج الله ذبج علية غضب من فووووك

ولج مو هاي اختج ما تعلمتي منهااااا

ولك اسمع يااااابو راجح اسمممع بت بتك ركاااااصة

وانت تصلي بجوامع

اهمدة حضييييييي اخ ياااااربي اخذ روحي و ابرلي

اعتقني من تربية الفاجررررةة

سمارة و هي تبجي: كاافييي يمه ابوس ايدج كاافي

والله ما سويت شي بس كعدت وياهم

نرجس: اسكتييييي اكرهج اكرررررررهج لج تلعب نفسي لان حبلت بوحدة قذرة مثلج بس عليهم تمشين هم حقج على عماتج يلي دمهن نكسسسسس

شرب و سحوووورة عليمن تطلعييييين

رضية: كاافي يمة صوتج راح عوفيها معليج بيها

نرجس: ما اريدج و متبرية منج الى يوم الدييين

كداام الله و رسولة اني ما اتحاسب علييييج

و على تربيتج يا قليييلة اصل، لج لو محترمة نفسج

جان يحسبولج الف حساب حالج حال اختج يلي محد يشوف اظفرهاا، مو انتي يا قذرة ياااا نكسة

سمارة: كااااافي كاااافي اسكتي مللتيني شترديني

اضل محبوسة بهل غرفة تردييين تسجنيني

اول و تالي يشوفوني اول و تالي اطلللع

لزمتها من شعرها و كسرت ركتبها، هيييج ابنيه ما اريدها

كوة سحبوني من عدها كعدت بعيدة عليها و هي اختها احتارت بيها

احس دمي يفووور يفووور، شعلمنها الله لا يوفقهن

بهاي الحظة كرهت عيشتي كرهت نفسي و تربيتي

تذكرت حتى اهلي يلي شمروني و نسواني خلال هاي السنين كلها و محد دك علية الباب

و الشايب يلي اخذتها يمشي بشور اخوته كوم يكوم

يكعد يعني يكعد، و المسؤلية زادة علية

صرت اجبر نفسي و وبيع كلينس و امشي و اركض بشارع بعد ماجنت مدللة بين اخواني!!

تحت كل هذا الضغط حسيت ايدي انسحبت

فتحت عيني، ياس بصفي و باس ايدي

غايب: الله يساعدج يمه و يطول بعمرج و يخليج سندنه

ضليت ساكته بس بديت اهدئ

ياس: يمة اسمعيني اعرف يلي سوته سمارة غلط بغلط، بس التصرف السويتي يمة راح تخسريها

نرجس: خليها تولي طبها الف مرض ما اريدها

ياس: يمة ادري بيج تحجين لان دمج فاير من الموقف يلي عشتي و طلعتي نار كلبج بيها

بس هاي بتج و مستحييل ترضين تخسريها و تخليهن يستغلوها اسوء انواع الاستغلال

يمة سمارة اشوفه لسه طفلة متفتهم شنو تريد

المفروض تخليها تحجيلج كلشي حتى تعرفين شلون تتصرفين وياها

نرجس: مو جنك كبران زايد؟ و جاي تعلم امك على التربية؟

ياس: لان انتي علمتينه انصلح اخطاء المقابل حتى لو جان اكبر منه و نفس الوقت انتي علمتينه يلي يصير عصبي معناها الشيطان راكب راسه و كل تصرف راح يسوي مو بأردته…. مو صحيح؟

نرجس: كوم شوفها ليش بعدها تبجي؟

ياس: اني اكول كومي احجي وياهاا

نرجس: ميخالف، بس خلي تسكت.. باس راسي و كام…

انتظرت عشر دقايق هدأت شوية و هي سكتت

بس اسمعها تون من الالم

كمت و رحت كعدت يمها، جنت اباوعلها بقسوة

بس روحي مكسورة عليها، تبقى ابنيتي ماكدر أأذيها

ما اريد والله ما اريدها تبجي ما اريدها تمشي ويه الغلط والله اخاف عليها من الهوى الطاير شلون

اخليها ترخص نفسها شلووون

رفعت راسها مستغربة

نرجس: اي احجيلي منو صبغلج شعرج و شوكت

شعندج طلعتي؟ سويتها قبل لو هاي اول مرة احجيلي…

جنت اتصرف بهدوء بس روحي محتركة و هي خايفة تخاف تحجي و تخاف تسكت

سمارة: اول مرة اطلع..

سمارة: قبل يوم بليل جنه ملتمين بأطراف البادية و ابوية يعرف

جنت لابسة مثل هل تنورة بس هي الباكستانية مال عمتي.. الجو برد و شعلنا جمرية

و صارو الولد يغنون و يدگون على طبل

كمت اني و البنات ركصت جنت اهز على الموسيقى

بس هيج بدون ما اعرف وانتي تعرفيني اني ما اعرف، حتى عماتي من يعلمني نفسي ما تتقبل بسرعة

سمارة: اجتي العورة الحجية ام البنات، تعرفيها اكييد

نرجس: ام الشعوذة و السحورة ولج شجابج عليها

شمعرفج بيها، لا حول ولاقوة الابالله…. دكملي كملي

باوعتلي بخوف و سكتت ماعرف بشنو جانت تفكر

جبرتها تحجي نطقت: عماتي، اني رحت العماتي و طلبت منهن يصبغن شعري و قنعني انو شكلي تغير

و كالت اليوم بليل نطلع و نتونس يم ابن واحد معروف و اني وافقت على كلامها

_لج كلج طفلة ١٥ سنة ولج يااا طلعة ولج ياونسة

ولج شسووون بيج المايستحن

احجيلي احجيلي شسوااالج كووولي

_والله ما سوالي شي اصلا ماكعدت يمهم،

من طبيت شفتها صايرة فوضة لعبت نفسي و طلعت

جانت اكو بستان ورا البيت و رحت اتمشى بيها

ورا ساعات طلعت عمتي ادور عليها و شافتني كالت غطي نفسج و تعالي السايق راح يرجعنه

و سويت مثل ما كالتلي حتى شوفي هذا الحجاب جنت خالته على شعري و وجهي…

هل كلام و الموقف يلي جنت بي لا احسد عليه

منعته من الطلعة ماكدرت اكثر اكتلها خاف تتأذة

و رحت هديت على عماتها تعاركت حجيت اتهمت

التمن علية حتى كتل كتلني

الله ميجرعهن جانن…

اجه الاب من فراته و حجيتلة الصار، مادري شلون اقتنع انو ممنوع بعد تطلع و تختلط ويه اهله

من بعدها صرت اخاف اطلع من البيت، يطبن ويحجن براسها لو ياخذنها.. مادري احتاريت..

فد يوم طلب مني ابني ياس هو يطلع و يدور شغل

رغم ابو كله محد يشغلك بس رفض كال اكو الف شغلة اشتغلها و محد يعرف نسبي

و فعلا لم ملابسة و طلع راح للمدينة و احنا بقينه

يوم نحصل لكمة ناكله و يوم لا..

و الوضع جان متأزم مو بس احنا حتى لبيوت البقية

لان الحفلات خفت مو مثل قبل بأيام التسعيناات

و شغل ماكو يا دوب يطلعون من الصبح لليل يحصلون الف الفين بزايد مسواك للبيت ماكو

فهل فترة سمعت تعدلت المناطق يلي حوالينه

بس المنطقة يلي عايشين بيها منكوبة و اصلا محد يوصل الها حتى قنوات التلفزون..

حليم زوجي تمرض مرض مو طبيعي نام من خلالها بالفراش اما ياس يجينه كل اسبوع متسوك و تعبان على نفسه و ينطني شكم فلس اضمهن اله

لان قرر تزوج و يكمل حياته واني مثل كل ام جنت طايرة من الفرح بي..

بس علاج ابو و المعيشة صارت تكسر الظهر..

قررت اني ارجع اطلع و ابيع مناديل او ملابس من البالة مثل قبل اي شي ابيعه في سبيل امشي

الوضع يلي عايشين بي

رغم سمارة تغيرت و صارت مثل اختها لا طلعة ولا طبه بس بعدني اخاف تسوي شغلة براسها

جنت اوصي اختها و ابوها يلي نايم بالفراش

و اطلع..

مرن سنتين على هذا الوضع..

حضرت بيهن عرس ابني و عدلنه البيت سويتلة غرفة ورانه و بيها حمام

دلاني على لبنية يلي يريدها، صح مو من معارفهم و الحمدلله اخذ غريبة ابنية من عائلة كلش فقيرة مثل مستوانه

خطبتلة و الخطوبة ما طولت غير اسبوعين وقتها مابلغت اي احد غير خواته بس محد يدري من وين لبنية يلي اخذناها

و صار وكت مصيبتي و كت عرس ابني!!

لبسته القاط بأيدي و ابو على عگازة فرحان بي

خواته واكفات يصفكن

احلى يوم احلى ساعات

لحد ما طلب مني انشوفلة سيارة انزفه بيها

و قتها تذكرو ناس يعرفوهم و قبل جانو يشتغلون يمهم

و تواصلو وياهم حتى يجون و يجبون سيارة انزفهم بيها..

طلعنا برا نستقبلهم و بقيت ابني يحضر نفسه بالغرفة

مسافة قليلة مشيت..

ما حسيت غير صوت صريخ جاي من الغرفة!!!

طبينه للبيت نركض، كلبي احسه راد يوكف بلحظتها

شصار..؟؟

ليش ابني ناگع بدمة

قاطة ليش ادمر..

يمة ياس ، ابني فتحت عيني

يمة كوم مرتك تنتظرك هسه و اني منتظرة اشوف ضحكتك، يبعد روح امك

ووووووولك يمة كووووم يمة انطيييك عمري فدوة

الطولك

يمة كسرة الدنيا كلها ولا كسرتك، ابوس ايدك بس شوفوني وكفتك

كلمة مكسورة بنومة ابني قليلة، قتلو و كتبو بغرفته

الثار

يمة ما ارتاحو بكسرتي، يمة جريمة عابد ما فضت

ارتاح غليلهم! عاشو حياة سعيدة بموتك يعريس شبابك…

ارتاحو بلچمة كلبي بهل يوم و كل يوم…….

سمارة: فزيت على حركة بالمكان غطيت نفسي و اني اجرجر بعباتي احس كلبي ديوجعني كلما دا اذكر شسويت

كعدت مرعوبة مادري شلون اتذكرت موت اخوية

يلي جان بسببي اني ليش هيج ياربي

ليش اغلط ليش ما افكر بأي خطوة اسويها ليش

وصلت الهذا المكان

اني على شنو لازم اتعاقب؟ على اخوية لو على ابوية

لو على!

ما اريد ما اريد اتذكر كافي ما اريد..

سديت اذني و اني احاول اطرد هل افكار من راسي

فارس: لسه مافهمت شي، سمارة شجابها على سلطان

رضية: سلطان منعرفة ولا شايفي قبل، حتى كتلك

اختي تركت من زمان تطلع قبل سنين طويلة

تقريبا عشر سنين

فارس: و شجابكم على كربلاء

رضية: رحنا للبصرة اول مرة بس امي متهية الطريق

و بنفس الوقت ابوية الله يرحمة ما جان راضي

على روحتنه لهذا رجعنه استقرينه بالبادية بس الوضعيية حييل صعبت علينا و سمعنا بدخول عصابات خفنا و اتجهنه الكربلاء اكثر محافظة أمنه

و الحمدلله التقينه برجال دلانه على هاي الحسينية يلي كاعدين بيها و بعدها ما استقرينه غير يومين و صارت هل مصيبة

_عندي كومة اسئلة، ليش بتحقيق ذكرتو اخوج بي حالة نفسية و هو حرك المستمسكات مالتكم

معقولة عشتو كل هاي الفترة بدون متشتغلون شي و تكونون نفسكم

_موضوع اخوية اعترف هاي كذبة لان بالاساس احنا ماعدنه اي مستمسك غير ملات امي و ابوية بس احنا الثلاثة ماعدنه نهائيًا.. اما لشغل لا اشتغلنا

بأشغال مختلفة، امي اشتغلت بالبالات و الخياطة و اني اشتغلت عد ناس تنضيف و طبخ

_اشتغلت ويه جماعة حسب ما اتذكر يشترون لگلينس و يبعو ع سيارات بسيطرات، و هم اشياء ثانية مثل نساتل او كفوف، او ورد

_ليش تركتو شغل

_اني و امي ما تركنه لحد ماكعدنه بالحسينية و اخذنه فترة استراحة بسيطة بين متتعدل امورنه

اما سمارة تركت من زمان و رفضت تطلع من البيت

تكول تعبانه و امي من تشوفها بالبيت تطمن اكثر

_لازم اعرف الجماعة يلي اشتغلت وياهم

_بشنو تفيدك هاي المعلومة

_اهواي تفيد! تبقى عندي بس قضية سلطان…

قاطع كلامه وصول شاب تقريباً بعمره للكافترية يلي كاعدين بيها.

صادق: عقييل، انت كاعد هنا

فارس: ايي تعال

صادق: خو ماعندك شغل مهم

فارس: لا كاعدين انسولف،

وكف قريب علية و كال: شلونج ان شاءلله بخير

رضية: الحمدلله زينه

صادق: دلزم الجهاز واحد من كرايبكم يريد يحجي وياك.. يمكن كال اسمه هيثم ابن نوره مدري ليش هيج كال، المهم يريد يحجي وياك

فارس: صدك تحجي، دنطيني الجهاز..

اخذ الجهاز و ابتعد مسافة ..

جر الكرسي كبالي و كعد أبتسم بفرح و سأل

: هل جمال من وين؟

_خليني اكول من البصرة

_الله يجمال البصرة، تخلف بهل حلوين و احنا المبتلين…

_ليست من الضرورة ان تكون المواجهة قوة

ربما تكون الضعف ولا يوجد حل اخر او ربما تكون المواجهة بسبب ثأر قديم…

انفتحت الزنزانه، عدلت كعدتي بخوف

دخل الضابط و وياه اثنين من ضابطات النسوة

كال اخذوها لتحقيق، كمت رجعت اتجتفت و فتشوني، و بأسوء طرق للأهانة اخذوني..

فتحو باب المكتب دخلت واني منزلة راسي

البنية اليمي جانت لابسة عسكري اخذت التحية

و كالت اكعدي هنا، اشرتلي على الكرسي يلي بصف المكتبة

تقدمت ردت اكعد رفعت راسي

و للمرة الثانية صارت عيني بعينة

هاي النظرة يلي خلتني اكوم مصدمة