//
//
ايام العرس ، كنت لاهي ..واتفقت مع هلي ومع روح انه مش حاندير عرس روح تقبلت الموضوع بس حسيت انها اضايقت ، لكن انا مش حانقدر نفرح ولا يهدالي بال الا لما تنتهي القضية كلها و انتريح من كل شي ونفهم حياتي وين ماشية !
//
//
قرينا الفاتحه وكان شعور صقر عادي
مش حاس ب اي شي
وعند روح برضو كانت حاسه بشعور عادي
كانو هما الاثنين مش فاضيين انه يجيهم احساس اصلا كل حد لاهي في حياته روح مشغوله فالشغل و صقر مش منتبه غير انه روح ما تآذيش روحها بسببه .
//
//
لما نقريت الفاتحه مسكت تلفوني و تباعدت شويه ورنيت علي روح اللي كانت لامه صحباتها و هلها ودايرين حفلة بسيطة
روح >> الو
انا>> مبروك
روح بربكة>> الله يبارك فيك ، صقر خلاص بجد نحن قرينا فاتحه
انا >> غسان
غسان >> نعم
انا>> قرينا فاتحه نحن توا صح ؟؟
غسان >> ان شاءالله عقل اه شن فيه ؟ 
انا >> نتأكد بس
روح>> ياسااامط 
انا>> شن بنديرلك المهم نحكو بعدين يا روحي بنشوف الشباب
روح >> اوكي باي
صكرنا وكل حد لهى فاللي عنده ، روح فالضيوف اللي عندها وانا فالشباب اللي معايا
//
//
مرن الكم يوم الي باقيات عالعرس وانا قاعده نحرق ما بين القضية ومابين العرس … تفكيري كان منهار من جميع النواحي ، خايفه علي صقر والخطوه اللي خذيتها .. خايفه يخذلني وانا حاطه كل املي فيه !خايفه يجي اليوم اللي تنتهي فيه القضية و كل حد يمشي في حاله …
//
//
يوم الزفة فالصبح
روح >> انا طالعه شوية وحانجي
يارا >> الكوافيره موعدك معاها بعد ساعة وين ماشيه ؟
روح >> بنشري حاجه ضروريه
يارا >> تو نطلع انا مع خالو عمر نجيبولك
روح >> يارا ماتركبيش عليا
يارا حستها متوتره >> براحتك براحتك
طلعت من الحوش و مشت شور حوش هل هيثم ، كانت لازم ادير الخطوه هذي قبل العرس عشان اتريح
وصلت و دقت و فتح الباب راجل باين عليه في متوسط عمره
روح >>انا المحاميه روح مصطفي ، ممكن نحكي مع خو هيثم ” عوض”
عوض >> وصلتي تفضلي ، بس بتحكي معايا بخصوص شنو ؟
روح >> بخصوص قضية هيثم
عوض >> القضية بينك وبين المحكمه
روح >> ممكن نحكو
عوض>> الحوش ما فيش حد
روح >> خلينا قدام الباب مش حانخش انا بروحي مستعجلة
عوض>> شويه بس
خش جوا وانا قعدت واقفة قدام الباب دقيقتين وطلع
عوض >> شن تبي تعرفي
روح >> ما وصلتوش الاي شي بخصوص هيثم ؟
عوض >> الشرطه ادور عليه مش نحن .
روح>> نعرف بس اكيد انتو هله ومش كل شي مسيبينه للشرطه
عوض >> اكيد بس ما وصلنش الشي ، اسآلي موكلك
روح >> ونسآله ليش ؟؟
عوض >> هو اللي دار كل شي خويا بعد ما خش للحبس بسبب ضربته الهيثم كان منفصل ويهزب
وهذي ردة فعله
روح >> كيف بيخطف هيثم وهو فالحبس مش سحر
عوض >> اكيد مش سحر بس يقدر يدز وحدين
روح >> وليش متآكد للدرجه هذي
عوض >> لانه خويا ما عندش عداوات لدرجة انهم يآذوه
روح >> ممكن نحكي مع والدتك؟
عوض >> قتلك ما فيش حد فالحوش
ونحن نحكو جا واحد درس السيارة قدام الحوش و نزل
عوض >> هضا معز
روح >> اه انت اللي كنت ماسك كل اجراءات القضية
معز>> تفضلي
روح >> يزيد فضلك
قعدت نسأل في معز و عوض و كانو هما الاثنين عادي نفس الكلام ما فيش جديد ، كملت كلامي و ركبت فالسيارة لقيت قريب عشرين مكالمه من يارا ورندة و خالي و كلهم
دزيت اليارا رسالة اني ماشية للكوافيره بروحي ومانبيش حد معايا و قفلت تلفوني ومشيت
//
//
“صقر “
نضت فالصبح و كنت نحس فيه يوم عادي ولا كأني عريس لعند جا غسان قدام وجي
غسان >> احلى عريس
انا >> بنبدو عاد
غسان >> نعطيك معلومات ولا عندك
انا>> لا بارك الله فيك وفرهن الروحك
غسان >> غير اسمعني بس
انا>> ماتسكنليش في راسي اه
غسان>> دور وين تلبس
انا >> تي بدله هيه نلبس حتي فالحوش
غسان >> عرسك راه مش حفلة تخرج
انا >> ماعندكش حاجه اديرها ؟ 
غسان >> لالا قاعدلك اليوم ومفضيلك الحوش
انا >> عليك حصلة سودا
طلعت انا وغسان ننهو في شوية حاجات وكان اغلب تفكيري ان يارب ما نظلمهش معايا ، انه قرار زواجها بيا هي شايفه انه هو فيه خير لها عشان شايفه فيا اني انا الشخص المناسب لها الفتره هذي وانا كل تفكيري اني ما نآذيهش طول الفتره هذي بس
//
//
روح
كنت فالصالون ، والوليه اتمكيجلي وانا في عالم ثاني ولا نندري علي حاجه ما بحتش في مكياجي ولا شكلي ، نفكر وكل تفكيري قانوني
ونحلل في كلام عوض ومعز وكان خاطري نمشي للمكتب نطرح الاوراق ونقعمز نكسد عليهن
فتحت تلفوني علي طول رن وكانت سارة
انا >> الو
سارة >> ياحيوانه عليش تسكير التلفون سكر حلوقك
انا >> شن تبي ياكلبه
سارة>> جايتك جايبه غدا معايا
انا>> تعالي باه بعدك جيعانه بكل
سكرت من ساره وقعدت نراجي فيها شويه و جتني ، كلينا مع بعضا و قعدنا نهدرزو و كملت مكياج وجا خالو عمر روحت لبست و كنا دايرين كل حاجه في حوشنا ماكانش في حد غير العيله انا صقر طلبنا انه يكون يوم للعيله بس
.
.
.
لبس صقر عند غسان وكان مكلم اصحابه و غسان برضو مكلم اصحابه و دارو زفة لعند حوش هل روح ، خش صقر و خذا روح وطلع
فاللحظة هذي صقر وروح كيف فطنو انه الموضوع جدي
لما خش صقر و شاف روح قدامه ولما روح شافت الصقر خاش و يبي ياخذها من حوش هلها ! فطنو انه الموضوع جدي وان الفاس طاح فالراس
طلع صقر وواخذ روح في يده عطاه غسان مفتاح السيارة وبحت فيه
غسان >> مبروك يا الرفقه
انا >> الله يبارك فيك
غسان >> تبي اي حاجه كلمني واعي راه
انا >> مغير ارقد نعمبو رفقتك بكل
ركبت فالسيارة و مشينا شور الحوش ، كان الحوش اللي مأجره مش بعيد من حوش هلي .. بس الطريق مرت كأنه ساعه مش عشر دقايق
انا >> ليش هاديه وين لسان المحاميه
روح >> راح
انا >> معقوله
روح >> والله
انا >> تو ينطلق لقدام 
روح >> كيف يعني
انا ضحكت
وصلنا عند الحوش و خشيت انا قبلها وهي ورايا
انا >> الحوش اثاثه جديد ، بس لو في حاجه مش عاجبتك نغيروها عادي
روح >> لالا مش ضروري حتي هكي كويس
خشت روح للحمام وانا سلحت الجاكه و خشيت للحمام لاخر دوشت و طلعت بالمنشف لقيت روح طالعه من الحمام بحتت فيا و برمت وجها عالمرايه
خذيت دبشي و طلعت من حذاها لبست و قعمزت فالصاله ولعت التلفزون
غيرت روح دبشها وطلعت جت قعمزت حذايا
انا >> دازين عشا زاه
روح >> ماعنديش نيه في ولا حاجه كول انت
انا >> لالا تعشيت عند غسان جابو الشباب
روح >> معناها خليه فالمايكرويڤ بلكي تجوع بعدين
انا ضحكت
روح >> ليش تضحك
انا >> شي
روح >> تفكييييرك حيوان
انا >> فهمتي معناها حتي انتي تفكيرك خيال
تعقدت من كلامي وجت بتصبي مسكت يدها
انا >> قعمزي انا مش متهم توا راه
روح>> متهم
انا >> لا راجلك
قعمزت وبحتت فيا
روح >> صقر انت مصدق ان نحن اجوزنا نحس في روحي نحلم ؟
انا>> انا مصدق بس تبيني نخليك تصدقي
روح >> كيف
انا >> متأكده ؟
روح >> اوهوووو علينا بلا قلة ادب
قربت منها و جيت عند رقبتها
انا >> متأكده نبطل ؟؟
روح كانت بتصبي بس مش قادره تصبي وخرت زاد قرب
انا >> مش حا نديرلك شي بس عندي طلب واحد
روح >> شنو ؟؟
انا>>ترقدي ف حضني اليوم بحتت روح فيا وجت فحضني بدون ما تحكي شي
//
//
عالفجر ناضت روح من نومها بحتت لقت صقر جنبها ، خشت للحمام وطلعت ادور في تلفونها
لقاته مطوح فالصاله خذاته حطاته فالشحن
وخشت شربت اميه و طلعت سمعت صوت مسج ، قربت من التلفون و لقت المسج من امل
” هضا عليش جايه تشوفي فيا يا حضرة المحاميه ؟؟؟
جايه علي اساس متعاطفة معايا وبقصتي و تحسني في صورة صقر قدامي بعدها مشيتي خذيتيه !!
بس انتي تعرفي كويس انه صقر مش حا يحبك ولا حايفكر مجرد التفكير ان يحبك ، حطيها في راسك كويس بكل وماتنسيش كلامي .
قريت روح المسج علي طلعتي من الدار
انا >>مالقيتكش جنبي وين مشيتي
روح بحتت فيا بنظره عمري ما ننساها ولا حانفهمها ، نظرة عتاب علي حزن علي كل شي
قربت مني و مدتلي التلفون و خشت وخبطت باب الدار
قريت الرسالة ، و عفاريت يتنططن قدام وجي لما شفت الاسم و اللي مكتوب خبطت التلفون عالطاوله وخشيت عليها
انا >> شنو الرسالة هذي
روح خشت فالسرير وببرود >> اقراها
انا >> قريتها قصدي هذي شن تبي بزبط ؟؟؟ مش متجوزه مش عندها راجل وحوش عليش القطاف
روح >> صقر بينك وبينها مالش دخل ، تحبك الله غالب
انا فصلت و جيت حذاها صبيتها من السرير >> كيف يعني ؟؟ مادخلكش ؟؟
روح تحاول تمسك اعصابها >> انا قتلك من الاول بعد يكمل الي بينا دير الي تبي اديره تجوز امل تجوز غيرها انت حر
انا >> هكي هي ؟؟
روح سكتت وغمضت عيونها و مش قادره تمسك دموعها ، برمت وجها وخشت في سريرها وغطت وجها
//
//
عند غسان ، بعد كملت حوست العرس رن علي غفران
غفران >> كملت حوسة عرس صاحبك
غسان >> اه الحمدلله
غفران >> هكي يعني فايتني بكل لكي كم يوم
غسان >> الله غاالب ياعيوني
غفران >> رايفة عليك
غسان >> شنو شنو ؟؟
غفران >>رايفة ع ل ي ك
غسان >> يناعليا وخلاص
غفران >> بطل
غسان >> خطر عليا را اختفيت من زمان
غفران>>حي عليك بعدها
غسان >> اوبا كلام جديد
غفران>> غسان انا معش نقدر نقعد ولا ثانيه بدونك ، انت كانك حاجه دزها ليا ربي … كنت خايفه فالاول عشان ماكنتش عارفتك ولا نعرف نيتك ، بس انت مافيش منك …ربي يخليك ليا ويقدرني نردلك اللي اديرلي فيه كله
غسان >> بعد الكلام هضا مانبيش شي انا خلاص
غفران >> انحبك
غسان>> لا حيعلمك بكل انتي ليش ما قلتيش الكلام هضا وانا حذاك هضك اليوم را عرفت نرد عليك
غفران >> بلا قلة ادب
غسان >> مقبولة منك ونموت فيك راه
//
//
عندي انا وروح
نضت ثاني يوم لقيت روح قاعده فالصالة ، وطارحه اوراقها و تكتب
انا >> صباح الخير
روح بدون ما تبحت >> صباح النور
انا >> امتي جبتيهن الاوراق
روح >> دزيتهن مع يارا هضك اليوم لما جت تحطلي في دبشي
انا >> وبتشتغلي ؟؟
روح>> ماعنديش ما ندير
انا قعمزت جنبها >> ديريلي قهوة ممكن
روح >> واتيه وساخنه من شويه طفيت عليها
انا >> باه ممكن تبحتي فيا لما نحكي
روح سيبت الاوراق وبحتت فيا >> نعم
انا >> قصة امل طلعيها من راسك بكل
روح >> مطلعتها يا صقر
انا >> عيونك ما يقولنش هكي
روح >> مالكش دعوه بعيوني
انا >> لا ليا
روح >> تمام حانطلعه من راسي
انا >> امل ما تعنيليش شي ! حتي لو مش انتي في حياتي ماكنتش حانرد الامل ولا حانبحت في وجها
روح >> تحكي من جدك يا صقر ولا تضحك عليا بالكلمتين هذينا
انا >> اكيد ما نضحكش عليك يا روح
روح >> اسفه
انا >> عادي توا تجيبيلي القهوه
روح صبت >> حاضر
صبت جابت القهوة وقعمزت جنبي و قعدنا نحكو عالقضية و كنت طول ماهي تشرحلي وتحكي وانا سرحان فيها
روح >> وترتني
انا >> ماهو الله غالب
روح >> بنبدو
انا >> لا خلاص سكتت نطلعو نتغدو برا ؟
روح >> عادي نتكو علي هلك ؟؟
انا >> ليش
روح>> ماتعرفتش عليهم كويس كل شي جا بسرعه بسرعه
انا >> خلاص تمام
//
//
طلعنا تغدينا برا و بعدها تكينا علي هلي
فاطمه >> ياخيه كيف حالك
روح>> الحمدلله
انا >> فاطمه خفي عالبنت
فاطمه >> ماقلنا شي 
سلمت روح وانا طلعت قدام الحوش مع منذر وجاني غسان
خشت فاطمه بدير قهوة وخشيت معاها
فاطمه >> قعمزي عيب ماتجيش
روح >>تي عادي شن فيها
فاطمه >> باهي احكيلي شنجو صقر معاكي
روح>> ههههه كويس
فاطمه >> عارفه من اول يوم شفتكم فيه مع بعضكم حسيت انكم البعضكم
روح انحرجت >> والله
فاطمه >> والله باين في عيونكم انتو الاثنين
روح >> بس وقتها كنا مرتبكين بكل وصقر دوبه طالع من حبس كيف انتبهتي
فاطمه >> هههههههههه عيب عليك لقطتها عالطاير
روح >>فاطمه عادي نسآلك علي حاجه
حطت فاطمه بكرج القهوة >> شنو ؟؟
روح >> كيف كانت علاقة امل ب صقر
فاطمه فهمت علي روح >>اممم مانكذبش عليكي كانو كيف اي اثنين يحبو بعضهم مش حانقولك لا انها مش كويسه بالعكس كانت بنت عاديه و صقر كان يحبها
روح ارتبكت وفاطمه فطنت الكلامها
فاطمه >> شوفي ياروح صقر خويا لما يحب يحب ولما اطير نيته من واحد مستحيل يرده في حياته مهما طار ونزل … ف لو يبي امل مستحيل كان يخطى خطوة زي هذي معاكي ، مستحيل صقر خويا يعشمك معاه ويرخي بيك مهما كان اللي بينك وبينه فات فيه وعطاك كلمة ف اطمني وبعدين انتي اصلا تهبلي وين بيلقي وحده كيفك
روح >> شكرا ياخيه علي كلامك
خش صقر علينا و قعد يهدرز معانا طلعنا شربنا قهوة مع بعضنا و روحنا
//
//
مر اسبوع الاجازة وكان لازم نرد الشغلي عشان موعد الجلسة ماقبل الاخيره قرب و لازم نحاول نوصل الاي دليل جديد في صالحي
انا >> لازم مشية الشغل هذي
روح >> بنبدو عاد
انا >> باه شعرك و العطر
روح >> تي اي عطر بطل مش قوي
انا قربت منها >> لا اهو قوي
روح >> ماهو انت لاصق فيا
انا قربت منها اخرى >> معش تحطيه
روح >> المره الجايه بس المره هذي خلاص لبست ودرت
انا >> باه عطيني بوسه
روح دفاته >> مش طبيعي انت عالصبح
ضحكت و مشيت وراها
روح >> هيا طولت
انا >> سكنان هيا نازل
نزلت انا وروح وصلتها ومشيت شور المحل عند غسان
//
//
روح
خشيت للمكتب و طلعت الاوراق وعلي طول بديت نشوف في اقوال معز صاحب هيثم القديمة
وبرضو اقوال عوض ، قعدت نقلب فالاوراق من هنا وهنا … كملت الاوراق و كتبت الحاجات فالملف الجديد
وبعدين طلعت ورقة الرسمة اللي راسمتها الصقر و بديت نرسم منها …
ميلان يحمي لاعبه من الإغراءات ويجدد عقده
يالا تعالوا شوفوا… مدرب برشلونة غاضب بسبب تغيير موعد مباراة بلد الوليد المفاجئ
رسائل غاضبة من الجماهير لإدارة ليفربول بسبب محمد صلاح
وظائف في لبنان براتب 500 دولار: فرصة ذهبية لعمال المخبوزات والزراعة – قدّم الآن!
دعاء فجر اليوم السابع والعشرين من رمضان: اللهم عفو كريم فاعف عنا
تغطية مؤتمر سلوت قبل مباراة ليفربول وساوثهامبتون في الدوري الإنجليزي الممتاز
