رواية خيانة عهد كامله وحصريه بقلم جمانة السعيدي

اني فاتن مواليد ٨٠ اسكن احدا محافضات الجنوب من اسره بسيطه متكونه من اثنيين ولد واثنيين بنات الولد همه الكبار والبنات الزغار اني ازغر وحده

موصفاتي حنطاويه طولي ١٦٣ شعري سرح واسود جسمي متناسق

احلى شي بيه عيوني عسلي وكبار ورموشي اثخان

وطبعي كلش خجوله ومسالمه وما احب المشاكل

تكدرون تكول جبانه واصدك بكلشي

يمكن لان احنه من عائله بسيطه والكل يصلي ويصوم

كبرت واني ابد ماسامعه احد يغلط اويسب او يفشر بعائلتنا

جنت اتفاجى من حجي بعض البنات بلمدرسه

واتعجب شلون يحجن هيج

جمانه السعيدي

اني ما اذكر ابوي لان مات واني عمري اربع سنوات جان رجال بسيط

صايم مصلي ويشتغل عامل وكوه العيشه دابره

من توفه امي ابتلت بعيشتنا جان اخوي اكبر واحد هاشم عمرا ١٣سنه والثاني ناظم عمرا ١٠ واختي سوسن عمرها ٧

واني ٤ سنوات

الحياة جانت ابد مو سهله على امي

عندي عمام اثنيين لكن ضروفهم الماديه صعبه

واحد عنده عشر جهال والثاني ثمانيه

من مات ابوي خافو يتقربون منا وتوكع المسوليه عليهم

ماجانو يجونه بس بلمناسبات

تعبت امي علينا حيل لحد ماكبرو اخواني

وثنينهم اتخرجو من الصناعه

الجبير فتح محل بلسوك مال حبوب وبقوليات وحنطه وشعير

والثاني فتح محل تصليح سيارات

قررت امي ازوج الجبير هاشم وخطبتله وحده من اقاربنا من بعيد بنيه حلوه وحبابه

كانت بنيه شاطره وربت بيت

عرس هاشم كان الفرحه الاولى الي تدخل بيتنا من بعد وفاة بابا بثمن سنوووات

جمانه السعيدي

شايله شغل البيت كله وزينه ويانه كلنا وتحملة اخوي وعصبيته

وراها بسنتين طلب اخوي الثاني يزوج

خطبناله ابنيه كلش حلوه

بلشكل لكن قبيحه بلفعل

غبيه ونحيسه وصاحبة مشاكل ماكدرنا نكمل وياها

اخذها وعزل بيها بيت وحدها

بعرس هذا اخوي الزغير ابن عمي الجبير شاف اختي الاكبر مني

طبعا هو ماشايفه قبل لان همه مايجونه بس بلمناسبات

اتخبل عليها

هي صحيح كلش حلوه بيضه وعيونها كبار وكلشي بيها حلو

ذبح نفسه عليها كلساع يدز احد يخطبها

واخوي يرفض طلبه

هو مبطل ثالث متوسط ويشتغل مصلح دراجات

وهي تدرس سادس اعدادي مللنا كلساع يخطب

بعدين نها عليها ووكف حالها شكد جانت تجي ناس تخطبها

وهو يهد عليهم ويفلش الخطبه

جمانه السعيدي

ازوجو اخوانه الازغر منه اثنيينهم وهو قافل عليها

اخوي طلب منه مهر غالي حتى يبطل مع ذالك جمع المهر واجه خطبها وجاب مشيه عجيبه الشوارع انسدت من السيارات

استحه اخوي من الناس الي اجت واضطر ينطيه

كمل كلشي بشهر واحد واخذها

بقينا بلبيت اني وامي واخوي الجبير ومرته

اخوي صار عندا ولد اثنيين

نحبهم ومتعلقين بيهم على حب اخوي وطيبة مرته

بلسادس اعدادي امي حيل تمرضت وتغيرت بين عليها تعب السنيين

اخذنها الاحسن دكتور بغداد

جان اسمه وليد الخيال

وحولنا للمستشفى مالته واجرينا الفحوصات اللازمه

طلع عدها سرطان المثانه وقرر الها عمليه بسرعه

كنما بوقته نتسابق ويه الزمن

الصدمه دمرتنه

كنا متأملين اطيب وتصير زينه

بعنا العدنا والماعدنا حتى نعالجه

وفعلا دفعنا اتعاب العمليه واستئصلو الورم وقررولها ثمن جرعات كيمياوي بمدينة الطب بغداد

امي اخذة اربع جرع وبطلت جانت الجرع عليها قويه

وكلما انكلها ناخذج للجرعه تكول اني صرت زينه مابيه شي

نجحت من السادس ونقبلت كلية قانون بغداد

جنت فرحانه وخايفه

خايفه عالم جديد

جهزت نفسي جبب وحجابات واخذت وياي اكل ورحت للقسم ورتبت اغراضي وتعرفت على البنات وياي

اثنيين كلش حبابات

هنه واصلات قبلي

داومت اول فتره كلش اخاف اكعد بلقاعه طول اليوم وما احجي ويه الولد ابد

اصلا ما ارفع راسي اشوفهم استحي

اشوف بس احذيتهم

جمانه السعيدي

بعدين عود اطورت اشويه كمت اطلع من القاعه اشويه وارجع

كلها اتسميني المعقده

اكو ولد من منطقتنا جان يروح ويرجع وياي للكليه واني ما اعرفه ابد

لحد ما اجت امه يوم الامي

تكلها ستار بس يحجي بفاتن

يكول شكد شايف بنات بس مثلها ما شايف ابد شنو هذا الثكل شني هاي الاخلاق

رحمله والديها على هاي التربيه

اهلي يسئلوني تعرفي

لاولله ولاشايفته ابد

مره راد يتحرش بيه

صعدنا سوا رايحين للكليه ودفع كروتي

واني ماقبلت كلت للولد رجعها

اني ما اقبل احد يدفع كروتي

ورجعتها اله بس ولله خطيه غير فشل فشله من يومها ابد ما حاول يحجي وياي ابد

بلمرحله الثالثه كليه امي انتكست حالتها حيل

بين بلفحوصات المرض راجع منتشر بجسمها وبعد مايكدرون يسيطرون علي وبلعطله مالت اخير السنه

امي توفت

اني حيل انهاريت ونقهرت

لان هي جانت اكثر من ام هي صديقتي وامي واهلي واختي وكلشي اليه بهاي الدنيه

للحكايه بقيه