احس البيه مو بيه
أهلي كتالي مو رجال..
انا كتالتي أبنيه
══━━━━✥◈✥━━━━═
مــاسه :: لطمت على خدي ميته من آلخوف هسه يگطعه الوهب شلون شسوي درت على بــدور حالها اتعس من حالي اثنينه خايفين على وهـــب من صــيهد
بــدور :: نروح نحميه؟
-ولج ننكتل وياه.
احجي وياها وارجف اعاين من الشباج، نزلت جــويريه تسأل شصاير، ماخلتها جده تروح ويانه البيت طــروادة،دارت عليها بودر تحجيلها، سمعت صوت صــيهد يصيح على وهـــب گـــلبي راح، خل اروح شيسوي خل يسوي.
طلعت بسرعة من بيت جدي لمشتمل وهـــب دفعت الباب ايدي ترجف وصيهد متسودن خانك وهـــب من ياخته ويصيح
صــيهد ::ولك ما تتوب انتَ حيوان شكاعد تسوي بروحك اموتنك والله.
صيح وطكاه راشدي بكل حيله، ووهب بس ساكت حتى ايده مايرفعها، دموعي على خدي خايفه اروحن واحاجيه، صوتي يرجف صيحت بخوف
-صــيهد لا تطكه اروحلك فـــدوه لا تطكه.
التفتوا عليّ إثنيتهم واني روحـــي رايحه جراه صــيهد حيل يعت بيه ويصيح
-خايفة عليك خااااايفه عليك وانتَ ما تخاف عليهن ما تفكر بيهن وانت تشرب هالسسسسم ابن النعال ولك احجي.
رجع طكاه على وجهه واشوف الدم نزل من خشم وهـــب ركضت اكض بأيد صــيهد ابجي واتوسل
-علييك العباس عوفه عوووفه.
دفعني حيل خازرني ويصيح
-وخرررري ولج وخررري.
وكفت ابجي ووهب يعاينلي ساكت عيونه متروسه دموع وصيهد مثل النار يريد يحركه ، يحجي بحرگه فتحت حلكي بصدمة من استوعبت كلامه وعاينت للگاع كلاص وبطل، شهكت ايدي على حلكي ، وصيهد روحه طالعه وكف بتعب يحجي وي وهـــب الكاعد على حيله ومنزل راسه.
صــيهد :: ما تخاف من الله؟ ولك جا خاف على عرضك خاف على اخواتك من تتسمم خاف على بت عمتك العايشه ويانه بنفس البيت ولك شكاعد تسوي برووحك.
صيح متخبل ووهب وكف خازره وعاط بوجهه
وهـــب :: الف مره گتلك لا تحجي هيجججج.
وصيهد تخبل جراه بكل قوه يطكه ويرجع يرفعه ويطكه بوكس على وجهه كطعه ويصيح
-ولك من تتزقنب يروح عقلك حالك حال الحيوووان تصير بهيمه لا عقل ولا فهم.
بجيت عاجزه احمي وهـــب وانه اشوف الدم غطى وجهه وصيهد ما عايفه كل ما اكض ايده يدفعني ويرجع على وهـــب، روحـــي راحت وفتحت عيني بصدمة شهكت وانه اشوف بنيه طلعت من الغرفة بعبايتها ترركض جرت وهـــب من ايد صــيهد وصاحت بوجهه وهي تبجي
ندى:: لا تضرررربه.
غمضت عيني وفتحتهن ما مستوعبه وصيهد ابتعد فاتح عينه على وسعها مصدوم، وهي وجها احمر من گد البجي ودموعها على خدها، واكفه گدام وهـــب اللي مابيه يرفع ايده ودايخ من كد ما صــيهد طكاه.
درت عيني الصيهد وهو يتلفت بيني وبينهم بصدمة، وكف وهـــب يمسح الدم من خشمه، جر البنيه خلاها وره ظهره وهيه تبجي بخوف ولزمت بقميص وهـــب من وره، ضحك صــيهد ما مستوعب.
صــيهد :: وهـــب وهـــب شكاعد تسوي انتَ؟ ووووهب، تسودنت ؟
وهـــب :: خلني احجيلك.
حجاها وصيهد تخبل لو بأيده يذبحه، رجع جراه خانگه وعيونه شايطه يصيح
-شتحجييييي ولك اشتحجيييي.
والبنيه بسرعة حطت روحها بنصهم تريد تطلع وهـــب من ايد صــيهد وهذا تخبل شلون كضت ايده دفع وهـــب وصاح بوجها
صــيهد :: وخرررري.
مشه بالهول متخبل ويمسح بأيده منين ما كضتها طب للمطبخ ورجع مغسل ايديه اثنينهن.
ووهب دار على البنيه يهمسلها
وهـــب :: اشش لا تخافين لا تخافين اخوي هذا.
وهي تبجي منهاره وتباوع الوجهه تهمس بصوت يرجف
ندى:: دم دم وجهك كله دم.
كعد صــيهد ايده على راسه ما مصدك وهـــب هيج يسوي
وهـــب :: خلني افهمنك.
وصيهد صفك أيد بأيد بحيرة
صــيهد :: شتفهمني ولك هههه شتفهمني انا امنعك من الشرب، طلعت تجيب بنات، اريدن اكدر استوعب سوايتك والله ما تنعقل.
وكف وهـــب بعصبيه مخلي اصبعه على حلكه
وهـــب:: اششش،لا تضل تمسلت لو تسمع وتفهم لو تسد حلكك وما تحجي حجي زايد.
وصيهد جر الكلاص شمره على وهـــب أجه بالحايط، صاح عليه
صــيهد :: وااالك عين تحجي .
وهـــب:: وداااعت امي انتَ فاهم غلط بس لو تسمع وافهمنك، بيش احلفلك فاهم غلط.
صــيهد :: بيش تحلف وانت نكس؟
دنك وهـــب ساكت وانه عيوني على البنيه مرعوبه حييل وكاضه بقميص وهـــب بأيد ترجف وايدها الثانية لامه العبايه عليها تشهك بخوف.
وهـــب:: أسمعني واذا حسيت انا مجذب عليك اكتلني بگلب بارد أنا راضي.
سكت صــيهد محتار مابيه يوكف على حيله، مكسور بسواية وهـــب ، التفت عليَّ مسحت دموعي گال
صــيهد :: امشي مناه مــاسه ردّي للبيت.
درت وجهي ارجف اريد آروح، اثنينهم صاحوا
-مــاسه.
التفتت عليهم دموعي على خدي
صــيهد :: كلشي لا تحجين خوش؟
هزيت راسي اي وطلعت.
وهـــب :: مشيت للباب وره مــاسه اريد اقفلنه، مفلش القفل، صاح.
صــيهد :: عوووفه عوووفه تعال.
رجعت يمه اعاين الندى الخوف كاتلها
-روحـــي للغرفة، لا تخافين تذكري شكتلج!
مسحت عيونها ترجف ومشت للغرفه، عفت صــيهد وطبيت للحمام غسلت وجهي من الدم ورديت يمه كاعد على صفحة يدخن الجكاره بأيده ترجف من العصبية، وخرها وأشر اكعد، كعدت على صفحة اعاينله.
صــيهد :: سولف شيخ وهـــب سولف يالماجنت تفوتلك فرض صلاة سوولف يله.
وهـــب ::شوف انا ما اجذب، احجيلك كلشي وداعت امي ما اضمن عليك شي.
صــيهد ::أحجي.
وهـــب :: البنيه ما عدي شي وياه.
-ههههه وشتسوي ببيتك تتعبد؟
-لا، شارده وساعدتها.
عكد حاجبه، طفه الجكاره يريد يركز وياي
-لا تلعب عليَّ يشهد الحسين أكسر ظهرك، البت منين؟
-لكيتها بالصحراء.
-شني؟
-لا، هيه لگتني مربط.
فر راسه يدور شي يطكني بيه.
-تتذكر من ســليم وبريا ربطوني بالچول؟
عاينلي خازرني
وهـــب :: بيوم الربطوني بالچول جتني سواده انا عبالي طنطل يلعب علي گالت اساعدك وتساعدني رضيت لان صوّت ذيابه يمنه وبس تعوفني وتروح ياكلني، من فكت ايدي گالت ساعدني بس اريد مچان اضلن بيه لمن الكه اختي.
صــيهد:: عليمن جاي تضحك ولك.
-وداعت خوتنه وانتَ اعز عدي من الهوه ماجاي اجذب عليك.
البت نختني ماكدرت ما اساعدها، امها وابوها ميتين ومرة ابوها ملوعتها شردت منها لا عدها عمام ولا اخوال بس اخت وحده دورت عليها طلعت بالبنان عايشه غاد ومايصير تروحلها الا لمن يصير عمرها ١٨.
رجع طلع باكيت الجكاير دخن من جديد حاير يصدكني لو لا
صــيهد :: يعني هاي سالفتك لو احجيها لمخبل ما يصدكها
وهـــب ::لا يصدكها المهم انتَ تصدك انا مامجذب.
-شلون رهمتها تعيش وياك بنفس المچان، وبعد تعال اكلك يا ارعن يا ساقط شلون تزقنب والبت هناه شكالك گلبك،بت مأمنه بيك ماتخاف وانت شارب تعتدي عليها؟؟؟
-انتَ شني سالفتك كلساع وگلت تعتدي حيوان انا شني؟
-تروح فـــدوه للحيوان اقلها ينكتل مره مرتين يتوب الا انتَ لو اكص منك لحم ما تتوب، البت ما تضل هناه.
-ما اعوفنها.
-تاكل تبن وتنجب، تردها منين ماجبتها.
-على كص رگبتي ماعفتها، انا اطيتها حجايه.
-تعاند انتَ؟
-يابه يا عناد!!! هسه انتَ صير بمچاني واجت وحده دخلت عدك، تطيهااا؟ لو تگطع زلم وما تعوفها؟؟
سكت خازرني طلع تليفونه من جيب الدشداشة، رفعت عيني البآب الغرفة ودي اكوم أطمنها واكلها لا تخافين ما اعوفنج لو يذبحني، نزلت عيني وحسيت لمحتها يم الشباج رجّعت رفعت راسي عاينت شايله البرده تعاينلي ودموعها على خدها، ابتسمتلها والله ما اعوفنج، درت عيني الصيهد من شفته يخابر.
صيهذ :: الو طرواده ….
كضيت بجي على اختك؟
تعال البيت هذا الچلب، وهـــب راح انحره.
سدّ التليفون خازرني شويه وطب طــروادة عيونه حمر وما له خلك روحه، عاين الوجهي وللبيت والكزاز الكسره صــيهد هز راسه راضي
طــروادة :: ياهو الكاتل ياهو المكتول؟
صــيهد :: تعال تعال حل مصايب ابن عمك.
عاينلي طــروادة بعصبيه
طــروادة :: ولك انتَ ما تبطل شرب؟
صــيهد :: هههههه ولك يا شرب يا دنيا هيه بس شرب اسمع مصيبته الثانية.
اتلفت بشك وصيهد يحجيله السالفه فتح عينه بصدمة
طــروادة :: وهـــب انتَ مسودن؟
وهـــب ::لا.
صــيهد :: لا وين، وهـــب عاقل واحنه مسودنين، وهـــب صح واحنه غلط، شلون يتنازل القديس وهـــب .
طــروادة :: على كيفك انتَ، جا شيسوي اذا بت نخته يردها؟
صــيهد :: اجاني المسودن الثاني، ماكتلك يردها بس ضلتها وياه نفس البيت تشوفها صح انتَ؟ وفوكها يسكر هناه ابن النعاااال، واليوم محد طالع من فطر الگاع باجر عگبه يطلع الف واحد وراها ويسوونك خاطفها واطيك للموت وهـــب هذا التريدده انتَ، ولك سالفتك غير الدم مايحلها، ويشهد الحسين سلف وراك اكتل.
طــروادة :: صح حجي اخوك وهب وابوك وشعلان وشاكر إذا دروا وهاي مو بعيده، يعاقبونك ويردونها منين ما اجت، وتكبر مايحلها شي بعّد تنكتل.
وهـــب ::لا تحاولون ما اعوفنها وعلي.
صــيهد ::سد حلكك شعلت روحـــي، ولك عرض وادم هاي زلم تتكاتل علمودها، شحجي وياااااك شلون افهمنك
طــروادة :: خافنه جذاب ماكو بت هاي مقلب.
صــيهد :: لا تحرك گـــلبي انت الثاني غير أنا شفتها
سكتوا محتارين، صــيهد حيل قافل ادري بيه خايف عليَّ وادري اذا احد طلع وراها ننكتل انا وياها، رفع راسه صــيهد وكف ورفع ايده يحذر
صــيهد:: اعقد عليها.
-ها سالمين شنّي السالفة؟
طــروادة ::وهـــب حجي صيهد صحيح، السالفة ما تنضمّ، والبت تطلع وراها أهل وعشيرة وكلبهم على عرضهم مايبرد الا بكتلك أقلها لو صار شي هيه مرتك
ساعتها بيها باب وجواب وينلكالها حل.
ضحكت مستهزئ اهز بأيدي
-ترا چم شهر ضلن واسفرها الاختها.
صــيهد :: تعقد عليها لو تطلعها مناه ومالك شغل بيها، يشهد الحسين اكتلنك لا تضل تجر وتعر بالسالفة.
ندى:: مسحت دموعي گـــلبي يدك حيل واكفه يم الشباك واباوعلهم، اخوه رجع خنكه بعصبية وهو عينه علي هزيتله راسي لا ما اريد يقبل بهيج حل، خل يعوفني اني الكالي غير مكان، رجع باوع الاخوه وهز راسه موافق، سديت البرده وكعدت على حيلي ابجي .
شسويتوا بيه يا هلي وين وصلتوني لوعات گـــلبي كثرن يا يمه،
ابجي بحرگه ولازمه الگلاده بأيدي، تعبـــت لشوكت اصبر لشوكت أضحي واتحمل همي شوكت يخلص.
رفعت راسي امسح بدموعي من دخل وهـــب سد باب الغرفة وبقى واكف بمكانه، وجهه من الضرب منتفخ ويم حاجبه جرح بعده ينزف، وارنبة خشمة حمره ، مشه بخطوات هادئة كعد كدامي.
وهـــب :: ليش طلعتي من الغرفة؟
ميلت راسي دموعي تتسابق على خدي
-خفت.
-من شنو خفتي؟
مسحت عيوني اشهك واحجي صوتي يرجف
ندى:: خفت خفت عليك خفت يكتلك.
زفر نفس بحسرة ولم شفته الداخل حلكه يحجي بهدوء
-أمسحي دموعج.
-باوع والله العظيم ما يطلع وراي احد والله ما اورطك بأي مشكلة والله والله ما اجذب.
لميت رجليَّه الصدري ابجي حايره شلون اقنعه غمض عيونه وتقرب اكثر كعد مثل كعدتي.
وهـــب :: آدري ومصدكج بس أخوتي خايفين عليَّ.
-زين عوفني اروح ادورلي غير مكان.
ضحك دنك ورجع باوع لعيوني هز راسه لا
-ما اعوفنج.
رفعت ايدي مسحت عيوني وهو منتظرني احجي همست وعيني بعينه
-اني ما اقبل بالحجوه اخوانك، وهـــب اني ضحيت بسنين من عمــري وتحملت كلشي والله تحملت عذاب زلم ما تتحمله، تعبـــت واكتفيت ما اقبل بعقد ….
باوعلي بشك
-راح يصيرلج يمي شهرين يا يوم شفتي مني شي مو زين يا يوم سمعتج حجاية؟ هسه صارت اذا عقدت عليج يعني تضحيه شني راح اكص جناحاتج؟ شسالفه.
-وهـــب حباب بس اسمعني.
-اكلج ترى لو ما طالعة من الغرفة وشايفج صــيهد جا عدت السالفة على خير لا من شاف ولا من درى، انتِ طلعتي وزدتي النار حطب.
وكف مبتعد من يمي مقهور رجع التفت علي حجّه بعصبية
-اول ما يصير عمرج ثمنطعش اطلكنج وتسافرين الاختج، اشو انا من جازفت وجبتج للقرية ماكتلج مضحي.
سكتت اباوعله حيل مقهور ماكتله شي يقهر هو كبّر الموضوع وكفت هزيت راسي خوش
-يعني وحده بوحده مو؟ خوش هاي هيه.
-انتِ البديتيها، من الاول “افك إيدك وتساعدني”
وهسه نكمل البديناه تسكتين اخوتي وترضين بالعقد وبالمقابل اكملج كلشي علمود سفرج الاختج.
وكفت كدامه ابتسمت رغم دموعي الكل ما امسحها تنزل
-ماشي قابله.
هز راسه موافق وطلع من يمي، بس سد الباب وراه كعدت على حيلي ابجي.
“”””””
رنـــه :: ما جنت متخيله ابجي وره عفراء، احس تيتمنه من جديد لمن تزوجت، حتى اخواني ما ادري بيهم وين متمدده على رجل ريـــمه ودموعي على خدي، سحبتني من ايدي كعدتني ومسحت دموعي بأيدها.
ريـــمه :: كافي مو زين عليها تبجين وراها، كومي غسلي وصلي ادعيلها تتهنى وتنسعد، واحنه يمج هم اخواتج رنـــه.
هزيت راسي اي وكامت هيه لبست عبايتها حتى تروح طلعت وياها للحوش مشه وياها حسين وصلها البيتهم لان تخاف منّ هاسكي
غسلت وصليت دعيتلها من كل گـــلبي بس ما كدرت اكف من البجي لميت السجادة وكعدت بالزاويه حاضنه رجليَّه الصدري ودموعي على خدي والوم بروحي شلون كتلها تتزوجين وآفتك منج، مرت ساعة وانه اسمع صوت اخواني بالهول وصوت طــروادة يسأل عني گاله عبود “بالغرفة تبجي”
ومن اسمعهم يحجون ازيد ما ادري شبيه هلكد استصعبت روحتها ودمعتي ما نشفت شوية وطبوا عليَّ كلهم طــروادة شايل صينية العشا ويضحك
طــروادة :: ياهو اللازم يسولنه عشه احنه لو انتِ؟
عبود:: راح نخابر عــفراء نكلها ارجعي رنـــه موتتنه من الجوع.
ضميت وجهي بأيدي اشهك اجوا اربعتهم حاضنيني
طــروادة :: كافي ابويه كافي شسالفة ترى هاي هيه ماكو ربع ساعة.
عبود:: اسكتي وناخذج ويانه للصيد.
حسين :: اسكتي واسويلج ثور بأسم صــيهد.
حجاها وضحكني طــروادة طكاه خازره ماراضي
طــروادة :: عيب ما يصير.
ونكزت زهره تدافعله وتصيح
زهره :: لا تططه.
جراها طــروادة الحضنه يبوسها ويدغدغها وعبود يعيب عليها شلون حجيها ثگيل وحتى بالمدرسة رسبت لان ماتكدر تحجي بصوره صحيحه، گال طــروادة.
-يله كافي تعالوا تعشوا انا سويتلكم العشه اليوم.
عبود :: هنه بتيتايات وطماطه وخبز من الجدر شمسوي مفطح.
رنـــه ::اكلت وياهم كوه على روحـــي يحاولون يضحكون ويسولفون رغم كلهم مقهورين وكل ساع واحد ذاكرها مچانها على الصينية ضل فارغ وكلنه نعاينله.
وره العشا طــروادة ضل ويانه وعبود راح وي سجاد، طبيت للمطبخ انضف وعينيّ عليهم كاعدين بالهول طــروادة ماد رجليه وساند ظهره على الحايط والتليفون بأيده يتصفح، وحسين وزهره يكتبون عين للدفتر وعّين للتلفزون ، رفعت عيني للحايط بوجهي يصيرن صور أهل البيت الامام علي والامام الحسين والامام العباس، عليهم السلام غمضت عيني ادعي
“اللهي بحق علي واولاده اسعد أختي وهنيها.
كضيت تنضيف ورحت يمهم تربعت وكعدت جريت رجل طــروادة خليتها على رجلي وفلتت الدبوس من دشداشتي أدور برجليه شوك وهو كيف گبل گالي
طــروادة :: اااي هناه اكو شوكه تبزني باصبعي الچبير.
نبشت رجليه وكل شوكه اطلعها انقهر وياها تعبان ورجليه رايحات من الشوك، ونوم الليل محروم منه كل هذا علمود الزرع
اخذت تلفونه منه واجت زهره تضويلي، نزل راسه على المخده مغمض وحسين ركض جابله ابره يدور برجله الثانية احنه ندور برجليه وهوه نام.
لمن اندك باب الحوش، ركض حسين شافه واجه گال
-سلطان يريد طــروادة.
كعدته طلعله طبّوا للدوانيه سويتلهم چاي وداه حسين ولان سالفة سلطان تقهرني ما گدرت امنع فضولي، بس شفت حسين وزهره ملتهين رحت يم باب الدوانية اعاينلهم من الفتحة مال مچان القفل، سلطان يدخن وطرواده يعاينله شويه وگاله.
طــروادة :: كافيك عوف الجكاير راح تموت.
هز راسه لا بقهر
سلطان:: الجكارة ما تموت حجايتها الموتتني.
-ياهيه؟والله خبلتني هسه غير يحجي؟
طفه الجكاره وعاين الطرواده عيونه دم گاله
-رغد.
-ردينه؟؟ سلطان شنّي السالفة المره تزوجت وانتهت سالفتها وانت تزوجت كافي انسى.
ضحك سلطان والدموع تلمع بعينه حجه بغصة صوته رايح
سلطان:: گالتلي خويه الچانت تگلي يا عشگي.
حجاها وضحك ضحكه طويله جر الجفيه من راسه غطه وجهه وبجه يشهك، فتحت حلكي مصدومه بيه، كام طــروادة من مچانه كعد كدامه مخلي ايده على جتفه يحاجيه بهدوء
طــروادة :: عليك الحسين كافي، هذا انتَ الزلمه الكلف تبجيك حجاية؟
رفع راسه سلطان يمسح دموعه ويهز راسه لا ويحجي بغصة
سلطان:: صوبت گـــلبي من حجتها وجن شلت الصواب من گـــلبي الكلبها ساعة الرديت عليها وكتلها خويه، نمردت روحها كدامي ماكدرت تكض دموعها.
– شجابك عليها وين شفتها؟
-انا الوديتها لعيالها ههههه كالتلي تتهنى بعرسك خويه.
هاي حبيبة روحـــي انا العلمتها على العشك انا العلمتها شلون تحاجيني وشنو تكلي من تلاكيني
تالي تكلي خويه.
-لا تلومها مابأيدها شي.
هز رأسه سلطان ميت من القهر سمعت باب الحوش اندك على كيف وما اهتميت مركزه وياهم بس شفت حسين طلع للباب يركض، گال سلطان.
-ابد والله ما ألومها وادعي الله تنساني وتتهنى بحياتها لان ادري بيها بعدها تتعذب طــروادة وحگ الله احس دموعها يچون گلبي مو خدها.
-الله كريم يخوي الله كريم، توكل على الله وفكر بمرتك لا تظلمها.
-ما ظالمها بس والله ماكادر اتقبلها اعاينلها وأتمناها رغدي.
هم يحجون واندفع باب الدوانيه الخارجي طب صــيهد وكفوا اثنينهم مرتبكين، سلم على سلطان وكعد يمهم يعاين بشك، هسه الا تجي تغسل هالوجهه، صاح طــروادة
-چاي چاي.
رحت للمطبخ حميته ولا تستاهل واحد يسويلك چاي جديد، صبيت ووداه حسين الهم، رجعت اعاينلهم رجلي تكطعن من الوكفه بس فضوليّ اقوى، شويه وسلطان گام ترخص وطلع.
تلفتت هيج وهيج إشوف حسين وزهره وين ودرت للباب اريد ارجع أعاين صار بوجهي طــروادة فاتح الباب خازرني وكفت عدل بلعت ريك بخوف
طــروادة :: شتسوين هناه؟
درت عيوني منه هيج وهيج جراني من ايدي.
-شسمعتي رنـــه؟
-ما سمعت شي من گالوا صــيهد اجه اجيت أشوفه حتى ادعي عليه علمود دجاجاتي.
احجي مرتبكه وهو خازرني ما راضي
-ما اريد اشوفنج هناه تحرركي.
هزيت راسي اي وخرت شويه، طب وسد الباب حيل، رجعت يم الباب اسمعهم گاله
صــيهد:: هاه ياهو اليعاين؟
-زهره هاي.
-امم زهره كتلي.
عفتهم ومشيت ادعي عليه طلعت للحوش اباوع لشحاطته والله الا اقهرنك طبيت للمطبخ جريت سجينه ام المنشار وكعدت يم نعاله شكيت تك منه، اخذته ومشيت صيحت الهاسكي شمرته يمه واحجي وياه
-هاي اول مره اسوي جريمه واتهمك بيها ميخالف تحملني حتى اطيك اكل.
عفته ورجعت للبيت ركض اخذت حسين وزهره طبيت للغرفة انومهم.
“”””””
وهـــب :: مشيت البيت عمي شامل من خابرني صــيهد محضر روحـــي. لحجيه طبيت للدوانيه تخنك من جكايرهم عاينلي بطرف عينه ما عاجبه، كعدت يم طــروادة گال
صــيهد ::لكينه سيد مو مناه راح نجيبه الليله يعقدلك يا مصخم يا خايس،حتى ما يحجي الجدك الملطم.
-اشكرك.
طــروادة :: كافي صــيهد انحلت ان شاءالله، كافي تلومه.
وهـــب :: مديت ايدي اريد اجر الباكيت منه جراه ما يرضى يطيني جكاره هزيت ايدي طــروادة كال شويه والولد يجون وصيهد يعاين الطرواده بشك گاله
صــيهد :: گبل لا يجون الولد، اكلك سلطان شبيه؟
دنك طــروادة ساكت ورث جكاره يله رفع راسه وگاله
-متعارك وي مرته.
صــيهد :: هااا، حسيت سمعت شي ما ادري جنكم حجيتوا بأختي؟
رفعت راسي اعاين الطرواده بشك شجاب طاري أخواتي بالنص مسح وجهه حاير گال
طــروادة ::شني السالفة يا اختك شجابها بالنص، متحاجي هوه ومرته علمود أختها اسمها رغديه تريد تزوجها السليم.
وهـــب :: مو گالوا اخواتها كلهن متزوجات والبقيه صغار
-ها؟ اي بت عمها تعتبرها اختها شلون انا احسبكم اخواني هيج.
كام طــروادة فتح الباب للولد طبوا ســليم وبريا وميثم وجابوا وياهم سلطان رغم ضايج وماله خلك لعبوا دومنه وخطيه طــروادة كل شويه رايح مسويلنه چاي خلصنه لعب وكعدوا يقرون شعر گالهم طــروادة
طــروادة:: ما احجي انا تبوكونه
مــيثم :: اشعرلكم بالروسي؟
صــيهد:: لااا جذاب تسب بينه
بريا:: لا لا، انا امدحكم بشعر بالروسي اوكفولي يگول الشاعر الروسي أخناتون، صفگولي حتي اتشجع.
وهـــب ::صفكناله نضحك وصيهد يريد يگومله يكله جذاب راح تسبونه بالروسي تحمحم وحجه روسي لبگ
بريا:: Все вокруг меня ослы, я один принц.
اترجملكم بالعربي كتلكم خوتكم خوش خوه وصحبتكم تسوه .
مــيثم:: صــيهد بالحسين جذاب يگول كل اليمي حمير وانا وحدي أمير.
كاموله صــيهد وطرواده كتلوه، كلنه جنه نضحك الا سلطان بعالم ثاني منتجي على المخده يدخن ساكت، گال مــيثم
مــيثم :: عريان السيد خلف يگول::
أجيك عيون ذيب
وغيظ حيه
وغيمة مروه
وهبوب اعذيبي أهب
وبيك أذبل كل خضاري
وشبت الصفصاف أشب.
صــيهد :: لو تحط ايدك على القران وتحلف ما اصدك بيك ما عاشگ.
ســليم ::انتَ ياهو الحجه وكتله عاشك.وانا احلف محد بينه عاشگ غيرك.
ضحك صــيهد يطفي الجكارة بالنفاضه وضل مبتسم وصافن الجكارة طفت وهوه ضال يجعص بيها بالنفاضه، باوعنه واحد بوجهه الثاني ضل مبتسم وحده أضنه نسانه كاعدين
طــروادة:: أحم أحم الو يمعود صــيهد.
رفع راسه بفزة كعد عدل جر المخده خلاها بحضنه يعاين النه يسأل
صــيهد:: وين وصلتوا.
مــيثم ::دك القران انت ماعاشگ!
صــيهد:: عاشگ خالتك الروسيه، ما تنجب.
ســليم:: والله هسه تعترف ولك تعشگ من ورانه واربعه وعشرين ساعة تحاسب بينه، عمي بالحسين رايح ومنتهي انتَ.
طــروادة :: اول مره اوكف ضدك وياهم صدك اثاريك عاشك من ورانه.
مــيثم:: هسه شني باجر نروح نخطبلك؟
صــيهد :: اهوووه چلبوا واحد شلون ما يضحك.
وهـــب :: اضــحك سكته واوز بالولد عليه بله انا اخافن احجي يمي بريا شاورته” كله اذا ماعاشك يعني ما تهتم اذا كلنه العاشگها صــيهد ….
وبريا بساع اندفع وتحمس حجه بصوت عالي
بريا:: صــيهد صــيهد انتَ مو تگول انا ما عاشگ ولا شي.
-اااي.
بريا:: خوش خوش، العاشگها صــيهد…..
حجاها يضحك والولد مندمجين هستوهم يردون يضحكون واجتنه نفاضه الجكاير تون بيني وبين بريا نرگعت بالحايط وطفر كزازها علينه وكفوا الولد مصدومين بتصرف صــيهد وهوه خازر بريا بغضب
صــيهد:: السانك اكصه.
مــيثم:: شني السالفة صــيهد كاعدين ونتشاقى لو جايه براس واحد منهم وفاشخه شتسوي؟
صــيهد:: اخذه للدكتور يخيطه.
حجاها وگام طلع من يمنه زعلان كمنه وراه من ضل يصيح
طــروادة :: خيير خير شني السالفه.
وصيهد كاض شحاطته بأيده ويتهدد
صــيهد:: اطلع چلب ابن چلب اذا اطب البيتك بعد يعوف نعولت الوادم كلها ياكل نعالي ليشش.
-هاسكي ماياكل نعوله هاي سوالفك.
خزر طــروادة ودار وجهه لكاني اضحك شمر النعال علي لبس نعالي وراح ضحكنه عليه وطشينه كلمن راح البيته ل١٢ اجوني هوه وطرواده
طــروادة :: اول مره ما ادري اوكف وياك لو ضدك بسالفة عقد وهـــب.
سكت متحسر ودار عينه علي
صــيهد :: وانا شني مكيف بس والله هالبت وراها كسر رگاب وهوه بس هالواحد اضيعه طــروادة ؟
-لا هاي هيه حقك.
سكت حاجينه وهـــب ورحنه نجيب السيد، صاعد بصفه وهوه يسوق
-صــيهد.
التفت يعاينلي ورد عاين للشارع
-تضم عليَّ؟
-لا، شضام عليك؟
-خيولن، لو تحلف للصبح ما اصدكك ياهي هاي العاشگها.
ضحك متحسر رفعت ايدي طكيته على راسه
-راح رأح صفن.
-هههههه، وعلي طــروادة انزلك هناه اشبعنك دمغات.
-ياهي الطيحتك!
-“نجمة سلفنه”
-اويلاااه، يعني من ديرتنا، من القريه؟
هز راسه لا
-خل نمشي عليها لا تضيع منك وتضل تلقي عليَّ اشعار.
تحسّر بقهر وهز راسه لا، وصلنه للسيد خطيه فاهمنه غلط وكعد ينصح ويعلم كاله صــيهد
-سيد الولد اخوي والبت بنيّة عمي واهلنه مايرضون يزوجونهم رادوا يشردون وانا كلت اسوي خير ازوجهم واسكت الاهل بعد مايكدرون يسوون شي
-بارك الله بيك وليدي بارك الله بيك.
لمن وصلنه للقرية فرينه السيارة وره نزلناه كاضينه مناه ومناه نختل بيه احنه بس نريد نوصل الوهب واجاني هاسكي يركض السيد جر ايده مني شارد وجلب بصيهد يحجي
-ها ها وليدي انا اخافن من الچلاب.
صــيهد :: هاي عود انتَ سيد وتخاف من الچلب.
رفع راسه السيد يعاين الصيهد بحيرة سكتت هاسكي وأشرتله روح ضل يمشي ويرد يتلفت خايب روح مو وكتك هسه. طببنه السيد البيت وهـــب لكيناه نايم فاتح حلكه دفره صــيهد برجله
-اكعد السيد يريد يسلم عليك.
وكف وهوه مغمض عيونه مد ايده الي خليت ايدي بأيده جراني يسلم مغمض ويحجي
-اهلاً وسهلاً سيد اهلاً.
جبته براشدي فتح عينه عاين بوجهنه
وهـــب :: اعذرني مولانه هستوني نايم وشوي بعدني ما مستوعب بس اوكف خل استوعب وأحاجي وياك.
فرك عيونه وراح غسل كعدنه السيد بالهول ورحت وراه للمطبخ
-وهـــب شارب؟
-لا والله شسالفه بس لان هسه نايم ماصارلي ربّع ساعة.
-حاجيت البنيه، رضت؟
-رضت بس بداخلها ما راضيه.
-مانريد نحلف جذب، احاجيها أنا ميخالف؟ من وره الباب؟
ندى:: مسحت عيوني ووكفت لافه العبايه علي دك الباب ودخل وهـــب يباوعلي بحسره گال
-طــروادة يريد يحاجيج تعاي هناه.
رحت يمه وره الباب واكفه وهوه فتح الباب على كيف صوت ولد يحجي بهدوء
طــروادة :: السلام عليكم خويه.
-وعليكم السلام.
– خويه لو اكو حل ثاني احنه ما نضغط عليج ونحميج ونوصلج الاختج بعيونه، بس احنه وادم عرب وعشاير وسالفة تحمي بت شارده من اهلها وراها كاتل ومكتول وما تنسد، انتِ ترضيها وهـــب الساعدج ينكتل؟
رفعت عيني الوهب يباوعلي ساكت دنكت اهمس
-لا ما ارضى.
طــروادة:: الف رحمه على والديج، اخيتي كون العقد من نفس راضيه ونيه صافيه مانريد باجر عگبه نحلف جذب.
سكتت أعض بشفتي محتاره رجع گال
-ها خويه اخذ حجايه منج؟
-اي.
-الله يستر عليج ويحفظج، تعال وهـــب.
ندى ::طلع وهـــب من يمي رجعت كعدت وره الباب هادئة بس اريد گـــلبي يرتاح علمود نيتي تكون صادقة بالعقد شوية واجه وهـــب فتح الباب على كيف وضل واكف برا هو والسيد وياه، كل شوي تصير عينه بعيني سأل السيد اذا إني مجبوره ابتسمت اباوع الوهب دنك ساكت جاوبت السيد لا ما مجبورة، كمل العقد بوجود صــيهد وطرواده.
اخذوا السيد يرجعونه ووهب طلع من البيت .
رنـــه :: كعدت الصبح من وكت لاول مره، عاينت المچان عفراء بحسرة، كمت غسلت وصليت بالي يم طرواده بعده بالگيعان طلعت للحوش بعدها الشمس هستوها تطلع صعدت على گن الدجآج ورفعت راسي اعاين من السياج لمحت اثنين من ولدنه رادين للبيت المسحاة على اجتافهم، نزلت بسرعة ورحت من فتحات السياج اعاين زين شفتهم صــيهد وميثم.
ركضت لمچان هاسكي نايم هزيته هز وفتحت السلسله منه
-تعااال حبيبي تعال.
مشيته لباب الحوش فتحته اله وهمست
-شوووه شوووه روح اركض.
طلع يركض وانه بسرعة رجعت اعاين من فتحات السياج يمشوون بهيبه ويسولفون كل واحد جكارته بأيده ، وهاسكي راح عليهم يركض بلا صوت هاي الحلوه بيه وهمه شافوه اجاهم ضلوا واحد يدفع بالثاني وركضوا للنخلات كل واحد صعد على نخله.
كعدت بالگاع اضــحك متشفيه بيهم حييل، رجعت اعاينلهم كعدلهم هاسكي بين النخلتين وبس واحد منهم يحاول ينزل ينبح عليه ويرجع يصعد، اضــحك متونسه لمن شفت طــروادة اجاهم صاح على هاسكي راحله وخلاهم ينزلون.
طبيت للبيت ركض حطيت الچاي على النار طب طــروادة اول ما عاينلي كتله
-صباح الخير.
-صباح العافيه، ها ليش هاده هاسكي على الولد؟
سكتت أحك بشعري
-يا هاسكي؟
-يا هاسكي هيه مال چذب، صــيهد گبل گال هاي اختك هدته علينه بطلي رنـــه بطلي تعادين صــيهد زلمة شكده شكبره مو عيب؟
-كل ما اشوفنه اتذكر ذبح دجاجاتي.
-مو جبنالج غيرهن.
سكتت وهوه راح يغسل تعبان حيل، شغل التلفزون على دعاء الصباح وجابله بطانية من الغرفه تمدد بالهول صاح
-رنـــه راح انام من تسوين الريوك كعديني.
هزيت راسي موافقة هو ونام وانه طلعت للحوش اريد اكنسه منا لمن يكعدون كلهم واسوي الريوك، كنسته وجاي ارش بيه والمح شي يتلولح على السياج، تدنيت يمها، هايشه من طين مربوط برگبتها خيط ومعلكه بالسياج، كضيتها بأيدي اگلب بيها منحوت على صفحة منها”رنـــه ” والصفحة الثانية “الهايشه”
اخذتها ورحت الطرواده انفص غضب هزيته من جتفه فز عيونه حمر وانه اصيح ومتخبله
-عاين شمسوي.
-شكوو؟
-عاين صــيهد شمسوي مسوي هايشه وعليها اسمي.
كعد على حيله اخذها من ايدي يعاين بيها وآنه أنافخ ميته من القهر
-وعادمني رابطها من ركبتها بخيط ومعلكني بالسياج، عود يعني اعدمج.
-خيولي انا اطيح حضه.
-زعطوط هوه ومخلي عقله وي عقلي؟
-صيري انتِ احسن منه وكبري عقلج لا تردين عليه، انتِ عاقله وعقلج يوزن بلد، صــيهد ترى مخبل عوفيه لا تدوخين روحج بيه.
هزيت راسي اي رجع نام اخذت الهايشه خربتها وحاولت انسى رجعت للحوش اطيت الدجاجات اكل وسمعت صوت ام صــيهد
-رنـــه يمه رنـــه.
رحت ركض فتحتلها الباب بأيدها سفطة خبز توه مخبوز
-صباح الخير
-صباح النور عمه، شوكت اجيتي من عفراء؟
-بالليل رديت يمه ماكدرت اباتن عدّهم!
-عفراء زينه.
-ياا مكيفين بيها متسودنين عليها والله ابو منذر هوسلها بعباته والمره فرحانه بيها، ورجلها عين البارده عليه ما مصدك ماخذها.
-يارب يارب تنسعد وتتهنى.
ضحكت وخلت الخبز بأيدي
-اعرف اخبز عمه.
-ادري چا سباعيه انتِ بس ميخالف اشتهيتلكم هالخبزات.
احذتهن منها وراحت كملت الريوك وكعدتهم طــروادة گوه كعد، صار اليوم ركض رحنه للمدرسة ومن رجعت اريد ابجي شلون تعبانه وارجع اسوي غده اول ما طبيت لگيت طــروادة طابخ تمن رفع راسه ضحك گال
-تعاي بله شوفيه شو صار حبه وحبه.
اجيت يمه هدرته وخليت عليه علاكه اضــحك
-هسه يصير زين.
-بعد انتِ سوي مرگه سلكتلج لحم انا.
هزيت راسي موافقة ورحت ركض بدلت ورجعت للمطبخ فرحانه لان فكر بيه وماخلاني أتعب وحدي.
وره الغدا راح وي الولد علمود الحاصوده للعصر وگب الصياح ركضت خايفه وعبود طلع يركض، عمي شاكر يصيح على طــروادة.
شاكر :: الحاصوده ما تمّر الگاعك.
طــروادة :: حاصودة أبوك هيه؟ شلون بله ما تمّر الگاعي
طــروادة يهد على عمي شاكر والولد كاضينه وعمي شاكر هم ولده كاضينه اجاهم جدي يصيح
شعلان:: جيبلك غيّر حاصودة هاي ما تحصد زرعك.
وطرواده تخبل اعاينله وميته من القهر شايطه روحه وبس يريد يلوح واحد منهم، والولد هم ما راضين على عمي شاكر وجدي ويصيحون عليهم
سلطان:: تحصد للسلف كله ومن توصل الطرواده ما رضيتوا بكيفكم هيه؟
يحجون ويگب الصياح بيهم گالهم طــروادة والشر يتنافض منه
-ارميها وما اخليها تحصد گيعانكم
شعلان:: خوش زلمه انتَ وترميها؟
طــروادة :: غصباً عليك وعلى كل شارب، ابن شامل انا وحگ الحسين افنيكم فني لا جد ولا عم يوگف بوجهي.
هد عمي شاكر عليه يريد يطگه والولد يجرون بطرواده للبيت وكل واحد يصيّح بصفحة، طبيت للبيت بسرعة وهمه طببوه للحوش متسودن بس يريدهم يهدونه صاح على سلطان.
-بالحسيين اكتنله ابوك خل يتجفى شري.
صــيهد:: سد حلكك كافي اطي مجال مو بكيفه ما تحصدلك فالتوه هيه.
دفع صــيهد بغضب طب للبيت ورگع باب الهول بوجهم وكفت على صفحة وحسين وزهره طبوا للغرفة شاردين، طب للمطبخ يغسل وجهه احمر ويرجف من العصبية، يسب بيهم.
مشيت وراه وكفت بالباب احجي بهدوء
-طــروادة بس على كيفك لا يصير بيك شي.
صاح بحرگه
-ولج حصدت للوادم كلها وصلت كاعي صاحوا ما تحصدلك شوفلك غيّر حاصودة.
-مو بكيفهم بس على كيفك لا يحترگ گلبك.
طلع من المطبخ ميت من القهر اخذتله كلاص ماي بارد شربه عيونه حمر وايده ترجف
-خاف جنت اسكت الخاطر الولد واگول اخوتي وزحمه، هسه لا والله حتى الخوة ماتوكف بوجهي.
-جيب غير حاصوده خيولون.
عاينلي بعصبيه يصيح
-وهيج خنيث انااا وارضى بحجيهم، كل سلف اله حاصوده وغصباً عليهم تحصد كاعي.
نحجي واحس اذني انطرشت من صوت الطلق صرخت وهوه دفعني على الغرفة طبيت اركض حاضنه زهره وحسين الگلبي اصرخ وهمه يبجون، واعاين الطرواده ركض جر سلاحه وسحب اقسام، وكف الطلق وبسرعة طلع عفتهم وطلعت وراه أركض خايفه وصوت عمي شاكر يصيح
شاكر :: ولك تنعلني طــروادة تنعلني.
ركضت بكل حيلي خايفة على اخوي واشوفن عمي شاكر التفكه بأيده والولد اجوه يركضون يجرون بيه وبس شافوا طــروادة طلع والتفكه بأيده ضموا ابوهم بظهرهم وولد بيت عمي وليد وبيت عمي خليل كاضين طــروادة يردون بس يجرون التفكه من أيده
روحه طلعت ينشال من بينهم بس يريد يفلت من اديهم اعاين الايده صبت دم وما عاف التفكه صــيهد يجر بيها كل حيله وهو ما يرضى يهدها ويحلف يكتل شاكر ماعافها الحد ما طاح عبود. بالگاع يشهك، فتحت عيني بصدمة وطلعت أركض متخبله
-عبود عبود.
كابلته ارجف واصيح متخبله، أجو يركضون وطرواده ذب التفكه واجاه چلب بأيده كوه يحجي
عبود:: عوف السلاح.
جراه طــروادة وانه ابجي متخبله وكفه مستند على جتفي ويهمس
-ليش طلعتي رنـــه.
ساكته بس دموعي تنزل طببناه للبيت وركضت اجيبله ماي ايدي ترجف وطرواده يغسل بوجهه يحاجيه بخوف
-اخذك للمستشفى حاجيني؟
عبود:: لا لا مابيه شي، هسه اصير زين.
شرب ماي ويعاين الايدي شلون ترجف يضحك وانه وطرواده ميتين من الخوف الولد صوتهم بالحوش يردون يطمنون عليه فتّت للغرفة وطبوا يمه يحاجونه اعاينلهم من الباب حسيت اريد عفراء اريد أأمن وما آخاف بوجودها.
كاموا الولد طلعوا وطب سجاد متسودن ماجان موجود يحاجيه بخوف
سجاد:: شصار ها ياهو وياك عبودي.
عبود :: ابوك رمه على بيتنا ههه يريد يكتل طــروادة.
اتلفت سجاد ما فاهم يعاين الطرواده.
سجاد :: ابوي وطرواده ينجازون بس انتَ لا يصير بيك شي من وره ابوي والحسين اكتله.
سكت عبود مدنك وسجاد ميت قهر وكف گاله
-رمه بيتكم انا ارمي بيتنه عبودي بس لا تضوج.
طــروادة :: لا سجاد لا تدخل خلك بعيد يردون يعاقبونك.
سجاد:: شيسوون خل يسوون.
حجاها وطلع من بيتنا، شوي وعبود نام، طــروادة طلع ووي صلاة المغرب رجع ووراه سيارات شرطة، وكف بره حوشنه، ركضت بخوف اعاين من السياج، شفته كاعد على الدرام يدخل، وبس طلعوا الولد وحاجوهم الشرطة تسودنوا يعاينون الطرواده وانه ما فاهمه شي لمن طلع عمي شاكر وجروه الشرطه يله فهمت
كل واحد بيهم يصيح بصفحة ولد عمي شاكر متسودنين على ابوهم يردون يجرونه من الشرطه ومن بينهم لمحت ريـــمه طلعت تركض وتصرخ متسودنه
ريـــمه :: يااااابه.
بجيت وانه اشوفها شلون تنشال وتنركع متخبله وإخوتها بس يردون يجرونها للبيت ادري بيها عدها الدنيا بجف وابوها بجف ثاني.
طببوها للبيت وسيارة الشرطة اخذت عمي شاكر بس راحت هدوا على طــروادة سلطان وسليم ومرتضى وهو كاعد هادئ
يدخن ساكت وصيهد ووهب وبريا وميثم واكفين بوجهه ولد عمي شاكر صاح سلطان
سلطان :: هسه تروح تتنازل طــروادة.
هز راسه لا وطب للبيت عاف الولد يتعاركون وياهم كعد يم عبود هادئ وانه گـــلبي نار عليه كد ما أنقهر اليوم، كام صله وصاح
-رنـــه سوي عشه الاخوتج.
طبيت للمطبخ اسوي العشا واسمع الباب كل ساعة يندك وما يطلع كعد عبود تعشوا هو وزهره وحسين، الوره العشا عبود كاله انا رايح السجاد، وطلع وطرواده ضل كاعد ما يريد يحاجي واحد من الولد.
طلعت برا اطي اكل الهاسكي رفعت راسي اعاين وكف النفس ببلعومي وآنه اشوف گيعانه تحترك شهكت والتفتت اريد اركض الطرواده لكيته واكف وراي يعاين للگاع ساكت نظرته تحجي ضيمه وقهره وتعبه، شهكت ايدي على حلكي وارجف
-كاعنه جاي تحترررك.
مشه بدون ما يحجي بهدوء طلع من البيت ركضت جريت عباتي واحجي وي حسين وزهره
-لا تطلعون هسه اجي.
طلعت اركض وراه شفت الولد راحوا يركضون للگيعان وهوه يمشي بهدوء من التفت وشافني صاح
-ردي شجابج.
صيحت ابجي
-ما اعووووفك.
جراني من ايدي ومشه باتجاه النخل النروح بيه كل مره انا وعفراء للــبستان، مو بنفس الدرب الركضوا بيه الولد للگيعان.
نمشي بين النخل ارجف كلي وعيني عليه وكف وسكتني من سمع صوت رنة حجل اتلفت عبالك وحده تركض وبرجلها حجل
اتلفت. يدور وانه عيني وياه والمحها وحده بعبايه تركض باتجاهنه دفعني الوره النخله وختل هوه هم لمن وصلت يمنه وكضاها منّ اجتافها.
فتحت عيني بصدمة وآنه اشوفها ملثمة وكاضه الدبه بأيدها وريحة النفط تفوح منها فاتحة عينها حييل خازره طــروادة وكلبي نمرد من عرفت هالعيون حجت كلمة كلمةً بغضب وهي بين اديه
” اليحرگ گلبي على اهلي أحرگ گلبه على تعبه”
يتبع…..
ايلول
التاسع من هنا
About the author
