رواية سجين وروح الفصل السابع 7 بقلم الكاتبة آية

وانا نمشي في الصفحة جاني الرد من امل .. فتحت الرسالة وكان مكتوب فيها علامات استفهام بس

روح >> ممكن نحكو ؟؟
امل >> من انتي ؟؟
روح >> اسمي روح
امل >> ايوه يعني شن تعرفيني عشان نحكو
روح >> انا المحامية وبنحكي معاك بخصوص صقر

من بعد ما قلتلها الكلمة هذي وقعدت امل تكتب وتمسح وانا معش كتبت شي قعدت بس نراجي في ردها

طولت امل ما ردت وكنت حاطه عالمسجات ونراجي في ردها وهي كل شوية تكتبت وتمسح

روح >> وبعدين ؟؟
امل >> صقر طلع من الحبس ؟؟؟؟؟
روح>> حا يطلع قريب
امل >> شن تبي مني ؟
روح >> بنسألك كم سؤال
امل >> اسفه ماعنديش اجابه الاسألتك وبعدين شن دخل علاقتي ب صقر بالقضية ؟
روح >> كل شي له دخل ، وكوني انا المحاميه ف انا اللي مفروض نطرح الاسأله
امل >> محاميه علي روحك لو سمحتي معش ادزيلي

شافت روح للمسج وماردتش وكانت متوقعة انه امل اديرلها بلوك ! بس ما دارتلهش
فعرفت روح انه في ان فالموضوع و امل حا ترد ادزلها مره ثانيه !

//
//

عند غسان في المستشفي
كان قاعد تحت يراجي في غفران لعند تروح … شويه وجاه مسج من غفران

غفران >> خالو جا وماما كملت تغذيه نحن طالعين انت وين ؟؟

مسكت التلفون ورديت عليها ” حاتلقيني في سيارتي “

طلعت ركبت فالسيارة وقعدت نشوفلهم من بعيد وهما طالعين

خال غفران >> من اللي جابكن هنا ؟؟

غفران>> ولد حلال لقيناه في طريقنا

خالها>> وانتي اي حد يقولك هيا تعدي معاه ؟ صغيره انتي ؟؟ واحد لقيتيه قدام حبس انظر فمن كان يزور

غفران >> شن ندير نسيب امي تموت ؟؟؟نرن عليك ما رديتش عليا وانت عارفه امتي تكمل الزيارة

خالها >> زيدي زيدي علي صوتك ؟؟ زيدي

سكتت غفران بقلة حيله و بحتت قدامها لقت غسان فالسيارة يشوفلهم …. روحت للحوش غيرت دبشها واطمنت علي امها وخلتها ترقد و مسكت تلفونها لقت مكالمتين من غسان رنت عليه

غسان>> وينك
غفران>> كنت مع ماما
غسان >> مادوالكش شي خالك
غفران >> لالا عادي
غسان >> تمام باهي … انا فالشغل نروح ونكلمك
غفران >> نراجي فيك
غسان ضحك >> تمام تشاو

//
//

عنـد روح ، كان يوم عطله وفاليوم هضا كان حايجي باتها يجيبلهم مصروف ويشوفهم وياخذ وجه
ومش ديما يجي مره كل بعد وين ووين يجي عشان يبين وجه

كانت روح قاعده فالصالة مع يارا اختها ويهدرزن

يارا >> شن دايره فالقضية ؟
روح >> قاعده هضك اليوم مشيت لهل المتهم
يارا>> باهي ؟؟
روح >> اسرار بين المحامي وموكله ما ينقالنش 
رندة “اخت روح الكبيرة” >> مطبقه القانون بحذافيره
روح >> طبعا حالفه القسم القانوني مش ساهل نخالفه ! وبعدين غير القسم فيه عقوبه لو طلعن اسرار اي موكل من موكليني برا

علي خشت باتهن

مصطفي “بات روح ” >> ياقعادك وانتي اطبقي فالقانون ! انتي كان جيتي ذكر خيرلك

تعقدت روح من كلام باتها وما ردتش عليه ، صبن سلمن علي بوهن وامهن ما بتش تطلع

مصطفي >> امكن مش قاعده ولا شنو ؟
يارا >> فالدار
مصطفي >> اها  باه ديريلي قهوة
روح كانت بتصبي بآي طريقة وجود باتها معاها في نفس المكان يضايق فيها >> تو نصبي انا
مصطفي >> لا انتي نبيك خليك

صبت يارا ورنده صبت ادير في رضاعه الولدها لي يعيط

روح >> خير ان شاء الله ؟؟
مصطفي >> جايينك عرب
روح >> عرب شن يبو فيا ؟

مصطفي >> غير فكيني من اسلوب الاستجواب هضا انا بوك مش موكل عندك !

روح سكتت وما بتش اتناقش لانه النقاش مع باتها كله هباء منثور

مصطفي >> عرب كويسين و الراجل بشغله وولد ناس ، بس ما يبيش وحده تشتغل

روح >> وعليش جايني مدام ما يبيش وحده تشتغل ؟؟

مصطفي >> و الشغل محصله منه حاجه؟؟؟؟ جايبتلي الكلام مغير مولعه سيارتك و ادوري من مكان المكان ؟؟ مره ماشيه للحبوس ومره ماشيه للمركز و مره تروحي متأخر ومره تطلعي بدري ؟
شن تحسابي روحك انتي

روح صوتها علا>> ماكانش هضا كلامك لما تخرجت ! كنت حا اطير من الفرحه و كنت مش مصدق امتي نشتغل ؟ شن تغير توا ! ولا ست الحسن عبتلك راسك علينا زي كل مره ؟

ضربها مصطفي كف علي وجها جن البنات يجارن وامها طلعت من الدار

امها >> شن فيه كنكم ؟؟؟؟؟
مصطفي >> هذي تربايتك تلاطع في بوها بدون حشم ، يكون في علمك كان نبيك تسيبي الشغل نخليك تسيبيه غصبا عنك

روح بدون ما تنزل ولا دمعه >> اه ومن بيصرف علي الحوش ؟ انت ! ولا مراتك

جا مصطفي بيضرب روح و قعدن البنات يعيطن ورنده تمسك فيه و روح خذتها امها وخششتها لدار

طلع باتهن وهو يسب و يعيط

روح اول ما طلع انهارت تبكي >> طول عمره اناني ما يفكرش الا في روحه بس يبي كل شي علي مزاجه شغلنا و قرايتنا و حتي رجالتنا ! لعند امتي بيدخل في حياتي !

يارا >> خلاص يا روح وانتي عارفه راسك كيف مسكر مستحيل يقدر عليك

رندة>> باتك طول عمره هكي لا عريس لاعرسان و موضوع شغلك طول عمره يحكي فيه ويسكت لانه عارف ما حدش قادر علي مصاريف الحوش غيرك ف مستحيل يوقفك اصلا

روح >> ما نحسش فيه ، بس ما يقعدش كل شويه جاي ومتعب نفسيتي

امها >> عدي اغسلي وجك سلم بنتي وماتعدليش عليه طول عمره يهزب ويعيط ، غير الحمدلله ماكان حد من خوالك هنا را تعاركو زي كل مره

روح >> ياريت خالو عمر قاعد را ردله الكف
يارا > طح سعدك 

خشت روح للحمام غسلت وجها وقعمزت حذا هلها شويه و خشت تحاول ترقد عشان بكرا موعد الزيارة
بس كملت الليل كله تبكي لعند عيونها وجعنها

//
//

في الحبس

كنت قاعد انا والشباب نتغدو بعدها ردينا للزنزانه وجا شاهين قالي فيه زيارة عرفتها روح

بدر >> زيارات خاصه وحركات
انا >> اطلعلي من صوتك
بدر >> شن درتللّي 
انا >> عدي يا تافه

طلعت مع شاهين ووصلت النفس مكان الزيارة لي فاتت ولقيت روح مقعمزه وعاطيتني بظهرها ، برمت وجيت قدامها سحبت الكرسي وقعمزت

انا >> السلام عليكم
روح بدون ما ترفع راسها>> كيف حالك
انا بأستغراب >> كويس ، انتي كنك ؟
روح >> ولا حاجه تعبانه شويه
انا >> وليش جيتي ؟
يارا >> الشغل شغل

وكانت مطبسه راسها و تلعب بالاوراق وما تبيش تبحت فيا

انا >> لما يكون الشغل علي حساب نفسك بلاش منه

روح >> الشغل هو اللي يطلع فيا من اللي انا فيه ف خلينا نحكو فالمهم ! وين طقينا المره اللي فاتت؟

انا سكتت ما بيتش نجاوب ، وخرت الكرسي ومسكت الاوراق وصبت قعدت تبرم و تحكي معايا

روح >> اه كنت قاعد مع الشباب ورنت عليك امل

انا >> ايوه

روح >> اوكي كمل

//
//

قبل ثلاث سنين

قعدنا مكسدين فالصقع رن تلفوني وكانت امل تباعدت بنرد

علي >> جاي تهدرز معانا ولا معاها
انا ضحكت>> المدام عاد ما نقدرش

ركبت فسيارة و رديت عليها

امل >> الو
انا >> مش رقدتي انتي
امل >> مش عارفه رقدت شويه ونضت
انا >> كنك تحسي ف حاجه
امل>> لالا يا روحي بس متوترة من الامتحانات
انا >> انتي قدها ماتخافيش كل سنة اديري فطروح وتنجحي
امل>> هههههههه ، وين قاعد
انا >> طلعت للشباب
امل>> صقر شن قلنا نحن ! ساد انك تمسك فالليل ريحني عليك وبعدين مش علي اساس بترقد
انا >> شويه ومروح كنت نعسان طار النوم
امل>> لالا توا تروح ! و الشغل هضا كله انا مش خاش راسي
انا >> الله غالب ما لقيتش غيره ! ونحط في حد جهدي كله فيه عشان من ؟ ماهو عشانك
امل >> سيب و دور اي شغل ثاني ، عندك تقرير انت ان عندك ضيق فالتنفس وماتقدرش تمسك دور اي شي تاني انا راضية
انا >> امل صكريلنا عالموضوع خلاص مروح توا
امل >> ديما تسكت فيا ومش معبر كلامي تمام

//
//

روح >> كمل ليش سكتت

صبيت و مشيت شورها

روح >> شن فيه ؟
انا >> طول ما انا نحكي وانتي مش مركزه
روح >> لا مركزه تهيالك بس
انا >> لاء ، كنتي لما نحكي في قصة امل بذات تركزي تركيز غير هكي !

روح طبست راسها وكانت فعلا تعبانه نفسيا ومعنويا ومش مركزة

انا >> لعند امتي حا تقعدي تمثلي انك قوية و انك مش محتاجه الحد يكون معاك ؟؟؟ لعند امتي وانتي تقسي علي روحك عشان ما تبينيش ضعفك وتباني بصورة المحامية القوية !و تجي علي حساب نفسك وحياتك

روح بتوتر من الكلام و بعصبية >> ما نمثلش انا هضا طبعي وهذي انا ما طلبتش منك توقف معايا ولا تعرف ظروفي انا محاميتك وانا اللي مفروض نوقف معاك مش العكس

قربت منها وكانت روح مصبية جنب الباب حطيت يدي اليمين عالباب و اليد اليسار عالساس وفالنص روح
كنت اطول منها منزل راسي عليها وهيه مرفعة راسها بتحدي وتبحت فيا بس كان واضح فعيونها الربكة و الخوف

انا >> احكي كنك سكتي ؟؟
روح بصوت واطي >> صقر بعد

نزلت راسي بزياده وقربت منها وهنا روح معش قدرت دفتني مسكت يديها بالقوة

روح >> شن تبي مني انت
انا >> كل خير
روح >> كيف يعني ؟؟
انا ضحكت>> نوضحلك ؟
روح>> يا سخيف والله نعيط نلم عليك الحبس كله

زدت نزلت راسي لرقبتها و روح معش سمعت الا صوت نفسها ، حتي يديها ارتخين طلقت يديها و حطيت يديا عالساس ومافيش من روح ولا اي مقاومه

ثواني ونحن هكي لعند روح فطنت الروحها دفتني بكل قوتها

روح >> حيوااان حيوان
انا ضحكت>> عرفتي انك محتاجه حد يكون معاك

بحتت فيا وماقدرتش تحكي ، حطت يدها علي رقبتها و دقت عالباب … فتح الشرطي لباب طلعت روح وجا كلبشني و شالني للزنزانه

//
//

عند رُوح !

من اول ما طلعت من صقر وانا مش مستوعبه اللي صار ، اساسا كيف خليته يقرب مني ؟
فعلا انا ضعيفه … مانقدرش ننكر الشي هضا
بس ماحدش كان يعرف الكل واخذ عليا صورة المحاميه القويه اللي لبسها وشكلها و اللي واللي واللي … مسكت قضايا مع اكبر صياع وماقدرش حد فيهم يهوبلي شمعني صقر ؟؟

كنت نسوق ومش عارفه نرد للمكتب ولا نروح للحوش علي رنت سارة صاحبتي

روح >> الو
سارة > وينك يا همي من مبدري نرن
روح >> سوري كان عندي موعد وتوا كيف كملت
سارة >> باهي تعالي كسدي عندي مكسده بكل
روح >> حوش هلك ولا حوشك ؟
سارة >> لا رديت حوشي
روح >> ح تقعدي مهزبه طول عمرك نكلم ماما و نجيك
سارة >> تمام 

صكرت روح من سارة و كانت محتاجه انها تطلع وتهدرز وتنسى صقر والقضية وباتها و حياتها كلها

//
//

عند صقر

بعد طلعت روح من عندي رديت للزنزانه وانا سارح ومش مركز مع شي

محمد >> ردينا للسرحان
انا >> مستحيل الواحد يفكر بينه وبين روحه
بدر >> فيه فرق بين التفكير و السرحان
انا >> سوا نفكر سوا سرحان هكي هكي نفكري في هكي قاعدين في حبس مش ف مول
بدر يضحك >> اهو فصلتك هذي تأكدلي ان الي نفكر فيه صح

محمد >> غير شن تحكو فهموني ؟

انا >> تعبان هضا الحبسه مأثره عالمخ
بدر >> لا والله الا مصحصح 
انا >> اطلع من راسي
بدر >> مش من صوتي يعني

طلقت فيه المخده

انا >> المره هذي المخده المره الجايه نصبيلك
بدر >> تمام تمام 

طلع بدر للتلفزون ومحمد رقد و طارق ماكانش باين …. وقعدت انا كالعاده نفكر في تفاصيل حياتي اللي كانت من ٣ سنين ، صراع مع روحي ومع حياتي القديمة … كنت كل ما نحصل فرصة اي حد يساعدني نرفض فيها ! كنت حاس اللي انا فيه هضا مني انا و اليوم هضا بتفاصيله كان مش حا يكون لو ما طلعتش !
كنت مصمم نطلع عشان هلي ! بس بعد ما اختفى كل شي اختفو هلي وتوفى باتي و راحت امل معش عندي اي سبب نطلع عشانه !
حا نطلع شن ندير ؟؟؟ المن نمشي !؟
و كيف حا نعيش ؟

“أعِنّي عَليَّ فَإنِّي عَدوِّي، وأنت عَليمٌ بِكُلِّ الخَفايا.”

//
//

عند روح

مشت الصاحبتها سارة في حوشها و قعدن يهدرزن و حاولت روح تطلع من مود هلها والقضية وكل شي

سارة >> باهي اهو حكيتلك قصتي احكيلي انتي توا كنه وجك !!

روح >> تعبانه شويه ومانرقدش كويس بس

سارة>> بسبب القضية ولا فيه حاجة ثانيه ؟؟
روح >> القضية وصاحب القضية وهلي وحياتي وكل شي

سارة >> احكيلي شن صاير ؟؟

روح >> مافيش حاجه كبيره بس كلها جت مع بعضها النبي فكيني من السيرة هذي جايتك نغير في جوي

سارة >> باهي تعالي معايا للمطبخ نديرو قهرة

روح >> هي

صبن روح وسارة للمطبخ و قعدن يهدرزن و نست روح اللي هيه فيه وشربت قهوة وشويه وطلعت روحت للحوش

//
//

ثاني يوم

كانت روح فالمكتب تشتغل علي كم حاجه وحده ثانيه غير قضية صقر ،والتلفون معلوق علي نت المكتب !
فطنت الصوت رسالة علماسنجر
مسكت التلفون وفتحت الرسالة وكانت من امل

” لو تبي تحكي معايا حاتلقيني نراجي فيك الساعه ٤ في الكافي وياريت ادزيلي رقمك”
ودزتلها العنوان

بحتت روح للساعة لقتها قريب ٣ ونص والكافي مش بعيد علي مكان المكتب كملت الاوراق اللي في يدها و طلعت شور العنوان الي فالرسالة

وصلت الساعه 4:05 بزبط هي خشت ورن تلفونها رقم غريب عرفت انها امل

امل >> جايه ولا مش جايه ؟؟
روح >> انا فالكافي
امل>> انا فوق

ركبت روح واول ما خشت شيرتلها امل

روح >> خير
امل >> خير

وكانت معاها بنت ثانيه

امل >> هذي اختي
روح >> اوكي

صبت اخت امل في طاولة بروحها تباعدت عليهن وقعدن روح وامل في طاولة بروحهن

روح>> تفضلي؟
امل >> انتي اللي حابه تحكي نسمع فيك
روح >> اللي جايبني سؤال واحد
امل >> اللي هوا ؟
روح >>ليش تخليتي علي صقر ؟
امل >> والسؤال هضا شن ح يفيدك في القضية ؟
روح >> بغض النظر حا يفيدني او لا بس حايريح صقر
امل >> تشوفي فيه ؟
روح >> انا محاميته ف اكيد بنشوفه
امل >> هو كويس ؟؟

روح نفذ صبرها >> لو كان شاغلك ماكنتيش تخليتي عليه في اكثر وقت كان هو محتاجك فيه

امل بعصبية>> شن كنتي تراجي مني ؟؟؟؟ بنت في اول شبابها حبت واحد طلع مجرم و خش للحبس و خذا مؤبد ؟ شن كنتي تبي مني اندير نرجاه لعند يموت ونبكي علي قبره ؟؟؟ ولا نرجى بلكي يعطوه عفو عام ؟؟ انتي لو مكاني شن كنتي حا ديري فهميني ؟؟

روح >> ماكنتش تخليت عليه لو راجيته العمر كله ! و تعرفي انه صقر قالي بالحرف الواحد ، انه لو امل قعدتلي ووثقت فيا ماكانش هامني حد !

امل >> انا ظروفي مستحيل تفهميهن
روح>> بعدين لحظة من قالك انه صقر واخذ مؤبد ؟
امل >> عرفت وخلاص !
روح >> بس صقر مش واخذ مؤبد ؟
امل بصدمه >> كيف يعني ؟؟
روح >> صقر مش واخذ مؤبد ، وياريت تختصري وتحكيلي اللي صار من بعد اول سنه من خشت صقر للحبس

امل >> حانحكيلك بس بشرط

روح >> احكى

امل >> انا ماليش دخل بقضية صقر لا من قريب ولا من بعيد والي حانحكيه لكي مش حايأثر في تحقيقك ولا في قضيتك بس حانحكيلك عشان توصلي الصقر انه ماليش ذنب وانه تمنيت ما صارش معاه هكي كنت راجيته

روح >> تمام

بدت امل تحكي من بعد ما صقر خش للحبس و كيف كانت منهارة
كانت امل تحكي و الوجع باين في كلامها كان واضح انها تحب صقر ! بس كانت اضعف من انها تكمل معاه تحت الظروف اللي هوا فيهن …

وهي تحكيلي حسيت بنغزه في قلبي مافهمتهش شنو ولا كان لها اي تفسير …

‏التعمُق بتفاصيلي سيؤذي قلبك دائمًا ^

//
//

كملـت روح كلامها مع امل و جت اخت امل قالتلها انها ما تقدرش اطول اكثر من هكي و كانت هي الي جايبتها

امل >> قولي الصقر انا اسفه … بس ماكنتش نبي نآذي نفسي

سكتت روح وماكانتش حاتوصل الرسالة الصقر عشان عارفه انه هو اللي حا يتآذي من الكلام هضا
حكتلي امل كلام مهم … هي كانت ما تحسابش انه حا يأثر فالقضية بس الواضح انه القضية حاتاخذ مجرى ثاني …

طلعت امل و دفعت الحساب و رديت للمكتب
عاودت كل الحسابات من جديد

//
//

في المكتب كان غسان جاي ويدور في روح علي خشتها

روح >> اهلا
غسان >> وين كنتي ندور عليك
روح >> كنت ندير في حاجه ضروريه تعال للمكتب
غسان >> شن جو القضية
روح >> اهو قاعده هالكتني
غسان >> ربي يعاون
روح >> مامشيتش الصقر ؟
غسان >> لالا ليا زيارتين ما مشيتلش
روح >> وليش
غسان >> نحوس فالشغل والله معش نفضى
روح >> غسان ماتخذلش صقر مالش حتي الا انت لا هل ولا اصحاب ولا حتي امل
غسان >> اوبا حكيتو في موضوع امل ؟
روح >> ياما حكينا 
غسان >> باه اسمعي انا جايك في موضوع ثاني
روح بأستغراب >> احكي
غسان >> نبيك تسألي علي واحد اسمه بدر نبي نعرف شن قضيته
روح >> بدر اللي مع صقر ؟
غسان انصدم >> كيف عرفتي ؟
روح >> اي شي يخص صقر نعرفه ف اكيد بنعرف من معاه فزنزانه
غسان >> لا محاميه عالمزبوط
روح >> عيب المهم قولي عليش تسأل عالراجل بتناسبهم ؟
غسان>> ممكن ليش لا  بس انا ما سألتش في خشته للحبس ف نبي نعرف قبل ما ندير شي

روح ما فهمتش >> خلاص تمام حانسألك عليه ونقولك

غسان >> اصليه ، هي ما تبي شي

روح >> سلامتك 

طلع غسان وروح تضحك عليه وعلي طيارته
رفعت التلفون و سألت كم حد لعند وصلت لبدر وعرفت اللي سألها عليه غسان

صكرت التلفون وردت تشتغل عالقضية

//
//

مرن كم يوم مافيش فيهن اي جديد

غسان يحكي مع غفران شبه يومي و روح قالت له ان بدر قضيته مش كبيره و عنده سوابق بس كلهن حاجات بسيطة

و صقر معش شاف روح من بعد التوتر لي صار في اخر زيارة ، ومواعيد الزيارة مش مترتبات

//
//

يوم الزيارة

جت روح وقعدت تستنى فيا في نفس المكان ، شوية و خشيت فكلي الشرطي الكلبشات و قعدت

روح >> كيف حالك
انا >> كويس
روح >> مش ناقصك شي هنا ؟
انا >> سلامتك
روح >> اوكي نبدو ؟؟

انا >> تمام

روح بتوتر واضح عليها مسكت الاوراق ولبست نظاراتها ، كانت تعبر علي توترها بالنظارات
كل ما حاجه تمشي مش كيف ما هي مخططتلها او نجيبو سيرة اي شي ما يعجبهش تسلح النظارات او تلبسهن او تقعد تلعب بيهن وانا حفظت الحركات هذينا من اول مره نشوفها فيها !

انا >> ليش متوتره

بحتت فيا >> من قالك

اانا >> عيونك و رعشة يدك ونظارتك

روح تنهدت>> صقر بحت خلينا محامي ومتهم الله يربحك ، بجد مش ناقصه نقعد نفكر في حاجات ثانيه غير القضية و غير حياتي الخاصه

انا >> بس ما فيش حاجه ثانيه غير انك انتي محاميه وانا متهم ! شن متهيآلك ؟؟

روح رفعت حاجبها وملامح النرفزه علي وجهها >> ولا حاجه  قلت نقولك بس …
المهم كنت تحكي مع امل وبعدين صكرت شن درت بعدها ؟

انا >> بس قبل ما ننزل شفت سيارة مدرسه و علي مطبس يحكي مع اللي يسوق ،نزلت شورهم و نبي نقوللهم اني مروح

//
//

قبل ثلاث سنين