أضَمك وين، مِن يَا عِين؟
هو المَثلك شينضَم؟
يالچَنك بخُور هنُود
مِن سَابع سِلف ينشَم
══━━━━✥◈✥━━━━══
مــاسه :: وكفت مثل الصنم فاتحة عيني على وسعها مصدومة واني اشوف سلطان ممدد بالگاع وجهه متروس دمّ وصيهد فوگه وخال خنجر على رگبته
بس فاتحة عيني وكلبي نمرد وهو عباره نار مشتعله يتنفس بقوة ويحجي من بين اسنانه
صــيهد :: احجي ااااحجي شعدك وي اختي؟ غلطت روحـــي يوم السمعتك گلت الطرواده رغدي ولك غلطت روحـــي وما صدكت السمعته.
وسلطان مثل الجثة ممدد بس يحرك راسه مناه ومناه رجع صــيهد طكاه وصيح
صــيهد :: اذبحنك يشهد الحسين اذبحنك احججججي
هو يحجي وانه احس الگاع افتريت بيه دار عينه سلطان لمحني وهمس بصوت مخنوك
سلطان :: اذبحني هوه انا ما عايش.
اخر حجايه سمعتها واحس براسي نرگع بالگاع ثواني واحس راشديات على وجهي اريد افتح عيني ما اكدر وصوته يمي
-مــاسه، ماااسه.
اعصر عيوني قوي كل ما يطكني راشدي، فتحت عيني كاعد كبالي وجهه كله غضب واديه ملطقات بدم سلطان شهكت وكعدت بسرعة راجعه ليورا واعاين عبالي ذابح سلطان
لمحته كاعد بجهه مدنك راسه والدم بكل وجهه، وصيهد بس لمحني صحيت رجع بسرعة على سلطان شاله من ياخته وكفه ودفعه على الحايط حييل يصيح
-شعددددك وي رغد احجي احججي
هز راسه سلطان لا
-ماعدي شي وياها
-جذاااب جذاب مررره تحجي بأسمها ومره تعاينلها وترجف ولك تعاين الاختي كبالي انتَ ماعدك غيره خسيس.
حجاها ودفع سلطان بقوة للباب وانه بالزاويه أرجف خايفه طلع سلطان وصيهد يفتر مثل الخبل دار عينه ولمحني صاح بغضب
-صيحيلي رغد.
بلعت ريك اريد احجي همست
-يردونك ودوني عليك.
شمر الخنجر من ايده على الباب يصيح
-انعل ابوج لا ابوووهم صيحيلي ررررغد.
شهكت ابجي وطلعت من يمه اركض بس فتحت باب المطبخ شهكت امي ولطمت على صدرها من شافت وجهي كله دم من ايد صــيهد، صاحت
-يمه يمه شبيه وجهج
مشيت بسرعه اغسل واحجي وياها
-مابيه شي مابيه شي ما متعوره.
اغسل بوجهي وهيه متخبله تجر بأيدي وتعاين بخوف مسحت وجهي الرجفه كاضتني
-رغد وين؟
سكتت امي مستغربه عفتها ومشيت للغرفه بس فتحت الباب عاينتلي
-صــيهد يريدج.
وكفت مرتبكه وتسأل
-ليش؟ شصاير؟
تلفتت بخوف وهمست بصوت ناصي
-ما ادررري ما ادري عصبي ولكيته كاض سلطان مدميه.
شهكت وخلت ايدها على گلبها اجت امي مستغربه تسأل
-شمالجن يمه ؟
عاينت الرغد ساكته وهي وجها صار أصفر وخايفه
-ماكو شي يمه صــيهد يريد يحاجي رغد وداني عليها.
-روحـــي رغد يمه روحـــي شوفي اخيج.
جريتها من أيدها وهي ترجف طلعنه للمطبخ نزلن دموعها ومسحتهن بسرعة تسأل
-سلطان وين راح.
اختنكت وشفتها رجفت نزلن دموعها من جديد وهي تگول
-طاكه حيل صــيهد؟
هزيت راسي اي بجت وغطت وجها بأثنين أديها وانه ميته من الخوف خاف واحد يجي ويشوفنه، جريت ايدها من وجها ومسحت دموعها احجي وياها
-امشينه لا تبجين كدام صــيهد، سلطان گاله ماعدي شي وياها وضل ينكر، انتِ لا تبجين وهم انكري.
هزت راسها اي وطلعنه طبينه للمشتمل هوه ماكو وانه كاضتها من ايدها طبينه للغرفه مالته طب ورانه فزيت ملتلفته عليه وهوه بلا تفاهم كض رغد من اجتافها كعدها على الجربايه وكضاها من فكّها خازرها
صــيهد :: ديررربالج تجذبين عليّ!
دفعت ايده من فكها وهو تخبل كضاها من راسها وفكها بغضب يحجي
-ووولج شعدج وي سلطان
نترت ايده من وجها تدفعه وتحجي هم خازرته
-ما عدي شي وياه.
حجتها ودفعته حيل تصيح بنتر
-وخرررر.
رفع ايده بكل غضب طكاها راشدي صيحت ابجي خايفه وهو كضاها من زندها عيونه حمر ويحجي بحقد
-بت النعال عليمن تنترين.
بجت رغد ساكته وهوه متخبل ويصيح
-متزوجه انتِ حيوانه متزوووجه نظرة ما تعاينين الغير رجلج.
جرت روحها منه تبجي وتصيح
-عوفني وخر ما مسويه شي عوووفني.
نتر ميت من الحرگه وعيونه ينكطن شر
صــيهد :: لا تجذذذبين عليَّ لا تجذبييين.
تشهك بأيده خايفه رفعت ايدها مسحت دموعها عينها بعينه گالتله
-جان رايدني گبل وما صارت وروح ابني الما شبعت منه ماكاض ايدي ما شايف خصله من شعري سلطان
رادني بالحلال ومارضوا زوجوني حتى يفتكون زوجوني حتى يلوعونه ويلوعوني.
فتح عينه على وسعها دفعها حيل يصيح متخبل كعد بالزاويه ساكت ايده على راسه وهي تبجي بصوت وانه بس دموع تنزل كاتمه صوتي بأيدي، رفع راسه الها يحجي بعتب
-شكتلج گبل لا تتزوجين؟ كتلج اذا ما راضيه احجي وكولي، احرك الدنيا وما اطيج كتلج مالج غرض بابوي انا موجود محد يكدر يجبرج على شي ولج وكفت ويااااج وكفت وياج، وانتِ هسه يله تكليلي انجبرت صارلج سنه ونص سنه ونص هسه يله تكليلي انجبرت، وهوه لو زلمه ماخلاج الغيره.
سكتت رغد تمسح بدموعها وكف كدامها كالتله
-قسّمه ماصارت حالنه حال هواي وادم.
هز راسه موافق وسحبها من أيدها موكفها رفع اصبعه بوجها يحذر
-انتِ على ذمة زلمه،مال تجين هسه تعاينين الغيره وتنزلين راسي انا الاذبحنج مو هوه، سلطان تعتبرينه مات فهمتي مااااات.
-نسيته من زمان.
هز راسه موافق ودفعها علي يحجي محروك گلبه
-اطلعن بره.
جريتها من ايدها وطلعنه بسرعة.
رنـــه :: طــروادة اجه تعبان كوه اكلاله شويه وحجه وي عــفراء وراح نام، ماصارله ساعه نايم وتفلش باب الحوش من الدك ركض حسين وعفراء وكفت بباب الهول خافت، اجه حسين يركض گالها
حسين:: سلطان يريد طــروادة، غرگان بالدم مدري ياهو طاكه.
عــفراء ركضت تكعد طــروادة وانه بسرعة رحت فتحت باب الدوانيه المقفول وخليته بس مردود حتى خاف يطبون اكدر اسمعهم، طلع طــروادة يلبّس بالقميص ركضت للشباج اعاينلهم، طب سلطان للحوش وطرواده يصيح
-شبيييك ولك.
وهو ساكت غسل وجهه وطب للدوانيه ضليت واكفه على صفحة اجه طــروادة بسرعة اخذ من عفراء تعقيم وگطن ورد يم سلطان.
اريد اروحن يم الباب اسمعهم بس عفراء واكفه يمي وخفت منها شويه وكالتلي
-بله اسمعيهم شبيه.
ضحكت ورحت بسرعة كعدت ركبه ونص لازمه يدة الباب واعاينلهم سلطان يحجي وطرواده يعقم بجروح وجها گاله
سلطان :: كتله ماعدي شي وياها، بس كونه ما يحاجيها ويقهرها.
طــروادة :: هالمسودن شيقنعه بعد هسه حتى وياي يتعارك.
سلطان ::خل يتعارك وياك انتَ ميخالف حتى لو يطكك بس كون هيه مايحاجيها وتنقهر.
وخر طــروادة يعاين السلطان هز ايده ورجع عقم وجهه ابتعد يحجي وياه واندك باب الحوش گبل گال
سلطان :: اجاك.
حسين ركض فتحله الباب وطبلهم ثور هايج يريد يناطح كضاه طــروادة وهوه يريد يرجع يطك سلطان يصيح بحرگه
صــيهد:: انتَ مو زلمه مووو زلمه.
وكف سلطان خازره وينتر
سلطان:: اكل تبن.
صــيهد:: ولك والله امووتك
طــروادة :: هسه هيه سالفة قديمه شبيك تسودنت صلي على محمد
صــيهد:: وخرر وخر انتَ هم مابيك غيره شلون تدري وساكتله.
دفع طــروادة ينفض غضب وبس يريد يكض سلطان.
سلطان:: هسه شتريد ذبحتنه ترى.
رفع ايده صــيهد يهدد بغضب
صــيهد ::اخواتي كلهن اذا المح واحد منكم رافع عينه عليهن اشلعها يشهد الحسين، وانتَ اسمها بعد ما تلفظة فهمت اسمهاااا ما تلفظة.
هز رأسه سلطان موافق، وطرواده جر صــيهد يريد يكعده دفعه يصيح
صــيهد:: عوووفني وخر عني، ولك مو كفو انتَ مو كفو، غدرتني وعاينت الاختي خليتها تريدك تالي عفتها الغيرك ولك توكف كدامي وتحجييي بيهاا كاعد بنصنه وتشعر عليهااا ما استحيت ما وكفت بعينك انا؟
طــروادة :: السالفة حيل قديمة بت عمه ورادها وماصارت وكلمن راح بحال سبيله.
نتر صــيهد رافع ايده بوجهه طــروادة
-انتَ جاي تبررله؟ غلطااان غلطان من ساسه الراسه لا تحاول تطلعه علي زين.
غلط وطلع من البيت رجع سلطان كعد متحسر هز راسه بقهر ابتسم باستهزاء وكاله
سلطان :: حقه شما يحجي حقه.
طــروادة :: اعذره، اخته وتعارف صــيهد على اخواتنه يغار مو عاد اخواته.
سلطان :: لو ما عايف رغد ياخذون ريـــمه يجبرونها وهيه تكره صيهد اختي ااختي ما اضحي باختي علمود روحـــي ، ولا ضحيت برغد انا ضحيت بكلبي والله مو بيها.
حجاها بصوت يرجف وعفراء كعدت بصفي تعاين وياي ما نحس الا حسين دفعنه اثنينه وطيحنه بالدوانيه كمنه متخبلات وهمه يعاينولنه بصدمه طلعنه نركض سدينه الباب ورانه وعفراء ركضت للطباخ شعلته وخلت السجينه وانه ادور على حسين ميتين من الفشلة طلع طــروادة خازرنه ويهدد
طــروادة :: انااا اعلمجن بس خل يروح.
عــفراء :: كله منج الا تسمعينيهمم؟
تحجي ومتحلفه بحسين وهوه شرد اختفه رحت الزهره اسألها
-حسين وين؟
رفعت اجتافها وتسوي بأيدها ما ادري غميتها ومشيت ادور ادور كلبت البيت عود اريد الكاه قبل لا عفراء تبرد وبعد ما تحاجيه، اجت يمي كاضه المكناسه وتصيح
-وينه؟
عاينت الايدها
-شو كاضه المكناسه؟ جا وين السجينة ؟
-وينه هسه هوه؟
-ما ادري شرد
-اكضه الخايس.
طلعنه أثنينه للحوش ندور عليه، سمعنه عبود برا الحوش يحجي وي سجاد، شويه وطب يضحك من شافنه اثنينه محروك كلبنه كال
-شني شكو؟
عــفراء:: هذا الخايس حسين، دفعنه بالدوانيه وسلطان كاعد وي طــروادة.
-وينه هوه هذا مايتوب.
رنـــه :: طب عبود للدوانيه وعفراء ذبت المكناسه وراحت للحبل تلم الهدوم كلهم نسوا الا انه ضاله ادور على حسين سمعته عطس افتريت أدور ماكو كعدت على كن الدجاج واسمع صوت نفس دنكت بسرعة فتحت باب كن الدجاج لكيته خاتل بيه
-كضيييتك.
-والله وعلي ما اعيدنها.
طلعته سحل اجر بيه العفراء وهيه تدور على المكناسه حتى تكتله بيها صاح
حسين:: بس تطكني اگل الطرواده يوميه يعاينلكم من تكعدون بالدوانيه.
انه عفته خفت صدك يفتن علي بس عفراء عضته وخر من يمها يمسح بأيده ويكلها
-منذوري.
-اووكفلي الخايس.
شرد منها، رجعنه طبينه للبيت لمن طلع سلطان واجانه طــروادة وعبود يحجي وياه گاله
عبود :: جدي ما يسوي هيج شني يضحي بصيهد.
طب طــروادة للغرفه يبدل ويحجي واحنه ما فاهمين شي گاله
طــروادة :: ضل انتَ ضل قدس بجدك، صــيهد بس يطلع من القريه يذبه منّ العشيرة وبس واحد يسمع ينكتل صــيهد.
عــفراء:: شني السآلفة طــروادة شكو؟
وكف بالهول يم المرايه يلف بالجفيه على راسه ويحجي وياها
طــروادة :: يريد يطرد صــيهد
عــفراء:: جا عمي وليد شبيه ساكت؟
طــروادة :: لا گايله اذا طردت صــيهد انا اطلع وياه ما اضلن.
-وين رايح هسه انتَ؟
-اخذ صــيهد منهم.
حجاها وطلع ركضت وراه اعاينلهم من السياج، مــيثم جاب صيهد كاضه كوه عليه جابوه للسيارة صعدوه هوه وطرواده وراحوا.
عــفراء عزلت البيت ولملت شويه وخابرت على طــروادة وانه كاعده يمها اسمع كالتله
-اكلك راح اروحن البيت عمي وليد
-شني شسوين؟
-زحمه من عمتي ام صــيهد اسلم عليها علمود وهـــب وهم حتى جده ما تحجي علي وتكول اجيتي وما مريتيلي واريد اشوفن بت عمتي نضال.
-ودي حسين يشوف اذا شعلان بالبيت لا ترحين.
-لا وعلي طالع هوه وعمي شاكر ووليد، محد هناه بس البنات.
رنـــه :: كالها خوش وانه اكرص بيها طكتني وكالتله
-رنـــه راح تروح وياي
-لا
-ليش تريد تشوف مــاسه.
-خل تروح لا تبطن خاف يرد شعلان.
سدت التلفون عفتها وركضت لبست طلعنه أنه وياها وزهره البيت جدي تلكتنه ام صــيهد فاتحه أديها ترحب بعفراء سلمت على البنات بالمطبخ وطبينه يم جده بس شافت عفراء كالتلها
-عدالي ما تجيني كلت يكون اعاين لوجها بعد.
عــفراء::لا جده شلون ما اجيج.
سلمنه عليها وكعدنا بالهول أشرتلي مــاسه براسها كمت يمها للمطبخ واكفات هي وجويريه لزمتني من أيدي
-رنـــه اريد احجي وي عفراء
-هيه اصلاً اجت علمود تشوفج.
جــويريه::هزيت رأسي اي ساكته وحايره شلون احجي وياها وحدنه، مــاسه كالت.
مــاسه:: انه عدي خطه، نكلها تعاي اصعدي شوفي خياطاتنه.
بــدور ::جــويريه مو تكليلها علي علمود القرين عفراء تعض ترى.
رنـــه :: اي وعلي مره انه سولفت بالجني عضتني بظهري، حتى اتوب، بــدور والله عضه وحده وتتوبج العمر كله خليها تعضج.
جــويريه :: ضحكنه وماسه تسوي چاي گالت
مــاسه ::انه من جنت صغيره طكيت البطه مالتها بالعصا موتتها وعضتني براسي والله منهدها كمت اذا اشوف البطوط بصفحة اعوفنها وامشي بغير صفحة.
بــدور :: لا انه من تعاركت وي رنـــه عضّتني بأيدي تدرين ماكو واحد ماعاضته، ذاك اليوم بعرسها وهـــب گال الله يذكرها بالخير عــفراء من جانت جاهل عضتني وشلعت وذره من رجلي.
جــويريه ::هههههههه
نضحك خنك بلا صوت وكل شوي مادين روسنه الهن، مــاسه ودتلهن الچاي مشينه كعدنه يمهن يسولفن ورغد كاعده بصف عــفراء عيني عليهن عفراء تسولف وي جده ولازمه ايد رغد تمسح عليها.
شويه وصعدنه فوك للغرفه وماسه نزلت حاجت عفراء گـــلبي يدك حيل لمن اجت فتحت الباب مبتسمه البنات طلعن وضلت بس هيه يمي مسحت وجهي بحيره كعدت يمي تسأل
-شلونج؟
باوعت الوجها ونزلن دموعي هزيت راسي مو زينه رفعت ردني اراويها الزراك من الضرب، وحجيت صوتي مخنوك.
جــويريه :: تعبـــت.
لزمت ايدي متحسره.
عــفراء:: شنو وصيتج انه جوري؟
-كلتي لوذي بسد قوي بس ماكو ماااكو قوي بيهم جدي حاكم الكل.
هزت راسها لا
-اكو اكو.
-تعبـــت عــفراء اقلها من جنت يم ابوي ما انضرب هيج
واطلع واطب وضامنه مدرستي، هناه اذا رفعت عيني بعين جدج يصيح ابطلج وعلى اقل شي يضربني.
رفعت اديها حاضنه وجهي بين جفوفها وهمست
-القوي اليحميج حواليج، انتِ الماتردين تشوفينه.
دنكت امسح بدموعي ساكته، اجت رغد صاحتلها عــفراء كرصت خدي تهمس
-مثل ما وصيتج.
حجتها وطلعت عافتني حايره ومتشتته بأفكاري.
“””””””””
ندى:: اباوع لوجهه مبتسمه وهو نايم، زفرت نفس بحسره وكعدت عدل خايفه من عصر عيونه بوجع ايده على بطنه
-ها وهـــب؟
حجيت بخوف فتح عينه وبس لمحني گدامه ابتسم متحسر
-يابعد روحه الوهب.
مسحت وجهي مرتبكه اتلافه اباوع لعيونه
-شبيك موجوع؟
-اممم.
-شسوي انطيك حبوب لو شلون نخابر على اخوك يجيك.
باوعتله گـــلبي يوجعني هز راسه لا ساكت مثل اليفكر، خله اصابعه على راسه وون
وهـــب ::راسي ذبحني من الوجع الا اخلي ايدي هناه يله ارتاح بس من ارفع ايدي بطّني توجعني.
تقربت يم راسه احجي بخوف وماببالي شي لزمت ايده بين اصابعي
-بله نزلها اني امرغلك، منين يوجعك مناه؟
-مممم
غمض عينه وانه مخليه اصابعي من الجهتين وأحركهن بشكل دائري
-ها وهـــب هيج؟
زفر نفس بحسره يهمس
-مممم، حتى وجع العمليه خف.
-ماتكدر تكعد شويه اشدلك راسك؟ يصير زين والله.
فتح عينه يباوعلي واني لازمه راسه ومدنكه اباوع لوجهه ابتسم ومد ايده لزم ايدي سحبها من راسه للحيته دك گـــلبي حيل وهو مخلي ايده فوك ايدي ويباوعلي مبتسم
-تشدينه بشالج؟
بلعت ريك هزيت راسي اي هز راسه مثلي وحجه بحماس
-يله.
عفته وكمت بسرعة اروح للغرفه صاح وراي
-ها وين.
دخلت للغرفه اخذت شال ثاني وطلعت يمه باوع الايدي ورفع حاجبه ما قابل
-شني تضحكين علي انا قصدت هذا العلا راسج.
وكفت لازمه الشال واباوعله ميلت راسي على صفحة منحرجه
-وهـــب!
مسح وجهه ورفع راسه من المخده
-يله تعاي شديه.
كعدت يمه طابكه الشال شديته على راسه ضابته
-ها مضبوب هواي ارخيه شويه؟
-لا لا زين.
حجاها ورجع تمدد مخلي ايده على بطنه يباوعلي سحب طرف الشال خلاه على خشمه شماه كزبر جسمي ضحك وهو يگول
-بواكه هذا عطري.
-مو انتَ عفّته بالغرفه مرات اخلي منه.
-اممم .
رجعت ميلت راسي ماعرف شحجي وياه
-وهـــب شبيك؟
ضحك
-من تميليين راسج على صفحة انا كلي أميلن.
حجاها وندك الباب وصوت مــاسه تهمس
-وهـــب إنه وامي وهـــب امي وراي.
كمت بسرعة دخلت للغرفة واباوعلهم من الشباك دخلت يمه مــاسه بأيدها صينية عشا وامه كعدت يمه تريده ياكل مايقبل كالها بعدين ضلوا شويه يمه وطلعوا صاح
-تعاي بطه.
طلعت يمه گال
-تعاي ساعديني اكعد.
تقربت يمه خليت مخاد يم الحايط ومديتله اديه اثنينهم كعدته، يكعد بصعوبه ينوجع، استقر ورفع القميص يباوع البطنه
-نوجعت؟
-اي
-لو اخوك جاي مكعدك اني شلعت كلبك.
ابتسم
وهـــب :: انا مرتاح حتى لو انوجع وينشلع گـــلبي راضي بكلشي يجي منج.
دنكت ساكته كل كلمه يحجيها تزيد دكات گـــلبي عفته وكمت للمطبخ اخذت من الاغراض الموجوده خاشوكه غسلتها ورجعت يمه لان شفت بالصينيه خاشوكه وحده
-تمد أيدك للصينية لو انطيك الصحن يمك؟
لزم ايد بأيد وغمض عينه بوجع
وهـــب ::ماكدر ارفع ايدي انوجع، كون مــاسه ضاله هناه توكلني هيه.
رفعتله حاجبي فتح تك عين وابتسم شلت الصحن وتقربت يمه اوكله شوي وگال
-كافي اكلي انتِ.
رجعت للصينيه لكيت مــاسه مخليه الخاشوكه الثانيه بالخبزة ضحكت وحجيت بحماس
-مــاسه شكد حبابه مخليتلي خاشوكه ثانيه بالخبزه واني عبالي مامخليتلي.
-مــاسه تشبهني كلش حبابه جنها انا.
-بس اخوك صــيهد يخوف.
سكت يباوعلي، اكلت شويه وشلت الاغراض للمطبخ، لورا العشا اجت مــاسه واخته الجبيرة يمه بقن ساعة وراحن انوجع حيل شرب حبوب ومافادن مكان العمليه يوجعه واني مكابلته حايره بس دموعي تنزل التفتلي ميت من الوجع
-عليمن تبجين.
مسحت دموعي محتاره
-اذا هلكد موجوع خل يأخذونك للمستشفى؟
هز راسه لا
-شويه واصير زين، سولفي وياي لهيني.
مسحت وجهي ادور سالفة كمت شغلت المبرده بالغرفه وفتحت باب الغرفه حتى الهوا يوصللنه جبت جرجف وكعدت مقابيله
-احجيلي انتَ عن اهلك عن قريتكم اعمامك.
-عندي ثلث أعمام وعمه وحده متوفيه.
-أعمامك كلهم هنا بالقريه.
هز راسه لا وحاول ينگلب حتى يصير مقابيلي ماكدر گال
-تعاي هنا صيري گدامي
كمت كعدت بصف فراشه يباوع الوجهي زفر نفس متحسر وكمل كلامه
وهـــب :: عمي شامل متوفي ابنه طــروادة تعرفينه حاجاج من ردنه نعقد
-اي، الله يرحمه شلون مات؟
-بالصيد أنتل.
-سوده عليّ.
-مم، وعمي خليل وعمي شاكر، شاكر موجود وعمي خليل لا.
-هم متوفي؟
-لا.
-وينه؟
-بـ ٢٠٠٦ طلع وبعد مارجع ماندري بيه ميت لو عايش، وراها زوجته عافت ولدها ورجعت الروسيا.
-اي، هو من جان شاب جدي طارده، طلع البلد عربي سافر غاد جاي وفد من روسيا وصايره بينه وبين وحده علاقه وتطورت وره ما تزوجها رد لهناه تصالح وي جدي وصار عدهم مــيثم وبريا، ومن اختفى عمي ماكو ثلاث أشهر مرته عافتهم وراحت.
-خطيه شكد قهر، وهسه همه عايشين وياكم؟
-اي بالقريه بس بيتهم وحدهم، امي تروح تنظفه وتخبز وتوديلهم وحتى طبخ تطبخلهم.
-يعني هسه عمك العايش بس شاكر.
-اي بس كون هوه الميت وعمي شامل ضال.
-ولج عمي شامل يختلف حنين ماكو بشر بحنيته، جان يلمنه جوه عباته كلنه ويكعد يسولفلنه قصص، ويعلمنه، كلنه بفضله ميزنه بين الحگ والباطل، انا لهسه اذكر من بالشتا نكعد يمه داير ماداير الصوبه
وكدامنه طاسات الروبه وهوه يحميلنه خبز على الصوبه يطينه ويحجيلنه قصص، سوالفه ماتنسي.
بس اويلي اذا عصب، شلون صــيهد مايشوف گدامه.
-والله من سوالفك تمنيت اني اعرفه وهم اكعد يمه عجبتني سالفة يلمنه بعباته من جنت طفلة جنت اشوف جهال هواي يمشون وي ابوهم ومتغطين وياه بالعبايه شكد تمنيتها ههههه.
ضحك يباوعلي وگال
-ترى انا يكولون علي نسخة شامل الله خلقني حبايه ومفشوگه من شامل، البس عبايه وتتغطين بيها وياي؟
فتحت عيني على وسعها خازرته ضحك
-اتشاقى وياج لا تخزين ترى ابوسهن.
-ووهب
-والله انا جاي اتعنف يمج هم مريض وهم انتِ كلساع تاخذين گـــلبي من تكولين وهـــب.
عفته وفتت للغرفه، گـــلبي يدك حيل وعركانه، حاولت ابتعد عنه وهو شوي شوي بدأ يتحسن، بأي فرصه يلكاها يحجي شي يخلي جسمي يرجف، اهله كل يوم يجون يمه، من شافني كمت ما انطي ردة فعل على كلامه واسوي نفسي ما سمعت شي كام يضوج ومايحجي شي.
رنـــه :: بالليل حسين وزهره ناموا، والولد بعدهم ماراجعين، فارشين بالغرفة عفراء تحجي وي منذر كاعده على فراشها وانه كتابي بأيدي وادرس، سدت التلفون وحاجتني.
عــفراء:: ليمت امتحانج؟
-بعد اسبوع، والله خايفه كاضه گـــلبي بأيدي
حجيتها وسمعنه باب الحوش انفتح وصوت عبود وطرواده دكوا باب الغرفه وطبوا، بأيد طــروادة علاكه.
طــروادة :: عبالي نمتن
عــفراء:: لا والله كاعين نسولف
عبود:: سهرانه رنـــه اليوم.
ضحكت كعدوا يمنه وطرواده انطاني العلاكه بيها تفاح
-اغسليهن وجيبيهن.
اخذتهن وركضت للمطبخ غسلتهم خليتهم بصحن وي سجينة ورجعت يمهم يسولفون كالتله عفراء
عــفراء:: داوم هاي السنه كليه.
طــروادة :: وين اكدر منين اجيبن وكت.
عــفراء:: كضيت عمرك تدرس سنه وتعوف سنة هاي سنة هالضاعت هيج ارجع هالسنه ادرس جا طلعت من السادس بذاك التعب حتى تضل هيج؟
ضحك طرواده وهو يگول
طــروادة :: هالسنه يردون يزرعون شلب،
-يااا، وكاعنه شلون.
طــروادة :: ازرع وياهم جا اذا عفتها تخرب يصير البزل عليها
عبود:: تتعب، بيك حيل طول اليوم تفتر بالگيعان انتَ العام زارعين حنطه نشل كلبك بيها اذا شلب شيصير بيك.
طــروادة :: جا شلون نعوف كاعنه تخرب؟
سكتت عفراء محتاره زراعة الشلب(الرز) تتعب حييل لازم طوّل الفترة هوه ينسگي وماينشف ابد ماينعاف ولا يوم يعل الگلب وهوه ميت من القهر لان لا ماعنده فلوس ولا يكدر يعوف الكيعان كالتله عفراء.
-منين تجيب فلوس ينرادلك هواي؟
-تدبر الله كريم أتداين على موسم الحصاد اردهن.
-الله يسهل خويه هاي هيه لا تفكر.
رنـــه :: هز راسه موافق وطلع من يمنه هو وعبود، عفراء يومين وراحت لعيالها وطرواده بدأ يشتغل بالگيعان ورجع لنفس التعب، وانه ملتهيه بين البيت وبين الامتحانات حسين وزهره امتحنوا كبلي وراهم بدت امتحاناتي انام من التسعه واكعد بـ٣ الفجر وي طــروادة هوه يطلع يكرب على البروده وآنه ادرس.
مــاسه :: ابوي لاول مره يوكف بوجهه جدي وما رضى يطرد صــيهد وجدي عاند مايرد الا يبوس راسي ويعتذر مني وصيهد قافل مايرضى يعتذر، ضل بالمعامل مايجي للقريه، امي تخابره تبجي طاك گلبها عليه، الحد يوم من الايام كبل أخر امتحان عدنه صاحتني گالت
-تعاي مــاسه، خابري صــيهد كليله امي فد مره بالفراش.
-يمه ويكضني مجذبه عليه وألله يموتني.
-مالج شغل خابريه وهل راح اتمدد انه ياهو يكله جذب.
اتصلت عليه وخلت التلفون بأيدي وبسرعة تمددت بفراشها تون فتح خط واجاني صوته بهدوء يحجي وبس كلت الو غير صوته ونتر
-هاااه.
-شلونك؟
-زين، انتِ شلونج، ليش كاضه التلفون؟
-ها مو هذا.
-اااي؟
-أمّي مريضه بالفراش
حجيتها ميته من الخوف وامي من يمها تحجي وتكلي
-كليله كليله عليك تمرضت تريد تشوفك.
صــيهد:: جا يمه سمعتج، مــاسه الجذابه اكضج.
-وعلي هيه كالتلي انه مالي شغل.
-وعلي الا اطيح حظج.
-تريد تشوفك والله صدك بس تبجي عليك حبوبي تعال ردّ للقريه وهـــب هم يريدك كبّل يومين الولد اخذوا فتحوا خياطاته.
-يله اليوم اجي.
حجاها وسد التلفون، وامي سوده علي ميته من القهر تريد تقنعه يعتذر من جدي بس كون يخليه يرد للقريه ويعوف المعامل، طلعت يم البنات للمطبخ كلمن تسويلها شغله وكتابها كدامها، كملنه وكعدنه نلف الدولمه كالت بــدور
بــدور:: حرامات ما سويناها ورغد هناه
مــاسه :: بس صــيهد راح يجي همزين.
حجيتها وندك الباب صوت وهـــب كامت جــويريه بسرعة غسلت ايدها ولفت حجابها زين طبت امي كالتلها
-ضلي كاعده يمه جا اخيوتج حتى لو طبوا.
رجعت كعدت بينه وامي فتحت الباب الوهب سلم وطب يحجي وي امي وهيه تبوس بيه كالها
-يمه مليت من كعدت البيت، اعتقيني بروح اهلج خليني اروحن ترى ســليم وبريا يوميه يطلعون بدوني يقهرون بيه.
-لا يمه لا ما تطلع وعلي يكون ازعل عليك لو طلعت بعدك ما طايب.
-وروح اهلج طبت.
يريد يلطم وامي قافله ماتخليه يطلع عافته وراحت حتى مايلح عليها اكثر، كامت بــدور حمتله الچاي يحجي ويانه وابد ما يعاين الجوري ولا حتى النه، كتله
-صــيهد اليوم يجي.
-خيولي ولا احاجيه شصار عليه اذا باس راس شعلان الخاطري ويجي يشوفني صوبني وعافني امداه وامده خوته.
بــدور :: الخاطر امي ما تنازل تريده يتنازل الخاطرك
وهـــب:: جا غير مصوووبني، ابو نجمة السلف.
مــاسه:: شني نجمة السلف.
سكت ورفع ايده يحذر
وهـــب :: والعباس اذا وحده جابت يمه طاري نجمة السلف ترى يكضجن يملص راسجن من جسمجن انا مالي شغل.
مــاسه :: هوه خل نتنفس يمه يله النوب نحجي بمدري شنو؟
اخذ استكان الچاي من بــدور يحجي
وهـــب::انتن يطبجن مرض جلبات وياه مابيجن حنيه لا ترحين يمه لا مره بعمرجن كتله خويه جوعان تريد شي، لا تضحكن وياه لا بيجن سالفه عبالك عدوجن شاردات منه.
عفت البأيدي ورفعت راسي اعاينله
-ترى هوه عصبي ويانه اسلوبه مو مثلك.
-شني عصبي جاي ياخذ راسج، انتن تفرقن كلجن حتى رغد، انا لو بمچان صــيهد واشوفجن تعاملن اخوي بطريقة وانا بطريقة ثانية الا بالحسين حتى ما اعاين بوجهجن بعد.
مــاسه :: نمرد گـــلبي احجي بحرگه وكوه كاضه دموعي
-انتَ شايف اسلوبه؟ ترى والله نحبه بس لان نخاف مبتعدين عنه، لا تحجي هيج والله حركت گـــلبي.
وهـــب :: مجذب؟ انتِ ما تنامين الا ارد للبيت وتشوفيني خاف جوعان، ومن صــيهد تشردين خاف يكلج سويلي اكل بالليل، انا تتلكني بضحكة وصيهد تتلكنه بوجهه كاتله الخوف، انا ضحكجن وياي شعلوه وصيهد ما يوم ضحكتن وياه.عبالك عدوجن مو اخوجن تكرهنه
بجيت اصيح مختنكه.
-لا تحجي هييج لا تحجيي، بالحسين اموتن عليه والعباس احبنه وعدي اعز من النفس بس ما اعارف شلون احجي وياه هوه مايتحمل وعصبي.
ضميت وجهي بأيدي ابجي محتركه حرك من حجي وهـــب سكت شويه وكال
وهـــب :: علمودجن انا، يوم سويلج صحن فواكه وروحن يمه سولفله على آلمدرسه سولفله شنو محتاجات شنو تردن، يوم روحن يمه كلله مشتاقيلك نريد نسولف وياك، شني يطردجن؟ يعصب لا والله يكيف انا ابصم بالعشرة يتمنى تتعاملن وياه نفس ما تتعاملن وياي.
علمود اذا انا متت ماتحسن ماعدجن اخو بعد
صاحت بــدور وهيه تبجي
بــدور :: ااااسم الله انتَ شبيك اليوم، يمممه تعاي الوهب يمه.
ضحك واجت امي تسأل شكو كمت اغسل وجهي بالسنك ساكته وامي تصيح عليه
-يا وهـــب شمالك وياهن.
وهـــب :: ههههه يمه اشاقيهن.
طردته امي من يمنه، وانه احس گـــلبي ممرود اخاف صدك انه الاسلوبي غلط مو صــيهد انه المقصرة وياه مو هوه،كملت الدولمه البنات صعدن وانه ضليت اشوي معلاك الجدي وجده
وي الصلاة طب صــيهد للمطبخ كل مره من بعيد اكله الله يساعدك هالمره عفت البأيدي ورحتله بسرعة شبگته ونزلن دموعي سكته مخليه راسي على صدره وهو من صدمته حتى ما شبگني بس يحجي بخوف
-ياهو وياج مــاسه شني؟
وخرت منه ساكته وامسح بعيوني اهز راسي ماكو شي وشفتي ترجف
-ياهو محاجيج؟ هاه ياهو وياج؟
-محد والله بس حيل اشتاقيتلك.
حجيتها شفايفي ترجف عكد حاجبه ابتسم حك شعره ورجع باوعلي ضحك مد ايده على راسي وهو يگول
-انا هم.
حجاها ومشه يريد يطب للهول واجته امي تبجي شابكه عليه وتعاتبه وهوه يبوس بأيدها كالتله
-بوس راس جدك وردلي.
-خيولي، انتِ ليش تفكرين بيه.
-فـــدوه اروحلك يمه
-انا الاروحلج فـــدوه يمه بس لا تكليلي بوس راسه اشوفنج وارد للمعامل ميخالف.
جرت اديه المشگگات خلتهن على وجها وبجت تتوسل
-يمه تعبك يهد حيلي صــيهد يمه ضل كدام عيني.
سكت مختنك، طب وهـــب شبك عليه يعاتبه گاله
-يابه بوس راسه وكله جدّي اعذرني شتخسر.
-ما ابوسن راسه ولا اوصله ولا اكله اعذرني لا وعلي اكله طاحظ الولد يوم الماهدوني وخلوني اكتلك.
امي غطت حلكها بالشيله تنعى وتبجي باس ايدها يتوسل بيها
-لا تسوين بيه هيج يمه تمردين گـــلبي يابعد گـــلبي.
-جا كوني ما هنت عليك حب راس جدك وفكني منه ماريدن افاركنك.
وهـــب :: صــيهد، الخاطر امي كوم.
مــاسه :: كام صــيهد غسل ومشه للهول هوه وامي ووهب، مشيت وراهم اعاين كالهم
صــيهد :: السلام عليكم.
ردوا ابوي وعمي وجده بس جدي رافع راسه ووجهه مايكصه السيف ابوي كام باس صــيهد وكاله
-بوس راس جدك بويه.
مشه صــيهد يمسح بوجهه باس جده وهيه تبوسه وتشمه لان حيل تحبه عافها مدنكه تمسح بدموعها وصار وره جدي وكف غماه باثنين اديه سكته وابوي خازره دنك حط ايده على راس جدي باس ايده وكاله
-اعذرني جدي شعلاان.
هز راسه جدي راضي كاله
شعلان:: معذور معذور بس كونك ما تعيدها وتبوكني.
صــيهد :: فلوسك هواي شعلان ما يأثر عليك حتى لو بكتك مية مليون.
شعلان:: اهاه ها وليد ابنك حتى جدي مايكلي عبالك صاحبه.
صــيهد :: اصغر بيك اسويلك واهس بالدنيآ.
ضحكوا وهوه من وره جدي كلساعه يغمه كاله ابوي
-اكعد بويه.
صــيهد:: لا اريدن اروح اشوف طــروادة، فلاليحكم تارسه الكيعان جا خليتوا الولد يساعدونه بگيعانه ؟
شعلان:: خيوولي هالنكس كتله اطني الكيعان وضل حالك حال الولد بكيعاني ما رضى يطبببه مررض، انا ما ارضى الولد يعاونونه غير افصم ظهرهم.
صــيهد :: خير ان شاءالله يله من رخصتكم انا رايح اكرب بمچانه، وهـــب شني ماصرت زين؟ حتى نعاون ابن عمك.
وهـــب :: هاليومين اصير توب.
هز راسه صــيهد موافق وجدي ضل ينافخ ويخزر بأبوي، اجه صــيهد للمطبخ يريد يطلع عاينتله
-مسويه دولمه وانتَ تحبها اكل يله تروح.
-شبعان ضميلي من ارد أكل.
ابتسمت اهز راسي خوش وهو طلع راح للمشتمل بدل وطلع يساعد طــروادة بكيعانه.
اجه يمي وهـــب صبيتله عشا بصينيه جراني الحضنه يعصر بوجهي
وهـــب :: الخايسه اعوج وجهج وعلي تزعل مني
دفعته اضــحك
-مازعلانه بس عوفني، روح الندى فكني.
اتلفت خازرني
-هسّه اكتلج
-ههههه شبيك ياهو يسمع، صدك شو اليوم بينت يوميه خاتل يمها.
تحسر يمسح بلحيته
-هيه بالغرفه وانا بالهول لا خاتل يمها ولا شي ناكل سوه تضل يمي شويه وترد للغرفه.
-امووتن واعرف شسالفتها وشلون جبتها هناه.
-صدك؟
-وعلي مرتي.
-ليمت تزوجتوا وشلون أهلي مايدرون.أنا عبالي هيج تحبها وخطفتها هناه.وتشافه من تكول مرتي
ضحك يحضر وياي بالصينيه حتى ياخذها ويروح يمها گال
-احبنها انا بس هيه ماتريدني.
حجاها بخنكه تمرد الگلب
-يمه وليش ما تريدك.
تحسر بقهر
وهـــب :: السالفه طويله بس اختصرها الج ضاله يمي حتى اسفرها الاختها للبنان دخلت عدي بس حتى اوصلها الاختها.
حجه واخذ الصينية طلع من يمي حيل مقهور، صبيت عشا الهم وصحت للبنات تعشينه بالمطبخ وي امي، وبس كملنه ركضنه الكتبنه لل١٠ تذكرت حجي وهـــب ونزلت سألت امي على صــيهد گالت رد بالمشتمل.
حميتله عشاه وصحت البدور وياي گالت جــويريه.
جــويريه:: مو تتأخرن.
بــدور :: تخافين يجيج القرين؟
جــويريه :: لا ههههه مــاسه اذا ضلت دولمه من تصعدن جيبن وياجن.
مــاسه :: ضحكت اهز راسي اي ونزلنه انه وبدور انه شايله الصينيه وبدور دولكة ماي طبينه للمشتمل بــدور كالت
بــدور :: خل اشرد انه خاف يكلي شلونج بالمدرسة.
-نجبي نجبي والله اطيح حظج امشي.
-يمه انه اخر امتحان شهري كبل اخر السنة ماخذه أربعين من ميه وين ام البنين كون مايجيب طاري المدرسه.
عيبت عليها وطبينه للهول ماكو دكينه باب الغرفه گال
-تعاي.
فتحت الباب بــدور وطبينه متمدد على الجربايه يعاين بتليفونه
نزله من شافنه ابتسمت وانه اكله
-جبتلك عشاك.
عاف التليفون ونزل من الجربايه وهو يگول
-عبالي نمتي، ماطاني گـــلبي، اگل الامي صبيلي.
كعد بالگاع وخليت الصينيه كدامه كعدنه على صفحة عاين البدور هستوه مد ايده للصحن كالها
-ست بــدور شنو اخبار المدرسه؟
وبدور انكتمت اكرص بيها اريدها تحجي ماكو عاف اللگمه من ايده يعاينلها كالتله
بــدور ::مييات.
-اكيد؟
-جا ما اجذب انه.
حجت ودنكت تطكطك باصابعها، مدنك ياكل واحنه مكابلينه وكاعدين اول مره نسويها وهو ياكل لگمه ويرفع راسه يعاينله مستغرب گال.
صــيهد:: شني بيجن شي.
سكت مدنك ما مرتاح كل شويه يرفع راسه يعاين النه شويه واستغفر كال
صــيهد:: جوعانات؟
اثنينا هزينا راسنا لا سكت كام غسل جريت بــدور من اذانها
-الجذابه ام الصفاره شلون تكليله ميات.
دفعتني تخزر بيه وطب صــيهد تحمحت اريد احجي شي مادري شحجي كتله
-عجبتك الدولمه؟
هز راسه اي وكعد على الجربايه مقابيلنه
-بالعافيه.
وكفت بسرعة
-بــدور ضلي هناه راح اجيب الچاي واجي.
عاينتلي بــدور واحس بيها تسب بيه، طلعت ركض جبت قوري الجاي واستكان وشكر واجيت يمه لكيته يكلها
صــيهد :: يادرس ماخذه بيه ميه؟
بــدور :: مو ميه كامله.
صــيهد :: جا شني مكطوم نصها؟
بــدور :: لا هيه ميه بس ناقصه شويه.
مــاسه :: رفعت استكان الجاي انطيته اله وهو خازر بــدور كتله
-صــيهد الف ايدك بلفاف مثل ذاك اليوم؟
فتح ايده عاين بيها ورجع عاينلي گال
-جج خيولن.
بــدور :: ليش، جا يلتهبن.
مــاسه :: كومي بــدور جيبي اللفاف والمعقم.
ركضت بــدور تجيبهن وانه اعاينله مبتسمه شرب اخر شي من الچاي نزل خلاه بالصينيه وصدمني من جراني منّ زندي وكفنّي كدامه وگال
صــيهد :: من الاخير شمسويات؟
-وام البنين ما مسوين شي.
خزرني بغضب ينتر
-ووولج تجذبين عليَّ؟
-لا والله لا ما مجذبه بس انه اكلك انه اكلك.
عاف ايدي ووخر من يمي يحجي
-أحجي يله.
-احنا مو زينات وياك علمود هيج انتَ عصبي ويانه لان مادايرين بالنه عليك مثل وهـــب، بس والقران والحسين عدنه انتَ عزيز مثلك مثل وهـــب ما افرق بينكم بس لان انتَ شويه عصبي مانحجي وياك لا تغلط علينه وتطكنه.
حجيت بغصه الدمعه بطرف رمشي سكت يعاينلي كعد على الجربايه وجر باكيت الجكاير يدخن
صــيهد::مو عصبي انا.
سكتت مسحت عيني گبل لا تنزل دمعتي طبت بــدور بأيدها الگطن واللفاف والمعقم وكفت بصفي من شافتنه مخنزر والجكاره بأيده، هستوني جاي اخذ الصينية ونطلع، وهو خله الجكاره بحكله وگال.
صــيهد:: مايوجعني هنه بس بعد انتن جبتن المعقم سونهن.
ابتسمت ومشينه كعدنه بصفه كل وحده بجهه وكل وحده كاضتلها أيد شويه وكال
-بس خل انفض الجكاره
عفت ايده خله الجكاره بين اصابعه وخرها من حلكه طكاها بالنفاضه تجددت جمرتها رجعها الحلكه ورجع أيده الأيدي عقمناهن ولفيناهن عاينلهن مبتسم
-شني مسوّي عمليه؟
بــدور :: حتى مايصير عليهن تراب ويلتهبن.
مد ايده كرص خشمها بين اصابعه الملفوفات ووكف مشه من يمي مد ايده على خدي وعبر للكنتور فتحه وطلع محفظته جاب منها فلوس ووكف كدامنه مد ايده البدور بيها خمسه وعشرين اخذتها منه ساكته واجه يمي مدلي ايده هم بيها خمسه وعشرين هزيت راسي لا
-ما اريد ما اجيت يمك ولا درت بالي عليك حتى تطيني فلوس انا اختك وهذا واجبي.
بــدور بسرعة حطت الخمسه وعشرين على الميز ركع كالتله
-انه هم نفس حجيها الحجته.
صــيهد :: اخذيها.
بــدور :: ماناخذ.
-ووولج.
بس صاح جريت الخمسه وعشرين من ايده وبدور بسرعة اخذت الخمسه وعشرين مالتها شلت الصينيه وطلعنه نركض ونضحك.
رجعنه ندرس وهمه آلولد التهوا بالزرع والكيعان كاموا حتى للبيت مايجون، لمن كضينه امتحانات روحنه طلعت كيفنه اول يوم على العطله وثاني يوم مليناها وحشه من المطبخ للغرفه ومن الغرفه للمطبخ ماكو شي نسويه.
وبدور مكضيتها علينه شگال الجن وشگال القرين لمن كضتها جــويريه وخنكتها بالمخده
جــويريه :: كافي خبلتيني كمت حتى بالامتحان اكله اذا انتَ موجود ساعدني.
بــدور :: ههههههه والعباس القرين موجود مو بكيفجن.
مــاسه :: وعلي هسه احمسج بنعال امي الثگيل اخليج تشوفيني قرين.
جــويريه ::ضحكت وكعدت عدل كعدت بــدور تريد تسولفلنه ونسكتها وماسه تكتلها من صدك بس هي ما تتأثر بس تضحك، عفتهن يباوعن تلفزون وإني افكر بكلام عفراء ابد ما راح من بالي.
ومن تجي الفكرة الراسي گـــلبي يدك بخوف منو القوي الالوذ بسده “صــيهد” يكدّر يحميني الحد ما أكمّل مدرسه يضل يدافعلي بس شلون شلون يضل يوكف بوجهه جدي علمودي.
كعدت على حيلي افكر درت الماسه اريد احاجيها اثنينهن نايمات، كمت طفيت التلفزون وطلعت من الغرفه نزلت جوه على اطراف اصابعي، بعدني على الدرج وسمعت باب المطبخ انفتح بسرعة خليت شالي على راسي وسمعت صوت صــيهد يحجي على كيف
-يمه، مــاسه.
دك گـــلبي بخوف كعدت على ثالث بايه من الدرج نزلت الشال من شعري على اجتافي وعدلت كذلتي، ضوه الحمام يخليني مبينه، طب للهول ووكف التفت للدرج شافني وفتح عينه خازرني، رفعت الشال بسرعة خليته على راسي گـــلبي يدددك بقوة.
نتر
-شعدددج كاعده.
سكتت مرتبكه ومتندمه على السويته وعلى الغايه اللي ببالي وكفت بسرعه وهو خازرني تقدم خطوه يحجي بغضب
-وولج.
درت وجهي وصعدت ركض ضميت روحـــي بفراشي أعض بأيدي اني مو هيج مو هيج ليش اتصرفت بهالطريقه، يارب سامحني يارب أغفر ذنبي، كلّ غايتي أريده يحميني اريده يدافعلي، اذا حبني ما راح يخلي احد يحاجيني.
احجي وي روحـــي ومتندمه ساعة افكاري الموزينه تسيطر علي وساعة الندم والخوف من رب العالمين يرجعني الحقيقتي جــويريه .
نمت وانس بوسط هوسه أفكآري الثاني يوم العصر ام صــيهد راحت الاهلها وكالت للبنات محد يجي اليوم الولد يباتون بالكيعان وي صحبانهم ، وجدادجن راحوا الفاتحه البغداد
ضلينه بس اني وماسه وبدور لعبنه وسوينه كليجه وتابعته فيلم بالهول ونضحك بصوت عالي، مابقى شي بنفسنه ماعده الجكاره شكد دورت بالبيت ردت بس وحده مالكيت بالليل كعدنه نسولف وسألتهن
-منو عدكم يدخن؟
بــدور :: گولي منو مايدخن، كلهم يدخنون عبالك عدهم سباق بالجكاير.
مــاسه:: عاينن اليوم ولا واحد من الولد يجي، خل نروح البيت خالي خليل نلعب بليستيشن وورق شتكولن؟
بــدور :: ااي اي صار شكد ما رايحين.
جــويريه :: سكتت اباوعلهن تحمحمت ورجعت اسأل مــاسه
-يعني كلش ولا واحد من الولد يجي؟
-اي مسوين لمه وي جماعتهم بالكيعان الليله يضلون للصبح يشربون جاي ويسولفون.
دنكت ساكته شويه وصعدنه للغرفة كالن يله خل نروح البيت خليل
-اني مابيه حيل اريد انام.
مــاسه :: ليش والله ونسه نلعب ونضحك حتى طوبه نلعب واغلب بــدور هههه.
تمددت بفراشي وغمضت عيني، وهنه شويه وراحن، بس تأكدت منهن طلعن دك گـــلبي حيل وكمت نزلت جوه، جده قافله غرفتها، خليت حجاب على راسي وطلعت كل خطوه امشيها گـــلبي يدك اسرع، بلعت ريك خايفه واني اباوع المشتمل صــيهد
مشيتله رجلي ترجف دخلت بسرعة وسديت الباب وراي زفرت نفس بخوف اتلفتت اباوع ومشيت مأمنه محد موجود افتريت بالبيت وفتحت باب الغرفه على كيف مديت رأسي تأكدت محد بيها دخلت بهدوء اباوع بيها، مــاسه مرتبتها
تقربت يم الميز اباوع بيه فتحت الجرارة الاوله ومالكيت الاريده
افتريت أدور لكيت بالجراره اللي يم الجربايه تكة جكاير وجداديح اربعة اخذتلي باكيت وجداحة كعدت على الجربايه فتحت الباكيت وورثت جكاره جريت منها نفس وزفرته براحه
ضحكت من تذكرت صديقاتي الجانن يدرن بيه وهنه يصيحلي جوري جكارة، كملت الجكاره وخليت الباكيت والجداحه بصدري وكفت نكثت المكان الجنت كاعده بيه وباوعت للغرفه كلشي مثل ماهو ما مخربطه اي شي .
مشيت هستوني فاتحه باب الغرفه وسمعت باب المشتمل انفتح شهكت واني المح صــيهد دخل فاتحه عيني كلها وافتر بالغرفة ميته من الخوف وجسمي يرجف ركضت اريد اختل بأي مكان
من خوفي فتحت باب الكنتور ودخلت بيه كعدت ومديت اصبعي بالمكان اليصير بيه قفل مشلوع وباقي فارغ سحبت الباب بس سديته انفتح باب الغرفه، واني صوت دكات گـــلبي عالي وأرجف خايفه.
رفعت عيني اباوع من مكان القفل وادعي يارب يروح يارب ما اعيدها بعد ما اعيدها التوبه،
لمحته شغل المبرده نزع التشيرت والفانيله وكعد كدامها فاتح تليفونه كام وكف كدام المرايه غمضت عيني وسديت حلكي وخشمي من أجتني عطسه من ريحة العطور البالملابس اليمي
لمن راحت رجعت اعاين شهكت من شفته واكف كدام الكنتور الاني بيه وبعدني ما مستوعبه قربه فتح الكنتور فتحت عينيّ كلها وهو يباوعلي ولازم الكنتور مناه ومناه
مديت ايدي الترجف اريد اوخر ايده واشرد دفعني خازرني ولزم الباب بقوه
-شتسوين هناه.
حجيتها وسديت حلكي ارجف كل جسمي يهتز هز راسه
-شعدج هنااه، تشربين جكاير؟
هزيت راسي اي اطرافي بردت من الخوف، رفعت نفسي اريد اوكف دفعني الداخل الكنتور وتقرب وكف بباب الكنتور كلش.
-انا مو كتلج تبطلين جكاير؟
-ما اعيدها.
-انجبييي.
دنكت الغصه تصعد وتنزل ببلعومي وهو وأكف كدامي مثل الصنم، رفعت راسي أريد ابجي واحاجيه لكيته مبتسم وبس باوعتله رجع خازرني
-اروح.
هز راسه لا
-بعد ما اعيدها
بلعت ريك ونزلت عيني من وجهه الصدره مد ايده فوكاي جرّ دشداشه لبسها وهو وأكفّ كدامي دنك المستوي دنكت عيني والزم بايدي الترجف. همس يم اذني
-طلعي البايگته.
رفعت راسي خازرته.
-مابايكه.
-جذابه
وكفت اريد اطلع من الكنتور وهو يدفعني ويرجعني المكاني، ابتعد وطلعت وكف كدام الباب.
-طلعي الباكيته.
-ما بگتتتت.
حجيتها وبجيت، وخر من يم الباب مشيت اريد اطلع صاح وراي.
-گولي الماسة خل تسويلي چاي انه جايها.
مشيت للبيت ارجف مــاسه وبدور ببيت خليل ومايجن هسه اقل شي ساعتين يله يرجعن ، التفتت يمشي وراي اجاي للبيت مشيت ارجف.
وهـــب :: عفت الولد ملتمين اخذت بريا وطلعنه صــيهد حن علي اطاني الدراجة، مشينه افترينه اعوض الايام الكعدتهن بالبيت گال
بريا:: عليك العباس مو تسوي بيه مقلب اليوم انا تعبان.
ضحكت
-لا وعلي.
-اكلك سلطان ليش ما يحجي وي صــيهد شبيهم؟
-والله ما ادري سألت صــيهد يكول مالك شغل غلست.
افترينه نسولف وكعدنه بكهوه عاينلي متحسر
-شبيك ولك.
-قهرني مرتضى اليوم.
-ليش؟
بريا:: كدام الفلح واجه يصيح علينه انا وميثم ولد الروسيه ماخلصتوا، مــيثم تخبل وهد عليه ومرتضى يصيح اتشاقه وياكم مثل ما صــيهد يشاقيكم مني تتبززون ومن صــيهد ترضون.
وهـــب :: هذا هم يمسلت ومايعارف يحجي احنه صدك نكولها بس بيناتنا مو كدام احد.
سكت من صدك مقهور، ضلينه لل ١٢ لمن خابرنه مــيثم يحجي كال ردوا يله، صعد وراي وانا اسوق لازم نمشي بطريق چول يله نوصل للقريه واحنه نمشي اشوفن زلم ثلاثة واكفين وكاضين لايتات ضحكت گال
بريا:: ولك مسلبچيه هذول.
-اكلت تبن خايس عبالكم دوم تعبر علي مقالبكم، ســليم وياهو وياه قنعتومن هالمره يشارككم؟
وكفت الدراجه دفعته نزلته وهو يصيح مو مقلب ولك مو مقلب فريت الدراجة مشيت بغير درب اضــحك لمن وصّلت للقريه تلاكه وياي ســليم راد من الكيعان توه.
رابط التقديم على الوظائف التعليمية في السعودية متاح رسميًا من وزارة التعليم
لا احترمه.. تعليق مثير من ممدوح عباس – مصربوست
اليوم.. نظر محاكمة 21 متهما بخلية ”مجموعات العمل النوعى” | الحوادث
مواقيت الصلاة اليوم في القاهرة والإسكندرية والمحافظات وموعد صلاة العيد الاثنين
أفضل 10 تطبيقات قرآن كريم لعام 2025: دليل شامل للمسلمين في رمضان لتلاوة وتعلم القرآن
رسميًا.. الأهلي السعودي يحسم مستقبل رون غورلي – مصربوست
بن غفير يقتحم الحرم الإبراهيمي ويؤدي طقوسًا مثيرة للجدل داخل باحاته!
